سه‌رۆكی هه‌رێمی كوردستان پێشوازی له وه‌زیری ده‌ره‌وه‌ی لوگزەمبۆرگ ده‌كات
ئه‌مڕۆ یه‌كشه‌ممه 29/3/2015 به‌ڕێز مسعود بارزانی سه‌رۆكی هه‌رێمی كوردستان پێشوازی له ژان ئاسڵ بۆرن وه‌زیری ده‌ره‌وه و كاروباری یه‌كێتی ئه‌وڕووپای لوگزەمبۆرگ و شاندی یاوه‌ری كرد.
له‌م دیداره‌دا وه‌زیری ده‌ره‌وه‌ی لوگزەمبۆرگ ستایشی سه‌ركه‌وتنه‌كانی پێشمه‌رگه‌ی كرد و پێزانینی خۆشی ده‌ربڕی به‌رامبه‌ر ئه‌و یارمه‌تییه‌ی هه‌رێمی كوردستان پێشكه‌شی ئاواره‌كانی كردووه و رایگه‌یاند، جیهان به‌ڕێزه‌وه سه‌یری ڕۆڵی كوردستان له حه‌واندنه‌وه‌ی ئاواره‌كان و پاراستنی پێكهاته نه‌ته‌وه‌یی و ئایینیه‌كان ده‌كات. هه‌روه‌ها ستایشی ئه‌و سه‌قامگیری و پێشكه‌وتنانه‌ی كرد، كه كوردستان به‌خۆیه‌وە بینیوویەتی و پابه‌ندی بنه‌ماكانی دیموكراسی و پێوه‌ره‌كانی مافی مرۆڤ بووه. له به‌شێكی دیكه‌ی قسه‌كانیدا ئه‌وه‌شی به سه‌رۆك بارزانی راگه‌یاند، كه لەنێو وڵاتانی ئەورووپاییدا مەیلێكی زۆر هه‌یه بۆ یارمه‌تیدانی هه‌رێمی كوردستان له‌ڕووی سه‌ربازی و هاوكاری مرۆییه‌وه، وڵاته‌كە‌شی له پشتیوانی و هاوكاری مرۆیی بۆ هه‌رێمی كوردستان به‌رده‌وام ده‌بێت و رایشیگه‌یاند، به هه‌ماهه‌نگی له‌گه‌ڵ وڵاتی ئه‌ڵمانیادا ئاماده‌ی چاره‌سه‌ركردنی پێشمه‌رگه برینداره‌كان و دابینكردنی پێداویستی پزیشكین.
لە بەشێكی دیكەی قسەكانیدا وه‌زیری ده‌ره‌وه‌ی لوگزەمبۆرگ ئاماژه‌ی به‌وه‌دا، كه له ئه‌وڕووپادا رێزێكی زۆر بۆ پێشمه‌رگه هه‌یه و رایگه‌یاند، ئێمه باش له‌و ئه‌ركه قوڕسه ده‌گه‌ین، كە پێشمەرگە بەجێیگەیاندووە به‌ڵام ئه‌گه‌ر پێشمه‌رگه نه‌بوایه، داعش نه‌ده‌شكا. ئه‌و شه‌ڕه به‌ته‌نها شه‌ڕی كوردستان نییه و چونكه داعش هه‌ڕه‌شه‌یه بۆ هه‌مووان بۆیە ده‌بێ به هه‌موو لایه‌ك روبه‌ڕووی ئه‌و هه‌ڕه‌شه جیهانییه ببینه‌وه.
له به‌رامبه‌ردا سه‌رۆك بارزانی سوپاسی هه‌ڵوێستی وڵاتانی دۆستی هه‌رێمی كوردستانی كرد و رایگه‌یاند هه‌رچه‌نده كوردستان له شه‌ڕێكی قورسدا بوو، به‌ڵام یارمه‌تیدانی ئاواره‌كانی به ئه‌ركێكی نیشتمانی و مرۆیی زانی و له‌و ئه‌ركه‌یشدا به‌رده‌وام ده‌بێت. سەرۆك بارزانی جه‌ختیشی له‌وه كرده‌وه، كه پێشمه‌رگه به شانازییه‌وه شه‌ڕی تیرۆریستان ده‌كات و توانیشی ئوستوره‌ی داعش بشكێنێ و دووپاتی كردەوە داعش هه‌ڕه‌شه‌یه بۆ هه‌موو لایه‌ك و روبه‌ڕووبونه‌وه‌یشی ته‌نها به ڕێگەی سه‌ربازی ناكرێ، به‌لكو ده‌بێ له‌ڕووی فكریشه‌وه شه‌ڕی بكرێ و سه‌رچاوه داراییه‌كانی وشك بكرێن. ئه‌وه‌شی خسته‌ڕوو، كه نابێ رێگه بدرێ تیرۆریستان له وڵاتانی ئه‌وڕووپادا ئازادییه‌كان بۆ مەبەستی ئاسانكاریی كاری تیرۆریستی بەكار بهێنن.
