هەرێمی کوردستان
سەرۆکی حکومەت پێشوازی لە باڵیۆزی سوید لە عێراق دەکات
ئەمڕۆ دووشەممە 6/5 مەسرور بارزانی سەرۆکی حکومەتی هەرێمی کوردستان، پێشوازی لە جێسیکا سڤاردسترۆم باڵیۆزی سوید لە عێراق کرد.
لە دیدارەکەدا گفتوگۆ لەبارەی بارودۆخی گشتیی عێراق و برەودان بە پەیوەندییەکانی هەرێمی کوردستان و سوید کرا.
سەبارەت بە پەیوەندیی لەگەڵ حکومەتی فیدراڵ، سەرۆکی حکومەت جەختی لە گرنگیی و پێویستی ڕێزگرتن لە ڕێککەوتننەکانی نێوان هەردوولا و دابینکردنی ماف و شایستە دارایی و دەستوورییەکانی هەرێمی کوردستان کردەوە .
لە تەوەرێکی دیکەی کۆبوونەوەکەدا ، گفتوگۆ لەبارەی دۆخی ناوخۆی هەرێمی کوردستان و گرنگیی ئەنجامدانی هەڵبژاردنی پەرلەمانی کوردستان کرا و سەرۆکی حکومەت دووپاتیکردەوە کە پێویستە هەڵبژاردن لە کاتی دیاریکراوی خۆی لەمساڵدا بکرێت .
باڵیۆزی سوید ئاماژەی بەوە دا کە سەڕەڕای گرفت و ئاستەنگەکان ، بەڵام خۆشبەختانە پرۆسەی ئاوەدانکردنەوە و گەشەپێدانی هەرێمی کوردستان و هەولێر بەتایبەتی بەردەوامە .
باشترکردنی دۆخی ئافرەتانی کوردستان و گرنگی ڕەخساندنی دەرفەتی یەکسان لە بەردەم ئافرەتان لە کایە جۆراجۆرەکاندا، تەوەرێکی دیکەی کۆبوونەوەکە بوو.
مەنسوور جیهانی: به‌همه‌ن قوبادی له فێستیڤاڵی نێوده‌وڵه‌تی فیلمی کان به جیهان ناسێندرا
"مەنسوور جیهانی" پەیامنێری سەربەخۆ و نێودەوڵەتی سینەما له وتووێژ له‌گه‌ڵ ته‌له‌ڤیزیۆنی "فڕانس ٢٤" France 24 گوتی: سینه‌ماکاری ناوداری کورد "به‌همه‌ن قوبادی" له فێستیڤاڵی نێوده‌وڵه‌تی فیلمی "کان" به سینەمای جیهان ناسێندرا.
"مەنسوور جیهانی" پەیامنێری سەربەخۆ و نێودەوڵەتی سینەما له وتووێژ له‌گه‌ڵ ته‌له‌ڤیزیۆنی "فڕانس ٢٤" France 24 فه‌ر‌‌نسا گوتی: فێستیڤاڵی نێوده‌وڵه‌تی فیلمی "کان" له وڵاتی فه‌ر‌‌نسا به ناونیشانی گرینگترین رووداوی سینه‌مای دنیا هه‌میشه گرینگییه‌کی تایبه‌تی به سینه‌مای کوردستان و ئێران داوه و پێگه‌یه‌کی تایبه‌تی بۆ ته‌رخان کردوون. به‌رچاوترین سینه‌ماکاری ئێرانی ڕه‌وانشاد "عه‌باس کیارۆسته‌می" به فیلمی سینه‌مایی "طعم گیلاس" واته "تامی گێلاس" به وه‌رگرتنی خه‌ڵاتی به‌نرخی چڵه‌خورمای زێڕین و ده‌رهێنه‌ری ناوداری کورد"به‌همه‌ن قوبادی" به فیلمی سینه‌مایی "کاتێک بۆ مه‌ستی ئه‌سپه‌کان" و به وه‌رگرتنی خه‌ڵاتی کامێڕای زێڕین و سینه‌ماکارانی به‌ناوبانگی ئێرانی له‌وانه؛ "ئه‌سغه‌ر فه‌رهادی"، "جه‌عفه‌ر په‌ناهی"، "محه‌مه‌د ڕه‌سووڵ ئۆف" و ... دوای به‌شداری له فێستیڤاڵی نێوده‌وڵه‌تی فیلمی "کان"ی فه‌ڕه‌نسا و وه‌رگرتنی خه‌ڵاتی به‌شه جۆراوجۆره پێشبڕکییه‌کان به سینەمای جیهان ناسێندران.
