پاشنیوەڕۆی ئەمڕۆ دووشەممە 4 - 4 - 2016 بەڕێز نێچیرڤان بارزانی سەرۆك وەزیرانی هەرێمی كوردستان، پێشوزای لە خاتوو ئێڤا درداكۆڤا كونسوڵی گشتیی نوێی كۆماری چیك لە هەرێمی كوردستان و شاندێكی یاوەری كرد.

لە دیدارێكدا بەڕێز سەرۆك وەزیرانی هەرێمی كوردستان وێڕای بەخێرهێنان، پیرۆزبایی دەستبەكاربوونی لە خاتوو درداكۆڤا كرد كە وەك كونسوڵی گشتیی نوێی كۆماری چیك لە هەرێمی كوردستان دەستبەكار بووە و هیوای سەركەوتنی بۆ خواست و هەموو هاوكاری و پشتگیرییەكی حكوومەتی هەرێمی كوردستان و لایەنە پەیوەندارەكانی بۆ كار و چالاكییەكانی كونسوڵخانەی گشتیی چیك لە هەرێمی كوردستان دووپات كردەوە.

لە كۆبوونەوەكەدا هەردوولا جەختیان لە پەرەپێدانی پەیوەندیی نێوان هەرێمی كوردستان و كۆماری چیك كردەوە و ئامادەییان بۆ پێشكەشكردنی هەموو ئاسانكارییەك لەپێناو بەرەوپێشەوەبردنی پەیوەندییەكان لە هەموو بوارەكاندا بە تایبەتی لەو بوارانەدا كە بۆ هەردوولا گرنگن، دەربڕی.

لە بەشێكی دیكەی دیدارەكەدا خاتوو درداكۆڤا جەختی لەوە كردەوە كە وڵاتەكەی لە پشتگیری و هاوكاریكردنی هێزی پێشمەرگە لە شەڕی دژی داعش بەردەوام دەبێت و ئاماژەی بەوەش دا كە چەند پرۆژەیەك لە هەرێمی كوردستان جێبەجێی دەكەن لەوانە سپۆنسەركردنی كەمپی ئاشتی بۆ ئاوارە و پەنابەران لە پارێزگای سلێمانی، دروستكردنی باڵەخانەی كەنیسەیەك لە ئەلقۆش، ڕاهێنانی پزیشكانی هەرێمی كوردستان لە پراگی پایتەختی چیك، چارەسەركردنی پێشمەرگە بریندارەكان لە نەخۆشخانە سەربازییەكانی چیك بە تایبەتی ئەوانەی كە چارەسەرییان لە هەرێمی كوردستان نییە و لە داهاتووشدا بەشداریكردن لە ئاوەدانكردنەوەی ئەو دەڤەرانەی لەژێر دەستی داعش ڕزگار كراون.

تاوتوێكردنی ڕەوشی ناوچەكە بە گشتی و عێراق و هەرێمی كوردستان بە تایبەتی و چەند بابەتێكی دیكەی پەیوەندیدار، لایەنێكی دیكەی دیدارەكە بوو.
 

 

 

 

 

 

نیوەڕۆی ئەمڕۆ سێشەممە 5 - 4 - 2016 بەڕێز نێچیرڤان بارزانی سەرۆك وەزیرانی هەرێمی كوردستان، پێشوزای لە بەڕێز ئید رۆیس سەرۆكی نوێنەرایەتیی كاروباری دەرەوەی كۆنگرێسی ئەمەریكا و شاندێكی یاوەری كرد كە لە ئەندامانی كۆنگرێس و ژمارەیەك دیپلۆماتكارانی ئەمەریكی پێكهاتوو.

