جێگری سەرۆک وەزیران سەرپەرشتی کۆبوونەوەی چاکسازییەکانی حکومەتی کرد
• قوباد تاڵەبانی: چاكسازییە‌كانمان بەردەوامی پێ دەدەین و داهاتمان فرەچەشن دەکەین
• جێگری سەرۆک وەزیران: جێبەجێکردنی یاسای چاكسازی كە لە پە‌رلە‌مانی كوردستان پەسەند كراوە، یە‌كێ لە پلانە‌كانمان لە‌ماوە‌ی داھاتوودا دەبێت.
هەولێر، هەرێمی کوردستان، عێراق (GOV.KRD) - رۆژی چوارشە‌ممە ١١ ئاداری ٢٠٢٠، قوباد تاڵەبانی جێگری سە‌رۆكی ئەنجومەنی وەزیران، سەرپەرشتیی كۆبوونە‌وە‌یەکی تایبەت بە جێبەجێکردنی چاکسازییەکانی حکومەت کرد. لە كۆبوونە‌وە‌كە‌دا، ھە‌ڵسە‌نگاندێكی ورد بۆ رەوشەکە و دەرهاویشتەکانی بڵاوبوونەوەی ڤایرۆسی كۆرۆنا و چۆنییەتی جێبەجێ کردنی چاکسازییەکانی حکومەتی هەرێم لە سێکتەرە جیاجیاکاندا كرا.
جێگری سە‌رۆكی ئەنجومەنی وەزیران، ئاماژەی بەوەدا کە دەبێت؛ چاكسازییە‌كانمان بەردەوامی پێ بدەین و داهاتمان فرەچەشن بکەین و یاسای چاكسازی كە لە‌پە‌رلە‌مانی کوردستان پەسەند كراوە، یە‌كێك بێت لە ئەولەویاتەکانمان کە لە‌ماوە‌یەکی نزیکدا بیخە‌ینە بواری جێبەجێ كردنەوە."
لەکۆبوونەوەکەدا، بڕیاردرا وە‌فدێك سەردانی بەغدا بكات بۆ ئەوەی پێکەوە هەماهەنگ بین بۆ ئەم رەوشە هەنووکەییە، ھە‌روە‌ھا وەزارەتی دارایی راسپێردرا بۆ ھە‌فتە‌ی ئایندە راپۆرتێكی ورد ئامادە بكە‌ن سەبارەت بە چۆنییەتی ئەنجامدانی قۆناغەکانی چاکسازیی.
لەبەشی دووەمی کۆبوونەوەکە، باس لەکەرتی کارەبا کرا و چۆنییەتی چاککردنی ئەو کەرتە لەرووی پێدانی کارەبا بەهاوڵاتییان و ئەنجامدانی چاکسازی لەو سێکتەرە. وەزیری کارەبا ڕاپۆرتێکی لەسەر بەرهەمهێنان و دابەشکردن و کۆکردنەوەی داهاتەکانی وەزارەتیان پێشکەش کرد، لەو رووەووە پێشنیار و بۆچوونەکان خرانە روو و بڕیار درا چی پێویستە ئەنجام بدرێت بۆ ئەوەی ئەو سێکتەرە باشتر رێکبخرێتەوە.
ھە‌روە‌ھا بڕیاردرا لە ماوەی دوو هەفتەدا وەزارەتی کارەبا راپۆرتێکی زانستی ئامادە بکات وپلانەکانیان بۆ چاکسازی وباشتر خزمەتکردنی هاوڵاتییان لە پێدانی کارەبا پێشکەش بکەن.
بەرنامەی راپەڕین و ئازادكردنی شاری دهۆك
نازم عومەر دەباغ
(مامۆستا نازم)
بەندە بە بڕیاری مەكتەبی سیاسی یەكێتی بۆ بەشداریی لە چالاكییەكانی دەرەوە، دژی بەكارهێنانی چەكی كیمیایی لە مانگی نیسانی 1990 بە شاندێك رەوانەی پاریس كرام، لەبەر هەندێك هۆكار بۆ ماوەی چەند مانگێك لە پاریس مامەوە.
بۆ مێژوو پێویستە بوترێت جەنابی رەوانشاد مام جەلال، ئەوكات لە دیدارەكانی دەرەوەی لە لەندەن و لە پاریسیش كە بەندە لەگەڵیدا بووم، باسی لەوە دەكرد كە سەدام پەلاماری كوێت دەدات و دەیگرێت و ئەوەی جێگای سەر سوڕمان بوو لای فەرەنسییەكان پێیان وابوو ئەوە خەونە، كە بەڕێز د.ئەحمەد بامەڕنی وەكو نوێنەری یەكێتی بەشدار بوو.
نامەکەی مام جەلال بۆ سەرکردایەتی چی تێدابوو؟
ئەوەبوو لە 2/8/1990 سەدام پەلاماری كوێتی-دا و كوێتی داگیركرد. بەندە كارەكانم تەواو بوو، بڕیارمدا بگەڕێمەوە بۆ كوردستان، جەنابی مام جەلال پێی باش بوو لە سوریا سەردانێكی بەڕێزیان بكەم و لەوێوە بگەڕێمەوە بۆ كوردستان.
لە رۆژی 5/8/1990 لەرێگای فڕۆكەوە لە پاریس گەڕامەوە و چووم بۆ دیمەشق، نزیكەی هەفتەیەك مامەوە، لەو ماوەیەدا چەند جارێك بە خزمەت مام جەلال گەیشتم و بەڵێنی دا كە نامەیەك بۆ مەكتەبی سیاسی و بەڕێز رەوانشاد كاك نەوشیروان بنووسێت. نامەكە دوو خاڵی گرنگی تێدا بوو: یەكەمیان سەرنجی بوو لەسەر هەندێك بابەت و قسە و قسەڵۆك لەناو سەركردایەتی و مەكتەبی سیاسی، دووەم لەسەر دەربڕینی خۆشحاڵی خۆی بۆ ئایندە دوای گرتنی كوێت، كە بۆچوونەكانی وابوو لە سەدام ناگەڕێن لە كوێت بمێنێتەوە و بە دڵنیاییەوە پەلاماری دەدەن و دەری دەكەن، بۆیە پێویستە یەكێتی خۆی ئامادە بكات لەكاتی دەركردنی عیراق لە كوێت و شكاندنی هێزەكانی، جەماوەر و هێزی پێشمەرگە سازو ئامادە بكرێت بۆ سەركردایەتیكردنی راپەڕین و هاوكارییەكی تەواو لەگەڵ ئەندامانی بەرەی كوردستانی. هەروەها نووسیبووی كە ئەویش لە دەرەوە كار لەسەر ئەوە دەكات و لەبەرەی كوردستانی رێككەون لەسەر شێوازی سەركردایەتی كە جەنابی مام جەلال لە دەرەوە سەركردایەتیی بەرەی كوردستانی بكات و ئەگەر راپەڕینیش كرا، ئەوا جەنابی كاك مەسعود لە ناوەوە سەركردایەتیی پێشمەرگە بكات.
دیارە لە 12/8/1990 گەڕامەوە لە رێگای دیمەشق – تاران و لە تاران چاوم بە بەڕێز كاك قادری حاجی عەلی كەوت و دواتر پێكەوە گەڕاینەوە سەركردایەتی یەكێتی لە قاسمەڕەش.
کۆبوونەوەی سەرکردایەتی بڕیاریدا
كۆبوونەوەیەكی مەكتەبی سیاسی و سەركردایەتی كراو خاڵەكانی نامەكەی مام جەلال گفتوگۆی لەسەر كرا، هەندێك راو بۆچوون هەبوو كە جیاوازیی تێدابوو، بەتایبەتی لەسەر شێوازی گفتوگۆ لەگەڵ سەدام حسێن كە هەموویان جگە لە بەندە و مامۆستا چەتۆ پێچەوانەی ئەو بۆچوونانە بووین.
لە بابەتی راپەڕین و خۆسازدان، هەمووان یەك رابووین و بڕیاردرا كاك نەوشیروان سەرپەرشتیی بەرنامەی داڕشتنی راپەڕین بكات لەگەڵ رێكخستنەكانی فەرماندەیی گشتیی هێزی پێشمەرگە كە ئەوكات بە بەرپرسیارێتی بەڕێز كاك ملازم عومەر و ئەندامێتی هەڤاڵان كاك شێردڵ حەوێزی، نەقیب خەلیل، كاك شێخ جەعفەر، مام رۆستەم، كاك حامیدی حاجی خالید و چەند كادر و فەرماندەی بەتواناش لە هێزی پێشمەرگە و مەڵبەندەكان هاوكار بوون، هەروەها رێكخستنەكانی ناو شاریش بۆ دروستكردنی شانە چەكدارەكان.
یەكێتیی نیشتمانیی كوردستان كەوتە پەیوەندیی و ئەنجامدانی چەندین كۆبوونەوە لەگەڵ قەوارە سیاسییەكانی كوردستان بەتایبەت پارتی دیموكراتی كوردستان.
لە مانگی 9/1990 دا، سەردانێكی پاریسم كرد، لەو كاتەدا جەنابی كاك مەسعود بە یاوەریی شاندێكی بەرز هاتبوونە قاسمەڕەش و میوانی مەكتەبی سیاسیی یەكێتی بوون و لەوێ بەرنامەی تەواوی شێوازی دابەشكردنی میحوەرەكان دەستنیشان كرا.
بەرنامەی راپەڕین بەمجۆرە داڕێژرابوو
بە پێی ئەو بەرنامەیە كە خوالێخۆشبوو كاك نەوشیروان دایڕشتبوو، بڕیاری لێ دەدرێت و هەموو میحوەرەكان بەرپرسیان بۆ دیاری دەكرێت لەسەر بنەمای كێ زۆرترین هێزی هەیە، بەرپرسی یەكەم بۆ ئەوان دەبێت و لایەنەكەی دیكە دەبێتە جێگر و هەروەها حساب بۆ لایەنەكانی تریش بكرێت.
