هەرێمی کوردستان

   هەرێمی کوردستان

فەلاح مستەفا پێشوازی لە خاتوو سێسل برایە باڵیۆزی تازەی نەرویج بۆ عێراق كرد

لە یەكەم سەردانیدا بۆ هەرێمی كوردستان خاتوو سێسل برایە باڵیۆزی نوێی نەرویج لە عێراق خۆشحاڵی خۆی بەرامبەر پەرەسەندنەكانی هەرێمی كوردستان دەربڕی و لە لێدوانێكی تایبەتدا بۆ ماڵپەڕی فەرمی حكومەتی هەرێمی كوردستان گووتی: زۆر سەرسامم بەو پەرەسەندنانەی كەوا تائێستا بینیومە كە زۆر دڵخۆشكەرەو ئەو هەموو ووزەو بەرفراوانی چالاكی ئابووری لە سەرانسەری هەرێم دەبینم و ئومێدی بەرەپێشچوون و سەركەوتنتان بۆ دەخوازم.

ئەمڕۆ فەلاح مستەفا بەرپرسی پەیوەندیەكانی دەرەوەی حكومەت بە ئامادەبوونی خاتوو سهام جەبەلی یاریدەدەری بەرپرسی فەرمانگەی پەیوەندیەكانی دەرەوە پێشوازی كرد لە خاتوو سێسل برایە باڵیۆزی نوێی نەرویج لە عێراق و بەڕێز ئیگڵ تۆرساس جێگری باڵیۆزو راوێژكاری باڵیۆزخانە بۆ كاروباری عێراق.

لە دیدارەكەدا فەلاح مستەفا پیرۆزبایی لە خاتوو سێسل كرد بە بۆنەی دەست بەكاربوونیان وەك باڵیۆزی وڵاتەكی بۆ عێراق، هاوكات وێڕای ئومێدی سەركەوتن لە كارەكانیاندا، ئامادەیی پشتیوانی و هەماهەنگی لەگەڵیاندا دەربڕی بۆ مەبەستی پەرەپێدانی پەیوەندیە دووقۆڵیەكانی نێوان هەرێمی كوردستان و نەرویج.

لای خۆیەوە باڵیۆز وێڕای سوپاس گوزاری بۆ پێشوازی كردنیان، خۆشحاڵی خۆی بۆ یەكەم سەردانی بۆ هەرێمی كوردستان دەربڕی. هاوكات خۆشحاڵبوو بە ئاستی پەیوەندی و كۆبوونەوەكانیان لەگەڵ بەرپرسانی حكومەتی هەرێمی كوردستان.

لە دیدارەكەدا باس لە پەرەپێدانی پەیوەندیە دووقۆڵیەكانی نێوان هەرێمی كوردستان و نەرویج كرا. لەم رووەشەوە باس لە ژینگەی سەقامگیری هەرێم لەڕووی ئاسایش و وەبەرهێنانەوە كرا كە دەرفەتێكە بۆ كۆمپانیاكانی نەرویج بۆ كاركردن لە هەرێم و سوود وەرگرتن لە دەرفەتەكانی وەبەرهێنان و بۆ بەشداربوون لە پرۆسەی ئاوەدانكردنەوەی هەرێمدا. بۆ ئەم مەبەستەش باس لە كردنەوەی نوێنەرایەتی وڵاتی نەرویج لە هەرێم كرا كە كاریگەری دەبێت لەسەر ئاسۆی بەرەوپێشچوونی ئەم پەیوەندیانە.

هەرلە دیدارەكەدا باس لە بارودۆخی سیاسی و ئابووری هەرێمی كوردستان كراو تیشك خرایەسەر پرۆسەی پێكهێنانی كابینەی نوێی حكومەتی هەرێم. هاوكات باس لە سروشتی پەیوەندیەكانی نێوان حكومەتی هەرێم و حكومەتی فیدڕاڵی عێراق كراو لەم بارەیەوە بەرپرسی پەیوەندیەكانی دەرەوە روونی كردەوە حكومەتی هەرێم بەپێی دەستور كاروبارەكانی خۆی و پەیوەندیەكانی بەڕێوەدەبات، بۆیە لە پێشكەوتنەكانی بەردەوام دەبێت.

