بەشی یەكەم // رووداو – هەولێر //    21 ساڵە وەك نوێنەری حیزب و پاشان نوێنەری حكومەت لە ئێرانە. خۆی دەڵێت زۆر جێی متمانەی قاسم سولەیمانی بووە، بۆ ئەمەش بەسەرهاتێك دەگێڕێتەوە و دەڵێت رۆژێكیان پێكەوە بوونە، قاسم سولەیمانی ژانەسەری گرتووە، داوای حەبێكی لێكردووە، ئەویش پێیگوتووە دەكرێ من پێش تۆ حەبەكە بخۆم؟

 

نازم دەباغ، نوێنەری حكومەتی هەرێمی كوردستان لە هەڤپەیڤینێكی درێژدا لەگەڵ (رووداو) باسی پەیوەندیی خۆی و قاسم سولەیمانی، هەروەها پەیوەندی سەركردایەتیی كورد و ئەو جەنەراڵە و چەند وێستگەیەكی ژیانی ئەو دەكات.

 

رووداو: لە سەرەتای شەڕی داعش، بەیانییەكی زوو لەگەڵ مەلابانگدان خەبەرت دەكەنەوە بۆ بەشداری لە كۆبوونەوەیەكی گرنگی ئێرانییەكان كە قاسم سولەیمانیش بەشدار بوو، لەوێ‌ حاجی قاسم باسی توانای پێشمەرگەی كردبوو، دەكرێ‌ لەو كۆبوونەوە گرنگەوە دەست بە هەڤپەیڤینەكەمان بكەین، ناوەڕۆكەكەی چی بوو؟

 

نازم دەباغ: پێموایە هەڵەیەك هەیە، حاجی قاسم لە كۆبوونەوەكە نەبوو، بەڵكو موحسین رەزایی بوو كە سەرۆكی شوورای دیاریكردنی بەرژوەندییەكانی نیزامە. لە نووسینگەی رەهبەرەوە هاتبوو، ئەمە مێژووە بۆیە دەیڵێم. دیاربوو كە بەدوایدا ناردم كۆمەڵێ خەڵكی لێبوو، گوتی من لە نووسینگەی رەهبەرەوە دێم و سڵاوی بۆ یەكێتی و تاڵەبانی هەیە، ئەوكاتە مام جەلال نەخۆش بوو. 

 

گوتی باسی دۆخی عێراق و هەرێمی كوردستان و داعشمان لە هەولێر و موسڵ كردووە، رەهبەر پێی خۆش بووە راوێژێكمان هەبێ لەگەڵ ئێوە. دیارە لەوبارەیەوە كۆمەڵێك قسە كرا، بۆچوونی جیاواز هەبوو، كەسانێكی بەهێز و بەتوانا هەبوون لەگەڵ ئەو بۆچوونەدا بوون كە پارێزگاری لە هەرێمی كوردستان بكرێ، نامەوێ ناوی ئەو كەسانە بهێنم و لەناو ئەو كەسانەدا تەنیا من كورد بووم. 

 

رووداو: وەكو نوێنەری حكومەت بەشدار بووی؟

 

نازم دەباغ: من ئەگەر درۆت لەگەڵ نەكەم وەك نوێنەری مام جەلال و یەكێتی لە كۆبوونەوەكەدا بەشدار بووم. هەموو ئەو كەسانەی لە كۆبوونەوەكەدا بوون پلە باڵا بوون، لەوێ رای جیاجیا هەبوو لەسەر هەرێمی كوردستان و هەڵوێستەكانی، بەڵام كەسانێكی بە دەسەڵات بۆچوونیان وابوو كە لە هەولێر و دەرەوەی هەولێر دەبێ شەڕی داعش بكەین و هەرێمی كوردستان بپارێزین، چونكە لە بەرژەوەندی خۆماندایە، هەر ئەوەشیان كرد.

 

رووداو: هاوكارییەكانی ئێران لە رووی چەك و تەقەمەنییەوە بۆ هەرێمی كوردستان لە شەڕی داعش پەیوەندی بەو كۆبوونەوەیەی ئێوە هەبوو؟

 

نازم دەباغ: بەشێكی، چونكە لە هەرێمی كوردستانیشەوە بەرپرسی باڵای هەرێمی كوردستان ئەو شەوە پەیوەندییان كرد، ئەو بەرپرسانە تەلەفۆنیان بۆ من كرد كە بارودۆخەكە بەكوێ گەیشتووە. من لە كۆبوونەوەكە  قسەیەكم كرد، بەڵام بە جۆرێك دیكە قسەكەی من بڵاوكرایەوە. گوایە من گوتوومە ئەگەر پارێزگاری لە هەرێمی كوردستان نەكەن، تەورێز دەبێت بە ئۆردوگایەكی گەورە بۆ ئاوارەكانی كورد، بەڵام گوتم بە دڵنیاییەوە جارێكی دیكە بۆی هەیە گەلی كورد تووشی كۆڕەو ببێ، چونكە پلانەكە گەورە بوو، بۆ تێكدانی ئەزموونی هەرێمی كوردستان بوو. بۆ دەركردنی سەركردایەتی سیاسی كورد و تێكدانی ئەم تەجروبەیە بوو.

 

رووداو: بۆچی هەرێمی كوردستان بەلای ئێرانەوە ئەوەندە گرنگە و دەیەوێ پارێزراو بێ؟

 

نازم دەباغ: من ناتوانم بەناوی ئێرانەوە قسە بكەم، بەڵام دەتوانم تێگەیشتنی خۆم بۆ هەڵوێستی ئێران بەرامبەر بە هەرێمی كوردستان دەربڕم، من وای دەخوێنمەوە ئێران كورد بە پارسەنگ و هاوسەنگێكی باش دادەنێ بۆ راگرتنی هاوسەنگی لەگەڵ شیعە و سوننە، چونكە كورد سوننەیە و ئەگەر سوننەی كورد و سوننەی عەرەب یەكبگرن واتە دەبێتە زۆرینە.

 

رووداو: چەند جار لەگەڵ قاسم سولەیمانی دانیشتووی؟ 

 

نازم دەباغ: حیساب ناكرێ، چونكە زەمانی رەوانشاد مام جەلال جاری وا هەبووە هەفتەی دوو سێ جار لە نێوانیاندا هاتوچۆم كردووە. جاری واش هەبووە مانگی چەند جارێك، جاری واش هەبووە دوو مانگ جارێك.

 

رووداو: بیرتە یەكەمجار كەی ئەوت بینی؟ باسی چیتان كرد؟

 

نازم دەباغ: یەكەمجار كە بینیم دوای راپەڕین بوو لە ساڵی 1991 ، بەناوی بەرەی كوردستانی ئەو سەردەمە خوالێخۆشبوو كاك سامی عەبدلڕەحمان، كاك قادر قادر، كاك ئەمیر هەبوو، وەزیری پیشەسازی لە كابینەی یەكەمی حكومەتی هەرێمی كوردستان، منیش بەناوی نوێنەرایەتی یەكێتی و مام جەلال لەگەڵ ئەو شاندە بووم، لە تاران بینیمان.