جیهانی له درێژه‌ی قسه‌کانیدا گوتی: هه‌موو ساڵیک، نوێترین به‌رهه‌می سینه‌ماکارانی به‌رچاوی ئێرانی بۆ به‌شداری له فێستیڤاڵی نێوده‌وڵه‌تی فیلمی "کان" ڕه‌وانه ده‌کرێن و بۆ یه‌که‌مین جار، هۆگران و لایه‌نگرانی هونه‌ری سینه‌ما، ڕۆژنامه‌نووسان، ڕخنه‌گران، نووسه‌ران و به گشتیی ستافی سینه‌مای جیهان له میانه‌ی ئه‌م ڕووداوه گرینگه سینه‌ماییه‌دا سه‌یری ئه‌م به‌رهه‌مانه ده‌که‌ن و له لایه‌ن ئه‌ندامانی لێژنه‌ی دادوه‌رانی به‌شه جۆراوجۆره‌کانه‌وه هه‌ڵده‌سه‌نگێندرێن و به وردی و به جوانی دادوه‌ری ده‌کرێن.
"مەنسوور جیهانی" له کۆتایی ئه‌م چاوپێکه‌وتنه‌دا جه‌ختی کرده‌وه: فێستیڤاڵی نێوده‌وڵه‌تی فیلمی "کان"ی فه‌ڕه‌نسا، یه‌که‌مین په‌نجه‌ره‌ی گرینگی سینه‌مایی له جیهاندایه که به‌ره‌وڕووی سینه‌مای کوردستان و ئێران ده‌کرێته‌وه و ئه‌م هاوکارییه گرینگ و پڕبایخه؛ وه‌کوو خوله‌کانی ڕابردوو، له خوله‌کانی داهاتووشدادرێژه‌ی ده‌بێت.
سه‌رۆكى هه‌رێمى كوردستان به‌شدارى له ڕێوڕه‌سمى ده‌ستبه‌كاربوونى سه‌رۆكى توركيادا كرد
ئێواره‌ى ئه‌مڕۆ شه‌ممه 2023/6/3 به‌ڕێز نێچيرڤان بارزانى، سه‌رۆكى هه‌رێمى كوردستان، له ئه‌نقه‌ره له‌گه‌ڵ ژماره‌يه‌كى به‌رچاوى سه‌رۆك و سه‌ركرده‌ى وڵاتان، به‌شدارى له ڕێوڕه‌سمى ده‌ستبه‌كاربوونى به‌ڕێز ڕه‌جه‌ب ته‌ييب ئه‌ردۆغان سه‌رۆكى توركيادا كرد.
دواى ڕێوڕه‌سمه‌كه‌ش سه‌رۆك نێچيرڤان بارزانى و ميوانانى باڵاى ڕێوڕه‌سمه‌كه، له كۆشكى سه‌رۆكايه‌تيى كۆمارى توركيا له ئه‌نقه‌ره، به‌شدارييان له ئێواره‌خوانێكدا كرد. ئه‌م ڕێوڕه‌سمانه دواى سوێندخواردنى ئه‌مڕۆى سه‌رۆك ئه‌ردۆغان له په‌رله‌مانى وڵاته‌كه‌ى بۆ خولێكى تازه‌ى سه‌رۆكايه‌تيى توركيا، به‌ڕێوه چوون.
سەرۆکی حکومەت پێشوازی لە شێخ خەلیفە بن تەحنون ئالنەهیان دەکات
ئەمڕۆ دووشەممە 5/29 مەسرور بارزانی سەرۆکی حکومەتی هەرێمی کوردستان، پێشوازی لە شێخ خەلیفە بن تەحنون بن محەمەد ئالنەهیان کرد.