ئەوەی لێرەوە گرنگە لە كۆبوونەوەكانی بەرەی كوردستانی لەسەر پێشنیازی مام جەلال و یەكێتی، بڕیاردرا لە جیاتی دەركردنی بەیاننامەی لێبووردنی گشتی، بانگەوازی ئاشتبوونەوەی گشتی رابگەیەندریت، بۆیە لە سەرەتاوە چەكدارەكانی پاڵ حكومەتی بەعس، زووتر هەستیان بەو دڵنیاییە كرد و لەگەڵ ئەوەشدا زۆرترین زەرەرمەند لە دەستی ئەو چەكدارانەی سەربە حكومەتی عیراق یەكێتیی نیشتمانیی كوردستان بوو كە سەدان شەهیدی پیشمەرگە و فەرماندە و رێكخستنی بەدەست ئەوان لەدەستدابوو.
كاتێك لە مانگی 10/1990 گەڕامەوە بۆ سەركردایەتی، باس لەوە كرا كە هەموو میحوەرەكان بەرپرسی بۆ دانراوە و هەر ئەندامێكی مەكتەبی سیاسی كراوە بە بەرپرسی پارێزگایەك جگە لە دهۆك كە كەسی بۆ دانەنرابوو.
دیارە ئەوكات جەنابی كاك كۆسرەت ئەندامی مەكتەبی سیاسی نەبوو، بەڵام وەكو ئەندامی سەركردایەتی بە شایستەیی و ئازایی و بەتوانایی لە سەركردایەتی كردنی شاری هەولێر، ئەو بەرپرسیارێتییەی پێدرا.
كاك ملازم عومەر بۆ پارێزگای سلێمانی و كاك فەرەیدون عبدالقادر بۆ كەركوك و وەكو باسمان كرد كاك كۆسرەت بۆ هەولێر و جەنابی كاك نەوشیروانیش وەكو فەرماندەی گشتیی هێزی پێشمەرگەی كوردستان لەگەڵ جەنابی كاك مەسعود.
منیش بەلامەوە سەیر بوو كە شوێن بۆ بەندە دیاری نەكرابوو، چوومە لای كاك نەوشیروان چاوەرێی كۆبوونەوەم دەكرد، پرسیارم كرد ئەرێ بۆچی هیچ شوێنێك و كارێك لە بەرنامەی راپەڕین بۆ بەندە دیاری نەكراوە؟
لەوەڵامدا وتی: نەمانزانی وازوو دێیتەوە، لەگەڵ ئەوەی وتم كاك نەوشیروان خۆت دەتزانی مۆڵەتی من یەك مانگ بوو وا هاتمەوە، (دیارە ئەو وای دانابوو كە منیش وەكو ئەو برادەرانەی دەچوونە دەرەوە، درەنگ دەگەڕانەوە وا دەكەم).
نەمویست لەو سەروەرییە بێبەش بم
وتی: باشە تەنها دهۆك ماوە، ئەگەر دەچیت، منیش بەشانازییەوە وتم من پێشمەرگەم، هەر شوێنێك بێت دەچم و نامەوێت لەم سەروەرییە بێبەش بم. وتی: باشە.
ئەوكات جەنابی كاك ملازم عومەر و عەقید دارا تۆفیق، لە ماڵەكەی بوون. وتم: باشە چی بكەم بۆ دهۆك، خۆ من نەكەس دەناسم و نە هێزێكی ئەتۆی پێشمەرگە هەیە لەگەڵ خۆمدا بیبەم، پێویستم بە هاوكاریی جەنابت و مەكتەبی عەسكەرییە.
دیارە كاك نەوشیروان وەڵامێكی دامەوە كە دڵخۆشكەر نەبوو، بەڵام جەنابی كاك ملازم عومەر وتی: نازم خەمت نەبێت، ئەگەر بچیت من هاوكاریت دەكەم، لێرەوە جارێكی تر سوپاسی كاك ملازم عومەر دەكەم.
هەر لەوێ بڕیاریدا لەگەڵ خوالێخۆشبوو نەقیب خلیل، هەموو ئەو پێشمەرگانەی بادینان كۆبكەینەوە، كاك نەقیب خلیل وەكو فەرماندەی گشتیی هێزی بادینان و بەندەش وەكو بەرپرس و سەرپەرشتیار دەستبەكار بووین.
داوای هێزێكی تایبەتم كرد كە لەگەڵماندا بێت، ئەوە بوو بە بڕیاری كاك ملازم عومەر و بە ئامادەیی كاك عوسمان شارستێنی بە هێزێكی خۆیەوە كە لەگەڵیدا بوون و نزیكەی 50 پێشمەرگە دەبوون، لەگەڵماندا بن. كەوتینە پەیوەندیی و خۆسازدان، بەگشتی توانرا هێزێكی 180 كەسی ئامادە بكەین لە پێشمەرگە قارەمانەكانی ناوچەی بادینان كە لای خۆمان لە ئۆردوگای زێوە و ئێران بوون.
تەنها برادەرانی کۆمەڵە لەبادینان هەبوون
ئەو چەند مانگە لە سەرەوە خەریكی پلان و بەرنامە بووین، هەروەها سەرقاڵی ئاگاداركردنی رێكخستنەكانی یەكێتیی نیشتمانیی كوردستان و مەفرەزە پارتیزانەكانی یەكێتی بووین لە ناوچەی بادینان كە بەسەرپەرشتی شەهید حەسەن سەلیم و كۆمەڵێك لە هەڤاڵانی لەوێ بوون.
بێگومان دەبێت ئەوەش بڵێن كە ئەو سەردەمە تەنها وەكو رێكخستنی برادەرانی كۆمەڵە لەوێ بوون و باڵادەست بوون.
لەپەیوەندیدا لەگەڵ برادەرانی پارتی
رۆژێك لە كۆتایی مانگی شوباتی 1991دا جەنابی كاك كۆسرەت كە ماڵەكەی لە مەهاباد بوو و لەباڵاخانەیەكدا پێكەوە لەگەڵ ئێمە دەژیان و تەنها دیوارمان هاوبەش بوو، وتی: با بچینەوە مەهاباد، لەویشەوە سەردانێكی راژان و جەنابی كاك مەسعود بارزانی بكەین، بۆ چەند رۆژێك پێكەوە چووینە مەهاباد، پێموایە كۆتایی مانگی شوبات بوو، شەو درەنگانێك كاك كۆسرەت لە دەرگای نێوان ماڵی خۆی و ئێمەدا وتی: ئەگەر مزگێنییەكی خۆشت پێ بڵێم چیم بۆ دەكەی ؟ وتم: دڵنیابە بەپێی شایستە و دڵخوازی خۆت.
وتی: وا هاوپەیمانی لە كوێتی دا، هەر دەبێ بەیانی سەردانی كاك مەسعود بكەین و بگەڕێینەوە بۆ قاسمەڕەش و خۆمان ئامادە بكەین.
پێكەوە بەیانییەكەی چوینە راژان و لەوێ چاومان بە كاك مەسعود و بەشێك لە ئەندامانی مەكتەبی سیاسی پارتی كەوت. باس لە بارودۆخ كراو كاك كۆسرەت داوای لە جەنابی كاك مەسعود كرد و وتی: بەپێی رێكەوتن، پێویستە جەنابت بێیتە قاسمەڕەش و سەركردایەتیمان بكەیت، هەر وەكو مام جەلال-یش لە دەرەوە سەركردایەتیی بەرەی كوردستانی دەكات.
هەر لەوێوە لە رێگای پیـرانشار (خانە) گەڕاینەوە بۆ قاسمەڕەش و كەوتینە خۆسازدان و كۆبوونەوە و پەیوەندیكردن بە پارتیزانەكانەوە كە لە خوارەوە بوون، لە هەموویان نزیكتـر لە سەركردایەتی كە وەكو دەروازەی پەیوەندیی و راپەڕینیش بوو، مەفرەزەی پارتیزان كاك عەزیز بەگ و كوردەی كوڕی بوو.
لەبەرنامەی پارتیزانەكاندا بەڕێز كاك نەوشیروان داوایكرد كاك عەزیز بەگ بۆ ناوچەی رانیە كە پیاوێكی شارەزاو دڵسۆز بوو ناویشی نا بە هەڵۆی پیـر كە لە رێگای دەزگای بێسیمەوە كە لەلایان بوو پەیوەندی كراو وتیان ئامادەین و لە پەیوەندیداین لەگەڵ شانە چەكدارەكان و سەركردایەتی.
بەرەبەیانی رۆژی 5/3/1991 هەواڵ هات كە لە رانیە راپەڕین بووە و شاری رانیە پاككراوەتەوە، بەڵام بەداخەوە كاك عەلی نەبی كۆمەڵێك كەسی تر شەهیدبوون.
لە مەكتەبی سیاسی كۆبوونەوە كراو بڕیاردرا هێزەكانی قاسمەڕەش بە زوویی بكەونەڕێ و ئاگاداری كاك مەسعودیش كرا كە راپەڕین دەستی پێكرد و چاوەڕێی ئێوە دەكەین.
رۆژی 6/3/1991 بڕیاڕ درا هێزەكەی بەندە لەگەڵ ئەوانەی دیكەدا كە دەیانەوێت بچینە خوارەوە لە ناویاندا خۆشكی بەڕێز هێرۆخان ئەوكات لە قاسمەڕەش بوو لەگەڵ هێزەكەی سكرتارییەت ئامادەبوون و هەموو پێكەوە بەڕێكەوتین بۆ رانیە، لەلایەن كاك عەزیز بەگەوە پێشوازیمان لێكرا.
بڕیاری ئازادکردنی ناوچەکان درا
سەرلەبەیانییەكەشی جەنابی كاك نەوشیـروان گەیشتە رانیە كە بەڕێزیان كاك كۆسرەت و شەهید حەسەن كوێستانی و كاك شێردڵ حەوێزی و كۆمەڵێك كادر و فەرماندەی هێزی پێشمەرگەشی لەگەڵدا بوو.
لە رۆژانی 7 و 8 و9 و10ی 3/1991، هەموو ناوچەی چوارقوڕنە، سەروچاوە و تا دەگاتە كۆیە و سلێمانی ئازاد كران.
دوای هاتنە خوارەوەی جەنابی كاك مەسعود و ئازادكردنی بێتواتە، كاك نەوشیـروان و كاك مەسعود بارەگایان بردە بێتواتە و رۆژی 10/3 بەندە چووم سەردانی كۆیە بكەم، لەوكاتەدا بروسكەیەكمان لە جەنابی كاك مەسعودەوە بۆ هات كە ئامادەیین و بڕۆین بەرەو بادینان، چونكە بڕیارە 11/3 شاری هەولێر رزگار بكرێت و لەوێشەوە بچین بۆ دهۆك.