 

رووداو: باسی چیتان كرد؟

 

نازم دەباغ: باسی ئەو شتانەمان كرد كە كورد پێویستی بوو، ئەو كاتە یەكێك لە كێشە گەورەكانمان سووتەمەنی بوو، دەمانویست ئێران هاوكاریمان بكات، هاوكاریش بوون.

 

رووداو: قەت لە كوردستان لەگەڵ حاجی قاسم دانیشتووی؟

 

نازم دەباغ: بەڵێ زۆر جار. من هەماهەنگیم كردووە، بەشداریم كردووە لەو كۆبوونەوانەی كە مام جەلال و كاك نێچیرڤان و عادل عەبدولمەهدی هەرسێ پێكەوە چوونە شوێنێك، ئەویش لە تارانەوە هات.

 

رووداو: ئەمە ساڵی چەند بوو؟

 

نازم دەباغ: ساڵەكەم بەتەواوی لەبیر نییە، بەڵام ئەوكاتە مام جەلال تازە ببووە سەرۆككۆماری عێراق. ئیدی بە هەلیكۆپتەر هاتین بۆ ئەو شوێنە، بەڵام دواتر هەواكە ناخۆش بوو توانای بینین كەم بوو، بۆیە بە ئۆتۆمبێل گەڕاینەوە كرماشان و لەوێشەوە بۆ تاران. چەند جارێكی دیكەش هەر لەناو كوردستان كۆبووینەتەوە، یەكەمجار لە كوردستان لە مەسیف سەلاحەددین لەگەڵ حاجی قاسم كۆبوومەتەوە.

 

رووداو:  قەت نانتان پێكەوە خواردووە؟

 

نازم دەباغ: نانی بەیانیمان زۆر پێكەوە خواردووە، یەكێك لە سیفەتەكانی ئەوە بوو كە كاری گرنگی هەبووایە، خۆ تۆ رۆژنامەی هەمشەهریت بینی؟ ئەوەی لەسەر ئەو پیاوە گوتوومە كەمە، بۆنموونە جاری وا هەبووە 11 و 12ی شەو تەلەفۆنم بۆ كردووە بۆ ماڵەوە، وەڵامی داومەتەوە.

 

رووداو: پەیوەندیتان ئەوەندە بەهێز بوو؟

 

نازم دەباغ: بەهۆی مام جەلالەوە بوو، چونكە ئەو پێگەیەی هەمبوو، لەبەر ئەوە بوو كە نوێنەری مام جەلال بووم، بەڵام خۆم توانیومە پارێزگاری لێ بكەم. جا بۆ نانی بەیانیان تەلەفۆنم بۆ كردووە گوتوویەتی سەعات  6:30 وەرە فڵان شوێن نانی بەیانی پێكەوە بخۆین.

 

رووداو: زۆرتر لە كوێ‌ نانی بەیانیتان دەخوارد؟

 

نازم دەباغ: زۆرتر لە شوێنی كارەكانی، كە چەند شوێنێكی هەبوو تایبەت.

 

رووداو: ئەی لە شوێنی كارەكەی تۆ؟

 

نازم دەباغ: لە شوێنی كاری من نانمان پێكەوە نەخواردووە، بەڵام رێككەوتووە ماڵەكەیان لە شوێنێك بوو لەسەر رێگایەك، گوتوویەتی وەرە فڵان شوێن راوەستە، لەگەڵ خۆی و شۆفێرەكەی، ئەو كوڕەی لەگەڵی شەهید بوو (جەعفەری)، هاتووەتە خوار و هاتووەتە ناو سەیارەكەی من، چونكە من شۆفێرم لەگەڵ نەبوو، قسەكانی لەناو سەیارەكەی من كردووە و دواتر چووەتەوە ناو سەیارەكەی خۆی. هەتا جارێ پێمگوت حاجی ئومێدەكەم ئەمە دووبارە نەبێتەوە. گوتی بۆ؟ گوتم خوانەخواستە ئەگەر شتێك بقەومێ تەنیا من مەوعیدەكەی تۆم لەم شوێنە زانیوە، لەبەر ئەوە بۆ جارێكی دیكە ئاوابێ نایەم. هەر كاتێكیش مەوعیدی دانابێ‌، ئەو پێش من گەیشتووەتە شوێنەكە. ئەگەریش دواكەوتبێ تەلەفۆنم بۆ كراوە گوتوویانە (10) خولەك خۆت دوابخە، چونكە لەوێ نییە.

 

رووداو: چ سیفەتێكی قاسم سولەیمانیت بەدڵ نەبوو؟

 

نازم دەباغ: تەمەننا دەكەم هەموو سەركردەیەك وەك ئەو بێ.

 

رووداو: قەت چوویت بۆ ماڵەكەی یان هاتووە بۆ ماڵەكەت؟

 

نازم دەباغ: نەخێر، من بڕوام بە قسەیەكی سوڵتان سولەیمان هەیە كە لە زنحیرەی حەریمی سوڵتان زاواكەی دەكات بە سەرۆكوەزیران و مۆرەكەی دەداتێ‌ و سوپاسی دەكات. ئەوەشی پێدەڵێ چەند لە گەورە پیاو نزیك ببیتەوە، ئەوەندەش لە مەرگ نزیك دەبیتەوە.

 

رووداو: لە روانگەی قسەكەی خۆتەوە، كەواتە بە نزیكیی تۆ لە قاسم سولەیمانی ئەگەری مردنت زیاتر بووە؟

 

نازم دەباغ: بەڵێ بەس نەترساوم، بۆ نموونە ئەوەتا ئەبومەهدی موهەندیس لە قاسم سولەیمانی نزیك بوو چی بەسەرهات؟ من بە فڕۆكەی تایبەت لەگەڵی هاتووم بۆ هەولێر و سلێمانی. بە ئۆتۆمبێل لە پاوەوە چووین بۆ كرماشان و مەریوان. لەگەڵی هاتووم بۆ قەڵاچوالان.

 

رووداو: بۆ دڵنیایی تۆی لەگەڵ خۆی دەگێڕا؟

 

نازم دەباغ: مام جەلال دەیگوت جێی مەهێڵە، چونكە كە تۆ پێیدەڵێی وەرە، دەبێ دڵنیای بكەیەوە و لەگەڵی بی، كاتێك پیاوێكی وا بانگ دەكەی، قەناعەت بكە سەری ئێشاوە حەبی لە من وەرگرتووە. بە ترسەوە پێمگوتووە ناكرێ خۆم سەرەتا حەبەكە بخۆم؟ گوتی عەیبە ئەو قسەیە چییە دەیكەی، چونكە پیاوێكی وا گەورە كێ ناڵێ تۆ حەبێكی بدەیە نامرێ. متمانەی زۆر بە من هەبوو.

