ئێوارەی ئەمڕۆ چوارشەممە 3/6/2015 لە شاری زاخۆ بە ئامادەبوونی بەڕێز نێچیرڤان بارزانی سەرۆك وەزیرانی هەرێمی كوردستان و بەڕێزان عەبدولحسێن عەبتان وەزیری وەرزش و لاوانی عێراق و وەزیری رۆشنبیری هەرێمی كوردستان و سەرۆكی یەكێتی ئۆڵۆمپی عێراق و پارێزگاری دهۆك و بەرپرسانی حكوومی و حزبی لە ناوچەكە و جەماوەرێكی زۆر، لە ڕێوڕەسمێكدا یاریگای نێودەوڵەتیی تۆپی پێ لە زاخۆ كرایەوە.

لە ڕێوڕەسمی كردنەوەی یاریگای نێودەوڵەتیی زاخۆدا كە لەسەر ئاستی هەرێمی كوردستان و عێراق یارگایەكی هەرە مۆدێرن و جوانە، سەرەتا هەریەك لە بەڕێزان سەرۆكی یەكێتی ئۆڵۆمپی عێراق و وەزیری وەرزش و لاوانی عێراق و سەرۆكی یانەی زاخۆ و پارێزگاری دهۆك وتەیان پێشكەشكرد و دواتر بەڕێز نێچیرڤان بارزانی سەرۆك وەزیرانی هەرێمی كوردستان وتەیەكی پێشكەشكرد و تیایدا پیرۆزبایی لە خەڵكی كوردستان و عێراق بە شێوەیەكی گشتی و بە تایبەتی خەڵك و وەرزشوانانی زاخۆ كرد و ئاماژەی بەوە كرد كە كردنەوەی یاریگاكە بەشێكە لە سەركەوتنەكانی گەلی كورد كە پەیمانی بەخۆی داوە سەركەوێت و بەردەوام بێت لە پێشكەوتن و هەر بەردەوامیش دەبێت.

هەروەها كردنەوەی ئەو یاریگایەشی بە پاداشتێكی بچووك بۆ خەبات و تێكۆشان و قوربانیدانی گەورەی خەڵكی خۆڕاگری زاخۆ لە قەڵەمدا كە لە هەموو شۆڕش و ڕاپەڕینەكانی كوردستان قوربانی زۆری داوە و ئێستاش بە دەستێك لە بەرامبەر دڕندەترین رێكخراوی تیرۆرستی بەرگری لە خاك و خەڵكی كوردستان دەكەن و قوربانی دەدەن و بە دەستێكی دیكەش لە لایەنی مرۆڤییەوە پێشوازی لە دەیان هەزار ئاوارە دەكەن و هاوكارییان پێشكەش دەكەن، بۆیە زاخۆ و دەڤەرەكانی دیكەی سەر بە پارێزگای دهۆك و بادینان بە شێوەیەكی گشتی شایەنی كار و پرۆژە و خزمەتی باشتر و گەورەترن. هەروەك دەستخۆشی لە پارێزگار و دامودەزگەكانی سنوری پارێزگای دهۆكی كرد بۆ ئەو كارەی كە كردوویانە و سوپاسی كردن.

جەختی كردەوە كە بە كردنەوەی ئەم یاریگایە بۆ دۆست و دوژمنان سەلماندمان خەڵكی كوردستان ئیرادەی خۆی بۆ ژیان و پێشكەوت لەژێر هیچ فشار و زولم و تیرۆر و شەڕ و پیلانگێڕییەك لەدەست نادات و هەروەها نە دروستكردنی بەربەست و نە ئابلوقە و نە بڕینی مووچە و بودجە خواستی گەلی كورد بۆ بەرەو پێشەوەچوون و ئاوەدانی و سەركەوتن لاواز ناكات.

دواتر هاتە سەر باسی سەركەوتنەكانی پێشمەرگە و ئاماژەی بەوە كرد كە پێشمەرگە كارێكی وای كردووە لە هەموو جیهان دەنگی داوەتەوە و سڵاو و ڕێزی بۆ هەموو پێشمەرگەكان لە سەنگەرەكانی بەرگری لە كوردستان هەر لە خانەقین تا شنگال نارد و ئەو بەرگرییەی پێشمەرگەی بەرز و پیرۆز نرخاند.

لە بارەی بە پارێزگا كردنی زاخۆش هەروەك جەماوەری ئامادەبوو بە دەنگی بەرز باسیان دەیانگوتەوە، بەڕێز سەرۆك وەزیرانی هەرێمی كوردستان دووپاتی كردەوە كە پێش ئێستاش ئەو بابەتە باسی لێوە كراوە و مافی بە پارێزگابوونی بە مافی خەڵكی زاخۆ زانی، بەڵام لە هەمان كاتدا ئاماژەی بەوە كرد كە ئەو بابەتە پێویستی بە پشووفراوانی هەیە چونكە تەنیا پەیوەست نییە بە بڕیاری كەسێك، بەڵكو پەیوەندی بە هەرێمی كوردستان و لایەنە سیاسییەكان و حكوومەتی عێراقیشەوە هەیە. ئەوەشی خستە ڕوو كە ئەوەی ئێستا لە توانا دایە بۆ ئەم بابەتە بكرێت ئەوەیە كە لە قۆناغی ئێستادا دەستەڵاتی فەرمانگەكانی زاخۆ زیاتر بكرێت و مەسەلەی بە پارێزگا كردنیش هەر لە بیری حكوومەت دەبێت.

