لە چوارچێوەى بایەخى نێودەوڵەتى بە بارودۆخى هەرێمى کوردستان و پشتگیرى کردنى حکومەتى لە شەڕى رووبەڕووبوونەوەى تیرۆرستانى داعش و کۆمەک کردنى ئاوارەو پەنابەرانى نیشتەجێى هەرێم، ئێوارەى ئەمڕۆ خاتوو مارگۆ ڤالسترۆم وەزیرى دەرەوەى وڵاتى سوید و بەڕێز پیتەر هولتکڤیست وەزیرى بەرگرى سویدو شاندێکى یاوەریان گەیشتنە هەولێرى پایتەخت و لەلایەن بەڕێزان کەریم سنجارى وەزیرى ناوخۆو وەزیرى پێشمەرگە بە وەکالەت و فەلاح مستەفا بەرپرسى پەیوەندیەکانى دەرەوەى حکومەت و خاتوو سوهام جەبەلى یاریدەدەرى بەرپرسى فەرمانگەى پەیوەندیەکانى دەرەوەو شۆڕش قادر رەحیم نوێنەرى حکومەتى هەرێم لە سوید پێشوازیان لێکرا.

 

ئەمەو بڕیارە بەرێزان خاتوو مارگۆ ڤالسترۆم وەزیرى دەرەوەى وڵاتى سوید و پیتەر هولتکڤیست وەزیرى بەرگرى سوید لەگەڵ هەر یەک لە بەرێزان مسعود بارزانى سەرۆکى هەرێمى کوردستان ونێچیرڤان بارزانى سەرۆک وەزیرانى هەرێمى کوردستان کۆببنەوە.

 

مارگۆ ڤاڵسترۆم و پیتەر هولتکڤیست كە سەرلەبەیانی ئەمڕۆ دووشەممە 2-11-2015 گەیشتبوونە بەغدا، بەمەبەستی پشتگیركردنی هەرێمی كوردستان لە شەڕی داعش هاتوونەتە هەولێر و دەیانەوێت بە راهێنانكردن بە پێشمەرگە هاوكاری كوردستان بكەن.

ئێوارەی ئەمڕۆ دووشەممە 1/11/2015 بەڕێز نێچیرڤان بارزانی سەرۆك وەزیرانی هەرێمی كوردستان، پێشوازی لە بەڕێزان خاتوو مارگۆت واڵسترۆم وەزیری دەرەوە و پیتەر هۆڵتكڤێست وەزیری بەرگریی سوید و شاندێكی یاوەریان كرد.

لە دیدارێكدا كە بەڕێز قوباد تاڵەبانی جێگری سەرۆك وەزیران و ژمارەیەك لە وەزیرانی حكوومەتی هەرێمی كوردستان ئامادەی بوون، شاندی میوان خۆشحاڵیی خۆیان بە سەردانی هەرێمی كوردستان دەربڕی و ئاماژەیان بەوە دا كە پێویست بوو زۆر زووتر ئەو سەردانە ئەنجام بدەن، بەڵام دەرفەتی سەردان بۆ هەرێمی كوردستان ئێستا ڕێككەوت، هەروەك باسیان لە سەركەوتنە یەك دوای یەكەكانی هێزی پێشمەرگە لە دژی تیرۆر كرد و نەبەردی و ئازایەتیی پێشمەرگەیان بەرز نرخاند كە بەرگری لە هەرێمی كوردستان و هەموو جیهان دەكات.

خاتوو واڵسترۆم دەربارەی مەبەستی سەردانەكەیان بۆ هەرێمی كوردستان، ئاشكرای كرد كە ئەوان هاتوون پاڵپشتیی خۆیان بۆ هەرێمی كوردستان لە هەموو ڕوویەكەوە ڕابگەیەنن و ئامادەییی خۆیان بۆ هەر هاوكارییەك پیشان دا. دووپاتیشی كردەوە ئەفسەرانیان لە هەرێمی كوردستان لەسەر مەشقكردن بە هێزی پێشمەرگە بەردەوام دەبن و خۆشحاڵیی خۆیشی پیشان دا كە ئەمڕۆ خۆیان لەنێو دۆستەكانیاندا لە هەرێمی كوردستان دەبیننەوە.

