لەدرێژەی سەردانەكەی بۆ وڵاتانی كەنداو و دوای سەردانەكەی بۆ وڵاتی ئیمارات و كۆبوونەوەی لەگەڵ جێنشینی ئەبوزەبی و ژمارەیەك بەرپرسی ئیماراتی یەكگرتووی عەرەبی ڕۆژی دووشەممە 30ـی 11ـی 2015 بەڕێز مەسعود بارزانی سەرۆكی هەرێمی كوردستان و شاندە یاوەرەكەی گەییشتە شاری ڕیازی پایتەختی شانشینی سعوودیە.

لەچوارچێوەی سەردانە فەرمییەكەی سەرۆك بارزانی بۆ شانشینی سعوودیە ڕۆژی سێشەممە 1ـی 12ـی 2015 شا سەلمان عەبدولعەزیز لە كۆشكی پاشایەتی لە شاری ڕیاز پێشوازی لە بەڕێز مەسعود بارزانی سەرۆكی هەرێمی كوردستان كرد.

لەم دیدارەدا كە ئەمیر محەمەد بن نایف بن عەبدولعەزیز جێنشینی یەكەم و جێگری یەكەمی سەرۆك وەزیران و وەزیری ناوخۆ و ئەمیر محەمەد بن سەلمان بن عەبدولعەزیز جێنشینی دووەم و جێگری دووەمی سەرۆك وەزیران و وەزیری بەرگری شانشینی سعوودیە و هەروەها وەزیرانی دارایی و دەرەوە و فەرهەنگ و ڕاگەیاندن حكوومەتی سعوودیە و ژمارەیەكی زۆری بەرپرس و كاربەدەستی باڵای ئەم وڵاتە ئامادە بوون، شای سعوودیا بەگەرمی بەخێرهاتنی سەرۆك بارزانی كرد و خۆشحاڵیی خۆیشی بۆ سەردانی سەرۆك بارزانی بۆ سعوودیە نیشان دا و جەختی لە گرنگی و بەردەوامیی سەردانەكان و فراوانتركردنی ئاستی پەیوەندییەكانی نێوان هەردوولا كردەوە.

هەر لە چوارچێوەی ئەم دیدارەدا شای سعوودیە نیوەڕۆخوانێكی لەسەر شەرەفی سەرۆك بارزانی ساز كرد و زۆربەی سەركردە باڵا سیاسی و ئیداری و سەربازییەكانی سعوودیە ئامادەی ئەو میوانداری و نێوەڕۆخوانەی شای سعوودیە بوون.

دوای نیوەڕۆخوانەكە سەرۆك بارزانی و شای سعوودیە بە ئامادەبوونی جێنشینی یەكەم و دووەمی سعوودیە و وەزیرانی دەرەوە و بەرگریی و وەزیر و بەرپرسەكانی تری حكوومەتی سعوودیا بەشداری كۆبوونەوەیەكی بەرفراوان بوون كە تێیدا بارودۆخی سیاسی و ئەمنی عێراق و ناوچەكە و هەروەها هەرێمی كوردستان خرایە بەر باس و گفتوگۆ و بیروڕایش لەبارەی چارەسەری قەیرانەكانی ناوچەكە و عێراق و شەڕی دژی تیرۆر ئاڵوگۆڕ كرا.

جێگەی ئاماژەپێكردنە لە بەردەوامیی سەردانە فەرمییەكەی بۆ شانشینی سعوودیە، سەرۆك بارزانی لەگەڵ جێنشین و ژمارەیەك گەورە بەرپرسی دیكەی ئەو وڵاتە كۆدەبێتەوە.

پێشنیوەڕۆی ئەمڕۆ پێنجشەممە 30/7/2015 بەڕێز نێچیرڤان بارزانی سەرۆك وەزیرانی هەرێمی كوردستان، پێشوازی لە بەڕێز حەسەن ئەحمەد ئەلشحی باڵیۆزی نوێی ئیمارات لە عێراق و شاندێكی یاوەری كرد.

