پۆڵەتیك پرێس: // نازم دەباغ نوێنەری حكومەتی هەرێم لەتاران دەڵێت: هێرشەكەی ئەمریكا لەسوریا چاوەڕوانكرابوو، ئەو هێرشەش هیچ كاریگەری لەسەر پەیوەندیەكانی نێوان حكومەتی ئێران و هەرێم نابێت.
ئەو قسانەی نازم دەباغ لەدای ئەوە هات، لە ناوەڕاستی ئەم مانگە بە چەند موشەكێكی كاتیۆشا هێرش كرایە سەر فڕۆكەخانەی هەولێر، ئەمریكاش لەبەرانبەر ئەو هێرشە لە 25ی شوبات لەڕێگەی هێرشی ئاسمانییەوە هەردوو گروپی كەتائیب حیزبوڵڵا و كەتائیب ئەلشوهەدای سەر بەئێرانی لە سوریا كردە ئامانج.
نازم دەباغ نوێنەری حكومەتی هەرێمی كوردستان لە تاران بۆ پۆڵەتیك پرێس دەشڵێت: هێرشەكە چاوەڕوانكراو بوو، چونكە لەسەرەتاوە ئەمریكا بڕیاریدا تۆڵە لە ئەنجامدەرانی هێرشە موشەكییەكەی سەر هەولێر بكاتەوە، دوای ئەوەی حكومەتی هەرێمیش رایگەیاند ئەو كەسانەی دەستیان لەو پەلامارەدا هەبووە دەستنیشانكراون.
هەروەها دەڵێت: بەشێك لەو گومانانە ئەوە بوو ئەو كەسانە لەمەرزەكانی سوریاوە هاتبن، بۆیە ئەمریكا بەڵێنەكەی خۆی جێبەجێكرد، ئەو شوێنەشی دیاریكرد، كە لەم قۆناغەی ئێستادا رەنگدانەوەی خراپی نەبێت لەسەر پەیوەندییەكانی نێوان عێراق و ئەمریكا، هۆكاری هەڵبژاردنەكەی بۆ ئەوە دەگەڕێتەوە.
لەبارەی ئەوەی ئاخۆ تۆڵەكردنەوەی ئەمریكا لەگروپێكی نزیك لەئێران چ كاریگەرییەك دەكاتە سەر پەیوەندیەكانی نێوان ئێران و هەرێم، نوێنەری حكومەتی هەرێم دەڵێت: ئەو چالاكییە سەربازییەی ئەمریكا ئەنجامیدا پێموانییە كاربكاتە سەر نێوان پەوەندییەكانی حكومەتی هەرێمی كوردستان و كۆماری ئیسلامی ئێران، بەڵكو ئێران خۆشی ئەو كەسانەی مەحكوم كرد، كە ئەو كارەیانكرد، واتە بەرپرسیارێتی لە ئەستۆی ئەو كەسەیە، كە خاوەن بڕیار بووە لە ئەنجامدانی ئەو كارە، پەیوەندیەكانیش دەتوانێت لە شوێنی خۆیدا بێت.
بە بۆچوونی نازم دەباغ، ئەنجامدانی ئەو چالاكیە لەهەولێر نابێتە هۆی دوركەوتنەوەی هەوڵ و كۆششەكانی بۆ باشكردنی و نزیكبوونەوەی پەیوەندییەكانی ئێران و ئەمریكاش، لەهەمانكاتیشدا جۆبایدن و ئەمریكاش پابەندن بەو بەڵێنەی داویانە بەوەی لەهەر شوێنێك زەرەر لە ئەمریكابدرێت تۆڵەی خۆیان دەكەنەوە.
https://politicpress.com/36524/
سەرۆکی حکومەتی هەرێمی کوردستان پەیوەندییەکی تەلەفۆنی لە وەزیری دەرەوەی فەڕەنسا پێگەیشت
هەولێر، هەرێمی کوردستان، عێراق (GOV. KRD) - ئەمڕۆ پێنجشەممە 2021/2/25 مەسرور بارزانی، سەرۆکی حکومەتی هەرێمی کوردستان، پەیوەندییەکی تەلەفۆنی لە ژان ئیڤ لۆدریان وەزیری دەرەوەی فەرەنسا پێگەیشت.