بارودۆخی سیاسی و قه‌یرانه‌كانی ناوچه‌كه و په‌یوه‌ندییه‌كانی نێوان هه‌رێمی كوردستان و به‌غدا ته‌وه‌رێكی دیكه‌ی دیداره‌كه بوو، له‌وباره‌وه سه‌رۆك بارزانی ئاماژه‌ی به‌وه‌دا، كه گه‌لی كوردستان خاوه‌نی كولتووری پێكه‌وه‌ژیان و لێبورده‌ییه و به هیچ شێوه‌یه‌ك نابێته به‌شێك له‌و ململانێ تایفییه‌ی له ناوچه‌كه‌دا له ئارادایه، هه‌روه‌ها دووپاتی كرده‌وه، كه تیرۆر و فه‌رهه‌نگی توندڕۆیی به هیچ شێوه‌یه‌ك ناتوانێ جێ پێی خۆی له كوردستان بكاته‌وه. سه‌رۆكی هه‌رێمی كوردستان له‌باره‌ی په‌یوه‌ندییه‌كانی هه‌رێمی كوردستان و به‌غدا ئاماژه‌ی به‌وه‌دا، كه رێككه‌وتنێك لە نێوان هەردوولا هه‌یه و لایه‌نی كوردستانی پێوه‌ی پابه‌نده و چاوه‌ڕێی جێبه‌جێكردنی ئه‌و رێككه‌وتنه‌یه.
له كۆتایی دیداره‌كه‌دا سه‌رۆك بارزانی لێدوانێكی رۆژنامه‌وانی دا. بۆ بینی لێدوانه‌كه ئێره كلیك بكه.
سكرتێری گشتیی ڕێكخراوی نەتەوە یەكگرتووەكان لەڕێی تەلەفۆنەوە پەیوەندی بە سەرۆك بارزانی كرد
لەم پەیوەندییە تەلەفۆنییەدا سكرتێری گشتیی ڕێكخراوی نەتەوە یەكگرتووەكان دڵگرانیی خۆی نیشاندا كە سەرباری ئەوەی زۆری پێخۆش بووە بەڵام بەهۆی كەمیی كات نەیتوانیوە سەردانی هەرێمی كوردستان بكات. هەروەها پیرۆزبایی لە سەرۆك بارزانی كرد بە بۆنەی سەركەوتنەكانی هێزی پێشمەرگەی كوردستان لەبەرانبەر تیرۆرریستانی داعش و سەرەخۆشی لە خانەوادەی شەهیدانی پێشمەرگە كرد و ستاییشی ڕۆڵی هێزی پێشمەرگەی كرد لە شكستدانی تیرۆریستانی داعش.
هەر لەم پەیوەندییە تەلەفۆنییەدا سكرتێری گشتیی ڕێكخراوی نەتەوە یەكگرتووەكان دەستخۆشی لە خەڵك و حكوومەتی هەرێمی كوردستان كرد كە یارمەتیی ئاوارە و پەنابەرانیان داوە و ڕایگەیاند كە ڕێكخراوی نەتەوە یەكگرتووەكان هەوڵ دەدات بەردەوام بێت لە هاوكاریكردنی هەرێمی كوردستان بۆ حەواندنەوەی ئاوارەكان و ئاستی هاوكارییەكانیش زیاتر بكات. لە بەشێكی دیكەی ئەم پەیوەندییە تەلەفۆنییەدا سكرتێری گشتیی ڕێكخراوی نەتەوە یەكگرتووەكان خۆشحاڵیی خۆی نیشاندا كە پەیوەندییەكانی نێوان هەرێم و بەغدا لە قۆناغێكی باشتر دان و هەوڵەكان بۆ چارەسەربوونی گرفتەكان بەردەوامن.
