سێ شەممە, 03 کانونی یەکەم 2019 20:54

"سەلام عارف روشدی" لەگەڵ نوێنەری خوێندکارانی مەستەری هەرێمی کوردستان لە تاران کۆبۆوە

"سەلام عارف روشدی" جێگری نوێنەری حکوومەتی هەرێمی کوردستان لە ئێران لەگەڵ نوێنەری خوێندکارانی مەستەری هەرێمی کوردستان لە زانکۆکانی تاران، دیداری کرد.

  نوێنەری خوێندکارانی هەرێمی کوردستان کە لە قۆناغی مەستەر لە زانکۆکانی تاران دەخوێنن، ئەمڕۆ سێشەمە 3ی دیسەمبەری 2019 سەردانی نوێنەرایەتی حکوومەتی هەرێمی کوردستان لە شاری تارانی پێتەختی ئێرانیان کرد و لە لایەن "سەلام عارف روشدی" جێگری نوێنەری حکوومەتی هەرێمی کوردستان لە وڵاتی ئێران، پێشوازییان لێکرا. 

 لە سەرەتای ئەم دیدارەدا، نوێنەری خوێندکارانی هەرێمی کوردستان سەبارەت بە بەداواچوون بۆ کارووباری خوێندکارانی هەرێمی کوردستان لە ئێران و پەسەندکردنی بڕوانامەی خوێندکاران لە لایەن نوێنەرایەتی حکوومەتی هەرێمی کوردستان لە تارانەوە هاتنە ئاخاوتن. 

 لە درێژەی کۆبوونەوەکەدا، "سەلام عارف روشدی" جەختی لەسەر ئەوە کردەوە کە هەر خوێندکارێکی هەرێمی کوردستان دوای بەدەستهێنانی بڕوانامە لە وڵاتی ئێران، دەبێت بڕوانامەکەی لە لایەن نوێنەرایەتی حکوومەتی هەرێمی کوردستان لە تاران پەسەند بکرێت.  

 جێگری نوێنەری حکوومەتی هەرێمی کوردستان لە تاران، بە پێویستی زانی سەرجەم خوێندکارانی هەرێمی کوردستان لە وڵاتی ئێران، ناویان لە نوێنەرایەتی حکوومەتی هەرێمی کوردستان تۆماربکەن.

 لە بەشێکی دیکەی ئەم دانیشتنەدا سەبارەت بە کارووباری خوێندکارانی هەرێمی کوردستان لە وڵاتی ئێران، چەند سەرنج و پێشنیارێک تاوتوێی کران.

نازم دەباغ: حکوومەتی هەرێمی کوردستان سیاسەتێکی ڕاست و دروستی هەبووە

 "نازم دەباغ" نوێنەری حکوومەتی هەرێمی کوردستان لە ئێران لە وتووێژێکی تایبەت لەگەڵ ڕادیۆ "نەوا" گوتی: خۆشبەختانە حکوومەتی هەرێمی کوردستان تا ئەم کاتە سیاسەتێکی ڕاست و دروستی هەبووە و خۆی بێلایەن گرتووە.

 

"نازم عومەر دەباغ" نوێنەری حکوومەتی هەرێمی کوردستان لە ئێران لە وتووێژێکی تایبەت لەگەڵ ڕادیۆ "نەوا" سەبارەت بە ڕۆڵی کۆماری ئیسلامی ئێران لە عێراق و هەرێمی کوردستان و نیگەرانییەکانی ئەمەریکا لەو ڕۆڵەی ئێران لە عێراقدا ڕایگەیاند: من پێموایە ئەمەریکا بە دوای جێبەجێکردنی ئەو سیاسەتەی خۆیەتی لە ناوچەکەدا و بەشێکیشی دژایەتی کردنی کۆماری ئیسلامی ئێرانییە، ئەوەی کە گرینگە ئێمە دەبێت سرنج بدەینە جوگرافیای هەرێمی کوردستان، کە لەڕاستیدا دەتوانم بڵێیم جوگرافییەکی خراپی هەیە و لە ناوچەکەدا دەبێت زۆر وشیارانە هەڵسووکەوت لەگەڵ ڕووداوەکانی دراوسێکاندا بکات.