لە پەیوەندییەکەدا گفتوگۆ دەربارەی هێرشە تیرۆریستییەکەی سەر شاری هەولێر کرا. سەرۆکی حکومەت سوپاسی وەزیری دەرەوەی فەرەنسای کرد بۆ سەرکۆنەکردنی هێرشەکە و ئاماژەی بەوەدا، کە زانیاری نوێ لە ئەنجامی لێکۆڵینەوەی هاوبەشی نێوان حکومەتی هەرێم و حکومەتی فیدراڵی بەدەستهاتوون.
هەردوولا هاوڕابوون لەسەر ئەوەی داعش، هێشتاش هەڕەشەیەکی ڕاستەقینەیە بۆ سەر ئاسایشی ناوچەکە و جەختیان لە سەر گرنگیی هەماهەنگی بەهێزی نێوان هەرێمی کوردستان و حکومەتی فیدراڵی و هاوپەیمانی نێودەوڵەتی کردەوە.
لە تەوەرێکی دیکەی پەیوەندییەکەدا، پەرەپێدانی زیاتری پەیوەندیی دۆستانە و پتەوی نێوان هەرێمی کوردستان و فەرەنسا دووپاتکرایەوە.
سەرۆکی حکومەتی هەرێمی کوردستان پەیوەندییەکی تەلەفۆنی لە وەزیری دەرەوەی فەڕەنسا پێگەیشت (gov.krd)
سەرۆكی هەرێمی كوردستان پێشوازی لە جێگری وەزیری دەرەوەی ئەرمەنستان كرد
سەرۆك نێچیرڤان بارزانی، كردنەوەی باڵیۆزخانەی ئەرمەنستانی لە بەغدا و كونسوڵخانەی گشتیان لە هەولێر و ناوەندێكی ڕۆشنبیریی ئەرمەنی لە قەڵای هەولێر، لەگەڵ كاركردن بۆ كردنەوەی گەشتیی ڕاستەوخۆی ئاسمانی لە بەغدا و هەولێرەوە بۆ یەریڤان، بە هەنگاوی باشی برەودان بە پەیوەندییەكانی عێراق و هەرێمی كوردستان لەگەڵ ئەرمەنستان لە قەڵەم دا و خۆشحاڵیی خۆی بەم هەنگاوانە دەربڕی.
نیوەڕۆى ئەمڕۆ چوارشەممە 2021/2/24 بەڕێز نێچیرڤان بارزانى، سەرۆکى هەرێمى کوردستان، پێشوازی لە بەڕێز ئارتاك ئاپیتۆنیان جێگری وەزیری دەرەوەی ئەرمەنستان كرد.
لە كۆبوونەوەیەكدا كە بەڕێزان باڵیۆزی ئەرمەنستان لە بەغدا و كونسوڵی گشتییان لە هەولێر ئامادەی بوون، گفتوگۆ سیاسی و دیپلۆماسییەكانی بەڕێز جێگری وەزیری دەرەوەی ئەرمەنستان لە بەغدا، پەرەپێدانی پەیوەندییەكانی هەرێمی كوردستان و عێراق لەگەڵ ئەرمەنستان، كردنەوەی باڵیۆزخانەیان لە بەغدا و كونسوڵخانەی گشتییان لە هەولێر، پەیوەندییەكانی نێوان هەردوولا بەتایبەتی لە بوارەكانی خوێندنی زانكۆیی، تەكنەلۆژیا و كشتوكاڵدا، دۆخی ڕەوەندی كوردی لە ئەرمەنستان و پێكهاتەی ئەرمەن لە هەرێمی كوردستان، تاوتوێ كران.
