ئەمڕۆ یەكشەممە 7ـی 9ـی 2014 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە شاندێكی قەداسەتی پاتریاك مار دەنخای چوارەم سەرۆكی كەنیسەی ڕۆژهەڵاتی ئاشووری كرد كە بە سەرۆكایەتیی مەتران مار ملیس زیا سەردانی كوردستانیان كردووە.

لە دیدارێكدا سەرۆكی شاندەكە سوپاس و پێزانینی سەرۆكی كەنیسەی ڕۆژهەڵاتی ئاشووری لە جیهانی بە سەرۆك بارزانی ڕاگەیاند بۆ ئەو هەوڵانەی هەرێمی كوردستان بۆ پاراستن و حەواندنەوەی ئاوارە و پەنابەرانی ئەنجامی داوە و سوپاسی كرانەوە و دڵفراوانیی خەڵكی كوردستانیشی كرد و ئاماژەی بەوەدا كە چارەنووسی هەموو پێكهاتەكانی كوردستان هاوبەشە و جێگەی شانازییە كوردستان بووەتە پەناگەیەكی ئارام بۆ مەسیحییەكان و پەیڕەوانی ئایین و ئایینزاكانی دیكەی عێراق. سەرۆكی شاندی سەرۆكی كەنیسەی ڕۆژهەڵاتی ئاشووری لە جیهان ئەوەیشی دووپات كردەوە كە پێویستە وڵاتانی جیهان هاوكار و پاڵپشتیی هەرێمی كوردستان بن لە شەڕكردنی دژی تیرۆریستان و یارمەتیدانی ئاوارەكان. سەرۆكی شاندی سەرۆكی كەنیسەی ڕۆژهەڵاتی ئاشووری لە جیهان هیوای سەركەوتنی بۆ سەرۆك بارزانی و گەلی كوردستان خواست لە تێپەڕاندنی ئەو شەڕ و كارەساتەی بەسەر كوردستاندا سەپێندراوە.

لەبەرانبەردا سەرۆك بارزانی بەگەرمی بەخێرهاتنی شاندی میوانی كرد و وێڕای ئاماژەدان بە پەیوەندیی مێژوویی نێوان پێكهاتەكان كوردستان جەختی لەوە كردەوە كە كوردستان نیشتیمانی هەمووانە و پێویستە هەموو لایەك تێیدا بە ئازادی و سەربەرزی بژیین. سەرۆك بارزانی ئەوەیشی خستەڕوو كە لەگەڵ ئەوەدا نییە خەڵك وڵاتی خۆیان جێبهێڵن چونكە ئەم بارودۆخە كاتییە و تێدەپەڕی و تیرۆر و تیرۆریستان هیچ ئاییندە و پێگەیەكیان لەم وڵاتەدا نابێت و ئاماژەكانی شكست و پاشەكشەیان بەڕوونی دەركەوتووە. سەرۆك بارزانی جەختی لەوەیش كردەوە كە داهاتوویەكی ڕوون لەبەردەم خەڵكی كوردستانە و ئەم داهاتووییە زۆر باشتر دەبێت لە ئێستا و ڕابردوو. لە درێژەی قسەكانیدا سەرۆك بارزانی گەشبینیی خۆی نیشاندا بەوەی كە ئەم بارودۆخە لە بەرژەوەندیی گەلی كوردستان كۆتایی دێت چونكە كوردستان لەسەر ڕێگەیەكی ڕاستە و گەلەكەمان خاوەنی دۆزێكی ڕەوا و دروستە.

 

 

 

 

ئەمڕۆ پێنجشەممە 4ـی 9ـی 2014 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە جۆن بیڕد وەزیری دەرەوەی كەنادا و شاندی یاوەری كرد كە پێكهاتبوون لە ژمارەیەك پارلەمانتاری ئەم وڵاتە و باڵیۆزی كەنادا لە عێراق.

