دوای گەییشتنی سەرۆك بارزانی بۆ فڕۆكەخانەی كوێت لە لایەن بەرپرسانی ئەم وڵاتە پێشوازی كرا و پاشان سەردانی كۆشكی ئەمیری كرد و لە لایەن شێخ سەباح ئەلئەحمەد ئەلجابر ئەلسەباح میری كوێت پێشوازیی لێ كرا. لە دانیشتنەكەدا كە جێنشینی میری كوێت شێخ نواف ئەلئەحمەد ئەلجابر ئەلسەباح و سەرۆكوەزیرانی دەوڵەتی كوێت شێخ جابر ئەلموبارك ئەلحەمەد ئەلسەباح و جێگری سەرۆكوەزیران و وەزیری دەرەوەی كوێت شێخ سەباح خالد ئەلحەمەد ئەلسەباح ئامادە بوون، كۆمەڵێك تەوەری گرنگ خرانە بەرباس و گفتوگۆ لەوانە گەشەسەندنی پەیوەندییەكانی هەر دوو وڵات و هەردوولا خۆشحاڵیی خۆیان دەربڕی كە لە ئاییندەیەكی نزیكدا كۆنسولگەریی گشتیی كوێت لە هەرێمی كوردستان دەكرێتەوە. لە چوارچێوەی ئەم دانیشتنەدا ئاماژە بە پەیوەندیی ئابووری و دەرفەتی هاوكاریی لەبواری چالاكیی كەرتی تایبەتی كوێت لە هەرێمی كوردستان درا و بڕیاریش درا كە شاندێكی ژووری بازرگانی و كەرتی تایبەتی كوێت لە لایەن هەرێمی كوردستانەوە بانگهێشت بكرێت.
تەوەرێكی دیكەی دانیشتنەكەی سەرۆك بارزانی و میری كوێت باسكردنی بارودۆخی سیاسی و ئاساییشی عێراق و هەروەها ئامادەكارییەكانی هەڵبژاردنی گشتی لە عێراق بوو.
جێگەی ئاماژەپێدانە كە شاندی یاوەری سەرۆك بارزانی كە بەشداری دانیشتنەكە بوون لە بەڕێزان د. فواد حوسێن سەرۆكی دیوانی سەرۆكایەتیی هەرێمی كوردستان و فەلاح مستەفا بەرپرسی فەرمانگەی پەیوەندییەكانی دەرەوەی حكوومەتی هەرێم پێكهاتبوو.
هەر هەمان ڕۆژیش سەرۆكوەزیرانی كوێت نیوەڕۆخوانێكی لەسەر شەڕەفی سەرۆكی هەرێمی كوردستان بۆ سەرۆك بارزانی و شاندی یاوەری ڕێكخست و وەزیری بازرگانی كوێت و باڵیۆزی كوێت لە عێراق و ژمارەیەك لە بەرپرسانی كوێتی ئامادەی نیوەڕۆخوانەكە بوون. لەم نیوەڕۆخوانەدا جەنابی سەرۆك بارزانی پوختەیەكی دەربارەی سیاسەتی هەرێم و بەرنامەی وەبەرهێنانی چالاكیی بازرگانی خستەڕوو و لە قسەكانیدا جەختی لە بایەخدانی حكوومەتی هەرێم بە بوارەكانی كشتوكاڵ و گەشتوگوزار و هەروەها سامانە سرووشتییەكان كردەوە. لە درێژەی قسەكانیدا بەڕێز سەرۆكی هەرێمی كوردستان كورتەیەكی لەبارەی پەیوەندییە سیاسی و ئابوورییەكانی هەرێمی كوردستان و وڵاتانی دراوسێی هەرێم بۆ ئامادەبووان باس كرد.
هەر ئێوارەی ئەمڕۆ دووشەممە 4ـی 11ـی 2013 بەڕێز سەرۆكی هەرێمی كوردستان كۆتایی بە سەردانەكەی بۆ هەر دوو وڵاتی ئیماراتی یەكگرتووی عەرەبی و دەوڵەتی كوێت هێناو و گەڕایەوە هەرێمی كوردستان.