وه‌زیرى ده‌ره‌وه‌ى ئیتالیا ستایشى پێشمه‌رگه ده‌كات
ئێوارەی ئەمڕۆ سێشەممە 23ی دیسەمبەری 2014 بەڕێز نێچیرڤان بارزانی سەرۆك وەزیرانی هەرێمی كوردستان پێشوزای لە بەڕێز "پاولۆ جێنتیلۆنی" وەزیری دەرەوەی ئیتالیا و شاندێكی یاوەری كرد.
لە كۆبوونەوەیەكدا بەڕێز نێچیرڤان بارزانی وێڕای بەخێرهێنان؛ تیشكی خستە سەر دوایین پێشهاتەكانی شەڕی دژی تیرۆرستانی داعش و سەركەوتنەكانی پێشمەرگە لە ناوچەی شنگال و سوپاس و پێزانینی خەڵك و حكوومەتی هەرێمی كوردستانی بۆ ئەمەریكا و وڵاتانی ئەورووپا و هاوپەیمانیی نێودەوڵەتی دووپات كردەوە كە هاوكاریی پێشمەرگەیان كردووە، بە تایبەت تیشكى خسته سه‌ر كاریگەریی هێرشە ئاسمانییەكان له گۆڕێنی باڵانسی شەڕ و ئاماژەی بە قوربانییەكانی پێشمەرگە و بەرگریی قارەمانانەیان له بەرنگاربوونەوەی تیرۆردا، كرد.
هەروەها باسی لە ڕەوش و پێویستییه‌كانی ئاوارە و پەنابەران كرد و جەختی لەسەر پێویستیی گەیشتنی هاوكاریی بەپەلە لە لایەن كۆمەڵگەی نێودەوڵەتی و نەتەوە یەكگرتووەكانه‌وه كردەوە، بە تایبەت كە وەرزی سەرما و سۆڵە و زستان گەیشت و ئاواره‌كان لە بارودۆخ و ڕەوشێكی نالەباردان و ئەوپەڕی پێویستییان بە هاوكاریی بەپەلە هەیە. سوپاسی سەرۆك وەزیران و سەرۆك ئەركانی سوپای ئیتالیایشی كرد كە لە ڕیزی پێشەوەی ئەوانه بوون دوای هێرشەكانی داعش بۆ سەر هەرێمى كوردستان؛ سەردانی هه‌ولێریان كرد، هه‌روه‌ها سڵاو و ڕێزی خۆی بۆ بەڕێز سەرۆك وەزیرانی ئیتالیا نارد.
به‌ڕێز نێچیرڤان بارزانى ئەوەشی دووپات كردەوە كە پێویستییان بە هاوكاریی ئیتالیا هه‌یه بۆ ئەوەی كۆمەڵگەی نێودەوڵەتی و ئەورووپا هان بدەن تا لە پرسی ناساندنی كارەساتی ئێزدییەكان بە جینۆساید لە ئاستی جیهاندا؛ هاوكاریی هەرێمی كوردستان بكەن. دەربارەی ڕەوشی ئێستای عێراقیش باسی لە دوایین ڕێككەوتنی نێوان هەولێر و بەغدا كرد و هیوای خواست ڕێككەوتنه‌كە ببێتە هۆكارێك بۆ چارەسەركردنی تەواوی كێشەكان لەسەر بنەمایەكی واقعبینانە و پشتگیریی هەرێمی كوردستانی بۆ به‌ڕێز سەرۆك وەزیران و حكوومەتی نوێی عێراق دووپات كرده‌وه.
لای خۆیەوە بەڕێز پاولۆ جێنتیلۆنی وەزیری دەرەوی ئیتالیا وێڕای پێشكەشكردنی پیرۆزبایی بۆ سەركەوتنەكانی پێشمەرگە لە ناوچەی شنگال و دەوروبەری؛ باسی لە ڕۆڵی دیاری كورد له هاوپەیمانیی نێودەوڵەتیدا كرد و بە ڕۆڵێكی زۆر گرنگی لە قەڵەم دا، هه‌روه‌ها دەستخۆشی و ڕێز و پێزانینى بۆ ڕۆڵی پێشەرگە و خەڵكی كوردستان دووپات كردەوە و تیشكی خستە سەر ئەوەی كە وڵاتەكەی بە هەموو شێوەیەك ئامادەی هاوكاریكردنی هەرێمی كوردستانە و پێشتریش هاوكاریی سەربازی و مرۆییان پێشكەش كردووە و چەند تیمێكیان مەشق و ڕاهێنانی سەربازی بە پێشمەرگە ده‌كه‌ن و ئەو تیمانە لە ڕۆژانی داهاتوودا فراوانتر دەكرێن. دووپاتیشی كردەوە كە ئیتالیا هەم لە چوارچێوەی نێودەوڵەتی و هەم بە شێوەیەكى ڕاستەوخۆش، هاوكاریی هەرێم دەكات.
به‌ڕێز وەزیری دەرەوەی ئیتالیا باسی لەوەش كرد كە دوای ڕزگاركردنی شوێنەكان، ئیتالیا دەتوانێت لە بواری ئاوەدانكردنەوەی ئەو شوێنانەدا هاوكاری هەرێمی كوردستان بكات و لەم بوارەشدا خاوەنی ئەزمونێكی دەوڵەمەندن. هه‌روه‌ها خۆشحاڵیی خۆی به پەیوەندییەكانی هەرێمی كوردستان و ئیتالیا دەربڕی و هیوای خواست ئەو نووسینگە دیپلۆماسیەی له هه‌ولێر هه‌یانه، لە ماوەیەكی نزیكی داهاتوودا ببێتە كونسوڵخانە و بۆ ئەم مەبەستەش پەرلەمانی ئیتالیا بڕیاری له‌سه‌ر داوە. سەرسامی و خۆشحاڵیی خۆیشی بۆ ئارامی و پێشكەوتوویی شاری هەولێر نیشان دا و بە شارێكی مۆدێرن و ئارام و سەقامگیری لەقەڵەم دا.