لە دیدارێكدا بەڕێز باڵیۆزی نوێی ئیمارات لە عێراق خۆشحاڵیی خۆی بە سەردانی هەرێمی كوردستان و سەرسامیی خۆیشی بەرامبەر پێشكەوتنەكانی هەرێمی كوردستان لەی هەموو بوارەكاندا و بە تایبەتی لە بواری ئابووریدا دەربڕی و ئاماژەی بەوە دا سەربارەی ئەو گرفتانەی دروست بوون، بەڵام هەرێمی كوردستان بە سیاسەت و سەركردایەتیی حەكیمانەی خۆی توانیویەتی سەركەوتنی باش لە هەموو بوارەكاندا بەدەست بهێنێت. باسی لەوەش كرد كە ئیمارات بایەخێكی زۆر بە پەیوەندییەكانی لەگەڵ هەرێمی كوردستان و زیاتر بەهێزكردنیان دەدات و سەرمایەدارانی ئیماراتی هان دەدەن بۆئەوەی وەبەرهێنان لە هەرێمی كوردستان بكەن.

هەروەها دەستخۆشی لە خەڵك و حكوومەتی هەرێمی كوردستان كرد كە سەرباری ئەو بارە قورسە داراییەی لەسەر شانیەتی، توانیویانە باوەش بۆ ژمارەیەكی یەكجار زۆری ئاوارە و پەنابەران لە هەموو پێكهاتەكان بكەن و شوێنی حەوانەوە و خزمەتگوزاریی پێویستیان بۆ دابین بكەن و ئامادەییی وڵاتەكەشی بۆ كەمكردنەوەی ئەو بارە قورسەی سەر شانی حكوومەتی هەرێم بە ناردنی بەردەوامی هاوكاری، پیشان دا.

لای خۆیەوە بەڕێز سەرۆك وەزیرانی هەرێمی كوردستان سوپاسی ئەو سەردانەی و هەڵوێستی بەڕێز باڵیۆز و حكوومەت و خەڵكی ئیماراتی كرد كە توانیویانە پەیوەندییەكی باش لەگەڵ هەرێمی كوردستان دروست بكەن و هاوكاریی حكوومەتی هەرێمی كوردستان بكەن بۆ بەهاناوەچوونی ئەو ئاوارە و پەنابەرانەی لە ترسی تیرۆر ڕوویان لە هەرێمی كوردستان كردووە. جەختی لەوەش كردەوە حكوومەتی هەرێمی كوردستان بە بایەخەوە سەیری پەیوەندییەكانی لەگەڵ حكوومەتی ئیمارات دەكات و ئامادەییی حكوومەتی هەرێمیشی بۆ پێشوازیكردن لە سەرمایەدارانی ئیمارات و پێشكەشكردنی كارئاسانی، دەربڕی.

بەڕێز نێچیرڤان بارزانی هیوای سەركەوتنی بۆ بەڕێز باڵیۆزی نوێی ئیمارات لە عێراق لە كارەكانی خواست و خوازیاری ئەوەش بوو كە پەیوەندییەكانی نێوان حكوومەتی هەرێمی كوردستان و ئیمارات لە هەموو بوارەكاندا زیاتر تۆكمە و بەهێز بكرێن. هەروەك سوپاسی بەڕێز كونسڵی ئیماراتی لە هەرێمی كوردستان كرد كە لە ماوەی دەسبەكاربوونی توانیویەتی پەیوەندییەكی باش و تۆكمە لەگەڵ دەامودەزگا حكوومییەكان و كۆمەڵگەی كوردستان بە شێوەیەكی گشتی دروست بكات و پردێكی بەهێزی نێوان هەرێمی كوردستان و دەوڵەتی ئیمارات بێت.