سەرۆكی هەرێمی كوردستان پێشوازی لە خاتوو لەیلا زانا و شاندی یاوەری كرد
لەم دیدارەدا كە بە مەبەستی گەیاندنی نامەی بەڕێز عەبدوڵڵا ئۆجەلان بە سەرۆك بارزانی ئەنجامدرا، شاندی میوان سڵاوی بەڕێز ئۆجەلانیان گەیاندە سەرۆك بارزانی و باسی ئەو دیدار و چاوپێكەوتنانەیان كرد كە لەسەرەتای ئەم مانگە لە ئیمڕاڵی لەگەڵ بەڕێز ئۆجەلاندا هەیانبووە. هەر لەم دیدارەدا شاندی میوان ئەوەیشیان خستەڕوو كە بەڕێز ئۆجەلان ئاگاداری گۆڕانكارییەكانی ناوچەكە و هاوكێشە ئاڵۆزەكان و ئەو شەڕەیە كە لە لایەن تیرۆریستاندا بەسەر كوردستاندا سەپێندراوە و ڕایانگەیاند كە بەڕێز ئۆجەلان جەختی لە ڕۆڵ و ئەو ئەرك و بەرپرسیارێتییە قورسە كردووەتەوە كە لەسەر شانی سەرۆك بارزانییە و دڵنیایی خۆیشی نیشان داوە كە سەرۆك بارزانی ڕۆڵی خۆی لە چارەكردنی گرفتەكان و تێپەڕاندنی هەڕەشەكان بۆ سەر كوردستان دەگێڕێت. لە بەشێكی دیكەی دیدارەكەدا شاندی میوان سەرەخۆشیی خۆیان و بەڕێز ئۆجەلانیان بە سەرۆك بارزانی و كەسوكاری ئەو پێشمەرگانە گەیاند كە لەشەڕی تیرۆریستاندا گیانی خۆیان بەخت كردووە و شەهید بوونە. هەر لەم كۆبوونەوەیەدا شاندی میوان جەختیان لە پاراستنی یەكڕیزی لایەنە سیاسییەكان و بەستنی كۆنگرەی نەتەوەیی كردەوە.
لەبەرانبەردا سەرۆك بارزانی بەخێرهاتنی شاندی میوانی كرد و سوپاسی پەرۆشی و خەمخۆریی بەڕێز ئۆجەلانی كرد بۆ چارەكردنی كێشەكان و ئەوەی خستەڕوو كە لەم كەشە ئاڵۆزەی لە ناوچەكەدا دەگوزەرێ بەهێزترین چەكی كوردستان، یەكڕیزی و برایەتی و كاركردنە بەو پڕەنسیپە باڵایانەی كە گەلی كوردستان هەیەتی، ئەویش ئاشتیخوازی و ئازادی و فەرهەنگی پێكەوەژیانە. سەرۆك بارزانی ئەوەیشی بۆ شاندی میوان باسكرد كە لەم ململانێ تاییفییەی لە ناوچەكەدا هەیە، كوردستان نابێتە بەشێك لە كێشە و ململانێیەكان. سەبارەت بە شەڕی تیرۆریستانیش سەرۆك بارزانی ئەوەی شی كردەوە كە سەركەوتنی كورد بەسەر تیرۆریستان، پێگە و ناوبانگی بەرزی بۆ گەلی كوردستان مسۆگەر كردووە و جێگەی شانازییشە كە كوردستان لە كۆبانێ هەتا خانەقین لە یەك سەنگەردا ڕووبەڕووی تیرۆریستان بووەتەوە. پەیوەست بە بەستنی كۆنگرەی نەتەوەیی، وێڕای پێداگیری لەسەر بەستنی كۆنگرەی نەتەوەیی سەرۆك بارزانی ئەوەی دووپاتكردەوە كە پێویستە هەموو لایەك لە هەوڵی سەرخستنی كۆنگرە بێت و ئامانجی سەرەكیی كۆنگرەیش گەیاندنی پەیامی ئاشتی بێت بۆ گەلانی ناوچەكە.
پڕۆسەی ئاشتیی لە توركیا و بارودۆخی ڕۆژئاوای كوردستان و هەروەها قسەكردن لەبارەی چۆنییەتیی نەهێشتنی كێشەی نێوان حزب و لایەنە سیاسییەكانی كوردستان تەوەرێكی دیكەی ئەم دانیشتنە بوو و، سەرۆك بارزانی پشتگیریی تەواوی خۆی بۆ پڕۆسەی ئاشتی دەربڕی.
بروسكەی سەرەخۆشیی سەرۆك بارزانی بۆ كۆچی دوایی پاتریاركی كەنیسەی ئاشووریی ڕۆژهەڵات
بەناوی خودای مەزن و دلۆڤان
بۆ كەنیسەی ئاشووریی ڕۆژهەڵات
بەداخێكی زۆرەوە هەواڵی كۆچی دوایی قەداسەتی پاتریارك مار دنخای چوارەممان بیست كە لە 26ـی ئاداری 2015 لە ویلایەتی مینیسۆتای ئەمەریكا كۆچی دوایی كردووە. خوالێخۆشبوو ڕابەر و كەسایەتییەكی كاریگەری ئایینیی عێراق و جیهان بوو و ڕۆڵی هەبوو لە قووڵكردنەوەی تەبایی و برایەتی و هەموو كات پەرۆشی پێكەوەژیان و ئاشتیی نێوان پێكهاتە و پەیڕەوانی ئایینە جیاوازەكان بووە. بەم بۆنە خەمناكەوە سەرەخۆشیی خۆم ئاراستەی دەستەی كەنیسەی ئاشووریی ڕۆژهەڵات و تێكڕای باوەڕدارانی ئەم كەنیسەیە و خانەوادە و كەسوكاری خواڵێخۆشبوو قەداسەتی پاتریارك مار دنخای چوارەم دەكەم. لە خودای مەزن داواكارم سەبر و ئارامی بە هەموو لایەكمان ببەخشێت و خوالێخۆشبووش بباتە بەر ڕەحمەت و دلۆڤانیی خۆی و ڕۆحی شاد بێت.