لە دیدارێكداوەزیری دەرەوەی كەنادا خۆشحاڵیی خۆی بۆ دیدار لەگەڵ سەرۆك بارزانی و سەردانی بۆ كوردستان نیشاندا و ڕایگەیاند كە گەلی كەنادا و حكوومەت و لایەنەكانی ئۆپۆزیسیۆنی وڵاتەكەی ئامادەن پاڵپشت و هاوكاری كوردستان بن لە شەڕی دژی تیرۆردا و ئەوەیشی خستەڕوو كە لەگەڵتان و شانبەشانتان دەبین لەشەڕی تیرۆریستاندا بۆ ئەوەی سەربكەون و وڵاتێكی گشتگیر و ئازاد و سەقامگیر و ئاشتیخواز بنیات بنێن. وەزیری دەرەوەی كەنادا ئاماژەی بەوەدا كە وڵاتەكەی و جیهانی ئازاد بە هیچ شێوەیەك وەحشیگەریی تیرۆریستان قبوڵ ناكەن و نیگەرانیی خۆیشی نیشاندا لەمەڕ ئەو هێرشانەی كراونەتە سەر پێكهاتە ئایینی و نەتەوەییەكانی عێراق بە تایبەت ئەو شوێنەی كە جێگەی ئومێدی هەموو لایەكە. وەزیریدەرەوەیكەنادا هێمای بە نێودەوڵەتیبوونی هەڕەشەی تیرۆر دا و شەڕكردنی لەدژی تیرۆری بە ئەركێكی هەمەلایەنە زانی.

شاندە یاوەرەكەی وەزیری دەرەوەی كەنادا دەستخۆشییان لە سەرۆك بارزانی و گەلی كوردستان كرد بۆ حەواندنەوە و پاراستنی ئەو هاووڵاتییانەی ڕوویان لە كوردستان كردووە و سوپاسی قارەمانێتیی هێزی پێشمەرگەی كوردستانیان كرد كە ڕێگەیان لە گەشە و پێشڕەویی تیرۆریستان كردووە و هەروەها سەرەخۆشییان لە سەرۆك بارزانی و گەلی كوردستان كرد و هاوخەمیی خۆشیان نیشاندا بۆ ئەو پێشمەرگانەی لە بەرەكانی جەنگ بوونەتە قوربانی و شەهید بوونە.

لە بەرانبەردا سەرۆك بارزانی بەگەرمی بەخێرهاتنی وەزیریدەرەوەیكەنادا و شاندە یاوەرەكەی كرد و ڕایگەیاند ئەو سەردانە پەیامێكی بەهێزی گەلی كەنادایە بۆ خەڵكی ئێمە كە لەم شەڕەدا كوردستان لەسەر ڕێگەی ڕاستە و تەنیا نییە و سوپاسی حكوومەت و گەلی كەنادا و جیهانی ئازادی كرد كە پاڵپشتی گەلی كوردستانن لەشەڕی تیرۆریستاندا. سەرۆك بارزانی هێمایشی بەوەدا كە جێگەی شانازییە پێشمەرگە و گەلی كوردستان لەبری جیهانی ئازاد و بۆ پاراستنی بەها مرۆڤییەكان شەڕی تیرۆریستانی دەكات.

سەرۆك بارزانی لە درێژەی قسەكانیدا ئەوەی خستەڕوو كە لەژێر ئابلوقەی دە ساڵە و بەو ئیمكانیاتە متوازەعەی لە دەستی پێشمەرگە دایە پێشمەرگە بە ئیرادەی خۆی توانی ڕێگە لە پێشڕەویی دەوڵەتێكی پڕچەكی تیرۆریستی بگرێت و ئێستا لە بەرەكانی شەڕ دەستپێشخەری لەدەستی پێشمەرگەیە و هێزە سەرەكییەكانی داعش گورزی كاریگەرییان بەر كەوتووە. سەرۆك بارزانی ئەوەیشی ڕاگەیاند كە بە یارمەتیی دۆستان و جیهانی ئازاد پێشمەرگە لە شەڕكردن و تێكشكاندن و ڕاوەدونانی تیرۆریستان بەردەوام دەبێت.