 

رووداو: لە هەڤپەیڤینێكدا لەگەڵ گۆڤاری (همشهری جوان) رۆژنامەنووسە ئێرانییەكە دەڵێت، بۆ ئەوەی باشتر حاجی قاسم بناسین، چووین بۆ لای نازم دەباغ! ئەمە هەر موجامەلە بوو، یان بەڕاستی وایە و تۆ بانكی زانیاری بوویت لەبارەی حاجی قاسمەوە؟

 

نازم دەباغ: نە ئەو پێویستی بە موجامەلەیە، نە منیش دەیكەم، ئەو سوور بووە لەسەر ئەوەی من قسەی بۆ بكەم. بایی خۆم زانیاریم لەسەر حاجی قاسم هەیە لە شێوەی كاركردنی لەگەڵ جەنابی مام جەلال و كاك مەسعود و كاك نێچیرڤان. زۆرجار رێككەوتووە پەیامی حاجی قاسمم بۆ مام جەلال و بۆ كاك مەسعود هێناوە.

 

رووداو: دیارترین ئەو پەیامانە چین و زیاتر بۆ كێت هێناون؟

 

نازم دەباغ: بۆ كاك مەسعود یەك دوو جار پەیامیم بۆ هێناوە، جارێك راستەوخۆ خۆم بۆم هێنا. جارێكیش لە رێگەی مام جەلالەوە گەیاندم. بۆ كاك نێچیرڤانیش چەندینجار پەیامی فەرمیی حكومەت و كۆماری ئیسلامیم هێناوە. لە رێگای پەیوەندییەكانی دەرەوە و كاك عەبدوڵڵا ئاكرەیی.

 

رووداو: نووسەر عارف قوربانی لە وتارێكدا لە (رووداو) نووسیبووی ئەگەر كۆنگرەی یەكێتی دوای كوژرانی قاسم سولەیمانی بكرابایە ئەنجامەكەی بەشێوەیەكی دیكە دەبوو؟ كاریگەریی قاسم سولەیمانی بەسەر یەكێتییەوە هێندە زۆر بوو؟

 

نازم دەباغ: پێموایە كاریگەریی حاجی قاسم لە ئاستێكدا بەسەر هەموو سەركردایەتی كوردەوە هەبوو، بەڵام بەرژەوەندییەكان زیاتر لەگەڵ یەكێتی بووە، چونكە مەرزێكی درێژمان هەیە. تۆ حساب بكە 435 كیلۆمەتر مەرزمان لەگەڵ ئێران هەیە. رەنگە لەگەڵ پارتی 15 بۆ 20 كیلۆمەتر بێ، چونكە ئەمسەری لەگەڵماندا پەكەكەیە و ئەو سەری تا دەگاتە توركیا هەر پەكەكەیە. تەنیا حاجی ئۆمەرانە و باقی دیكە لەگەڵ یەكێتییە، بەرژەوەندی توركیا لەگەڵ پارتی چەندە بەو ئەندازەیەش بەرژەوەندیی ئێران لەگەڵ یەكێتی هەیە. بەڵام من بۆ مێژوو دەڵێم ئەو لێكدانەوەیەی ئێران بۆ كورد هەیەتی لە نێوان یەكێتی و پارتی، ئەو لێكدانەوەیە مومكینە لایەنێكی دیكە نەیبێ.

 

رووداو: چۆن؟

 

 نازم دەباغ: بۆ نموونە ئێمە ئەزموونی 31ی ئابمان هەیە، من دوای 14 رۆژ كە لە هەولێر خۆم شاردبووەوە، بە قاچاخ خۆم گەیاندە نەغەدە. مام جەلال یەكسەر منی كردە بەرپرسی هەماهەنگیی ئێران و یەكێتی. لە نەغەدە جیهازم هەبوو لەگەڵ هەموو لایەك پەیوەندیم هەبوو، تا ئەو شوێنەی ئێستا كە یەكێتی گەیشتووەتە دێگەڵە و دۆڵی سماقوڵی و دۆڵی شەهیدانیش كە گەیشتینە ئەوێ، ئێرانییەكان بە منیان گوت تەواو. ئێمە نامانەوێ‌ پارتی لەناوبچێ‌. ئەمە مێژووە و قسەی دیكەش هەیە بیكەم، بەڵام ناكرێ، بۆ نموونە چۆن پەیام بۆ پارتی نێردرا كە لە مەسیف بمێننەوە.

 

رووداو: چۆن پەیامیان بۆ نێردرا، كێ‌ پەیامەكەی نارد؟

 

نازم دەباغ: ئێرانییەكان خۆیان ناردبوویان، پەیامەكەش زارەكی بوو، پێیانگوترا تەواو یەكێتی لەوە زیاتر ناتوانێ بێتە پێشەوە. ئەمە سیاسەتی ئێرانە.

 

 رووداو: من وەڵامی پرسیارەكەی كوژرانی قاسم سولەیمانی و كۆنگرەی یەكێتیم وەرنەگرتەوە؟

 

نازم دەباغ: من پێموایە كاك عارف قوربانی كەمێك زانیارییەكانی تەواو نییە. من بڵێم  ئێران كاریگەری لەسەر نەبووە، هەیبووە، هەر وەك چۆن كاریگەری لەسەر لایەنەكانی دیكەش هەبووە. هێز نییە لە هەرێمی كوردستان لە پەیوەندییەكی باشدا نەبووبێ لەگەڵ حاجی قاسم و قەرارگەی رەمەزان.

 

رووداو: حاجی قاسم تا چەند رۆڵی لە دانانی بەرپرسانی كورد لە پێگەی حیزبی و حكومی هەبوو؟

 

نازم دەباغ: رۆڵ نەبوو ئامۆژگاری بوو. لە كێشەی نێوان یەكێتی و پارتی و گۆڕان ماوەیەك كەسە كاریزماكانیان دەشكاند، لەناو یەكێتی یەكدییان دەشكاند و یەكێتی دژی پارتی بوو. لەولا كاك نەوشیروانیان دەشكاند. ئەمە ئەگەر حاجیش لێرە نەبێ خوای ئەو لەسەرمانە. ئەو ئامۆژگارییەی كردم و گوتی تكات لێدەكەم ئەوەی دەمت دەگاتێ رێز بۆ كەسایەتییە كاریزماكانی خۆتان دابنێن، ئەمانە راستە باش و خراپیشیان تێدایە، بەڵام چاكەكەی ئەوەیە بەو كاریزمایەی خۆی بووەتە ئەم پیاوە گەورەیە. بەرامبەر ناحەزەكانتان مەیانشكێنن، ئەمە خۆی ئامۆژگارییەكی زۆر زۆر بە ویژدان و دۆستانەیە بۆ هەموومان.