لە دیدارێکدا کە ئەحمەد ئەلزاهری کونسولی گشتیی دەوڵەتی ئیمارات لە هەرێمی کوردستان ئامادەی بوو، گفتوگۆ لە بارەی پەرەپێدانی پەیوەندیی تایبەتی و بەهێزی نێوان هەرێمی کوردستان و میرنشینی یەکگرتووی عەرەبی ( ئیمارت ) کرا و جەخت لە پتەوکردنی هاریکاری و هەماهەنگیی نێوان هەردوولا لە بوارە جۆراوجۆەکاندا کرایەوە.
سه‌رۆك نێچيرڤان بارزانى پيرۆزبايى له سه‌رۆك ئه‌ردۆغان ده‌كات
ئێواره‌ى ئه‌مڕۆ چوارشه‌ممه 2023/5/31، به‌ڕێز نێچيرڤان بارزانى، سه‌رۆكى هه‌رێمى كوردستان، له په‌يوه‌ندييه‌كى ته‌له‌فۆنيدا پيرۆزبايى له به‌ڕێز ڕه‌جه‌ب ته‌ييب ئه‌ردۆغان كرد بۆ هه‌ڵبژاردنه‌وه‌ى به سه‌رۆكى كۆمارى توركيا.
سه‌رۆك نێچيرڤان بارزانى هه‌روه‌ها هيواى سه‌ركه‌وتنى بۆ سه‌رۆك ئه‌ردۆغان و گه‌ل و حكوومه‌تى توركيا خواست و ئاماده‌يى و خواستى هه‌رێمى كوردستانى بۆ بره‌ودان به په‌يوه‌ندييه‌كانى له‌گه‌ڵ توركيا له هه‌موو بواره‌كاندا ده‌ربڕى.
لاى خۆيه‌وه سه‌رۆك ئه‌ردۆغان وێڕاى سوپاس و پێزانين بۆ پيرۆزبايى و په‌يوه‌نديى به‌ڕێز سه‌رۆكى هه‌رێمى كوردستان و دووپاتكردنه‌وه‌ى خواستى وڵاته‌كه‌ى بۆ پته‌وكردنى زياترى په‌يوه‌ندييه‌كانى له‌گه‌ڵ عێراق و هه‌رێمى كوردستان، به فه‌رمى سه‌رۆك نێچيرڤان بارزانى بۆ ڕێوڕه‌سمى سوێندخوارنى له ئه‌نقه‌ره بانگهێشت كرد.
تاوتوێكردنى دۆخى ناوچه‌كه به‌گشتى و چه‌ند پرسێكى ديكه‌ى جێى بايه‌خى هاوبه‌ش، ته‌وه‌رێكى ديكه‌ى گفتوگۆى هه‌ردوولا بوو.
https://presidency.gov.krd/president-nechirvan-barzani-congratulates-president-erdogan-2/
سه‌رۆك نێچيرڤان بارزانى: خه‌ڵك له ناكۆكيى سياسى، بێزار و ماندووه
ئێواره‌ی ئه‌مڕۆ یه‌كشه‌ممه 28/5/2023 به ئاماده‌بوونی به‌ڕێزان جه‌نابى سه‌رۆك مه‌سعوود بارزانی، نێچيرڤان بارزانى، سه‌رۆكى هه‌رێمى كوردستان، مه‌سروور بارزانى، سه‌رۆك وه‌زيرانى هه‌رێمى كوردستان، محه‌مه‌د ئه‌لحه‌لبووسى، سه‌رۆكى ئه‌نجومه‌نى نوێنه‌رانى عێراق و ژماره‌یه‌ك له به‌رپرسانی حكوومی و حزبى و نوێنه‌ری وڵاتان و ئه‌كادیمی و كه‌سوكاری قوتابیان، ڕێوڕه‌سمی پێنجه‌مین خولی ده‌رچووانی زانكۆی ئه‌مه‌ریكیی كوردستان له دهۆك به‌ڕێوه‌چوو.
