سەرۆکی حکومەتی هەرێمی کوردستان پێشوازی لە باڵیۆزی ئوستراليا لە عێراق دەکات
هەولێر، هەرێمی کوردستان، عێراق (GOV. KRD) - ئەمڕۆ شەممە 2020/12/26 مەسرور بارزانی سەرۆکی حکومەتی هەرێمی کوردستان پێشوازی لە جوان لوندس باڵیۆزی ئوسترالیا لە عێراق کرد.
لە دیدارەکەدا بارودۆخی عێراق و ناوچەکە و پەرەپێدانی پەیوەندییەکانی نێوان ئوسترالیا و هەرێمی کوردستان تاووتوێ کرا.
ھەروەھا گفتوگۆ دەربارەی گەشەپێدانی دەرفەتەکانی هەماهەنگیی و هاریکاریی لە نێوان هەردوولا و وەبەرهێنانی کۆمپانیاکانی ئوسترالیا لە هەرێمی کوردستان کرا، بەتایبەتی لە بواری پیشەسازی و کشتوکاڵیدا.
پەیامی پیرۆزبایی سەرۆکی حکومەتی هەرێمی کوردستان بەبۆنەی جەژنی لە دایکبوونی حەزرەتی مەسیح
هەولێر، هەرێمی کوردستان، عێراق (GOV. KRD) - بەبۆنەی جەژنی لە دایکبوونی حەزرەتی مەسیح (سڵاوی خوای لێ بێت) پیرۆزبایییەکی گەرم لە خوشک و برایانی کریستیان لە هەرێمی کوردستان و عێراق و جیهان دەکەم. هیوادارم لە کەشێکی ئارام و پڕ لە کامەرانیدا ڕۆژانی جەژن بەسەر ببەن.
کریستیانەکان پێکهاتەیەکی گرنگ و ڕەسەنی کۆمەڵگەی کوردستانن و لە گەڵ پێکهاتەکانی دیکەدا، ڕۆڵێکی گرنگییان لە پێشخستنی کۆمەڵگەی کوردستاندا گێڕاوە و هەرێمی کوردستانیش، بووەتە مەڵبەندی بەیەکەوەژیانی نەتەوەیی و ئاینیی لە ناوچەکەدا. لەم بۆنە پیرۆزەدا، پابەندبوونی خۆمان بە قووڵکردنەوە و بەهێزکردنی کولتووری لێبوردەیی و تەبایی و بەیەکەوەژیانی ئاشتییانەی نێوان پێکهاتەکان دووپات دەکەینەوە کە یەکێکە لە شانازییەکانی هەرێمی کوردستان.
ئومێدەوارم هاتنەوەی ئەم جەژنە و ساڵی نوێ، ببێتە مایەی سەقامگیربوونی ئاشتی و تەناهی و کۆتایی هاتنی قەیران و نەهامەتییەکان لە کوردستان و جیهاندا.
مەسرور بارزانی
سەرۆکی حکومەتی هەرێمی کوردستان
2020/12/24
په‌يامى سه‌رۆك نێچيرڤان بارزانى بۆ يادى له‌دايكبوونى مه‌سيح
يادى له‌دايكبوونى حه‌زره‌تى مه‌سيح “سڵاوى خواى لێ بێت” له خوشك و برايانى مه‌سيحى له هه‌رێمى كوردستان، عێراق و ته‌واوى جيهان به گه‌رمى پيرۆز ده‌كه‌م، جه‌ژن و پشوويه‌كى خۆش و ئاراميان بۆ ده‌خوازم. هيوادارم ئه‌م جه‌ژنه ته‌بايى، ئاشته‌وايى، لێبورده‌يى و يه‌كترقبووڵكردنى زياتر له عێراق، ناوچه‌كه و جيهان، بۆ ته‌واوى مرۆڤايه‌تى له‌گه‌ڵ خۆيدا بهێنێت.
به‌داخه‌وه ئه‌مساڵ له هه‌رێمى كوردستانيش وه‌ك هه‌موو جيهان به‌هۆى په‌تاى كۆڤيد_19ـه‌وه، ڕێوڕه‌سمى گه‌وره‌ى جه‌ژن ئه‌نجام نادرێن، به‌ڵام بێگومان يادى له‌دايكبوونى حه‌زره‌تى مه‌سيح به شكۆدارييه‌وه له دڵى هه‌موواندا ده‌كرێته‌وه و به‌رز ڕاده‌گيرێت. هيوادارم ياد و جه‌ژنه‌كانى داهاتوومان له كه‌ش و دۆخى باشتردا بگه‌ڕێنه‌وه.
