ئەمڕۆ چوارشەممە 7ـی 1ـی 2014 بەڕێز مەسعود بارزانی سەرۆكی هەرێمی كوردستان پێشوازی لە پێشمەرگەی قارەمانی دەڤەری شنگال قاسم دەربۆ كرد.

لە دیدارێكدا سەرۆك بارزانی سوپاسی خۆڕاگری و قارەمانێتیی قاسم دەربۆ و هەڤاڵانی و هەروەها ئەم پێشمەرگە دڵێرانە كرد كە قارەمانانە بەرگرییان لە چیای شنگال كرد و ڕێگەیان نەدا دەستی گڵاوی تیرۆریستان بگاتە چیای شنگال. سەرۆك بارزانی لەبارەی ئەو كارەساتەی بەسەر خوشك و برا ئێزیدییەكان هاتووە، ئاماژەی بەوەدا كە زوڵم و دەستدرێژیی دوژمنان و تیرۆریستان دژی خوشك و برا ئێزیدییەكان درێژەپێدەری ئەو زوڵمەیە كە دوژمنانی كوردستان لەدژی گەلەكەمان و بێسەروشوێنكردنی 12000 فەیلی و 8000 بارزانی و سەدوهەشتاودوو هەزار كوردی گەرمیان و ناوچەكانی دیكەی كوردستان و هەروەها كیمیابارانكردنی هەڵەبجە ئەنجامیان داوە. دوژمنان ئێزیدییەكانیان بەهۆی كوردبوون و ئێزیدیبوونیان كردە ئامانج و بەلای تیرۆریست و دوژمنانەوە ئێزیدیەكان دووجار تاوانبارن ئەویش چونكە لە نەتەوەی كوردن و ئایینیشیان ئێزیدییە. بۆیە ئێمەیش هەرچی لە تواناماندا بیت دەیكەین بۆ ئەوەی ئێزیدییەكان سەرفیراز و ئازاد بن و وەك هەموو خەڵكی كوردستان بە ئازادیی بژیین.

لەبەرانبەردا فەرماندە و پێشمەرگەی قارەمانی دەڤەری شنگال سوپاسی سەرۆك بارزانی كرد و ئامادەبوونی سەرۆك بارزانیی لە بەرەكانی شەڕ بە هۆكارێكی گەورە زانی لە سەركەوتنی هێزی پێشمەرگە و هەروەها هاتنی سەرۆك بارزانیشی بۆ سەر چیای شنگال بە وەرچەرخانێك لە مێژووی دەڤەری شنگال لە قەلەمدا. قاسم دەربۆ بەڵێنی بە سەرۆك بارزانیدا كە تاهەتایە بەرگریكاری كەرامەت و خاكی كوردستان و شنگال دەبێت و جەختی لەوەیش كردەوە كە ئێزیدییەكان و خەڵكی دەڤەری شنگال، شنگال بە بەشێكی ڕەسەنی كوردستان دەزانن.

ئەمڕۆ دووشەممە 29ـی 12ـی 2014 بە مەبەستی هەواڵپرسین و ئاگاداربوونیان لە ڕەوشی بەرەكانی جەنگ و سوپاسكردنی سەرۆك بارزانی، شاندێكی باڵای هەردوو حزبی یەكگرتووی ئیسلامی و كۆمەڵی ئیسلامی بە سەرۆكایەتیی مامۆستا محەمەد فەرەج ئەمینداری گشتیی یەكگرتوو و مامۆستا عەلی باپیر ئەمیری كۆمەڵی ئیسلامی و ژمارەیەك لە ئەندامانی مەكتەبی سیاسی و سەركردایەتیی هەردوو حزب لە یەكێك لە بارەگاكانی فەرماندەیی پێشمەرگە لە میحوەری ڕۆژئاوای دیجلە، سەردانی بەڕێز مەسعود بارزانی سەرۆكی هەرێمی كوردستانیان كرد.