 

مومكینە رۆڵیشی هەبووبێ لەوەی یەكێتی تا ئێستا بەم شێوەیە ماوەتەوە و دووبەرەكییەك دروست نەبوو كە ناحەزەكانی یەكێتی خەونیان پێوە دەبینی و حەزیان دەكرد ببێتە سەد پارچە.

 

رووداو: بەڵام دەشگوترێ قاسم سولەیمانی رۆڵی هەبووە لە دروستكردنی ململانێی ناو باڵەكانی یەكێتی لە دوای نەمانی مام جەلال، بۆ ئەوەی هەمیشە باڵادەست بێ‌ بەسەریانەوە؟

 

نازم دەباغ: بە پێچەوانەوە، من گوتم یەكێتی و پارتی و یەكگرتوو و كۆمەڵ پەیوەندیی باشیان هەبووە لەگەڵی. ئامۆژگارییەكانی ئەوە نەبووە تەبایی تێكبدا لە نێوانیان. بە پێچەوانەوە بۆ ئەوە بووە یەكبین.

 

من نموونەی 31ی ئابم هێنایەوە. كاتێك یەكێتی لە كوردستان دەركرا، ئەمریكییەكان چوونە لای كاك مەسعود لە سەیرانبەن، نەیانگوت كاك مەسعود بگەڕێوە با یەكێتی بێتەوە، بەڵكو دەستخۆشییان لێكرد. بەڵام ئێران كە پشتیوانیی یەكێتی كرد و یەكێتی هێرشی كرد، لەوانەبوو بتوانێ‌ شوێنی دیكەش بگرێت، بەڵام ئێران بە ئێمەی گوت تا ئێرە. واتە نابێ‌ پارتی لەوە زیاتر بشكێنرێ‌.    

 

رووداو: قاسم سولەیمانی هۆشداری زۆری بە كورد دا كە ریفراندۆم نەكەن، تەنانەت بە سەركردەیەكی وەك كاك كۆسرەت دەڵێ ئەگەر وازنەهێنی ئەوە دێم بۆ پرسەكەت، ئایا سولەیمانی لەگەڵ تۆ قەت باسی بابەتی ریفراندۆمی كرد؟ هیچ پەیامێكی لە رێگەی تۆوە نارد بۆ سەركردایەتی كورد؟

 

نازم دەباغ: ئەوەی كاك كۆسرەت راست نییە. 

 

رووداو: لەگەڵ تۆ باسی ریفراندۆمی كرد؟

 

نازم دەباغ: نەك لەگەڵ من باسی كردبێ. من ئاگاداری هاتنی جەنابی كاك نێچیرڤان بووم بۆ لای حاجی قاسم. بەشداریم لە كۆبوونەوەكە نەكرد، چونكە شاندەكە پارتی بوون، لە فڕۆكەخانە پێشوازیم لێكردن تا شوێنەكەی حاجی قاسم. تەنانەت كاك نێچیرڤان گوتبووی ئەوە بۆ رۆیشت. گوتم نامەوێ شایەت بم لەسەر قسەكان، مومكینە بشزانم چییە. شاندی یەكێتیش كە هاتووە بریتی بووە لە كاك كۆسرەت، مەلا بەختیار، كاك عومەر فەتاح و د.خەسرەو، مەحموود سەنگاوی و خۆشم كە تەرجەمەی قسەكانی كاك كۆسرەتم بۆ حاجی قاسم كرد، ئەوەی من گوێم لێ بووە گوترا ریفراندۆم مەكەن، بەڵێنیشتان دەدەینێ لە جێبەجێكردنی مادەی 140 پشتیوانتان بم، لەوانەیە بڵێن بۆ تا ئێستا پشتیوانمان نەبووی؟ ئەوەش هۆكاری هەبووە، بەڵام بەڵێنتان دەدەمێ دوای ئەو بابەتە، داكۆكیكارێكی سەرسەختتان بم بۆ مافەكانتان لەناو چوارچێوەی عێراق.

 

رووداو: دڵنیاییەك هەبوو كە قاسم سولەیمانی و ئێران داكۆكییان لە مافی كورد دەكرد؟

 

نازم دەباغ: دڵنیایی هەبوو وەك ئێستا عێراق لە دەستی خۆیان بوو، ئەگەر ئەوان نەبوونایە ئەو بودجەیە بۆ هەرێمی كوردستان دەهات؟

 

 

https://www.rudaw.net/sorani/interview/15012020

خەندان- نازم دەباغ، نوێنەری حكومەتی هەرێمی كوردستان لە تاران رەتیكردەوە ئێران هەڕەشەی لە هەرێمی كوردستان كردبێت لەسەر روداوەكانی ئەم دواییە و هەڵوێستەكانی بەرپرسانی هەرێم.

نازم دەباغ لە لێدوانێكی تایبەتدا بۆ خەندان رایگەیاند،"ئێران هیچ هەڕەشەیەكی لە هەرێمی كوردستان نەكردوە".

"هەرێمی كوردستان نابێتە لایەنگری هیچ لایەنێك و لەئێستاشدا تاران لە رێگەی ئێمەوە هیچ پەیامێكی ئاراستەی هەرێمی كوردستان نەكردوە "
 

سەبارەت بە هەڵویستەكانی هەرێم تایبەت بە دۆخی عێراق و گرژییەكانی نێوان ئەمریكا و ئێران، نازم دەباغ رایگەیاند،"هەرێمی كوردستان نابێتە لایەنگری هیچ لایەنێك و لەئێستاشدا تاران لە رێگەی ئێمەوە هیچ پەیامێكی ئاراستەی هەرێمی كوردستان نەكردوە."

ئەمە لەكاتێكدایە كە بەهۆی گرژییەكانی نێوان ئەمریكا و ئێران، لە هەندێك میدیای لۆكاڵی هەرێم وابڵاوكراوەتەوە كە تاران هەڕەشەی لە هەرێمی كوردستان كردوە سەبارەت بە هەڵوێستەكانیان لە روداوەكانی ئەمدواییە.

http://www.xendan.org/detailnews.aspx?jimare=85630&babet=1&relat=1024

پێنج شەممە, 09 کانونی دووەم 2020 18:18

نازم دەباغ بەشداريی لە ڕێوڕەسمی پرسەی شەهید "ئەبومەهدی ئەالموهەندیس" کرد

"نازم دەباغ" نوێنەری حکومەتی هەرێمی کوردستان لە ئێران و شاندی هاوڕێی بەشداریان لە ڕێوڕەسمی پرسە و سەرەخۆشی شەهید "ئەبومەهدی ئەالموهەندیس" و هاوڕێیانی کرد. 