له‌م ياده پيرۆزه‌دا دووپاتى ده‌كه‌ينه‌وه كه هه‌رێمى كوردستان وه‌ك هه‌ميشه به لانه‌ى ته‌بايى و فره‌يى و پێكه‌وه‌ژيانى هه‌موو پێكهاته‌كانى و به ماڵ و نيشتمانى خوشك و برايانى مه‌سيحيش ده‌مێنێته‌وه. هه‌موومان پێكه‌وه به ته‌بايى، يه‌كڕيزى، خۆڕاگرى و قوربانيدان، ڕۆژگارى سه‌خت و كێشه و قه‌يرانى زۆرمان به‌ڕێكردووه، به هه‌مان شێوه ئه‌م دۆخه سه‌خته و په‌تا و قه‌يرانه‌كانيش تێده‌په‌ڕێنين و داهاتوويه‌كى باشتر چاوه‌ڕێمانه.
هاووڵاتیانی مه‌سيحى دڵنيا ده‌كه‌ينه‌وه كه به‌رده‌وام ده‌بين و هه‌موو هه‌وڵ و توانايه‌ك ده‌خه‌ينه گه‌ڕ بۆ ئه‌وه‌ى ناوچه زيانبه‌ركه‌وتووه‌كانيان له شه‌ڕى دژى تيرۆردا ئاوه‌دان بكرێنه‌وه و شوێنه‌وارى شه‌ڕيان به‌سه‌ره‌وه نه‌مێنێت، تا ئاواره‌كانيان بتوانن بگه‌ڕێنه‌وه و ئارامى، ژيان، دڵنيايى و بووژانه‌وه له‌گه‌ڵ خۆياندا ببه‌نه‌وه، جارێكى دى ئاواره نه‌بنه‌وه و هه‌موو مافێكيان پارێزراو بێت.
جه‌ژنى له‌دايكبوونى مه‌سيح و ساڵی تازه‌ی زایینی له هه‌مووان پيرۆز بێت، هه‌موو ساڵێك به خۆشى.
نێچيرڤان بارزانى
سه‌رۆكى هه‌رێمى كوردستان
https://presidency.gov.krd/congratulations-to-president-nechirvan-barzani-on-the-birth-of-christ/
پۆڵه‌تیك پرێس // نوێنه‌رى حكومه‌تى هه‌رێمی كوردستان له تاران ده‌ڵێت:”له‌م قۆناغه‌دا به‌هۆى ئاڵوگۆڕى ئیداره‌ى ئه‌مریكا و هاتنى جۆ بایدن، ئێران ئه‌وه‌ى لێ به‌دیناكرێت بیر له تۆڵه‌كردنه‌وه‌ى قاسم سوله‌یمانی و ئه‌بومه‌هدى موهه‌ندیس بكاته‌وه”.
نازم ده‌باغ نوێنه‌رى حكومه‌تى هه‌رێم له تاران، له‌میانی لێدوانێكی تایبه‌ت بۆ پۆڵه‌تیك پرێس وتى: “به‌دڵنیاییه‌وه نه ئێستا و نه داهاتوو ئێران له هه‌وڵى ئه‌وه‌دا نیه به به‌هانه‌ى تۆڵه‌كردنه‌وه‌ى قاسم سوله‌یمانی و ئه‌بومه‌هدى موهه‌ندیس، بیه‌وێت كاردانه‌وه‌یه‌كى واى هه‌بێت كه ناوچه‌كه و خۆیشى زه‌ره‌رمه‌ندبن”.
نازم ده‌باغ وتیشى: “هه‌ندێك هه‌وڵ و قسه نیشانی ده‌ده‌ن گوایه ئێران ده‌یه‌وێت تۆڵه‌بكاته‌وه و ئه‌مریكاش له‌به‌رامبه‌ر ئه‌و تۆڵه‌كردنه‌وه‌یه هێرش بكاته سه‌ر چه‌ند به‌رژه‌وه‌ندییه‌كى ئێران له عێراق و له ناو خودی ئێران، به‌ڵام ئه‌وه‌ى هه‌ستى پێده‌كه‌م جوڵه‌كانى به‌رپرسانى ئێران به‌و ئاراسته‌یه‌یه به‌رژه‌وه‌ندییه‌كانى خۆیان بپارێزن نه‌ك به‌هۆى تۆڵه‌كردنه‌وه‌ى قاسم سوله‌یمانی كێشه‌كان گه‌وره‌تربێت، ره‌نگه بۆ تۆڵه‌كردنه‌وه رێگا و هه‌ڵوێست و كاتى تریان هه‌بێت، به‌ڵام له‌م قۆناغه كه چاوه‌ڕێى ئاڵوگۆڕ له ئه‌مریكا ده‌كه‌ن، به‌تایبه‌ت هاتنی بایدن بۆ لوتكه‌ی ده‌سه‌ڵات، به‌دوورى ده‌بینم ئێران تۆڵه بكاته‌وه”.