باسكردنی بارودۆخی سیاسیی عێراق و پەیوەندییەكانی نێوان هەوڵێر و بەغدا لایەنێكی دیكەی دیدارەكە بوو و لەمبارەیەشەوە بەڕێز باڵیۆزی ئیمارات لە عێراق هیوای خواست كێشەكان بە ڕێگەی گفتوگۆ و دیالۆگ چارەسەر بكرێن.

ئەمڕۆ چوارشەممە ٢٩ـی٧ـی٢٠١٥، بەڕێز مەسعود بارزانی سەرۆکی هەرێمی کوردستان لە سەلاحەدین پێشوازیی لە بەڕیز حسن احمد الشحی باڵیۆزی نوێی ئیماراتی یەکگرتووی عەرەبی لە عێراق و راشد محه‌مه‌د مه‌نسوری کونسوڵی گشتیی وڵاتی ئیمارات له‌هه‌رێمی کوردستان کرد.

لە دیدارێكدا سەرەتا باڵیۆزی نوێی ئیمارات سڵاو و ڕێزی شێخ موحەمەد بن زاید جێنشینی ئیماراتی یەكگرتووی عەرەبی بە سەرۆک بارزانی ڕاگەیاند و خۆشحاڵیی خۆی نیشان دا کە بۆ یەکەمجارە سەردانی هەرێمی کوردستان دەکات و سەرسامیی خۆی بە پێشکەوتنەکانی هەرێمی کوردستان خستەڕوو، هەروەها سوپاس و پێزانینی وڵاتەکەی بۆ سەرۆک بارزانی و حکوومەتی هەرێمی کوردستان ڕاگەیاند بۆ هاوکاریی و هەماهەنگییان لەگەڵ رێکخراوە مرۆییەکانی ئیماراتی عەرەبی و ئامادەیی وڵاتەکەشی بۆ پەرەپێدانی زیاتری پەیوەندییەکانی لەگەڵ هەرێمی کوردستان دەربڕی.

لە بەرانبەردا سەرۆک بارزانی وێڕای بەخێرهێنانیان، هیوای سەرکەوتنی بۆ باڵیۆزی نوێ خواست و خۆشحاڵی خۆی بۆ بەرەوپێشچوونی ئاستی پەیوەندییەكانی نێوان هەردوولا پێشان دا و سوپاسی ئیماراتی عەرەبی کرد بۆ ئەو هاوکارییانەی لەبواری مرۆییدا پێشکەشی ئاوارە و لێقەوماوانی کردووە.

هەر لەم دیدارەدا لەبارەی بارودۆخی سیاسی و ئەمنیی عێراق و ناوچەكە و هەڕەشەی تیرۆریستان بۆ سەر ئاساییشی ناوچەكە و جیهان و دوایین پەرەسەندنە سیاسییەكان بیروڕا ئاڵوگۆڕ كرا.

دەوڵەتی ئیماراتی عەرەبی یەکگرتوو، دەستی بە هەڵمەتێكی سەرتاسەری بۆ ئاوارە وپەنابەرانی نێو هەرێمی كوردستان کردووە بۆ گەیاندنی یارمەتی مرۆیی وكەلوپەلی تەندروستی بۆیان، کە نزیكەی یەك ملیۆن كەس پێی سوودمەند دەبن.

راشد مەنسووری، كونسوڵی ئیمارات لە هەولێر، لە لێدوانێكی تایبەت بە ماڵپەڕی حكومەتی هەرێمی كوردستان وتی، بەپێی رێنماییەكانی سەرۆك  و‌‌حکومەتی دەوڵەتی ئیمارات ولەڕێگەی دەزگای خەلیفە بن زاید ئال نهەیان بەهاوكاری دەزگای خێر خوازی بارزانی وبەسەرپەرشتی مانگی سووری ئیماراتی ئەم هەڵمەتە وەكو دیاری مانگی ڕەمەزانی پیرۆز لە هەرێمی كوردستان دەستیپێكرد وتا كۆتایی ئەم مانگە بەردەوام دەبێت وهەموو ناوچەكانی هەرێمی كوردستان دەگرێتەوە.