بەڕێز جێگری وەزیری دەرەوەی ئەرمەنستان خواستی وڵاتەكەی بۆ برەودانی زیاتر بە پەیوندییەكانی لەگەڵ هەرێمی كوردستان لە هەموو بوارەكاندا دووپات كردەوە و سوپاسی هەرێمی كوردستانی كرد بۆ ئەو گرنگییەی بە پێكهاتەی ئەرمەن دراوە كە توانیویانە لە پەرلەمانی كوردستان نوێنەرایەتییان هەبێت و كەنیسەیان بكەنەوە و مافەكانیان پارێزراو بێت.
سەرۆکى هەرێمى کوردستان لەگەڵ باڵیۆزى ئەمەریکا کۆبووەوە
پاشنیوەڕۆى رۆژی چوارشەممە 2021/2/24 بەڕێز نێچیرڤان بارزانى، سەرۆکى هەرێمى کوردستان، پێشوازى لە بەڕێز ماتیو تولەر باڵیۆزى ئەمەریکا لە عێراق کرد.
لە کۆبوونەوەیەکدا دوایین پێشهاتە ئەمنى و سیاسییەکانى عێراق و هێرشەکانى سەر هەولێر، دواتر بەلەد و بەغدا تاوتوێ کران و جەخت لە گرنگی و پێویستیى هەماهەنگیى نێوان لایەنه پەیوەندارەکان لە عێراق و هەرێمى کوردستان و بەردەوامیى هاریکارى و پشتگیریى هاوپەیمانیى نێودەوڵەتی بۆ بەرەنگاربوونەوەى تیرۆر و پاراستنى ئارامى و سەقامگیرى کرایەوە.
باڵیۆزى ئەمەریکا پابەندیى وڵاتەکەى بە بەردەوامیى دیالۆگى ستراتیژیى ئەمەریکى ـ عێراقى دووپات کردەوه و سەرۆک نێچیرڤان بارزانییش دیالۆگى ستراتیژى وەک چوارچێوەیەکى گرنگ بۆ برەودان بە پەیوەندییەکانى ئەمەریکا لەگەڵ عێراق و هەرێمى کوردستان لە قەڵەم دا، دووپاتیشى کردەوە کە هەرێمى کوردستان خوازیارى پەیوەندییەکى تەندروست و کارایە لەگەڵ حکوومەتى فیدراڵى عێراق و ئامادەیە کێشەکانى لەسەر بنەماى دەستوور چارەسەر بکات.
دۆخى هەرێمى کوردستان و گرنگیى یەکڕیزیى لایەنەکان، دوایین پێشهاتەکانى بڵاوبوونەى ڤایرسى کۆرۆنا و هەوڵەکان بۆ دابینکردنى ڤاکسین، هەڵبژاردنەکانى داهاتووى عێراق و هاریکاریى نەتەوە یەکگرتووەکان و کۆمەڵگەى نێودەوڵەتى لەمبارەیەوە، ڕێککەوتنى حکوومەتى هەرێمى کوردستان و حکوومەتى فیدراڵ بۆ ئاساییکردنەوەى دۆخى شەنگال، دۆخى دەشتى نەینەوا و چەند پرسیکى دیکەى جێى بایەخى هاوبەش، خرانە بەر باس.