 

گوتیشی: ئەو جوگرافیایە ناتوانین بگۆڕین کە سنوورێکمان ئێرانە، سنوورێکمان عەڕەبە و سنوورێکیشمان تورکیایە. ئەمەریکا و کۆمەڵێک وڵاتانی دیکەش بەرژەوەندیی تایبەتیان هەیە لە پێناو بازاڕی خۆیان و دابینکردنی بازاڕی ئەوانی دیکە. بۆیە هەر یەکە لە چوارچێوەی بەرژەوەندییەکانی خۆیدا کار دەکات، دەستوور دەدات و ڕێنمایی بڵاودەکاتەوە. گرینگ ئەوەیە حکوومەتی هەرێمی کوردستان کە تا ئێستا بە باشی هەنگاوی هەڵێناوە لە ڕۆی مافەوە و لە ڕووی دژایەتیی کردنەوە خۆی بێلایەن بگرێت و خۆشی ببەستێتەوە بەو سیاسەتەی کە لە بەغدا بڕیاریی لەسەر دەدرێت. بۆیە ئاسان نییە بکەوینە ئەو داوەی کە نە دژی کۆماری ئیسلامی ئێران و نە دژی ئەمەریکا و نە دژی وڵاتانی دیکەش بین. وەکوو ئەوەی کە دەڵێن لە باشترین حاڵەتدا و بەتایبەتیش بەرژەوەندیی خۆمان لەبەرچاوبگرین.

 

نوێنەری حکوومەتی هەرێمی کوردستان لە تاران ڕاشیگەیاند: بەڵام لە بیرمان نەچێت دوو ساڵ پێش ئێستا کورد، بیری لە ئەنجامدانی ڕاپرسی کردەوە بە مەبەستی ئەوەی کە ببێتە کیانێک بۆ ڕاگەیاندنی سەربەخۆیی لە ئاییندەدا، دیمان ئەو کەسانەی کە کەوتنە دژایەتی کردن و دیشمان ئەو کەسانەی کە کەوتنە پارێزگاریی کردن لەو ئەزموونەی کە لە هەرێمی کوردستاندا هەیە.

 

"نازم دەباغ" سەبارەت بە پەیامی "مایک پێنس" جێگری سەرۆک کۆماری ئەمەریکا لە هەرێمی کوردستان گوتی: چاودێرانی سیاسی لە هەڵسەنگاندنی باروودۆخی سەردانەکەی جێگری سەرۆک کۆماری ئەمەریکا بۆ هەرێمی کوردستان و عێراق تووشی هەڵەیەک بوون و ئەویش بەرنامەیەکی تایبەت بووە بۆ سوپاسکردنی ئەم ڕۆژەدا لە سەربازەکانیان و لە ئەمەریکا بە ڕۆژی سوپاسگوزاری ناسراوە و هاتبوو بۆ هەولێر کە سوپاسی سەربازەکانی خۆیان بکات. بەڵام ئەمە لە گرینگی سەفەرەکەی "مایک پێنس" کەمناکاتەوە. لە کاتی هاتنیشیدا بۆ هەولێر، لە لایەن بەرپرسانی باڵای هەرێمی کوردستانەوە پێشوازیی لێکرا و لە پەیامەکەیدا دیسانەوە ڕۆڵی کوردیی بەرزنرخاند لە شەڕیی داعشدا.

 

گوتیشی: "مایک پێنس" لە پەیامەکەیدا شتێکی دیکەشی گوت کە پێموایە بۆ ئێران و هەروەها بۆ عێراقیش دڵخۆشکەر بێت و گوتی ئێمە لەگەڵ یەکپارچەیی خاکی عێراقین. و ئەوە لە قازانجی کوردیشدا بوو کە دەبێت بە وریاییەوە هەڵسووکەوتی لەگەڵ بکات و ئەویش پێشتوانی لە شەڕیی کورد لەگەڵ داعش و تیرۆر کرد و هەروەها پشتوانی لە کێشەی کورد کرد لە چوارچێوەی دەستووری هەمیشەیی عێراقدا.

 

نوێنەری حکوومەتی هەرێمی کوردستان لە ئێران سەبارەت بە ڕۆڵی کۆماری ئیسلامی ئێران لە عێراق و هەرێمی کوردستان گوتی: پێموایە کۆماری ئیسلامی ئێران هەمیشە لە بەرژەوەندیدا بووە کە ئەمن و ئاسایشی عێراق پارێزراوبێت و لەگەڵ ئەوەدابووە کە حکوومەتی هەرێمی کوردستان لە چوارچێوەی ئەو سیاسەتەی کە بەغدا کاریی پێدەکات، ئەویش کاریی پێبکات و خۆشبەختانە حکوومەتی هەرێمی کوردستان تا ئەم کاتە دەتوانم بڵێیم سیاسەتێکی ڕاست و دروستی هەبووە و خۆی بێلایەن گرتووە.