لە دیدارەكەدا شاندی میوان پیرۆزبایی ئەو سەركەوتنە مەزنەیان لە سەرۆك بارزانی كرد كە هێزی پێشمەرگەی كوردستان لە بەرەكانی ڕووبەڕووبوونەوەی تیرۆریستان لە دەڤەری شنگال و ڕەبیعە و زووممار بەدەستیانهێناوە. سوپاسی ڕۆڵ و ئامادەبوونی سەرۆك بارزانیان كرد كە بەشێوەیەكی ڕاستەوخۆ سەركردایەتیی شەڕ و سەركەوتنەكانی كردووە و پێزانینیان بۆ ماندووبوون و ڕۆڵی كاریگەری سەرۆك بارزانی هەبوو. شاندی میوان دەستخۆشیشی لە هێزەكانی پێشمەرگە كرد كە قارەمانانە بەرگریان لە خاكی نیشتیمان كردووە و لە شەڕێكی بەرفراوان و نێودەوڵەتیدا تیرۆریستانیان تووشی شكست كردووە. شاندی میوان ئەوەیشیان خستەڕوو كە لە سایەی قوربانیدانی پێشمەرگە و خۆڕاگریی خەڵكی كوردستان و هەوڵەكانی سەرۆك بارزانی پێگەی هەرێمی كوردستان لە هەڵكشاندایە و هەست و سۆز و پاڵپشتییەكی نێودەوڵەتیی زۆر باش بۆ هەرێمی كوردستان فەراهەم كراوە. شاندی میوان جەختی لە ڕۆڵی سەرۆك بارزانیش كردەوە لە چارەكردنی كێشە ناوخۆییەكانی هەرێم و یەكڕیزیی ناوخۆیی و هەروەها پەیوەندییەكانی نێوان هەرێم و بەغدا كردەوە.

لە بەرانبەردا سەرۆك بارزانی بە گەرمی بەخێرهاتنی شاندی میوانی كرد و سوپاسی كردن و لە وتەیەكدا بارودۆخی مەیدانی بەرەكانی شەڕ و سەركەوتنەكانی پێشمەرگە لە دەڤەری زووممار و ڕەبیعە و پلانی ئازادكردنی دەڤەری شنگالی بۆ شاندی میوان شی كردەوە و وێڕای ئاماژەدان بە قارەمانێتی و قوربانیدانی پێشمەرگە ئەوەی دووپاتكردەوە كە ئێستا ڕۆحێكی تەحەدی و ڕووبەڕووبوونەوەی زاڵمان و تیرۆریستان لەناو خەڵكی كوردستان دروست بووە و سوپاسی خۆڕاگریی گەلی كوردستان و پاڵپشتیی لایەنە سیاسییەكانیشی كرد كە پشتیوانی هێزی پێشمەرگەی كوردستان بوونە.

سەرۆك بارزانی باسی لە هۆكارەكانی پەلاماردانی داعش بۆ سەر كوردستان كرد و هێمای بەوەدا كە نەیارانی گەلی كوردستان پاڵیان بە داعش وەنا بۆ ئەوەی پەلاماری كوردستان بدەن چونكە كوردستان لە مەسەلەی ڕیفراندۆم و سەربەخۆیی و بووژانەوە ڕێگەیەكی باشی بڕیوە و هەروەها ویستیان لەڕێگەی داعشەوە ناوچەكانی دەرەوەی ئیدارەی هەرێم لە دەستی كوردستان دەربێنن و بیخەنە سەر نەخشەی وەهمیی خیلافەتەكەی داعش. هەروەها ئاماژەیشی بەوەدا كە كوردستان لەژێر هەڕەشەیەكی مەزنی مان و نەماندا بوو بەڵام بە پشتیوانیی خوا و هێز و بازووی پێشمەرگە و پاڵپشتیی گەل و یارمەتیی دۆستانمان ئەو پیلانەی دوژمنان سەری نەگرت. سەرۆك بارزانی زیاتر لەبارەی هەڕەشەی تیرۆریستان دوا و جەختی لەوە كردەوە كە پێویستە لەڕووی فكریشەوە بەڕووی هزری توندڕۆیی بێینەوە و ئەوە ئەركی لایەنە سیاسییەكان و پیاوانی ئایینییە شەڕی ئایدیۆلۆژیای تیرۆر بكەن. سەبارەت بە ئەو خەڵكە عەرەبانەی لە ناوچە ئازادكراوەكاندا دەژیین سەرۆك بارزانی جەختی لەوە كردەوە كە بە پێی پێوەرە ئینسانییەكان و ئەخلاق و فەرهەنگی بەرزی كوردستانیان مامەڵە لەگەڵ ئەو خەڵكە دەكرێت كە هیچ پەیوەندییەكان بە تیرۆریستانی داعشەوە نییە.