مسعود بارزانی
سەرۆكی هەرێمی كوردستان
27ـی ئاداری 2015
سەرۆكی هەرێمی كوردستان پێشوازی لە وەكیلی وەزیری دەرەوەی توركیا دەكات
ئەمڕۆ پێنجشەممە 12ـی 3ـی 2015 بەڕێز مەسعود بارزانی سەرۆكی هەرێمی كوردستان پێشوازی لە فرێدون سینێرلی ئۆغلو وەكیلی وەزیری دەرەوەی توركیا و شاندێكی یاوەری كرد.
لە دیدارەكەدا بارودۆخی سیاسیی و ئەمنیی ناوچەكە و هەڕەشەی تیرۆریستان بۆ سەر ئاساییشی ناوچەكە و جیهان خرایە بەر باس و گفتوگۆ و جەخت لەوە كرایەوە كە دابینكردنی ئاساییشی ناوچەكە و ڕووبەڕووبوونەوەی تیرۆریستان ئەركی هەموو لایەكە و پێویستی بە كاری هاوبەش و هەماهەنگیی نێوان وڵاتانی ناوچەكە و جیهان هەیە.
هەر لەم كۆبوونەوەیەدا قسە لەبارەی پڕۆسەی چارەسەری ئاشتیی توركیا كرا و سەرۆك بارزانی ئەوەی دووپات كردەوە كە هەرێمی كوردستان پاڵپشتی پڕۆسەی ئاشتیی لە توركیایە و ئامادەیشە لە هەموو قۆناغەكانی ئەم پڕۆسەیە یارمەتیی سەرخستنی پڕۆسەی ئاشتی لە توركیا بدات. هەر پەیوەست بەم باسەوە سەرۆك بارزانی ئەوەی خستە ڕوو كە لە سەرخستنی پڕۆسەی ئاشتیدا هەموو لایەك و گەلانی ناوچەكە سوودمەند دەبن و هیوایشی خواست كۆسپ و تەگەرەكانی بەردەم ئەم پڕۆسەیە نەمێنن.
پەیوەندییە سیاسی و ئابوورییەكانی نێوان هەرێمی كوردستان و توركیا و فراوانكردنی ئاستی هەماهەنگی و هاوكاریی نێوان هەردوولا بۆ دابینكردنی ئاساییش و ڕووبەڕووبوونەوەی تیرۆریستان تەوەرێكی دیكەی ئەم كۆبوونەوەیە بوو و، وەكیل وەزیری دەرەوەی توركیا ڕایگەیاند كە ئاساییش و سەقامگیریی هەرێمی كوردستان بۆ وڵاتەكەی جێگەی بایەخە و توركیا هەموو هەوڵێك دەدات یارمەتیی ئاساییش و سەقامگیریی هەرێمی كوردستان بدات.
سه‌رۆك بارزانی له‌گه‌ڵ كه‌سایه‌تی و سه‌رۆك هۆزه‌‌كانى ڕۆژئاواى دیجله كۆبۆوه
پێشنیوه‌ڕۆی ئه‌مڕۆ یه‌كشه‌مه 15/3/2015 به‌ڕێز مسعود بارزانى، سه‌رۆكى هه‌رێمى كوردستان له میحوەری ڕۆژئاوای دیجلە له‌گه‌ڵ كه‌سایه‌تی و سه‌رۆك هۆزه‌‌كانى ڕۆژئاواى دیجله(ره‌بیعه و زوممار و شنگال) كۆبۆوه.