لای خۆیەوە بەرێز سەرۆك وەزیرانی هەرێمی كوردستان سوپاسی ئەو سەردانە گرنگە و تێبینییە بەنرخەكانی شاندی میوانی كرد و دووپاتی كردەوە كە خەڵك و حكوومەتی هەرێمی كوردستان پەیوەندییەكی تایبەتیان لەگەڵ خەڵك و حكوومەتی سوید هەیە و سوپاسی خۆی و حكوومەتی هەرێمی كوردستانی بۆ ئەو هاوكارییانە دەربڕی كە تا ئێستا لەلایەن سویدەوە پێشكەش بە هەرێمی كوردستان كراون. هەروەك سوپاسی خەڵك و حكوومەتی سویدی كرد كە لە كاتە سەختەكاندا و كاتێك ژمارەیەكی زۆری خەڵكی كوردستان ڕوویان لەو وڵاتەكە كرد، باوەشیان بۆ كردنەوە و بە باشترین شێوە پێشوازییان لێ كردن.

سەبارەت بە پەیوەندیی دوولایەنەش، بەرێزیان جەختی لەوە كردەوە كە خەڵك و حكوومەتی هەرێمی كوردستان ئامادەن بۆ پەرەپێدانی پەیوەندییەكان لە هەموو بوارەكاندا، هەر هاوكاری و هەماهەنگییەك پێشكەش بكەن و بەردەوامیش دەبن لە پتەوتركردنی ئەو پەیوەندیانە.

تاوتوێكردنی بارودۆخی عێراق و ناوچەكە بە گشتی، لایەنێكی دیكەی دیدارەكە بوو۰

ڕۆژی سێشەممە 3ـی 11ـی 2015 لە شاری هەولێر بەڕێز مەسعود بارزانی سەرۆكی هەرێمی كوردستان پێشوازی لە شاندێكی باڵای حكوومەتی سوید كرد كە پێكهاتبوو لە خاتوو مارگۆت واڵسترۆم وەزیری دەرەوە و پیتێر هۆڵدڤیست وەزیری بەرگری و خاتوو ئانیكا مۆلین هێڵگێرن باڵیۆزی سوید لە عێراق.

لە دیدارەكەدا وەزیری دەرەوەی سوید ستاییشی ڕۆڵی هێزی پێشمەرگەی كرد لە شەڕی دژی داعش و پاڵپشتیی وڵاتەكەی بۆ هەرێمی كوردستان لەشەڕی دژی تیرۆریستان و هەروەها هاوپەیمانێتیی نێودەوڵەتی لەدژی داعش دووپاتكردەوە و ئەوەی بە سەرۆك بارزانی ڕاگەیاند كە ئێوە بۆ جیهان و مرۆڤایەتی شەڕ دەكەن و جیهان بەچاوی ڕێزەوە سەیری سەرۆك بارزانی و پێشمەرگە دەكات. وەزیری دەرەوەی سوید وێڕای ئاماژەدان بە مەترسییەكانی تیرۆر هێمای بەوەدا كە كۆمەڵگەی نێودەوڵەتی بۆ تێكشكاندنی تیرۆر پێویستی بە یەكڕیزی و یەكدەنگی هەیە.

هەر لەم كۆبوونەوەیەدا وەزیری بەرگریی سوید ئاماژەی بەوەدا كە بۆ چارەسەركردنی گرفتەكانی ڕۆژهەڵاتی ناوەڕاست پێویستە سەرەتا داعش ڕیشەكێش بكرێت و لەشەڕی دژی تیرۆریستاندا هەتا سەركەوتن لەگەڵ پێشمەرگە دەبن و هاریكاری سەربازی و تەندروستی و مەشق و ڕاهێنان پێشكەشی پێشمەرگە دەكەن.

لەبەرانبەردا سەرۆك بارزانی سوپاسی شاندی میوان و حكوومەت و گەلی سویدی كرد كە پاڵپشتی پێشمەرگە و خەڵكی كوردستانن و لە ڕۆژانی تەنگانەیشدا وڵاتی سوید باوەشی بۆ هاووڵاتیانی كورد كردووەتەوە. سەرۆك بارزانی وێڕای دووپاتكردنەوەی ئەوەی كە پێویستە ئەولەوییەتی سەرەك شەڕی داعش بێت، باسیشی لە مەترسییەكانی تیرۆر كرد كە هەڕەشەیە بۆ هەموو لایەك و ڕووبەڕووبوونەوەیشی ئەركی هەموو وڵاتێكە و بۆ چارەسەركردنی تیرۆر پێویستە هۆكارەكانی سەرهەڵدانی تیرۆر بدۆزرێنەوە و نەهێڵدرێن و تەنیا مامەڵە لەگەڵ ئەنجام و دەرهاوێشتەكانی تیرۆر نەكرێت و لە چارەكردنی هۆكارەكانیشدا دەكرێ چارەسەری سیاسی یەكێك بێت لە ڕێگەكانی ڕێگەگرتن لە سەرهەڵدانی تیرۆر.