نوێنەری حکومەتی هەرێم لە تاران، میوانی شارپرێسە پەیوەندیەکانی هەرێم و تاران، دواین گۆرانکاریەکانی ناوچەکە
سەرۆکی حکومەتی هەرێمی کوردستان پێشوازی لە سەرۆکی ڕەوتیی حیکمەی نیشتمانی و هاوپەیمانیی عیراقیون دەکات
• عەممار حەکیم: پشتگیریی ئەو ڕێککەوتنە دەکەین کە لە نێوان حکومەتی هەرێم و حکومەتی فیدراڵی هاتووەتەئارا لە سەر بودجەی عێراق بۆ ساڵی 2021
• سەرۆکی حکومەت: هەرێمی کوردستان هەمیشە لەگەڵ چارەسەری بنەڕەتی کێشەکان بووە لەگەڵ حکومەتی فیدراڵی
هەولێر، هەرێمی کوردستان، عێراق (GOV. KRD) - ئەمڕۆ یەکشەممە 2021/2/21 مەسرور بارزانی سەرۆکی حکومەتی هەرێمی کوردستان، پێشوازی لە عەممار حەکیم سەرۆکی ڕەوتیی حیکمەی نیشتمانی و هاوپەیمانی عیراقیون کرد.
لە دیدارەکەدا گفتوگۆ دەربارەی دۆخی عێراق و پەیوەندییەکانی هەرێمی کوردستان و حکومەتی فیدراڵی کرا.
سەرۆکی ڕەوتیی حیکمەی نیشتمانی وهاوپەیمانی عیراقیون، ئاماژەی بەوەدا کە هەرێمی کوردستان، بە دۆست و هاوپەیمانیی خۆمان دەزانین و پێویستە دەستوور، بکرێتە بنەمای چارەسەرکردنی کێشەکانی نێوان هەرێمی کوردستان و حکومەتی فیدراڵی.
گوتیشی ئێمە پشتگیریی ئەو ڕێککەوتنە دەکەین کە لە نێوان حکومەتی هەرێم و حکومەتی فیدراڵی هاتووەتەئارا لەسەر بودجەی عێراق بۆ ساڵی 2021 و هيوادارين لە ئەنجومەنی نوێنەرانی عێراق، دەنگی لە سەر بدرێت.
سەرۆکی حکومەت جەختی لەوە کردەوە کە هەرێم ، هەمیشە لە گەڵ چارەسەری بنەڕەتی کێشەکان بووە لە گەڵ حکومەتی فیدراڵی لە سەر بنەمای دابینکردنی ماف و شایستە دەستوورییەکانی هەرێمی کوردستان و پاراستنی تایبەتمەندی و قەوارەی فیدراڵی هەرێم و لەبەرچاوگرتنی پرنسیپەکانی هاوسەنگی و شەراکەت و سازان .
قوباد تاڵە‌بانی لەگەڵ باڵیۆزی ئەمریكا لە عێراق كۆبووە
• لە کۆبوونەوەکەدا دوا پێشھاتە‌كانی عێراق و كوردستانیان تاوتوێكران
هەولێر، هەرێمی کوردستان، عێراق (GOV. KRD) - لە‌میانی سە‌ر‌دانە‌كە‌یدا بۆ بەغدا، پاش نیوە‌ڕۆی رۆژی 17 شوباتی 2021، قوباد تاڵە‌بانی جێگری سەرۆكی ئەنجومەنی وەزیران، لەگەڵ باڵیۆزی ئەمریكا لە عێراق ماثیۆ تولەر كۆبووە.
لە‌كۆبوونە‌وە‌كە‌دا، دواپێشھات و گۆڕانكارییە سیاسی و ئە‌منییە‌كان خرانە بە‌رباس.
جێگری سەرۆكی ئەنجومەنی وەزیران باسی لە ڕێڕە‌وی گفتوگۆكانی وە‌فدی ھە‌رێم كرد لەبارەی پڕۆژە یاسای بودجەی٢٠٢١ی عێراق و كۆبوونە‌وەو دیدارەکان لەگەڵ لایە‌نە پە‌یوە‌ندیدارە‌كان.
ھێرشە مووشە‌كییە‌كە‌ی سەر شاری ھە‌ولێر بە‌شێكی تری گفتوگۆكان بوو و هەردوولا جەختیان لە گرنگی پاراستنی ئارامی عێراق و كوردستان كردەوە.
لە‌تە‌وە‌رێكی تردا باس لە رە‌وشی سیاسی و دوا گۆڕانكارییە‌كانی ھە‌رێمی كوردستان كرا.
