ئێوارەی ڕۆژی پێنجشەممە 21ـی 1ـی 2016 لە شاری هەولێر بەڕێز مەسعود بارزانی سەرۆكی هەرێمی كوردستان پێشوازی لە جەنەڕاڵ ئۆستن فەرماندەی فەرماندەیی ناوەندیی هێزەكانی ئەمەریكا و شاندێكی یاوەری كرد كە پێكهاتبوو لە ستیوارت جۆنز باڵیۆزی ئەمەریكا لە عێراق و ژمارەیەك لە فەرماندە و بەرپرس و ڕاوێژكارە باڵاكانی سوپای ئەمەریكا لە عێراق.

لە دیدارەكەدا بارودۆخی مەیدانیی بەرەكانی ڕووبەڕووبوونەوەی تیرۆریستان لە پارێزگاكانی نەینەوا و ئەنبار و شوێنەكانی تری عێراق و سەركەوتنەكانی هێزی پێشمەرگە لە شنگال و كاریگەریی ئەو سەركەوتنانە لەسەر شەڕی دژی تیرۆریستان خرایە بەر باس و گفتوگۆ.

هەر لەم كۆبوونەوەیەدا ڕۆشنایی خرایە سەر سەردانی سەرۆكی دیوانی سەرۆكایەتیی هەرێم و بەرپرسی فەرمانگەی پەیوەندییەكانی حكوومەتی هەرێم كە لەسەر ڕاسپاردەی سەرۆك بارزانی سەردانی ئەمەریكایان كردبوو و ئەنجامەكانی ئەو سەردانە بە سوودبەخش وەسف كرا و بە لەپێشچاوگرتنی قەیرانی ئابووری جەخت لە چڕكردنەوەی هەوڵەكان كرایەوە بۆ ڕووبەڕووبوونەوەی قەیرانەكە و دۆزینەوەی ڕێگەچارەی گونجاو بۆ نەهێشتنی كێشەكان و دابینكردنی پێداویستییەكانی هێزی پێشمەرگەی كوردستان. هەروەها ستاییشی خۆڕاگریی گەلی كوردستان و ئازایەتیی پێشمەرگە كرا و جەختیش لەوە كرایەوە كە پێویستە دۆستانی گەلی كوردستان یارمەتیی خەڵكی كوردستان بدەن لە تێپەڕاندنی قەیران و كێشەكاندا.

لە بەشێكی دیكەی ئەم كۆبوونەوەیەدا باس لە ئامادەكارییەكانی پڕۆسەی ئازادكردنی موسڵ و بایەخی ئازادكردنی موسڵ لە یەكلاییكردنەوەی شەڕی داعش كرا و هەروەها ئاستی هەماهەنگیی نێوان هێزی پێشمەرگە و هێزی هاوپەیمانان و هێزە عێراقییەكان لە ڕوویەڕووبوونەوەی تیرۆریستان و كاریگەریی بوونی هەماهەنگیی ورد لە وەدەستهێنانی سەركەوتنەكان تاوتوێ كرا.

جێگەی ئاماژەپێكردنە لەم كۆبوونەوەیەدا نێچیرڤان بارزانی سەرۆكی حكوومەتی كوردستان و كەریم شنگالی وەزیری ناوخۆ و وەزیری پێشمەرگە بە وەكالەت و فواد حوسێن سەرۆكی دیوانی سەرۆكایەتیی هەرێم و فەلاح مستەفا بەرپرسی فەرمانگەی پەیوەندییەكانی حكوومەت و ئەنوەر حاجی عوسمان بریكاری وەزیری پێشمەرگە و فەریق جەبار یاوەر ئەندامی فەرماندەیی گشتیی هێزەكانی پاراستنی هەرێم ئامادە بوون.

 

ڕۆژی یەكشەممە 24ـی 1ـی 2016 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە ستیوارت جۆنز باڵیۆزی ئەمەریكا لە عێراق كرد.