 

دەباغ سەبارەت بە سیاسەتی کۆماری ئیسلامی ئێران بۆ هەرێمی کوردستان گوتی: تا ئێستاکە کۆماری ئیسلامی ئێران و عێراق و هەرێمی کوردستان سیاسەتێکی هاوسەنگیان هەبووە و ئومێد دەکەم ئەو سیاسەتە بەردەوام بێت بۆ ئەوەی کە هەرێمی کوردستان دووربێت لەو کێشەو و گیر و گرفتانەی کە توانای ڕووبەڕووبوونەوەی نییە، چونکە نە توانای ئەوەی هەیە ڕووبەڕووی ئەمەریکا بێتەوە و نە توانای ئەویشی هەیە کە ڕووبەڕووی ئێران بێتەوە. واتە بۆ پاراستنی ئەمن و ئاسایشی خۆی ئەو سیاسەتەی ڕچاوگرتووە و تا ئێستاش نەمانبیستووە کە کۆماری ئیسلامی ئێران گلەیی و گازندەی بووبێت بەرانبەر بە سیاسەتی ئیستراتیژی هەرێمی کوردستان.

 

"نازم عومەر دەباغ" سەبارەت بە نیگەرانییەکانی کۆماری ئیسلامی ئێران لە هەرێمی کوردستانەوە گوتی: دیارە هەرێمی کوردستان نابێت لایەنگریی ئەو هیز و لایەنانە بێت کە دژایەتی ئێران دەکەن.

 

لینکی چاوپێکەوتن:

https://www.radionawa.com/Ku/show-detail.aspx?jimare=51&znjera=4809

 

 

سه‌رۆك كۆمارى توركیا پێشوازى له‌ سه‌رۆكى حكوومه‌تى هه‌رێمى كوردستان دەکات

 

 

رۆژی پێنجشەممە 2019/11/28 رەجەب تەیب ئەردۆغان، سەرۆك کۆماری تورکیا لەکۆشکی کۆماری لەئەنقەرە پێشوازی لە مەسرور بارزانی، سەرۆکی حکوومەتی هەرێمی کوردستان كرد.

له‌ کۆبوونه‌وه‌كه‌دا، بارودۆخى سیاسى و ئاسایشى ناوچه‌كه‌ تاوتوێكرا و جه‌خت له‌ پێشخستنى په‌یوه‌ندییەکانی هه‌ولێر و ئه‌نقه‌رەو  رۆڵى هه‌رێمى كوردستانى له‌ سه‌قامگیرى ناوچه‌كه‌ كرایه‌وه.‌

سه‌رۆكى حكوومه‌تى هه‌رێمى كوردستان دووپاتیكرده‌وه‌، هه‌رێمى كوردستان فاکتەرى سەقامگیریی ئاسایش  و ئارامى ده‌بێت له‌ ده‌ڤه‌ره‌كه‌ و خواستى هه‌رێمى كوردستانیشى بۆ پەرەپێدانی په‌یوه‌ندییەکان، به‌ تایبه‌ت له‌ بواره‌كانى بازرگانى و ئابوورى پیشاندا.

له‌ كۆبوونه‌وه‌یه‌کیشدا له‌گه‌ڵ مەولوود چاوشئۆغڵو وه‌زیرى ده‌ره‌وه‌ى توركیا، گفتوگۆ له‌ باره‌ى پێشهاتەکانی ناوچەکە و چۆنیەتی بەرەوپێشبردنی پەیوەندییە دووقۆڵییەکان كرا، بە تایبەت بابەتە پەیوەندیدارەکانی بواری بازرگانی و ئابووری.

لە دوای ئەو کۆبوونەوەیە، سەرۆکی حکوومەتی هەرێمی کوردستان و وه‌زیرى ده‌ره‌وه‌ى توركیا کۆنفرانسێکی رۆژنامەوانی هاوبەشیان ئەنجامدا و باسیان لە وردەکاری کۆبوونەوەکە کرد و وەڵامی رۆژنامەنووسانیان دایەوە.

سەرۆکی حکوومەتی هەرێمی کوردستان لە کۆنفرانسە رۆژنامەوانییە هاوبەشەکه‌دا گووتی: گفتوگۆی گرنگی لەسەر ئاستەکانی سیاسی و ئابووری لەگەڵ وەزیری دەرەوەی تورکیا ئەنجامداوە.

