ئەمڕۆ پێنجشەممە 13ـی 11ـی 2014 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە تان بانگلین كونسوڵی گشتیی چین و شاندێكی یاوەری كرد.
لە دیدارەكەدا كونسوڵی گشتیی چین سوپاسی سەرۆك بارزانی كرد بۆ ڕەخساندنی ئەم دیدارە و ئامادەیی وڵاتەكەی نیشاندا بۆ فراوانكردنی پەیوەندییەكانی نێوان چین و هەرێمی كوردستان. كونسوڵی گشتیی چین جەختی لەوەیش كردەوە كە بەهێزتربوونی پەیوەندیی ئابووری و فەرهەنگی و سیاسی، دەبێتە هۆی بەرزتر بوونی ئاستی دۆستایەتیی نێوان گەلی كوردستان و گەلی چین. هەروەها هیوایشی خواست كە شاند و بەرپرسانی هەردوو لا بۆ بەهێزكردنی پەیوەندییەكان سەردانی یەكتر بكەن. كونسوڵی گشتیی چین هیوایشی خواست هەرێمی كوردستان لە ئاییندەدا سوود لە ئەزموونەكانی وڵاتەكەی لە بوارە جیاجیاكان وەربگرێ.
لە بەرانبەردا سەرۆك بارزانی بەخێرهاتنی شاندی میوانی كرد و وێڕای ئاماژەدان بە پێگەی سیاسی و ئابووریی چین و هەروەها شارستانییەتی ئەم وڵاتە، بڕیاری كردنەوەی كونسوڵخانەی وڵاتی چینی لە هەولێر بەرز نرخاند و بە سەرەتایەكی باشی لە قەڵەم دا بۆ پێشڤەچوونی پەیوەندییەكانی نێوان هەردوولا.
سەرۆك بارزانی پێشوازیشی لە فراوانكردنی پەیوەندییەكانی نێوان هەرێمی كوردستان و چین كرد و ئاماژەی بەوەدا كە لە زۆر بواردا بۆ هەرێمی كوردستان و چین دەرفەتی كاری هاوبەش و هاوكاری هەیە.