ئەمڕۆ چوارشەممە ٢٩ـی٧ـی٢٠٥، بەڕێز مەسعود بارزانی سەرۆکی هەرێمی کوردستان لە سەلاحەدین پێشوازیی لە خاتوو لینداڵ ساچس باڵیۆزی ئوسترڵیا لە عێراق کرد.

لە دیدارەكەدا باڵیۆزی ئوستراڵیا لە عێراق سوپاسی سەرۆک بارزانی کرد بۆ دیدارەکە و ڕایگەیاند کە من ئەرکەکەم لە عێراق کۆتایی دێت و بۆ ئەوە هاتووم ماڵئاواییتان لێ بکەم، من چوار ساڵە لە عێراقم و لەم چوار ساڵەدا ڕەوشی زۆر خراپم بینیوە، بەڵا دەرفەتی ئەوەشم هەبوو کە کوردستانی جوان ببینم. باڵیۆزی ئوستراڵیا سوپاسگوزاریی خۆی و وڵاتەکەشی پێشکەشی سەرۆک بارزانی و گەل و حکوومەتی هەرێمی کوردستان کرد بۆ هاوکارییان لەگەڵ نوێنەرایەتی و ئەو هاووڵاتییانەی ئوستراڵیا کە لە هەرێمی کوردستان دەژین.

باڵیۆزی ئوستراڵیا جەختیشی کردەوە کە وڵاتەکەی وەک بەشێک لە هاوپەیمانێتیی نێودەوڵەتیی دژی داعش، هەست بە مەترسییەکانی تیرۆر دەکات و لە هاوکارییەکانی بۆ هەرێمی کوردستان بەردەوام دەبێت و هەماهەنگی و پاڵپشتیی لەگەڵ دۆستەکانی و بەتایبەت هەریمی کوردستان پەرە پێ دەدات. سوپاسی هەرێمی کوردستانیشی کرد کە ئەو ژمارە زۆرەی ئاوارە و لێقەوماوانیان حەواندۆتەوە و ڕایگەیاند کە وڵاتەکەی ڕێز و پێزانینی زۆری بۆ ئەو ڕۆڵە مرۆییەی کوردستان هەیە و لەچوارچێوەی کارەکانی ڕێکخراوی نەتەوە یەکگرتووەکانیشدا هەوڵ دەدات هاوکاریی زیاتر بۆ بەهاناوەچوونی ئاوارەکان تەرخان بکات.

هەر لە دیدارەکەدا باڵیۆزی ئوستراڵیا ڕایگەیاند: ساڵێک بەر لە ئێستا ڕەوشێکی زۆر خراپ هەبوو، خۆشحاڵم کە پێشمەرگە توانی ئازایانە بەرگریی بکات و هەڕەشەی تیرۆریستان لەسەر هەرێم نەهێڵێت.

باڵیۆزی ئوستراڵیا نیگەرانیی خۆیشی لە ڕەوشی خراپی ناوخۆی عێراق و پەرەسەندنی ناکۆکییەکان دەربڕی و هیوای خواست ئەو هەوڵانەی بۆ ئاشتەوایی هەیە سەربگرێت.

بەرانبەردا سەرۆك بارزانی وێڕای بەخێرهێنان، هیوای سەرکەوتنیشی لە کاری نوێیدا بۆ باڵیۆزی ئوستراڵیا لە عێراق خواست، سوپاسی وڵاتەکەشی کرد بۆ بەشدارییان لە شەڕ دژی تیرۆریستانی داعش.

سەرۆک بارزانی ڕایگەیاند: ڕاستە ساڵێکی سەختمان بەڕێ کرد، ئەو شەڕە بەسەر ئێمەدا سەپێندرا و بەدرێژایی مێژوو گەلی ئێمە دەستپێشخەری شەڕ نەبووە و هەمووجارێ بەسەریدا سەپێندراوە، بەڵام جێی شانازییمانە کە پێشمەرگەی کوردستان توانییان ئەفسانەی داعش تێکبشکێنن.