لە دیدارێكدا كە هەریەكە لە بەڕێزان قوباد تاڵەبانی جێگری سەرۆك وەزیران، سەرۆكی دیوانی سەرۆكایەتیی هەرێم و وەزیرانی ناوخۆ و پێشمەرگە بە وەكالەت و پلاندانانی هەرێمی كوردستان ئامادەی بوون، شاندی میوان خۆشحاڵیی خۆیان بە سەردانی هەرێمی كوردستان دەربڕی و پشتگیریی خۆیان بۆ هەرێمی كوردستان و هێزی پێشمەرگە لە شەڕی دژی تیرۆر و لە لایەنی مرۆییەوە دووپات كردەوە و هەڵوێستی خەڵك و حكوومەتی هەرێمی كوردستانیان بۆ پێشوازیكردن لە ژمارەیەكی یەكجار زۆری ئاوارە و پەنابەرانی دەستی تیرۆر و دابینكردنی جێگەی حەوانەوە و خزمەتگوزاریی پێویست بۆیان، بەرز نرخاند.

 

 

لە بەشێكی دیكەی دیدارەكەدا شاندی میوان باسیان لە ڕەوشی ئافرەت لە هەرێمی كوردستان و جێگە و پێگەیان لە كایەكانی بەڕێوەبردن و سیاسی و كۆمەڵایەتیدا كرد و لەمبارەیەشەوە ئاماژە بە ئافرەتە ئازادكراوەكانی ئێزدی لە دەستی داعش و ئازادكردنی ئەوانەی كە ماون كرا و جەختیان لەسەر چاودێریكردنیان لەباری دەروونییەوە و چۆنییەتیی گەڕاندنەوەیان بۆ ناو كۆمەڵگا، كردەوە. هەروەها ئامادەییی خۆشیان بۆ هاوكارییكردنی هەرێمی كوردستان بۆ تێپەڕاندنی قەیرانی دارایی دەربڕی.

لای خۆیەوە بەڕێز سەرۆك وەزیران سوپاسی سەردانی شاندی كۆنگرێس و پشتیوانیی بەردەوامی ئەمەریكا بۆ هەرێمی كوردستان بەتایبەتی دۆستانی كورد لە كۆنگرێسی ئەمەریكا كرد. هەروەها تیشكی خستە سەر دوا پێشهاتەكانی شەڕی دژی تیرۆرستانی داعش و ئاماژەی بەوە دا كە هێزی پێشمەرگە لەو شەڕەدا پێویستی بە پشتیوانیی بەردەوامی وڵاتانی دۆست بە گشتی و ئەمەریكا بە تایبەتی هەیە و جەختی لەوە كردەوە كە پێویستە چەكی مۆدێرن بۆ هێزی پێشمەرگە دابین بكرێت تا بتوانێت لە سەركەوتنەكانی بەسەر تیرۆردا بەردەوام بێت.

دواتر بەڕێزیان باسی ڕەوشی هەرێمی كوردستان و ئەو قەیرانە داراییەی ڕووبەڕووی هەرێم بووەتەوە و هۆكارەكانی كرد و هیوای خواست وڵاتانی دۆست لەمبارەیەوە هاوكار و پشتیوانی هەرێمی كوردستان بن. جەختی لەوەش كردەوە كە پێویستە بەشی هەرێمی كوردستان لەو قەرزە نێودەوڵەتییە دابین بكرێت كە حكوومەتی عێراق وەریدەگرێت.

هەروەك باسی لە ڕێكارەكانی ناچاری دارایی و پلانێكی چاكسازی حكوومەتی هەرێم بۆ ڕووبەڕووبوونەوەی قەیرانی دارایی كرد و ئاماژەی بەوە دا كە هەرێمی كوردستان چاوی لە هاوكاریی كۆمەڵگەی نێودەوڵەتیی و كۆمپانیا وەبەرهێنەرەكانە بۆ تێپەڕاندنی ئەم قەیرانە بەتایبەتی كە دەرگای هەرێمی كوردستان بۆ وەبەرهێنەر و بزنسمانەكان كراوەیە تاكو بێن لە هەرێم وەبەرهێنان بكەن و لەم ڕێگەیەوە هاوكار بن بۆ تێپەڕاندنی ئەو قەیرانە داراییە.