دوای كۆبوونەوەكەش كۆنگرەیەكی ڕۆژنامەوانی بۆ هەردوو بەڕێزان نێچیرڤان بارزانی و وەزیری دەرەوەی ئیتالیا ڕێكخرا و سه‌ره‌تا به‌ڕێز سه‌رۆك وه‌زیران گوتى:
ئێوارەتان باش، بەخێر بێن..
خۆشحاڵین پێشوازی لە وەزیری دەرەوەی ئیتالیا دەكەین كە ئەمڕۆ سه‌ردانى كردووین، هەروەك دەزانن به‌ڕێز سەرۆك وەزیرانی ئیتالیا خۆی لە كەسانی یەكەم بووە كە دوای ئەوەی گرووپی تیرۆریستی داعش بەرەو كوردستان هاتن، هات سەردانی هەولێری كرد و دواتر سوپاسالاری ئیتالیاش سەردانی ئێمەی كرد و ئیتالیا وەك بەشێك لەو هاوپەیمانییە نێودەوڵەتیەی دژی تیرۆریستان دروست بوو، لە ڕووی تەقەمه‌نی و چەك و یارمەتیی مرۆیی و هاوكاریی سەربازییه‌وه، یارمەتیی هەرێمی كوردستانی داوە. ئێمە لەو كۆبوونەوەیەدا بە وردی باسی ئەو تەوەرانە و پەیوەندیی هەرێمی كوردستان و ئیتالیامان كرد، هەروەها باسی ئەو هاوكاریانەمان كرد كە ئیتالیا بۆ هەرێمی كوردستانی ناردووه و دەینێرێت. هەرێمی كوردستان سوپاسگوزاری ئەو یارمەتییەیە و هیوادارین ئەو پەیوەندیانەی نێوان هەرێمی كوردستان و عیراق بەگشتی لەگەڵ ئیتالیا لە ئایندەدا زیاتریش ببێت.
دواتر وەزیری دەرەوەی ئیتالیا لە وتەیەكدا، پیرۆزباییی سەركەوتنی پێشمەرگەی لە سەرۆك وه‌زیرانى هەرێمی كوردستان كرد و دووپاتى كرده‌وه كه سه‌ركه‌وتنه‌كانى شه‌نگال لە ڕووی مۆراڵه‌وه كاریگەریی زۆری لەسەر ڕای گشتی دروست كرد و گرنگیی خۆی هەبوو و گوتی:
زۆر سوپاس، كۆبوونەوەیەكی زۆر گرنگ و بەسوودمان لەگەڵ سەرۆك وەزیرانی نێچیرڤان بارزانی هەبوو، من حەز دەكەم لە سەرەتادا پیرۆزبایی لە بەڕێز نێچیرڤان بارزانی بكەم بۆ ئەو دەستكەوتە سەربازیانەی لە شه‌نگال بە دەست هاتن و ئەمەش زۆر گرنگ بوو لە ڕووی مۆراڵه‌وه، چونكە نیگەرانییەكی زۆر لاى ڕای گشتی لەوبارەوە هەبوو و جەخت لەسەر ئەم بارودۆخە دەكرایه‌وە، بۆیە توانای پێشمەرگە بۆ ڕزگاركردنی شه‌نگال لە ڕووی سیمبۆلى و مۆڕاڵه‌وه، زۆر گرنگ بوو.
هەروەها وەك سەرۆك وەزیران گوتی، ئێمە باسی هاوكاریی هاوبەشی نێوانمان كرد لە چوارچێوەی ئەو هاوپەیمانییەی لە دژی داعش پێكهاتووە، بە تایبەتی هاوكاریی سەربازی و خۆشحاڵم كە لە ڕۆژی یەكەمەوە یەكەم تیمی ئێمە لە مامۆستا و ڕاهێنەر و مەشقكارانی سەربازیی ئیتاڵی، گەیشتۆوونەتە هەرێمی كوردستان و لە ئایندەدا ژمارەیان دەگاتە 280 كەس، بەڵام ئێستا 35یان گەیشتوونەتە هەولێر بۆ مەشق و ڕاهێنانی پێشمەرگە لەسەر ئەو سیستەمەی چەكی ئیتاڵی كە بۆ ئه‌وانمان دابین كردووە.
ئێمە هەر لەو كۆبوونەوەیەدا باسی هاوكاریی مرۆییمان كرد كە ئەمەش ئەركێكی قورس و سه‌خته لەسەر هەرێمی كوردستان و لە ڕووی هەبوونی په‌نابه‌ر و ئاوارەى ناوخۆوه، حكوومەتی هەرێمی كوردستانی خستۆتە ژێر بارێكی قورسه‌وه.