دەستبەجێ گەڕامەوە رانیە و بێتواتە و چووین بۆ لای كاك مەسعود، كاك نەوشیـروان ئاگاداری كردین كە ناوچەی حەریر و باتاس و رواندزیش ئازادكراون، بۆیە دەكرێت بچینە حەریر و لەوێوە خۆمان ئامادە بكەین بۆ بادینان و دهۆك لەگەڵ شەهید حەسەن كوێستانی و شەهید دڵشاد حەسەن و شەهید تەحسین كاوانی كە هەرسێكیان گیانی پاكیان بە كورد و یەكێتی و پێشمەرگە سپارد و شەهید بوون.
رۆژی 11/3 لە حەریر پەیوەندیم پێوەكردن و شەوی 11 لەسەر 12ی 3، بەدوای كاك عەبدولـموهەیمەندا دەگەڕام، چونكە سەركردایەتیی هێزەكەی پارتی بوو بۆ بادینان، تا بزانم بەرنامەمان چۆن دەبێت بۆ رۆیشتن. شەو لە ماڵی حسێن ئاغای سەرچیا چاوم بە بەرپرسێكی ئێرانی كەوت كە لەگەڵیدا بوو، دەمناسی. ویستم بە ناوی خۆی سڵاوی لێ بكەم، دەمم نەكردەوە وتی: (حاجی عەلی!) بە زەردەخەنەوە ئەحواڵیم پرسی و بەخێرهاتنی حاجی عەلیم كرد.
دیاربوو باس لە بارودۆخی بێخمە كرا و منیش وتم: «من خۆمی پێوە مەشغوڵ ناكەم، نامەیەكم دا بە كاك عومەر ئاغای سورچی وەكو نوێنەری یەكێتی، دیارە مەبەستم هەبوو، بروسكەشم بۆ شەهید حەسەن و شەهید دڵشاد كرد كە بەپەلە نوێنەریان بنێرن بۆ دەستبەسەر داگرتنی كەلو پەلی بێخمە.
وا باسكرا كە دەبێت چاوەڕێ بكەین تا هەولێرو رێگای فائیدە كۆنتـرۆڵ دەكرێت، ئەوكات لەگەڵ هێزەكەی برادەرانی پارتی بەڕێبكەوین بۆ دهۆك.
كەوتمە بیر كردنەوە لەوەی ئەگەر وا بڕوات، دەبێت هێزەكەی یەكێتی وەكو پاشكۆ لەگەڵ هێزەكەی پارتیدا بچینە دهۆك، هێزەكەی ئەوان نزیكەی 1500 تا 1600پێشمەرگە بوو.
بەمجۆرە لە پردی قەندیل پەڕینەوە
دوعا خوازیم كرد و چوومە حەریر بۆلای شەهید تەحسین كاوانی و پێم وت: كاك تحسین كارێكمان پێ ناكرێت تا ئێمە زووتر بڕۆین لە رێگای ئاكرێ؟، وتی: با، بەڵام تۆ ئامادەی بچیت؟ وتم بەدڵنیاییەوە دەچم. وتی: ئەمشەو پەیوەندیی دەكەم و بەیانی ئاگادارتان دەكەمەوە.
ئەوە بوو پەیوەندیی بە رێكخستنەكانی ئاكرێ-وە كرد كە كەسێك ئەوكات بەناوی نەقیب فەیسەڵ كە ئەفسەری پۆلیس بوو، سەرپەرشتی شانە چەكدارەكان و رێكخستن بوو، وتی: وادەكەین 13/3 سەرلەبەیانیەكەی دەست پێ بكەین و دڵنیای دا كە سەركەوتوو دەبین.
بۆ نیوەڕۆكەی ئۆتۆمبێل دەهێنینە سەر رێگا لە ناوچەی پردی قەندیل و دەیان پەڕێنینەوە. لەڕاستیدا زۆر راستگۆیانە ئەو كارەیان كردو یەكەم نەقیب خەلیل پەڕییەوە و دوا بەدوای یەك هەموومان. بۆ ئێوارەكەی ئێمە لە ئاكرێ نانمان خوارد و حەواینەوە.
لێرەدا پێویستە باسی شانە چەكدارەكانی هێزەكەی كاك سوارەی عەباس ئاغا بكەین كە ئەوكات لەلایەن حكومەتی عیراقەوە پاراستنی ناوچەی شێخانیان پێ سپێردرا بوو. دەستبەجێ كە زانییان ناوچەكەیان چۆڵكرد و كارئاسانیان بۆ كردین و هاوكارییان كردین.
بۆ رۆژی دواتر لەرێگای شێخانەوە بە ئۆتۆمبیل بەرەو دهۆك بەڕێكەوتین. دیارە شەوەكەی لە رێگای بێسیمەوە ئاگاداریان كردینەوە كە دهۆكیش ئامادەیە و بەیانی 14/3/1991 كاتێك لەگەڵ هێزەكەدا گەیشتینە دهۆك، شاری دهۆك بە تەواوی ئازادكرابوو، برادەرانی ریكخستنی شار و پارتیزانەكان دەستیان بەسەر دهۆكدا گرتبوو. ئەوانەی كە لەبیرمە وەكو بەرپرسی رێكخستنەكانی یەكێتی، كاك عارف روشدی و كاك حسێن برای شەهید نەقیب خلیل، هەڤاڵ سدیق ئامێدی، سادق عومەر سندی، عەلی شەعبان و چەند كادرێكی تر.
بروسکەی کۆتایی نێردرا بۆ کاک نەوشیروان
لە فەرمانگەی ئاگركوژێنەوەی دهۆك كە وەكو بارەگا دیاری كرابوو، هەر لەوێ كاك سەركەوت كە كادرێكی خوێندەوار بوو، بەرپرسیاری دەزگای بێسیمەكەمان بوو، زوو بێسیمەكەی دامەزراند و پەیامێكی بۆ كاك نەوشیروان نارد كە ئەوكات كاك نەوشیروان بەناوی مەولود و بەندە بەناوی سەهەند بوو. لە سەهەند-ەوە بۆ مەولود، ئاگاداری كردەوە كەوا سەعات 2:35 لە دوای نیوەڕۆی ئەمڕۆ 14/3 ئێمە گەیشتووینەتە دهۆك و شارەكە بەتەواوەتی ئازاد كراوە.
جگە لە هێزەكانی یەكێتی بە لێپرسراوێتی حەسەن سەلیم كە بەرپرسی هێزی پارتیزانەكانی ئەوێ بوو، هێزەكانی برادەرانی پارتیش ئەوكات بە سەرپەرشتیی بەڕێز كاك دكتۆر كەمال كەركوكی و لەگەڵ پارتی گەل بەشداربوون لە ئازادكردنی دهۆكدا.
كاتێك بروسكەكە دەگاتە دەست كاك نەوشیروان لەگەڵ كاك مەسعود هەریەك لە ژوورێك دەبن و نزیك بەیەك (ئەوە قسەی كاك حسێن سنجاری- یە كە ئەوكات لەگەڵ كاك نەوشیروان بوو.
هەڵدەستێت و دەچێتە لای كاك مەسعود، وەكو مژدانەیەك دەڵێت كاك مەسعود ئەوە ناشارەزاكەی ئێمەیە بەتەنها وەكو یەكێتی گەیشتۆتە دهۆك، دیارە وەكو خۆی لەبری تەقدیر كاك مەسعود دەڵێت: خۆ بڕیاربوو هەموو پێكەوە بچین بۆ دهۆك، دیارە فێڵی لە برادەرانمان كردووە، نەدەبوایە بێ ئەوان بچن.
بۆ بەیانییەكەی هێزەكەی برادەرانی پارتی هەر هەمووی گەیشتن و لە دهۆك چاومان بەیەكتری كەوت كە بریتی بوون لە كاك عەبدولموهەیمەن و زەعیم عەلی و كاك بابەكر زێباری و كۆمەڵیك لە فەرماندە و كادری دیكە كە ناوی هەموویانم لەبیر نەماوە و رێككەوتین كە لەمەودوا لەگەڵ یەكتریدا هاوكاربین.
گەڕانەوەی مام جەلال و هێرشەکانی دوژمن
لە رۆژی 16/3 حكومەتی عیراق لە ناوچەی فاییدەوە دەستی كرد بە هێرش و پەلاماردان بۆسەر هێزەكانی پێشمەرگە، هەروەها لەگەلی دهۆك، شەهید حەسەن سەلیم لە شەڕەكاندا لەگەڵ چەند پێشمەرگەیەكدا شەهید ببوون، پەیامیش هات كە جەنابی مام جەلال لە سوریاوە لەگەڵ كۆمەڵێك كادرو فەرماندەدا لەرێگەی فیشخاپوورەوە دەگەڕێنەوە كوردستان، لەوانە خوالیخۆشبوو جەبار فەرمان و كاك ئەحمەد بامەڕنی و لەسكرتاریەتیشەوە هێزێكی سكرتارییەت بە سەرپەرشتیی دكتۆر كەریم هاتن بۆ زاخۆ، هەموو چووین بۆ زاخۆ بۆ پێشوازیی لە جەنابی مام جەلال.
بەڕێز مام جەلال لەرێگەی فیشخاپوور لە 25/3 گەڕایەوە.
كە گەیشتن سەرەتا چوونە زاخۆ بوو بۆ بەردەم قایمقامییەتی زاخۆ، لەوێ بەئامادەبوونی جەماوەرێكی زۆر وتارێكی گرنگ و بەنرخی خوێندەوە، دواتر چاوی بە كۆمەڵێك كەسایەتیی و لایەنە سیاسییەكان كەوت.