نوێنه‌رى حكومه‌تى هه‌رێم له تاران ئه‌وشی رونكرده‌وه، قسه‌كانى ئه‌مریكا و ئێرانیش ته‌نها بۆئه‌وه‌یه یه‌كترى ئاگاداربكه‌نه‌وه، نه‌وه‌ك ترامپ له‌م قۆناغه‌دا كێشه‌یه‌ك دروست بكات ره‌نگدانه‌وه‌ى هه‌بێت بۆ سیاسه‌تى ئاینده‌ى ئێران له‌گه‌ڵ ئیداره‌ى ئه‌مریكا.
رۆژی 3ـی مانگی كانوونی دووه‌می ساڵی 2020 له‌پاش چه‌ند خوله‌كێك له‌گه‌یشتنیان به فڕۆكه‌خانه‌ی نێوده‌وڵه‌تی به‌غدا، له‌ڕێگه‌ی فڕۆكه‌یه‌كی بێفڕۆكه‌وانه‌وه ئه‌مریكا قاسم سوله‌یمانی، فه‌رمانده‌ی پێشووی فه‌یله‌قی قودس و ئه‌بو مه‌هدی موهه‌ندیس، جێگری سه‌رۆكی ده‌سته‌ی حه‌شدی شه‌عبی كرده ئامانج و ده‌ستبه‌جێ له‌وێدا كوژران.
https://politicpress.com/26666/
سەرۆکی حکومەتی هەرێمی کوردستان پەیوەندییەکی تەلەفۆنی لە وەزیری دەرەوەی ئەمەریکا پێگەیشت
هەولێر، هەرێمی کوردستان، عێراق (GOV. KRD) - ئێوارەی ئەمڕۆ سێشەممە 2020/12/22 مەسرور بارزانی سەرۆکی حکومەتی هەرێمی کوردستان، پەیوەندییەکی تەلەفۆنی لە مایک پۆمپێیۆ وەزیری دەرەوەی ئەمەریکا پێگەیشت.
لە پەیوەندییەکەدا هەردوولا بە درێژی گفتوگۆیان دەربارەی کێشەکانی نێوان هەرێمی کورستان و حکومەتی فیدراڵی کرد، بەتایبەتی سەبارەت بە بابەتی بودجەوە. سەرۆکی حکومەت پێشنیاری کرد کە وڵاتە یەکگرتووەکانی ئەمەریکا و نەتەوە یەکگرتووەکان، بە شێوەیەکی کارا و لە ئاستێکی باڵادا، بەشداربن لە چارەسەکردنی کێشەکان و گەیشتن بە ڕێککەوتن لە نێوان هەرێم وحکومەتی فیدراڵی لە سەر بنەمای دەستوور. سەرۆکی حکومەت سوپاسی هەڵوێستی وەزیری دەرەوەی ئەمەریکای کرد کە خوازیارە هەرێمی کوردستان بەشێوەیەکی دادپەروەرانە بەشی خۆی لە بودجەی فیدراڵی بەرکەوێت. هەروەها سوپاسی پۆمپێیۆی کرد بۆ پشتیوانی بەردەوامیی لە هەرێمی کوردستان لەماوەی كاركردنيدا.
لە پەیوەندییەکەدا هەروەها جەخت لە گرنگیی پەرەپێدانی زیاتری پەیوەندییەکانی نێوان هەرێمی کوردستان و ئەمەریکا کرایەوە ، بە تایبەتی لە بواری وزەدا. سەرۆکی حکومەت ئاماژەی بە گرنگیی بەردەوامبوونی یارمەتییەکانی ئەمەریکا کرد بۆ هێزی پێشمەرگە و هەروەها یارمەتییە تەکنیکییەکانی USAID.