هەر لەم كۆبوونەوەیەدا قسە لەبارەی زەروورەتی پاراستنی یەكڕیزیی نیشتیمانی و لەبەرچاوگرتنی پێویستی و ژیانی خەڵكی كوردستان و هەروەها بەنیشتیمانیكردنی هێزەكانی پێشمەرگە و خۆپاراستن لە گوتاری بەرتەسكی حزبایەتی و پاراستنی بەرژەوەندییە باڵاكانی گەلی كوردستان كرا.

 

 

 

 

 

 

 

ڕۆژی ١٤ـی ١٢ـی ٢٠١٤ بەڕێز مەسعود بارزانی سەرۆکی هەرێمی کوردستان لە نامەیەکدا بۆ وەزارەتی پێشمەرگەی حکوومەتی هەرێمی کوردستان، لە حەوت خاڵدا ڕێنمایی نوێی بۆ یەکخستنەوە و ڕێکخستنەوەی هێزی پێشمەرگەی کوردستان ئاراستەی وەزارەتی پێشمەرگە کردووە.

ئەمە دەقی نامەکەیە:

بۆ/ وەزارەتی پێشمەرگەی حکوومەتی هەرێمی کوردستان

بابەت: ڕێنمایی

لەبەر ئەوەی کە وەزارەتی پێشمەرگە وەزارەتێکی گرینگە و ئەرکێکی قورس و پیرۆزی لەسەرشانە، بۆیە وەزارەتی هەموو گەلی کوردستانە. ئێستاش کە حکوومەتی هەرێمی کوردستان، حکوومەتێکی بنکەفراوانە، نەک پەنجا بە پەنجای نێوان دوو حزب، کەواتە دەبێ ڕەفتاری کارمەندانی وەزارەت ڕەفتارێکی نەتەوەیی بێت نەک حزبی.

بۆیە پێویستە زۆر بە وردی ڕەچاوی ئەم خاڵانە بکرێت:

1. بەهیچ جۆرێک کاری ڕێکخستن و حزبایەتی لەناو وەزارەت ناکرێت و ئەو کەسەی بیهەوێت لەناو وەزارەت حزبایەتی بکات با دەست لەکار بکێشێتەوە و بگەڕێتەوە بۆ لای حزبەکەی خۆی.

2. دابەشکردنی چەک و تەقەمەنی بەپێی پێویستیی بەرەکانی جەنگ دەبێت، نەک لەسەر بنەمای پەنجا بە پەنجای حزبی.

3. بوودجەی هەموو هێزەکانی پێشمەرگە، بە لیواکانی وەزارەت و هەردوو یەکەی ٧٠ و٨٠ شەوە، دەبێ لەلایەن وەزارەتی پێشمەرگەوە دابەش بکرێت، نەک بە شێوازی پێشوو.

4. پێویستە هەرچی زووتر هێزی پێشمەرگەی کوردستان بە ڕێکوپێکی یەکبخرێتەوە. بە شێوەیەک کە نابێ حزبایەتی تێدا بێت.

5. گۆڕانکاری لەو فەرماندەییانە بکرێت کە لە شەڕی دژی تیرۆریستاندا نەیانتوانیوە ئەرکی خۆیان بە باشی جێبەجێ بکەن و فەرماندەی تر کە چالاک بوون لە جێگەیان دابندرێن.

6. هەر کارمەندێک، لە هەر ئاست و پۆستێکدا بێت، ڕاپۆرت لەسەر ڕەوشی وەزارەت بداتە هەر حزبێک، سزا دەدرێت و دەدرێتە دادگای سەربازی.

7. هەر هێزێک لە دەرەوەی وەزارەت هەبێت بە نایاسایی دەژمێردرێت و کەس بۆی نییە هێزی تازە لە دەرەوەی وەزارەت دروست بکات.