له كۆبوونه‌وه‌كه‌دا سه‌رۆك بارزانی له وته‌یه‌كدا تیشكی خسته سه‌ر ڕەوشی دەڤەرەکە لە قۆناخەکانی کاتی پەلاماری داعش و دوای ئازادکردنەوەی ناوچەکە لەلایەن پێشمەرگە و باسی ره‌فتاره چه‌په‌ڵه‌كانی رێكخراوی تیرۆریستی داعشی به‌رامبه‌ر خه‌ڵكی ئه‌و ده‌ڤه‌ره‌کرد و داوای له ئاماده‌بووان كرد كه هه‌ماهه‌نگی هه‌بێت بۆ برایه‌تى و پێكه‌وەژیان و جه‌ختی له پێوه‌ندیی مێژوویی نێوان كورد و عه‌ره‌ب كرده‌وه و ڕایگه‌یاند: ڕه‌وا نییه ڕێ به سته‌مكاران و ناحه‌زان بدرێت شه‌ڕ و ناكۆكی داعش بكه‌نه ناكۆكی نێوان ئه‌و دوو گه‌له‌ی كه ده‌مێكه پێكه‌وه ده‌ژین.
هه‌ر له‌و كۆبوونه‌وه‌یه‌دا، سه‌رۆكی هه‌رێمی كوردستان ئەوەی وەبیر سه‌رۆك هۆز و كه‌سایه‌تییە عه‌ره‌بەکانی ناوچه‌كانی شنگال، ڕه‌بیعه، به‌نداوی مووسڵ و زومماری هێنایەوە کە لەکاتی ڕاپه‌ڕینه مه‌زنه‌كه‌ی ساڵی 1991 ترسی ئەوەمان هەبوو كه دوای ئه‌وه‌ی كورد به‌ره‌و ڕووی كیمیاباران و ئه‌نفال بووه‌وه، دوای ئازادی، په‌نا بۆ تۆڵه ببات، به‌ڵام گه‌لی كورد سه‌ربڵندانه بنه‌مای تۆڵه‌سه‌ندنه‌وه‌ی وه‌لا نا و بنه‌ماكانی پێكه‌وه‌یی له‌به‌رچاو گرت.
سه‌رۆك بارزانی باسی کردەوە چەپەڵەکانی داعشی کرد و ئاماژەی بەوە کرد کە ئەو ناوچانەی لەلایەن تیرۆریستانەوە داگیر کران كاولیان کرد و خەڵکی ناوچەکە بینییان کە ئەو تیرۆریستانە چەند دژە مرۆڤ و دواكه‌وتوون، هەروەها دەرکەوت کە داعش جگە له كاولكاریی هیچی پێشکەشی ناوچە سوننە نشینەکان نەکرد.
سه‌رۆك بارزانی ڕایگه‌یاند، سوپاس بۆ خوا ئێستا زۆربه‌ی ناوچه‌كان له چنگی داعش ڕزگار كراون، ئێستایش پێویستمان به هه‌مووان هه‌یه بۆ دروستكردنی پێوه‌ندییه‌كی نوێ و ڕێگە نادەین كه‌س ده‌ستدرێژەیی بکاتە سەر خەڵکی ناوچەکە و هه‌موو لایه‌كیش مافی خۆیانه به ئازادی بژین و كه‌رامه‌تیان پارێزراو بێ، بەڵام پێویستە هه‌ریه‌ك لای خۆیه‌وه ڕۆڵ ببینی بۆ پاراستنی سه‌قامگیری و ئاساییشی ناوچه‌كە و هه‌ر خزمه‌تگوزارییه‌ك لە ناوجەکە پێویست بێت پێشـكه‌ش ده‌كرێت و داوا له حكوومه‌تی هه‌رێم ده‌كه‌م ده‌ستبه‌جێ خزمه‌تگوزاری دابین بكات و داوایش له حكوومه‌تی فیدراڵ ده‌كه‌م هاوكار بێ.
سه‌رۆك بارزانی بە سه‌رۆك هۆز و پیاوماقوڵانی ناوچەکەی راگه‌یاند کە ئه‌وه‌ی كه فه‌رمانڕانیی داعشی پێ دروسته، ئه‌وا ڕێگه‌ی ده‌ده‌ین بچێته نێو داعشه‌وه، به‌ڵام ئه‌وه‌ی كه ڕۆڵی خراپ ببینێ و سیخوڕی بكات، لێره جێگایان نابێته‌وه، هەروەها جەختیشی کردەوە هه‌ر كه‌سێك هاوكاریی ئه‌و تیرۆریستانه‌ی كردووه، به‌و شێوه‌یه مامه‌ڵه‌ی له‌گه‌ڵدا ده‌كه‌ین كه له‌گه‌ڵ داعشدا ده‌كرێ.
سەرۆک بارزانی تەئکیدیشی کردەوە کە هه‌ر كه‌سێك له هه‌رێمی كوردستاندا بژی، ئازاده له پێڕۆكردنی ئایین و تایبه‌تمه‌ندییه‌كانی، جه‌ختیشی كرده‌وه، ئه‌و ناوچانه‌ی كه ئازادمان كردوون به‌شێكن له هه‌رێمی كوردستان و بۆ ناوچه‌كانی دیكه‌یش ئاماده‌ی هاوكارین.