لە تەوەرێکی دیکەی پەیوەندییەکەدا، ئاستەنگەکانی بواری سەقامگیریی ئەمنیی لە ناوچەکە و نەهێشتنی گرژییەکان لە سەر سنووری هەرێمی کوردستان و سوریا و گرنگیی جێبەجێکردنی ڕێککەوتننامەی شنگال تاووتوێ کران لە پێناو گەڕانەوەی ئاوارەکان بۆ شوێنەکانیان.
https://gov.krd/government/the-prime-minister/activities/posts/2020/december/%D8%B3%DB%95%D8%B1%DB%86%DA%A9%DB%8C-%D8%AD%DA%A9%D9%88%D9%85%DB%95%D8%AA%DB%8C-%D9%87%DB%95%D8%B1%DB%8E%D9%85%DB%8C-%DA%A9%D9%88%D8%B1%D8%AF%D8%B3%D8%AA%D8%A7%D9%86-%D9%BE%DB%95%DB%8C%D9%88%DB%95%D9%86%D8%AF%DB%8C%DB%8C%DB%95%DA%A9%DB%8C-%D8%AA%DB%95%D9%84%DB%95%D9%81%DB%86%D9%86%DB%8C-%D9%84%DB%95-%D9%88%DB%95%D8%B2%DB%8C%D8%B1%DB%8C-%D8%AF%DB%95%D8%B1%DB%95%D9%88%DB%95%DB%8C-%D8%A6%DB%95%D9%85%DB%95%D8%B1%DB%8C%DA%A9%D8%A7-%D9%BE%DB%8E%DA%AF%DB%95%DB%8C%D8%B4%D8%AA/
هەولێر، هەرێمی کوردستان، عێراق (GOV. KRD) - ئەمڕۆ سێشەممە 2020/12/22 مەسرور بارزانی سەرۆکی حکومەتی هەرێمی کوردستان، پێشوازیی لە عەبدولغەنی ئەسەدی سەرۆکی دەزگای ئاسایشی نیشتمانیی عێراق کرد.
لە دیدارەکەدا، بارودۆخی عێراق و پەیوەندییەکانی نێوان هەرێمی کوردستان و حکومەتی فیدراڵی و پەرەپێدانی هەماهەنگیی ئەمنیی نێوان هەردوولا تاووتوێ کرا.
هەروەها لە دیدارەکەدا جەخت لە گرنگیی جێبەجێکردنی ڕێککەوتننامەی شنگال و دەرچوونی میلیشیا و هێزە چەکدارە نایاساییەکان لە عێراق کرایەوە.
نێچيرڤان بارزانى و جينين پلاسخارت، دۆخى عێراق تاوتوێ ده‌كه‌ن
له كۆبوونه‌وه‌يه‌كدا له‌گه‌ڵ به‌ڕێز نێچيرڤان بارزانى، سه‌رۆكى هه‌رێمى كوردستان، خاتوو جينين پلاسخارت، نوێنه‌رى سكرتێرى گشتيى نه‌ته‌وه يه‌كگرتووه‌كان له عێراق جه‌ختى له‌وه كرده‌وه كه په‌يوه‌ندييه‌كى باشى نێوان هه‌ولێر و به‌غدا له به‌رژه‌وه‌نديى ته‌واوى عێراقدايه، هه‌روه‌ها پشتگيريى نه‌ته‌وه يه‌كگرتووه‌كانى بۆ گفتوگۆى نێوان هه‌ردوولا ده‌ربڕى و هيواى خواست كێشه‌كانيان چاره‌سه‌ر بكه‌ن.
له كۆبوونه‌وه‌كه‌دا سه‌رۆك نێچيرڤان بارزانى وێڕاى سوپاس و پێزانين بۆ ڕۆڵى گرنگى نه‌ته‌وه يه‌كگرتووه‌كان له عێراق، هيواى خواست له هاندانى هه‌ولێر و به‌غدا بۆ سه‌ركه‌وتنى گفتوگۆكان به‌رده‌وام بێت و له چاره‌سه‌ركردنى كێشه‌كانى نێوانياندا هاوكار و يارمه‌تيده‌ر بێت.