تاوتوێكردنی ڕەوشی ناوچەكە بە گشتی و ڕەوشی ئەو دەڤەرانەی كە لە دەستی تیرۆرستانی داعش ڕزگار كراون و چۆنیەتیی ئاوەدانكردنەوەیان و چەند بابەتێكی دیكەی پەیوەندیدار، لایەنێكی دیكەی دیدارەكە بوو.

 

 

 

 

 

 

 

 

ئێوارەی ئەمڕۆ سێشەممە 5 - 4 - 2016 بەڕێز نێچیرڤان بارزانی سەرۆك وەزیرانی هەرێمی كوردستان، پێشوزای لە بەڕێز ئەنزۆ ئەماندۆلا جێگری وەزیری دەرەوەی ئیتاڵیا و شاندێكی دیپلۆماسی و سەربازیی یاوەری كرد.

لە دیدارێكدا بەڕێز ئەماندۆلا خۆشحاڵیی خۆی بە سەردانی هەرێمی كوردستان دەربڕی كە پاش دەستبەكاربوونی وەك جێگری وەزیری دەرەوەی ئیتاڵیا، یەكەم جارە سەردانی هەرێمی كوردستان دەكات. هەروەها بەردەوامیی هاوكارییە مرۆیی و سەربازییەكانی وڵاتەكەی بۆ هەرێمی كوردستان و پتەوتركردنی پەیوەندییە دووقۆڵییەكانی نێوان ئیتاڵیا و هەرێمی كوردستانی لە هەموو بوارەكاندا دووپات كردەوە.

لە بەشێكی دیكەی قسەكانیدا ئاماژەی بە قارەمانێتیی هێزی پێشمەرگە لە شەڕی دژی داعش و وەستاندنی مەترسیی تیرۆر لەسەر هەرێمی كوردستان كرد و هەڵوێستی خەڵك و حكوومەتی هەرێمی كوردستانی لە پێشوازیكردن لە ژمارەیەكی یەكجار زۆری ئاوارە و پەنابەری دەستی تیرۆر و دابینكردنی جێگەی حەوانەوە و خزمەتگوزاریی پێویست بۆیان، بەرز نرخاند.

لای خۆیەوە بەڕێز سەرۆك وەزیرانی هەرێمی كوردستان سوپاسی ئەو سەردانەی كرد و باسی لە دوایین پێشهاتەكانی شەڕی دژی تیرۆرستانی داعش كرد و لەمبارەیەشەوە سوپاسی هاوكارییە بەردەوامەكانی ئیتاڵیای لەڕووی سەربازی و مرۆییەوە بۆ هەرێمی كوردستان كرد. جەختی لەوەش كردەوە كە شەڕی دژی داعش تەنیا بەرپرسیاریەتیی هەرێمی كوردستان نییە بەڵكو بەرپرسیاریەتیی هەموو كۆمەڵگەی نێودەوڵەتییە بەتایبەتی وڵاتانی هاوپەیمان.

بەڕێزیان لە بەردەوامیی قسەكانیدا پتەوتركردنی پەیوەندییە دووقۆڵییەكانی نێوان ئیتاڵیا و هەرێمی كوردستانی دووپات كردەوە و پوختەیەكیشی دەربارەی ئەو قەیرانە داراییەی ڕووی لە هەرێمی كوردستان كردووە و هۆكارەكانی و پلانەكانی حكوومەتی هەرێم بۆ تێپەڕاندنی، خستە ڕوو و هیوای خواست كە كۆمەڵگەی نێودەوڵەتی لەم ڕووەوە هاوكاریی هەرێمی كوردستان بكات بەتایبەتی گرووپی وڵاتانی جی حەوت بۆ ئەوەی هەرێمی كوردستان بتوانێت ئەو قەیرانە سەركەوتووانە تێپەڕێنێت.

