نيوه‌ڕۆى ئه‌مڕۆ چوارشه‌ممه‌ 2021/11/17 به‌ڕێز نێچيرڤان بارزانى، سه‌رۆكى هه‌رێمى كوردستان، پێشوازى له‌ به‌ڕێز د. به‌رهه‌م ساڵح، سه‌ركۆمارى عيراقى فيدراڵ كرد.

له‌ كۆبوونه‌وه‌يه‌كدا دۆخى عيراق به‌گشتى و قۆناغى دواى پرۆسه‌ى ده‌نگدان و هه‌ڵبژاردنى ئه‌نجومه‌نى نوێنه‌رانى عيراق و ئه‌نجامه‌كانى، په‌يوه‌ندييه‌كانى هه‌ولێر ـ به‌غدا و هه‌وڵه‌كانى چاره‌سه‌ركردنيان، پرسى دامه‌زراندنى حكوومه‌تى داهاتووى عيراق، شه‌ڕى تيرۆر و ڕووبه‌ڕووبوونه‌وه‌ى هه‌ڕه‌شه‌كانى داعش و پێشهاته‌كانى ناوچه‌كه‌ به‌گشتى، خرانه‌ به‌ر باس و بيروڕايان له‌باره‌يانه‌وه‌ گۆڕييه‌وه‌.

هه‌ردوولا جه‌ختيان له‌ گرنگى و پێويستيى هاريكارى و هه‌ماهه‌نگيى هێز و لايه‌نه‌ عيراقييه‌كان بۆ تێپه‌ڕاندنى ته‌حه‌دييه‌كانى ئه‌م قۆناغه‌ كرده‌وه‌ و هاوڕا بوون كه‌ هه‌مووان پێكه‌وه‌ بۆ جێگيركردنى سه‌قامگيرى و هێنانه‌كايه‌ى حكوومه‌تێكى خزمه‌تگوزار و وه‌ڵامده‌ره‌وه‌ بۆ چاوه‌ڕوانى و داواكارييه‌كانى هاووڵاتيان كار بكه‌ن و پرۆسه‌ى سياسى و وڵات بخه‌نه‌ سه‌ر ڕێچكه‌ و پێگه‌ى دروستى خۆى.

https://presidency.gov.krd/the-presidents-of-the-republic-of-iraq-and-the-kurdistan-region-discuss-the-situation-of-the-country/

• سەرۆکی حکومەت :
حکومەتا هەرێما کوردستانێ پشتەڤانییا خۆ بۆ پێشڤەبرنا بوارێ کەلتووری و رەوشەنبیری ل کوردستانی ب گشتی دووپات دکەتەڤە

هەولێر، هەرێمی کوردستان، عێراق (GOV.KRD)- ئەمڕۆ دووشەممە 15ی نۆڤێمبەری 2021، بە ئامادەبوونی مەسرور بارزانی سەرۆکی حکومەتی هەرێمی کوردستان، ڕێوڕەسمی هەشتەمین فێستیڤاڵی نێودەوڵەتیی فیلم لە دهۆک دەستی پێکرد کە هەفتەیەک بەردەوام دەبێت.