سەرۆك بارزانی ئەوەیشی بۆ شاندی میوان شی كردەوە كە ئاستی كارەسات و ژمارەی ئاوارەكان ئەوەندە بەرزە كە لە تواناكانی هەرێمی كوردستان تێپەڕیوە و تەنانەت بەهۆی بوونی ئاوارەكان لەناو قوتابخانەكان گرفت بۆ پڕۆسەی خوێندنی قوتابیان دروست بووە. پەیوەست بە چارەسەریی كێشەكانی ئاوارەكان سەرۆك بارزانی ڕایگەیاند كە چارەسەری سەرەكیی ئەوەیە بتوانرێت ئاوارەكان بۆ شوێنەكانی خۆیان بگەڕێنەوە و بشپارێزرێن.
پڕۆسەی سیاسیی عێراق و پەیوەندییەكانی نێوان كەنادا و هەرێمی كوردستان تەوەرێكی دیكەی دیدارەكە بوو.

 

 

 

 

ئەمڕۆ چوارشەممە 3ـی 9ـی 2014 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە سیناتۆر كارل لێڤین سیناتۆری هەرێمی میشیگانی ویلایەتە یەكگرتووەكانی ئەمەریكا و شاندێكی یاوەری كرد.

لە دیدارێكدا سیناتۆری هەرێمی میشیگانی ویلایەتە یەكگرتووەكانی ئەمەریكا سوپاسی سەرۆك بارزانیی كرد بۆ ڕەخساندنی ئەم دیدارە و ڕایگەیاند گەلی ئەمەریكا هەست بە نزیكییەكی زۆر دەكات لەگەڵ گەلی كوردستان و ستاییشی كولتووری پێكەوەژیانی گەلی كوردی كرد كە لە ناوچەی ڕۆژهەڵاتی ناوەڕاست بێوێنەیە، كولتوورێك كە هیچ جیاوازییەك لەنێوان پەیڕەوانی ئایینەكان نابینێت و هەروەها دەستخۆشیشی لە حیكمەت و دووربینیی سەرۆك بارزانی و سەركردایەتیی كوردستان كرد كە بەردەوام كار بۆ چارەسەركردنی كێشەكان و لە هەمانكاتیشدا بەدیهێنانی خەونەكانی گەلەكەیان دەكەن. سیناتۆری هەرێمی میشیگانی ویلایەتە یەكگرتووەكانی ئەمەریكا لە درێژەی قسەكانیدا نیگەرانیی خۆی بۆ گەشەكردنی تواناكانی تیرۆریستان و ئەو هەڕەشەیە نیشاندا كە تیرۆریستان لەدژی كوردستان و پێكهاتە ئایینی و نەتەوەییەكانی نەینەوا دروستیان كردووە.

لەبەرانبەردا سەرۆك بارزانی بە گەرمی بەخێرهاتنی سیناتۆر كارل لێڤین و شاندی یاوەری كرد و سوپاسی گەل و سەرۆك و جێگری سەرۆكی ئەمەریكایشی كرد كە لە شەڕی دژی تیرۆردا یارمەتیی كوردستانیان دا و ئەوەیشی خستەڕوو كە ئێمە نامانەوێ ئەمەریكا و جیهانی ئازاد ڕۆڵەكانیان بۆ شەڕ بنێرێنە كوردستان بەڵكو تەنیا دەمانەوێ پاڵپشتیی مرۆیی و سەربازی بۆ گەلی كوردستان و پێشمەرگە دابین بكەن بۆ ئەوەی بتوانین بەرگری لە خۆمان بكەین و هاووڵاتیان و پێكهاتە ئایینی و نەتەوەییەكان بپارێزین. سەرۆك بارزانی هێمای بەو ئابلۆقە دە ساڵەیە دا كە لە لایەن حكوومەتی عێراق بەسەر پێشمەرگە سەپێندرا بوو كە پێچەوانەی ڕێكەوتنەكانیش بوو و بووە هۆی ئەوەی هێزەكانی پێشمەرگە لە چەكی نوێ و مەشق و ڕاهێنانی بەردەوام بێبەش بێت و ڕایگەیاند لەگەڵ هەموو ئەو گرفتانە كە ڕێگە نادەین بە هیچ شێوەیەك تیرۆر پێگەی هەبێت لە كوردستان و بە توندترین شێوە بەرەنگاری دەبینەوە.