هه‌ر له میانى ئه‌و كۆبوونه‌وه‌یه‌یدا له‌گه‌ڵ سه‌رۆك هۆز و كه‌سایه‌تیەکانی عه‌ره‌بى ده‌ڤه‌رى رۆژئاواى دیجله، سه‌رۆكى هه‌رێمى كوردستان جه‌ختى له‌سه‌ر برایه‌تى كورد و عه‌ره‌ب كرده‌وه و رایگه‌یاند كه داعش ناتوانێت برایه‌تى كورد و عه‌ره‌وب تێكبدات و داعش هیچ پاشه‌رۆژێكى لێره نییه .
لە بەرانبەریشدا سه‌رۆك هۆز و كه‌سایه‌تییە عه‌ره‌بیەکانى ناوچه‌كه ستایشى پێشمه‌رگه و گه‌لى كوردستان و حكوومه‌ت و له سه‌رووشیانه‌وه ستایشى سه‌رۆك بارزانییان بۆ پاراستنى گیان و ماڵیان و راشیانگه‌یاند كه پێشمه‌رگه زامنى پاراستنى سه‌روماڵییانه.
بۆ بینین و بیستنی دەقی وتەکانی سەرۆک بارزانی لەسەر ئەم لینکە كلیك بکە.
سەرۆكی هەرێمی كوردستان پێشوازی لە بەرپرسی پێشووی دەزگەی ناوەندیی هەواڵگریی ئەمەریكا دەكات
ئەمڕۆ هەینی 13ـی 3ـی 2015 بەڕێز مەسعود بارزانی پێشوازی لە دەیڤید پێترایۆس بەرپرسی پێشووی دەزگەی ناوەندیی هەواڵگریی ئەمەریكا و فەرماندەی پێشووی فەرماندەیی ناوەندیی هێزەكانی سوپای ئەمەریكا كرد.
لە دیدارەكەدا بارودۆخی سیاسی و ئەمنیی عێراق و ناوچەكە و هەڕەشەكانی تیرۆریستان بۆ سەر ئاساییشی جیهانی و ناوچەكە خرایە بەر باس و گفتوگۆ. هەر لەم دیدارەدا بەرپرسی پێشووی دەزگەی ناوەندیی هەواڵگریی ئەمەریكا سەرسووڕمانی خۆی بە پێشكەوتن و ئاوەدانیی كوردستان نیشان دا و پیرۆزبایی لە سەرۆك بارزانییش كرد بۆ ئەو سەركەوتنانەی هێزەكانی پێشمەرگەی كوردستان لە شەڕی دژی تیرۆریستاندا بەدەستیانهێناوە و ستاییشی قارەمانێتی و ئازایەتیی پێشمەرگەی كرد. هەروەها سەرەخۆشیی لە سەرۆك بارزانی و گەلی كوردستان و كەسوكاری ئەو پێشمەرگە قارەمانانە كرد كە لەشەڕی تیرۆریستاندا گیانی خۆیان بەخت كردووە و شەهید بوونە.
سەرۆكی هەرێمی كوردستان پێشوازی لە سەرۆكی ئەنجوومەنی نوێنەرانی عێراق كرد
ئەمڕۆ چوارشەممە 18ـی 3ـی 2015 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە سەلیم ئەلجبووری سەرۆكی ئەنجوومەنی نوێنەرانی عێراق و شاندێكی یاوەری كرد.
لە دیدارەكەدا بارودۆخی سیاسی و ئەمنیی عێراق و هەروەها ڕەوشی بەرەكانی ڕووبەڕووبوونەوەی تیرۆریستان لە پارێزگاكانی دیالە و ئەنبار و كەركووك و سەلاحەدین و نەینەوا خرایە بەر باس و قسە لەبارەی سەركەوتنەكانی هێزی پێشمەرگەی كوردستان و هێزە ئەمنییەكانی عێراق و هۆزە عەرەبەكان و حەشدی شەعبی كرا. هەر لەم كۆبوونەوەیەدا جەخت لەسەر ئازادكردنی شاری موسڵ و ناوچەكانی دیكە لەژێر دەستی تیرۆریستانی داعش كرایەوە.
لە تەوەرێكی دیكەی دیدارەكەدا تەحەدییاتی بەردەم عێراق و چۆنییەتی هاوكاری و هەماهەنگیی نێوان لایەنە سیاسییەكانی عێراق لە پڕۆسەی سیاسی و چاكسازی و قۆناغەكانی دوای شەڕی داعش تاوتوێ كرا.