پاشان بەرپرسی پەیوەندیەكانی دەرەوە باسی لە بارودۆخی ئاسایش لە بەشەكانی دیكەی عێراق كردو هەروەها باسی لە كاریگەریەكانی توندوتیژیەكان ئەو ناوچانە لەسەر هەرێم و ئاوارەبوونی خەڵكی ئەو ناوچانە كرد كە بەو هۆیەوە روویان لە هەرێمی كوردستان كردووە. هاوكات باسی هەڵبژاردنی ئەنجومەنی پارێزگاكان لە هەرێم و هەروەها هەڵبژاردنی پەرلەمانی عێراق كرا كە بڕیارە لە كۆتایی ئەم مانگە ئەنجام بدرێت.

لە بەشێكی دیكەی دیدارەكەدا باس لە قەیرانی سوریا و بەردەوامی شەپۆلی هاتنی ئەو ئاوارانە بۆ هەرێمی كوردستان و كاریگەریەكانی لەسەر هەرێم لەڕووی مرۆیی و ئابووریەوە كرا. هەربۆیە جەخت كرایەوە لەسەر زیادكردنی هاوكاریە نێودەوڵەتیەكان بۆ كەمكردنەوەی كێشەو گرفتەكانی ئەم ئاوارانە.
 

  • پێنج شەممە, 03 نیسان 2014

 

 

 

 

فەلاح مستەفا لەگەڵ ئێرنستۆ برام راوێژكاری سیاسەتی ستراتیژی لە وەزارەتی دەرەوەی هۆڵەندا كۆبووەوە

لەمیانەی سەردانەكەیدا بۆ عێراق و هەرێمی كوردستان ئێرنستۆ برام راوێژكاری سیاسەتی ستراتیژی لە بەشی رۆژهەڵاتی ناوەڕاست و باكوری ئەفریقا لە وەزارەتی دەرەوەی هۆڵەندا و فەلاح مستەفا بەرپرسی پەیوەندیەكانی دەرەوەی حكومەتی هەرێم كۆبووەنەوە.

 
،ئێرنستۆ برام وێڕای دەربڕینی خۆشحاڵی خۆی بۆ ئەوەی كە جارێكی دیكە سەردانی هەرێمی كوردستان دەكاتەوە  گووتیشی كە گۆڕانكاری و پێشکەوتنەکان لە هەرێم دەبینێت. لای خۆشیەوە فەلاح مستەفا گووتی ئەم سەردانە دەرفەتێكە بۆ لە نزیکەوە بینینی دۆخی سەقامگیری هەرێم و ئەو پێشكەوتنانەی لە بواری سیاسی و ئابووری لەم ناوچەیەدا بەدەست هاتوون کە ئەمەش گرینگە بۆ هاندان و هاتنی زیاتری بازرگانان و كۆمپانیاكانی هۆڵەندا بۆ هەرێم تاوەكو لە پرۆژەكانی وەبەرهێنان و پرۆسەی ئاوەدانكردنەوە بەشداربن.
 
دواتر تیشك خرایەسەر پەرەپێدانی پەیوەندیە دووقۆڵیەكانی نێوان هەردوولاو لەم رووەشەوە خۆشحاڵی خۆیان بۆ بەرەوپێشچوونی ئاستی پەیوەندیەكانی نێوان هەرێمی كوردستان و هۆڵەندا دەربڕی، لای خۆشیەوە راوێژكاری سیاسەتی ستراتیژی لە وەزارەتی دەرەوەی هۆڵەندا سوپاسی حكومەتی هەرێمی كوردستانی كرد بۆ هەماهەنگی كردنیان لەگەڵ نوێنەرایەتی وڵاتەكەی لە هەرێم. هاوكات جەخت لەسەر پەرەپێدان و ئاسۆی ئەو پەیوەندیانە لە بوارە جیاجیاكانی سیاسی و ئابوری و بازرگانی و كەلتوری لە نێوان هەردوولا كرایەوە.
 