بۆ بەیانییەكەی بەرەو دهۆك بەڕێكەوتن و هەر ئەوكات كاك جەبار فەرمانی نارد بۆ بەرەی شەڕەكانی فاییدە كە بارودۆخەكە خراپ بوو، بەندە و هێزەكەش بۆ هەندێك كار لە زاخۆ ماینەوە و بەرنامەی چاوپێكەوتنم هەبوو لەگەڵ كوردەكانی سلۆپی، و بەیانییەكەی دوای پاشەكشەی پێشمەرگە لە فاییدە، بارودۆخ زۆر خراپ بوو. خەڵك دەستیكرد بەكۆچ و شڵەژانێكی ناخۆش روویدا و ناچار جەنابی مام جەلال دوای چەند كۆبوونەوەیەك لە دهۆك، دوای زۆر لێكردنی زۆربەی كەسایەتییەكان، دهۆكی بەجێهێشت بەرەو سلێمانی و بەندەش لەڕێگەی باتوفەو ئامێدییەوە (كە پێشتر شارەزاییم هەبوو) بەرەو بارزان و دواتریش بەرەو رواندز بەڕێكەوتم.
قوباد تاڵەبانی و کۆنسوڵی ئەمریکا لە ھەولێر دوا گۆڕانکارییەکانی عێراق و ناوچەكە تاوتوێ دەكەن
هەولێر // ڕۆژی سێشەمە ١٠ ئاداری ٢٠٢٠، قوباد تاڵەبانی جێگری سەرۆکی ئەنجومەنی وەزیران پێشوازیی لە ستیف ڤەیگن كونسوڵی ئە‌مریكا لە ھە‌رێمی كوردستان كرد و ئامادەکارییەکانی حکومەتی هەرێمی بۆ پێشگرتن لە بڵاوبوونەوەی ڤایرۆسی کۆڕۆنای بۆ ڕوونکردەوە.
قوباد تاڵەبانی گەشبینی خۆی دەربڕی بەوەی كە هەرێمی کوردستان دەتوانێت بە هاوکاری نێوان حکومەت و هاووڵاتیان بە کەمترین زیان بەسەر پەتای کۆڕۆنادا زاڵ بێت.
لە تەوەرێکی دیکەی کۆبوونەوەدا، تاوتوێی هەنگاوەکانی چاکسازی لە وەزارەتی پێشمەرگە کرا و قوباد تاڵەبانی جەختی لەوە کردەوە حکومەتی هەرێم بە هەموو توانایەوە لەسەر چاکسازییەکانی وەزارەتی پێشمەرگە بەردەوام دەبێت.
لە بەشێکی دیکەی کۆبوونەوەکەدا تاوتوێی دۆخی ئابوری هەرێم کرا، بە تایبەتی دوای دابەزینی نرخی نەوت لە بازاڕەکانی جیهاندا. جێگری سەرۆکی ئەنجومەنی وەزیران باسی لەوەکرد کە حکومەتی هەرێم بەو ئەزمونەی لە کابینەی رابردوودا وریگرتووە بە ئاڕاستە‌ی فرەچەشن کردنی سەرچاوەکانی داهات کار دەکات.
بەشێکی دیکەی کۆبوونەوەکە تەرخان کرا بۆ تاوتوێکردنی دۆخی سیاسیی بەغدا و پەیوەندییەکانی نێوان هەولێر و بەغدا، قوباد تاڵەبانی هەڵوێستی هەرێمی کوردستانی ڕوونکردەوە و رایگەیاند: هەرێم پشتگیری لە حکومەتێک لە بەغدا دەکات کە رەنگدانەوەی ئیرادەی هەموو پێکهاتەکانی عێراق بێت و رێز لە تایبەتمەندییەکانی هەرێمی کوردستان بگرێت.
ڕاگه‌يه‌نراوى كۆبوونه‌وه‌ى سه‌رۆكايه‌تيى هه‌رێمى كوردستان و لايه‌نه سياسييه‌كان
رۆژی چوارشه‌ممه 4/3/2020 به سه‌رپه‌رشتیی به‌ڕێز نێچیرڤان بارزانی، سه‌رۆكی هه‌رێمی كوردستان و به ئاماده‌بوونی به‌ڕێزان جێگرانی سه‌رۆك، كۆبوونه‌وه‌ی هاوبه‌شی لایه‌نه سیاسییه‌كانی كوردستانی به‌شدار له ئه‌نجومه‌نی نوێنه‌رانی عێراق له سه‌رۆكایه‌تیی هه‌رێمی كوردستان له هه‌ولێر، ئه‌نجام درا.
كۆبوونه‌وه تایبه‌ت بوو به هه‌ڵسه‌نگاندنی دۆخی سیاسیی عێراق دوای سه‌رنه‌كه‌وتنی هه‌وڵه‌كانی پێكهێنانی كابینه‌ی نوێی حكوومه‌تی فیدرالی عێراق و هه‌نگاوه‌كانى داهاتوو بۆ پێكهێنانى حكوومه‌ت.
سه‌ره‌تا سه‌رۆك نێچیرڤان بارزانی سوپاسی لایه‌نه سیاسییه‌كان و فراكسیۆنه كوردستانییه‌كانی ئه‌نجومه‌نی نوێنه‌رانی عێراقی كرد بۆ يه‌كهه‌ڵوێستییان له مامه‌ڵه‌كرن له‌گه‌ڵ دۆخی ئێستای عێراقدا و جه‌ختیشى له‌وه كرده‌وه كه پارێزگاری له‌م یه‌كڕیزی و یه‌كهه‌ڵوێستییه بكرێت و سه‌رۆكایه‌تیی هه‌رێمیش وه‌ك چه‌تری كۆكه‌ره‌وه‌ی هه‌موو لایه‌نه كوردستانییه‌كان، له‌سه‌ر بنه‌ماى ئه‌رك و مافه‌كان پشتگیر و پارێزه‌ری ئه‌م يه‌كڕيزى و يه‌كهه‌ڵوێستييه ده‌بێت.
كۆبوونه‌وه جه‌ختی له‌سه‌ر په‌رۆشیی هه‌رێمى كوردستان بۆ چاره‌سه‌ركردنی كێشه‌كانی عێراق كرده‌وه و هه‌موو هاوكاری و پشتگیرییه‌كی بۆ هه‌وڵه‌كانی چاره‌سه‌ری و ده‌ربازكردنی عێراق له كێشه و قه‌یرانه‌كان له چوارچێوه‌ى ده‌ستووردا و له‌سه‌ر بنه‌مای هاوبه‌شیی ڕاسته‌قینه و دابینكردنی مافی هه‌موو پێكهاته‌كانی عێراق، كرده‌وه.
له كۆبوونه‌وه‌كه‌دا دووپات كرایه‌وه كه لایه‌نه كوردستانییه‌كان وه‌ك هه‌میشه به‌شێك ده‌بن له چاره‌سه‌ر و له‌م پێناوه‌دا هه‌موو توانايه‌ك ده‌خه‌نه گه‌ڕ، هه‌روه‌ها هه‌موو لایه‌نه سیاسییه‌كان ئاماده‌یيی خۆیان دووپات كرده‌وه بۆ چوونه‌ناو پرۆسه‌ی گفتوگۆیه‌كی گشتگيرى نیشتمانیانه بۆ پێكهێنانی كابینه‌ی ئاینده به شێوه‌یه‌ك وه‌ڵامده‌ره‌وه‌ى داوا ڕه‌واكانى تێكڕاى گه‌لى عێراق بێت، تواناى چاره‌سه‌ركردنى كێشه و قه‌يرانه‌كانى وڵاتى هه‌بێت، ببێته مايه‌ى ڕه‌زامه‌نديى ته‌واوى پێكهاته‌كانى عێراق و مافه ده‌ستوورييه‌كانى هه‌رێمى كوردستان دابين بكات.
پەیامی سەرۆک نێچیرڤان بارزانی لە ساڵیادی ڕاپەڕیندا
جەماوەری سەربەرز و خۆڕاگری کوردستان،
بە بۆنەی بیست و نۆيەمین ساڵیادی ڕاپەڕینە شکۆدارەکەی ئازاری ١٩٩١وە، گەرمترین پیرۆزبایی لە خانەوادەی سەربەرزی شەهیدان و پێشمەرگە قارەمانەکان و سەرجەم کوردستانييان لە ناوخۆ و دەرەوەی کوردستان دەکەم.
ڕاپەڕین کە یەکێکە لە سەروەرییە مەزنەکانی مێژووی گەلەکەمان، دەربڕی باوەڕ و خواستى گەلی کوردستان بۆ ژیانێکی ئازاد و سەرفرازانە و ڕەتکردنەوەی ستەم و زۆرداری بوو، ترۆپكی خەبات و قوربانیدانی هێزی پێشمەرگە و ڕۆڵەکانی گەل و یەکێتی و یەکڕیزیی لایەنە سیاسییەکان و پێکهاتەکان و سەرجەم خه‌ڵكی کوردستان بوو، پاراستنی دەستکەوتەکانیشی، ئەرک و بەرپرسیاريه‌تیی هەموو لایەن و پێکهاتە و هه‌موو تاکێكی کوردستانه و وەفادارییانە بۆ گیانی پاکی شەهیدە قارەمانەکانمان و هەموو قوربانیيانی ڕێگای ڕزگاریمان.
کوردستانیيانی ئازیز،
گیانی خۆڕاگری و بەرەنگاریی دلێرانه‌تان سه‌رباری ئه‌و لێبورده‌ییه‌ی له ڕاپه‌ڕیندا نواندتان، زادەی هەمان ئەو کولتوورە مرۆڤدۆستانەیە کە ئیلهامبەخش و نەخشەڕێی سەرجەم بەرخودان و شۆڕشەکانی كوردستان بووه به ڕاپەڕینیشه‌وه. خەباتی ئێوە، هەمیشە هه‌ڵگری باوەڕ و نه‌ریت و به‌ها و جیهانبینییه‌كی بەرز بووه کە شایانی ئه‌وه‌ن نەوە بە نەوەی ئەم گەلە، شانازییان پێوە بکەن. ئەوە ڕاپەڕین و خواستى ئێوە بوو کە سەلماندی مەحاڵە هیچ زه‌بر و زه‌نگ و سه‌ركوتكارییه‌ك بتوانێ شکۆ و خواستى گەلی کوردستان بۆ ژیانێکی سەرفرازانە و ئامانجە نیشتمانیيەکانی، بشكێنێ.