لە دیدارەكەدا كە ماتیۆس میتمان كۆنسوڵی ئەمەریكا لە هەولێر ئامادە بوو بارودۆخی سیاسی و ئەمنیی ناوچەكە و هەروەها پەیوەندییەكانی نێوان هەولێر و بەغدا خرایە بەرباس و گفتوگۆ و باسیش لە ئامادەكارییەكانی هێزی هاوپەیمانان و هێزەكانی عێراقی و پێشمەرگە كرا بۆ ئۆپڕاسیۆنی ئازادسازیی موسڵ كرا.

لە بەشێكی دیكەی ئەم كۆبوونەوەیەدا پەیوەندییەكانی نێوان هەرێمی كوردستان و ئەمەریكا و هەماهەنگیی نێوان هەردوولا لە بوارە جیاجیاكان تاوتوێ كرا.

 

 

 

 

ئێوارەی ڕۆژی سێشەممە 8ـی 12ـی 2015 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە جەنەڕاڵ لۆید ئۆستن فەرماندەی فەرماندەیی ناوەندیی هێزەكانی ئەمەریكا و شاندێكی یاوەری كرد كە پێكهاتبوون لە ستیوارت جۆنز باڵیۆزی ئەمەریكا لە عێراق و ژمارەیەك لە فەرماندە و بەرپرس و ڕاوێژكاری باڵای سوپای ئەمەریكا.

لە دیدارەكەدا فەرماندەی فەرماندەیی ناوەندیی هێزەكانی ئەمەریكا پیرۆزبایی سەركەوتنەكانی هێزی پێشمەرگەی كوردستان و ئازادكردنی شنگالی لە سەرۆك بارزانی كرد و ئۆپڕاسیۆنی ئازادكردنی شنگالی بە سەركەوتنێكی مەزن و كەریگەر وەسف كرد لە شەڕی دژی تیرۆریستان. هەروەها ستاییشی ئازایەتی و لێهاتوویی هێزی پێشمەرگەی كوردستانی كرد كە زۆر بە باشی توانیویەتی سوود لە هەماهەنگی و پاڵپشتیی ئاسمانیی هێزە هاوپەیمانەكان وەربگرێت و ڕاشیگەیاند كە سوپای ئەمەریكا بەردەوام دەبێت لە پاڵپشتیكردنی پێشمەرگە و گوشارهێنان بۆ تیرۆریستانی داعش و لێدان و تێكشكاندنیان.

لەبەرانبەردا سەرۆك بارزانی سوپاسی هاوكاری و پاڵپشتیی سوپای ئەمەریكای كرد كە بووەتە هۆی ئەوەی سەركەوتنەكان بەدی بێن. هەروەها ئاماژەیشی بەوەدا كە هێزی پێشمەرگەی كوردستان بە پلانی باش و ئازایەتی و هەماهەنگیی بێ وێنە لەگەڵ هێزە هاوپەیمانەكان توانی سەركەوتنی مەزن لە بەرەكانی ڕووبەڕووبوونەوەی تیرۆریستان تۆمار بكات.

هەر لەم كۆبوونەوەیەدا باس لە بارودۆخی مەیدانیی بەرەكانی شەڕ لە ئەنبار و سەلاحەدین و نەینەوا و هەماهەنگی و هاوكاریی زیاتری پێشمەرگە و هێزی هاوپەیمانان و هێزەكانی عێراقی بۆ لەناوبردن و شكستدانی تیرۆریستانی داعش كرا و پێداویستییە سەربازییەكانی هێزی پێشمەرگەیش تاوتوێ كرا. لە بەشێكی دیكەی كۆبوونەوەكەدا بیروڕا لەبارەی دوا پێشهاتە سیاسییەكانی ناوچەكە و ململانێی نێوان هێزە هەرێمایەتی و دەولییەكان لە ئاستی ناوچەیی و نێودەوڵەتی ئاڵوگۆڕ كرا.