به‌ڕێزيان هه‌روه‌ها جه‌ختى له‌وه كرده‌وه كه چاره‌سه‌ركردنى يه‌كجاره‌كى و گشتگيرى كێشه‌كانى هه‌ولێر ـ به‌غدا، كليلى سه‌قامگيريى عێراق و پێكه‌وه‌ژيانه و به ڕه‌چاوكردنى دۆخى سه‌ختى وڵات و ته‌حه‌دييه‌كانى به‌رده‌مى، ده‌بێ ده‌سه‌ڵات و لايه‌نه عێراقييه‌كان به گيانێكى به‌رپرسانه مامه‌ڵه له‌گه‌ڵ دۆخه‌كه‌دا بكه‌ن و كێشه‌كان له‌سه‌ر بنه‌ماى ده‌ستوور چاره‌سه‌ر و ڕێككه‌وتنه‌كانيش جێبه‌جێ بكرێن.
دۆخى سياسى، ئه‌منى، ته‌ندروستى و ئابووريى عێراق، به‌ره‌نگاربوونه‌وه‌ى تيرۆر و ئه‌ركى هاوپه‌يمانيى نێوده‌وڵه‌تى له عێراق، هه‌ڵبژاردنه‌كانى داهاتووى وڵات، په‌ره‌سه‌ندنه‌كانى ناوچه‌كه به‌گشتى و چه‌ند پرسێكى ديكه‌ى مايه‌ى بايه‌خى هاوبه‌ش، ته‌وه‌رێكى ديكه‌ى كۆبوونه‌وه‌كه بوو.
https://presidency.gov.krd/nechirvan-barzani-and-jenin-blashart-discuss-the-situation-in-iraq-2/
سەرۆکی حکومەتی هەرێمی کوردستان پێشوازی لە نوێنەری تایبەتی سکرتێری گشتی نەتەوە یەکگرتووەکان لە عێراق دەکات
• مەسرور بارزانی: بەداخەوە بابەتی مووچە کراوەتە کارتێکی فشاری سیاسی لە دژی خەڵکی کوردستان.
• داوا لە نەتەوە یەکگرتووەکان دەکەین کە ڕۆڵی کارای خۆی بگێڕێت لە گەیشتن بە ڕێککەوتن بە پێی دەستوور.
هەولێر، هەرێمی کوردستان، عێراق (GOV. KRD) - ئەمڕۆ یەکشەممە 2020/12/20 مەسرور بارزانی سەرۆکی حکومەتی هەرێمی کوردستان، پێشوازیی لە جینین هێنیس-پلاسخارت نوێنەری تایبەتی سکرتێری گشتی نەتەوە یەکگرتووەکان لە عێراق کرد.
لە کۆبوونەوەکەدا، گفتوگۆ دەربارەی دۆخی عێراق و دوایین پێشهاتەکانی دانوستانی نێوان حکومەتی هەرێمی کوردستان و حکومەتی فیدراڵی و میکانیزمەکانی چارەسەرکردنی کێشەکان کرا.
سەرۆکی حکومەت ئاماژەی بەوەدا کە حکومەتی هەرێمی کوردستان هیچ بیانوویەکی بۆ حکومەتی بەغدا نەهێشتووەتە بۆ چارەسەرکردنی کێشەکان و گەیشتن بە ڕێککەوتن لە سەر بنەمای دەستوور. گوتیشی بەداخەوە بابەتی مووچە، کراوەتە کارتێکی فشاری سیاسی لە دژی خەڵکی کوردستان، کە لەمساڵدا بەغدا تەنیا بەشە مووچەی شەش مانگی ناردووە. بۆیە داوا لە نەتەوە یەکگرتووەکان دەکەین کە ڕۆڵی کارای خۆی بگێڕێت لە گەیشتن بە ڕێککەوتن و دابینکردنی ماف و شایستە داراییەکانی هەرێمی کوردستان بە پێی دەستوور.
لە کۆبوونەوەکەا ، هەروەها جەخت لە جێبەجێکردنی ڕێککەوتنامەی شنگال کرایەوە، لە پێناو گەڕانەوەی ئارامی و سەقامگیریی بۆ دەڤەرەکە. سەرۆکی حکومەت داوای کرد ڕێککەوتننامەکە وەکو خۆی جێبەجێ بکرێت نەک تەنیا ئەنجامدانی هەندێک ڕێکاری ڕووکەش بێت.
تاران ـ ئێران پڕێس: "نازم دەباغ" نوێنەری حکومەتی هەرێمی کوردستان لە ئێران گوتی: قەیرانە ئابوورییەکان، بووە هۆی پێکهێنانی ناڕەزایەتییەکانی هەرێمی کوردستان.