هه‌روه‌ها گوتى: ئیتالیا لەمبارەیەوە بەرنامەی خۆی هەیە و دەستپێشخەریی ئەوەی هەبوو كە 12 ملیۆن دۆلار بۆ هاوكاریی مرۆیی دابین بكات، بەڵام ئێمە بیرمان لە دەستپێشخەریی دیكە كردۆتەوە بۆ هاوكاریی مرۆیی، بە تایبەتی كە ئێستا لە وەرزی زستانداین، بۆیە دەمانەوێ لەم ڕووەوە هاوكار بین. ئێمە هەروەها جەخت لەسەر باشتركردنی پەیوەندیی نێوان هەردوولامان دەكەینەوە، جگە لە خەبات لە دژی تیرۆریستانی داعش، دەمانەوێ پەیوەندییەكانمان لە زۆر بواردا بچێتە پێشه‌وه، بە تایبەتی لە بواری ئابووری و كولتووریەوە، چونكە دەكرێ كاری زۆر لەسەر هەردوو بوار بكرێت، كە بەرژەوەندیی هاوبەشی هەردوولای تیادایە، ڕاستە ئێستا ئەو هاوكارییە هەیە و لە زۆر بواریشدا بەدی دەكرێت، هەروەها تیمی تایبەتمان لە بواری شوێنەواردا هەیە و بە ڕەچاوكردنی سەقامگیریی هەرێمی كوردستان و ئەو سەركەوتنەی لە ڕووی سەربازییەوە بە دەست هاتوون، ئەگەری هاوكاری لە زۆر بواردا زیاتر دەكات.
وەزیری دەرەوەی ئیتالیا ئاشكرای كرد، هه‌موو ئه‌و فڕۆكە ئیتالیانه‌ى یارمه‌تى و هاوكارى بۆ هه‌رێمى كوردستان ده‌هێنن، پێشتر له به‌غدا ده‌نیشنه‌وه ئینجا دێنه هه‌ولێر، ئه‌مه‌ش له‌سه‌ر داواى حكوومه‌تى عیراقه و گوتى: ئێمه له‌م داوایه تێده‌گه‌ین. ڕوونیشى كرده‌وه لە دوایین سەردانیدا بۆ بەغدا، تێبینیی ئەوەی كرد ئەوان بەرنامەی خۆیان هەیە و بە بەیاخەوە دەڕواننە ئەو ڕێككەوتنەی لەگەڵ هەولێر ئیمزایان كردووە و هیوای خواست جێبەجێی بكەن.
لای خۆیەوە به‌ڕێز نێچیرڤان بارزانی لە وەڵامی پرسیارێكدا لەبارەی بارودۆخی دەشتی نەینەوا و ڕزگاركردنییه‌وه، ئاماژەی بەوە دا ئەگەر ئۆپه‌راسیۆنى سەربازیش بكرێت بۆ گەڕاندنەوەی مه‌سیحییه‌كان بۆ شوێنەكانی خۆیان، ڕاگرتن و پاراستنی ناوچەكە كارێكی گرنگترە و گوتی: بەبێ ئەنجامدانی ئۆپەراسیۆنی سەربازی لە مووسڵ، ئەم كارە زەحمەت دەبێت، نیگەرانیی ئێمە لە بارەی پاراستنیانە دوای گەڕانەوەیان. ئەنجامدانی ئۆپەراسیۆنی سەربازی بۆ مووسڵ كارێكی سەختە، بەڵام هاوكاریكردن بۆ گەڕانەوەی ئەم خەڵكە بۆ زێدی خۆیان لە پێشینەی كارەكانی ئێمەیە و ناشتوانین كاتەكەی دیاری بكەین.
به‌ڕێز وەزیری دەرەوەی ئیتالیا ئەوەی خستە ڕوو كه وڵاتەكەی چەكی بە هەرێمی كوردستان داوە و پێكهاتبوو لەمووشەكی RBG و دژه‌تانك، ئەمە جگە لە هەبوونی مەشقكار بۆ ڕاهێنان و مەشقپێكردنی پێشمەرگە لەسەر بەكارهێنانی و ئاماژەی بەوەش دا فڕۆكەكانی ئیتالیا لە بنكەی سەرەكیی خۆیانەوە لە كوێت كاری خۆیان ئەنجام دەده‌ن و جۆری فڕۆكەكانیش TORNADO و فڕۆكەی بێ فڕۆكەوانن كه ڕەزامەندیی پەرلەمانی ئیتالیاى له‌سه‌ره.
بەڕێز نێچیرڤان بارزانی تیشكى خسته سه‌ر بارودۆخی هەرێمی كوردستان لە سەردەمی حكوومەتی پێشوو و ڕوونى كرده‌وه كوردستان بە كاتێكی سەختدا تێپەڕی، لە هەمان كاتیشدا گەشبینیی خۆی بە حكوومەتی تازەی به‌ڕێز عه‌بادی نیشان دا و دووپاتی كردەوە ئێستا قۆناغێكی دیكەی پەیوەندییەكان دەست پێدەكات، هه‌روه‌ها ڕایگه‌یاند كه عه‌بادی سەردانی كوردستان دەكات، بەڵام تا ئێستا كاتی سەردانەكە دیار نیە و گوتی : لە حكوومەتی هەرێمی كوردستان سیاسەتی كاركردنمان لەگەڵ حكوومەتی تازەی عیراقدا هەیه بۆ چارەسەركردنی كێشەكان.