سەرۆکی حکوومەتی هەرێمی کوردستان جەختی لەسەر گرنگی بەرقەرارکردنی ئاسایش لەناوچەکەدا کردەوە و روونیکردەوە، سەقامگیری لە بەرژەوەندی هەموو لایەکدایە.

سەرۆکی حکومەتی هەرێمی کوردستان راشیگەیاند، بەرەوپێشچوونی باش لە گفتوگۆکانیاندا لەگەڵ حکوومەتی فیدڕاڵی عێراق بەدیھاتووە،  بە ئاراستەی چارەسەرکردنی تەواوی کێشەکان.

سەرۆکی حکوومەت ستایشی هاوکاری حکوومەتی تورکیای لەگەڵ نەتەوەیەکگرتووەکان لە بارەی میوانداریکردنی پەنابەرە سوورییەکان کرد و هیوای خواست خۆویستانە بگەڕێنەوە ناوچەکانیان، نەک بە زۆرەملێ.

لە وەڵامی پرسیاری رۆژنامەنووساندا، سەرۆک وەزیران رایگەیاند هەرێمی کوردستان پەیوەندی زۆر گرنگی لەگەڵ تورکیا هەیە و گوتی نابێت خاکی هەرێمی کوردستان لەلایەن هیچ گرووپێکەوە بۆ هێرشکردنە سەر وڵاتانی دراوسێ بەکاربهێندرێت.

مەسرور بارزانی، سەرۆکی حکوومەتی هەرێمی کوردستان، رۆژی پێنجشەممە 28ی تشرینی یەکەم (نۆڤێمبەر) 2019 گەیشتە ئەنقەرە، وەک یەکەمین سەردانی فەرمی بۆ دەرەوەی هەرێمی کوردستان لە دوای دەستبەکاربوونی وەك سەرۆکوەزیران.

 

 

قادر عەزیز پرسەنامەیەكی ئاراستەی نازم دەباغ كرد

 قادر عەزیز ئەندامی مەكتەبی سیاسی یەكێتی و سەرپەرشتیاری مەكتەبی راگەیاندن، پرسەنامەیەكی ئاراستەی نازم عومەر دەباغ نوێنەری حكومەتی هەرێمی كوردستان لە كۆماری ئیسلامی ئێران كرد، بۆ كۆچی دوایی (محەمەد عومەر دەباغ ) ی برایان.

لەو پرسەنامەیەدا قادر عەزیز وێڕای دەربڕینی هاوخەمی، هیواشی خواستووە ئەمە دوا كۆستی بنەماڵەكەیان بێت.

https://www.gksat.tv/details.aspx?jimare=87584&cor=Kurdistan

 

بافڵ تاڵەبانی پرسەنامەیەك ئاراستەی مامۆستا نازم دەباغ دەكات

برای بەڕێزمان مامۆستا نازم دەباغ نوێنەری حکومەتی ھەرێمی کوردستان لە کۆماری ئیسلامی ئێران

‎بەداخ و پەژارەوە ، هەواڵی کۆچی دوایی ( محەمەد عومەر دەباغ ) ی براتانم پێگەیشت بەم بۆنە خەمناکەوە ، پرسەو سەرەخۆشی خۆمان ، ئاڕاستەی کەسوکارو بنەماڵە تێکۆشەرەکەتان دەکەین هاوبەشی خەم و پەژارەتانین
‎ روحی کۆچکردووش شادبێت ‎

پرسەنامەی قوباد تاڵەبانی بۆ بنەماڵەی نازم عومەر دەباغ

قوباد تاڵەبانی جێگری سەرۆكی ئەنجومەنی وەزیران پرسەنامەیەك ئاڕاستەی بنەماڵەی نازم عومەر دەباغ دەكات كە ئەمەی خوارەوە دەقەكەیەتی:

بەڕێزان بنەماڵەی مام محەمەد عومەر دەباغ

بەڕێز كاك نازم عومەر دەباغ نوێنەری حكومەتی ھەرێم لە ئێران

سڵاوێكی گەرم...

خەمبار و نیگەران بووین بەبیستنی هەواڵی گیان لەدەستدانی (مام محەمەد عومەر دەباغ)، بەم بۆنەیەوە پرسەو سەرەخۆشیتان ئاڕاستە دەكەین و خۆمان بەشەریكی خەمتان دەزانین لەم كۆستەی بنەماڵە تێكۆشەرەكەتان.

