ئەمڕۆ سێشەممە 11ـی 2ـی 2014 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی کرد لە پارلەمانتاری توركیا خاتوو لەیلا زانا و سری سورەییا ئۆندەر، پارلەمانتار و جێگری هاوسەرۆكی پارتی دیموكراتی گەلان HDP کە بەمەبەستی گەیاندنی نامەیەکی بەڕێز عەبدوڵڵا ئۆجەلان تەشریفیان هێنابوو.

لە دیدارەكەدا ئەو نامەیەی بەڕێز عەبدوڵڵا ئۆجەلان کە بە دەستی خۆی و بەزمانی کوردی بۆ سەرۆک بارزانی نووسیوە ڕادەستی سەرۆک بارزانی کرا کە تیایدا وێڕای دەربڕینی ڕێزی خۆی بۆ سەرۆک بارزانی، باسی پرۆسەی ئاشتیی لە تورکیا کردووە. لەبەشێکی دیکەی نامەکەدا بەڕێز ئۆجەلان پشتگیریی خۆی بۆ پرۆسەی ئاشتیی لە تورکیا دەربڕیوە و داوای هاوکاریی سەرجەم لایەنەکانی کردووە بۆ سەرخستنی ئەو پرۆسەیە و ئاماژەی بۆ پێویستیی بەردەوامبوونی هەماهەنگیی لەنێوان هەموو لایەنە کوردییەکان کردووە.

هەر لە دیدارەکەدا کۆمەڵێک تەوەر خرانە بەر باس کە پەیوەندییان بە ڕەوشی ناوچەکەوە هەیە.

سێ شەممە, 11 شوبات 2014