بارودۆخ و گوزەرانی ئاوارەكان تەوەرێكی دیكەی ئەم دانیشتنە بوو و سەرۆك بارزانی ئاماژەی بەو ژمارە زۆرەی ئاوارە دا كە ڕوویان لە كوردستان كردووە و ئەوەی خستەڕوو كە حەواندنەوەی ئەو ژمارە گەورەیەی ئاوارە و پەنابەر لە تواناكانی هەرێمی كوردستان تێپەڕیوە و ڕایشیگەیاند كە چارەسەری گرفتی ئاوارەكان ئەوەیە كە بتوانن بۆ شوێنەكانی خۆیان بگەڕێنەوە.

پڕۆسەی سیاسیی عێراق و ئاستی هەماهەنگی و پەیوەندیی نێوان ئەمەریكا و هەرێمی كوردستان تەوەرێكی دیكەی كۆبوونەوەی نێوان سەرۆك بارزانی و سیناتۆری هەرێمی میشیگانی ویلایەتە یەكگرتووەكانی ئەمەریكا بوو.

 

 

 

 

ئەمڕۆ سێشەممە 2ـی 9ـی 2014 لە سەلاحەدین بەڕێز مەسعود بارزانی پێشوازی لە ئەیاد عەلاوی سەرۆكی لیستی نیشتیمانیی عێراقی لە ئەنجوومەنی نوێنەرانی عێراق كرد.

لە دیدارێكدا دوایین پێشهاتە سیاسی و ئەمنییەكانی عێراق و پڕۆسەی پێكهێنانی حكوومەتی تازەی عێراقی خرایە بەر باس هەروەها هەڕەشەكانی تیرۆر بۆ سەر كوردستان و عێراق و سەركەوتنەكانی ئەم دواییەی پێشمەرگەی كوردستان لە بەرەكانی جەنگی دژی تیرۆریستانی داعش تاوتوێ كرا و قسەیش لەبارەی بارەدۆخی ئاوارەكان و ڕەوش و گوزەرانیان كرا.

هەر لەم دیدارەدا هەردوو لا لەسەر ئەوە هاوڕا بوون كە پێویستە لە پێكهێنانی حكوومەتی داهاتوودا ویست و داواكاریی هەموو پێكهاتەكانی عێراق لەبەر چاو بگیرێت. ئەوەیش دووپات كرایەوە كە بۆسەركەوتن لە شەڕی تیرۆریستان پێویستە چارەسەری سیاسیی گونجاوییش بدۆزرێتەوە. لەو دیدارەدا جەختیش لەوە كرایەوە كە پێویستە حكوومەتی عێراقی پابەندی ئەو بەرپرسیارێتییە بێت كە بۆ یارمەتیدان و گەڕاندنەوەی ئاوارەكان لەسەر شانیەتی.

ئێوارەی ئەمڕۆ شەممە ٣٠ـی ٨ـی ٢٠١٤ بەڕێز مەسعود بارزانی سەرۆکی هەرێمی کوردستان لە سەلاحەدین پێشوازی لە دکتۆر ئەحمەد چەلەبی سەرۆکی کۆنگرەی نیشتیمانیی عێراقی کرد. لە دیدارەکەدا ڕەوشی سیاسیی و سەربازیی ئێستای کوردستان و سەرکەوتنەکانی پێشمەرگە لە بەرانبەر تیرۆریستان و ڕەوشی سیاسی و ئەمنیی عێراق خرانە بەرباس و تەئکید لەوە کرایەوە کە تیرۆریستان بوونەتە هەڕەشە بۆ سەر هەموو مرۆڤایەتی و هیچ سنوور و بەهایەک ناناسن، بۆیە پێویستە هەموولایەک بۆ ڕیشەکێشکردنی تیرۆر هاوکار بن.