جێگەی كۆچكردوو بەهەشتی بەرین بێت و سەبووری و دڵنەوایی بۆ ئێوەی بەڕێزیش لە خودای گەورە داواكارم.
انا للە و انا  الیە راجعون
قوباد تاڵەبانی
جێگری سەرۆكی ئەنجومەنی وەزیران

 https://www.pukmedia.com/KS_Direje.aspx?Jimare=146331

سەرۆک کۆمار پرسەنامەیەکی ئاڕاستەی نازم دەباغ و بنەماڵەکەی کرد بە بۆنەی کۆچی دوایی(محەمەد عومەر دەباغ)ەوە

 برای بەرێز/ نازم عومەر دەباغ

بەرێزان/ بنەماڵە و کەسوکاری خوالێخۆشبوو محەمەد عومەر

بەداخ و کەسەرێکی زۆرەوە ھەواڵی کۆچی دوایی (محەمەد عومەر)ی براتانم پێگەیشت.

به‌م بۆنه‌ خه‌مباره‌وه‌ پرسه‌ و سه‌ره‌خۆشی خۆم ئاڕاسته‌ی خۆتان و خانه‌واده‌ و كه‌سوكارتان دەکەم و داوام له‌ خودای گه‌وره‌ ئه‌وه‌یه‌ خوالێخۆشبوو به‌ر ره‌حمه‌تی خۆی بخات و به‌ به‌هه‌شتی به‌رینی شاد بكات و سه‌بووری هه‌موو لایه‌ك بدات.

ٳنــا لله وٳنــا ٳلــیــه راجــعــون

بەرھەم ساڵح
سەرۆک کۆمار

 

نێچیرڤان بارزانى پێشوازى لە مایک پێنس دەکات

بەڕێز مایک پێنس جێگرى سەرۆکى ئەمەریکا سوپاس و پێزانینى وڵاتەکەى بۆ هەرێمى کوردستان دووپات کردەوە کە ڕۆڵێکى کاریگەرى لە شەڕى دژى داعشدا هەبووە، هەروەها ستایشى پێکەوەژیان و پاراستنى پێکهاتە ئایینى و نەتەوەییەکان و حەواندنەوەى ئاوارە و پەنابەرانى لە هەرێمى کوردستان کرد، سڵاو و ڕێزى خۆى و ئیدارەى ئەمەریکایشى پێشکەش بە کەسوکارى شەهیدانى پێشمه‌رگه‌ له‌ شەڕى دژى تیرۆر کرد.

ئێوارەى رۆژی شەممە 23/11/2019 لە هەولێر بەڕێز نێچیرڤان بارزانى، سەرۆکى هەرێمى کوردستان، پێشوازى لە بەڕێز مایک پێنس جێگرى سەرۆکى ئەمەریکا کرد.

لە کۆبوونەوەیەکدا که‌ بەڕێزان مەسروور بارزانى، سەرۆک وەزیرانى هەرێمى کوردستان، مستەفا سەید قادر جێگرى سەرۆکى هەرێمى کوردستان، قوباد تاڵەبانى جێگرى سەرۆک وەزیران و فەوزى هەریرى، سەرۆکى دیوانى سەرۆکایەتیى هەرێمى کوردستان ئامادەى بوون، بەڕێز پێنس پابەندیى ئەمەریکاى بۆ برەودان بە پەیوەندییەکان و هاوکارى و پشتگیرى لە هەرێمى کوردستان وەک هاوپەیمانێکى ئەمەریکا لە چوارچێوەى عێراقدا دووپات کردەوە و خۆشحاڵى و پشتگیریى وڵاتەکەى بە بەرەوپێشچوونى پەیوەندییەکانى هەولێر ـ بەغدا و گفتوگۆ و هەوڵى چارەسەرکردنى کێشەکان نیشان دا.

لە کۆبوونەوەکەدا سەرۆک نێچیرڤان بارزانى وێڕاى دەربڕینى خواستى هەرێمى کوردستان بۆ پەرەپێدان بە پەیوەندییەکانى لەگەڵ ئەمەریکا، سوپاسى ئەمەریکاى کرد کە لە شەڕى دژى داعشدا پشتگیرى لە عێراق و هەرێمى کوردستان کرد و دووپاتى کردەوە بێ پشتگیریى ئەمەریکا ئەو سەرکەوتنە بەسەر داعشدا بەدى نەدەهات، هەروەها سەردانى بەڕێز جێگرى سەرۆکى ئەمەریکاى لەم کاتەدا بە نیشانەى پشتگیرى لە عێراق و هەرێمى کوردستان لە قەڵەم دا.

