سه‌رله‌به‌یانیى ئه‌مڕۆ یه‌كشه‌ممه 14ى ئه‌یلوولى 2014، به‌ڕێز نێچیرڤان بارزانى سه‌رۆك وه‌زیرانى هه‌رێمى كوردستان، پێشوازى له خاتوو ڤالێرى ئامۆس جێگرى سكرتێرى گشتیى نه‌ته‌وه یه‌كگرتووه‌كان ـ ڕێكخه‌رى نووسینگه‌ى كاروبارى مرۆییى UN و شاندێكى یاوه‌رى كرد.
شاندى میوان كه سه‌ردانى كه‌مپه‌كانى ئاواره و په‌نابه‌رانى له سنوورى پارێزگاى دهۆك كردبوو، پوخته‌ى دید و تێبینییه‌كانى خۆیان ده‌رباره‌ى ڕه‌وشى ئاواره‌كان و كێشه و گرفته‌كانیان خسته ڕوو، هه‌روه‌ها سوپاس و پێزانین و ده‌ستخۆشیى نه‌ته‌وه یه‌كگرتووه‌كان و كۆمه‌ڵگه‌ى نێوده‌وڵه‌تییان پێشكه‌ش به حكوومه‌تى هه‌رێمى كوردستان كرد، كه وێڕاى زۆریى ژماره‌ى ئاواره‌كان و سنوورداریى تواناكان، پێشوازى لێ كردوون و هه‌موو كۆمه‌ك و هاوكارییه‌كى پێشكه‌ش كردوون.
شانده‌كه هه‌روه‌ها تیشكیان خسته سه‌ر كۆمه‌ڵێك كێشه و گرفتى كه‌مپه‌كان له ڕووى په‌روه‌رده‌یى و ته‌ندروستى و ژیارییه‌وه و مه‌ترسیى خۆیان له ئه‌گه‌رى زیادبوونى ژماره‌ى په‌نابه‌ران و ئاواره‌كان ده‌ربڕى، دووپاتیشیان كرده‌وه كه داوا له كۆمه‌ڵگه‌ى نێوده‌وڵه‌تى و وڵاته كۆمه‌كبه‌خشه‌كان و حكوومه‌تى به‌غدا ده‌كه‌ن بۆ ئه‌وه‌ى هاوكارى و یارمه‌تیى زیاتر پێشكه‌ش به حكوومه‌تى هه‌رێمى كوردستان بكه‌ن، تا بتوانێت به شێوه‌یه‌كى باشتر خزمه‌تى په‌نابه‌ران و ئاواره‌كان بكات.
لاى خۆیه‌وه به‌ڕێز سه‌رۆك وه‌زیران دووپاتى كرده‌وه كه حكوومه‌تى هه‌رێمى كوردستان هه‌ر له سه‌ره‌تاوه ده‌رگاكانى به ڕووى هه‌موو په‌نابه‌ران و ئاواره‌كاندا كردووه‌ته‌وه و وێڕاى سنوورداریى تواناكانیشى، هه‌موو كۆمه‌ك و هاوكارییه‌كى پێویستى پێشكه‌ش كردوون، به‌ڵام ئه‌وه‌یشى نه‌شارده‌وه كه پێداویستییه‌كانى ڕه‌وشه‌كه له ده‌ره‌وه‌ى تواناكانى حكوومه‌ته، به تایبه‌تى كه له سه‌ره‌تاى ئه‌مساڵه‌وه به هۆى نه‌ناردنى بودجه‌ى هه‌رێمى كوردستان له لایه‌ن حكوومه‌تى عیراقه‌وه، حكوومه‌تى هه‌رێم له قه‌یرانێكى سه‌ختى داراییدایه، بۆیه داواى كرد كه UN و كۆمه‌ڵگه‌ى نێوده‌وڵه‌تى و حكوومه‌تى عیراق، ئه‌رك و به‌رپرسیاریه‌تیى خۆیان جێبه‌جێ بكه‌ن.