هەر لە دیدارەكەدا رەوشی سیاسی و پرۆسەی پێکهێنانی کابینەی نوێی حکومەت و پێشكەوتنەكانی هەرێمی كوردستان لە بوارە جیاجیاكاندا تیشكیان خرایەسەرو هاوكات باس لە هەڵبژاردنی ئەنجومەنی پارێزگاكان لە هەرێم و هەڵبژاردنی ئەنجومەنی نوێنەرانی عێراق كرا كە بڕیارە لە كۆتایی ئەم مانگە ئەنجام بدرێن. لەلایەكی دیكەشەوە باس لە كێشەو پرسە هەڵواسراوەكانی نێوان هەولێرو بەغدا كراو هەروەها هەڵوێستی حكومەتی هەرێم بۆ چارەسەر كردنیان بە لێك تێگەیشتن و بەپێی دەستور روونكرایەوە.
 
پاشان باسی پەیوەندیەكانی حكومەتی هەرێم لەگەڵ وڵاتانی دراوسێ‌ و كۆمەڵگای نێودەوڵەتی كرا. لەم بارەیەشەوە فەلاح مستەفا روونی كردەوە كە حكومەتی هەرێمی كوردستان لە هەوڵی بەردەوامدایە بۆ پەرەپێدانی لەگەڵ كۆمەڵگای نێودەوڵەتی و لەم رووەشەوە جەخت دەكاتەوە لەسەر پەرەپێدانی پەیوەندیە دووقۆڵیەكان لەسەر بنەمای لێك تێگەیشتن و بەرژەوەندی هاوبەش.
 
لە لایەكی دیكەشەوە بارودۆخی ناوخۆیی عێراق لەڕووی سیاسی و ئاسایش تاوتوێ‌ كرا. هاوكات تیشك خرایەسەر دوایین پەرەسەندنەكانی رۆژئاوایی عێراق و هاتنی خەڵكی ئەو ناوچانە بە هۆی توندوتیژیەكانەوە بۆ هەرێم و كاریەگەریان لەسەر دۆخی ئابووری و مرۆیی هەرێمی كوردستان.
 
هەردوولا بیروڕاكانیان دەربارەی قەیرانی سوریا ئاڵوگۆڕ كردو تیشكیان خستەسەر كاریگەریەكانی ئەو قەیرانە لەسەر وڵاتانی دراوسێی سوریاو هەروەها دەرهاویشتەكانی ئەو قەیرانە لەسەر تەواوی ناوچەكە لەڕووی سیاسی و ئاسایش و مرۆییەوە باسیان لێوەكرا. لای خۆشیەوە بەرپرسی پەیوەندیەكانی دەرەوە گووتی كە حكومەتی هەرێم پێویستی بە هاوكاری زیاتری كۆمەڵگای نێودەوڵەتی هەیە بۆ یارمەتیدانی ئاوارەكانی سووریا كە بەشێوەیەكی بەردەوام روو لە هەرێمی كوردستان دەكەن

 

  • هەینی, 04 نیسان 2014

 

 

 

لە هەولێر فەلاح مستەفا بەشداری لە رۆژی خاكی فەڵەستینی كرد

ئەمڕۆ كونسوڵگەری گشتی فەڵەستین لە هەرێمی كوردستان بە ئامادەبوونی فەلاح مستەفا بەرپرسی پەیوەندیەكانی دەرەوەی حكومەت و دبلۆماتكارانی وڵاتانی عەرەبی لە هەولێر و كارمەندانی كونسوڵگەریەكەیان و رەوەندی رەوەندی فەڵەستینی لە هەولێر مەراسیمێكی بۆ یادكردنەوەی رۆژی خاكی فەڵەستینی رێكخست.