مسعود بارزانی

سەرۆکی هەرێمی کوردستان

١٤/١٢/٢٠١٤

 

 

 

 

 

 

 

ئەمڕۆ شەممە 2٧ـی 12ـی 2014 لە شاری هەولێر بەڕێز مەسعود بارزانی سەرۆكی هەرێمی كوردستان پێشوازی لە بەڕێز جۆن مه‌ككه‌ین سیناتۆری كۆماریخوازه‌كانی ئەمەریکا و شاندێكی یاوەری كرد كە پێكهاتبوون لە جۆزێف پینینگتۆن کونسوڵی گشتیی ئەمەریکا لە هەولێر و ژمارەیەک ڕاوێژکار و ئەفسەری سوپای ئەمەریکا و لەگەڵیان كۆبۆوە.

له‌م كۆبوونه‌وه‌یه‌دا کە بە ئامادەبوونی هەریەک لە بەڕێزان مەسروور بارزانی ڕاوێژکاری ئەنجوومەنی ئاساییشی هەرێم و مستەفا سەید قادر وەزیری پێشمەرگە و کەریم شنگالی وەزیری ناوخۆ و فەلاح مستەفا بەرپرسی فەرمانگەی پەیوەندییەکانی دەروەی هەرێم، بەڕێوە چوو، سەرەتا بەڕێز جۆن مه‌ككه‌ین خۆشحاڵیی خۆی بە سەردانی هەرێم ڕاگەیاند و ڕێز و پێزانینی خۆی بۆ ڕۆڵی سەرۆک بارزانی و هەرێمی کوردستان، لە شەڕی ڕووبەڕووبوونەوەی تیرۆردا نیشان دا و ڕایگەیاند کە دەیەوێ پرسە و سەرەخۆشیی خۆی پێشکەش بە سەرۆک بارزانی و گەلی کوردستان بکات بۆ شەهیدبوونی ئەو پیاوە ئازایانەی پێشمەرگە کە لەم شەڕەدا گیانی خۆیان بەخت کردووە.

هەروەها بەڕێز جۆن مەککەین خۆشحاڵیی خۆی بۆ دەستپێکردنی سەرەتایەکی نوێ لە پەیوەندییەکانی نێوان هەرێمی کوردستان و بەغدا نیشان دا.

هەر لە دیدارەکەدا بەڕێز جۆن مه‌ككه‌ین ڕایگەیاند کە لەبەر ئەوەی ئاگادارە سەرۆکی هەرێمی کوردستان خۆی لەبەرەکانی شەڕە، بۆیە هاتووە لە نزیکەوە گوێ لە بۆچوون و سەرنجەکانی سەرۆک بارزانی بگرێت سەبارەت بە هەڵوێستی سیاسی و سەربازیی بەرەکانی شەڕ و پێداویستییەکانی پێشمەرگە لە شەڕی دژی تیرۆریستاندا. جەختیشی لەوە کردەوە کە گەل و حکوومەتی ئەمەریکا بەردەوام دەبن لە هاوکاریی و پشتیوانییان بۆ هەرێمی کوردستان لە شەڕی دژی تیرۆر و جەختی لە پەرەپێدانی پەیوەندیی لەمیژینەی نێوان هەردوو گەلی ئەمەریکا و هەرێمی کوردستان کردەوە.

لە بەرانبەردا سەرۆک بارزانی بەخێرهاتنی شاندی میوانی کرد و سوپاسی گەل و حکوومەتی ئەمەریکا و دۆستان و هێزی هاوپەیمانانی کرد کە لە شەڕی دژی تیرۆریستاندا پشتیوانی هەرێمی کوردستان بوون.

دواتر سەرۆک بارزانی هۆکارەکانی پەیدابوون و گەشەکردنی ڕێکخراوی تیرۆریستیی داعش و کەوتنی موسڵ و پەلاماردانی هەرێمی کوردستان لەلایەن تیرۆریستانی بۆ شاندی میوان شی کردەوە. سەبارەت بە بارودۆخی مەیدانیی بەرەکانی شەڕ، سەرۆک بارزانی ئاماژەی بەوە دا کە پێشمەرگە سەرکەوتنی زۆر گەورەی تۆمار کردووە و گورزی کەمەرشکێنیان لە تیرۆریستان داوە.