شاندی نوێنەرایەتی حکومەتی هەرێمی کوردستان لە تاران، پێکهاتوو لە "نازم عومەر دەباغ" نوێنەری حکومەتی هەرێمی کوردستان لە ئێران، "سەلام عارف روشدی" جیگری نوێنەری حکومەتی هەرێمی کوردستان لە تاران، "لوقمان لەتیف محەمەد"، "هیوا رەسوول رەشید"، "فەخرەدین عەزیز" و "عەلی عەلا’ غوڵام" ئەندامانی نوێنەرایەتی حکومەتی هەرێمی کوردستان، رۆژی چوارشەمە رێکەوتی 8/1/2020 بەشداریان لە ڕێوڕەسمی پرسە و سەرەخۆشی شەهید "ئەبومەهدی ئەالموهەندیس" و هاوڕێی شەهیدەکانی کرد کە لە باڵیۆزخانەی عێراق لە شاری تاران بەڕێوەچوو. 

دکتۆر "سەعد جەواد قەندیل" باڵیۆزی عێراق لە وڵاتی ئێران پێشوازیی گەرمی لە شاندی نوێنەرایەتی حکومەتی هەرێمی کوردستان کرد و سوپاسی کردن بۆ ئامادەبوونیان لەم ڕێوڕەسمی پرسە و سەرەخۆشیە. 

"نازم دەباغ" نوێنەری حکومەتی هەرێمی کوردستان لە ئێران و شاندی یاوەری هاوخەمی و سەرەخۆشی خۆیان ئاراستەی باڵیۆزی عێراق لە تاران کرد. 

"عەدنان حەسەن مەحموود" باڵیۆزی سووریا لە تارانیش بەشداریی لەم مەراسیمەدا کرد.

نوسینگەی راگەیاندنی مەسرور بارزانی رونكردنەوەیەكی بڵاوكردەوە

خەندان- // نوسینگەی راگەیاندنی مەسرور بارزانی رونكردنەوەیەكی بڵاوكردەوە وسەبارەت بە هەواڵی سوپاسكردنی مایك پۆمپیۆ بۆ مەسرور بارزانی لە هاوكارییكرنیان بۆ كوشتنی قاسم سولەیمانی.


لەو رونكردنەوەیەدا كە وێنەیەكی گەیشتۆتە خەندان نوسینگەی راگەیاندنی سەرۆكی حكومەت نوسیویەتی،"رۆژنامەی (کیهان )ی ئێرانی هەواڵێکی بڵاوکردوەتەوە گوایا وەزیری دەرەوەی ئەمەریکا مایک پۆمپێیۆ لە پەیوەندییە تەلەفۆنیەکەیدا سوپاسی مەسرور بارزانی سەرۆکی حکومەتی هەرێمی کوردستانی کردوە لە هاوکاریکردنی لە ”پرسی تیرۆرکردنی جەنەراڵ قاسم سولەیمانی“ ."

لە رونكردنەوەكەدا هاتوە،"ئەم هەواڵە  هەڵبەستراوە و دوورە لە راستییەوە. جێی داخیشە هەندێک میدیا هەواڵی چەواشەکارانەی لەو چەشنە بڵاودەکەنەوە. بە پێچەوانەوە لە پەیوەندییە تەلەفۆنیەکەدا، مەسرور بارزانی سەرۆکی حکومەتی هەرێمی کوردستان نیگەرانیی خۆی لە تێکچونی بارودۆخی ناوچەکە دەربڕیوە و جەختیشی لە هێورکردنەوەی دۆخەکە کردوەتەوە و تەنیا باسی پەیوەندی نێوان هەرێمی کوردستان و ئەمەریکا کراوە و بە هیچ شێوەیەک باسی ئەو بابەتە نەکراوە کە رۆژنامەی ( کیهان) بڵاوی کردوەتەوە."

لە كۆتاییدا هاتوە،"داوا لە بەرپرسانی ئەو رۆژنامەیە دەکەین رونکردنەوە بدەن لە سەر بڵاوکردنەوەی ئەو هەواڵە چەواشەکارانەیە."

دەقی رونكردنەوەكە:


رونکردنەوەیە لە نووسینگەی راگەیاندنی سەرۆکی حکومەتی هەرێمی کوردستانەوە دەربارەی هەواڵێکی ناڕاستی (کیهان ) ی ئێرانی :
هەواڵەکەی (کیهان ) هیچ بنەمایەکی راستی نیییە 

رۆژنامەی (کیهان )ی ئێرانی هەواڵێکی بڵاوکردووەتەوە گوایا وەزیری دەرەوەی ئەمەریکا مایک پۆمپێیۆ لە پەیوەندییە تەلەفۆنیەکەیدا سوپاسی مەسرور بارزانی سەرۆکی حکومەتی هەرێمی کوردستانی کردووە لە هاوکاریکردنی لە ”پرسی تیرۆرکردنی جەنەراڵ قاسم سولەیمانی“ .

ئەم هەواڵە  هەڵبەستراوە و دوورە لە راستییەوە. جێی داخیشە هەندێک میدیا هەواڵی چەواشەکارانەی لەو چەشنە بڵاودەکەنەوە. بە پێچەوانەوە لە پەیوەندییە تەلەفۆنیەکەدا ،  مەسرور بارزانی سەرۆکی حکومەتی هەرێمی کوردستان نیگەرانیی خۆی لە تێکچوونی بارودۆخی ناوچەکە دەربڕیوە و جەختیشی لە هێورکردنەوەی دۆخەکە کردووەتەوە و تەنیا باسی پەیوەندی نێوان هەرێمی کوردستان و ئەمەریکا کراوە و بە هیچ شێوەیەک باسی ئەو بابەتە نەکراوە کە رۆژنامەی ( کیهان) بڵاوی کردووەتەوە. 
داواش لە بەرپرسانی ئەو رۆژنامەیە دەکەین روونکردنەوە بدەن لە سەر بڵاوکردنەوەی ئەو هەواڵە چەواشەکارانەیە. 

نووسینگەی راگەیاندنی 
سەرۆکی حکومەتی هەرێمی کوردستان 
2020/1/6

 

http://www.xendan.org/detailnews.aspx?jimare=84964&babet=1&relat=1024

 

ڕاگه‌يه‌نراوێك لە سەرۆكايه‌تيی هەرێمی كوردستانەوە

ڕووداوەكانی ئەم دواییەی كەركووك و قائیم و بەردەم باڵیۆزخانەی ئەمەریكا لە بەغدا، ئاماژەن بۆ ئاڵۆزبوونی زياترى بارودۆخی عێراق و كردار و پەرچەكرداری چەندبارەی بەدوای خۆیدا هێنا، هەر لەو سۆنگەیەوە ئەو هەنگاوانه‌ ڕه‌تده‌كه‌ينه‌وه‌ كە لەسەر خاكی عێراق تەسفیەی حیساباتی وڵاتان بكرێت و سەروەریی عێراق پێشێل بكرێ كە لە ئاكامدا سەردار قاسم سولەیمانی فەرماندەی فەیلەقی قودس و ئەبو مەهدی موهەندیس جێگری سەرۆكی ده‌سته‌ى حەشدی شەعبی و هاوڕێكانیان بوونە قوربانی كە هەردووكیان ڕۆڵى به‌رچاویان لە شەڕی دژ بە تیرۆریستانی داعش لە چەند ساڵی ڕابردوودا هەبوو.