لە کۆبوونەوەکەدا دۆخى ناوچەکە بەگشتى و چەند پرسێکى جێى بایەخى هەردوولا تاوتوێ کران.

 https://president.gov.krd/nechirvan-barzani-receives-mike-pines/

یەک شەممە, 24 تشرینی دووەم 2019 04:27

بەشداریی نوێنەرایەتی حکوومەتی هەرێمی کوردستان لە ڕێوڕەسمی کۆچی دوایی ڕاوێژکاری سەرۆکی پەڕڵەمانی ئێران

 نوێنەرایەتی حکوومەتی هەرێمی کوردستان لە تاران، بەشداریی لە ڕێوڕەسمی کۆچی دوایی برای دکتۆر "محەمەد جەعفەری" گەورە ڕاوێژکاری سەرۆکایەتی پەڕڵەمانی ئێرانی کرد.

شاندێکی نوێنەرایەتی حکوومەتی هەرێمی کوردستان لە تاران، پێکهاتوو لە "سەلام عارف روشدی" جێگری نوێنەری حکوومەتی هەرێمی کوردستان لە ئێران، "هیوا ڕەسووڵ" و "عەباس عەبدواڵلە" ئەندامانی نوێنەرایەتی حکوومەتی هەرێمی کوردستان، رۆژی یەکشەمە 17/11/2019 بەشدارییان لە ڕێوڕەسمی کۆچی دوایی "محەمەد حوسێن جەعفەری" برای دکتۆر "محەمەد جەعفەری" گەورە ڕاوێژکاری سەرۆکایەتی پەڕڵەمانی کۆماری ئیسلامی ئێران و سەرۆکی بەشی سەرۆکایەتی پەڕڵەمانی ئێرانیان کرد.

دکتۆر "محەمەد جەعفەری" سەرۆکی بەشی سەرۆکایەتی پەڕڵەمانی ئێران، سوپاسی ئامادەبوونی شاندیی نوێنەرایەتی حکوومەتی هەرێمی کوردستان لە تارانی کرد بۆ بەشداریی کردن لە ڕێوڕەسمی کۆچی دوایی براکەی.   

ڕێوڕەسمی کۆچی دوایی برای دکتۆر جەعفەری، بە ئامادەبوونی دکتۆر "عەلی لاریجانی" سەرۆکی پەڕڵەمانی ئێران، دکتۆر "مەحموود واعیزی" سەرۆکی نووسینگەی سەرۆک کۆماری ئێران، جێگران و ڕاوێژکارانی سەرۆک کۆماری ئێران و بەرپرسانی باڵای ئەم وڵاتە، کەسایەتییە زانستی و سیاسییەکان، نوێنەری شارە جۆراوجۆرەکانی ئێران لە پەڕڵەمانی ئەم وڵاتە، کارمەندانی هێزی یاسادانانی ئێران و هەروەها خەڵکی ئاسایی لە مزگەوتی پەڕڵەمانی ئێران بەڕێوەچوو.

 

نازم دەباغ لەگەڵ سەفین دزەیی کۆبۆوە

"نازم دەباغ" نوێنەری حکوومەتی هەرێمی کوردستان لە تاران، لە شاری هەولێر لەگەڵ "سەفین دزەیی" بەرپرسی پەیوەندییەکانی دەرەوەی حکوومەتی هەرێمی کوردستان دیداریی کرد.

"نازم دەباغ" نوێنەری حکوومەتی هەرێمی کوردستان لە وڵاتی ئێران، رۆژی چوارشەمە 6/11/2019 لە شاری هەولێری پێتەختی هەرێمی کوردستان، لەگەڵ "سەفین دزەیی" بەرپرسی پەیوەندییەکانی دەرەوەی حکوومەتی هەرێمی کوردستان دیداریی کرد.

لەم دیدارەدا تاوتوێی دوایین کار و چالاکییەکان و گرینگترین پێشهاتە سیاسییەکانی هەرێمی کوردستان و عێراق و ناوچەکە کرا و هەروەها باسی پەیوەندییەکانی نێوان هەرێمی کوردستان و کۆماری ئیسلامی ئێران کرا.

پەڕەى 7 لەکۆى 146 پەڕەدا

هەواڵی زیاتر لە تویتەر

راپۆرتە پڕ بینەرەکان

حالت های رنگی