رونیشیكردەوە، ئەوان دوو شێوە دابەشكردنیان هەیە بۆ یارمەتیە مرۆییەكان، بەشێكیان هەفتانەن کە بەشێوەیەكی بەردەوامە وپرۆسەكە چەسپاوە بۆ ئەوانەی لێی سوودمەندن، بەشەكەی دیكەیشی بۆ خانەوادە هەژارەكانی دەرەوەی كامپەكانە وئەو كەلوپەلانەی خۆراك كە پێیان دەدرێت بەشی دوو هەفتەیان دەكات ئەمە جگە لە دابینكردنی پێداویستی ئافرەت ومنداڵ وئاوی پاك بۆ خواردنەوە.

راشد مەنسووری ئاماژەی بەوەدا بەپێی ئەو پلانەی بە هاوبەشی لەگەڵ دەزگای خێرخوازی بارزانی داندراوە، دوای هەولێر بەرەو دهۆك وئاكرێ وپاشانیش بۆ سلێمانی دەڕۆن بەهەموو شار وشارۆچكەكانیانەوە. وتیشی کە تا ئێستا زیاتر لە 250 هەزار كەس لەم هەڵمەتە سوودیان وەرگرتووە.

ئەوەشی خستەڕوو كە ناونووسكردن بۆ پێشكەشكردنی خزمەتگوزاری تەندروستی بە پێشكەشكردنی دەرمان وهاتنی تیمی پزیشكی وتەندروستی وئەنجامدانی نەشتەرگەریش بۆ ئەوانەی پێویستیان پێیەتی لەئارادایە.

لەدوایین چالاكی مانگی سووری ئیماراتیش، بەهاوكاری دەزگای خێرخوازی بارزانی وبەسەرپەرشتی كونسوڵگەری دەوڵەتی ئیماراتی عەرەبی یەکگرتوو لە هەولێر هەڵمەتێكی گەیاندنی هاوكاری مرۆیی بۆ ئاوارە عەرەبەكانی نێو هەرێمی كوردستان دەستپێكرد كە سەرتاسەری شارەكانی هەرێمی كوردستان دەگرێتەوە ولەنێو كامپەكانی هەولێر دەستی پێكرد وبۆ دەوروبەری بەردەوام بوو.

لە 27ی حوزەیران، بەشێكی ئەم هاوكاریانە گەیەندرایە نزیكەی 1200 خانەوادەی ئاوارەبوو كە بە پلەیەك خەڵكی ناوچەكانی تەل شەعیر وتەلڕیم وگەیارەن. ئەمە جگە لە چەند خانەوادەیەكی كوردی ناوچەكانی دەورووبەری مەخموور كە تا ئێستا بەهۆی هاوسنووریان لەگەڵ بەرەكانی شەڕدا نەگەڕاونەتە شوێن وناوچەكانیان وبەگشتی ژمارەی خانەوادە ئاوارەبووەكان لەنێوان 1000 تا 1200 دایە.

راشد مەنسووری ئاماژەی بەوەشدا کە دەزگای خێرخوازی بارزانی كە هاوبەشێكی ستراتیژی مانگی سووری ئیماراتیە، لەم ماوەیەدا توانی لیستی تایبەت بەناوی خانەوادەكان ئامادە بكات وپۆلێنیان بكات وبەپێی لیستەكانی ئەوان ئەم كارە كرا.