تاوتوێكردنی چەند پرسێكی پەیوەندیداری وەك ئۆپەراسیۆنی ئازادكردنی مووسڵ لە دەستی تیرۆرستانی داعش و ئاوەدانكردنەوەی دەڤەرە ئازادكراوەكان و گەڕاندنەوەی متمانەی پێكەوەژیانی پێكهاتەكان لەو جێگایانە و دابینكردنی ئاسایش و ئاشتی بۆیان و نۆژەنكردنەوەی بەنداوی مووسڵ لەلایەن كۆمپانیایەكی ئیتاڵییەوە و پرۆسەی سیاسی لە بەغدا و پەیوەندییەكانی هەرێمی كوردستان لەگەڵ بەغد و وڵاتانی ناوچەكە و چارەسەركردنی كێشە هەڵواسراوەكانی نێوان هەولێر و بەغدا ، لایەنێكی دیكەی دیدارەكە بوو.

 

سەرلەبەیانیی ئەمڕۆ 3 - 4 - 2016 بەڕێز نێچیرڤان بارزانی سەرۆك وەزیرانی هەرێمی كوردستان پێشوازی لە باڵیۆزی نیازپاكیی نەتەوە یەكگرتووەكان هونەرمەندی ناوداری عەرەبی ئیماراتی بەڕێز حسێن ئەلجەسمی كرد كە بە مەبەستی كردنەوەی چەند پرۆژەیەكی خێرخوازیی مانگی سووری ئیماراتی سەردانی هەرێمی كوردستانی كردووە.


لە دیدارەكەدا كە بەڕێز كونسوڵی گشتیی ئیمارات لە هەرێمی كوردستان و ژمارەیەك لە بەرپرسانی مانگی سووری ئیماراتی ئامادەی بوون، بەڕێز ئەلجەسمی خۆشحاڵیی خۆی بە سەردانی هەرێمی كوردستان دەربڕی و سەرسامیی خۆیشی بۆ میواندۆستیی خەڵك و پێشكەوتوویی هەرێمی كوردستان پیشان دا. ئەوەشی ئاشكرا كرد مەبەستیانە لە سەردانەكەیاندا پەیامی هەرێمی كوردستان بگەیەننە جیهان و پەیامی ئیماراتیش بگەیەننە هەرێمی كوردستان كە ئامادەیە بۆ هاوكاری و یارمەتیدانی ئاوارە و پەنابەران و سووككردنی ئەو بارە قورسەی كە بەو هۆیەوە كەوتۆتە سەر شانی هەرێمی كوردستان.

هەروەها باسی لە بەشداریی خۆیان لە كردنەوەی چەند پڕۆژەیەكی خزمەتگوزاریی مانگی سووری ئیماراتی لە هەرێمی كوردستان كرد كە بۆ خزمەت و هاوكاریی ئاوارە و پەنابەران لە هەرێمی كوردستان ئەنجامیان داون وەك كردنەوەی كەمپێك كە لە 632 یەكەی نیشتەجێبوون پێكدێت بە تەواوی پێداویستی و خزمەتگوزارییەكانیەوە وەك قوتابخانە، مزگەوت، ئاو و كارەبا، پاركێكی یاری منداڵان و یەكەیەكی بەڕێوەبەری كە دەبێتە سەنتەرێكی فریاگوزاری بۆ ئاوارە و پەنابەران لە سنووری پارێزگای هەولێر و كردنەوەی نەخۆشخانەیەكی 58 قەرەوێڵەیی منداڵان و لەدایكبوون و دانانی بەردی بناغەی نەخۆشخانەیەكی تایبەتی تا.

لای خۆیەوە بەڕێز سەرۆك وەزیرانی هەرێمی كوردستان خۆشحاڵیی خۆی بە سەردانی بەڕێزیان پیشان دا و سوپاسی كار و چالاكییە خێرخوازی و مرۆڤییەكانی بەڕێزیانی كرد و هیوای سەركەوتنی لە كارەكانیدا بۆ خواست. هەروەك سوپاسی حكوومەت و سەركردایەتی وڵاتی ئیمارات و مانگی سووری ئیماراتی كرد بۆ ئەو خزمەتگوزارییە مرۆییانەی كە لە هەرێمی كوردستان و وڵاتانی ناوچەكە و تەواوی جیهان پێشكەش بە لێقەوماوان دەكەن.