هەر لە دیدارەکەدا باس لە پرۆسەی پێکهێنانی حکوومەتی نوێی عێراق کرا و هەردوولا هاوڕابوون کە پێویستە کابینەی نوێی حکوومەت لەسەر بنەمای شەراکەتی ڕاستەقینە بێت و ڕێز لە پێگە و خواستی ڕەوای هەموو پێکهاتەکان بگیرێت و پرۆسەی سیاسیی عێراق بەپێی دەستوور ڕاست بکرێتەوە.

 

 

 

 

ئەمڕۆ پێنجشەممە 28ـی 8ـی 2014 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە جەنەڕاڵ سیر سیمۆن نێردراوی تایبەتی ئاساییشی حكوومەتی بریتانیا بۆ هەرێمی كوردستان و شاندێكی یاوەری كرد.

لە دیدارێكدا نێردراوی تایبەتی ئاساییشی حكوومەتی بریتانیا سوپاسی سەرۆك بارزانی كرد بۆ ڕەخساندنی ئەم دیدارە و سڵاوی سەرۆك وەزیران و وەزیری دەرەوەی بریتانیاشی بە سەرۆك بارزانی گەیاند و هەروەها پێزانینیشی هەبوو بۆ ڕۆڵی هێزەكانی پێشمەرگە لە شەڕی دژی تیرۆریستان و دەستخۆشی لەو سەقامگیری و سەركەوتن و دەستپێشخەرییە كرد كە ئێستا لە بەرەكانی جەنگدا لە بەرانبەر تیرۆریستانی داعش هاتووتە ئاراوە. نێردراوی تایبەتی ئاساییشی حكوومەتی بریتانیا سوپاسی هەوڵەكانی حكوومەتی هەرێمی كوردستانی كرد بۆ یارمەتیدانی ئاوارەكان و پاراستنیان لە هەڕەشەی تیرۆریستان.

نێردراوی تایبەتی ئاساییشی حكوومەتی بریتانیا ئەوەی خستەڕوو كە لە لایەن سەرۆك وەزیرانی بریتانیاوە هاتووە بۆ ئەوەی لەسەر مسۆگەربوونی یارمەتییە مرۆیی و سەربازییەكانی وڵاتەكەی بۆ هەرێمی كوردستان كار بكات. هەروەها جەختیشی لە بەردەوامیی هەماهەنگی و پەیوەندیی نێوان هەرێمی كوردستان و بریتانیای كردەوە لە ڕووبەڕووبوونەوەی هەڕەشەی تیرۆریستانی داعش و تێكشكاندنیان.

لە بەرانبەردا سەرۆك بارزانی بەخێرهاتنی شاندی حكوومەتی بریتانیای كرد و سوپاسی هەڵوێستی سەرۆك وەزیران و حكوومەتی بریتانیای كرد لە یارمەتیدانی هەرێمی كوردستان و بە سوودبەخش و كاریگەری وەسفكرد. سەبارەت بە هەڕەشەی تیرۆریستان سەرۆك بارزانی ئاماژەی بەوەدا كە تیرۆر هەڕەشەیەكە بۆ سەر هەموو لایەك و ئەو هەڕەشەیە هیچ سنوورێك ناناسێ و لە هیچ شوێنێك ناگیرسێتەوە بۆیەشە لەناوبردنی پێویستی بە هەوڵێكی دەولی و هەمە لایەنە و ڕێوشوێن و پلانی گشتگیر و نوێ هەیە.