له رێوڕه‌سمه‌كه‌دا سه‌رۆك نێچیرڤان بارزانی وته‌یه‌كی پێشكه‌ش كرد، ئه‌مه ده‌قه‌كه‌یه‌تی:
به‌ڕێز جه‌نابى سه‌رۆك بارزانى،
به‌ڕێز جه‌نابی محه‌مه‌د حه‌لبووسی سه‌رۆكی په‌رله‌مانی عێراق
به‌ڕێز شێخ خه‌لیفه ته‌حنوون
خۆشحاڵین به ئاماده‌بوونتان له‌و ڕێوڕه‌سمه‌دا، زۆر به‌خێربێن.
كه‌سوكارى ئازيزى ده‌رچووان،
ئاماده‌بووانى به‌ڕێز..
ئێواره‌تان باش،
خۆشحاڵین كه له‌گه‌ڵ ئێوه‌ى به‌ڕێز له خولێكى تازه‌ى ده‌رچووانى زانكۆى ئه‌مه‌ريكيى كوردستان له دهۆك، به‌شدارين. به گه‌رمى پيرۆزبايى و ده‌ستخۆشى له ده‌رچووان ده‌كه‌م و هيواى سه‌ركه‌وتنى زياتريان بۆ ده‌خوازم.
پيرۆزبايى له دايكوباوك و خێزان و كه‌سوكارى ده‌رچووان و له مامۆستايان و سه‌رۆكايه‌تى و ده‌سته‌ى ئه‌ميندارنی زانكۆ ده‌كه‌م. ئێوه‌ش ئه‌ركێكى گه‌وره و پيرۆزتان به‌جێ گه‌ياند. ماندوو نه‌بن و ده‌ستتان خۆش بێت.
به‌ڕێزان..
ده‌رچوونى پۆلێكى ديكه‌ى گه‌نجانى كوردستان و عێراق، يان له هه‌ر شوێنێكى ديكه‌وه هاتبن، مايه‌ى شانازى و خۆشحاڵييه. ئێوه ده‌رچووانى خۆشه‌ويست، به زانست و زانينى تازه و سه‌رده‌ميانه پێگه‌يشتوون. ئێستا ئيتر ئاماده‌ن بۆ قۆناغى ديكه‌ى ژيان كه قۆناغى كار و خزمه‌تكردن و به‌شدارى و هاوبه‌شيى كاراتانه له پێشخستنى وڵات و له پێشخستنی كۆمه‌ڵگه‌دا.
وڵات چاوى له ئێوه‌يه كه ڕۆڵى خۆتان بگێڕن. هه‌ر يه‌كه و له بوارى خۆيدا داهێنان بكه‌ن و به بير و عه‌قڵى تازه و بنياتنه‌رانه، ده‌رفه‌تى كار بۆ خۆتان و ده‌روبه‌رتان دروست بكه‌ن. كارى سه‌ركه‌وتوو بكه‌ن بۆ به‌ره‌وپێشبردن و به‌هێزكردن و هه‌مه‌جۆركردنى ئابوورى.
بيرۆكه و ڕوانگه‌ى سه‌ركه‌وتووى زانستى و پيشه‌يى پێشكه‌ش بكه‌ن، بۆ دۆزينه‌وه‌ى چاره‌سه‌ر بۆ كێشه و قه‌يرانه‌كانى وڵاته‌كه‌مان له هه‌موو بواره‌كاندا. بۆ باشتركردنى ئاستى ژيان و كۆمه‌ڵگه و په‌ڕينه‌وه بۆ داهاتوويه‌كى باشتر.