لەبەشێکی دیکەی قسەکانیدا، سەرۆک بارزانی ئاماژەی بە هەڕەشەی تیرۆر بۆ سەر جیهان کرد و ڕایگەیاند: تیرۆر هەڕەشەیەکی جیدییە بۆ سەر هەموو گەل و نەتەوە و دەوڵەتان و هەموولایەکیشی کردۆتە ئامانج، ئەو تیرۆریستانەش کە هاتوونەتە ڕیزی ڕێکخراوی تیرۆریستیی داعش ڕەگەزنامەی جۆراوجۆریان هەیە، بۆیە ڕووبەڕووبوونەوەشیان پێویستی بە هەماهەنگی و هەوڵی هەمەلایەنەی دەوڵەتان هەیە و پێویستە لەپاڵ ڕێکاری سەربازی، لە ڕووی فکری و وشک کردنی سەرچاوەی دارایی و ڕێگرتن لە پەیوەندییکردنی تیرۆریستان، دژایەتیی ئەو تیرۆریستانە بکرێت.

هەروەها سەرۆک بارزانی ڕایگەیاند: دەبێ دەوڵەتان هەماهەنگییان هەبێ و لە قوڵایی مەترسییەکە تێ بگەن و نابێ هیچ دەوڵەت یان لایەنێک تیرۆر و تیرۆریستان وەک کارت بەکار بهێنێت و یاریی بەو کارتە بکات، چونکە تیرۆر ئاگرێکە هەمووان پێکەوە دەسووتێنێت.

هەر لە قسەکانیدا سەرۆک بارزانی ئاماژەی بە ڕەوشی شاری کۆبانێ کرد و سوپاسی ئەمەریکای کرد کە بە لێدانی تیرۆریستان، پشتیوانیی لە پێشمەرگە و شەڕڤانانی ئەوشارە دەکات.

باسکردنی چۆنییەتیی هەماهەنگیی زیاتری پێشمەرگە و هێزی هاوپەیمانان و بارودۆخی شاری مووسڵ ڕەوشی سیاسی و ئەمنیی عێراق و سوریا و ناوچەکە، تەورەرێکی تری کۆبوونەوەکە بوو.

 

 

 

 

ئەمڕۆ سێشەممە 23ـی 12ـی 2014 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە خاتوو فێدریكا مۆگێرینی بەرپرسی سیاسەتی دەرەوەی یەكێتیی ئەورووپا و شاندێكی یاوەری كرد.

لە سەرەتای كۆبوونەوەكەدا بەرپرسی سیاسەتی دەرەوەی یەكێتیی ئەورووپا پیرۆزبایی لە سەرۆك بارزانی كرد بە بۆنەی ئەو سەركەوتنانەی هێزی پێشمەرگە لە بەرەكانی شەڕی دژی داعش بەدەستیان هێناوە و خۆشحاڵیی خۆیشی نیشان دا كە لە ڕووبەڕووبوونەوەی تیرۆردا لە كوردستاندا هەواڵی خۆش هەیە، بە تایبەت بۆ ئێزیدییەكان. بەرپرسی سیاسەتی دەرەوەی یەكێتیی ئەورووپا ئەوەیشی باس كرد كە یەكێتیی ئەورووپا لەم شەڕەدا پاڵپشتی هەرێمی كوردستانە و ڕایگەیاند بۆ ئەوە هاتووە بزانێ یەكێتیی ئەورووپا چۆن بتوانێت زیاتر یارمەتیی هەرێمی كوردستان بدات. هەروەها ئاماژەیشی بەوەدا كە یەكێتیی ئەورووپا هانی وڵاتانی ئەندامی دەدات كە لە هاوكارییە مرۆیی و سەربازییەكانیان بۆ هەرێمی كوردستان بەردەوام بن.

لە بەشێكی دیكەی قسەكانیدا بەرپرسی سیاسەتی دەرەوەی یەكێتی ئەورووپا سوپاسی پێشمەرگە و هەرێمی كوردستانی كرد كە ڕووبەڕووی تیرۆریستان بوونەتەوە و ژمارەیەكی زۆری پەنابەریان پاراستووە و لە شەڕی دژی داعشدا سەركەوتنی بێوێنەیان تۆمار كردووە. خاتوو فێدریكا مۆگێرینی لەبارەی سەركەوتنەكانی پێشمەرگە زیاتر دوا و هێمای بەوەکرد كە لەم شەڕەدا كوردستان سێ سەركەوتنی بەدەستهێناوە، لەڕووی سەربازی داعشی شكاندووە و لەڕووی دەروونیش سەركەوت و ئەوەی بە جیهان نیشان دا كە دەكرێ داعش بشكێت و ئومێدەكان بگەڕێنەوە و هەروەها كوردستان لەڕووی كولتووریشەوە سەركەوت و سەلماندی كە لەگەڵ پێكەوەژیانە و پێكهاتە ئایینی و نەتەوەییەكان دەپارێزێت.