لە بەشێكی دیكەی قسەكانیدا سەرۆك بارزانی تیشكی خستە سەر سەركەوتنە مەیدانییەكانی پێشمەرگە و ڕایگەیاند كە بۆ ئێمە جێگەی شانازییە كە لەجیاتی هەموو جیهان شەڕی ئەم تیرۆریستانە دەكەین و هێزی پێشمەرگەیش بە سەركەوتنەكانی خۆی بەسەر تیرۆریستان سیحری تیرۆریستانیان بەتاڵ كردەوە كە خۆیان بە هێزێك دەزانی كە هەرگیز ناشكێن. سەرۆك بارزانی ئەوەیش خستەڕوو كە هێزەكانی پێشمەرگە لە دۆخی هێرشبردندان و ئاماژەكانی ڕووخان و تێكشكانی داعش لەسەر دەستی پێشمەرگە بە ڕوونی دەركەوتووە.

پەیوەست بە بارودۆخی ئاوارەكانیش سەرۆك بارزانی ئەوەی دووپات كردەوە كە یارمەتیدانی خەڵكی لێقەوماو و پارستنیان لە هەڕەشەی تیرۆریستان بە ئەركێكی مرۆیی و نیشتیمانی دەزانین و لەپێناو پاراستنی پێكهاتە نەتەوەیی و ئایینییەكان قوربانی و شەهیدیشمان داوە. سەرۆك بارزانی ئاماژەی بەو ژمارە زۆرەی ئاوارەكان دا كە ڕوویان لە كوردستان كردووە و ڕایگەیاند كە كوردستان بە هەموو توانایەك یارمەتییان دەدات بەڵام ژمارە و ئاستی كارەساتەكە لە توانای كوردستان زیاترە و ئەوەیشی بۆ نێردراوی تایبەتی ئاساییشی حكوومەتی بریتانیا باس كرد كە پێویستە خوشك و برا مەسیحییەكان و ئاوارەكان بیر لە جێهێشتنی وڵاتەكەیان نەكەنەوە و چارەسەری سەرەكییش لەوەدایە ناوچەكانیان ئازاد بكرێت و یارمەتیی گەڕانەوە و نیشتەجێبوونیان بدرێت و لە هەڕەشەكانیش بپارێزرێن.

سەبارەت بە پڕۆسەی سیاسیی عێراقیش سەرۆك بارزانی هێمای بەوەدا كە پێویستە پڕۆسەی سیاسی تەنیا بە ئاراستەی گۆڕینی دەموچاو نەڕوات بەڵكو هاوكات لەگەڵ ئەوە دەبێ بەرنامە و سیستەم و تەفكیری سیاسیی بگۆڕێت و حكوومەتێك بە بەشداریی هەموو لایەك و لەسەر بنەمای شەراكەتی ڕاستەقینە دابمەزرێت.

دانانی میكانیزمی هەماهەنگیی پێویستی نێوان بریتانیا و حكوومەتی هەرێم بۆ گەیاندنی یارمەتییەكانی بریتانیا تەوەرێكی دیكەی ئەم دانیشتنە بوو.

 

 

 

 

ئێوارەی ئەمڕۆ پێنجشەممە 28ـی 8ـی 2014 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە بەڕێز محەمەد حاجی مەحمود سکرتێری حزبی سۆسیالیست دیموکراتی کوردستان كرد.

لە دیدارەکەدا ڕەوشی سیاسیی و سەربازیی ئێستای کوردستان و سەرکەوتنەکانی پێشمەرگە خرایە بەرباس.

هەڵسەنگاندنی دۆخی سیاسی و ئەمنی و پرۆسەی پێکهێنانی حکوومەتی نوێی عێراق و ڕەوشی پەنابەران و لێقەوماوان تەوەرێکی دیکەی دیدارەکە بوو و بەبایەخەوە باس لەو پشتیوانییە نێودەوڵەتییە کرا کە لە ڕووی سیاسی و هاوکاریی سەربازیی و مرۆییەوە بۆ کوردستان هاتۆتەدی.

