ڕۆژی یەكشەممە 10ـی 1ـی 2016 لە شاری هەولێر بەڕێز مەسعود بارزانی سەرۆكی هەرێمی كوردستان لەگەڵ شاندێكی باڵای حكوومەتی هۆڵەندا كۆبۆوە كە پێكهاتبوون لە لۆدڤایك ئاشەر جێگری سەرۆك وەزیران و ژەنین هێنس پلاشخارت وەزیری بەرگری و جەنەڕاڵ تۆم میدن دۆرپ سوپاسالاری هۆڵەندا و جان واڵتماز باڵیۆزی هۆڵەندا لە عێراق و ڤان دێر زاندی كۆنسوڵی هۆڵەندا لە هەولێر.

لە دیدارەكەدا جێگری سەرۆك وەزیرانی هۆڵەندا سوپاسی سەرۆك بارزانی كرد بۆ ئەو پێشوازییە گەرمەی لە خۆی و شاندی یاوەری كراوە و هەروەها ستاییشی ڕۆڵ و ئازایەتی هێزی پێشمەرگەی كوردستان كرد لە ڕووبەڕووبوونەوەی تیرۆریستان و سەرەخۆشیشی لە سەرۆك بارزانی و گەلی كوردستان كرد بۆ ئەو پێشمەرگانەی لەپێناو پاراستنی پێكهاتەكان و شەڕی دژی تیرۆریستان گیانی خۆیان بەخت كردووە و لە شەڕەكاندا شەهید بوونە. هەروەها جەختیشی لەبەردەوامی پشتیوانی وڵاتەكەی كردەوە لە كوردستان و هێزی پێشمەرگە. لە بەشێكی دیكەی قسەكانیدا پێزانینی وڵاتەكەی بە سەرۆك بارزانی ڕاگەیاند كە هەرێمی كوردستان میوانداری ملیۆنێك و هەشتسەتهەزار ئاوارە و پەنابەری كردووە و سەرباری بوونی گرفتی قووڵی ئابووری قوربانی زۆریشی لە شەڕی تیرۆریستان داوە و لەوەدا هۆڵەندا هاوسۆزی كوردستانە و هەروەها شەڕی تیرۆریستانیشی بە هۆكاری یەكبوونی هەردولا لە قەڵەم دا.

لەبەرانبەردا سەرۆك بارزانی بەخێرهاتنی شاندی میوانی كرد و سوپاسی گەل و حكوومەتی هۆڵەندای كرد كە لە شەڕی تیرۆریستاندا پشتیوانی پێشمەرگەن. هەروەها باسی لە هەماهەنگی نێوان پێشمەرگە و هێزی هاوپەیمانان كرد و ئەو هەماهەنگییەی بە كەموێنە وەسف كرد كە بووەتە هۆی ئەوەی سەركەوتنەكان زووتر بەدەست بێن و لە شەڕەكاندا هیچ شوێنێكی سڤیل نەكرێتە ئامانج. لە درێژەی قسەكانیدا سەرۆك بارزانی مەترسییەكانی توندڕۆیی و ڕێكخراوی داعشی بۆ سەر مرۆڤایەتی بۆ شاندی میوان خستەڕوو و باسی لە هۆكارەكانی سەرهەڵدانی داعش و گەشەكردنی لە عێراق كرد و جەختیشی لەوە كردەوە كە پێویستە قۆناغی دوای شكستدانی داعش بە بایەخەوە سەیر بكرێت و دەبێ ڕێككەوتنێك هەبێت كە لەدوای ڕزگاركردنی موسڵ ناوچەكان چۆن بەڕێوەببردرێت و گەرەنتیش بۆ ئاییندەی پێكهاتەكان هەبێت كە كارەساتەكان چیتر دووبارە نەبنەوە.

هەر لەم كۆبوونەوەیە جەخت لە پێویستی لەناوبردنی تیرۆریستان لە سووریا و عێراق و گەڕاندنەوەی ژیانێكی ئاشتیانە بۆ ناوچە ئازادكراوەكان كرایەوە و هەردوولا لەسەر ئەوە هاوڕا بوون كە شەڕی دژی تیرۆر جگە لە لایەنی سەربازی پێویستە ڕەهەندی ئابووری و ئایدیۆلۆژیشی هەبێت. لە بەشێكی دیكەی ئەم كۆبوونەوەیەدا باس لە پێداویستییە سەربازییەكانی هێزی پێشمەرگە لە بەرەكانی شەڕ كرا.

جێگەی ئاماژەپێكردنە لەم كۆبوونەوەیەدا كەریم سنجاری وەزیری ناوخۆ و وەزیری پێشمەرگە بە وەكالەت و فواد حوسێن سەرۆكی دیوانی سەرۆكایەتی و فەلاح مستەفا بەرپرسی فەرمانگەی پەیوەندییەكانی حكوومەتی هەرێم و فەریق جەمال سوپاسالاری پێشمەرگە و فەریق جەبار یاوەر ئەندامی فەرماندەیی گشتیی هێزەكانی پاراستنی هەرێم ئامادە بوون.