هه‌روه‌ها گوتى ئێمە مانگی ڕابردوو سەردانی بەغدامان كرد و گەیشتینە ڕێككەوتنێكی سەرەتایی لەبارەی پرسی نەوت و داهاته‌وه بۆ هەناردەكردنی بڕی 250 هەزار بەرمیلی نەوتى ڕۆژانه لە لایەن حكوومەتی هەرێمی كوردستانەوە، لەگەڵ هاوكاریكردنی بەغدا بۆ هەناردەكردنی 300 هەزار بەرمیل نه‌وتى ڕۆژانه لە نەوتی كەركووك. هیوادارین بگەینە جێبەجێكردنی ئه‌م ڕێككەوتنە لە سەرەتای مانگی یەكی ساڵی تازە، بە هەبوونی كەشوهەوایەكی تازە و هیوادارین سوودی لێ وەربگرین بۆ چارەسەركردنی كێشەكانی هەولێر و بەغدا، هەروەها پێویستە بەغداش 17%ی بەشی هەرێمی كوردستان لە بودجەی گشتیی عیراق بنێرێت كە تا ئێستا ئێمە 11%مان وەرگرتووە، ئەم ڕێككەوتنەش بۆ ماوەی یەك ساڵە و هیوادارم لەم كاتەدا بگەینە ڕێككەوتنی تەواو و ئێمە ئامادەین بۆ هەموو هاوكاریەك.
دوایین شت له وه‌ڵامى پرسیارێكدا به‌ڕێز وه‌زیرى ده‌ره‌وه‌ى ئیتالیا گوتى: پێزانینمان بۆ ڕۆڵى پێشمه‌رگه هه‌یه كه له جیاتى هه‌موو جیهان له‌سه‌ر زه‌وى به هاوكاریى هێزى ئاسمانیى هاوپه‌یمانان شه‌ڕى داعش ده‌كات، ئه‌مه ته‌نیا هه‌ستى من نییه، هه‌ستى ڕاى گشتیى ئیتالیاش هه‌ر ئه‌مه‌یه. به‌شداریى پێشمه‌رگه له شه‌ڕه‌كانى كۆبانێشدا به‌رز ده‌نرخێنین و هاوكارییه‌كى باشه بۆ ئه‌و شه‌رڤانانه‌ى له وێ ده‌جه‌نگن.
مۆگێرینی، پیرۆزباییی سه‌ركه‌وتنه‌كانی له پێشمه‌رگه كرد
ئێواره‌ی ئه‌مڕۆ دووشه‌ممه 22ی دیسه‌مبه‌ری 2014، به‌ڕێز نێچیرڤان بارزانی سه‌رۆك وه‌زیرانی هه‌رێمی كوردستان، له فڕۆكه‌خانه‌ی نێوده‌وڵه‌تیی هه‌ولێر، پێشوازی له خاتوو ’’فێدێریكا مۆگێرینی’’ به‌رپرسی سیاسه‌تی ده‌ره‌وه‌ی یه‌كێتیی ئه‌وررۆپا و شاندێكی یاوه‌ری كرد.
دواتر له كۆبوونه‌وه‌یه‌كدا خاتوو مۆگێرینی، ده‌ستخۆشی و پیرۆزباییی سه‌ركه‌وتنه‌كانی پێشمه‌رگه‌ی له ناوچه‌ی شه‌نگال له گه‌لی كوردستان و پێشمه‌رگه كرد و ڕایگه‌یاند كه به‌م بۆنه‌یه‌وه، ئه‌مڕۆ له به‌غداش پیرۆزباییی سه‌ركه‌وتنه‌كانی پێشمه‌رگه‌ی له حكوومه‌تی عیراق و به‌ڕێزان سه‌ركۆمار و سه‌رۆك وه‌زیرانی عیراق كردووه. هه‌روه‌ها دووپاتی كرده‌وه كه سه‌ركه‌وتنه‌كانی پێشمه‌رگه له ناوچه‌ی شه‌نگال، بۆ مۆرالی پێشمه‌رگه و ته‌نانه‌ت بۆ مۆرالی جیهان و كۆمه‌ڵگه‌ی نێوده‌وڵه‌تیش شتێكی گرنگ و زۆر باشه.
له به‌شێكی دیكه‌ی كۆبوونه‌وه‌كه‌دا به‌ره‌نگاربوونه‌وه‌ی تیرۆر و جه‌نگی دژی داعش خرایه به‌ر باس و هه‌ردوولا جه‌ختیان له‌وه كرده‌وه كه داعش بۆ سه‌ر ته‌واوی مرۆڤایه‌تی مه‌ترسییه و ده‌بێ به هه‌موو شێوه‌یه‌ك به‌ره‌نگاری ببنه‌وه بۆ ئه‌وه‌ی یه‌كجاری له‌ناو بچێت. له‌مباره‌یه‌وه به‌ڕێز نێچیرڤان بارزانی دووپاتی كرده‌وه كه شه‌ڕی داعش ته‌نیا به شێوازی سه‌ربازی سه‌ركه‌وتوو نابێت، به‌ڵكوو ده‌بێت شه‌ڕی بیری داعش بكرێت و له ڕووی هزری و په‌روه‌رده‌ییشه‌وه به‌ره‌نگاری ببینه‌وه.
هه‌روه‌ها گرنگیی ڕۆڵی هاوپه‌یمانیی نێوده‌وڵه‌تی و پشتگیریی مرۆیی و سه‌ربازیی نێوده‌وڵه‌تی بۆ هه‌رێمی كوردستان و به‌شداریی كارا و كاریگه‌ری هێزه ئاسمانییه‌كانی هاوپه‌یمانان بۆ پشتگیری له پێشمه‌رگه به به‌رزی هه‌ڵسه‌نگێندرا و به‌ڕێز سه‌رۆك وه‌زیران وێڕای دووپاتكردنه‌وه‌ی سوپاس و پێزانین بۆ ئه‌و هاوكاری و پشتگیرییه، داكۆكی له‌وه كرده‌وه كه پێشمه‌رگه پێویستی به هاوكاریی زیاتر و چه‌كی قورس و ڕاهێنان هه‌یه. هه‌ر له‌مباره‌یه‌وه به‌ڕێز وه‌زیری پێشمه‌رگه‌ی هه‌رێمی كوردستانیش كه له كۆبوونه‌وه‌كه‌دا به‌شدار بوو، تیشكی خسته سه‌ر دوایین پێشهاته‌كانی شه‌ڕ و پێداویستییه‌كانی پێشمه‌رگه. لای خۆیه خاتوو مۆگێرینی جه‌ختی له‌وه كرده‌وه كه هه‌و‌ڵه‌كانیان بۆ هاوكاری و پشتگیریی پێشمه‌رگه له هه‌موو ڕوویه‌كه‌وه به‌رده‌وام ده‌بێت.