هەر لەم كۆبوونەوەیەدا باس لە بارودۆخی سیاسی ناوچەكە و هەرێمی كوردستان و هەروەها دۆخی مافەكانی مرۆڤ و ئافرەتان كرا و هەردولا جەختیان لە پێویستیی قووڵتركردنی پێكەوەژیان و بنەماكانی مرۆڤسالاری و پتەوتركردنی دیموكراسی كردەوە.

جێگەی ئاماژەپێكردنە لەم كۆبوونەوەیەدا مەسرور بارزانی ڕاوێژكاری ئەنجوومەنی ئاساییشی هەرێم و كەریم سنجاری وەزیری ناوخۆ و وەزیری پێشمەرگە بە وەكالەت و فەلاح مستەفا بەرپرسی فەرمانگەی پەیوەندییەكانی دەرەوەی هەرێم و جەعفەر شێخ مستەفا و فەریق شێروان عەبدولرەحمان و فەریق جەبار یاوەر ئەندامانی فەرماندەیی گشتیی هێزەكانی پاراستنی هەرێم ئامادە بوون.

پاشنیوەڕۆی ئەمڕۆ پێنجشەممە 15/10/2015 بەڕێز نێچیرڤان بارزانی سەرۆك وەزیرانی هەرێمی كوردستان، پێشوزای لە خاتوو ئەنیكا مۆڵن هێڵگرن باڵیۆزی نوێی وڵاتی سوید لە عێراق و شاندێكی دیپلۆماسیی یاوەری كرد.

لە دیدارێكدا خاتوو هێڵگرن خۆشحاڵیی خۆی بە سەردانی هەرێمی كوردستان و ئەو پەیوەندییە پتەوەی لە نێوان تیمی دیپلۆماسیی سوید لە عێراق بەگشتی و بە تایبەتی هەرێمی كوردستاندا هەیە، دەربڕی و هیوای بەردەوامیی پەیوەندییەكانی خواست. دواتر باسی لە بارودۆخی ئێستای عێراق و هەرێمی كوردستان كرد و جەختی لەوە كردەوە وڵاتەكەی گرنگییەكی زۆر بە بواری كۆمەڵایەتی و ئابووری و پاراستنی مافی تاك و بەرەنگابوونەوەی توندوتیژی دژی ئافرەتان دەدات و ئەو هەنگاوانەشی بەرز نرخاند كە لەو بوارانەدا لە هەرێمی كوردستان نراون.

دەربارەی ئەو كێشانەی لە هەرێمی كوردستان هەن، دووپاتی كردەوە كە پێویستە هەموو كێشەكان لە ڕێگەی دیالۆگ و گفتوگۆ چارەسەر بكرێن و ئەو ئارامییەی لە هەرێمی كوردستان هەیە بەردەوامی هەبێت و بە هەموو لایەك ڕووبەڕووی تیرۆرستانی داعش ببنەوە. ئەوەشی ئاشكرا كرد لە داهاتوودا ژماەریەك شاندی حكوومەتی سوید سەردانی هەرێمی كوردستان دەكەن و ئەوكات دیدار و كۆبوونەوەی زیاتر بۆ گفتوگۆكردنی هەموو پرسەكان ئەنجام دەدرێن.

لای خۆیەوە بەڕێز نێچیرڤان بارزانی سوپاسی ئەو سەردانەی باڵیۆزی نوێی سوید لە عێراق كرد و هیوای سەركەوتنی لە كارەكانی بۆ خواست و پشتگیری لە پێشنیارەكانی كرد بە تایبەت لە بەرەوپێشبردنی لایەنی كۆمەڵایەتی و زیاتر بە دیموكراسیكردنی كۆمەڵگە و هەوڵی زیاتر بۆ نەهێشتنی توندوتیژی دژی ئافرەتان.