ئێوه ده‌بێ له‌گه‌ڵ هاوكاران و هاوتاكانتان له زانكۆكانى ديكه‌ى كوردستان، له عێراق و جيهان، پێكه‌وه كار و هه‌ماهه‌نگى بكه‌ن. سوود له زانست و زانياريى يه‌كتر ببينن. به بيرۆكه‌ى داهێنانه‌رانه و پێشنيار و ڕه‌خنه‌ى بنياتنه‌رانه، پردێكى په‌يوه‌ندى له‌گه‌ڵ ده‌سه‌ڵاتداران و به‌ڕێوه‌به‌رايه‌تيى وڵاتدا دروست بكه‌ن. به‌شدار و هاوبه‌ش بن له به‌ڕێوه‌بردنێكى باشترى وڵاتدا، تا هه‌موومان پێكه‌وه بتوانين كوردستانێكى به‌هێزتر و داهاتوويه‌كى باشتر بۆ نه‌وه‌كانمان بنيات بنێين.
ئێوه و نه‌وه‌ى تازه‌ى كوردستان، ده‌بێ ئه‌وپه‌ڕى سوود له ته‌كنه‌لۆژيا و پێشكه‌وتنى زانستيى سه‌رده‌مییانه ببينن. ده‌توانن كاركردن له دووره، له ماڵ، له‌گه‌ڵ كۆمپانياكان و كه‌رتى تايبه‌ت و گشتى له هه‌رێمى كوردستان و عێراق و ته‌نانه‌ت له ده‌ره‌وه‌ى وڵاتيش په‌ره‌ی پێبده‌ن و جگه له دۆزينه‌وه‌ى ده‌رفه‌تى كار، له‌و ڕێگه‌يه‌وه ببنه باڵيۆزێكى باش بۆ وڵاته‌كه‌تان له جيهاندا.
كار، ئه‌رك و به‌رپرسياريه‌تييه. ئێوه كه ده‌ست به كار ده‌كه‌ن، ده‌بێ به‌رپرسانه و به پێى ئيتيكى كار، به شێوه‌يه‌كى پيشه‌يى هه‌موو تواناكانتان بخه‌نه خزمه‌تى كاره‌وه. داهێنانى تێدا بكه‌ن و پێشخستن و سه‌ركه‌وتنى، مسۆگه‌ر بكه‌ن. بۆ ئه‌وه‌ش ده‌بێ هه‌ميشه به عه‌قل و بيرى كراوه كار بكه‌ن و به‌رده‌وام گۆڕانگارى بۆ باشتر و باشتر دروست بكه‌ن.
نموونه‌ى سه‌ركه‌وتووى هه‌ندێ له ده‌رچووانى زانكۆ و په‌يمانگاكان هه‌ن. كار و بزنسى خۆيان دامه‌زراندووه، ده‌رفه‌تى كاريان بۆ خه‌ڵكى ديكه‌ش دروست كردووه. ئه‌مه جێگه‌ى ئومێد و خۆشحاڵيی ئێمه‌یه. شانازى ده‌كه‌ين كه ده‌بينين گه‌نجانى ئێمه به خواست و ئيراده‌يه‌كى به‌رزه‌وه هه‌وڵ ده‌ده‌ن و له هه‌ر بوارێكى كار و خزمه‌تدا بێت، خۆيان ده‌سه‌لمێنن. هه‌ست به به‌رپرسياريه‌تى و خاوه‌نداريه‌تى ده‌كه‌ن.
ژيان هه‌ميشه له پێشكه‌وتن و گۆڕاندايه. تا ژيان هه‌يه، پێويسته به‌رده‌وام فێر ببيت و له‌گه‌ڵ دوايين و تازه‌ترين پێشكه‌وتنه‌كانى سه‌رده‌مدا، ئه‌پده‌ت بكرێین. هه‌ر له‌م ڕوانگه‌يه‌وه، وه‌ك پێويستييه‌كى زۆر گرنگ و له‌پێش، ده‌بێ له هه‌رێمى كوردستان هه‌ميشه بايه‌خ و گرنگيى تايبه‌ت به كواليتى و ئاستى زانست و نوێكردنه‌وه‌ى پرۆگرام و به‌رنامه‌ى خوێندن و فێركردن بدرێت. ده‌بێ هه‌ميشه له‌گه‌ڵ پێشكه‌وتنه‌كاندا بڕۆين، بۆ ئه‌وه‌ى بتوانين به كۆمه‌ڵگه‌يه‌كى زيندوو بمێنينه‌وه و به كاروانى جيهانى پێشكه‌وتوو ڕابگه‌ين.