ڕه‌وشی ئاواره و په‌نابه‌ران و پێداویستییه‌كانیان، به‌شێكی دیكه‌ی كۆبوونه‌وه‌كه بوو كه تیایدا به‌ڕێز سه‌رۆك وه‌زیران جه‌ختی له پێویستیی هاوكاریكردنی زیاتری ئاواره‌كان كرده‌وه و داوای كرد یه‌كێتیی ئه‌ورووپا هه‌وڵی زیاتر بدات بۆ ئه‌وه‌ی هه‌م وڵاتانی ئه‌ورووپا و هه‌م كۆمه‌ڵگه‌ی نێوده‌وڵه‌تیش ئاوڕی جددیتر له كه‌یسی ئاواره‌كان بده‌نه و هاوكاریی زیاتریان پێشكه‌ش بكه‌ن، وه‌ك چۆن حكوومه‌تی عیراقیش ده‌بێ زیاتر به‌هانایانه‌وه بێت.
له كۆتاییی كۆبوونه‌وه‌كه‌دا، دوایین ڕێككه‌وتنی هه‌ردوو حكوومه‌تی هه‌رێمی كوردستان و حكوومه‌تی فیدرال، په‌یوه‌ندییه‌كانی هه‌رێمی كوردستان و وڵاتانی دراوسێ، ڕه‌وشی ناوچه‌كه به‌گشتی و كاریگه‌رییه‌كانی شه‌ڕی دژی تیرۆر، تاوتوێ كران.
ئەمڕۆ هەینی 26ـی 12ـی 2014 لە شاری هەولێر بەڕێز مەسعود بارزانی سەرۆكی هەرێمی كوردستان پێشوازی لە عەلی لاریجانی سەرۆكی ئەنجوومەنی شوورای ئیسلامیی ئێران و شاندێكی یاوەری كرد كە پێكهاتبوون لە ژمارەیەك نوێنەر و ئەندام و ڕاوێژكاری ئەنجوومەنی شوورای ئیسلامیی ئێران و مورتەزا عەبادی كونسوڵی گشتیی كۆماری ئیسلامیی ئێران لە هەولێر و، لەگەڵیان كۆبۆوە.
پەیامی سەرۆك بارزانی بەبۆنەی جەژنی ڕۆژووی ئێزیدیان
بەناوی خودای مەزن و دلۆڤان
خۆشحاڵم كە لە بۆنەی جەژنی ڕۆژووی ئێزیدییاندا سەركەوتنی گەورەی پێشمەرگە قارەمانەكانی كوردستان بە دیاری پێشكەشی خوشك و برایانی ئێزیدی دەكەین و، ئەمە شیاوترین پیرۆزباییە لەوان دەكەین.
دەستپێكردنی ئۆپڕاسیۆنی ڕزگاركردنی دەڤەری شنگال لە ڕۆژی ئاڵای كوردستان و گەییشتنی پێشمەرگە بە چیای شنگال لە 18ـی 12ـی 2014 مانای خۆی هەیە. با هەموو دوژمنان و ناحەزان بزانن ئەگەر جارێك بۆیان بڕەخسێت كینی خۆیان بەرانبەر كورد و كوردستان دەربكەن، لە كۆتاییدا باجی تاوانەكانیان دەدەن و ئەبێ تیرۆریستانی داعش ببنە پەند بۆ هەموو دوژمنان.
هیوادارم بەیەكگەییشتنی ئەم سەركەوتنە مەزنە و جەژنی ڕۆژووی خوشك و برایانی ئێزیدی ببێتە هۆی ساڕێژبوونی برینی ئێمە و ئەو ئازیزانە و گەلی كوردستانیش لەوە دڵنیا دەكەین كە سەری دوژمنان دەكەوێتە ژێر پێیان.
هەزارن سڵاو لە گیانی پاكی شەهیدانی هەمیشە زیندوو. دوعای چاكبوونەوەی بە پەلەش بۆ بریندارەكان و دەست و چاوی هەموو پێشمەرگە قارەمانەكان ماچ دەكەم كە من دەزانم چ قارەمانییەكی مەزنیان تۆمار كردووە.
مسعود بارزانی
سەرۆكی هەرێمی كوردستان
19ـی 12ـی 2014
بەبۆنەی سەركەوتنەكانی پێشمەرگە سەرۆك وەزیرانی عێراق پیرۆزبایی لە سەرۆكی هەرێمی كوردستان كرد
ئێوارەی ئەمڕۆ هەینی 19ـی 12ـی 2014 بەڕێز حەیدەر عەبادی سەرۆك وەزیرانی عێراقی فیدڕاڵ لەڕێی تەلەفۆنەوە پەیوەندی بە بەڕێز مەسعود بارزانی سەرۆكی هەرێمی كوردستان كرد.