 

نابێ عێراق بكرێتە گۆڕەپانی یەكلاكردنەوەی ململانێی وڵاتان. داوا دەكەین كێشەكانیان بە گفتوگۆ چارەسەر بكەن و ڕێز له‌ عێراق و سه‌روه‌رييه‌كه‌ى بگيرێت. بەردەوامیی ئەم ئاڵۆزی و كردار و پەرچەكردارانە، عێراق و ناوچەكە بەرەو هەڵدێر و ئاییندەیەكی نادیار دەبات و دەبێتە هۆی زیندووكردنەوە و بەهێزكردنی هێزە توندڕەو و تیرۆریستەكانی وەك داعش.

 

لەم دۆخە ئاڵۆز و هەستیار و مەترسیداره‌دا، داوا لە هەموو لایەك دەكەین ئەوپەڕی دانبەخۆیاندا بگرن و ڕێگە لە په‌ره‌سه‌ندنه‌ مەترسیدارەكان بگيرێت.

دوو شەممە, 30 کانونی یەکەم 2019 04:46

نازم دەباغ لەگەڵ کیوومەرس پوورئەحمەد دەرهێنەری سینەمای ئێران کۆبۆوە

"نازم دەباغ" نوێنەری حکوومەتی هەرێمی کوردستان لە ئێران، لەگەڵ "کیوومەرس پوورئەحمەد" دەرهێنەری ناودار و بەئەزموونی سینەمای ئێران دیداریی کرد. 

 

"کیوومەرس پوورئەحمەد" دەرهێنەری ناودار و بەئەزموونی سینەمای ئێران، ئەمڕۆ دووشەمە ڕێکەوتی 30ی دیسەمبەری 2019 سەردانی نووسینگەی نوێنەرایەتی حکوومەتی هەرێمی کوردستان لە تارانی کرد و لە لایەن "نازم عومەر دەباغ" نوێنەری حکوومەتی هەرێمی کوردستان لە ئێران و هەروەها "سەلام عارف روشدی" جێگری نوێنەری حکوومەتی هەرێمی کوردستان لە تاران و "لوقمان محەمەد لەتیف" و "فەخرەالدین عەزیز ساڵح" ئەندامانی نووسینگەی نوێنەرایەتی حکوومەتی هەرێمی کوردستان پێشوازیان لێکرا.

 

"کیوومەرس پوورئەحمەد" کە ئەم ڕۆژانە سەرقاڵی نووسینی سیناریۆی "کوردستانی من"ە، بە مەبەستی ئاگاداربوون لە خەباتی قارەمانانەی هێزی پێشمەرگەی کوردستان و شەڕە پارتیزانییەکانی ئەو شۆڕشگێڕانە دژی ڕژێمی بەعس، چاویی بە "نازم دەباغ" کەوت و چەندین پرسیاریی لەمبارەیەوە ئاراستە کرد کە نوێنەری حکوومەتی هەرێمی کوردستان لە تاران بە وردیی وڵامی تەواوی پرسیارەکانی دایەوە و ئەم بابەتە گرینگەی بە جوانی بۆ شیکردەوە. 

 

ئەم دەرهێنەرە پێشەنگەی سینەمای ئێران هەروەها سەردانی "سەلام عارف روشدی" جێگری نوێنەری حکوومەتی هەرێمی کوردستان لە تارانی کرد کە لەم دانیشتنەدا "لوقمان محەمەد لەتیف" و "فەخرەالدین عەزیز ساڵح" ئەندامانی نووسینگەی نوێنەرایەتی حکوومەتی هەرێمی کوردستانیش تیایدا ئامادەبوون. 

 

"کیوومەرس پوورئەحمەد" دەرهێنەر، سیناریۆنووس و بەرهەمهێنەری ئێرانی ساڵی 1949 لە شاری نەجەف ئاباد لە پارێزگای ئیسفەهان لە دایک بووە و دەرچووی لقی دەرهێنەری سینەمایە و 22 فیلمی سینەمایی، لەوانە: "اتوبوس شب"، "شەوی یەڵدا"، "خواهران غەریب"، "گل یخ"، "بی بی چلچلە"، "ناتوورە"، "نوک برج"، "شەرم"، "نان و شیعر"، "باران" و هەروەها 3 زنجیرە دڕامای تەلەڤیزیۆنی سازکردووە کە "چیرۆکەکانی مەجید" یەکێکیە لەو بەرهەمانەی کە هەموو تاکێکی ئێرانی لە شاشەی تەلەڤیزیۆنەکانی ئێران سەیری کردووە. پوورئەحمەد بە سازکردنی ئەم بەرهەمانە کۆمەڵێک خەڵاتی گرینگی ناوخۆیی و نێودەوڵەتی بەدەستهێناوە.

 

 

نێچيرڤان بارزانى په‌يامێك ئاراسته‌ی یه‌كێتی ده‌كات

 K24 - هه‌ولێر //  نێچیرڤان بارزانی، سه‌رۆكی هه‌رێمی كوردستان، به‌بۆنه‌ی كۆتاییهاتنی كاره‌كانی كۆنگره‌ی چواره‌می یه‌كێتی نیشتمانی كوردستان، په‌یامێكی پیرۆزبایی ئاراسته‌ی ئه‌و حزبه‌ ده‌كات.

ده‌قی په‌یامه‌كه‌ی نێچیرڤان بارزانی:

"به‌ بۆنه‌ى كۆتاييهاتن و سه‌ركه‌وتنى كۆنگره‌ى چواره‌مى يه‌كێتيى نيشتمانيى كوردستانه‌وه‌، به‌ گه‌رمى پيرۆزبايى له‌ يه‌ك به‌ يه‌كى ئه‌ندامانى ئەنجومەنی باڵای سیاسی و بەرژەوەنديی یەكێتیی نیشتمانیی كوردستان و ئه‌نجومه‌نى سه‌ركردايه‌تيى گشتيى يه‌كێتى و ته‌واوى كاديران و ئه‌ندامان و لايه‌نگرانى ده‌كه‌م، هيواى سه‌ركه‌وتنيان بۆ ده‌خوازم.