لە وتەیەكدا باڵوێز نەزمی حەزوری كونسوڵی گشتی فەڵەستین لە هەرێم دوای بەخێرهێنانی ئامادەبووان، گووتی گەلی فەڵەستین 30ی ئازاری هەموو ساڵێك ئاهەنگی رۆژی خاك دەگێڕێت و ئەم رۆژەشی بە رۆژی نیشتمانی ناوبرد.

پاشان سوپاسی خۆی پێشكەش بە گەل و حكومەتی هەرێمی كوردستان كرد بۆ پشتیوانی و هاوسۆزی بەردەوامیان بۆ گەلی فەڵەستین. هاوكات سوپاسی جەنابی سەرۆكی هەرێمی كوردستان و بەڕێز سەرۆكی حكومەتی هەرێمی كرد بۆ پشتیوانی كردنی گەلی فەڵەستین و گووتیشی ئێمە شانازی بە بوونمان لێرە دەكەین. پاشان سوپاسی بەرپرسی فەرمانگەی پەیوەندیەكانی دەرەوەی كرد بۆ هەڵوێستەكانی و بۆ پاڵپشتی بەردەوامیان بۆ ئەنجامدانی كارو چالاكیەكانیان.

دواتر فەلاح مستەفا بەم بۆنەیەوە وتەیەكی بەناوی حكومەتی هەرێم پێشكەش كردو سوپاسی كونسوڵگەری گشتی فەڵەستینی لە هەولێر كرد بۆ بانگهێشت كردنیان بۆ بەشداری كردن لەو یادكردنەوەیەدا. هەر بەم بۆنەیەشەوە پشتیوانی گەل و حكومەتی هەرێمی كوردستانی بۆ گەلی فەڵەستین دووپاتكردەوەو جەختی كردەوە لەسەر ئەوەی كە گەلی كوردستان زۆر بەباشی لە ئازارەكانی گەلی فەڵەستین تێدەگات. هاوكات هیوای بەدیهێنانی ئاواتەكانیان خواست بۆ بەدەستهێنانی ئامانجە شەرعیەكانیان بەپێی بڕیارە نێودەوڵەتیەكان بۆ چارەسەركردنی پرسەكەیان كە خۆی لە دامەزراندنی دوو دەوڵەتدا دەبینێتەوە.

بەرپرسی پەیوەندیەكانی دەرەوە گووتی گەلی كوردستان پشتیوانتان دەبێت بۆ بەدەست هێنانی مافەكانتان و پێویستە وەڵاممان بۆ هەر ستەمێك بۆنیادنان و گرینگی دان بێت بە خاك و ژینگە.  هەربۆیە هەڵبژاردنی داری زەیتون و چاندنی گوزارشتە لە ئاشتی كە دروشمی خەباتی گەلی كورد بووە لەكاتی شۆڕشەكان و هەروەها هەڵبژاردنی ئاشتی بووە لەكاتی گفتوگۆكاندا. گووتیشی گەلی فەلەستین دەتوانن لەڕێگەی گفتوگۆكانەوە بە ئامانجەكانیان بگەن و پێویستە لەسەر كۆمەڵگای نێودەوڵەتی بەردەوام بێت لە كار كردن بۆ سەرخستنی گفتوگۆكان، چونكە ئێمە كە لە سەدەی بیست و یەكدا دەژین نابێت گەلێك هەبێت لە مافەكانی خۆی بێبەش بێت. لەكۆتایی وتارەكەشیدا بەرپرسی پەیوەندیەكانی دەرەوە پشتیوانی بۆ گەلی فەڵەستین دوپات كردەوە.