لەم پەیوەندییە تەلەفۆنییەدا سەرۆك وەزیرانی عێراقی فیدڕاڵ پیرۆزبایی لە سەرۆك بارزانی كرد بە بۆنەی سەركەوتنەكانی ئەم دواییەی هێزەكانی پێشمەرگەی كوردستان لە دەڤەری زووممار و شەنگال و شكاندنی ئابڵۆقەی تیرۆریستانی داعش لەسەر چیای شنگال. هەروەها دەستخۆشیشی لە هێزەكانی پێشمەرگە كرد بۆ ئەو دەستكەوت و سەركەوتنانەی لەشەڕی دژی تیرۆریستانی داعش بەدەستیان هێناوە.
هەر لەم پەیوەندییە تەلەفۆنییەدا سەرۆك وەزیرانی عێراقی فیدڕاڵ پشتگیری و پشتیوانی حكوومەتی عێراقی بۆ هەرێمی كوردستان و هێزەكانی پێشمەرگە لە شەڕی دژی تیرۆریستان دووپات كردەوە و جەختی لە هەماهەنگی و پەیوەندیی بەردەوامی هەردوولا كردەوە.
سەرۆك بارزانی سەردانی مەزاری شەرفەدین لە چیای شنگال كرد
ئێوەارەی ئەمڕۆ یەكشەممە 21ـی 12ـی 2014 بەڕێز مەسعود بارزانی سەرۆكی هەرێمی كوردستان لە چوارچێوەی سەردانەكەی بۆ چیای شنگال سەردانی مەزاری شەرفەدینی لە چیای شنگال كرد كە بە یەكێك لە شوێنە پیرۆزەكانی كوردانی ئێزیدی هەژمار دەكرێت.
لەم سەردانەیدا سەرۆك بارزانی لە لایەن ژمارەیەك كەسایەتیی ئایینی و كۆمەڵایەتیی دەڤەری شنگال و ئێزیدی پێشوازیی لێكرا و ئامادەبووانی مەزاری شەرفەدین ستاییشی ڕۆڵی سەرۆك بارزانیان كرد لە سەركەوتنی ئۆپڕاسیۆنی ئازادكردنی دەڤەری شنگال. سەرۆك بارزانیش پیرۆزبایی ئەو سەركەوتنەی لە خوشك و برایانی ئێزیدی و خەڵكی ناوچەكە كرد و پێزانینیشی بۆ ڕۆڵی قارەمانانەی هێزی پێشمەرگەی كوردستان هەبوو و سڵاوی خۆیشی بۆ ئەو شەهیدە قارەمانانە نارد كە گیانی خۆیان لەپێناو بەرگریكردن لە خاك و كەرامەتی كوردستان فیدا كردووە.
سه‌رۆك بارزانی گه‌یشته سه‌ر چیای شنگال
دوای سەركەوتنی ئۆپڕاسیۆنەكانی پێشمەرگە بە سەرپەرشتیی ڕاستەوخۆی سەرۆك بارزانی لە هەردوو میحوەری ڕەبیعە بۆ چیای شنگال و زوومار بۆ چیای شنگال و ئازادكردنی ناوچەیەكی بەرفراوان لە ڕۆژئاوای ڕووباری دیجلە و دەڤەری ڕەبیعە و زوومار و شنگال ئەمڕۆ یه‌كشه‌ممه 21/12/2014 به‌ڕێز مەسعود بارزانی سەرۆكی هەرێمی كوردستان گه‌یشته سەر چیای شنگال.
سەرۆك بارزانی پاش گەییشتنی بە چیای شنگال لە یەكێك لە بارەگاكانی پێشمەرگە لە چیای شنگال له‌گه‌ڵ فه‌رمانده‌كانی هێزی پێشمەرگە لە چیای شنگال بۆ تاوتوكردنی دوا بارودۆخی مه‌یدانی ئۆپه‌راسیۆنه‌كه و چۆنیه‌تی هاوكاری كردنی ئه‌و خێزانانه‌ی له‌سه‌ر چیا ماونه‌ته‌وه كۆبۆیەوە.
لەدوای كۆبوونەوەكە لە پڕێسكۆنفرانسێكی ڕۆژنامەوانی كە لە چیای شنگال بەڕێوەچوو پەیامی سەركەوتنی بە گەلی كوردستان راگه‌یاند و گوتی سوپاسى پێشمه‌رگه ده‌كه‌م كه توانیان داستانێكی مێژوویی تۆمار بكەن و له میانه‌ى 24 سه‌عاتدا دوو رێگاى سه‌ره‌كى ڕەبیعە و زوومار بۆ چیای شنگال بكەنەوە.
سەرۆك بارزانی پیرۆزبایی لە خوشك و برایانی ئێزدی كرد بەبۆنەی كۆنترۆڵكردنەوەی بەشێكی زۆری ناوچەكانیان لەلایەن پێشمەرگەوە و ئاماژەی بەوەدا كە ئاواتێكى ئه‌وه بوو كه بێته سه‌ر چیاى شنگال و پیرۆزبایى سەركەوتن له خوشك و برایانى خۆی بكات. هەروەها دەستخۆشیی لە پێشمەرگە كرد و گوتی: "پێشمەرگە داستانێكی مێژوویی تۆماركرد،
سەرۆكی هەرێمی كوردستان سڵاوی بۆ شەهیدانی پێشمەرگەش نارد و گوتی " ئه‌و سەركەوتنە به‌رهه‌می خوێنی شه‌هیدانه، له‌و باوه‌ڕه‌دام كه ئێستا گیانى پاكى شه‌هیدان بەو سەركەوتنە خۆشحاڵن". لە درێژەی قسەكانیدا سەرۆك بارزانی ستاییشی خۆڕاگری ئەو خەڵكە قارەمانەی كرد كە لە بارودۆخێكی زۆر ناخۆشدا لە چیا ماونەتەوە و بوونەتە پەندی خۆڕاگری بۆ هەموو جیهان.