یەكێتیی نیشتمانیی كوردستان كه‌ له‌سه‌ر ئاستى كوردستان و عێراق خاوه‌ن ئاماده‌يى و پێگه‌يه‌كى كاريگه‌ره‌، به‌ سه‌ركه‌وتنى كۆنگره‌كه‌ى ده‌توانێ ڕۆڵێكى باشتر بۆ به‌ده‌ستهێنانى مافه‌ ده‌ستوورييه‌كانى هه‌رێمى كوردستان له‌ عێراق و خزمه‌تكردنى زياترى هه‌رێمى كوردستان و پاراستنى ده‌سكه‌وته‌كانى و دروستكردنى يه‌كڕيزى و ته‌بايى له‌نێوان لايه‌نه‌ كوردستانييه‌كاندا بگێڕێت.

هه‌ر له‌م بۆنه‌يه‌دا به‌ ڕێزه‌وه‌ يادى جه‌نابى سه‌رۆك مام جه‌لال ده‌كه‌ينه‌وه‌.

نێچيرڤان بارزانى

سه‌رۆكى هه‌رێمى كوردستان"

 

https://www.kurdistan24.net/so/news/563980dd-08cf-49f8-8d03-de77d1ed803e

 

مه‌سرور بارزانی په‌یامێكی پیرۆزبایی ئاراسته‌ی یه‌كێتی نیشتمانی كوردستان ده‌كات

 K24 - هه‌ولێر ///  مەسرور بارزانی سەرۆکی حکومەتی هەرێمی کوردستان، بەبۆنەی کۆتاییهاتنی کۆنگرەی چوارەمی یەکێتی نیشتمانیی کوردستان، پەیامێکی پپرۆزبایی ئاراستەی سەرکردایەتی یەکێتی ده‌كات.

له‌ به‌شێكی په‌یامه‌كه‌ی سه‌رۆكی حكومه‌تی هه‌رێمی كوردستاندا هاتووه‌: "هیوادارم ئەم کۆنگرەیە ببێتە دەرفەتێك بۆ خزمەتکردنی پرسە نیشتمانییەکان و پشتیوانی زیاتری حکومەتی هەرێمی کوردستان".

ده‌قی په‌یامی پیرۆزباییه‌كه‌ی سه‌رۆكی حكومه‌ت:

"پیرۆزبایی سەرکەوتنی کۆنگرەی چوارەم لە بەڕێزان ئەندامانی ئەنجومەنی باڵای سیاسی و ئەنجومەنی گشتی سەرکردایەتی و گشت ئەندامانی یەکێتی نیشتمانیی کوردستان دەکەم . هیوادارم ئەم کۆنگرەیە ببێتە دەرفەتێک بۆ خزمەتکردنی پرسە نیشتمانییەکان  و هەروەها پشتیوانی زیاتری حکومەتی هەرێمی کوردستان ، بۆ ئەوەی بتوانین بەیەکەوە خزمەتێکی شایستەتری خەڵکی هەرێمی کوردستان بکەین و داکۆکیش لە مافە دەستوورییەکانمان بکەین.

مەسرور بارزانی

سەرۆکی حکومەتی هەرێمی کوردستان

2019/12/27"

https://www.kurdistan24.net/so/news/588104d0-cb98-462c-9868-3d8b93d06363

 

شەممە, 28 کانونی یەکەم 2019 03:31

نازم دەباغ لەگەڵ جێگری وەزیری ئاوەدانکردنەوەی حکومەتی هەرێمی کوردستان دیداری کرد

"نازم دەباغ" نوێنەری حکومەتی هەرێمی کوردستان لە ئێران، لەگەڵ "ئاگرین عه‌بدو‌اڵڵە عه‌زیز" جێگری وەزیری ئاوەدانکردنەوەی حکومەتی هەرێمی کوردستان و شاندی هاوڕێی کۆبۆوه.

 "ئاگرین عه‌بدو‌اڵڵە عه‌زیز" جێگری وەزیری ئاوەدانکردنەوەی حکومەتی هەرێمی کوردستان به هاوڕێیه‌تی لەگەڵ "زانا مستەفا عه‌زیز"  بەڕێوه‌بەری گشتیی لە وەزارەت و "نصرالڵە محه‌مه‌د عه‌لی" بەڕێوه‌بەری گشتیی ئەمرۆ شەمە رێکەوتی ٢٨/١٢/٢٠١٩ سەردانی نوێنەرایەتی حکومەتی هەرێمی کوردستان لە تارانیان کرد و لە لایەن "نازم عومەر دەباغ" نوێنەری حکومەتی هەرێمی کوردستان لە ئێران و "سەلام عارف روشدی" جێگری نوێنەری حکومەتی هەرێمی کوردستان لە تاران و "هیوا ره‌سوڵ ره‌شید" و "لوقمان محه‌مه‌د لەتیف" و "وڵات ئەسعد پیرۆ" ئەندامانی نووسینگەی نوێنەرایەتی پێشوازیان لێکرا.  

 سەردانی شاندی وەزارەتی ئاوەدانکردنەوەی حکومەتی هەرێمی کوردستان بۆ شاری تاران بە مەستی بەشداری کردن لە پێشانگای نێودەوڵەتی پیشەسازیی خانوبەرەیه‌ کە لە پێته‌ختی وڵاتی ئێران بەرێوەدەچێت.

شەشەمین خولی فیستیڤاڵی فیلمی کوردی "یۆتۆبۆری" لە وڵاتی سوید بەڕێوەچوو

مەنسوور جیهانی ـ  بە دروشمی "ڕۆژئاوا لەگەڵتانین" و بە نمایشی بەرهەمی سینەماکارانی کورد، شەشەمین خولی فیستیڤاڵی فیلمی کوردی "یۆتۆبۆری" لە سوید بەڕێوەچوو.

 

بە ئامادەبوونی "دڵشاد ئەحمەد" سەرۆکی شەشەمین خولی فیستیڤاڵی فیلمی کوردی "یۆتۆبۆری" Goteborg و سەرۆکی کۆمەڵەی هونەرە جوانەکانی یۆتۆبۆری، "شەماڵی عەبە ڕەش" ئەکتەری ناوداری کورد و بەرپرسی هونەریی ئەم فیستیڤاڵە، "لاگێ بیۆرک" Lage Björk بەرپرسی پەیوەندییەکانی کۆمەڵەی هونەرە جوانەکانی یۆتۆبۆری، هەندێک لە سینەماکارانی بەشداربوو لە فیستیڤاڵ و هۆگرانی هونەریی سینەما، شەشەمین خولی فیستیڤاڵی فیلمی کوردی "یۆتۆبۆری" بە دروشمی "ڕۆژئاوا لەگەڵتانین" و بە نمایشی بەرهەمی سینەماکارانی کوردستانی ئێران، هەرێمی کوردستان و سینەماکارانی کورد لە ئەورووپا لە هۆڵی سینەمایی "فۆڵکت هیووس" Fulket Hus لە شاری یۆتۆبۆری لە وڵاتی سوید بەڕێوەچوو. 