هەر لەم بۆنەیەداو دوای خوێندنەوەی وتارەكان، فەلاح مستەفا و نەزمی حەزوری بە یاوەری هەریەك لە كونسوڵی میسرو گونسوڵی گشتی ئوردن و كونسوڵی گشتی ئیمارات لە هەولێرو كارمەندانی كونسوڵگەری گشتی فەڵەستین لە هەرێم و رەوەندی فەڵەستینی، وەك پەیامێك بۆ ئاشتی، لە گۆڕەپانی كونسوڵگەری گشتی فەڵەستین لە هەولێر نەمامێكی زەیتون چێنرا.

هەر لە مەراسیمەكەدا چەند پەخشان و هۆنراوەو هۆزان بە بۆنەی رۆژی خاكی فەڵستینی پێشكەش كران.
 

 

  • هەینی, 04 نیسان 2014

 

 

 

 

 

 

 

 

 

فەلاح مستەفا لەگەڵ سەرۆكی گرووپی سۆشیالست و دیموكراتەكان لە پەرلەمانی ئەوروپا كۆبووەوە

ئەمڕۆ فەلاح مستەفا بەرپرسی پەیوەندیەكانی دەرەوەی حكومەت بە ئامادەبوونی خاتوو سهام جەبەلی یاریدەدەری بەرپرسی فەرمانگەی پەیوەندیەکانی دەرەوە لەگەڵ هانێز سۆبۆدا سەرۆكی گرووپی سۆشیالست و دیموكراتەكان لە پەرلەمانی ئەوروپا بە یاوەری خاتوو سیلین بایر راوێژكاری سیاسی و وتەبێژی سەرۆكایەتی پەرلەمانی ئەوروپا كۆبووەوە.

بەرپرسی پەیوەندیەكانی دەرەوە خۆشحاڵی خۆی بۆ ئەنجامدانی ئەم سەردانە لە لایەن هانێز سۆبۆدا سەرۆكی گرووپی سۆشیالیست و دیموكراتەكان لە پەرلەمانی ئەوروپا بۆ هەرێمی كوردستان دەربڕی و بە دەرەفەتێكی باشی زانی بۆ لە نزیكەوە ئاگاداربوون لە پەرەسەندن و پێشكەوتنەكانی هەرێمی كوردستان. پاشان تیشكی خستەسەر بارودۆخی سیاسی و ئابووری لە هەرێمی كوردستان و ئاماژەی بەو بەرەوپێشچوونانە كرد كە لە هەرێم بەدی هاتوون، هاوكات باسی لە تێڕوانینەكانی حكومەت بۆ پێشكەوتنی زیاترو ئایندەی هەرێمی كوردستان كرد.

دواتر هەردوولا گفتوگۆیان دەربارەی پەیوەندیەكانی نێوان هەولێرو بەغدا كردو باس لەو ئاستەنگانە كرا كە دێنە بەردەم چەسپاندنی سیستەمی فیدڕاڵی لە عێراق. فەلاح مستەفا گووتی لە هەوڵ و كاری بەردەوامدان بۆ جێبەجێ كردنی بڕگەو مادە دەستوریەكان و مسۆگەركردنی هاوبەشی راستەقینەو بۆ چەسپاندنی سیستەمێكی فیدڕاڵی دیموكراتی فرەیی.

هەروەها گووتی بایەخی تەواو دەدەین بە فراوانكردنی پەیوەندیەكان لەگەڵ كۆمەڵگای نێودەودەڵەتی لەناویشیدا بە گرنگیەوە لە ئاسۆی پەیوەندیەكان لەگەڵ یەكێتی ئەوروپا دەڕوانین. گووتیشی خوازیارن یەكێتی ئەوروپا نوێنەرایەتی خۆی لە هەرێمی كوردستان بكاتەوە بۆ هاوكاری و پشتیوانی كردن لە پێشكەوتنەكان لەڕووی سیاسی و ئابووری و كۆمەڵایەتی.