پەیامی سەرۆك نێچیرڤان بارزانی سەبارەت بە هێرشی مووشەكی بۆ سەر هەولێر
هێرشی تیرۆریستیی شەوی ڕابردوو كە بە مووشەك كرایە سەر هەولێر و بووه هۆى گيانله‌ده‌ستدانى كەسێك و برينداربوونى نۆ كه‌سى دى كە ژماره‌يه‌كيان ئەمه‌ریكین، بە توندی سەركۆنە و شەرمەزار دەكەین. سەرەخۆشی لە كەسوكاری قوربانييه‌كه دەكەین و هیوای زووچاكبوونەوە بۆ برینداران دەخوازین.
داوا لە ئەنجومەنی ئاسایشی نێودەوڵەتی و نەتەوە یەكگرتووەكان دەكەین مه‌ترسيى ئەو هێرشە زۆر بە جددی وەربگرن و كار بكەن بۆ ڕێگرتن لە هەڕەشە لەسەر خەڵكی هەرێمی كوردستان لە ڕێگەی هاندانى حكوومەتی عێراقه‌وه بۆ جێبەجێكردنی دەستووری عێراق و بەتایبەتی مادەی 140.
داوا لە بەڕێز سەرۆك وەزیران و فەرماندەی گشتیی هێزە چەكدارەكانی عێراق و فەرماندەیيی هێزەكانی هاوپەیمانان لە عێراق دەكەم، بە خێرایی ميكانيزمى هه‌ماهه‌نگى له‌گه‌ڵ هه‌رێمى كوردستان كارا بكه‌نه‌وه و هێزەكانی ئاسایش و پێشمەرگە لەگەڵ سوپا و دەزگا و هێزە عێراقييه‌كان بە بەشداريی هاوپەیمانان لەو ناوچەیە، پێكه‌وه كار بكه‌ن و هه‌ماهه‌نگ بن.
نه‌بوونى هه‌ماهه‌نگى و هەبوونی هه‌ندێك هێز و گرووپى چه‌كدارى ده‌ره‌وه‌ى فه‌رمان و ده‌سه‌ڵاتى حكوومه‌تى فيدراڵ، بوونه‌ته هۆى ئاڵۆزيى ناوچه‌كه و وایكردووە هەڕەشەیەكی بەردەوام بۆ سەر هەرێمی كوردستان هه‌بێت. بۆيه داوا له به‌ڕێز سه‌رۆك وه‌زيرانى عێراق ده‌كه‌م به‌په‌له ليژنه‌يه‌كى هاوبه‌شى لێكۆڵينه‌وه‌ى حكوومه‌تى هه‌رێمى كوردستان و حكوومه‌تى فيدراڵ ده‌ستبه‌كار بێت و به زووترين كات هێرشكاران بدۆزرێنه‌وه و به سزاى ياسايى بگه‌يه‌نرێن.
نێچیرڤان بارزانی
سەرۆكی هەرێمی كوردستان
2021/2/16
نازم دەباغ: چاوەڕوانی هەڵوێستی فەرمی دەوڵەتی عێراق بۆ چوونەدەرەوەی هێزەکانی ئەمەریکا لە هەرێمی کوردستانین
"نازم دەباغ" نوێنەری حکومەتی هەرێمی کوردستان لە ئێران گوتی: هەرێمی کوردستان لە بابەتی چوونەدەرەوەی هێزەکانی ئەمەریکا چاوەڕوانی هەڵوێستی فەرمی و هەنگاویی دەوڵەتی ناوەندی عێراقە.