سەرۆكی هەرێمی كوردستان پێشوازی لە شاندی هۆزی حەدیدیی پارێزگای نەینەوا دەكات
ئەمڕۆ چوارشەممە 18ـی 3ـی 2015 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە شاندی هۆزی حەدیدی بە سەرۆكایەتیی ئەحمەد مەحمود ئەلوەشانی كرد.
لە دیدارەكەدا شاندی میوان سوپاسی سەرۆك بارزانی و هێزی پێشمەرگەی كوردستانیان كرد كە ناوچەكانیان لەژێر دەستی داعش ڕزگار كردووە و پێزانینیان بۆ قارەمانێتی و قوربانیدانی هێزی پێشمەرگەی كوردستان هەبوو و زۆر بە توندی ئیدانەی ئەو تاوانە قێزەوەنانەیان كرد كە تیرۆریستانی داعش درهەق پێكهاتە ئایینی و نەتەوەییەكانی پارێزگای نەینەوا و خوشك و برا ئیزیدی و مەسیحییەكان ئەنجام داوە.
شاندی هۆزی حەدیدیی نیشتەجێی پارێزگای نەینەوا و دەورووبەری ناحیەی وانكێ و سەدی موسڵ ئەوەیان بە سەرۆك بارزانی ڕاگەیاند كە ئامادەیی تەواویان هەیە كە شانبەشانی هێزی پێشمەرگەی كوردستان ناوچەكانیان بپارێزن و شەڕی تیرۆریستانی داعش بكەن و چارەنووسی خۆیان بە هەرێمی كوردستان ببەستنەوە و داوایان كرد ناوچەكانیان بخرێتە سەر هەرێمی كوردستان. هەروەها وێڕای ئاماژەدان بەوەی تیرۆریستانی داعش دەستیان لە تێكدان و شێواندنی باری كۆمەڵایەتی و كوشتن و بڕینی خەڵكی بێتاوان هەبووە ستاییشی مامەڵەی ڕەوشتبەرزانەی هێزی پێشمەرگەی كوردستانیان كرد لەگەڵ دانیشتوانی ناوچەكە و خەڵكی عەرەبی دەڤەرە ئازادكراوەكان.
لەبەرانبەردا سەرۆك بارزانی بەخێرهاتنی شاندی میوانی كرد و سوپاسی هەڵوێستیانی كرد و هێمای بەوەدا كە ئەو تاوانانەی تیرۆریستانی داعش ئەنجامیان داوە لە هیچ شوێن و مێژوویەكدا ڕووی نەداوە. ئەوەیشی خستەڕوو كە گەلی كوردستان خاوەنی كولتووری پێكەوەژیان و ڕەوشتی بەرزە و هیچ جیاوازییەك لەنێوان موسڵمان و مەسیحی و ئێزیدی و عەرەب و كورد و پێكهاتەكانی دی نییە. سەرۆك بارزانی جەختی لەوەیش كردەوە كە ئەوەی دەستی لەگەڵ داعش هەبووبێت و هاوكاریی داعشی كردبێت و هزری داعشی لا پەسەند بێت بە هیچ شێوەیەك نابێ بگەڕێتەوە ناوچە ئازاد كراوەكان.
تیرۆریستانی داعشیش هیچ ئاییندەیەكیان لە ناوچەكە نییە و لەناوچوونیان تەنیا بە كاتەوە بەندە. سەرۆك بارزانی ئەوەیشی دووپات كردەوە كە پێویستە خەڵكی ناوچەكە لە ژیانێكی ئاسوودەدا بژیین و ڕێز لە ئیرادەی دانیشتوانی ناوچەكە بگیرێت و ئەوان بڕیار لە چارەنووسی خۆیان بدەن.
سەرۆكی هەرێمی كوردستان پێشوازی له نوێنه‌ری سه‌رۆك وه‌زیرانی به‌ریتانیا بۆ كاروباری ئاسایشی هه‌رێمی كوردستان و شاندی یاوه‌ری ده‌كات
ئه‌مڕۆ چوارشه‌مه 18ـی 3ـی2015 لە سەلاحەدین به‌ڕێز مه‌سعود بارزانی سەرۆكی هەرێمی كوردستان پێشوازی له جه‌نه‌ڕاڵ سیمۆن مایه‌ل نێردراوی تایبەتی به‌ریتانیا بۆ كاروباری ئاسایشی هه‌رێمی كوردستان و شاندێكی یاوه‌ری كرد، كه له جه‌نه‌ڕاڵ تۆم بێكت نێردراوی نوێی بریتانیا بۆ كاروباری ئاساییش لە هەرێمی كوردستان و كونسوڵی گشتی به‌ریتانیا له هه‌ولێر و ژماره‌یه‌ك به‌رپرسی سه‌ربازیی سوپای بریتانیا پێكهاتبوو.