هەر لە دیدارەكەدا بەرپرسی پەیوەندیەكانی دەرەوە باسی لە پەیوەندیەكانی حكومەتی هەرێم لەگەڵ ووڵاتانی جیهان بە تایبەتی وڵاتانی دراوسێ كردو گووتی حكومەتی هەرێم گرینگی تەواو بە بەرەوپێشبردنی پەیوەندیەكانی لەگەڵ وڵاتانی دراوسێی دەدات لەسەر بنەمای رێزگرتن لە یەكترو بەرژەوەندی هاوبەش.

فەلاح مستەفا باسی لە قەیرانی سوریاو كاریگەریەكانی لەسەر هەرێمی كوردستان لەڕووی سیاسی و ئاسایش و مرۆییەوە كرد. هاوكات تیشكی خستەسەر ژمارەو پێداویستی ئاوارەكان لە هەرێم و داوای لە كۆمەڵگەی نێودەوڵەتی كرد كە یارمەتی زیاتری ئەم ئاوارانە بدەن بۆ كەمكردنەوەی كێشەو گرفتەكانیان.

 

 

 

 

 

عیماد ئەحمەد لەگەڵ دەستەی هەڵبژاردنەكانی هەرێمی كوردستان كۆبوەوە

عیماد ئەحمەد رایگەیاند وەكو هەرێمی كوردستان بەگرنگیەوە لەهەڵبژاردنەكانی 30/4 دەڕوانین بەئاراستەی بەرقەراركردنی زیاتری دیموكراسی و چەسپاندنی تەواوی مافە دەستورەیەكانمان لەعیراق و گەشەپێدانی زیاتری هەرێمی كوردستان كەببێتە نمونەیەكی گەشەسەندوی ناوچەكە لەهەموو بوارەكاندا، هەروا تەئكیدیشی كردەوە بۆ زەمینە خۆشكردن لەبەردەم هەڵبژاردنێكی پاك و ئازاد كەتەواوی ئەوانەی مافی دەنگدانیان هەیە بەئازادی دەنگ بدەن، حكومەتی هەرێم بەبێ لایەنی لەگەڵ كۆمسیۆنی باڵای هەڵبژاردنەكان هاوكار و پشتیوان دەبێت، دواشی كرد هەموو لیست و قەوارە سیاسیەكان لەكەشێكی ئارام و دور لەتوندوتیژی و بەپێی قانون و رێنمایەكان هەڵمەتی هەڵبژاردن بەڕێوە ببەن و بیكەنە كەرنەڤاڵێكی نیشتمانی.


ئەم لێدوانەی  عیماد ئەحمەد جێگری سەرۆكی حكومەتی هەرێمی كوردستان لەمیانەی كۆبونەوەیەكدا هات لەگەڵ  دەستەی هەڵبژاردنەكانی هەرێمی كوردستانی كۆمسیۆنی باڵای سەربەخۆی هەڵبژاردنەكانی عیراق كەئەمڕۆ  لە تەلاری ئەنجومەنی وەزیران بەڕێوەچوو سەبارەت بەئامادەكاریەكانی هەڵبژاردنی ئەنجومەنی نوێنەرانی عیراق و ئەنجومەنی پارێزگاكانی هەرێم.


سەرەتا بەڕێوەبەرانی گشتی دەستەی هەڵبژاردنەكانی هەرێمی كوردستان  رونكردنەوەی پێویستیان لەبارەی ئامادەكاری پڕۆسەكە خستەڕوو  و ئاماژەیان بەوەكرد كەئەمجارە لەرێگەی كارتی دەنگدانەوە هاوڵاتیان دەنگی خۆیان دەدەن، بۆیە پرۆسەكە جیاوازدەبێت لەهەڵبژاردنەكانی پێشوو، بۆ ئاسكاری و باش بەڕێوەچوونی هەڵبژاردنەكانیش كۆمسیۆنی باڵا ئامادەكاری پێویستیان كردوە كەهاووڵاتیان بەئاسانی دەنگی خۆیان بدەن، هەروا باسیان لەوەشكرد كەتەنیا لەكوردستان هەردوو هەڵبژاردنی ئەنجومەنی نوێنەرانی عیراق و ئەنجومەنی پارێزگاكان  بەڕێوە دەچێت بەڵام بەبێ لەبەرچاوگرتنی ئەو جیاوازییە كەرەنگە جۆرێك لەفشار دروست بكات .

