رۆژي 2/7/2014 شاندي هەرێمي كوردستان كە پێكهاتووە لە بەڕێزان د. فوئاد حوسێن سەرۆكي ديواني سەرۆكايەتي هەرێم و فەلاح مستەفا بەرپرسي پەيوەنديەكاني دەرەوەي حكومەت لەگەڵ بەڕێز جۆن كێري وەزيري دەرەوەي ئەمريكا كۆبوونەوە.
لە سەرەتا وەزيري دەرەوەي ئەمەريكا خۆشحاڵي خۆي بە سەرداني شاندي هەرێمي كوردستان بۆ ئەمەريكا نيشاندا سوپاسي حكومەتي هەرێمي كوردستانيشي كرد بۆ ئەو پێشوازيە گەرمەي كە هەفتەي رابردوو لە هەولێر لێيان كرا.
وەزيري دەرەوەي ئەمەريكا كورتە باسێكي دەربارەي ئاكامي سەردانەكەي بۆ بەغدا و هەرێمي كوردستان پێشكەش كردو تيشكي خستە سەر دوايين پێشهاتەكاني عێراق و جەختي كردەوە كە پێويستە هەموو لايەنەكان بەشدار بن بۆ بەرەو پێشبردن و بنياتنانەوەي پرۆسەي سياسي لە عێراق و داوكاربوو كە گشت لايەك لە چوارچێوەي پەرلەمان بتوانن كە هەرسێ سەرۆكايەتيەكە لە عێراق پێكبهێنن بۆ ئەوەي لەم قۆناغە مەترسيدارە دەربازي ببێت و رووبەرووي تيرۆرستان ببنەوە تا ئاسايش و ئارامي بگەرێنرێتەوە عێراق.
جۆن كێري بە شاندي حكومەتي هەرێمي كوردستاني راگەياند كە ئيدارەي ئەمريكا ئاگاداري مێژووي خەباتي ميللەتي كوردەو وە لە خواست و ئارەزوەكانيان تێدەگەين، هاوكات تاكيدي كردەوە كە رۆلي كورد بە گرنگ وەسف كرد كە تا ئێستا بەشێكن لە سەرخستني پرۆسەي سياسي لە عێراق به گشتي و هەرێمي كوردستان بە تايبەتى.
لە بەرامبەردا دكتۆر فوئاد حسێن سوپاسي وەزيري دەرەوەي ئەمريكاي كرد بۆ ئەو پێشوزايە گەرمەي كە لێياني كردوە و خۆشحالي خۆي دەربري كە دواي سەردانەكەيان بۆ هەولێر دووبارە ئەم دەرفەتەي بۆ رەخساندوونەتەوە.
سەرۆكي ديواني سەرۆكايەتي هەرێم بە تێر و تەسەلي باسي لە دوايين گۆرانكاريەكاني گۆڕەپاني سياسي عێراق كردو بە وەزيري دەرەوەي راگەياند ئەو گۆرانكاريانەي كە دواي 9/6/2014 دروست بوو واقيعێكي تازەي هێنايە پێشەوە و پێويستە بە سياسەت و تێڕوانينێكي جياواز مامەڵە لەگەڵ بارودۆخەكەدا بكرێت. پێي راگەياند كە رەوشەكە دەخوازێت هەرێمي كوردستان دوو ئاراستە بڕوات. يەكەميان: كورد بەردەوام بێت لە گێڕاني رۆلي سەرەكي بۆ سەرخستني پرۆسەي سياسي لە بەغدا و چارەسەركردني كێشە و ئالۆزيەكان.
دووەم : كوردستان بەردەوام بێت لە پاراستني سنورەكاني هەرێمي كوردستان و هەروەها بەرەو پێشبردني بوارەكاني ئابووري و ئاسايش و بنياتناني دامەزراوەيي و خۆ ئامادەكردن بۆ مافي چارەي خۆنوسين.