 

 

 

 

ئەمڕۆ چوارشەممە 27ـی 8ـی 2014 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە شێخەكانی هۆزی شەمەڕ و چەند هۆزێكی عەرەبی ناوچەی ڕەبیعە و دەشتی نەینەوا كرد.

لە دیدارێكدا كەسایەتی و شێخەكانی هۆزی شەمەڕ و چەند هۆزێكی دی ئامادەیی خۆیان بۆ سەرۆك بارزانی نیشاندا بۆ ئەوەی بەگژ تیرۆریستانی داعش بچنەوە و بەشداری شەڕی دژی تیرۆریستانی داعش بن. شاندی میوان دووپاتی ئەوەیان كردەوە كە ئامادەن چەك هەڵبگرن و تیرۆریستان لە ناوچەكە ڕیشەكێش بكەن و دژی هەموو هەوڵێكیش دەوەستن كە بیەوێت پێكەوەژیانی كورد و عەرەب و پێكهاتە ئایینی و نەتەوەییەكانی ناوچەكە تێكبدات. كەسایەتی و شێخەكانی هۆزی شەمەڕ و هۆزە عەرەبەكانی دەڤەری نەینەوا سوپاسی گەلی كوردستان و سەرۆك بارزانیان كرد كە لە مامەڵەكردن لەگەڵ پەنابەر و ئاوارەكان ڕەوشتی بەرز و ڕەسەنی مێژوویی خۆیان بەكار هێناوە و بوونەتە پەناگەی لێقەوماوان. ڕاشیانگەیاند كە ناتوانن دەستەوەستان بن لەوەی مزگەوت و شوێنە پیرۆزەكان تێكدەدرێن و مەسیحی و كوردانی ئێزیدی لە لایەن تیرۆریستان بچەوسێندرێنەوە و ڕێگە نادەن هێزی شەڕ و تاریكی لە ناوچەكانیان دەستەڵات بگرێتە دەست.

هەر لەم دیدارە سەرۆك بارزانی دەستخۆشی لە هەڵوێستی شێخەكانی ئەو هۆزانە كرد و ئاماژەی بەوەدا كە شەرەفێكی گەورەیە گەلی كوردستان شەڕی زوڵم و تاریكی و وەحشیگەریی تیرۆریستان دەكات و ئێستا هاوكێشەكان لە بەرژەوەندیی هێزەكانی پێشمەرگە گۆڕاون و تیرۆریستان لە دۆخی داڕمان و دۆڕانن. سەرۆك بارزانی جەختی لەوە كردەوە كە گەلی كوردستان هەمیشە لەگەڵ پێكەوەژیان و تەبایەتی و برایەتی بووە و خەباتی لەدژی داگیركاری و زوڵمدا كردووە و لە هیچ دۆخێكدا قبووڵی ئەوەی نەكردووە بچێتە ناو شەڕی نەتەوەیی و تاییفی. سەبارەت بە دەركەوتنی تیرۆریستانی داعش سەرۆك بارزانی ئاماژەی بەوەدا كە سیاسەتی هەڵەی حكوومەتی بەغدا ژینگەیەكی وای دروست كرد تیرۆر و داعش گەشە بكات. سەرۆك بارزانی ئەوەیشی دووپات كردەوە كە هێزەكانی پێشمەرگە هەتا تێكشكاندنی تەواوەیی تیرۆریستان ناوەستن و بەسەریان سەردەكەون و ئەو ئامۆژگارییەشی دا كە پێویستە ئەو كەسانەی هاوكاری تیرۆریستان بوونە بە توندترین شێوە سزا بدرێن بەڵام ژیانی هاووڵاتیان و ئەو خەڵكەی پەیوەندییان بە تیرۆریستان نەبووە بپارێزرێت.

 

 

 

 

دوایین هەواڵەکان

هەواڵی زیاتر لە تویتەر

راپۆرتە پڕ بینەرەکان

حالت های رنگی