هەروەها سوپاسی هاوكاری و هەماهەنگییەكانی پێشووی حكوومەتی سوید بۆ هەرێمی كوردستان كرد كە سودێكی زۆری لەبواری دەركردنی چەند یاسایەك هەبووە بەتایبەتی یاسای ڕووبەڕووبوونەوەی توندوتیژی دژی ئافرەتان و هاوكارییكردنی ئەو ژمارە زۆرەی ئاوارە و پەنابەران كە لە ترسی تیرۆر ڕوویان لە هەرێمی كوردستان كردووە.

گفتوگۆكردنی ڕەوشی سیاسیی هەرێمی كوردستان و گارانتیكردنی پێداویستییەكانی هاووڵاتیان و چارەسەركردنی كێشەكان بە ڕێگەی دیالۆگ و ڕەوشی ئەو هاووڵاتیە كوردانەی كە لە و سوید ژیان بەسەر دەبەن، لایەنێكی دیكەی دیدارەكە بوو.

 

 

ڕۆژی سێشەممە 13ـی 10ـی 2015 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە خاتوو ئانیكا مولین باڵیۆزی نوێی سوید لە عێراقی فیدڕاڵ كرد.

لە دیدارەكەدا باڵیۆزی نوێی سوید لە عێراق خۆشحاڵیی خۆی نیشاندا بۆ ئەو پەیوەندی و دیالۆگە نموونەییەی كە لەنێوان وڵاتەكەی و هەرێمی كوردستاندا هەیە و تۆڕێكی مێژوویی و مرۆڤی بەیەكەوەیان دەبەستێتەوە. وێڕای ئاماژەدان بە هاوكارییە سەربازییەكانی سوید بۆ هێزی پێشمەرگە جەختی لەوە كردەوە كە سوید بە بایەخەوە سەیری خۆڕاگری و قوربانیدانی پێشمەرگە لە بەرانبەر تیرۆریستان دەكات و لە ساتەوەختە مێژووییەكاندا لەگەڵ گەلی كوردستان دەبێت. باڵیۆزی سوید لە عێراق باسی شەڕی تیرۆریستان و هەڕەشەكانی تیرۆریستان بۆ سەر ئاساییشی ناوچەكەی كرد و بۆچوونی وڵاتەكەی لەبارەی دوا گۆڕانكارییە سیاسییەكانی ناوچەكە بە تایبەتی دەستێوەردانی سەربازی ڕووسیا لە سووریا خستەڕوو و هیوایشی خواست وڵاتەكەی بتوانێ ڕۆڵی هەبێ لە چارەكردنی كێشەكانی پێكهاتەكانی عێراق لە دوای شكستدانی تیرۆریستان.

لەبەرانبەردا سەرۆك بارزانی سوپاسی باڵیۆزی تازەی سویدی كرد و هیوای سەركەوتنی لە ئەرك و كارەكانی بۆ خواست و وێڕای ئاماژەدان بە پەیوەندیی مێژوویی نێوان گەلی كوردستان و گەلی سوید پێزانینیشی بۆ گەل و حكوومەتی سوید هەبوو كە لە ڕۆژانی تەنگانەدا پاڵپشتی كوردستانی كردووە و هەزاران هاووڵاتیی كوردی وەخۆ گرتووە. هەروەها سوپاسی هاوكارییە سەربازییەكانی سویدی كرد كە پێشكەشی هێزی پێشمەرگە كراوە.

لە درێژەی قسەكانیدا سەرۆك بارزانی باسی لە هۆكارەكانی سەرهەڵدان و گەشەی تیرۆر كرد لە ناوچەكە و باسی لە بارودۆخی مەیدانیی بەرەكانی شەڕ و هەروەها قۆناغی دوای ئازادكردنی موسڵ كرد و ئاماژەی بە باری دیموگرافی و فرەیی پارێزگای نەینەوا دا و جەختی لەوە كردەوە كە پێویستە گەرەنتی و ڕێوشوێنی ئیداری و سیاسی وا بگیرێتە بەر كە دڵنیایی تەواو بدرێتە پێكهاتەكان كە كارەساتەكان دووبارە نەبنەوە. سەرۆك بارزانی هێمای بە دۆخی ئاڵۆزی سووریایش دا و ئەوەی دووپات كردەوە كە ئەگەر هەماهەنگی و كاری هاوبەشی ڕووسیا و وڵاتانی هاوپەیمان لە لێدانی تیرۆریستانی داعش هەبێت و لە هەمانكاتیشدا چارەسەری سیاسی بۆ ئاییندەی سووریا لەبەرچاو بگیرێت ئەوە ئەنجامی باشتری لێدەكەوێتەوە.