لەلایەن خۆیەوە عیماد ئەحمەد رونیكردەوە كەهەرێمی كوردستان بەگرنگیەوە لەم هەڵبژاردنە دەڕوانێت خوازیارە لەسەر ئاستی هەموو عیراق  ببێتە مایەی چەسپاندنی زیاتری بنەماكانی دیموكراسی و خۆشگوزەرانی و چارەسەركردنی كێشە سیاسی و ئەمنی و خزمەتگوزاریەكان و هەلومەرجێكی لەبارتر بۆ سەرجەم پێكهاتە جیاوازەكانی عیراق فەراهەم بكات كەهەموویان بەشێوەیەكی راستەقینە بەشداربن لەبڕیارو بەرێوەبردنی وڵاتدا، بۆ كوردستانیش ببێتە سەرەتایەكی تری پێشكەوتن و ئاوەدانی زیاترو بەیەكەوە كاركردن بۆ وەدیهێنانی تەواوی مافەكانمان و قوڵكردنەوە یئەزموونی دیموكراسی لەبەرژەوەندی خەڵكدا.

لەدرێژەی رونكردنەوەكەیدا عیماد ئەحمەد باسی لەوەشكرد كەپێویستە هەموو لایەنە سیاسیەكان بەگیانی لێپسراوێتی و لەبەرچاوگرتنی بەرژەوەندیە نیشتمانیەكان لەم كەرنەڤاڵە بڕوانن بۆ ئەوەی لەداهاتوو بەپێی خواست و ئیرادەی خەڵك كاربكەین و خزمەتی زیاتریان بكەین، بۆ ئەم مەبەستەش حكومەتی هەرێم وەك رابردوو بەبێلایەنی كار بۆ سەركەوتنی هەڵبژاردنەكان دەكات  و لەگەڵ لایەنە پەیوەندیدارەكان ئامادەی هاوكاری و پشتیوانییە بەشێوەیەك كەهاووڵاتیانی كوردستان بەجیاوازی بیروبۆچوونی سیاسیان بتوانن بەئازادی دەنگی خۆیان بدەن.

جێگری سەرۆكی حكومەتی هەرێم راشیگەیاند پێویستە دەستەی هەڵبژاردنەكانی هەرێمی كوردستان بەوردی ئامادەكاری بكەن كەخەڵك لەرێگەی ئەو كارتە تازەیەوە بەئاسانی دەنگ بدەن و گرفتیان بۆ دروست نەبێت، لەلایەكی تریشەوە رەوچاو و چاودێری جێبەجێكردن و پابەندبوونی قانون و سیستم و رێنمایەكان بن لەلایەن لیست و قەوارە سیاسیەكانەوە بۆ ئەوەی لەدۆخێكی ئارام و دوور لەتوندوتیژی پرۆسەكە بەسەركەوتوویی لەبەرژوەندی بەرەو پێشچوونی  وڵاتەكەمان بەڕێوە بچێت.

جێگری سەرۆكی حكومەت داواشی كرد كەلیست و كاندیداكان لەكاتی بانگەشەی هەڵبژاردندا پابەندی رێنمایەكان بكەن و شوێنی گشتی ونەگونجاو بۆ هەڵمەتەكە بەكار نەهێنن و سیماو جوانی شارە و گەڕەك و كۆڵانەكان نەشێوێنن و نمونەیەكی جوان لەمیانەی هەڵمەتەكەدا پێشكەش بكەن.