جێگەی ئاماژەپێكردنە لەو كۆبوونەوەیەدا مەسروور بارزانی ڕاوێژكاری ئەنجوومەنی ئاساییشی هەرێم و كەریم سنجاری وەزیری ناوخۆ و وەزیری پێشمەرگە بە وەكالەت و د. فواد حوسێن سەرۆكی دیوانی سەرۆكایەتیی هەرێم و فەلاح مستەفا بەرپرسی فەرمانگەی پەیوەندییەكانی حكوومەت و ئەنوەر حاجی عوسمان بریكاری وەزارەتی پێشمەرگە و شێخ جەعفەر شێخ مستەفا و فەریق شێروان عەبدولرەحمان و فەریق جەبار یاوەر ئەندامانی فەرماندەیی گشتیی هێزەكانی پاراستنی هەرێم ئامادە بوون.

ڕۆژی دووشەممە 23ـی 11ـی 2015 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە تۆنی بلینكێن جێگری وەزیری دەرەوەی ئەمەریكا و شاندێكی یاوەری كرد كە پێكهاتبوو لە ستیوارت جۆنز باڵیۆزی ئەمەریكا لە عێراق و ژمارەیەك ڕاوێژكاری وەزارەتی دەرەوەی ئەمەریكا.

لە دیدارەكەدا جێگری وەزیری دەرەوەی ئەمەریكا پیرۆزبایی سەركەوتنەكانی پێشمەرگە و ئازادكردنی شنگالی لە سەرۆك بارزانی كرد و ڕایگەیاند كە زۆر سەرسامن بە هەنگاو و پلانەكانی سەرۆك بارزانی لە ئۆپڕاسیۆنەكان و ئەوەیشی خستەڕوو كە پێشمەرگە بۆ سەركەوتنەكانی قوربانی داوە و ئەوەیان جێگەی پێزانینی جیهانیانە. لە درێژەی قسەكانیشیدا باسی دوا پێشڤەچوونەكان و گۆڕانكارییە مەیدانییەكانی شەڕی دژی داعشی كرد لە عێراق و سووریا. سەبارەت بە پاڵپشتیكردنی هێزی پێشمەرگەی كوردستان ئەوەی دووپاتكردەوە كە وڵاتەكەی لە پشتیوانیی پێشمەرگە بەردەوام دەبێت و هەوڵەكانیشی بۆ فراوانتركردنی ئەم پشتیوانییە دەخاتەگەڕ.

لەبەرانبەردا سەرۆك بارزانی سوپاسی پاڵپشتیی هێزە هاوپەیمانەكان و بە تایبەت ئەمەریكای كرد كە كاریگەریی زۆری لە سەركەوتنەكانی پێشمەرگەدا هەبووە لە هەموو قۆناغە جیاجیاكانی ئۆپڕاسیۆنەكاندا هەر چەندە هاوكارییە سەربازییەكان لەسەر زەوی لە ئاستی فراوانی و سەختیی شەڕەكان نەبووە. سەرۆك بارزانی لە درێژەی قسەكانیدا باسی لە وردەكارییەكانی پلانی ئازادكردنی شنگال كرد كە زەبرێكی گەورە بوو بەر تیرۆریستانی داعش كەوتووە. پەیوەست بە كۆتاییهێنان بە داعش سەرۆك بارزانی وێڕای ئاماژەدان بەوەی كە داعش دوژمنی هاوبەشی هەموو مرۆڤایەتییە و لەهەر شوێنێك دەرفەتیان هەبێ دەبنە سەرچاوەی هەڕەشە بۆ سەر ژیانی هاووڵاتیان، جەختیشی لەوە كردەوە كە ئەولەوییەتی هەرێمی كوردستان شەڕكردن و تێكشكاندنی داعشە و پێویستە كۆمەڵگەی نێودەوڵەتی و هاوپەیمانان بەشێوەیەكی جدیتر بەشدار بن لە ڕووبەڕووبوونەوەی داعش و دەستی خۆیان لەم شەڕەدا كراوەتر بكەن. هەر لەم دیدارەدا سەرۆك بارزانی لەڕێی جێگری وەزیری دەرەوەی ئەمەریكا سڵاو و ڕێزی تایبەتی خۆی بۆ سەرۆك و جێگری سەرۆكی ئەمەریكا نارد.