سەرۆک بارزانی جەختی کردەوە کە داعش هەڕەشەیە لەسەر هەموو مرۆڤایەتی و لەناوبردنیشی ئەرکی هاوبەشی هەمووانە و پێویستە نەک هەر لە ڕووی سەربازی بەڵکوو لە ڕووی سیاسی و فیکری و ئابوورییشەوە شەڕی ئەو تیرۆریستانە بکرێت.

سەرۆک بارزانی هیوای خواست کێشە ناوخۆییەکانی عێراقیش بە نیازپاکی چارەسەر بکرێن.

سەبارەت بە بەشدارییکردنی تورکیا لەشەڕی دژی داعش و گرژییەکانی ئێستای نێوان تورکیا و PKK سەرۆک بارزانی ڕایگەیاند کە بێ گومان هاتنی تورکیا بۆ ناو هاوپەیمانیی دژی داعش کاریگەریی ئیجابی دەبێت. سەرۆک بارزانی نیگەرانیی خۆی لە پەرەسەندنی گرژییەكان نیشان دا و تەئکیدی کردەوە کە پێویستە هەموو لایەک بگەڕێنەوە بۆ پرۆسەی ئاشتی و بە پێویستیشی زانی تەركیزی گشت لایەك لەسەر ڕووبەڕووبوونەوە و لەناوبردنی تیرۆریستانی داعش بێت کە دوژمنی هاوبەشی هەمووانە.

باسکردنی بارودۆخی مەیدانیی بەرەكانی ڕووبەڕووبوونەوەی تیرۆریستان و ڕەوشی سیاسی و ئەمنیی عێراق و ناوچەکە تەوەرەێکی تری دیدارەکە بوو.

ئێوارەی ڕۆژی سێشەممە 28ـی 7ـی 2015 فرانك ڤالتر شتاینمایێر وەزیری دەرەوەی ئەڵمانیا لەڕێی تەلەفۆنەوە پەیوەندی بە بەڕێز مەسعود بارزانی سەرۆكی هەرێمی كوردستان كرد.

لەم پەیوەندییە تەلەفۆنییەدا بیروڕا لەبارەی دوا پێشهاتە سیاسی و ئەمنییەكانی ناوچەكە ئاڵوگۆڕ كرا و تیشك خرایە سەر هاوكارییە مرۆیی و سەربازییەكانی وڵاتی ئەڵمانیا بۆ هەرێمی كوردستان و هێزی پێشمەرگە.

هەر لەم پەیوەندییەدا پەیوەندییەكانی نێوان هەرێمی كوردستان و وڵاتی ئەڵمانیا تاوتوێ كرا.

ڕۆژی چوارشەممە 29ـی 7ـی 2015 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە فەریدوون سینێرلی جێگری وەزیری دەرەوەی توركیا و شاندێكی یاوەری كرد.

لە دیدارەكەدا بارودۆخی سیاسی و ئەمنیی ناوچەكە و دواپێشهاتە سیاسییەكان و هەورەها شەڕی دژی تیرۆریستانی داعش خرایە بەر باس و گفتوگۆ و تێیدا وەزیری دەرەوەی توركیا وێڕای ئاماژەدان بە بارودۆخی هەستیاری ناوچەكە باسی لە بڕیاری دەوڵەتی توركیا و ڕێككەوتنیان لەگەڵ ئەمەریكا كرد بۆ بەشداربوون لە شەڕی دژی تیرۆریستانی داعش و سەرۆك بارزانیی لە وردەكارییەكانی ئەم ڕێككەوتنە ئاگادار كردەوە. جێگری وەزیری دەرەوەی توركیا ئاماژەیشی بەوەدا كە ئامانجی توركیا لەم بڕیارە شكاندنی تیرۆریستانی داعش و گەڕاندنەوەی خەڵكی ئاوارە بۆ ناوچەكانیان و گەیاندنی هاوكاریی مرۆییە بۆ ئاوارەكان.