دوای وتەكەی، سەرۆك بارزانی وەڵامی پرسیاری ڕۆژنامەنووسانی دایەوە.
بۆ بینینی دەقی وتاری سەرۆك بارزانی كلیكی ئەم نووسینە بكە.
سەرۆكی هەرێمی كوردستان پێشوازی لە شێخی هۆزی شەمەر دەكات
ئەمڕۆ دووشەممە 22ـی 12ـی 2014 لە شاری دهۆك بەڕێز مەسعود بارزانی پێشوازی لە شێخ عەبدوڵڵا حمێدی عەجیل ئەلیاوەر شێخی هۆزی شەمەر و شاندێكی یاوەری كرد.
لە دیدارێكدا شێخی هۆزی شەمەر دەستخۆشی و پیرۆزبایی لە سەرۆك بارزانی كرد بۆ ئەو سەركەوتنە مەزنەی كە هێزەكانی پێشمەرگە لە بەرانبەر تیرۆریستانی داعش بەدەستیانهێناوە و هەروەها ئازادبوونی ناوچەیەكی بەرفراوانی دەڤەری شنگال و ڕەبیعە و زووممار. سوپاسی قارەمانێتیی هێزەكانی پێشمەرگەی كوردستانیشی كرد لە تێكشكاندن و دەرپەڕاندنی تیرۆریستانی داعش لەم ناوچانە.
لە بەرانبەردا سەرۆك بارزانی سوپاسی شێخی هۆزی شەمەری كرد و جەختی لەسەر تەبایی و برایەتیی نێوان كورد و ئەو عەرەبانە كردەوە كە بڕوایان بە پێكەوەژیان هەیە و دەستیان لەگەڵ تیرۆریستانی داعشدا نەبووە. سەرۆك بارزانی ئەوەیشی دووپات كردەوە كە ئەو عەرەبانەی بەشداری تاوانەكانی داعش بوونە و هاوكارییان كردوون و تاوانیان لەدژی پێكهاتە نەتەوەیی و ئایینییەكانی ناوچەكە بە تایبەت ئێزیدی و مەسیحییەكان ئەنجام داوە لەو تاوانانەدا بەرپرسیارن و شەریكی زوڵم و تاوانی تیرۆریستانی داعشن.
نێچیرڤان بارزانى پێشوازى له سیناتۆرێكى ئه‌مه‌ریكى ده‌كات
ئێواره‌ى ئه‌مڕۆ یه‌كشه‌ممه 21ى دیسه‌مبه‌رى 2014، به‌ڕێز نێچیرڤان بارزانى سه‌رۆك وه‌زیرانى هه‌رێمى پێشوازى له به‌ڕێز سیناتۆر "پات ڕۆبه‌رتس"، ئه‌ندامى ئه‌نجومه‌نى پیرانى ئه‌مه‌ریكا كرد.
له دیدارێكدا به‌ڕێز سیناتۆر ڕۆبه‌رتس خۆشحاڵیى خۆى به سه‌ردانى كوردستان ده‌ربڕى، به تایبه‌تى كه سه‌ردانه‌كه‌ى هاوكاته له‌گه‌ڵ پێشڕه‌وى و سه‌ركه‌وتنه‌كانى پێشمه‌رگه و خۆى بووه‌ته شاهیدى سه‌ركه‌وتنه‌كانى پێشمه‌رگه له ناوچه‌ى شه‌نگال و ده‌وروبه‌رى. هه‌روه‌ها باسى له‌وه كرد كه كورد له مێژوودا هه‌میشه چه‌وسێنراوه‌ته‌وه، به‌ڵام توانیویانه خۆیان ڕزگار بكه‌ن و وه‌ك جه‌نگاوه‌رى به‌رگریكار له مافه‌كانیان ناسروان. سوپاس و پێزانینى خۆیشى بۆ قوربانییه‌كانى پێشمه‌رگه ده‌ربڕى و هیواى خواست پێشڕه‌وییه‌كانى پێشمه‌رگه تا ده‌گه‌نه ئه‌نجامى كۆتایى، به‌رده‌وام بن.
به‌ڕێز سیناتۆرى میوان ڕوونى كرده‌وه تیرۆرستانى داعش كه به تیرۆركارى و دڕه‌نده‌یى و تۆقاندن، مه‌ترسییان له‌سه‌ر ئاشتى و سه‌قامگیرى دروست كردووه، به ته‌نیا دوژمنێكى سه‌رسه‌ختى عیراق و سووریا نین، به‌ڵكوو دوژمنى ته‌واوى مرۆڤایه‌تین و ده‌بێ به یه‌كجارى بنه‌بڕ بكرێن و نه‌مێنن. هه‌روه‌ها تیشكى خسته سه‌ر په‌یوه‌ندییه‌كانى ئه‌مه‌ریكا و هه‌رێمى كوردستان و دووپاتى كرده‌وه كه پێویسته په‌یوه‌ندییه‌كانى ئه‌مه‌ریكا و هه‌رێمى باشتر ببن و هاوكاریى زیاتر پێشكه‌ش به هه‌رێمى كوردستان بكرێت، بۆ ئه‌وه‌ى بتوانێت باشتر ڕووبه‌ڕووى تیرۆر ببێته‌وه و سه‌ربكه‌وێت.