کوردستانیيانی خۆشەویست،
ڕاپەڕین بەڵگەی زیندووی ئەو ڕاستیەیە کە یەکڕیزی و تەبایيی نێوان لایەن و پێکهاتەکانی کوردستان و ئاشتەوایيی ناوخۆ، هەمیشە گەلەکەمانی بەرەو سەرکەوتن و سەرفرازیی زیاتر بردووە، بۆیە بۆ بەدیهێنانی سەرجەم ئامانجە نیشتیمانیيەکان و مسۆگەرکردنی ژیانیکی شایستە بە خەبات و قوربانیيەکانی گەلەکەمان و ئایندەیەکی گەشتر بۆ نەوەکانمان، دەبێ هەوڵی هەموو لایەن و پێکهاتە و هه‌ر تاکێکی کوردستان، لە خزمەتی پتەوکردنی زياترى گیانی تەبایی و بنەماکانی پێکەوەژیان و لێبوردەیی و ئاشتیخوازیدا بێت.
با یادی ڕاپەڕین وزە و ئیرادەی زیاترمان بۆ یەکڕیزی و تەبایی و خزمەتکردن بە گەل و وڵات پێ ببەخشێت.
بەرز و شکۆدار بێت ساڵیادی ڕاپەڕینی مەزنی ئازاری ١٩٩١.
دروود بۆ گیانی پاکی شەهیدانی ڕاپەڕین و سەرجەم شەهیدانی کوردستان.
نێچيرڤان بارزانى
سه‌رۆكى هه‌رێمى كوردستان
4/3/2020
پەیامی سەرۆکی حکومەتی هەرێمی کوردستان بەبۆنەی ساڵیادی راپەڕینی گەلی کوردستان
هەولێر، هەرێمی کوردستان، عێراق (GOV.KRD) - ئەمڕۆ بیست و نۆ ساڵ بەسەر راپەڕینی مەزنی گەلی کوردستان لە ساڵی ١٩٩١ تێدەپەڕێت. بەم بۆنە شکۆدارەوە، پیرۆزبایی لە خەڵکی کوردستان و پێشمەرگە قارەمانەکان و کەسوکاری سەربەرزی شەهیدان دەکەم.
راپەڕینی شکۆداری ١٩٩١ وەرچەرخانێکی مێژوویی بوو لە خەباتی بزووتنەوەی رزگاریخوازی خەڵکی کوردستاندا کە بەرامبەر ستەم و داگیرکاریدا راپەڕی و ئەو پەیامەی بە هەموو جیهان گەیاند کە گەلی کوردستان ژێردەستەیی و چەوساندنەوە و نکوڵیکردن لە مافە رەوکانی رەتدەکاتەوە.
راپەڕینی مەزنی ئاداری ١٩٩١، بەرهەمی یەکگرتوویی و یەکڕیزی هەموو چین و توێژ وپێکهاتەکانی کوردستان بوو، دەسکەوتەکانی ئێستای گەلی کوردستان و ئەو ئاوەدانیی و پێشڤەچوونەی دۆزی رەوای خەلکی کوردستان و پێگەی دیاری هەرێمی کوردستان لە نێو کۆمەڵگەی نێودەوڵەتیدا، بەرهەمی شۆڕش و سەرهەڵدانە بەردەوامەکانی خەڵکی کوردستان و لە نێویشیاندا راپەڕینی مەزنی ١٩٩١ ە کە پێویستە بە هەمان گیانی یەکڕیزی و یەکدەنگی راپەڕینەوە پارێزگاری لە دەسکەوتە نیشتمانییەکانمان بکەین.
ساڵیادی راپەڕینی ئاداری ١٩٩١ پیرۆزبێت و کوردستانیش هەمیشە ئارام و ئاوەدان بێت.
مەسرور بارزانی
سەرۆکی حکومەتی هەرێمی کوردستان
نازم دەباغ نوێنەری حکومەتی هەرێمی کوردستان له تاران دەڵێت" بڵاوبونەوەی ڤایرۆسی کۆرۆنا لە ئێران نەبۆتە هۆی داخستنی سنورەکان و ڕاگرتنی مامەڵەی بازرگانی نێوان هەرێمی کوردستان و ئێران بەپێچەوانەوە لەژێر چاودێری ئاسایش و تیمی تەندروستی بەردەوامە، هەر ئەمڕۆ بەیانی هه‌زار ئۆتۆمبێلی "ترانزه‌یت " لەبەندەر عەباسەوە چاوەڕێێان دەکرد بێنە باشماخ ڕێگەیان پێدرا بپەڕنەوە، دەشڵێت جارێکی تر لەدوێنێ (1/3) وه درێژکرایەوە و بۆ ماوەی هەفتەیەکی تر بڕیاری بەکراوەیی هێشتنەوەی سنورەکانی نێوان هەرێمی کوردستان و ئێران."
" ئەمڕۆ بەیانی نزیکەی هەزار ئۆتۆمبێلی "تڕانزه‌یت" لەبەندەر عەباس چاوەڕێ بوون لەڕێگای مەرزەکانەوە بچنە هەرێمی کوردستان، هەر ئەمڕۆ بەیانی ڕێگەیان پێدرا جوڵە بکەن و بارەکانیان بەرەو باشماخ ببەن و بپەڕنەوە هەرێمی کوردستان "
لەسەرەتای وتووێژەکەدا دەباغ دەڵێت" ئێمە لەسەر خەتین بۆ هەفتەیەک ڕێگای بازرگانی کراوەبوو، هەموو بارێک برابوو بۆ کوردستان لەڕێگای تیمی تایبەتی بازرگانی و ئاسایشی و تەندروستی کە وردبینی ئەو ئۆتۆمبێلانە بکەن، واتە مەرزەکانی هەرێمی کوردستان کراوەیە بۆ کاروباری بازرگانی لەگەڵ ئێران بەڵام بەومەرجەی ئەو ئۆتۆمبێلانەی کەدەچن لە خەتێکی تایبەتیەوە دەڕۆن بە چاودێری کردنی ئاسایش و تەندروستی و پشکنینی ئەو کەسانەی کەنەخۆشیان هەبێت یا گومانیان لێبکرێت تا ڕێگە نەدەن بڕۆن."
نوێنەری حکومەتی هەرێمی کوردستان لەشاری تاران ئەوەشی وت" دوێنێ (1/3) جارێکی تر بۆ ماوەی یەک هەفتەی تر مامەڵەی بازرگانی لەنێوان هەرێمی کوردستان و ئێران لەڕێگای سنورەکانەوە (واته كردنه‌وه‌ی سنوره‌كان) درێژکرایەوە."
نازم دەباغ ڕاشیگه‌یاند" ئەمڕۆ بەیانی نزیکەی هەزار ئۆتۆمبێلی "تڕانزه‌یت" لەبەندەر عەباس چاوەڕێ بوون لەڕێگای مەرزەکانەوە بچنە هەرێمی کوردستان، هەر ئەمڕۆ بەیانی ڕێگەیان پێدرا جوڵە بکەن و بارەکانیان بەرەو باشماخ ببەن و بپەڕنەوە هەرێمی کوردستان، واتە من نەمدیوە و نەبیستووە ڕێگای مەرزەکان گیرابێت هەتا 1/3 ئەوەتا جارێکی تریش کردنەوەی ئەو ڕێگایەبەکراوەیی بۆ ماوەی یەک هەفتەی تر درێژکرایەوە."
"ئەم بابەتی (کۆرۆنا)یەش ئەوەندەی خەریکە دەبێتە کارێکی سیاسی ئەوەندە ناکڕیت بکرێتە ڕووداوێکی سروشتی کەساڵانە چەندین نەخۆشی تری وا بڵاوبۆتەوە و خەڵکی زیاتریشیان کوشتووە "
دەباغ ڕونیكرده‌وه" هۆکاری ئەوەی کە حکومەتی هەرێمی کوردستان ئەو بڕیارە دەدات بۆ ئەوەیە کە پێویستی بەوبازاڕ و کەلوپەلانەیە کە لە ئێرانەوە دێت بۆیە ئەو کەلوپەلانەی کە لە ئێران و چینەوە دێن وەک وتم دەخرێنەژێر چاودێری وەزارەتی تەندروستی هەروەها ئەو کۆمسیۆنەی کە بۆ ڕوبەڕوبونەوەی کۆرۆنا کاردەکەن، ئێمە ئەمڕۆ سنورێکی دورودرێژمان لەگەڵ کۆماری ئیسلامی ئێراندا هەیە ئەم بابەتی (کۆرۆنا)یەش ئەوەندەی خەریکە دەبێتە کارێکی سیاسی ئەوەندە ناکڕیت بکرێتە ڕووداوێکی سروشتی کەساڵانە چەندین نەخۆشی تری وا بڵاوبۆتەوە و خەڵکی زیاتریشیان کوشتووە بۆیە دەکرێت مرۆڤ بە پشوو و بێ سترێس خۆی بپارێزێت لەو پەتایەنەی کەبڵاودەبنەوە."
"بەداخەوە حکومەتی هەرێم نەیتوانیووە جێگرەوەی هەندێک بەرهەم بەبەرهەمی ناوخۆیی دابین بکات. "
هەروەها ڕایگەیاند" من ناتوانم بڵێم هەرێمی کوردستان دەتوانێت جێگرەوەی ئێران یاخود جێنه‌گرەوەی بدۆزێتەوە، بەڵام ئەوەندە دەزانم تا ئێستا بازرگانی لەگەڵ کۆماری ئیسلامی ئێران بەشیکی ئەساسی و پێداویستی و ژیان و گوزەرانی هەرێمی کوردستانه، هەر ئەمڕۆ درێژی قافڵەکانی ئۆتۆمبێل لەسنوری باشماخ نزیکەی پانزە کیلۆمەترە، بەداخەوە حکومەتی هەرێم نەیتوانیووە جێگرەوەی هەندێک بەرهەم بەبەرهەمی ناوخۆیی دابین بکات."
جەختی کردەوە" بڵاوبەوەی کۆرۆنا لە ئێران نەبۆتە هۆی وەستانی بازرگانی لەنێوان ئێران و هەرێمی کوردستان ."
دەباغ ئەوەشی " خۆ ئەگەر هەرێمی کوردستان بڕیاری داخستنی سنورەکانی بدایە هێشتا نەگەێشتوینەتە ئەو قۆناغەی بڵێین ئێران چ هەڵوێستێکی دەبوو بەڵام بەدڵنیایی کە خۆی ئێستا کۆنترۆڵی دۆخەکە دەکات پێویستە بۆ هەرێمی کوردستانیشذی بەڕەوا ببینێت، بەڵام هێشتا نەگەیشتوینەتە ئەو قۆناغە."