بارودۆخی ناوخۆی هەرێمی كوردستان و گرژییەكانی ئەم دواییەی پارێزگای سلێمانی تەوەرێكی دیكەی كۆبوونەوەكە بوو. پەیوەست بەم بابەتەوە باڵیۆزی نوێی سوید داوای كرد گرژییەكان گەشە نەكات بۆ ئەوەی كاریگەری لەسەر شەڕی دژی تیرۆریستانی داعش نەبێت.

"نازم دەباغ" نوێنەری حکوومەتی ھەرێمی کوردستان لە ئێران، له‌گه‌ڵ"پێر لینێر" سکرتێری یەکەمی باڵیۆزخانەی سوید  لە تاران کۆبۆوە.

سەرلەبەیانی  ئەمرۆپێنجشه‌مه‌ رێکەوتی ١٣/٨/٢٠١٥ "پێر لینێر" سکرتێری یەکەمی باڵیۆزخانەی سوید  لە تاران سەردانی نووسینگەی نوێنەرایەتی حکوومەتی هەرێمی کوردستان لە تارانیکرد و لە لایەن "نازم دەباغ" نوێنەری حکوومەتی ھەرێمی کوردستان لە ئێران و "ئەمجەد بابەحاجی" ئەندامی نووسینگەی نوێنەرایەتی حکوومەتی ھەرێمی کوردستانلە تارانپێشوازیی لێکرا.

لە دانیشتنەکەدا دوو لایه‌ن سه‌باره‌ت بە باروودۆخی ئێستای ھەرێمیکوردستان و عێراق و بەرەنگاربوونەوەی داعش، پەیوەندییەکانی نێوان ھەرێمی کوردستان و عێراق و هه‌روه‌ها ئاڵۆزیەکانی ئەم دواییەی تورکیا هاتنه‌ ئاخاوتن.

سکرتێری یەکەمی باڵیۆزخانەی سوید  لە تاران و شاندی هاوڕێی پشتیوانی خۆیان نیشاندا بۆ بەردەوام بوون لە پشتیوانی کردنی هەرێمی کوردستان  لە بەرەنگاربوونەوەی گرووپی تیرۆریستی داعش.

 

"نازم دەباغ" نوێنەری حکوومەتی ھەرێمی کوردستان لە تاران تێروانینی حکومەتی هەرێمی لەمەڕ ڕووداوەکانی ئەم دواییەی ناوچەکە بۆ سکرتێری یەکەمی باڵیۆزخانەی سوید لە ئێرانباس کرد.

د.ویسف محەمەد سادق، سەرۆکی پەرلەمانی کوردستان دەڵێت "وڵاتی سوید بۆ ئێمە گرنگە، چ لە ڕووی ئەزموونی دیموکراسی و پەرلەمانییەوە، چ لەڕووی پێکهاتەی دانیشتوانەکەیەوە، کە ژمارەیەکی زۆر ڕەوەندی کوردی لەم وڵاتەدا نیشتەجێن و ئێستا هاوڵاتی سوید، بەشدارن لە پڕۆسەی بەڕیوبردنی وڵاتدا، بەتایبەتیش ئێستا چەندین پەرلەمانتار و چالاکوانی و کەسایەتی سیاسی دیار لەم وڵاتەدا کوردن، ئەمەش ئاماژەی تێکەڵاوبوونی ڕەوەندی کوردییە لەگەڵ کۆمەڵگەی سویدیدا، گرنگە بۆ ئێمە سوود لە ئەزموونی پەرلەمانی و دیموکراتی سوید وەربگرین.
ئەم وتانەی سەرۆکی پەرلەمانی کوردستان، لەمیانی دواهەمین وێستگەی سەردانی شاندی پەرلەمانی کوردستان هات بۆ پەرلەمانی سوید و کۆبوونەوەیان لەگەڵ سەرۆکی فراکسیۆنی پارتی سۆشیال دیموکرات و سەرۆکی لیژنەی پەیوەندییەکانی دەرەوەی پەرلەمان و تۆڕی پەیوەندی سویدی کوردستانی لە پەرلەمانی سوید.
لە دانیشتنەکاندا سەرۆکی پەرلەمانی کوردستان و شاندی یاوەری،باسیان لە بارودۆخی هەرێمی کوردستان و شەڕی دژ بە تیرۆرستان و پەیوەندی نێوان هەرێم و حکومەتی ناوەند و قەیرانی دارایی و ئاوارەکان کرد چەند پرسێکی تریان کرد.
پەرلەمانتارانی سوید لەبارەی پرسە جیاوازو گەرمەکانی گۆڕەپانی سیاسی کوردستان پرسیاریان لە شاندی پەرلەمانی کوردستان دەکرد.
لەبارەی پرسی پەیوەندی نێوان پەرلەمانی سوید و پەرلەمانی کوردستان، هەردولا ئەم پەیوەندییەیان بە پێویستییەکی گرنگ دانا، چونکە پەیوەندی نێوان هەردوو گەلی سوید و کوردستان مێژوویەکی دورودرێژی هەیە.