ده‌چووانى خۆشه‌ويست،
دڵنيام هه‌ر يه‌كه‌تان ده‌يان بيرۆكه‌ى جياى هه‌يه بۆ هه‌ر يه‌كێك له بواره‌كانى ژيان. بۆ ئابوورى، بۆ كار، بۆ سياسه‌ت، بۆ به‌ڕێوه‌بردن. هه‌ر يه‌كه‌تان خه‌ونى هه‌يه له بوارى خۆيدا ببێته ژماره‌يه‌كى ديار. ده‌مه‌وێ دڵنياتان بكه‌مه‌وه، به هه‌وڵ و كۆڵنه‌دان و سووربوونتان له‌سه‌ر سه‌ركه‌وتن، چۆن ئه‌مڕۆ سه‌ركه‌وتن و زانكۆتان ته‌واو كرد، ئاواش به هه‌مان گيانى سووربوون و كۆڵنه‌دان و هه‌وڵدان، ده‌توانن بيرۆكه و خه‌ونه‌كانتان بكه‌نه ڕاستى.
بۆيه لێره‌وه به ئێوه و به هه‌موو ده‌رچووانى زانكۆ و په‌يمانگاكانى كوردستان ده‌ڵێم: ته‌نيا پشت به كاركردن له كه‌رتى گشتيدا مه‌به‌ستن. وه‌ك چۆن له خوێندندا خۆتان سه‌لماند و سه‌ركه‌وتن، ئاواش ده‌توانن بۆ دروستكردنى ده‌رفه‌تى كار و داهێنان، خۆتان بسه‌لمێنن. بۆ ئه‌مه ده‌بێ هاريكارى و هه‌ماهه‌نگى له‌گه‌ڵ بازاڕ و كه‌رتى تايبه‌تدا بكه‌ن و به دڵنیاییشه‌وه حكوومه‌تی هه‌رێمی كوردستان هاوكار و پشتيوانتان بێت.
ئاماده‌بووانى به‌ڕێز،
هه‌موو لايه‌ك ئاگادارن كه دواى ڕێككه‌وتنى هاوپه‌يمانيى به‌ڕێوبردنى ده‌وڵه‌ت بۆ دامه‌زراندنى حكوومه‌تى عێراقى فيدراڵ، جۆرێك له سه‌قامگيريى سياسى له وڵات هاتووه‌ته ئاراوه. گه‌لى عێراق به گشتى و دۆستان له جيهان، به خۆشحاڵى و ئومێده‌وه له لێكه‌وته ئه‌رێنييه‌كانى ئه‌و ڕێككه‌وتنه ده‌ڕوانن، بۆ داهاتوويه‌كى باشتر، هيوا و ئومێديان له‌سه‌ر بنيات ناوه.
مايه‌ى نيگه‌رانييه‌كى قووڵ و بێ ئومێدييه ئه‌گه‌ر هه‌ندێ لايه‌ن هه‌وڵ بده‌ن ته‌گه‌ره بخه‌نه به‌رده‌م ڕێككه‌وتنه‌كان و لێكگه‌يشتنى نێوان لايه‌نه‌كان. ئه‌م جۆره مامه‌ڵه‌يه و هه‌وڵدان بۆ پێشێلكردنى مافه ده‌ستوورييه‌كانى هه‌رێمى كوردستان، هه‌رگيز قبووڵكراو نييه و هيچ سوودێك به هيچ لايه‌ك و به عێراق و سه‌قامگيريى وڵات ناگه‌يه‌نێت. ئه‌مه ته‌نيا دووباره‌كردنه‌وه‌ى ئه‌زموونێكى شكستخواردووه كه هه‌ميشه به زيانى عێراق و هه‌موو پێكهاته‌كانى عێراق، ته‌واو بووه. بۆيه لێره‌وه داوا له هه‌موو لايه‌ك ده‌كه‌م پابه‌ندى ڕێككه‌وتنه‌كان بن و پرۆسه و سه‌قامگيريى سياسيى وڵات بپارێزن.