لەدرێژەی قسەكانیدا جێگری وەزیری دەرەوەی ڕایگەیاند كە توركیا بە گرنگییەوە سەیری هەرێمی كوردستان دەكات و بە فاكتەری سەقامگیری و بووژانەوە و پێشكەوتنی ناوچەكەی دەزانێت و بەردەوامیش دەبێت لە پەرەپێدانی پەیوەندییەكانی لەگەڵ هەرێمی كوردستان.

لەبارەی بارگرژییەكانی نێوان سوپای توركیا و پەكەكەیش ئەوەی بە سەرۆك بارزانی ڕاگەیاند كە لە توركیا بوار بۆ هەموو لایەك كراوەیە بۆ ئەوەی بەشداری پڕۆسەی سیاسی بن ئەویش لەسەر بنەما و پێوەرە دیموكراتییەكان و دوور لە مەنتقی چەك و، ئەوەیان مەرجی سەرەكی سەرخستنی پڕۆسەی ئاشتییە و وڵاتەكەی پابەندی ئەم بنەمایەیە.

لەبەرانبەردا سەرۆك بارزانی تیشكی خستە سەر مەترسییەكانی تیرۆریستانی داعش كە هەڕەشەن بۆ سەر هەموو لایەك و ئەركی هەموو لایەكە بەشدار بن لە شەڕكردن لەدژی تیرۆریستانی داعش و ئەو شەڕەش دەبێ هەمەلایەنە بێت و تەنیا شەڕی سەربازی نەبێت بەڵكو پێویستە شەڕی فكری و ئابووریی داعشیش بكرێت. هەروەها خۆشحاڵیی خۆیشی نیشاندا بە بڕیاری دەوڵەتی توركیا بۆ بەشداربوون لە شەڕی دژی داعش كە كاریگەرییەكی زۆری لەسەر یەكلاییبوونەوەی شەڕی دژی تیرۆریستانی داعش دەبێت. پەیوەست بە بارگرژییەكانی ئەم دواییەی نێوان سوپای توركیا و پەكەكە، سەرۆك بارزانی ئاماژەی بەوەدا كە هەرێمی كوردستان شەڕ و توندوتیژی بە ڕێگەیەكی گونجاو نازانێ و هانی هەر دوولا دەدات كە بگەڕێنەوە سەر بنەماكانی پڕۆسەی ئاشتی و دانوساندن و، سوود لە كرانەوە و پڕۆسەی سیاسی وەربگرن.

جێگەی ئاماژەكردنە لەم دیدارەدا د. فواد حوسێن سەرۆكی دیوانی سەرۆكایەتیی هەرێم و سەفین دزەیی گوتەبێژی حكوومەتی هەرێمی كوردستان ئامادە بوون.

بە بۆنەی جەژنی ڕەمەزانی پیرۆزەوە، بەڕێز دەیڤید کامیرۆن، سەرۆکوەزیرانی بریتانیا، لە نامەیەکدا پیرۆزبایی ئاراستەی بەڕێز مەسعود بارزانی سەرۆکی هەرێمی کوردستان کردووە.

سەرۆکوەزیرانی بریتانیا لە نامەکەیدا، ویڕای جەژنەپیرۆزە، هیواد شادی و ئارامی بۆ سەرۆک بارزانی و خەڵکی کوردستان خواستووە.

ڕۆژی هەینی 24ـی 7ـی 2015 لە شاری هەولێر بەڕێز مەسعود بارزانی پێشوازی لە ئاشتن كارتەر وەزیری بەرگریی ئەمەریكا و شاندێكی یاوەری كرد كە پێكهاتبوون لە ستیوارت جۆنز باڵیۆزی ئەمەریكا لە عێراق و كونسوڵی ئەمەریكا لە هەولێر و ژمارەیەك بەرپرس و ڕاوێژكاری سوپا و وەزارەتی بەرگریی ئەمەریكا.