لەوەڵامی ئەو پرسیارەی ئەگەر سبەی بەهۆی بەردەوامی بازرگانی لەگەڵ ئێران ڤایرۆسی کۆرۆنا گواسترایەوە هەرێمی کوردستان، ئێران ئامادەیە هاوکاری هەرێمی کوردستان بکات؟ نازم دەباغ وتی" من پێم وایە ئێران لەزۆر ڕوەوە و لەشەڕی داعش-دا هاوکاری هەرێمی کوردستانی کردووە بێگومان ئه‌وەی لەتوانایدا بێت ئەگەر حکومەتی هەرێم داواکاری لێبکات پێشبینی دەکەم ئێران بەدەم داواکارییەکەیەوە بچێت."
https://www.dengiamerika.com/a/iran/5311166.html
سەرۆکی حکومەتی هەرێمی کوردستان لە گەڵ شا عەبدوڵڵا شاى ئوردن کۆبووەوە
• شا عەبدوڵڵا: پەیوەندییەکی تایبەتیمان لە گەل هەرێمی کوردستان و عێراق هەیە و ئامادەین هاوکاری براکانمان بکەین بە هەر شێوەیەک کە پێویست بێت.
• سەرۆکی حکومەتی هەرێمی کوردستان سوپاسی پشتگیریی شانشینی ئوردنی کرد و رۆڵی شا عەبدوڵڵاشی لە سەقامگیریی ناوچەکەدا بەرز نرخاند.
ئەمڕۆ یەکشەممە 2020/3/1 مەسرور بارزانی سەرۆکی حکومەتی هەرێمی کوردستان بە سەرۆکایەتی شاندێکی حکومی و بەبانگهێشتێکی فەرمی، گەیشتە عەممانی پایتەختی ئوردن.
هەر لەگەڵ گەیشتنی لە لایەن شا عەبدوڵڵای دووەم شای ئوردن لە کۆشکی بەسمان پێشوازی لێکرا.
لە کۆبوونەوەکەدا کە جێنشینی ئوردن شازادە حوسێن بن عەبدوڵڵا و سەرۆک وەزیرانی ئوردن عومەر ئەلرەزاز ئامادەیبوون ، گفتوگۆ دەربارەی پەرەپێدانی پەیوەندیی نێوان هەرێمی کوردستان و شانشینی ئوردن بەتایبەتی لە بواری بازرگانی و وەبەرهێناندا کرا.
خاوەنشکۆ شا عەبدوڵڵای دووەم ئاماژەی بەوەدا کە پەیوەندییەکی تایبەتیمان لە گەڵ هەرێمی کوردستان و عێراق هەیە و ئامادەین هاوکاری براکانمان بکەین بە هەر شێوەیەک کە پێویست بێت.
خۆشحاڵیشین بە پەرەپێدانی پەیوەندییە بازرگانییەکانمان بە جۆرێک کە لە بەرژەوەندی هەردوولادا بێت.
سەرۆکی حکومەتی هەرێمی کوردستان ئاماژەی بە گرنگیی هەماهەنگی هاوبەش و پەرەپێدانی پەیوەندی دوولایەنە لە بواری بازرگانی و بەرزکردنەوەی ئاستی وەبەرهێنانی ئوردنی لە هەرێمی کوردستاندا کرد. سەرۆکی حکومەت سوپاسی پشتگیریی شانشینیی ئوردنی کرد و رۆڵی شا عەبدوڵڵای لە سەقامگیریی ناوچەکەدا بەرز نرخاند.
پاشان شا عەبدوڵڵا میوانداری سەرۆکی حکومەت و شاندی هەرێمی کوردستانی بۆ خوانی نیوەڕۆ کرد.
شاندی یاوەری سەرۆکی حکومەتی هەرێمی کوردستان پێکهاتبوون لە رێبەر ئەحمەد وەزیری ناوخۆ، عەبدوڵڵا حاجی مەحمود وەزیری کاروباری شەهیدان و ئەنفالکراوان و سەفین دزەیی بەرپرسی فەرمانگەی پەیوەندییەکانی دەرەوە .
https://dfr.gov.krd/a/d.aspx?l=13&a=50197
"نازم دەباغ" نوێنەری هەرێمی کوردستان لە ئێران گوتی: تۆڵەی خوێنی سەردار سلێمانی بۆ خەڵکی دەسکەوتی باشی دەبێت و هیوادارم هەموو رێبەران، وەکوو ئەو بەڕێزە بن و ئەو بکەنە نموونەی خۆیان.
گرووپی خۆڕاگری ئاژانسی تەسنیم ـ دۆسیەی تایبەتی "دووری حەبیب": "نازم دەباغ" نوێنەری هەرێمی کوردستان لە تاران لەو کەسانەیە کە بە بۆنەی ئەو بەرپرسیارییەتییەی کە لە ساڵانی ڕابردوودا تا ئێستا بوویەتی، لە قۆناغە جۆراوجۆرەکاندا لە نزیکەوە لەگەڵ سەرداری شەهید "قاسم سلێمانی" کاری کردووە و ئاشنایەتی لەگەڵی بووە.
"نازم دەباغ" نزیکەی بیست ساڵە کە نوێنەری حکوومەتی هەرێمی کردستان لە ئێرانی لە ئەستۆدایە و لە هەڤاڵانی نزیکی "جەلال تاڵەبانی" سکرتێری کۆچکردووی یەکێتی نیشتمانی کوردستانی عێراق دێتە ئەژمار کە ئەویش پەیوەندییەکی دۆستانەی یەگجار زۆریی لەگەڵ سەردار سلێمانی هەبوو.
بەڕێز دەباغ لە وتووێژ لەگەڵ ئاژانسی تەسنیم، هەندێک بیرەوەریی خۆی لەگەڵ سەردار "قاسم سڵێمانی" گێڕایەوە کە دەقەکەی لە خوارەوە دەخوێننەوە.
سپاستان دەکەین بۆ ئەو دەرفەتەی کە بۆ ئێمەتان تەرخانکردووە، تکایە بفەرموون چۆن لەگەڵ سەردار سلێمانی و لە کوێی و چۆن ئاشنا بوون؟
ئاشنایی ئێمە بۆ ساڵی ۱۹۹۱ دەگەڕێتەوە کە وەکوو نوێنەری خواڵێخۆشبوو بەڕێز "جەڵاڵ تاڵەبانی" سکرتێری یەکێتی نیشتمانی و پاشان سەرۆک کۆماری عێراق ئەم چاوپێکەوتنانە ئەنجامدەدرا. زۆربەی پەیوەندییەکانی کوردەکان لە ڕێگای قەرارگای ڕەمەزانەوە بوو کە یەکێکە لە لقەکانی هێزی قودس. من بۆخۆم یەکەمین جار دوای ڕاپەڕینی هەرێمی کوردستان و دامەزراندنی یەکەمین کابینەی حکومەتی هەریمی کوردستان لەگەڵ شاندێک بە سەرۆکایەتی شەهید "سامی عەبدوالڕەحمان" هاتین بۆ ئێران و لەگەڵ خوالێخۆشبوو "حەسەن حەبیبی" کە ئەوکات جێگری یەکەمی سەرۆک کۆماری ئێران بوو و پاشان لەگەڵ فەرماندەی هێزی قودس چاوپێکەوتنمان کرد. هەڵبەت لەو قۆناغەدا ئێمە شارەزایی ئەوتۆمان لەگەڵ ئەو نەبوو، بەڵام دواتر ئەو ئاشنایی و چاوپێکەوتنانە زیاتر بوو و هەر کات کە پێویست بوایە، وەکوو نوێنەری بەڕێز تاڵەبانی داواکاریی چاوپێکەوتن بووم و ئەو دیدارە ئەنجامدەدرا.
لە لایەنی کەسایەتییەوە سەردار سلێمانیتان چۆن بینی؟ کام یەک لە تایبەتمەندییەکانی ئەو لە لایەنی ئێوەوە زیاتر لەوانی دیکەوە بەرچاوتر بوو؟
ئەو فەرماندەیەکی ئازا، ڕاستگۆ، بەوەفا، سیاسەتمەدار، بە هزر و بیر و دڵپاک بوو. لە تەواویی ئەو کۆبوونەواوەی کە لەگەڵ ئەودا بووم دەمبینی کە لەوپەڕیی سەرنج و هێمنی گوێی لە قسەکانی بەرانبەرەکەی دەگرێت و پاشان بیرووڕای خۆی دەردەبڕیی و ئەگەر بابەتێکی گرینگ بخرایەتە ڕوو، هەوڵیدەدا زۆر بە خێرایی بە سەرئەنجامی بگەیەنێت. شارەزایی تەواویی بەسەر بابەتەکاندا هەبوو و کارەکانی بە وتووێژ دەبردە پێشەوە و لەم ڕێگایەدا بە دڵێکی کراوەوە هەڵسووکەوتی دەکرد.
سەبارەت بە هەرێمی کوردستان لە چاوپێکەوتن لەگەڵ سەردار سلێمانی لەسەر چ بابەتێک قسەتان دەکرد؟
سەردار سلێمانی پەیوەندیی و ڕۆڵێکی باشی لەسەر بابەتەکانی پەیوەندیدار بە عێراقەوە هەبوو. ئاشکرایە کە ئەم کۆبوونەوانە تا ئەو ڕادەیە لە دەزگاکانی ڕاگەیاندن باسی لێنەدەکرا و تەنانەت تۆماریش نەدەکرا، بەڵام ئەم بوونە بوونێکی زۆر دیار و گاریگەر بوو.