هەر لەم چوارچێوەیەشدا ولەرۆژی 3ی تەموزی ئەمسال، بەهەماهەنگی نێوان كونسوڵگەری ئیمارات لە هەولێر ودەزگای خێرخوازی بارزانی، رێكخراوی مانگی سوری ئیماراتی یارمەتی مرۆیی كە لەچەند مادەیەكی خۆراك وچەند كەلوپەلێكی تەندروستی پێكهاتبوو گەیاندە ئاوارەكانی كامپی بەحركە وپەنابەرانی رۆژئاوای كوردستان لە كامپی كەورگۆسك.

لەهەردوو كامپدا، نزیكەی 3000 خانەوادە لەم یارمەتیانە سوود مەندبوون، وبەپێی پلانی داهاتووشدا،ئاوارە وپەنابەرانی هەردوو پارێزگای دهۆك وسلێمانی لەم یارمەتیە مرۆییانە سوودمەند دەبن.

لە درێژەی سەردانی سەرۆك بارزانی و شاندی یاوەری بۆ وڵاتانی كەنداو ڕۆژی دووشەممە 15ـی 6ـی 2015 لە شاری ئەبوزەبی شێخ موحەمەد بن زاید جێنشینی ئیماراتی یەكگرتووی عەرەبی پێشوازی لە بەڕێز مەسعود بارزانی سەرۆكی هەرێمی كوردستان و شاندی یاوەری كرد.

لە دیدارێكی گەرم و دۆستانەدا باسی پەیوەندییەكانی نێوان هەرێمی كوردستان و ئیمارات و چۆنییەتی بەرەوپێشبردن و فراوانتركردنی كرا و هەروەها دوا پێشهاتە سیاسی و ئەمنییەكانی عێراق و ناوچەكە و هەڕەشەی تیرۆریستان بۆ سەر ئاساییشی ناوچەكە و جیهان خرایە بەر باس و گفتوگۆ. تەوەرێكی دیكەی ئەم دانیشتنە تاوتوێكردنی بارودۆخی مرۆیی و ڕەوشی ئاوارە و پەنابەران بوو كە لەبەر هەڕەشەی تیرۆریستان ماڵ حاڵی خۆیان جێ هێشتووە.

جێگەی ئاماژەپێكردنە لەم دیدارەدا مەسرور بارزانی ڕاوێژكاری ئەنجوومەنی ئاساییشی هەرێم و فواد حوسێن سەرۆكی دیوانی سەرۆكایەتیی هەرێم و عەلی سندی وەزیری پلاندانان و سەلاحەدین بابەكر وەزیری كارەبای حكوومەتی هەرێم یاوەری سەرۆك بارزانی بوون.

ئێوارەی ئەمڕۆ یەكشەممە 2015/2/8 بەڕێز نێچیرڤان بارزانی سەرۆك وەزیرانی هەرێمی كوردستان بە سەرۆكایەتی شاندێكی حكوومی گەیشتە میرنشینی دوبەی لە ئیماراتی عەرەبی یەكگرتوو.

لە سەردانەكەیدا كە هەریەك لە قوباد تاڵەبانی جێگری سەرۆك وەزیران و ئاشتی هەورامی وەزیری وزە و سەرچاوە سروشتییەكان و عەلی سندی وەزیری پلاندانان و رێباز حەملان وەزیری دارایی و سەفین دزەیی وتەبێژی فەرمی حكوومەتی هەرێمی كوردستان یاوەری دەكەن؛ بە داوەتێكی فەرمی دەوڵەتی ئیماراتی عەرەبی یەكگرتوو بەشداری لە كۆبوونەوەی لوتكەی حكومی دا دەكەن كە بەڕێز بان كی مۆن سكرتێری گشتی نەتەوە یەكگرتووەكان و ژمارەیەك لە شارەزایان و بەرپرسیانی دەزگا جیهانییەكان بەشداری تێدا دەكەن.

لە كۆبوونەوەی لوتكەی حكومی دا كە ماوەی سێ‌ رۆژ دەخایەنێت؛ كۆبوونەوە و كۆڕ و سمیناری تایبەت بە سیستمی كارگێڕی و حكوومەتداری و چۆنییەتی پێشخستنیان پێشكەش دەكرێت.