"نازم دەباغ" نوێنەری حکومەتی هەرێمی کوردستان لە تاران لە وتووێژ لەگەڵ ئاژانسی هەواڵنێری نێودەوڵەتی "ئێران پڕێس" بە ئاماژە بە ناڕەزایەتییەکانی ڕۆژانی ڕابردوو لە هەرێمی کوردستان گوتی: قەیرانی ئابووریی لە هەرێمی کوردستان بە هۆی بڵاوبوونەوەی پەتای ڤایرۆسی کۆڕۆنا، دابەزینی نرخی نەوت و بڕینی بوودجەی هەرێمی کوردستان لە لایەن دەوڵەتی عێراقەوە بۆتە هۆی ئەوەی کە بەرپرسانی هەرێمی کوردستان نەتوانن لە کاتی پێویستدا مووچەی کارمەندانی خۆیان بدەن و کارمەندان و خەڵکی هەرێمی کوردستان ناچاربوون ناڕەزایەتی خۆیان دەرببڕن.
گوتیشی: لە کەشووهەوای ئاوەهادا دوژمنانیش دزە دەکەنە ناو خۆپێشاندەرانەوە و ناڕازییەکان بە دوو گرووپ دابەشدەبن، یەکەمیان خۆپێشاندەرێکن کە پابەندیی یاسان و بە شێوەی یاسایی و بە هێمنی بە شوێن بەدواداچوونی داخۆازییە یاساییەکانی خۆیانەوەن و گرووپەکەی دیکەش کە کاریی خراپ و تێکدەریی دەکەن.
دەباغ لە درێژەی قسەکانیدا گوتی: هەڵبەت تێکدەران تا ڕادەیەک پێناسە کراون و بەرپرسانی هەرێمی کوردستانیش هەنگاویی ئەوتۆیان بۆ پێکهێنانی هێمنی لە ناوچەکەدا هەڵێناوە.
نوێنەری حکومەتی هەرێمی کوردستان لە تاران هەروەها گوتیشی: هەڵبەت لە پێکهێنانی قەیرانی ئابووریی و ناڕەزایەتییەکانی ئەم دوایانەدا بوونی گەندەڵی ڕەدناکەمەوە، بەڵام ئەگەر نەوت هەرزان نەدەبوو، بوودجەش لە لایەن دەوڵەتی عێراقەوە نەدەبڕدرا و بڵاوبوونەوەی پەتای ڤایرۆسی کۆڕۆناش بووە هۆی داخران و وەستانی ئابووریی هەرێمی کوردستان، دەوڵەتی هەرێمی کوردستان دەیتوانی وەکوو ساڵانی ڕابردوو مووچەی کارمەندانی خۆی بدات و چیدی ناڕەزایەتییەکانی سەرشەقام نەبینین.
ڕاشیگەیاند: هەرێمی کوردستان بۆ گەیشتن بە دانووستان، هەنگاوی پۆزێتیڤی هەڵێناوە و ئامادەیی خۆی ڕاگەیاندووە کە دەتوانێت سەتا پەنجای داهاتی ناوخۆی خۆی بە دەوڵەتی عێراق بدات؛ هەر چەندە دەوڵەتی عێراق ڕایگەیاندووە کە حکومەتی هەرێمی کوردستان، دەبێت نەوت ڕادەستی بەغداد بکات، نەوەکوو داهاتی نەوت بنێرێت.
"نازم دەباغ" لە بەشێکی دیکەی ئەم چاوپێکەتنەدا گوتی: لە هەمان کاتیشدا دانووستان لەگەڵ دەوڵەتی عێراق هێشتا کۆتایی پێنەهاتووە، چونکە لە هەندێک مەسەلەدا ناکۆکی هەیە و دەوڵەتی عێراق مەرجی داناوە هەرێمی کوردستان دەبێت نیوەی هەناردەکانی ڕۆژانەی خۆی واتە 550 هەزار بەرمیل نەوت ڕەوانەی بەغداد بکات، بەڵام هیوادارم بە نییەتی خێرەوە ڕێککەوتن بکرێت.
گوتیشی: ڕێککەوتنی نەوت، تەنیا چارەسەریی کۆتایی هێنانی قەیرانی ئابووریی هەرێمی کوردستان نییە و یەکێک لە هەنگاوە گرینگەکانی چاکسازییە؛ کە هەرێمی کوردستان، چاکسازییەکانی دەست پێکردووە و دەبێت ڕوونکردنەوە لە داهاتی نەوتدا بکرێت.
