ڕۆژی سێشەممە 12ـی 4ـی 2016 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە سەید عەممار ئەلحەكیم سەرۆكی ئەنجوومەنی باڵای ئیسلامی لە عێراق و شاندی یاوەری كرد.

لە دیدارەكەدا كە فازڵ میرانی سكرتێر و هۆشیار زێباری و مەحمود محەمەد ئەندامانی مەكتەبی سیاسیی پارتی دیموكراتی كوردستان و د. فواد حوسێن سەرۆكی دیوانی سەرۆكایەتیی هەرێم ئامادەی بوون، سەرۆكی ئەنجوممەنی باڵای ئیسلامی لە عێراق باسی لە دوایین كۆنگرەی ئەنجوومەنی باڵای ئیسلامی و ڕاسپاردە و بڕیارەكان و ڕوئیای كۆنگرەكە كرد و هەروەها بیروبۆچوونی ئەنجوومەنی باڵای ئیسلامیی لەبارەی قەیرانی سیاسیی عێراق بۆ سەرۆك بارزانی شی كردەوە و باسی لەو وەرەقەیە كرد كە ئەنجوومەنی باڵای ئیسلامی بۆ چارەسەركردنی قەیرانی عێراق پێشكەشی هەر سێ سەرۆكایەتییەكەی عێراقی كردووە.

لەبەرانبەردا سەرۆك بارزانی پیرۆزبایی بەستنی كۆنگرەی ئەنجوومەنی باڵای ئیسلامی و هەڵبژاردنەوەی سەید عەممار ئەلحكیم كرد وەك سەرۆكی ئەنجوومەنی باڵای ئیسلامی و لە گوتەیەكدا سیاسەت و بیروڕای هەرێمی كوردستانی لەمەڕ قەیرانی سیاسیی عێراق بۆ شاندی میوان خستەڕوو.

هەر لەم كۆبوونەوەیەدا بیروڕا لە بارەی ڕیشە و هۆكارەكانی قەیرانی سیاسیی عێراق و ڕێگەكانی چارەسەركردنی ئەم قەیرانە ئاڵوگۆڕ كرا و جەخت لەوە كرایەوە كە بە بێ ڕەچاوكردنی بنەمای شەراكەتی ڕاستەقینە چارەسەركردنی قەیرانی سیاسیی ناهێتەدی و گرفتەكان قووڵتر دەبنەوە. هەروەها هەردوولا ئەوەیشیان دووپات كردەوە كە پێویستە ئەو هێزانەی ڕۆڵیان لە ڕووخاندنی ڕژێمی پێشوو و خەبات لەدژی دیكتاتۆریدا هەبووە ڕۆڵی خۆیان لە چارەكردنی گرفتەكان و پڕۆسەی سیاسی بگێڕنەوە.