باسكردنی بارودۆخی سووریا و چۆنیەتیی چارەسەركردنی قەیرانی سووریا و تێكشكاندنی تیرۆر و خستنەڕووی چارەسەری سیاسی و بۆ دواڕۆژی ئەم وڵاتە و هەروەها پلان و هەوڵەكانی حكوومەتی هەرێمی كوردستان و هێزی پێشمەرگە بۆ ئاوەدانكردنەوە و پاراستنی شنگال و گەڕانەوەی خەڵكی شنگال لە پاش ئازادكردنی چەند تەوەرێكی دیكەی كۆبوونەوەكە بوون.

ڕۆژی سێشەممە 20ـی 10ـی 2015 لە شاری هەولێر بەڕێز مەسعود بارزانی سەرۆكی هەرێمی كوردستان پێشوازی لە جەنەڕاڵ جۆزێف دانفۆرد سەرۆكی دەستەی ئەركانی هێزە هاوبەشەكانی ئەمەریكا و شاندێكی یاوەری كرد كە پێكهاتبوون لە ستیوارت جۆنز باڵیۆزی ئەمەریكا لە عێراق و ماتیاس میتمەن كونسوڵی ئەمەریكا لە هەولێر و ژمارەیەك فەرماندە و بەرپرسی سوپای ئەمەریكا لە عێراق.

لە دیدارەكەدا سەرۆكی دەستەی ئەركانی هێزە هاوبەشەكانی ئەمەریكا ستاییشی ئازایەتیی هێزی پێشمەرگەی كوردستانی كرد لە ڕووبەڕووبوونەوەی تیرۆریستانی داعش و سوپاسی ئاستی باشی هەماهەنگی و كاری هاوبەشی نێوان سوپای ئەمەریكا و پێشمەرگەی كرد و پێزانینیشی هەبوو بۆ سەرۆك بارزانی لە سەركردایەتیكردنی شەڕەكانی دژی تیرۆریستانی داعش. هەروەها جەختیشی لەوە كردەوە كە وڵاتەكەی هەرێمی كوردستان و پێشمەرگە بە هێزی سەرەكیی شكاندنی داعش و سەقامگیریی ناوچەكە دەزانێت و شكاندنی ئەفسانەی داعشیش لەسەر دەستی پێشمەرگە متمانەی كۆمەڵگەی نێودەوڵەتی بەرانبەر ئەو هێزانە زیاتر كرد كە شەڕی تیرۆریستان دەكەن. سەرۆكی دەستەی ئەركانی هێزە هاوبەشەكانی ئەمەریكا ئەوەیشی باس كرد كە هاتووە لە نزیكەوە ئاگاداری بۆچوونەكانی سەرۆك بارزانی بێت لەبارەی شەڕی داعش ئاستی هەماهەنگی و كاری هاوبەشی نێوان سوپای ئەمەریكا و هێزی پێشمەرگە و دووپاتیشی كردەوە كە وڵاتەكەی پابەندە بە هاوپەیمانێتی لەگەڵ هەرێمی كوردستان و ڕیشەكێشكردنی داعش لە ناوچەكە.

لەبەرانبەردا سەرۆك بارزانی بەخێرهاتنی سەرۆكی دەستەی ئەركانی هێزە هاوبەشەكانی ئەمەریكا و شاندی یاوەری كرد و پیرۆزبایی ئەركی تازەی لێ كرد و هیوای سەركەوتنی بۆ خواست و سوپاسی گەل و سەرۆك و حكوومەت و سوپای ئەمەریكایشی كرد كە لە شەڕی دژی تیرۆریستاندا پشتیوانی پێشمەرگە و هەرێمی كوردستانن. سەرۆك بارزانی باسی بارودۆخی مەیدانیی بەرەكانی شەڕی تیرۆریستان كرد و ئەوەی دووپاتكردەوە كە داعش دوژمنی هاوبەشی هەموو لایەكە و شانازیشە بۆ گەلی كوردستان كە لەسەر دەستی پێشمەرگە ئەفسانەی داعشی شكاند و شەڕ لە دژی تیرۆریستانی داعش شەڕێكی پیرۆزە و ئەوەیشی خستەڕوو كە شكاندنی داعش جوهدێكی هەمەلایەنە و هەماهەنگی و هاوكارییەكی دەولی و جدیی دەوێت. هەروەها ئاماژەی بە قوربانیدان و تێچوونی مرۆیی و ئابووریی شەڕی داعش و ئابڵۆقەی ئابووری و باری قورسی ئاوارەكان كرد كە گوشارێكی زۆری بۆ هەرێمی كوردستان هێناوە. لەدرێژەی قسەكانیدا سەرۆك بارزانی باسی لە گرنگیی قۆناغی دوای داعش كرد و بە پێویستی زانی كە گەرەنتییەكی وا بدرێتە پێكهاتەكان كە لە ئاییندەیان دڵنیا بن و چیتر كارەساتەكان دووبارە نەبنەوە.