بە پێی ڕاپۆڕتی گرووپی نێودەوڵەتی ئاژانسی هەواڵنێری "ئانا"، شەوی ڕابردوو (دووشەمە 15ی فێبرییەی 2021) چەندین مووشەک ئاڕاستەی شاری هەولێر و دەورووبەریی کرا و بە چەندین شوێنی ئەوێدا تەقییەوە و بەم هۆیەوە چەندین کەسیش برینداربوون. وەزارەتی تەندروستی هەرێمی کوردستان سەبارەت بە ڕێژەی بریندارەکانی ئەم هێرشە ڕایگەیاند کە سێ کەس لەوانە یەکێک لە پاسەوانەکانی کونسوولگەری ئەمەریکا لە هەولێر لە نێو بریندارەکاندایە.
ئەوە لە حاڵێکدایە کە هەندێک سەرچاوە هەواڵنێرییەکان ژمارەی هاوەنەکان بە دوو دانە و هەندێکیش بە پێنج دانە هەژمار دەکەن. تەلەڤیزیۆنی "ئەلمەیادین"ی لوبنانیش لە ڕاپۆڕتێکدا ڕایگەیاندووە کە هێرشەکە بە هۆی تەقینەوەی سێ قۆمپارە بووە. هێزە ئەمنییەکانیش ئەو ڕێگایانەی کە دەچنەوە سەرە فڕۆکەخانەیان بەستووە بۆ ئەوەی کە پێش لە هەر هەنگاوێکی ئەوتۆی دیکە بگرن و بە شێوەی بەربڵاو، چاودێریی هێزەکان لە دەرووبەریی فڕۆکەخانەی هەولێر بەردەوامە.
بە شوێن ئەم هێرشەدا، هەندێک سەرچاوەی هەواڵنێریی ڕایانگەیاند کە هەندێک کۆپتەری ئەمەریکی بەسەر ئاسمانی فڕۆکەخانەی هەولێردا دەسووەڕێنەوە. ئەم هێرشانە لە حاڵێکدا ئەنجام دەدرێت کە ئامادەبوونی هێزەکانی ئەمەریکا لە عێراق و بە تایبەت هەرێمی کوردستان ،مەترسی بەدواوەیە و دوای شەهیدکردنی ژنێڕاڵەکانی خۆڕاگریی "قاسم سلێمانی" و "ئەبوومەهدی ئەلمەهەندیس" و بە مەبەستی تۆڵەسەندنەوە، بوونە ئامانجی هێزەکانی حەشدی شەعبی و خۆڕاگری خەڵکی عێراق.
"نازم دەباغ" نوێنەری حکومەتی هەرێمی کوردستان لە ئێران لە وتووێژ لەگەڵ پەیامنێری بەشی ڕۆژئاوای ئاسیا و میحوەری خۆڕاگریی گرووپی نێودەوڵەتی ئاژانسی هەواڵنێری "ئانا"، گوتی: ئامادەبوونی ئەمەریکییەکان بۆ ئەمڕۆ و دوێنێ نییە و ساڵانێکە کە لە عێراق بوونیان هەیە. بەتایبەت دوای ئەوەی کە جوگرافیای هەرێمی کوردستان دوای ڕیفڕاندۆم بە پێی یاسای بنەڕەتی عێراق بووە بەشێک لە نیشتمانی عێراق و بڕیارە گشتییەکانی ئەوێی پەیوەستە بە بڕیارەکانی دەوڵەتی ناوەندی عێراق و بەغداوە.
گوتیشی: ئەمەریکییەکان لە شەڕ دژی گرووپی تیڕۆریستی داعش، یارمەتی هەرێمی کوردستانیاندا و هەر بەم هۆیەوە کوردەکان بوونی ئەوانیان لە هەولێر قەبووڵ کردووە. بێجگە لەوە، هەرێمی کوردستان پشتیوانی لە ئامادەبوونی ئێرانییەکان لە هەولێر کردووە. خاڵێکی گرینگ ئەوەیە کە هەولێر بە هێچ شێوەیەک ئیزن نادات کە خاکی هەرێمی کوردستان ببێتە سەرچاوەی هێرش، مەترسی و نائەمنی بۆ دراوسێکان و بە تایبەت ئێران.