لە دیدارەكەدا وەزیری بەگریی ئەمەریكا خۆشحاڵیی خۆی بۆ سەردانی بۆ كوردستان و دیداری لەگەڵ سەرۆك بارزانی نیشاندا و سوپاسی ئەو هەماهەنگی و كارە هاوبەشەی كرد كە لە نێوان سوپای ئەمەریكا و هێزی پێشمەرگەدا هەیە و بە كارێكی نموونەیی و سەركەوتووی وەسف كرد و هەروەها سەرسامیی خۆیشی نیشاندا بە ئازایەتی و لێهاتوویی پێشمەرگە لە شەڕی دژی تیرۆریستان و سەركردایەتیكردن و بەڕێوەبردنی ئەم شەڕە. وەزیری بەرگریی ئەمەریكا پابەندبوونی وڵاتەكەی بۆ هاوكاریكردنی كوردستان و یارمەتیدانی پێشمەرگە و دابینكردنی چەك و پێداویستییە سەربازییەكان دووپاتكردەوە و هاوپەیمانێتیی نێوان هەرێمی كوردستان و ئەمەریكای بە هاوبەشییەكی مەزن بۆ بەرقەراركردنی ئاشتی لە ناوچەكە لەقەڵەم دا.

لەبەرانبەردا سەرۆك بارزانی بەگەرمی بەخێرهاتنی شاندی میوانی كرد و سوپاسی گەل و سەرۆك و حكوومەت و سوپای ئەمەریكای كرد كە پاڵپشتی هەرێمی كوردستان بوونە و ئەوەی خستەڕوو كە بە كاری هاوبەش توانیمان سەركەوتنی مەزن بەدەست بهێنین، هەروەها ڕەزامەندیی خۆیشی لە ئاستی هەماهەنگیی نێوان سوپای ئەمەریكا و هێزی پێشمەرگە نیشاندا كە زۆر دەقیق و ورد بووە بە جۆرێك كە تا ئێستا هیچ زیانێك بە خەڵكی سڤیل نەگەییشتووە. لە درێژەی قسەكانیدا سەرۆك بارزانی ڕۆشنایی خستە سەر شەڕی تیرۆریستان و جەختی لەوە كردەوە كە بۆ ئێمە جێگەی شانازییە پێشمەرگە بە نوێنەرایەتیی جیهان شەڕی تیرۆر دەكات و لەگەڵ ئەوەیش ئەو شەڕە تەنیا شەڕی لایەنێك نییە لەگەڵ تیرۆر، بەڵكو شەڕی هەموو لایەكە. بۆیە بەكاری هاوبەش و پێكەوەیی دەكرێ ئەنجام و سەركەوتنی زۆر باش بەدەست بهێنرێت.

هەر لە كۆبوونەوەكەدا باس لە چۆنییەتی بەرزكردنەوەی هەماهەنگیی نێوان هێزی پێشمەرگە و سوپای ئەمەریكا و پێداویستییەكانی هێزی پێشمەرگە كرا و پلانی ئازادكردنی شاری موسڵ و تێكشكاندنی تیرۆریستانی داعش لە سووریا خرایە بەر باس و گفتوگۆ. پەیوەست بە پڕۆسەی ئازادكردنی موسڵ سەرۆك بارزانی ئاماژەی بە قۆناغی دوای ئازادكردنی موسڵ دا و ئەوەی دووپاتكردەوە كە بە لەبەرچاوگرتنی دۆخی دیموگرافی موسڵ پێویستە دڵنیاییەكی تەواو بە پێكهاتە نەتەوەیی و ئایینییەكانی موسڵ بدرێت كە چیتر تووشی كارەسات و نەهامەتی نابنەوە و ماف و داواكارییەكانیان مسۆگەر دەكرێن. لەبارەی ڕووبەڕووبوونەوەی تیرۆریستان لە سووریا سەرۆك بارزانی هێمای بەوەدا كە لە دژایەتیكردنی تیرۆردا بارودۆخی عێراق و سووریا بەیەكەوە بەستراوە و پێویستە لە هەر دوو شوێن تیرۆریستان تێكبشكێندرێن و لەناو ببردرێن. لە ئاستی ناوچەییشدا سەرۆك بارزانی ئەوەی بۆ شاندی میوان باسكرد كە نابێ هیچ لایەك تیرۆر وەك كارتی سیاسی لەدژی لایەنەكانی دی بەكار بەهێنێت چونكە دواجار ئاگر و زیانەكانی تیرۆر بەر خۆی دەكەوێتەوە.