بەڕێزیان هەروەها هیوای خواست كە پەیوەندییەكانی نێوان هەرێمی كوردستان و ئیمارات لە هەموو بوارەكاندا بەرەوپێشەوە بچێت و سوپاسی ڕۆڵی بەڕێز كونسول و كونسوڵخانەی گشتیی ئیماراتی لە هەرێمی كوردستان كرد بۆ كاركردن لەسەر گەیاندنی كۆمەك و هاوكاری بە ئاوارە و پەنابەران لە هەرێمی كوردستان و هەوڵدانی بەردەوامیان بۆ برەودان بە پەیوەندییەكانی نێوان هەرێمی كوردستان و ئیمارات.

لە كۆتایی دیدارەكەدا بەڕێز سەرۆك وەزیرانی هەرێمی كوردستان نامەیەكی سوپاس و پێزانینی پێشكەش بە بەڕێز ئەلجەسمی كرد.

 

 

 

 

 

له‌ به‌رده‌وامیى سه‌ردانه‌كه‌یدا بۆ به‌غدا؛ ئێوارەی ئەمڕۆ هەینی 8 - 4 - 2016 بەڕێز نێچیرڤان بارزانی سەرۆك وەزیرانی هەرێمی كوردستان و شاندی یاوەری لەگەڵ بەرێز حەیدەر عەبادی سەرۆك وەزیرانی عێراقی فیدرال و ژمارەیەك لە بەرپرسانی حكوومەتی عێراق كۆبووەوە.

لە كۆبوونەوەكەدا باس لە پەیوەندییەكانی نێوان هەولێر و بەغدا و قەیرانی دارایی و چۆنیەتیی تێپەڕاندنی قەیرانەكە و شەڕی دژی تیرۆرستانی داعش و ئازادكردنەوەی شاری مووسڵ لە تیرۆرستان و هەمانگیی زیاتری نێوان هەرێمی كوردستان و بەغدا لەوبارەیەوە، گفتوگۆی لەسەر كرا.

لە بەشێكی دیكەی كۆبوونەوەكەدا باس لە پێكهاتەی نوێی حكوومەتی عێراق كرا و لەمبارەیەوە بەڕێز سەرۆك وەزیرانى هه‌رێمى كوردستان ڕاشكاوانە هەڵوێستی هەرێمی كوردستانی خستە ڕوو كە پێویستە مافی دەستووری و یاسایی هەرێم لەبەرچاو بگیرێت.

پاشنیوەڕۆی ئەمڕۆ هەینی 8 - 4 - 2016 بەڕێز نێچیرڤان بارزانی سەرۆك وەزیرانی هەرێمی كوردستان و شاندێكی یاوەری كە لە بەڕێزان قوباد تاڵەبانی جێگری سەرۆك وەزیران و فوئاد حوسێن سەرۆكی دیوانی سەرۆكایەتیی هەرێمی كوردستان و سەفین دزەیی وتەبێژی فەرمیی حكوومەتی هەرێمی كوردستان پێكهاتبوو، بە یاوریی بەڕێز كونسوڵی ئەمەریكا لە هەولێر،  به‌ سەردانێك گه‌یشته‌ بەغدا.

له‌ سه‌ره‌تاى سه‌ردانه‌كه‌یدا لەگەڵ بەرێز جۆن كیری؛ وەزیری دەرەوەی ئەمەریكا و ژمارەیەك لە بەرپرسان و دیپلۆماتكارانی ئەمەریكا كۆبووەوە. لە كۆبوونەوەكەدا بارودۆخی ناوچەكە و قەیرانی دارایی كە ڕووبەڕووی عێراق بەگشتی و هەرێمی كوردستان بەتایبەتی بووەتەوە و ڕەوشی ئەمنیی ناوچەكە و شەڕی دژی تیرۆرستانی داعش و هەنگاوەكانی داهاتووی نێوان بەغدا و هەولێر و هاوپەیمانان بۆ ئازادكردنی شاری مووسڵ لە دەستی تیرۆر و پەیوەندییە دووقۆڵییەكانی نێوان ئەمەریكا و هەرێمی كوردستان، خرانە بەر باس و گفتوگۆ.