نوێنەری حکومەتی هەرێمی کوردستان لە تاران لە وڵامی پرسیارێکدا سەبارەت بە هەوڵوێستی هەولێر دەربارەی چوونەدەرەوەی هێزکانی ئەمەریکا لە عێراق، جەختی کردەوە: هەرێمی کوردستان لە بابەتی چوونەدەرەوەی هێزەکانی ئەمەریکا چاوەڕوانی هەڵوێستی فەرمی و هەنگاویی دەوڵەتی ناوەندی عێراقە.
دەباغ گوتیشی: سەرتاسەری عێراق، پێویستی بە هاوکاریی لەگەڵ وڵاتانی یەکپارچە لەوانە کۆماری ئیسلامی ئێرانە کە لە دژیی تیڕۆریستانی وەکوو داعش خەباتیان کردووە و هەروەها لە داهاتووشدا بەردەوام خەبات دەکەن.
نوێنەری حکومەتی هەرێمی کوردستان لە تاران لە کۆتایی قسەکانیدا گوتی: هەولێر لە چوارچێوەی ڕێککەوتنەکان لەگەڵ بەغدا هاوکاریی دەکات و دەوڵەتی ناوەندی دەبێت بە پێی یاسای بنەڕەتی مافی ڕەوای کوردەکانی هەرێمی کوردستان بپارێزێت، بەڵام تا ئێستا پشتیوانی پێویست لە کوردەکان نەکراوە.
لینکی هەواڵ:
https://ana.press/fa/news/33/564582/منتظر-موضع-رسمی-دولت-عراق-برای-اخراج-نیروهای-آمریکایی-از-اقلیم-کردستان-هستیم-اجازه-نمی%E2%80%8Cدهیم-اربیل-مبدأ-تهدید-ایران-شود
نوێنه‌ری حكومه‌تی هه‌رێم له ئێران: هێرشه‌كانی هه‌ولێر كۆتا ڕووداو نابن
پۆڵه‌تیك پرێس:
نوێنەری حكومەتی هەرێم لە ئێران دەڵێت، ئامانجی هێرشەكەی هەولێر بۆ تێكدانی ئارامی هەرێمی كوردستان و تێكدانی پەیوەندییەكانی هەرێم و ئێران، ئێران و ئەمریكایە.
نازم دەباغ، نوێنەری حكومەتی هەرێمی كوردستان لە ئێران، له‌باره‌ی هێرشه موشه‌كییه‌كانی شه‌وی ڕابردووی شاری هه‌ولێر به پۆڵەتیك پرێس-ی ڕاگه‌یاند، “بە بڕوای من لە ناوچەكە و رۆژهەڵاتی ناوەڕاست دەمێكە پیلان و هه‌وڵێك هەیە بۆ زیاتر قوڵكردنەوەی كێشەكانی نێوان ئێران و ئەمریكا و هەندێكجاریش ئێران و هەرێمی كوردستان”.
له‌باره‌ی تۆمه‌تباركردنی ئێران به “ده‌ستهه‌بوون”ی له‌و هێرشه موشه‌كیانه نوێنەری حكومەتی هەرێم لە ئێران وتی:”جاری یەكەم نیە پەنجەی ئەنجامدانی ئەو جۆرە كارانە بەرەو ڕووی ئێران رادەكێشرێت، بەڵام ئەوەی ئێمە لێی ئاگاداربووین تەنها لە بۆردومانی بارەگاكانی حزبی دیموكرات ئێران بەرپرسیاری خۆی راگەیاند، ئەوانی دیكە كە جاری سێیەمە هەولێر موشەكباران دەكرێت، دوو جارەكەی پێشوو نەیانتوانی بیسەلمێنن لە ئێرانەوە هەولێر موشەكبارانكراوە، ئەمجارەی كۆتایش بەڵگەیەكی ئاشكراو روون هەیە گروپێك ئەنجامیانداوە لەناو هەرێمی كوردستان و عێراقدا، ئەو كەسەی بەرپرسیارێتی خۆی رادەگەیەنێت سەر بە كام لایە، مەرج نیە ئەوەی شیعە بێت و ئەم كارانە ئەنجام بدات سەر بەئێران بێت”.