نوێنەری حکومەتی هەرێمی کوردستان لە ئێران، هەروەها سەبارەت بە یاسای نوێی هەڵبژاردنەکانیش گوتی: ئەم بابەتە بە گشتیی لە بەرژەوەندیی خەڵکی عێراقە، چونکە باروودۆخێک پێکدێنێت تاکوو کەسانێک توانایی خزمەتی زیاتریان هەبێت و بتوانن بێین وتەنانەت لە بەرژەوەندیی حیزبە گەورەکانیشە و دەبێت چاوەڕوانی دەستپێکردنی هەڵبژاردنەکان بین، تاکوو کاریگەریی گۆڕانکارییەکان لە یاسای هەڵبژاردنەکاندا ببینین.
"نازم دەباغ" سەبارەت بە ئاستی پەیوەندییە ئابوورییەکانی نێوان هەرێمی کوردستان و ئێران گوتی: بە بڕوای من، ئاستی پەیوەندییە ئابووریی و سیایییەکانی نێوان حکومەتی هەرێمی کوردستان و ئێران بەرەو گەشەکردنە، بەڵام لە هەمان کاتدا پەیوەندیی بە باروودۆخی بازاڕیشەوە هەیە.
نوێنەری حکومەتی هەرێمی کوردستان لە ئێران، لە کۆتایی قسەکانیدا گوتی: ئێستاکە ئاڵووگۆڕییە ئابوورییەکانی هەرێمی کوردستان و ئێران، نزیکەی 4 میلیارد دولارە، بەڵام بە شوێن گەشەپێدان و زیادکردنی ئاستی ئاڵووگۆڕییەکانەوەین.
ناوەرۆکی چاوپێکەوتنی خاتوو "نێدا سەجادی" پەیامنێری ئاژانسی هەواڵنێری نێودەوڵەتی "ئێران پڕێس" لەگەڵ "نازم دەباغ" نوێنەری حکومەتی هەرێمی کوردستان لە ئێران، لە لینکی خوارەوەدا ببینن:
https://farsi.iranpress.com/middle_east-i191022
بە ئامادەبوونی سەرۆکی حکومەتی هەرێمی کوردستان ڕێوڕەسمی ڕۆژی ئاڵا بەڕێوەچوو
مەسرور بارزانی:
• داوا لە هەموو لایەنە سیاسییەکان و هەموو بیروبۆچوونە جیاوازەکان لە کوردستان دەکەم لە ژێر سایەی ئەم ئاڵایەدا، بەیەکەوە بەرگری لە دەستکەوتەکانمان بکەین.
•لەسەر هەموومان ئەرک و پێویستە ئەم ئاڵایە بەرز رابگرین و نەهێڵین بە هیچ شێوەیەک شکۆی نەتەوەیی و نیشتمانیمان بشکێ.
• داوام لە نەوەی داهاتوو و گەنجانی ئێمە ئەوەیە بزانن لەپێناو ئەو ئاڵایە و شکۆی نەتەوەییمان، چ قوربانییەک دراوە.
هەولێر، هەرێمی کوردستان، عێراق (GOV. KRD) - ئەمڕۆ پێنجشەممە 2020/12/17 بە ئامادەبوونی سەرۆکی حکومەتی هەرێمی کوردستان مەسرور بارزانی، ڕێوڕەسمی ڕۆژی ئاڵای کوردستان لە فەرماندەیی پێشمەرگەی زێرەڤانی لە شاری هەولێر بەڕێوەچوو.
لە ڕێوڕەسمەکەدا، سەرۆکی حکومەتی هەرێمی کوردستان گوتارێکی پێشکەش کرد و تێێدا ئاماژەی بەوەدا “کە لە سەر هەموومان ئەرک و پێویستە ئەم ئاڵایە بەرز ڕابگرین و نەهێڵین بە هیچ شێوەیەک شکۆی نەتەوەیی و نیشتمانیمان بشکێ”.
ئەمەش دەقی گوتارەکەیە:
بەناوی خوای گەورە و میهرەبان
بەیانیتان باش
رۆژی ئاڵا لە ئێوەی بەڕێز، پێشمەرگە قارەمانەکان و هەموو خەڵکی کوردستان پیرۆز بێت. ئەم ئاڵایە، هێما و سیمبوولی خەبات و قوربانیدان و پێناسەی نیشتمانیی گەلەکەمانە. ئەم ئاڵایە بووەتە دوابەرگی جەستەی هەزاران شەهید.