هەر لەو سەردانەیدا كە ماوەی سێ‌ رۆژ دەخایەنێت؛ بەڕێز نێچیرڤان بارزانی و شاندی یاوەری لەگەڵ گەورە بەرپرسانی دەوڵەتی ئیماراتی عەرەبی یەكگرتوو چەندین دیدار و كۆبونەوە ساز دەكەن.

پاشنیوه‌ڕۆی ئه‌مڕۆ دووشه‌ممه‌ 2015/2/9، به‌ڕێز نێچیرڤان بارزانی سه‌رۆك وه‌زیرانی هه‌رێمی كوردستان له‌ كۆشكی ئه‌لبه‌حر له‌ ئه‌بوو زه‌بیی پایته‌خت، له‌ لایه‌ن به‌ڕێز شێخ محه‌مه‌د بن زاید ئال نهیان جێنشینی ئه‌بوو زه‌بی، جێگری سه‌ركرده‌ی باڵای هێزه‌ چه‌كداره‌كانی میرنشینه‌ یه‌كگرتووه‌كانی عه‌ره‌بی ‘’’ئیمارات’’ه‌وه‌، پێسوازی لێ كرا.

له‌ دیدارێكدا به‌ڕێز شێخ محه‌مه‌د بن زاید ئال نهیان، خۆشحاڵیی خۆی به‌ دیداری به‌ڕێز نێچیرڤان بارزانی نیشان دا و سوپاسی به‌ڕێزیانی كرد بۆ به‌شداریكردنی خۆی و شاندی حكوومه‌تی هه‌رێمی كوردستان له‌ لوتكه‌ی حكوومه‌ت كه‌ ئه‌مڕۆ له‌ دوبه‌ی كاره‌كانی ده‌ست پێكرد و ماوه‌ی سێ ڕۆژ به‌رده‌وام ده‌بێت. له‌ به‌رامبه‌ردا به‌ڕێز سه‌رۆك وه‌زیرانی هه‌رێمی كوردستان سوپاسی بانگهێشتكردنی بۆ ئه‌م لوتكه‌ جیهانییه‌ كرد و خۆشحاڵیی خۆی به‌ سه‌ردانی ئیمارات و به‌شداریكردنی له‌ لوتكه‌ی حكوومیدا ده‌ربڕی.

له‌ به‌شێكی دیكه‌ی دیداره‌كه‌دا، هه‌ردوولا باسیان له‌ په‌یوه‌ندییه‌كانی هه‌رێمی كوردستان به‌ تایبه‌تی و عیراق به‌گشتی له‌گه‌ڵ ئیمارات كرد و جه‌ختیان له‌ خواستی دوولایه‌نه‌ بۆ به‌ره‌وپێشبردن و چۆنیه‌تیی بره‌ودانی زیاتر به‌ په‌یوه‌ندییه‌كان له‌ هه‌موو بواره‌كان و به‌تایبه‌تی له‌ بواری ئابووریدا و بۆ‌ به‌رژه‌وه‌ندیی هه‌ردوولا، كرده‌وه‌. هه‌روه‌ها چه‌ند پرسێكی دیكه‌ی هه‌نووكه‌ییی مایه‌ی بایه‌خی دوولایه‌نایان، تاوتوێ كرد.

به‌ڕێز نێچیرڤان بارزانی سوپاس و پێزانینی حكوومه‌تی هه‌رێمی كوردستانی بۆ كۆمه‌ك و هاوكارییه‌ مرۆییه‌كانی ئیمارات دووپات كرده‌وه‌ و له‌مباره‌یه‌وه‌ به‌تایبه‌تی تیشكی خسته‌ سه‌ر ڕۆڵی دیار و به‌رچاوی مانگی سووری ئیماراتی كه‌ له‌ چه‌ندین ناوچه‌ی جیا له‌ هه‌رێمی كوردستان، كۆمه‌ك و هاوكاری پێشكه‌ش به‌ ئاواره‌ و په‌نابه‌ران كردووه‌ و بۆ ئه‌مه‌ش ده‌ستخۆشی له‌ به‌ڕێوه‌به‌ران و ستافی ئه‌و دامه‌زراوه‌ مرۆییه‌ كرد.