باسی لەوەشكرد، “بەدووری دەزانم ئەم روداوە دەستی ئێرانی تێدابێت تەنها دەستی ئەوانەی تێدایە نایانەوێت ئارامی لە ناوچەكەدا هەبێت و ئەمریكا و ئێران لەیەكدی نزیك ببنەوە، چونكە ئێستا ئەمریكا سەرۆكێكی نوێ هەیە، ئه‌و وڵاته و ئەوروپاش دەیانەوێت بگەڕێنەوە بۆ رێككەوتنی ئەتۆمی پێنج كۆ یەك”.
به‌بۆچوونی نوێنه‌ره‌كه‌ی هه‌رێمی كوردستان له تاران، هێرشه‌كانی شه‌وی دووشه‌ممه كۆتا رووداو نابێت “بۆیە پێویستە بەدوای هۆكاری ئەو رووداوانەدا بگەڕێین و رێگەنەدرێت بەو كەسانەی دەیانەوێت لە ئاوی لێڵدا ماسی بگرن، زۆرگرنگە بۆ حكومەتی هەرێمی كوردستان نەكەوێتە ژێر كاریگەری بارودۆخی هەندێك سیاسەت لە ناوچەكەدا چونكە ئەوەی ئەو كارەی كردووە ئامانجی تێكدانی ئارامی هەرێم و تێكدانی پەیوەندییەكانی هەرێم و ئێرانە، هه‌روه‌ها تێكدانی ئەو هەوڵانەیە كە دەرێت لە پێناو گەڕانەوەی ئێران و ئەمریكا بۆسەر مێزی گفتوگۆ”.
https://politicpress.com/34844/
More...
نه‌ته‌وه يه‌كگرتووه‌كان جه‌خت له ڕۆڵى سه‌رۆكايه‌تيى هه‌رێمى كوردستان ده‌كاته‌وه
دەقی گوتاری مەسرور بارزانی سەرۆکی حکومەتی هەرێمی کوردستان لە ئیڤێنتی TEDxNishtman
سەرۆکی حکومەتی هەرێمی کوردستان پێشوازی لە نادیە موراد دەکات
ڕاگه‌يه‌نراوێك لە سەرۆكی هەرێمی كوردستانەوە
دوایین هەواڵەکان
- پهيامى سه‌رۆك نێچيرڤان بارزانى بۆ ساڵى نوێ
- پەیامی سەرۆکی حکومەتی هەرێمی کوردستان بە بۆنەی سەری ساڵی نوێی زایینی2025
- سهرۆكى هه‌رێمى كوردستان، پێشوازيى له كونسوڵی گشتيى نوێى ئێران كرد
- عەباس غەزالی: کۆچی مامۆستا مهنسوور یاقووتی وهک لهدهست چونی یاقووتێکی گرانبههایه
- سهرۆک نێچیرڤان بارزانی له‌گه‌ڵ وهزیری بهرگریی هۆڵهندا کۆبووهوه
- سه‌رۆك نێچيرڤان بارزانى پێشوازيى له ئيسماعيل بهشيكچى كرد
- سه‌رۆك نێچيرڤان بارزانى و وهزيرى بهرگريى ئيتاڵيا كۆبوونهوه
- سه‌رۆك نێچيرڤان بارزانى له‌گه‌ڵ فەرماندەی هێزەکانی هاوپەیمانيی نێودەوڵەتی كۆبووهوه
- سه‌رۆك نێچيرڤان بارزانى پێشوازیی له باڵيۆزى نوێى چيك كرد
- سەرۆک نێچیرڤان بارزانی پێشوازیی لە سوپاسالاری بەریتانیا کرد