سەرۆكی هەرێمی كوردستان پێشوازی لە شاندێكی هاوبەشی كۆماریخوازانی هەردوو ئەنجوومەنی پیران و نوێنەرانی ئەمەریكا دەكات

  • چوار شەممە, 14 ت یەکەم 2015

ڕۆژی چوارشەممە 14ـی 10ـی 2015 لە شاری هەولێر بەڕێز مەسعود بارزانی سەرۆكی هەرێمی كوردستان پێشوازی لە شاندێكی هاوبەشی كۆماریخوازانی هەردوو ئەنجوومەنی پیران و نوێنەرانی ئەمەریكا كرد كە پێكهاتبوون لە سێناتۆر میچ مەككۆنێڵ سەرۆكی زۆرینەی كۆماریخوازانی ئەنجوومەنی پیران و سێناتۆر تۆم كوتون و سێناتۆر مایك ڕۆندز و سێناتۆر جۆنی ئیرنست و ئاندی بار ئەندامی كۆماریخوازی ئەنجوومەنی نوێنەرانی ئەمەریكا و ستیوارت جۆنز باڵیۆزی ئەمەریكا لە عێراق و ماتیوس میتمان كونسوڵی ئەمەریكا لە هەولێر و ژمارەیەك فەرماندەی سوپای ئەمەریكا لە عێراق و ڕاوێژكاری كۆنگریسی ئەمەریكا.

لە دیدارەكەدا شاندی میوان ستاییشی بڕوابەخۆبوون و قارەمانێتی و خۆڕاگریی هێزی پێشمەرگەی كوردستانیان كرد و سەرسامیی خۆیشیان بە سەقامگیری و پێشكەوتنی گەلی كوردستان نیشاندا و ئەوەیان بە سەرۆك بارزانی ڕاگەیاند كە هەموو جیهان بە بایەخەوە سەیری پێگە و ڕۆڵی هەرێمی كوردستان دەكات. شاندی كۆماریخوازی كۆنگریسی ئەمەریكی پاڵپشتیی تەواوی خۆیان بۆ سەقامگیریی هەرێمی كوردستان و پشتیوانیكردنی هێزی پێشمەرگە و پڕچەككردنی ڕاگەیاند و ئەویان خستەڕوو كە بەردەوام دەبن بۆ هەوڵەكانیان بۆ یارمەتیدان و پاراستنی هەرێمی كوردستان. هەر لەم دیدارەدا ئەندامانی شاندی میوان داوایان كرد كە گوێبیستی ڕاوبۆچوونی سەرۆك بارزانی بن لەبارەی شەڕی تیرۆریستان و دوا پەرەسەندنە سیاسی و ئەمنییەكان و بارودۆخی ناوچەكە و سووریا و هەروەها كێشە و گرفتەكانی هەرێم و پێداویستییەكانی هێزی پێشمەرگەی كوردستان.

لەبەرانبەردا سەرۆك بارزانی بە گەرمی بەخێرهاتنی شاندی میوانی كرد و سوپاسی گەل و سەرۆك و حكوومەت و سوپای ئەمەریكای كرد كە پاڵپشتی هەرێمی كوردستان بوونە و ئاستی هەماهەنگیی نێوان هێزی پێشمەرگە و سوپای ئەمەریكای بە نموونەیی وەسف كرد و خۆشحاڵیی خۆیشی نیشاندا كە هەماهەنگییەكە بە شێوەیەك بووە كە هەتا ئێستا خەڵكی سڤیل بۆ یەكجاریش نەكراونەتە ئامانج و ئەوە خۆی لەخۆیدا سەركەوتن و دەستكەوتە بۆ سوپای ئەمەریكا و هێزی پێشمەرگە. سەرۆك بارزانی جەختیشی لەوە كردەوە كە ئەولەویەتی سەرەكیی هەرێمی كوردستان و هێزی پێشمەرگە پاراستنی پێكهاتەكان و شەڕی داعش و لەناوبردنی هەڕەشەی تیرۆریستانە.

سەرۆك بارزانی لە درێژەی قسەكانیدا باسی گرفتی ئابووری و تێچوونە مرۆڤی و ماددییەكانی شەڕی داعش و هاتنی سەدانهەزار ئاوارە و بڕینی بودجەی هەرێم و دابەزینی نرخی نەوتی كرد كە بە یەكەوە كێشەی گەورەیان بۆ هەرێمی كوردستان دروست كردووە و قەیرانی ئابووری قووڵتر كردووە.

لەبارەی بارودۆخی ناوەخۆی هەرێمیش سەرۆك بارزانی ڕایگەیاند كە پاراستنی ئاساییشی نەتەوەیی هەرێمی كوردستان و هەروەها شەڕی دژی داعش دەبێ ئەولەوییەتی هەموو لایەكی هەرێمی كوردستان بێت و دواجار قەیرانی سیاسیی هەرێمیش چارەسەر دەبێت و كاریگەری لەسەر سەقامگیریی هەرێم نابێت.

جێگەی ئاماژەپێدانە لەم كۆبوونەوەیەدا نێچیرڤان بارزانی سەرۆكی حكوومەتی هەرێمی كوردستان و د. ڕۆژ نوری شاوێز جێگری پێشووی سەرۆك وەزیرانی عێراق و فواد حوسێن سەرۆكی دیوانی سەرۆكایەتیی هەرێم و فەلاح مستەفا بەرپرسی فەرمانگەی پەیوەندییەكانی هەرێم ئامادە بوون.

Read کد خبر: 1604

هەواڵی زیاتر لە تویتەر

راپۆرتە پڕ بینەرەکان

حالت های رنگی