بەرپرسی سیاسەتی دەرەوەی یەكێتیی ئەورووپا ڕاشیگەیاند ئێمە پێزانینمان بۆ سەرکەوتنەکانی پێشمەرگە هەیە و ئێوە پێشانی دنیاتان دا کە دەکرێ خەڵک بەهەموو جیاوازییەکانیانەوە پێکەوە بژین، ئێوە توانیتان کارێک بکەن کە ئومێد بۆ خەڵکی لێقەوماو بگەڕێتەوە و زەردەخەنە بخەنەوە سەر لێویان.

لە بەرانبەردا سەرۆک بارزانی سوپاسی یەکێتیی ئەورووپا و هاوپەیمانیی نێودەوڵەتی کرد بۆ ئەو هاوکارییانەی لەڕووی سەربازی و مرۆییەوە پێشکەشی هەرێمی کوردستانیان کردووە و ڕایگەیاند کە بوونی دۆستی وەک ئێوە توانای زیاتری بە گەلەکەمان بەخشی لە بەرەوڕووبوونەوەی دوژمنێکی دڕندەی تیرۆریست.

سەرۆک بارزانی جەختیشی کردەوە کە ئەگەرچی شەڕکردن لەگەڵ دوژمنێکی مەترسیدار و دڕندەی وەک داعش شەڕێکی قورسە چونکە ئەوان دژی هەموو بەهایەکی مرۆیی و دژی ژیان و ئازادین و چەکی پێشکەوتووی سوپای دوو دەوڵەتی لەبەردەستدایە و تاوانی زۆر دڕندانە و نامرۆڤانەیان ئەنجام داوە کە پێشتر هیچ دیکتاتۆرێک دەرهەق بە گەلی کورد ئەنجامی نەداوە، بەڵام بۆ ئێمە شەڕەفێکی گەورەیە کە پێشمەرگەی کوردستان لەجیاتی هەموو جیهانی ئازاد شەڕ دەکات و تیرۆریستان تێکدەشکێنێت.

سەرۆک بارزانی تەئکیدیشی کردەوە کە پێشمەرگە توانی هەیبەت و ئەفسانەی داعش بشکێنێت و ئەوەی کە پێشتر دەگووترا داعش هێزێکە هەرگیز ناشکێت لەلایەن پێشمەرگەوە پووچەڵ کرایەوە. هەروەها جەختیشی کردەوە کە داعش هیچ داهاتوویەکی نییە و پێشمەرگە لە تێکشکاندن و دەرپەڕاندنی تیرۆریستان بەردەوام دەبێت.

سەبارەت بە هاوکاریی پەنابەر و لێقەوماوان سەرۆک بارزانی جەختی کردەوە کە بەهەموو توانایەکمانەوە دەیانپارێزین و هاوکارییان دەکەین بۆ ئەوەی بتوانن بگەڕێنەوە زێدی خۆیان و داوای لە ئاوارە کریستیانەکانیش کرد بێ ئومێد نەبن و بیر لە بەجێهێشتنی وڵات نەکەنەوە چونکە داعش دیاردەیەکی کاتییە و تێکدەشکێندرێت و کوردستانیش وەک هەمیشە وڵاتی هەمووانە، یا هەموومان پێکەوە بە سەربەرزی دەژین یان پێکەوە دەمرین.

باسکردنی ئاستی پەیوەندییەکانی هەرێمی کوردستان و بەغدا و ڕەوشی سیاسی و ئەمنیی عێراق و سوریا تەوەرێکی دیکەی کۆبوونەوەکە بوو.

دوای کۆبوونەوەکەیش سەرۆک بارزانی و بەرپرسی سیاسەتی دەرەوەی یەكێتی ئەورووپا کۆنگرەیەکی ڕۆژنامەنووسیان ئەنجام دا و وەڵامی پرسیارەکانی کەناڵەکانی ڕاگەیاندنیان دایەوە.