هەردوولا جەختیان لە پتەوتركردنی پیوەندییە دووقۆڵییەكانی نێوان هەرێمی كوردستان و ئەمەریكا لە بوارە جیاجیاكاندا كردەوە و بەڕێز جۆن كیری؛ وەزیری دەرەوەی ئەمەریكا ئامادەییی وڵاتەكەی دەربڕی كە هاوكاریی عێراق و هەرێمی كوردستان بەتایبەتی بكات بۆ ڕووبەڕووبوونەوەی قەیرانی دارایی. هەروەك بەردەوامیی هاوكارییەكانی وڵاتەكەی بۆ هێزی پێشمەرگە دەربڕی لە شەڕی دژى تیرۆردا و لەمبارەیەشەوە ڕۆڵی خەڵك و حكوومەت و هێزی پێشمەرگەی لە وەستاندنی مەترسیی تیرۆر و سەركەوتنە بەردوامەكانی پێشمەرگە بەسەر تیرۆرستانی داعشدا بەرز نرخاند.

هەروەها ڕۆڵی هاوپەیمانان لە شەڕی دژی تیرۆرستانى داعش بەگشتی و ئەمەریكا بەتایبەتی و هاوكارییە سەربازی و مرۆییەكانیان بۆ هەرێمی كوردستان و پێشمەرگە و تاوتوێكردنی چەند بابەتێكی دیكەی پەیوەندیدار، لایەنێكی دیكەی كۆبوونەوەكە بوو.

هەر لە چوارچێوەی سەردانەكەیدا بۆ بەغدا، ئێوارەی ئەمڕۆ هەینی 8 - 4 - 2016 بەڕێز نێچیرڤان بارزانی سەرۆك وەزیرانی هەرێمی كوردستان و شاندی یاوەری سەردانی بەرێز د. فوئاد مەعسووم سەركۆماری عێراقی فیدرالی كرد.

لە دیدارێكدا ڕەوشی ناوچەكە بەگشتی و عێراق و هەرێمی كوردستان بەتایبەتی خرایە بەر باس و گفتوگۆ. هەردوولا هەماهەنگیی و هاوكاریی نێوان هەولێر و بەغدایان بۆ چارەسەركردنی كێشە و قەیرانەكان دووپات كردەوە و جەختیان لەوە كردەوە كە پێویستە سەرجەم كێشەكانی نێوان هەولێر و بەغدا له‌ ڕێگەی دیالۆگ و گفتوگۆوه‌ چارەسەریان بۆ بدۆزرێتەوە.

لە تەوەرێكی دیكەی دیدارەكەدا شەڕی دژی تیرۆرستانی داعش و ڕزگاركردنەوەی شاری مووسڵ و هەنگاوەكانی چارەسەركردن و ڕووبەڕووبوونەوەی ئەو قەیرانە داراییەی كە بەرۆكی عێراق بەگشتی و هەرێمی كوردستانی بەتایبەتی گرتووە، هه‌روه‌ها پێكهاتەی نوێی حكوومەتی عێراق و ڕەچاوكردنی مافە دەستووری و یاساییەكانی كورد لەو پێكهاتەدا، خرانە بەر باس و گفتوگۆ.

 

ئێوارەی ئەمڕۆ پێنجشەممە 7 - 4 - 2016 بەڕێز نێچیرڤان بارزانی سەرۆك وەزیرانی هەرێمی كوردستان، پێشوزای لە بەڕێز خێرت بۆرژوا سەرۆك وەزیرانی هەرێمی فلاندەرزی بەلجیكا و شاندێكی یاوەری كرد.