لەم دیدارەدا مستەفا سەید قادر وەزیری پێشمەرگە و فەلاح مستەفا بەرپرسی فەرمانگەی پەیوەندییەكانی حكوومەتی هەرێم و ئەنوەر حاجی عوسمان بریكاری وەزراەتی پێشمەرگە و جەعفەر شێخ مستەفا و فەریق شێروان عەبدولڕەحمان و فەریق جەبار یاوەر ئەندامانی فەرماندەیی گشتیی هێزەكانی پاراستنی هەرێم ئامادە بوون.

جێگەی ئاماژە پێكردنە بەر لە دەستپێكی كۆبوونەوەكە وەزیری بەرگریی ئەمەریكا لە دەفتەری پڕۆتۆكۆڵی سەرۆكایەتیی هەرێم یادداشتێكی نووسی كە ئەمەی خوارەوە دەقەكەیەتی:

بۆ سەرۆك بارزانی و هاوكارەكانی

لەگەڵ شانازییەكی گەورە بۆ لێهاتوویی و ئازایەتیی پێشمەرگە و حیكمەتی حكوومەتی هەرێمی كوردستان و، دۆستایەتیی لەگەڵ ئەمەریكا.

ئێمە بەهیوای بەردەوامبوونی ئەو هاوبەشییەمانین لە ئاییندەدا.

ئاشتن كارتەر

وەزیری بەرگریی ئەمەریكا

24-7-2015

ڕۆژی دووشەممە 20ـی 7ـی 2015 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە د. خالد بن محەمەد ئەلعەتیە وەزیری دەرەوەی قەتەر و شاندێكی یاوەری كرد.

لە دیدارەكەدا وەزیری دەرەوەی قەتەر سڵاوی ئەمیری قەتەری بە سەرۆك بارزانی گەیاند و هەروەها ستاییشی پێشكەوتن و بووژانەوەی هەرێمی كوردستان و ئازایەتیی پێشمەرگەی كرد لە ڕووبەڕووبوونەوەی تیرۆریستان و ڕۆڵی سەرۆك بارزانیشی لە سەركردایەتیكردنی شەڕی تیرۆر و پێشڤەچوونی كوردستان بەرز نرخاند. هەروەها سوپاسی سەرۆك بارزانی و گەلی كوردستانیشی كرد كە لەگەڵ ئەوەی كوردستان لەشەڕ دایە و قەیرانی ئابووریشی هەیە بەڵام بووەتە پەناگەی سەدانهەزار ئاوارە كە لە نەتەوە و پەیڕەوانی ئایینیی جیاواز پێكهاتوون.

لەبەرانبەردا سەرۆك بارزانی بەخێرهاتنی شاندی میوانی كرد و ڕۆشنایی خستە سەر بارودۆخی ئاوارەكان و جەختی لەوە كردەوە كە كوردستان یارمەتیدانی ئاوارە و لێقەوماوان بە ئەركێكی مرۆڤی و نیشتیمانی خۆی دەزانێت و ئەوەی لە دەستی هاتووە بۆ باشتركردنی ژیانی ئاوارەكان كردوویەتی بەڵام ژمارەی ئاوارە و پەنابەران یەكجار زۆر و لە دەرەوەی تواناكانی هەرێمی كوردستانە.