 

 

 

 

 

 

وتاری سەرۆكی هەرێمی كوردستان لە رێوڕەسمی كردنەوەی پیشانگای مەدا

بە ناوی خوای گەورە و میهرەبان

خوشك وبرایان
میوانانی ئازیز


رێگەم پێبدەن بەخێرهاتنێكی گەرمتان بكەم بۆ هەولێر پایتەختی هەرێمی كوردستان ، ئامادەبوونتان هیوا و متمانەمان پێدەبەخشێت و شانازیشی پێوە دەكەین ، و مایەی شانازیشمانە كە دەبینین هەموو ساڵێك پیشانگای كتیبَب لە هەولێر دەكرێتەوە و هەر ساڵێكیش پێشكەوتنی زیاتر و رێكخستنی بە خۆیەوە دەبینێت .


ئەمڕۆ كوردستان میوانداری كتێب و رۆشنبیری دەكات چونكە باوەڕی بەوە هەیە كە رۆشنبیری بنەمای ژیانێكی ئارامە و ئەو گەلەی خۆی بە رۆشنبیری پڕچەك دەكات دەتوانێت ئایندەی خۆی بونیاد بنێت و دەتوانێ سوود وەربگرێت و سوودیشی بۆ خەڵكی دیكەش هەبێت .


پیشانگای كتێب زۆر بە رێكی دەستیپێكرد و ئەمڕۆش وا میوانداری نۆیەمین پیشانگای دەكەین لە هەولێر و ئەمەش بەڵگەیەكی گەورەیە بەوەی گەلی كوردستان خۆشەویستی بۆ كتێب و رۆشنبیری هەیە بۆ كتێب و رۆشنبیری و ئامادەبوونی ئەم خەڵكە لەو پیشانگایەش بەڵگەیەكی دیكەیە بۆ رێزگرتنی خەڵكی كوردستان بۆ رۆشنبیری و رۆشنبیران و بۆ قەڵەم .


مایەی شانازیمانە كە بەو پەڕی متمانەوە دەڵێین ، ئازادیە گشتی و تایبەتیەكان بۆ هەر تاكێك پارێزراوە بە بەڵگەی كردنەوەی ئەم پیشانگایەی كە هەموو خانەكانی بڵاوكردنەوە تیایدا كتێبەكانی خۆی نمایش دەكات بە بێ ئەوەی هیچ لایەن و كەسێك سانسۆر بخاتە سەریان چونكە ئێمە متمانەمان بە خۆمان و بەو خانانەی بڵاوكردنەوانە هەیە كە رۆڵی لە گەشەپێدان و پێشخستنی رۆشنبیری لە كوردستان و لە عیراقدا دەبێت بە شێوەیەكی گشتی.


بەم بۆنەیەوە دەمەوێ ئەرك و ماندوبوونی خانەی مەدا و بە تایبەتی برای بەڕێز فەخری كەریم بەرز بنرخێنم كە هەردەم لەگەڵ خانەكانی بڵاوكردنەوەی جیهان و لەگەڵ حكومەتی هەرێمی كوردستان لە كاری بەردەوامدایە بۆ رێكخستنی ئەم پیشانگایە بە شێوەیەكی ساڵانە لە هەولێر .


دەمەوێ ئاماژەش بەوە بكەم كە هەولێر هەمیشە كراوەیە و ئامادەیە بۆ پیشوازیكردن لە هەموو پیشانگایەكی لەمجۆرە .


لە كۆتاییدا جارێكی دیكە سوپاستان دەكەم و هیوای مانەوەیەكی خۆش بۆ هەموو میوانان لە هەولێر دەخوازم .


و السلام علیكم و رحمە الله و بركاته .

 

 

 

 

 

پەڕەى 249 لەکۆى 280 پەڕەدا

هەواڵی زیاتر لە تویتەر

راپۆرتە پڕ بینەرەکان

حالت های رنگی