لە بیرمە دوای ماوەیەکی کورت لە ڕاپەڕینی هەرێمی کوردستان، بە شوێن ئەوەوە بووین کە کەرەستە و خزمەتگوزاری زیاتر پێشکەش بە خەڵکی خۆمان بکەین. کۆمپانیایەکی ئێرانی ڕەزامەندیی دەربڕیی کە بۆ ئێمە بیر لێبدات بەڵام چونکە دەترسا ئەمەریکییەکان جیهازەکانی ئەوان لێبدات، هەر بەم هۆیەوە داوای گەرەنتی لە ئێومە کرد و جەختیشی کردەوە کە ئەم گەڕەنتییە دەبێت لە ئێران دابین بکرێت. بەڵام بۆ ئێمە کارێکی سەخت بوو. بابەتەکەمان بە گوێی سەردار سلێمانی ڕاگەیاند و چیرۆکەکەمان بۆ گێڕاوە. پێمان گوت کە ئەم کۆمپانیایە داوای گە’ڕەنتی یەک میلیۆن دوڵاری لە ئێمە دەکات. بە زووترین کات، ئەو چەکێکی یەک میلیۆن دوڵاری نووسی و بەو کۆمپانیایەیدا و گوتیان ئەگەر جیهازەکانتان بۆ ئێران نەگەڕاوە ئەم چەکە بۆخۆتان هەڵبگرن. بۆ دابینکردنی کارەباش دیسان ئەو ڕۆڵێکی کاریگەری هەبوو کە وەزارەتی وزەی ئێران قەبووڵیکرد هەزار مێگاوات کارەبای عێراق دابین بکات کە لەم ڕێژەیە، 300 مێگاواتیش بۆ هەرێمی کوردستان بێت.
ئێمە لە بواریی سووتەمەنی (نەوت و گاز)یش گرفتمان هەبوو و هێنانی ئەوانە لە سنوورەکانەوە بۆ ئێمە کارێکی سەخت بوو. پاراستنی سنوور لە ئێران لە ئەستۆی دەزگایەکی دیکە بوو بەڵام سەردار سلێمانی لەگەڵ ناوەندەکانی جۆراوجۆر لەوانە: قەرارگای حەمزە و دەوڵەت، هەماهەنگی کرد تاکوو سنووری پەرویزخان بە شێوەی کاتی بۆ ماوەی 6 مانگ بۆ ئاڵووگۆڕیی سووتەمەنی بۆ ناوچەکانی گەرمیان، کەلار و سلێمانی بکرێتەوە و دوای شەش مانگیش دیسانەوە ئەو ماوەیە نوێی بکرێتەوە.
ئەو دوای کۆتایی هاتنی نوێی کردنەوەی دووهەم، گوتیان کاتێک هەم خەڵکی ئێران و هەم خەڵکی کوردستان لەسەر ئەم بابەتە بەرژەوەندییان هەیە، بۆچی سنوورەکان بە تەواویی نەکەینەوە؟ ئەم هەنگاوانە لە کاتێکدا کرا کە خەڵکی ئێمە پێویستی ئەوتۆی بە ئاو، کارەبا، نەوت و گاز هەبوو و هەر ئەو کاریگەرییەی سەردار سلێمانی بوو کە بووە هۆی ئەوەی کە سنوورەکان چالاک بکرێت.
تەنانەت چەند ڕۆژ پێش لە هێرشی داعش، خودی شەهید سلێمانی لە ناوچەی مەخموور و هەولێر ئامادەبوو و سەردانی ئەم ناوچە جۆراوجۆرانەی کرد. لەو باوەڕەدابوو کە هێزەکانی پێشمەرگە لە بەرەکەکانی شەڕ پێویستی بە هاوکاریی و کەرەستەی زیاتر هەیە، هەر بەم هۆیەوە کاتێک شەو پەیوەندیی گرت و گوتی داعش هێرشی کردووە و داوای یارمەتی کرا، چون ئەو زانیاریی پێشووتریی هەبوو بۆ ناردنی یارمەتی و ئامادەبوونی ڕاوێژکارانی لەشکری و سوپای ئێرانی بە خێرایی هەنگاویی هەڵێنا.
ئەو یارمەتییانەی کە لەگەڵ شەڕی داعش بۆ هەرێمی کوردستان لە ئارادا بوو بە چ شێوەیەک بوو و سەردار سلێمانی چۆن هاتن بۆ ئەوێی و چ کارێکیان کرد؟
ئەو شەوەی کە داعش هێرشی بۆ سەر هەولێر کرد، بەرپرسانی هەرێمی کوردستان لەگەڵ بەرپرسانی کۆماری ئیسلامی ئێران و بەڕێز سلێمانی پەیوەندییان گرت.
ماوەیەک پێش ئەو کاتەش یەکێک لە فەرماندەکانی ئەڕتەشی ئێران لەمبارەیەوە قسەی کرد کە قەرارگای شەڕ لەگەڵ داعشمان لە هەرێمی کوردستان عێراق هەبوو.
لە زاخۆ تا جەبەل حەمری لە ناوچەی خانەقین و کەلار ئەم قەرارگایە بۆ ڕاوێژ و ڕێنوێنی و ناردنی یارمەنی نیزامی بۆ هێزەکانی پێشمەرگە و شەڕ لەگەڵ داعش بوونی هەبوو.
هەندێک وێنەش لە بوونی سەردار سلێمانی لە تەنیشت هێزەکانی پێشمەرگە و هێزەکانی دیکەش لە کوردستان بڵاوکرایەوە کە لە کاتی ڕووبەڕووبوونە لەگەڵ داعش بوو و هەڵبەت هەر وەکوو گوتم، ئەو پێش لە دەسپێکردنی پێکدادانەکانیش لەوێی ئامادەبوو.
کاتێک کە داعش هێرشی کرد و عێراق لە ئێران داوای یارمەتی کرد، ئەگەر ئێران هاوکاریی نەدەکرد، چ شتێک ڕوویدەدا؟
من پێشتریش گوتوومە کە ئەگەر ئێران و یارمەتییەکانی ئێران نەبوایە هەر لە سەرەتادا بەغدا وەدەستی داعش دەکەوت. ئێران یارمەتی زۆریدا و ئەگەرچی یارمەتییە ئاسمانییەکانی وڵاتانی دیکەش کاریگەر بوو، بەڵام چارەسەریی شەڕ لەسەر عەرز وەدیار دەکەوێت و ئێران لەم بوارەدا یارمەتییەکی زۆریدا.
ئەگەر ئەم یارمەتیانە نەبوایە کارەساتی گەورە بۆ ئەو ناوچانەی کە داعش هێرشی بۆ سەر کردبوون دەهاتە پێشێی و بە ئاسانی نەدەکرا ئەم کارەساتە قەرەبوو بکرێتەوە، بەڵام بە خۆشحاڵییەوە بە هاوکاریی ئێران پێشی ئەم مەسەلەیە گیرا.
لە دواییشدا کە بەڕێز "مەسعوود بارزانی" وەکوو سەرۆکی هەرێمی کوردستان، سوپاسنامەی بۆ سەرۆک کۆماری ئێران نارد و سوپاسی هەنگاوەکانی کۆماری ئیسلامی ئێران کرد کە وەکوو وڵاتێک کە هەر لە یەکەمین ساتەکاندا یارمەتییەکانی خۆی بۆ ڕووبەڕووبوونەوە لەگەڵ داعش نارد.
بەڕێز بارزانی لەم نامەیەدا نووسیبووی کە ئێمە هەر ئەو چاوەڕوانییەمان لە کۆماری ئیسلامی ئێران هەبوو و خۆشبەختانە ئەم هەنگاوە ئەنجامدرا کە لە کاتی پێویست و لە ساتی یەکەمدا ئەم یارمەتیانە گەیشت.
پەیوەندییەکانی سەردار سلێمانی و بەڕێز تاڵەبانی بە چ شێوەیەک بوو و ئەم پەیوەندییە لە بەرەپێشبردنی ئامانجەکانی دوو لایەن چ کاریگەرییەکی هەیە؟ ئەگەر سەبارەت بە پەیوەندییەکانی ئەم دوو کەسایەتییە بیرەوەرییەکتان هەیە بۆمان باس بکەن.
من بە گشتیی لە کۆبوونەوەکانی ئەواندا ئامادەبووم و هەندێک جاریش دەهاتمە دەرێی تاکوو ئەوان بە ئاسانی لەگەڵ یەکتری قسە بکەن.
ئەوەی کە من لە پەیوندیی سەردار سلێمانی و مام جەلالدا بۆم دەرکەوتووە، پەیوەندییەکی برایانە، ڕاستگۆیانە و وەفادارانە لە سەر بنەمای ڕابردوو و پەیوەندییەکی باش بوو کە لە لایەنی سیاسی، ئایدیۆلۆژیای هزری و نەتەوایەتییەوە لەگەڵ یەکتریی هەیانبوو.
چەندین جار سەردار سلێمانی بە منی گوت کە من یەگجار زۆر ئەو برا گەورەیەم (جەلال تاڵەبانی)م خۆش دەوێت چونکە کەسایەتییەکی ڕاستگۆیە، وەکوو هەندێک کەسی دیکە نییە کە لە پێش ئەمەریکییەکان دژی ئێمە بێت و لە پێش ئێمەش لە دژی ئەوان بێت.
بەڕێز تاڵەبانیش ڕێزیکی زۆریی لە سەردار سلێمانی دەگرت و دەیگوت ئەو کەسێکە کە بە باشی هەست بە من دەکات و لە کاتی پێویست یارمەتیمان دەدات و جەختی دەکرد کە ئەم پەیوەندییە دەبێت بپارێزێت. سەردار سلێمانی مرۆڤێکی ڕاستگۆ، خۆماڵی و خۆشەویست بوو، هیچ کاتێک لە بیرم ناچێت کە شتێکی بۆ خۆی یا بۆ بنەماڵەکەی ویستبێت بۆ نموونە لە هەرێمی کوردستان بۆ منداڵەکانی چالاکییەکی ئابووریی دابمەزرێنێت.
خەڵکی هەرێمی کوردستان چ بیرووڕایەکیان سەبارەت بە سەردار سلێمانی هەیە و تا چەندە ئەویان دەناسی؟
سەردار سلێمانی لە هەر شەڕێک کە هێزەکانی پێشمەرگە لەگەڵ داعش بوویان، ئامادەدەبوو و ئەگەر بۆخۆشی نەبوایە، هاوکارەکانی دەنارد. دیارە هێزەکانی پێشمەرگە کاتێک کە بۆ ماڵەکانی خۆیان دەگەڕانەوە ئەم بایەتەیان دەگێڕاوە و کەسانی دیکەش لەگەڵ ئەو کەسایەتییە ئاشنا دەبوون. هەر لە بەر ئەم هۆیە خەڵکی ئێمە شارەزاییەکی باشیان لەگەڵ ئەو و یارمەتییەکانی بۆ هەرێمی کوردستان هەیە.