لە بەشێكی دیكەی قسەكانیدا سەرۆك بارزانی ئاماژەی بە دەركەوتن و گەشەی تیرۆریستان لە عێراق و مەترسییەكانی تیرۆر دا و ڕایگەیاند ئەو تاوان و دڕندەییەی تیرۆریستان لە دژی خەڵك و پێكهاتەكان ئەنجامیان داوە لە مێژوودا وێنەی نەبووە. ئەوەیشی خستەڕوو كە تیرۆریستان سوودیان لە ململانێی تاییفی و بارودۆخی نالەباری سیاسی وەرگرت و گەشەیان كرد. سەرۆكی هەرێمی كوردستان ئەوەیشی دووپات كردەوە كە ڕووبەڕووبوونەوەی تیرۆر پێویستی بە هەوڵی هەمە لایەنە هەیە و لە تەك شەڕی سەربازی پێویستە لەڕووی سیاسی و فكری و ئابووریشەوە شەڕی تیرۆریستان بكرێت. هەروەها ئەوەیشی بە وەزیری دەرەوەی قەتەر ڕاگەیاند كە لە ڕووبەڕووبوونەوەی تیرۆریستاندا بارودۆخی عێراق و سووریا بەیەكەوە بەستراوە و پێویستە لە عێراق و سووریا تیرۆر لەناو ببردرێت.

پەیوەندییەكانی نێوان هەرێمی كوردستان و وڵاتی قەتەر تەوەرێكی دیكەی ئەم دانیشتنە بوو.

ئەمڕۆ هەینی، ١٧ـی٧ـی٢٠١٥، بەڕێز مەسعود بارزانی سەرۆكی هەرێمی كوردستان بە مەبەستی پیرۆزبایی جەژن و ئاگاداربوون لە بارودۆخی هێزی پێشمەرگە و بەسەركردنەوەی بەرەكانی شەڕ، سەردانی هەرسێ میحوەری مەخموور-گوێڕ و باشوور و ڕۆژئاوای کەرکووکی کرد.

لەم سەردانەدا سەرەتا سەرۆك بارزانی سەردانی میحوەری مەخموور-گوێڕێ کرد و لەلایەن بەرێز سیروان بارزانی سەرپەرشتیاری میحوەرەکە و فەرماندە و پێشمەرگەکانی ئەو میحوەرە بەگەرمی پێشوازیی لێ کرا. سەرۆک بارزانی سەنگەرەکانی پێشەوەی هێزی پێشمەرگەی بەسەر کردەوە و پیرۆزبای جەژنی لە فەرماندە و پێشمەرگەکان کرد و دەستخۆشیی لێ کردن کە بەهۆی ئازایەتی و گیانفیدایی ئەوانەوە هەموو جیهان بەچاوی ڕێزەوە سەیری كوردستان دەكات و گەلەکەشمان بە ئاسوودەیی جەژن دەگێڕێت.

دواتر سەرۆک بارزانی بەمەبەستی پیرۆزبایی جەژن و بەسەركردنەوەی بەرەكانی شەڕ لە میحوەرەكانی باشوور و ڕۆژئاوای کەرکووک، هێزەکانی پێشمەرگەی لەو دوو میحوەرە بەسەر کردەوە و لەلایەن بەڕێزان محەمەد حاجی مەحموود سەرپەرشتیاری هێزی پێشمەرگە لە میحوەرەکانی کەرکووک و دکتۆر کەمال کەرکووکی بەرپرسی میحوەری ڕۆژئاوای کەرکووک و دوبز و وەستا ڕەسوول بەرپرسی میحوەری چواری باشووری کەرکووک، بەگەرمی پێشوازییان لێ کرا.

دواتر لە كۆبوونەوەیەکدا لەگەڵ فەرماندەکانی هێزی پێشمەرگە لەو دوو میحوەرە سەرۆک بارزانی بەبۆنەی جەژنی ڕەمەزانی پیرۆزەوە بەگەرمی پیرۆزبایی لە هێزی پێشمەرگە و فەرماندەکان کرد و ڕایگەیاند کە هاتووم تا جەژنتان لێ پیرۆز بکەم و سوپاستان بکەم بۆ ئەو خۆڕاگری و قارەمانێتییەی پێشانتان داوە و ئەو گیانفیدایی و لەخۆبووردووییەی ئێوە بۆ ئەوەیە گەلەکەمان بە ئاسوودەیی بژیت.