بۆ بینینی دەقی کۆنگرەیی ڕۆژنامەنووسی سەرۆک بارزانی و بەرپرسی سیاسەتی دەرەوەی یەكێتی ئەورووپا كلیكی ئەم نووسینە بكە.

ئەمڕۆ هەینی 26ـی 12ـی 2014 لە شاری هەولێر بەڕێز مەسعود بارزانی سەرۆكی هەرێمی كوردستان پێشوازی لە عەلی لاریجانی سەرۆكی ئەنجوومەنی شوورای ئیسلامیی ئێران و شاندێكی یاوەری كرد كە پێكهاتبوون لە ژمارەیەك نوێنەر و ئەندام و ڕاوێژكاری ئەنجوومەنی شوورای ئیسلامیی ئێران و مورتەزا عەبادی كونسوڵی گشتیی كۆماری ئیسلامیی ئێران لە هەولێر و، لەگەڵیان كۆبۆوە.

ئێوارەی ئەمڕۆ هەینی 19ـی 12ـی 2014 بەڕێز حەیدەر عەبادی سەرۆك وەزیرانی عێراقی فیدڕاڵ لەڕێی تەلەفۆنەوە پەیوەندی بە بەڕێز مەسعود بارزانی سەرۆكی هەرێمی كوردستان كرد.

لەم پەیوەندییە تەلەفۆنییەدا سەرۆك وەزیرانی عێراقی فیدڕاڵ پیرۆزبایی لە سەرۆك بارزانی كرد بە بۆنەی سەركەوتنەكانی ئەم دواییەی هێزەكانی پێشمەرگەی كوردستان لە دەڤەری زووممار و شەنگال و شكاندنی ئابڵۆقەی تیرۆریستانی داعش لەسەر چیای شنگال. هەروەها دەستخۆشیشی لە هێزەكانی پێشمەرگە كرد بۆ ئەو دەستكەوت و سەركەوتنانەی لەشەڕی دژی تیرۆریستانی داعش بەدەستیان هێناوە.

هەر لەم پەیوەندییە تەلەفۆنییەدا سەرۆك وەزیرانی عێراقی فیدڕاڵ پشتگیری و پشتیوانی حكوومەتی عێراقی بۆ هەرێمی كوردستان و هێزەكانی پێشمەرگە لە شەڕی دژی تیرۆریستان دووپات كردەوە و جەختی لە هەماهەنگی و پەیوەندیی بەردەوامی هەردوولا كردەوە.

ئێوەارەی ئەمڕۆ یەكشەممە 21ـی 12ـی 2014 بەڕێز مەسعود بارزانی سەرۆكی هەرێمی كوردستان لە چوارچێوەی سەردانەكەی بۆ چیای شنگال سەردانی مەزاری شەرفەدینی لە چیای شنگال كرد كە بە یەكێك لە شوێنە پیرۆزەكانی كوردانی ئێزیدی هەژمار دەكرێت.

لەم سەردانەیدا سەرۆك بارزانی لە لایەن ژمارەیەك كەسایەتیی ئایینی و كۆمەڵایەتیی دەڤەری شنگال و ئێزیدی پێشوازیی لێكرا و ئامادەبووانی مەزاری شەرفەدین ستاییشی ڕۆڵی سەرۆك بارزانیان كرد لە سەركەوتنی ئۆپڕاسیۆنی ئازادكردنی دەڤەری شنگال. سەرۆك بارزانیش پیرۆزبایی ئەو سەركەوتنەی لە خوشك و برایانی ئێزیدی و خەڵكی ناوچەكە كرد و پێزانینیشی بۆ ڕۆڵی قارەمانانەی هێزی پێشمەرگەی كوردستان هەبوو و سڵاوی خۆیشی بۆ ئەو شەهیدە قارەمانانە نارد كە گیانی خۆیان لەپێناو بەرگریكردن لە خاك و كەرامەتی كوردستان فیدا كردووە.

 

 

 

 

دوایین هەواڵەکان

هەواڵی زیاتر لە تویتەر

راپۆرتە پڕ بینەرەکان

حالت های رنگی