هەماهەنگیی نێوان هێزەكانی عێراق و هێزی پێشمەرگە و ئامادەكارییەكانی ئازادكردنی موسڵ و پێداویستییە سەربازییەكانی پێشمەرگە و هەروەها بارودۆخی سووریا و ئۆپڕاسیۆنە ئاسمانییەكانی ڕووسیا لە خاكی سووریا ئەو تەوەرانە بوونە كە لە كۆبوونەوەكەدا بیروڕای لەباریەوە ئاڵوگۆڕ كرا.

جێگەی ئاماژەپێدانە لەم كۆبوونەویەدا جێگری سەرۆك وەزیرانی حكوومەت و ڕاوێژكاری ئەنجوومەنی ئاساییشی هەرێم و وەزیری ناوخۆ و سەرۆكی دیوانی سەرۆكایەتیی هەرێم و بریكاری وەزارەتی پێشمەرگە و جەعفەر شێخ مستەفا و فەریق شێروان عەبدولرەحمان و فەریق جەبار یاوەر ئەندامانی فەرماندەیی گشتیی هێزەكانی پاراستنی هەرێم و فەریق جەمال محەمەد سوپاسالاری پێشمەرگە ئامادە بوون.

ڕۆژی یەكشەممە 4ـی 10ـی 2015 بەڕێز مەسعود بارزانی سەرۆكی هەرێمی كوردستان پێشوازی لە ستیوارت جۆنز باڵیۆزی ئەمەریكا لە عێراق و شاندێكی یاوەری كرد.

لە دیدارەكەدا باڵیۆزی ئەمەریكا لە عێراق پیرۆزبایی سەركەوتنەكانی ئەم دواییەی هێزی پێشمەرگەی كوردستان لە میحوەرەكانی كەركووك لە سەرۆك بارزانی كرد و سەرەخۆشیشی لە كەسوكاری شەهیدانی ئەم ئۆپراسیۆنە كرد و هیوای چاكبوونەوەی بۆ برینداران خواست. هەروەها ئاستی هەماهەنگیی و هاوكاریی نێوان هێزە هاوپەیمانەكان و هێزی پێشمەرگەی بە نموونەیی وەسف كرد و سوپاسی سەرۆك بارزانیشی كرد كە پشتیوانێكی سەرەكیی هاوپەیمانان بووە لە شەڕی دژی تیرۆریستانی داعش. لە بەشێكی دیكەی ئەم دانیشتنە باڵیۆزی ئەمەریكا لە عێراق سەرۆك بارزانیی لە دوایین هەڵوێست و ستراتیژییەكانی وڵاتەكەی لە ناوچەكە و لەمەڕ پرسە هەنووكەییەكان ئاگادار كردەوە.