سەرۆک بارزانی جەختی لەوە کردەوە کە ئەرکی پێشمەرگە زۆر پیرۆزە و پەیوەستە بە مان و نەمانی میللەتێک و و ئەوەیش بۆ ئێوە شانازییەکی گەورەیە و سڵاوی بۆ گیانی پاكی ئەو شەهیدانە نارد كە بە خوێنی خۆیان خاكی كوردستانیان پاراستووە.

سەرۆک بارزانی جەختیشی کردەوە کە گەل سەرچاوەی دەسەڵاتە و دوابڕیاریش لای گەلە و حزبەکان ئامرازن بۆ خزمەتکردنی گەلەکەمان و بەرژەوەندیی باڵای گەل و نیشتیمان لەسەرووی هەموو شتێکەوەیە و وێڕای جیاوازیی لە بۆچوونەکان و ئەگەر ناکۆکییەکیش هەبێت، ئەوە گەل بڕیاری کۆتایی دەدات نەک حزبێک.

سەرۆك بارزانی لە درێژەی قسەكانیدا جەختی کردەوە کە گەلەکەمان قوربانی زۆری داوە و پێویستە کۆتایی بە نەهامەتییەکانی بێت و ڕایگەیاند کە دەبێ بەدەستی خۆمان ئەو مافە وەدەست بهێنین و چاوەڕێی هیچ لایەک نەکەین، جەختیشی کردەوە كە یەکڕیزیی هێزی پێشمەرگە و تێكەڵبوونی خوێنی پێشمەرگەكانمان لە سەنگەری بەرگری بنەمای یەكڕیزیی گەلەكەمانە و دەبێ ئەوە بۆ سیاسییەكانیش وەك ڕێگە پێشاندەرێك بێت بۆ یەكڕیزی و برایەتی و بە هیچ شێوەیەكیش نابێ بارودۆخی سیاسیی و ناوخۆیی كوردستان كاریگەریی لە سەر پێشمەرگە هەبێت.

هەر لە کۆبوونەوەکەدا سەرپەرشتیار و فەرماندەکانی هێزی پێشمەرگە سوپاسی سەرۆک بارزانییان کرد کە هەمیشە لەگەڵ پێشمەرگەیە و بۆنە و جەژنەکانی لەگەڵ پێشمەرگە دەبێت، دواتریش سەرنج و تێبینییەکانی خۆیان لەبارەی ڕەوشی بەرەکانی بەرەوڕووبوونەوە لەگەڵ تیرۆریستان خستتەڕوو.

ڕۆژی چوارشەممە 15ـی 7ـی 2015 بەڕێز مەسعود بارزانی سەرۆكی هەرێمی كوردستان پێشوازی لە خاتوو ڕۆبێرتا پینۆتی وەزیری بەرگریی ئیتالیا و شاندێكی یاوەری كرد كە پێكهاتبوون لە باڵیۆزی ئیتالیا لە عێراق و كۆنسوڵی ئیتالیا لە هەولێر و ژمارەیەك ئەفسەر و ڕاوێژكاری وەزارەتی بەرگریی ئیتالیا.

لە دیدارەكەدا وەزیری بەرگریی ئیتالیا سوپاسی سەرۆك بارزانی كرد بۆ ڕەخساندنی دیدارەكە و لە دەستپێكی وتەكانیدا بە پێزانینێكی زۆرەوە باسی ڕۆڵی پێشمەرگەی كرد كە لە هێڵی یەكەمی شەڕكردنە لەدژی تیرۆریستانی داعش و ڕەزامەندیی خۆیشی نیشاندا لەو ئاستە بەرزەی كە هێزی پێشمەرگە لە شەڕكردن و مەشق و ڕاهێناندا هەیانە و، ئەوەی خستەڕوو كە بۆ ڕێگەگرتن لە داعش پێویست بوو وڵاتەكەی لە زووترین كاتدا یارمەتیی كوردستان بدات چونكە یارمەتیدانی كوردستان یارمەتیدانی ئیتالیایە و ئەو شەڕەیش شەڕێكە لەپێناو پاراستنی شارستانییەت و هەموو جیهان. وەزیری بەرگریی ئیتالیا جەختی لە دۆستایەتیی نێوان گەلی ئیتالیا و گەلی كوردستان كردەوە و ڕایگەیاند كە وڵاتەكەی بەردەوام دەبێت لە پێشكەشكردنی هاوكاریی سەربازی بۆ كوردستان.

