ڕۆژی سێشەممە 7ـی 7ـی 2015 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە یووكی ئۆكامۆتۆ سیاسەتمەداری ناودار و ڕاوێژكاری تایبەتی سەرۆك وەزیرانی پێشووی ژاپۆن و شاندێكی یاوەری كرد كە لە كازۆیا ناشیدا باڵیۆزی ژاپۆن لە عێراقی فیدڕاڵ و ژمارەیەك ڕاوێژكاری باڵیۆزخانەی ژاپۆن پێك هاتبوو.

لە دیدارەكەدا ڕاوێژكاری تایبەتی سەرۆك وەزیرانی پێشووی ژاپۆن پیرۆزبایی لە سەرۆك بارزانی كرد بە بۆنەی ئەو پێشكەوتنەی لە ماوەی دە ساڵی ڕابردوو لە هەرێمی كوردستاندا لە بواری جۆراوجۆر هاتووەتە ئاراوە. ئەوەیشی ڕاگەیاند كە وڵاتەكەی بایەخێكی زۆر بە كوردستان دەدات و ژاپۆن ئامادەیی تەواوی هەیە كە بەشدارییەكی كارای لە یارمەتیدانی كەرتی گشتی و تایبەتی كوردستاندا هەبێت. هەروەها ئەوەیشی خستەڕوو كە وڵاتی ژاپۆن بە نیگەرانییەوە سەیری بارودۆخی ئاساییشی ناوچەكە و هەڕەشەی تیرۆریستان دەكات و ڕۆڵی هێزی پێشمەرگەی كوردستانیشی لە ڕووبەڕووبوونەوەی تیرۆریستان و پاراستنی پێكهاتەكان بە ئازایەنە و نیشتیمانپەروەرانە وەسف كرد. یووكی ئۆكاتۆمۆ سیاسەتمەداری ناوداری ژاپۆنی پێشمەرگەی بە تەنیا هێزی سەركەوتوو لە قەڵەمدا كە كاریگەرانە ڕووبەڕووی تیرۆر بووەتەوە و ڕۆڵی گێڕاوە لە پاراستنی ئاساییشی جیهان.

لەبەرانبەردا سەرۆك بارزانی بە گەرمی بەخێرهاتنی شاندی میوانی كرد و ئامادەیی هەرێمی كوردستانی ڕاگەیاند بۆ فراوانتركردنی پەیوەندییەكان لەگەڵ وڵاتی ژاپۆن لە بواری سیاسی و ئابووری و كەرتی كشتوكاڵ و ئەوەیشی خستەڕوو كە لە كوردستان دەرفەتی زۆر باش هەیە كە سوود لە توانا سرووشتییەكان وەربگیرێت و پەرە بە كەرتی كشتوكاڵ بدرێت. لە درێژەی قسەكانیدا سەرۆك بارزانی تیشكی خستە سەر شەڕی دژی داعش و جەختی لەوە كردەوە كە داعش ڕێكخراوێكی تیرۆریستیی جیهانییە و هەڕەشەیە بۆ سەر هەموو لایەك، بۆیە ڕووبەڕووبوونەوەی هەوڵێكی هەمە لایەنەی پێویستە.