له دیدارێكدا كه به بۆنه‌ی كۆتایهاتنی ئه‌ركی جه‌نه‌ڕالمایه‌لو ناساندنی شوێنگره‌وه‌كه‌ی (جه‌نه‌ڕاڵ تۆم بێكت) ساز درابوو، شاندی سەربازیی حكوومەتی بریتانیا پابەندبوونی خۆی بە پاڵپشتیكردنی هێزی پێشمەرگەی كوردستان دووپاتكردەوە و ستاییشی ڕۆڵی سەرۆك بارزانیشیان كرد لە سەرپەرشتیكردنی شەڕەكانی پێشمەرگە لەبەرانبەر تیرۆریستان و پیرۆزبایی سەركەوتنەكانی پێشمەرگەیان لە سەرۆك بارزانی كرد و سەرەخۆشیی خۆیشیان بۆ سەرۆك بارزانی و كەسوكاری ئەو پێشمەرگانە ڕاگەیاند كە لەشەڕی دژی تیرۆریستاندا گیانی خۆیان بەخت كردووە و شەهید بوونە. شاندەكە ئەوەیشی دووپاتكردەوە كە شەڕی ڕاستەقینە و كاریگەر هێزی پێشمەرگە كردوویەتی و دەستكەوت و سەركەوتنەكانی پێشمەرگەیش زۆر بەرچاو و دیارن.
لەبەرانبەردا سەرۆك بارزانی سوپاسی ئەرك و ماندووبوونی جەنەڕاڵ مایەل و تیمە سەربازییەكانی بریتانیای كرد كە هەماهەنگیی زۆر باشیان لەگەڵ هێزەكانی پێشمەرگەدا هەبووە و ڕۆڵیان لە سەركەوتنەكاندا گێڕاوە. هەروەها ئاماژەیشی بەوەدا كە ئەزموونی كاری هاوبەشی پێشمەرگە و هێزی هاوپەیمانان پێشانیدا كە بە هەماهەنگی و هاوكاریی لایەنەكان دەكرێ تیرۆریستانی داعش تێكبشكێندرێن. سەبارەت بە پەیوەندییەكانی هەرێمی كوردستان و بەغدا و شەڕی دژی تیرۆریستان سەرۆك بارزانی ئەوەی خستەڕوو كە پێویستە ئەولەوییەتی سەرەكیی هەموو لایەك شەڕی داعش و ئازادكردنی موسڵ و ناوچە داگیركراوەكانی دیكە بێت و بۆ چارەسەربوونی كێشەكانی نێوان هەولێر و بەغدایش لایەنەكان لە پەیوەندیی بەردەوامدا دەبن.
More...
سەرۆكی هەرێمی كوردستان پێشوازی لە شاندێكی پەرلەمانی یەكێتیی ئەورووپا دەكات
ڕاگەیێندراوی سەرۆكایەتیی هەرێمی كوردستان لەبارەی كردەوەی تیرۆریستیی شاری حەسەكە
ڕێكخراوى جیهانیى ته‌ندروستى، ستایشى هه‌رێمى كوردستان ده‌كات
نێچیرڤان بارزانى داواى هاوكارى له ژاپۆن ده‌كات
دوایین هەواڵەکان
- نوێنەری حکومەتی هەرێم لە ئێران: سەردانەکەی پزیشکیان ئاماژەیە بۆ گرنگیدانی ئێران بە هەرێمی کوردستان
- هه‌رێمى كوردستان و ئێران جهخت له برهودان به پهيوهندييهكانيان دهكهنهوه
- سهرۆک نێچیرڤان بارزانی: سەردانی سەرۆک کۆماری ئێران مێژوویی بوو
- نازم دەباغ له وتووێژ له‌گه‌ڵ ئاژانسی ئیرنا: مەسعوود پزشکیان سەردانی هەولێر دەکات
- نازم دەباغ: کاتی سەردانی پزیشکیان بۆ عێراق دیار نییە
- «سەلام رشدی» له‌گه‌ڵ شاندی یهکێتی هاورده و ناردنکارانی لقی هه‌ولێر کۆبۆوه
- سه‌رۆك نێچيرڤان بارزانى: ههميشه پشتيوانى و بهرگرى له مافهكانى ئێزدييان دهكهين
- سهرۆک نێچیرڤان بارزانی له‌گه‌ڵ باڵیۆزی یهکێتیی ئهورووپا کۆبووهوه
- سه‌رۆك نێچيرڤان بارزانى له‌گه‌ڵ باڵيۆزى نهمسا كۆبووهوه
- سه‌رۆك نێچيرڤان بارزانى سوپاسى جهنهرال ڤاول ده‌كات