ئەو جەختی زۆری لەسەر یەکێتی و هاوکاریی گرووپە کوردییەکان، شیعە و سوننە لەگەڵ یەکتری دەکردەوە و ئەوەی لە کۆبوونەوە جۆراوجۆرەکان بە ئامادەبوونی هەموو کەسایەتییەکان دووبارە دەکردەوە.
چۆن ئاگاداریی شەهیدبوونی ئەو بوون؟
بەیانی زوو یەکێک لە هاوکارەکانم پەیامی بۆ ناردم و گوتی کە بەداخەوە ئەم کارەساتە ڕوویداوە. هەواڵێکی دڵتەزێن بوو و ئەگەر کاریگەرییەکەی بۆ من زیاتر لە بیستنی هەواڵی کۆچی دوایی بەڕێز تاڵەبانی نەبوو، لەویش کەمتر نەبوو. مردنی ئەو خەسارەیەکی قەرەبوونەکراوە و بە لەبەرچاوگرتنی ئەو شارەزایی و پەیوەندییە تاکەکەسییەی کە لەگەڵ ئەو بووم، لەو بڕوایەدام بە ئاسانی کەسێک وەکوو ئەو پەیدا نابێت.
زۆر یەک لەو بڕوایەدان دوای شەهیدبوونی ئەو، بەڕێکردنی تەرمی ئەو لە لایەن خەڵکی عێراق لە لایەنی سیاسی و نێودەوڵەتییەوە پەیامێکی گەورە بوو و ئەو ڕووداوە یەکێتی نێوان خەڵکی ئێران و عێراقی زیاتر کرد، هەڵسەنگاندنی ئێوە لەمبارەیەوە چییە؟
ئەم بەشدارییە زۆرەی خەڵکی ڕووداوێکی دەگمەن بوو و هەموو شیعەکان و نە تەنیا ئێرانییەکانی خستە ژێر کاریگەریی خۆیەوە. ئێوە ئەگەر چاو لە وێنە و ئەو فیلمانەی کە لە ئێران و عێراق بڵاوبۆوە بکەن، خەڵکی عێراقیش بە ئەرکی خۆیان زانی کە سوپاس و پێزانینی خۆیان ئاراستەی سەردار سلێمانی بکەین.
بە بڕوای ئێویە بۆچی ئەمەریکییەکان سەردار سلێمانییان تیڕۆڕ کرد؟
لە لایەنی یەکەمەوە تیڕۆڕی حاج قاسم لە لایەن سەرۆک کۆماری عراق ئیدانە کرا کە ئەم مەحکوومکردنە مانا و هۆی خۆی هەیە. ئەمەریکا بەم کارە سەروەریی عێراقی پێشێل کرد کە ئەوە کارێکی قێزەونە کە بە هیچ شێوەیەک جێگای پەسەند نییە.
ئەو هەنگاوە تەنانەت لە نێوان خودی ئەمەریکییەکانیش جێگای ناکۆکی بیرووڕا بوو کە ئایا کارێکی پۆزێتیڤ بوو یا نا؟
کردەوەی سەردار سلێمانی لە عێراق و سووریە و لوبنان، هەنگاوی دژ بە تیرۆڕیسم بوو بەڵام من فکر دەکەمەوە لە لۆبی زایۆنیسزم و تڕامپ کەسانێک بوون کە ئەم کارەیان لە بەرژەوەندیی خۆیان دەزانی تا لەم ڕێگایەوە پەیوەندیی ئێران و عێراق خراب بکەن و هەروەها هۆی سەرەکی بەرەنگاربوونەوە لەگەڵ تیرۆڕیسم لە ناوچەکە لەناوبەرن، چونکە ئەو نائارامییە لە ناوچەکە لە بەرژەوەندیی ئەواندایە بەڵام من لەوبڕوایەدام زەرەریی ئەم هەنگاوە بۆ ئەمەریکییەکان لە بەرژەوەندییەکەی زیاترە.
ئەوە ڕاستییەکە کە قوربانی بوونی کەسانی گەورە، بەرهەمی بە بەرەکەتی بۆ خەڵکی ئەو وڵاتە دەبێت و ئەو کەسانە هەرمان دەبن.
من فکر دەکەمەوە تۆڵەی خوێنی سەردار سلێمانی بۆ خەڵکی دەسکەوتی باشی دەبێت و هیوادارم هەموو رێبەران وەکوو ئەو بەڕێزە بن و ئەو بکەنە نموونەی خۆیان.
ئەگەر بتانەوێت بە چەند وشە قسە لەگەڵ سەردار سلێمانی بکەن، وەکوو هەڤاڵێک چی پێدەڵێن؟
پێی دەڵێم تۆ زیندووی و جێگات خاڵی نییە. تۆ لە دڵی خەڵکی نەتەوەکەدا جێگات هەیە. هیوادارم بە هێمنی بخەویی. ئەوەی کە کردت لە یاد و دڵی خەڵکیدا دەمێنێتەوە و مردنەکەت بە شانازیی و سەربڵندی بوو. خەڵکی خۆشەویستی خۆیان لە ڕێوڕەسمی شینگێڕییەکەت بە تۆ نیشاندا و ئیشەڵڵا جێگات لە بەهەشتی بەرین بێت. ماڵئاوا.
بۆ زانیاریی زیاتر:
بەشی عێراق و هەرێمی کوردستان- نوێنەری هەرێمی کوردستان لە ئێران ڕایگەیاند هەردوو لایەنی ئێران و هەرێمی کوردستان لە هەوڵدان بۆ بەردەوام بوون لە ئاڵوگۆڕی بازرگانیی نێوانیان
بەپێی هەواڵی کوردپرێس، پاش ئەوەی کە بەشێوەی فەرمی بڵاو بوونەوەی ڤایرۆسی کرۆنا لە ئێران ڕاگەیێندرا، عێراق بەشێوەی ڕەسمی ڕایگەیاند هیچ موسافیرێک لە ئێران وەرناگرێت و ڤیزەیش بۆ هاووڵاتییانی ئێرانی دەرناکرێت.
نازم عومەر دەباغ نوێنەری هەرێمی کوردستان لە گفتوگۆ لەگەڵ کوردپرێسدا لەباەری بەردەوام بوونی ئاڵوگۆڕی بازرگانی و هاتوچۆی موسافیر لە دەروازە فەرمییەکانەوە وتی: بەپێی زانیارییەکانی من دەروازەکانی هەرێمی کوردستان لە دیاری کردنی ئەو ڕێنمایانەن بۆ ئەوەی کە پڕۆسەی بازرگانی بەردەوام بێت لەنێوان ئێران و هەرێمی کوردستان.
ناوبراو ئاماژەی بەوە دا کە لەلایەن هەرێمی کوردستانەوە ڕاگەیێندراوە کە هەموو دەروازەکان داخراوە بەڵام دیسان خەریکی ڕێکاری تازەن بۆ ئەوەی کە بەشێک لەو کەسانەی کە پێویستە هاتوچۆ بکەن، ئەنجامی بدەن و لە هەمان کاتیشدا ئەوانەی کە شکی نەخۆشیەکەیان لێدەکرێت تا ئێستا بڕیاری قەرەنتینە کردنیان دراوە لە کۆتاییدا دەبێت چاوەڕێ بکەین کە دوابڕیار چی دەبێت.
شایانی باسە عێراق شەوی پێنجشەممەی ڕابردوو لە هەوڵێکدا بۆ ڕێگری کردن لە تەشەنەسەندنی ڤایرۆسی کرۆنا سنوورە زەوینییەکانی لەگەڵ ئێران داخست و ئیدارەی دەروازەی سنوورییەکانی عێراق لەمبارەوە وتی تا سێ ڕۆژ سنوورە زەوینییەکانی وڵاتەکەیان بەڕووی موسافیرە ئێرانییەکاندا داخست.
بەگوێرەی ڕاگەیێندراوی بەڕێوەبەرایەتیی دەروازە سنوورییەکانی عێراق، هاووڵاتییانی عێراقی کە لە ئێراندان ئەم یاسایە نایانگرێتەوە و هاوردەکردنی بەرهەمە جیاوازەکان لە ئێرانەوە بەردەوام دەبێت
http://www.kurdpress.com/ku/details.aspx?id=149749
More...
راگه‌یه‌ندراوی كۆبوونه‌وه‌ی سێ سه‌رۆكایه‌تی هه‌رێمی كوردستان له‌گه‌ڵ لایه‌نه‌كان
نوێنەرایه‌تی حکومەتی هەرێمی کوردستان به‌شداریی له ساڵیادیی کۆچی سه‌ید محه‌مه‌د باقر الحه‌کیم کرد
سه‌رۆكی هه‌رێمی كوردستان پێشوازی له شاندێكی كۆنگرێسی ئه‌مه‌ریكا ده‌كات
مەسرور بارزانی و وەزیری دەرەوەی ئیتاڵیا کۆبوونەوە
دوایین هەواڵەکان
- نوێنەری حکومەتی هەرێم لە ئێران: سەردانەکەی پزیشکیان ئاماژەیە بۆ گرنگیدانی ئێران بە هەرێمی کوردستان
- هه‌رێمى كوردستان و ئێران جهخت له برهودان به پهيوهندييهكانيان دهكهنهوه
- سهرۆک نێچیرڤان بارزانی: سەردانی سەرۆک کۆماری ئێران مێژوویی بوو
- نازم دەباغ له وتووێژ له‌گه‌ڵ ئاژانسی ئیرنا: مەسعوود پزشکیان سەردانی هەولێر دەکات
- نازم دەباغ: کاتی سەردانی پزیشکیان بۆ عێراق دیار نییە
- «سەلام رشدی» له‌گه‌ڵ شاندی یهکێتی هاورده و ناردنکارانی لقی هه‌ولێر کۆبۆوه
- سه‌رۆك نێچيرڤان بارزانى: ههميشه پشتيوانى و بهرگرى له مافهكانى ئێزدييان دهكهين
- سهرۆک نێچیرڤان بارزانی له‌گه‌ڵ باڵیۆزی یهکێتیی ئهورووپا کۆبووهوه
- سه‌رۆك نێچيرڤان بارزانى له‌گه‌ڵ باڵيۆزى نهمسا كۆبووهوه
- سه‌رۆك نێچيرڤان بارزانى سوپاسى جهنهرال ڤاول ده‌كات