لە دیدارێكدا بەڕێز بۆرژوا خۆشحاڵیی خۆی بە سەردانی هەرێمی كوردستان دەربڕی و ئاماژەی بەوە دا كە هەرێمی كوردستان لە ناوچەیەكی پڕ ئالۆز و نائارامدا، هەرێمێكی ئارام و پێشكەوتووە و پێكەوەژیانی پێكهاتە نەتەوەیی و ئاینییەكان و ئارامی و پێشكەوتنە بەردەوامەكانی هەرێمی كوردستانیشی بەرز نرخاند. هەروەك دەسخۆشی لە خەڵك و حكوومەتی هەرێمی كوردستان و پێشمەرگە كرد كە سەرەڕای قەیرانی دارایی، توانیویانە لەجیاتی جیهانی ئازاد پلانە مەترسیدارەكانی تیرۆرستان شكست پێ بهێنن و پێشوزای لە ژمارەیەكی یەكجار زۆری ئاوارە و پەنابەری دەستی تیرۆر بكەن و خزمەتگوزاری پێویستیان بۆ دابین بكەن.

لە بەشێكی دیكەی قسەكانیدا هەموو هاوكاری و هەماهەنگییەكی هەرێمی فلاندەرزی لە بوارە جیاجیاكاندا بە تایبەتیش لە بوارەكانی ئابووری و مۆركردنی گرێبەستی ئابووری و خوێندنی باڵا و پەروەردەدا لەگەڵ هەرێمی كوردستان پیشان دا و بۆ ئەم مەبەستەش هیوای خواست كۆمسیۆنێك لەنێوان هەردوولادا پێكبهێندرێت بۆ ئەوەی لە ڕێگەیەوە پەیوەندییە دووقۆڵیەكانیش زیاتر پتەو بكرێن.

لای خۆیەوە بەڕێز سەرۆك وەزیرانی هەرێمی كوردستان سوپاسی ئەو سەردانە و هەڵوێستی بەرێز سەرۆك وەزیرانی هەرێمی فلاندەرزی بەلجیكی كرد بۆ تێڕوانینیان سەربارەت بە هەرێمی كوردستان و سەرەخۆشیشی لە بەرێزیان كرد بۆ قوربانیانی هێرشە تیرۆرستییەكەی داعش لە بروكسێلی پایتەختی بەلجیكا. ئاماژەی بەوەش دا كە پێكەوەژیانی پێكهاتەكانی هەرێمی كوردستان مێژوویەكی دوورودرێژی هەیە و شانازی پێوە دەكەن.

سەبارەت بە شەڕی دژی داعشیش بەڕێز سەرۆك وەزیران جەختی لەوە كردەوە كە پێویستە بنەماكانی مرۆڤایەتی بپارێزرێن و داوای لە كۆمەڵگەی نێودەوڵەتیش كرد لەڕووی سەربازی و مرۆییەوە زیاتر هاوكاریی هەرێمی كوردستان بكات و ئامادەییی هەرێمی كوردستانیشی بۆ هەر هاوكاری و هەماهەنگییەك لەگەڵ هەرێمی فلاندەرز دەربڕی و دووپاتی كردەوە كە هەرێمی كوردستان پێویستی بە ئەزموونی بەلجیكایە بۆ باشتركردنی سیستمی ئیداری و جێبەجێكردنی چاكسازی كە ماوەیەكە بۆ تێپەڕاندنی قەیرانی دارایی و باشتركردنی سیستمی بەرێوەبردن لەلایەن حكوومەتی هەرێمی كوردستانەوە، دەست بە جێبەجێكردنی چەند ڕێكار و پلانێكی چاكسازی كراوە.

 

 

تاوتوێكردنی باوردۆخی ناوچەكە بەگشتی و عێراق بەتایبەتی و چەند بابەتێكی پەیوەندیدار، لایەنێكی دیكەی دیدارەكە بوو.

لە كۆتایی دیدارەكەدا هەردوو سەرۆك وەزیران دیاری و یادگارییان گۆڕییەوە.

 

دوایین هەواڵەکان

هەواڵی زیاتر لە تویتەر

راپۆرتە پڕ بینەرەکان

حالت های رنگی