ئۆربان ئالین سەرۆکی پەرلەمانی سوید، لە کاتی پێشوازیکردن لە د.یوسف محەمەد سادق سەرۆکی پەرلەمان و سەرۆکی فراکسیۆنەکانی پەرلەمانی کوردستان وتی؛ "بەخێربێن بۆ سوید، ئێمە خۆمان بە دۆستێکی نزیکی ئێوە دەزانین، هەمو فراکسیۆنە جیاوازەکانی پەرلەمانی سوید، کۆ دەنگن کە حکومەتی سوید هاوکاری و پشتیوانی هەرێمی کوردستان بکات، خۆشبەختانە ئێستا پەیوەندییەکانی نێوان سوید و هەرێمی کوردستان لە ئاستێکی بەرزدایە. "

د.یوسف محەمەد سادق، سەرۆکی پەرلەمانی کوردستان، بەناوی خۆی پەرلەمانی کوردستانەوە سوپاسی سەرۆکی پەرلەمانی سویدی کرد و وتی "هاتنمان بۆ پەرلەمانی سوید بۆ پتەوکردنی پەیوەندی نێوانمانە، داواکارین لە سێ بواری گرنگدا هاوکارمانبن، ئەوانیش چارەسەرکردنی پێشمەرگە بریندارەکانی شەڕی داعش، بەداخەوە ئێستا پیشمەرگە لە بری دونیا شەڕی تیرۆرستان دەکات، بەڵام حکومەتی عێراق پابەند نییە بە ڕێکەوتنەکەی لەگەڵ هەرێم کە هاوکاری پێشمەرگە بکات، کردنەوەی کەمپ بۆ ئاوارەکان، وەبەرهێنانی کۆمپانیا سویدییەکان لە هەرێمی کوردستان بەرزبکەنەوە، لە بەشێکی تری وتەکانیدا سەرۆکی پەرلەمان وتی "ئێستا هەرێمی کوردستان لەشەڕێکی بەرفراواندایە لەگەڵ تیرۆرستان، هیوادارین سوید و وڵاتانی تری ئەوروپا لەو مەترسییە گەورەیەی تیرۆر بگەن، چونکە تیرۆر سنووری نییە و تیرۆرستان لە کوێ دەرفەتییان هەبێت ئاسایش دەخەنە مەترسییەوە.
سەرۆکی پەرلەمانی سوید، سوپاسی زانیارییەکانی سەرۆکی پەرلەمانی کوردستانی کرد و ئاماژەی بەوەدا لە ئایندەیەکی نزیکدا شاندێکی پەرلەمانی سوید سەردانی هەرێمی کوردستان دەکات و لە نزیکەوە چاودێری ڕووداوەکان دەکات و  پەیوەندییەکانمان و هاوکاری سوید بۆ کوردستان هەنگاوی گەورە بە خۆوە دەبینێت، بەتایبەتیش لە ڕووی مرۆیی و فریاگوزارییەوە.
 
 

 

 

 

 

دوایین هەواڵەکان

هەواڵی زیاتر لە تویتەر

راپۆرتە پڕ بینەرەکان

حالت های رنگی