ڕێگه‌ى ڕاست و دروست بۆ تێپه‌راندنى كێشه و قه‌يرانه‌كان له عێراق، پابه‌ندبوونه به ڕێككه‌وتن و لێكگه‌يشتنى نێوان لايه‌نه‌كان به‌گشتى و لايه‌نه‌كانى هاوپه‌يمانيى به‌ڕێوه‌بردنى ده‌وڵه‌ت به شێوه‌یه‌كی تايبه‌تى. ده‌بێ عێراق كۆكه‌ره‌وه‌ى هه‌موومان بێت كه تيايدا هه‌موو مافه ده‌ستوورييه‌كانى ته‌واوى پێكهاته‌كان پارێزراو و ڕێزلێگيراو بن. مێژوو ئه‌مه‌ى سه‌لماندووه و ده‌بێ هه‌موومان په‌ند و وانه له ڕابردوو وه‌رگرين.
چ له عێراق و چ له هه‌رێمى كوردستان، خه‌ڵك ئيتر له كێشه و ناكۆكيى سياسى، بێزار و ماندوو بووه. هه‌موومان ده‌بێ به خۆماندا بچينه‌وه و به‌رژه‌وه‌نديى باڵاى وڵات، بخه‌ينه سه‌رووى هه‌موو شتێكه‌وه. ئێمه ته‌نيا و ته‌نيا به يه‌كڕيزى و يه‌كترقبووڵكردن و ته‌بايى و پێكه‌وه ده‌توانين پارێزگارى له قه‌واره‌ى فيدراڵى و مافه ده‌ستوورييه‌كانى هه‌رێمى كوردستان بكه‌ين و به‌ره‌و داهاتوويه‌كى باشتر، هه‌نگاو بنێين.
له كۆتاييدا، ده‌رچووانى خۆشه‌ويست، دووباره پيرۆزباييتان لێده‌كه‌م، له ژيان و كار و ئه‌ركى داهاتوو، هيواى سه‌ركه‌وتنى زياترتان بۆ ده‌خوازم. ئێوه و هه‌موو گه‌نجانى ديكه‌ى كوردستان كه له هه‌ر زانكۆیه‌ك و په‌يمانگه‌يه‌ك ده‌رده‌چن، مايه‌ى شانازى و سه‌ركرده و ئومێدى داهاتووى وڵاتن.
ئيواره‌تان باش و كاتێكى خۆش بۆ هه‌موو لايه‌كتان ده‌خوازم.
به‌خێربێن.
زۆر سوپاس.
دوایین هەواڵەکان
- نوێنەری حکومەتی هەرێم لە ئێران: سەردانەکەی پزیشکیان ئاماژەیە بۆ گرنگیدانی ئێران بە هەرێمی کوردستان
- هه‌رێمى كوردستان و ئێران جهخت له بره‌ودان به پهيوهندييهكانيان دهكهنهوه
- سهرۆک نێچیرڤان بارزانی: سەردانی سەرۆک کۆماری ئێران مێژوویی بوو
- نازم دەباغ له وتووێژ له‌گه‌ڵ ئاژانسی ئیرنا: مەسعوود پزشکیان سەردانی هەولێر دەکات
- نازم دەباغ: کاتی سەردانی پزیشکیان بۆ عێراق دیار نییە
- «سەلام رشدی» له‌گه‌ڵ شاندی یهکێتی هاورده و ناردنکارانی لقی ههولێر کۆبۆوه
- سه‌رۆك نێچيرڤان بارزانى: هه‌ميشه پشتيوانى و بهرگرى له مافهكانى ئێزدييان ده‌كه‌ين
- سهرۆک نێچیرڤان بارزانی له‌گه‌ڵ باڵیۆزی یهکێتیی ئهورووپا کۆبووهوه
- سه‌رۆك نێچيرڤان بارزانى له‌گه‌ڵ باڵيۆزى نهمسا كۆبووهوه
- سه‌رۆك نێچيرڤان بارزانى سوپاسى جهنهرال ڤاول ده‌كات