سه‌رۆكی حكومه‌تی هه‌رێمی كوردستان، لە گوتارێکدا ڕایگەیاند کە به‌ گوێره‌ی توانا، هه‌موو پشتیوانییه‌كی ماددی و مه‌عنه‌ویی بۆ كاری هونه‌ری دەکەین و پابه‌ندین به‌ پێشخستنی بواری كولتووری و هونه‌ری
سه‌رۆكی حكومه‌ت ئاماژه‌ی به‌وه‌شدا کە سینه‌ما ده‌توانێت رۆڵێكی كاریگه‌ر له‌ پرۆسه‌ی هۆشیاری كۆمه‌ڵگه‌ ببینێت. هەروەها گوتیشی: گه‌لی كوردستان به‌ درێژایی مێژووی خۆی رووبه‌ڕووی ده‌یان كاره‌سات، كۆمه‌ڵكوژی، جینۆساید، سیاسه‌تی ره‌گه‌زپه‌رستی و له‌ناوبردن بووه‌ته‌وه‌، له‌ په‌نجا ساڵی رابردوودا تاوانی هۆڤیانه‌ دژی‌ گه‌لی كوردستان ئه‌نجامدراون، به‌ڵام به‌داخه‌وه‌ ئه‌و تاوانانه‌ و مێژووی تراژیدیای گه‌لی ئێمه‌ وه‌ك ئه‌وه‌ی پێویسته‌ له‌ سینه‌مادا ره‌نگی نه‌داوه‌ته‌وه‌.
ئەمەش دەقی گوتاری سەرۆکی حکومەتی هەرێمی کوردستانە :
ئەز گەلەك خۆشحالم، ئەڤرۆ ل هەشتەمین فیلمە فەستیڤاڵا نێڤدەولەتی یا دهۆکێ پشکدارم. دەستخۆشیێ ل رێڤەبەر و رێکخەرێن ڤێ فەستیڤاڵێ دکەم، کو ئەڤە چەند ساڵن ب رەنگەکێ سەرکەفتی فەستیڤاڵێ ئەنجام ددەن.
ب خێرهاتنەکا گەرم ل هەموو مێهڤانێن بەرێز و سینەماکار و فیلمسازان دکەم، کو ژ دەرڤەی هەرێما کوردستانێ هاتینە، زۆر ب خێر بێن.
من بهیست كو تیمه‌كا هونه‌رمه‌ند و سینه‌ماكارێن ئه‌فغانی ژی یێن لڤر، ئه‌ز ب خێرهاته‌كا گه‌رم یا وان ژی دكه‌م، چونكی ره‌وشا وه‌ڵاتێ وان ژی وه‌كی وه‌ڵاتێ مه‌ یێ دژواره‌، لێ به‌لێ گرنگیدان ب كارێ فیلمسازی و هونه‌ریێ بۆ به‌رچاڤكرنا ئێش و ژانێن گه‌لێ وان نیشانا وێ یه‌كییه‌،‌ كو باندۆرا هونه‌را فیلم و سینه‌مایێ لسه‌ر جڤاكێ و جیهانێ چه‌ندا زۆره‌، ژبه‌ر وێ یه‌كێ ده‌ستخۆشیێ لێ دكه‌م و ده‌ستخۆشیێ ل رێخه‌رێن ڤێ فه‌سته‌ڤاڵێ ژی دكه‌م.
جهێ خۆشحالیێ یە، کو ب رێکا ڤێ فەستیڤاڵێ، سینەماکار و فیلمسازێن کوردستانێ و وەڵاتێن دەوروبەر و جیهانێ پێگڤە دروونن و یەک ودوو دناسن و دانوستاندنان لسەر بەرهەمێن خۆ و پێشڤەبەرنا سینەمایێ و فیلمسازیێ ب گشتی دکەن. ئەڤ جۆرێ فەستیڤاڵان، دەلیڤەیێن زۆر گرنگن بۆ پێشڤەچوونا هونەرێ سینەمایێ و د هەمان دەمدا بۆ پتر ناساندنا کوردستانێ.
بێگومان سینەما، هونەرەکا ئێکجار گرنگ و کاریگەرە، کو دشیان دایە ب رێکا ڤی هونەری، چەندین پەیامێن گرنگ و مرۆڤایەتی بگەهینیته‌ خەلکی، هەروەتۆڤ سینەما دکاریت رۆلەکێ کاریگەر د پرۆسەیا هشیارکرنەڤێ و پێشڤەبرنا جڤاکی دا هەبیت.
گەلێ کوردستانێ، ب درێژاهییا دیروکا خۆ، راستی دەیان کارەسات،جینۆساید، سیاسەتا رەگەزپەرستیێ و ژناڤبرنێ بوویە. هەر بۆ نموونه‌، بتنێ د پێنجی ساڵێن دەربازبووییدا تاوانێن مەزن و هۆڤایەتی ل دژی گەلێ کوردستانێ هاتینە ئەنجام دان. مخابن ئەڤ تاوانە و دیروکا تراژیدی یا گەلێ کوردستانێ، وەکو پێدڤی د سینەمایێدا رەنگڤه‌نه‌دایه‌. ل دەمەکی کو ژ هەژی هندێ نە کو ژ لایێ سینەماکارێن کوردستانی و بیانیڤە، ببنە دەیان فیلمێن کاریگەر و ب هێز. ل هەمان دەمدا، دیروکا گەلێ کوردستانێ، یا تژییە ژ سه‌دان داستانێن ئازایەتی و قەهرەمانیێ، هەروەتۆڤ چەندین سەرکردە و رێبەر و کەسایەتی و هێمایێن نیشتیمانی و وەڵاتپارێزیێ هەنە، کو هەژی وێ چەندێ نە ببنە مژار و بابەتێن سینەمایێ و به‌رهه‌مێن نوکە و پاشەرۆژێ.
هەروەتۆڤ، جوگرافیا و سروشتێ هەرێما کوردستانێ، رەنگە زۆر ب گونجن کو ببنە جهێن وێنەگرتنا فیلمێن سینەمایی بهێنە بکارئینان. حکومەتا هەرێما کوردستانێ، پێشوازیێ ل وان هەموو سینەماکاران دکەت، كو بهێن و وێنەیێن خۆ بگرن. ژ بۆ ڤی مەرەمێ ژی، د چارچووڤەیێ رێکار و یاسایێن کار پێ دهیتە کرن، ئەم د ئامادەینە بۆ هەر هەڤکاری و پشتەڤانییەکا پێتڤی.
حکومەتا هەرێما کوردستانێ پشتەڤانییا خۆ بۆ پێشڤەبرنا بوارێ کەلتووری و رەوشەنبیری ل کوردستانی ب گشتی دووپات دکەتەڤە و ل ساڵێن دەربازبووییدا، حکومەت لدویڤ ئیماکاناتێن به‌رده‌ست هاروکارێ بوارێ سینەمایی و هونه‌ری بوویە و ب شێوەیێن ماددی و مەعنەوی و نوكه‌ ژی ب هه‌مان ره‌نگ، ئەم د ئامادەینە ل گۆڕەی شیانێن حکومەتێ، هەماهەنگ و هەڤکار بین. هەر چەندە هنگ د ئاگەهدارن کو مخابن ل دو ساڵێن دەربازبوویی، ب ئەگەرێ قەیرانا دارایی، هەرێما کوردستانێ د رەوشەکا زەحمەت یا دارایی دایە، کو هەتا نوکە ژی مە نەوەستیاینە ب تەمامی ژ ئەڤێ رەوشا ب زەحمەت دەرباز بین. نوکە کارێ بەراهیێ یێ حکومەتێ دابینکرنا مووچەیێ مووچەخۆرێن هەرێما کوردستانێ یە، لێ دگه‌ل ڤێ چەندێ ژی ئەم کار دکەین بۆ ئاڤاکرنا ژێرخانەکا ب هێز یا ئابووری و د هەمان دەمدا ژی پێشڤەبەرنا بوارێ کەلتووری.
جارەکا دی، دەستخۆشیێ ل رێکخەرێن ڤێ فەستیڤاڵێ دکەم و هیڤییا سەرکەفتنێ بۆ سینەماکارێن کوردستانێ دخوازم و هیڤیدارم ل ئاستێ وێ بەرپرسیاریێ بن، یا ل سەر ملێن وان و ب رەنگەکێ بابەتی، رەوش و دوورهێل و دیروکا گەلێ کوردستانێ ب باشی ب رێکا ئەکرانێن سینەمایێ، بگەهیننە هەموو جیهانێ.