ئێواره‌ی ئه‌مڕۆ دووشه‌ممه‌ 2015/2/9، به‌ڕێز نێچیرڤان بارزانی سه‌رۆك وه‌زیرانی هه‌رێمی كوردستان و شاندی یاوه‌ری له‌ لایه‌ن به‌ڕێز شێخ عه‌بدوڵڵا بن زاید ئال نهیان وه‌زیری ده‌ره‌وه‌ی میرنشینه‌ یه‌كگرتووه‌كانی عه‌ره‌بی ’’ئیمارات’’ه‌وه‌، پێشوازی لێ كرا.

له‌ كۆبوونه‌وه‌یه‌كدا هه‌ردوولا باسیان له‌ په‌یوه‌ندییه‌كانی هه‌رێمی كوردستان و عیراق له‌گه‌ڵ ئیمارات كرد و تیشكیان خسته‌ سه‌ر چۆنیه‌تیی بره‌ودانی زیاتر به‌ په‌یوه‌ندییه‌كان. له‌مباره‌یه‌وه‌ باس له‌ ڕۆڵی كونسلخانه‌ی گشتیی ئیمارات له‌ هه‌ولێر كرا و به‌ڕێز سه‌رۆك وه‌زیران ڕۆڵی به‌ڕێز كونسل و كونسلخانه‌ی گشتیی ئیماراتی له‌ هه‌ولێر به‌رز نرخاند و ئاماژه‌ی به‌ هه‌وڵ و كۆششه‌ به‌رده‌وامه‌كانیان بۆ به‌ره‌وپێشبردنی په‌یوه‌ندیی دووقۆڵیی هه‌رێمی كوردستان و ئیمارات كرد. به‌ڕێز وه‌زیری ده‌ره‌وه‌ی ئیماراتیش ڕۆڵی كونسلخانه‌ی وڵاته‌كه‌ی له‌ هه‌ولێر به‌ ڕۆڵێكی گرنگ له‌قه‌ڵه‌م دا.

هه‌ردوولا ڕه‌وش و بارودۆخی ناوچه‌كه‌ به‌گشتی و دوایین پێشهاته‌كانی شه‌ڕی دژی تیرۆرستانی داعشیان به‌تایبه‌تی تاوتوێ كرد و له‌مباره‌یه‌وه‌ هه‌ردوولا جه‌ختیان له‌وه‌ كرده‌وه‌ كه‌ شه‌ڕی دژی تیرۆر، ته‌نیا به‌ چه‌ك ناكرێت و هاوكات له‌گه‌ڵ لێدان و ئۆپه‌راسیۆنه‌ سه‌ربازییه‌كان، ده‌بێ له‌ ڕووی هزریشه‌وه‌ شه‌ڕی تیرۆر و بیری توندوتیژی بكرێت.

به‌ڕێز نێچیرڤان بارزانی، به‌ بانگهێشتێكی فه‌رمی و به‌ سه‌رۆكایه‌تیی شاندێكی حكوومی كه‌ له‌ به‌ڕێزان جێگری سه‌رۆك وه‌زیران، وه‌زیرانی دارایی و ئابووری، سامانه‌ سروشتییه‌كان، پلاندانان و وته‌بێژی فه‌رمیی حكوومه‌تی هه‌رێمی كوردستان پێكهاتبوو، بۆ به‌شداریكردن له‌ لوتكه‌ی حكوومی، دوێنێ ئێواره‌ گه‌یشتنه‌ دوبه‌ی.