لاى خۆیه‌وه به‌ڕێز نێچیرڤان بارزانى سه‌رۆك وه‌زیران هه‌رێمى كوردستان، سوپاسى بۆچوون و تێبینییه‌كانى كرد و تیشكى خسته سه‌ر دوایین پێشهات و پێشڕه‌وییه‌كانى پێشمه‌رگه، به تایبه‌تى سه‌ركه‌وتنه‌كانى ئه‌م ڕۆژانه‌ى پێشمه‌رگه له ناوچه‌ى شه‌نگال و داكۆكى له‌وه كرده‌وه كه ڕاسته پێشمه‌رگه سه‌ركه‌وتنى باشى به ده‌ست هێناوه، به‌ڵام بۆ پاراستنى ئاسایش و سه‌قامگیرى، پێویستى به هاوكارى و چه‌كى قورس و و مه‌شق و ڕاهێنان هه‌یه. هه‌روه‌ها سوپاسى ئه‌مه‌ریكا و هێزه هاوپه‌یمانه‌كانى كرد كه هێرشه ئاسمانییه‌كانیان بۆ سه‌ركه‌وتنى پێشمه‌رگه، هاوكار بوون.
به‌ڕێز سه‌رۆك وه‌زیران هه‌روه‌ها باسى له ڕه‌وش و بارودۆخى ئاواره و په‌نابه‌ران كرد، به تایبه‌تیش ئاواره ئێزدى و مه‌سیحییه‌كان كه ڕوویان له هه‌رێمى كوردستان كردووه و حكوومه‌ت و خه‌ڵكى هه‌رێمى كوردستان، هه‌موو هه‌وڵێكیان داوه بۆ ئه‌وه‌ى به‌هانایانه‌وه بچن و هاوكارییان بكه‌ن و ئارامى و سه‌قامگیرییان بۆ دابین بكه‌ن. جه‌ختیشى له‌وه كرده‌وه كه تا له ئاواره‌ییدان، ئه‌وه‌ى له توانادا بێت هاوكارییان ده‌كه‌ن، به‌ڵام بێگومان ئه‌وان پێویستییان به هاوكاریى زیاترى كۆمه‌ڵگه‌ى نێوده‌وڵه‌تى هه‌یه.
سەرۆك كۆماری عێراق بەبۆنەی سەركەوتنەكانی پێشمەرگە پیرۆزبایی لە سەرۆكی هەرێمی كوردستان كرد
ئەمڕۆ شەممە 20ـی 12ـی 2014 بەڕێز فواد مەعسوم سەرۆك كۆماری عێراق لەڕێی تەلەفۆنەوە پەیوەندی بە بەڕێز مەسعود بارزانی سەرۆكی هەرێمی كوردستان كرد. لەم پەیوەندییە تەلەفۆنییەدا سەرۆك كۆماری عێراق بە گەرمی پیرۆزبایی لە سەرۆك بارزانی كرد بە بۆنەی ئەو سەركەوتنە مەزنانەی هێزی پێشمەرگەی كوردستان لە دەڤەری زووممار و ڕەبیعە و شنگال بەدەستیانهێناوە. هیوایشی خواست لە ئاییندەیەكی نزیكدا تەواوی شوێنەكانی دی لە دەستی تیرۆریستان ڕزگار بكرێن. هەروەها دەستخۆشیشی لە هێزەكانی پێشمەرگە كرد كە قارەمانانە توانیویانە تیرۆریستان تێكبشكێنن و ڕاویان بنێن.
More...
نێچیرڤان بارزانی: كۆمپانیاكانی نەوت متمانەیان پێكردین
نێچیرڤان بارزانى ده‌ستخۆشى و پیرۆزبایى له پێشمه‌رگه ده‌كات
نێچیرڤان بارزانی و ئه‌ردۆغان كۆبوونه‌وه
نێچیرڤان بارزانی و داوودئۆغلو ڕه‌وشی عیراق و كوردستان تاوتوێ ده‌كه‌ن
دوایین هەواڵەکان
- نوێنەری حکومەتی هەرێم لە ئێران: سەردانەکەی پزیشکیان ئاماژەیە بۆ گرنگیدانی ئێران بە هەرێمی کوردستان
- هه‌رێمى كوردستان و ئێران جهخت له برهودان به پهيوهندييهكانيان دهكهنهوه
- سهرۆک نێچیرڤان بارزانی: سەردانی سەرۆک کۆماری ئێران مێژوویی بوو
- نازم دەباغ له وتووێژ له‌گه‌ڵ ئاژانسی ئیرنا: مەسعوود پزشکیان سەردانی هەولێر دەکات
- نازم دەباغ: کاتی سەردانی پزیشکیان بۆ عێراق دیار نییە
- «سەلام رشدی» له‌گه‌ڵ شاندی یهکێتی هاورده و ناردنکارانی لقی هه‌ولێر کۆبۆوه
- سه‌رۆك نێچيرڤان بارزانى: ههميشه پشتيوانى و بهرگرى له مافهكانى ئێزدييان دهكهين
- سهرۆک نێچیرڤان بارزانی له‌گه‌ڵ باڵیۆزی یهکێتیی ئه‌ورووپا کۆبووهوه
- سه‌رۆك نێچيرڤان بارزانى له‌گه‌ڵ باڵيۆزى نهمسا كۆبووهوه
- سه‌رۆك نێچيرڤان بارزانى سوپاسى جهنهرال ڤاول ده‌كات