 

 

 

 

 

 

 

 

 

 

 

https://gov.krd/government/the-prime-minister/activities/posts/2021/november/%D8%A8%DB%95-%D8%A8%DB%95%D8%B4%D8%AF%D8%A7%D8%B1%DB%8C-%D8%B3%DB%95%D8%B1%DB%86%DA%A9%DB%8C-%D8%AD%DA%A9%D9%88%D9%85%DB%95%D8%AA%DB%8C-%D9%87%DB%95%D8%B1%DB%8E%D9%85%DB%8C-%DA%A9%D9%88%D8%B1%D8%AF%D8%B3%D8%AA%D8%A7%D9%86-%DA%95%DB%8E%D9%88%D8%B1%DB%95%D8%B3%D9%85%DB%8C-%D9%87%DB%95%D8%B4%D8%AA%DB%95%D9%85%DB%8C%D9%86-%D9%81%DB%8E%D8%B3%D8%AA%DB%8C%DA%A4%D8%A7%DA%B5%DB%8C-%D9%86%DB%8E%D9%88%D8%AF%DB%95%D9%88%DA%B5%DB%95%D8%AA%DB%8C%DB%8C-%D9%81%DB%8C%D9%84%D9%85-%D9%84%DB%95-%D8%AF%D9%87%DB%86%DA%A9-%D8%A8%DB%95%DA%95%DB%8E%D9%88%DB%95%DA%86%D9%88%D9%88/