 

لە گوتاری بەرپرسانی شەشەمین خولی فیستیڤاڵی فیلمی کوردی "یۆتۆبۆری"دا هاتووە: شەش ساڵە، خەون و ئازار و شادی لەگەڵ ئێوەدا بەش دەکەین، شەش ساڵە نیشتمان و تاراوگە بەیەکەوە گرێ دەدەین. ئێمە لە ڕێگەی هونەرەوە دەمانەوێت خۆمان و جیهان بدوێنین. چیرۆک و ئازارە سیاسی و کەلتووری و کۆمەڵایەتییەکانمان شەنوکەو بکەین. لە گۆشەیەکی پڕ لە شەڕ و تەنگەژەی ئەم جیهانەدا خۆمان نمایش دەکەین و دەمانەوێت تێکەڵ بە شارستانییەتی جیهان ببین، بیر لەوە ناکەینەوە خەون و هەوڵەکانمان گەورە بن یان بچووک، بۆ ئێمە گرنگ هەوڵدان و بەردەوامییە. 

 

لە بەشێکی دیکەی ئەم گوتارەدا هاتووە: بەڕێزان ئێمە لە چرکەساتێکدا دیداری فیلمی کوردیی سازدەکەین، کە هەورێکی ڕەش لە مێژوویەکی دوریی ئیمپڕاتۆرییەتی عوسمانییەوە بەرەو ئاسمانی نیشتمانی ئێمە دێت. لە هەگبەیەدا کە ماڵ و ژیانمان، نیشتمان و کوردبوونمان زەوت بکات. کوردستانییان نزیکەی پێنج ساڵە لە جەنگێکی قورس و گرانی ئاڵا ڕەشەکانی داعشدان. ئێمە لە جەنگەکاندا گۆرانی دەڵێین و فیلم دروست دەکەین، نیگار دەکێشین و چیرۆکەکانمان دەنووسینەوە. ئێمە لەم دۆخەدا زیاد لە هەموو کاتێکی دیکە پێویستیمان بە هونەرە، بۆ گرێ دانەوەی خۆمان بە جێهانەوە. 

 

لە درێژەی ئەم گوتارەدا هاتووە: لەم سەردەمەدا شانازییەکانی ئێمە تەنها شەڕڤانان نین، کە جەنگێکی خۆپارێزیی دەکەن لە دژی کۆنەپەرەستان. لەم سەردەمەدا جیهان ئاشنا دەبێت بە زانایەکی بیرکاریی کورد و ڕۆمانی کوردیی لە ئەورووپادا بۆ سەر چەندین زمانی دیکە وەردەگێڕدرێت. ڕێکخراوەی جیهانی یۆنسکۆ لە پاریس، شارە کوردییەکان وەکوو شاری کەلتووری بە جیهان دەناسێنێت. سینەماکارانی کوردیش هەوڵدەدەن لە ژێر سوتوو و باڕووتی جەنگەکانەوە چیرۆکەکانیان بە جیهان ئاشنا بکەن.

 

لە کۆتایی گوتاریی شەشەمین خولی فیستیڤاڵی فیلمی کوردی "یۆتۆبۆری"دا نووسراوە: ئەم سەردەمە سەردەمی کوردە، لەم سەردەمەدا کاری ئێمەش ئەوەیە دوور لە ڕەگەز پەرەستی ئینسانی بوون و کوردبوونی خۆمان، دووپات بکەینەوە پێناسەی خۆمان بکەینەوە بۆ ئەوەی لە خۆمان و لە جیهان تێبگەین، بۆ ئەمەش کاری زۆرمان لە پێشە. گرنگترین کار گوزارشت کردنە لە خۆمان و گێڕانەوەی چیرۆکەکانە و ڕاوەستانە لەسەر خەونەکانمان. هونەری سینەما و هەموو چالاکییە کەلتوورییەکانی دیکە، هۆکارێکن بۆ مانەوەمان لەو جوگرافیا داخرا و ترسناکەی کە دەورەی داوین. 

 

ناوی ئەو فیلمانەی کە لە ڕۆژانی بەڕێوەچوونی شەشەمین خولی فیستیڤاڵی فیلمی کوردی "یۆتۆبۆری" نمایش کران بریتی بوون لە: فیلمی سینەمایی "گوڵ نیسا" لە دەرهێنانی سەتار چەمەنی گوڵ لە ڕێوڕەسمی کردنەوەی فیستیڤاڵ و هەروەها کورتە فیلمەکانی "ڕەش و سپی" لە دەرهێنانی ڕێبین ڕەشید، "سوور و سەوز" لە دەرهێنانی سارا فەخری، "فڕینی بەرد" لە دەرهێنانی هەردی حەسەن، "وەک هەمیشە" لە دەرهێنانی نەسرین پاکو، "بۆنی خوێن" لە دەرهێنانی کاردینا هێمن، "ساتێک بۆ من" لە دەرهێنانی مەریوان ئیبراهیم، "هیوا" لە دەرهێنانی عابد هەورامی، "سێ" لە دەرهێنانی هەردی سەلامی، "ڕێگا" لە دەرهێنانی خەیبەر ڕەفیق، "هاویە" لە دەرهێنانی سامی کاکە، "جارێک لە کوردستان" لە دەرهێنانی ژینۆ هادی، "قوربانی" لە دەرهێنانی ڕزگار حسێن، "سنوورێن ڤاڵا" لە دەرهێنانی هەژار دهۆکی، "وون بوون" لە دەرهێنانی گۆنا حەمە ساڵح، "دوا چارەنووس" لە دەرهێنانی کامەران مەنسوور، "ناتەواو" لە دەرهێنانی ڕەحمان هوشیاری، "لێت دەگەڕێم بڕۆیت" لە دەرهێنانی سۆران سۆرانی و "گەڕان بەدوای شوناسدا" لە دەرهێنانی ئاوات عوسمان.

 

لە ڕێوڕەسمی کردنەوەی شەشەمین خولی فیستیڤاڵی فیلمی کوردی "یۆتۆبۆری"دا هونەرمەند بەرزان سەیدا بە هاوکاری گرووپی موزیک کە پێکهاتبوون لە هێرش عومەر ڕەزا، ئیبراهیم عوسمان، سەباح سەنتوور، ئاسۆ دیلان، فەریبورز کەرەمی و ڕەزا شەریفی چەندین گۆرانی و پارچە موزیکی کوردییان پێشکەش کرد.

پەڕەى 1 لەکۆى 142 پەڕەدا

هەواڵی زیاتر لە تویتەر

راپۆرتە پڕ بینەرەکان

حالت های رنگی