هەر لەم كۆبوونەوەیە پێداویستییە سەربازییەكانی هێزی پێشمەرگە و بارودۆخی مەیدانیی بەرەكانی ڕووبەڕووبوونەوەی تیرۆریستانی داعش لە عێراق و سووریا و چۆنییەتی لەناوبردنی تیرۆر تاوتوێ كرا و بیروڕایش لەبارەی دوایین پەرەسەندنە سیاسییەكانی ناوچەكە و هەروەها پەلامارە ئاسمانییەكانی ڕووسیا ئاڵوگۆڕ كرا و سەرۆك بارزانی ئەوەی دووپات كردەوە كە پێویستە شەڕی هەمە لایەنەی داعش بكرێت و تیرۆریستانی داعش لە سووریا و عێراق و ناوچەكە لە ڕەگوڕیشە دەربهێنرێن. سەرۆك بارزانی بوونی كۆدەنگیی دەولیی لەسەر لەناوبردنی داعش بە پێویست زانی و ئەوەیشی خستەڕوو كە دەبێ وڵاتان هەموو جۆرە ناكۆكییەك وەلا بنێن و تەركیز لەسەر لەناوبردنی داعش بكەن چونكە هەڕەشەیە بۆ سەر هەموو لایەك.

پەیوەندییەكانی نێوان هەرێم و حكوومەتی عێراقی فیدڕاڵ تەوەرێكی دیكەی ئەم كۆبوونەوەیە بوو.

سەرلەبەیانیی ئەمڕۆ سێشەممە 2015/9/15 بەڕێز نێچیرڤان بارزانی سەرۆك وەزیرانی هەرێمی كوردستان، پێشوازی لە بەڕێزان ستیوارت جۆنز باڵیۆزی ئەمەریكا لە عێراق و برێت مەكگۆرگ یاریدەدەری جێگری وەزارەتی دەرەوەی ئەمەریكا و شاندێكی دیپلۆماسی و سەربازیی یاوەریان كرد.


لە دیدارێكدا دوا پێشهاتەكان و بارودۆخی عێراق و ناوچەكە بە گشتی و هەرێمی كوردستان بە تایبەتی و ڕەوشی ئاسایش و شەڕی دژی تیرۆرستانی داعش و ئەو شكستانەی تیرۆرستان لەسەر دەستی پێشمەرگە ڕووبەڕووی بوونەتەوە، خرانە بەر باس و گفتوگۆ. لەمبارەیەشەوە شاندی میوان بەردەوامیی هاوكارییە سەربازییەكانیان بۆ هێزی پێشمەرگە دووپات كردەوە و جەختیش لەسەر هەماهەنگیی بەردەوامی نێوان ئەمەریكا و حكوومەتی هەرێمی كوردستان و حكوومەتی عێراق كرایەوە.


لەبارەی پرسی سەرۆكایەتیی هەرێمی كوردستانیشەوە، شاندی میوان پشتگیریی خۆیان بۆ بەردەوامیی گفتوگۆكانی نێوان لایەنە سیاسییەكانی هەرێمی كوردستان دەربڕی و جەختیان لەوە كردەوە كە پێویستە هەرێمی كوردستان لەم قۆناغەدا ئەولەویەت بداتە شەڕی دژی تیرۆرستانی داعش و هیوایان خواست لایەنە سیاسییەكانی كوردستان لە داهاتوویەكی نزیكدا بگەنە ئەنجامێك.


لای خۆیەوە بەڕێز نێچیرڤان بارزانی سەرۆك وەزیرانی هەرێمی كوردستان سوپاسی هەوڵەكانی باڵیۆزی ئەمەریكا لە عێراق و سوپای ئەمەریكای كرد كە تا ئێستا زۆر بە باشی هاوكاریی هێزی پێشمەرگەیان كردووە، بەڵام بۆ قۆناغەكانی داهاتوو پێویستییان بە پلانێكی تۆكمە و پاڵپشتیی هاوپەیمانان، بە تایبەتی ئەمەریكا بۆ هێزەكانی پێشمەرگە و سوپای عێراق دەبێت، بەمەبەستی ئازادكردنی ئەو ناوچانەی لەژێر دەستی تیرۆرستانی داعشدا ماون.