لەبەرانبەردا سەرۆك بارزانی بە گەرمی بەخێرهاتنی شاندی میوانی كرد و بەناوی خۆی و گەلی كوردستان سوپاسی گەل و حكوومەتی ئیتالیای كرد كە یارمەتیی كوردستانیان داوە لە شەڕی تیرۆریستان و هاتنی سەرۆك وەزیران و كارەبەدەستە باڵاكانی ئیتالیای بۆ كوردستان بە ئاماژەیەكی ڕوون بۆ پەیوەندیی مێژوویی و دۆستانەی نێوان هەرێمی كوردستان و ئیتالیا لە قەڵەم دا. سەرۆكی هەرێمی كوردستان لە درێژەی قسەكانیدا ڕۆشنایی خستەسەر مەترسییەكانی تیرۆر بۆ سەر ئاساییشی جیهان و جەختی لەوە كردەوە كە ڕووبەڕووبوونەوەی تیرۆر تەنیا شەڕی سەربازی و شەڕی لایەنێك نییە، شەڕی هەموو جیهانی ئازاد و دیموكراتخوازە لەدژی تاریكی و شەڕانگێزی. ئەم شەڕە پێویستی بە هەوڵی هەموو لایەك هەیە و هاوكات لەگەڵ شەڕی سەربازی پێویستە لەڕووی فكری و ئابووری و سیاسیشەوە شەڕی تیرۆریستان بكرێت و جوهدی وڵاتانی عەرەبی و ئیسلامیی بۆ ئەو مەبەستە بە پێویست زانی. هەروەها ئاماژەیشی بەوەدا كە هەندێ وڵات تووشی هەڵە بوون كە بیریان لەوە كردەوە تیرۆر وەك كارت بۆ ململانێكان بەكار بهێنن چونكە تیرۆر هەڕەشەیەكی گەورەیە و دواجار زیانی بۆ خۆیان و بۆ هەموو لایەك دەبێت. سەرۆك بارزانی باسی دەركەوتنی تیرۆریستانی لە عێراق و پەلاماردانیان بۆ سەر كوردستان كرد و هێمای بەوەدا كە پێشمەرگە توانی تیرۆریستانی داعش لە سنوورەكانی كوردستان تێكبشكێنێت، ئێستا ورەی پێشمەرگە زۆر بەرزە و گەلی كوردستانیش بە هیچ شێوەیەك تەحەمولی هزری داعش و خەڵكی وەك داعش ناكات و لە كوردستاندا جێگەیان نییە.

تاوتوێكردنی هەڕەشەكانی داعش لە ناوچەكە و سووریا و لیبیا و چۆنییەتی ڕووبەڕووبوونەوەیان و هەروەها ڕێككەوتنی ئەتۆمی ئێران و وڵاتانی پێنج كۆ یەك تەوەرێكی دیكەی ئەو دانیشتنە بوو و، سەبارەت بە بوونی تیرۆریستان لە سووریا سەرۆك بارزانی ئەوەی ڕاگەیاند كە پێویستە داعش لە سووریایش تێكبشكێندرێت و شەڕی تیرۆر لە سووریا و عێراق بابەتێكە بە یەكەوە بەستراوەتەوە. پەیوەست بە ڕێككەوتنی ئەتۆمیی ئێران و وڵاتانی پێنج كۆ یەك سەرۆك بارزانی هیوای ئەوەی خواست كە ئەم ڕێككەوتنە ببێتە مایەی پتەوتركردنی سەقامگیری و ئاشتی لە ناوچەكە و ڕێگەیش بۆ لەناوبردنی تیرۆر خۆش بكات.