ئەم ئاڵایە لەکاتێکدا لەلایەن پێشەوا قازی ڕادەستی سەرۆکی نەمرمان مستەفا بارزانی کرا، دواتر لەسەر لووتکەی شاخەکانی کوردستان هەڵکرا و بەرز ڕاگیرا. لەژێر رابەرایەتی و سەرۆکایەتیی سەرۆک بارزانی هەر ئەو ئاڵایە، لە کۆشک و تەلار و پایتەختی وڵاتانی دنیا هەڵکرا و رێزی لێگیرا.
ئەم ئاڵایە، هێمای نەتەوەیی و نیشتمانیی هەموومانە، هێمای پێکەوەژیانی ئایینی و نەتەوەیی هەموو خەڵکی کوردستانە، ئەم ئاڵایە بووەتە هێمایەک بۆ پێناسەکردنی پێکەوەژیانی گەلان لە کوردستان و هێمایەک بۆ هەموو ئەو ئازادیخوازانەی پەنایان هیناوەتە بەر کوردستان، چونکە کوردستان بە خاکی پێکەوەژیان و و ئاشتی و ئازادی ناسراوە.
لەسەر هەموومان ئەرک و پێویستە ئەم ئاڵایە بەرز رابگرین و نەهێڵین بە هیچ شێوەیەک شکۆی نەتەوەیی و نیشتمانیمان بشکێ. داوام لە نەوەی داهاتوو و گەنجانی ئێمە ئەوەیە: بزانن لەپێناو ئەو ئاڵایە و شکۆی نەتەوەییمان، چ قوربانییەک دراوە. شکۆی نەتەوەییمان شتێکە نە بە پارە دەکڕدرێت و نە دەفرۆشرێت، شکۆیەکە بە خوێنی هەزاران شەهید هاتووەتە دی.
من لێرەوە دەستخۆشی لە هەموو پێشمەرگە قارەمان دەکەم و دەستی دایکی هەموو ئەو شەهیدانە ماچ دەکەم، کە لەپێناو بەرزڕاگرتنی ئەم ئاڵایە خەباتێکی بێوچانیان کردووە و قوربانیی زۆرتان داوە. شانازی بە بوونی خۆمان دەکەین کە لەژێر سایەی ئەم ئاڵایە بتوانین بەردەوام بین لە خزمەتکردنی گەل و نیشتمانمان.
داوا لە هەموو لایەنە سیاسییەکان و هەموو بیروبۆچوونە جیاوازەکان لە کوردستان دەکەم لە ژێر سایەی ئەم ئاڵایەدا، بەیەکەوە بەرگری لە دەستکەوتەکانمان بکەین و خەبات بکەین بۆ بەدیهێنانی ژیانێکی باشتر و بەختەوەرتر بۆ هەموو ئەو گەل و نەتەوانەی لە کوردستاندا دەژین.
سوپاسی خۆڕاگریتان دەکەم و دەستخۆشیتان لێدەکەم، هەر سەرکەوتوو و سەلامت بن و ئاڵای کوردستانیش هەر بەرز و شەکاوە بێت.
https://gov.krd/government/the-prime-minister/activities/posts/2020/december/%D8%A8%DB%95-%D8%A6%D8%A7%D9%85%D8%A7%D8%AF%DB%95%D8%A8%D9%88%D9%88%D9%86%DB%8C-%D8%B3%DB%95%D8%B1%DB%86%DA%A9%DB%8C-%D8%AD%DA%A9%D9%88%D9%85%DB%95%D8%AA%DB%8C-%D9%87%DB%95%D8%B1%DB%8E%D9%85%DB%8C-%DA%A9%D9%88%D8%B1%D8%AF%D8%B3%D8%AA%D8%A7%D9%86-%DA%95%DB%8E%D9%88%DA%95%DB%95%D8%B3%D9%85%DB%8C-%DA%95%DB%86%DA%98%DB%8C-%D8%A6%D8%A7%DA%B5%D8%A7-%D8%A8%DB%95%DA%95%DB%8E%D9%88%DB%95%DA%86%D9%88%D9%88/
More...
نوێنەری حکومەتی هەرێمی کوردستان لە تاران: دەستوەردان لە خۆپێشاندانەکان هەبووە
نازم دەباغ: حکومەتی هەرێمی کوردستان بەشوێن ڕێککەوتن لەگەڵ حکومەتی فیدڕاڵی عێراقە