دەربارەی پرسی سەرۆكایەتیی هەرێمی كوردستانیش، بەڕێزیان ئاماژەی بەوە كرد كە گفتوگۆكان بەردەوامن و هەوڵەكان بۆ گەیشتن بە ئەنجامێكی گونجاو جددین بە شێوەیەك لە بەرژەوەندیی گشتیی خەڵكی هەرێمی كوردستان و سەقامگیریی ناوچەكەدا بێت، بە تایبەتی كە ئێستا هێزی پێشمەرگە و بەڕێز سەرۆكی هەرێمی كوردستان ئەولەویەت دەدەن بە ڕووبەڕووبوونەوەی تیرۆرستانی داعش، بۆیە پێویستە بابەتەكانی دیكە كارییگەریان لەسەر ئەو پرسە نەبێت.


بەردەوامیی گفتوگۆكانی نێوان هەولێر و بەغدا بەمەبەستی چارەسەركردنی كێشەكانی نێوان هەردوولا، هەروەها بارودۆخی ڕۆژهەڵاتی ناوەڕاست و وڵاتانی دەوروبەر، لایەنێكی دیكەی دیدارەكە بوو.

ئێوارەی ڕۆژی سێشەممە 28ـی 7ـی 2015 لە شاری هەولێر بەڕێز مەسعود بارزانی سەرۆكی هەرێمی كوردستان پێشوازی لە لۆید ئۆستن فەرماندەی فەرماندەیی ناوەندیی هێزەكانی ئەمەریكا و ستیوارت جۆنز باڵیۆزی ئەمەریكا لە عێراق و شاندێكی یاوەری كرد كە پێكهاتبوون لە ژمارەیەك بەرپرس و ڕاوێژكاری سوپای ئەمەریكا.

لە دیدارەكەدا بارودۆخی مەیدانی بەرەكانی ڕووبەڕووبوونەوەی تیرۆریستان لە پارێزگاكانی ئەنبار و سەلاحەدین و كەركووك و نەینەوا خرایە بەر باس و گفتوگۆ و، هەروەها ڕۆشنایی خرایە سەر ئاستی ئامادەیی هێزی پێشمەرگە و هێزەكانی عێراقی بۆ تێكشكاندنی تیرۆریستانی داعش.

هەر لەم دیدارەدا هەردوولا خۆشحاڵیی خۆیان بۆ بڕیاری توركیا بۆ بەشداریكردن لە شەڕی دژی داعش كردەوە كە كاریگەریی ئیجابی لەسەر ڕووبەڕووبوونەوەی تیرۆریستانی داعش لە ناوچەكەدا دەبێت. لەبارەی گرژییەكانی ئەم دواییەی نێوان سوپای توركیا و پەكەكە سەرۆك بارزانی نیگەرانیی خۆی لە پەرەسەندنی گرژییەكان نیشاندا و ئەوەی خستەڕوو كە داوا دەكات هەردوولا بگەڕێنەوە سەر مێزی گفتوگۆ و ئاشتی و، بە پێویستیشی زانی تەركیزی گشت لایەك لەسەر ڕووبەڕووبوونەوە و لەناوبردنی تیرۆریستانی داعش بێت.

لەبەشێكی دیكەی ئەم كۆبوونەوەیەدا فەرماندەی فەرماندەیی ناوەندیی هێزەكانی ئەمەریكا وێڕای ئاماژەدان بە ئازایەتی و لێهاتوویی پێشمەرگە ئەوەی دووپاتكردەوە كە سوپای ئەمەریكا لە هەموو هەنگاوێكدا پاڵپشتی هێزی پێشمەرگەی كوردستان دەبێت.

جێگەی ئاماژەپێكردنە لەم كۆبوونەوەیەدا مستەفا سەید قادر وەزیری پێشمەرگە و د. فواد حوسێن سەرۆكی دیوانی سەرۆكایەتیی هەرێم و ئەنوەر حاجی عوسمان بریكاری وەزارەتی پێشمەرگە و جەعفەر شێخ مستەفا و فەریق شێروان عەبدوڵڕەحمان و فەریق جەبار یاوەر ئەندامانی فەرماندەیی گشتیی هێزەكانی پاراستنی هەرێم و سەفین دزەیی گوتەبێژی حكوومەتی هەرێم ئامادە بوون.

دوایین هەواڵەکان

هەواڵی زیاتر لە تویتەر

راپۆرتە پڕ بینەرەکان

حالت های رنگی