لە كۆتاییدا خۆشحاڵی خۆی بۆ ئەو پۆلە ئافرەتە پێشمەرگانە دەربڕی كە لە ئەكادیمیای سەربازی زاخۆ پەروەردە كراون و لەناو یاریگاكەدا نمایشی جیاوازیان پێشكەشكرد، بە ئاماژەیەكی گرنگی لەقەڵەمدا كە پێویستە هەموو لایەك لە هەوڵ و تێكۆشان بەردەوام بێت بۆ خزمەتكردنی كوردستان و پشتگیریی ئافرەتانیشی بۆ بەرەوامی خەبات بە كارێكی پێویست زانی و پیرۆزبایی لێكردن و هیوای خواست نمونەیان زیاد بێت.

ئەمەش دەقی وتاری بەڕێز نێچیرڤان بارزانی سەرۆك وەزیرانی هەرێمی كوردستانی:

ئاماده‌بوویێت خۆشتڤی،

وه‌رزشڤان و وه‌رزشدۆستێت باژێڕێ عه‌زیرێ زاخۆ،

خه‌لكێ هێژایێ دەڤەرا زاخۆكا ده‌لال،

ئێڤاریا وە باش،

هون هه‌می ب خێر بێت سەرچاڤا...

ئەز گەلەك كەیفخۆشم ئەڤرۆ ل ڤێ ئێڤاریێ بەشدار دبم دگه‌ل هه‌وه بۆ ڤەكرنا یاریگەها زاخۆ ، كو ل سه‌ر ئاستێ هه‌رێما كوردستانێ و عیراقێ، یاریگه‌ها هه‌ری مۆدێرن و هه‌ری جوانه پیرۆز بیت ل شارێ زاخۆ‌. ڤه‌كرنا ڤێ وەرزشگەهێ ل هه‌می وه‌رزشڤانێت زاخۆ، ل خه‌لكێ دەڤەرا زاخۆیا دەلال و خۆشتڤی ، ل كوردستانێ، ل عێراقێ پیرۆز دكەین.

ئه‌ڤ یاریگه‌هه‌ به‌شه‌كێ دیه‌ ژ چیرۆكا سه‌ركه‌فتنا ملله‌تێ مە، كو ب درێژاهیا دیرۆكێ قوربانیی دا و سۆزا دگه‌ل خۆ دای، كو سه‌ركه‌ڤیت و دێ هه‌ر و هه‌ر پێشكه‌ڤیت.

دەنگا وە بڵندە بۆ پارێزگەهبوونی، ئەڤە بەری نها ژی مە بەحس كریە، ئەڤە حەقەكێ وەیە، خەباتا وە، خۆڕاگرییا وە، خزمەتا وە ل هەر ئاستەكێ ل قوربانیدانێ ل خەباتێ، ل ئابووریا ئەڤ وەلاتەی حەقێ وەیە، بەلێ دڤێت بێهنا وە دگەل ڤێ مژارێ یا فرە بیت، مەسەلێ پەیوەندی ب بڕیارا یەك كەسی ڤە نییە، بەلكو پەیوەندی یا ب هەرێما كوردستانێ و لایەنێت سیاسی و عێراقێ ڤە هەی. ئەو تشتێ ڤێ گاڤێ ئەز دكارم بێژم ئەوە كو ئەم سۆزێ ددەین دەستهڵاتا فەرمانگەهێت زاخۆ ئەم زێدە بكەین بۆ ڤێ قۆناغێ و بێگومان مەسەلا پارێزگەهبوونێ ژی دێ ل بیرا مە بیت.

ئەڤ یاریگەهە ئەڤرۆ ل زاخۆ هاتە ڤەكرن، پاداشته‌كێ بچویكه‌ بۆ خه‌بات و تێكۆشین و قوربانیدانا مه‌زنا خه‌لكێ خۆڕاگرێ زاخۆ، كو د هه‌می شۆڕه‌ش و سه‌رهلدانێت كوردستانێدا، گیان و خوین و شه‌هید دانه‌ و پێشكەشی كوردستانێ و ملله‌تێ كورد كرینه‌.

قه‌هره‌مانی و مێرخاسی یێت خه‌لكێ زاخۆ ل شۆڕه‌شا ئه‌یلوولا مەزن، ڕۆلێ وان د شۆڕه‌شا گولانێدا ڕۆله‌لێ مه‌زن و به‌رچاڤه‌، ئه‌ڤرۆ ژی كو كوردستان به‌رامبه‌ری دڕنده‌ترین رێكخستنا تیرۆرێ، به‌ڕه‌ڤانیێ ل كوردستانێ و كوردستانیان و ل هه‌می مرۆڤاهیێ دكه‌ت، دیسا خه‌لكێ زاخۆ و ڤێ ده‌ڤه‌را هێژا، خودانێت سه‌ربلندی و قه‌هرمانییه‌كا مه‌زنن، سه‌ركه‌فتنێت ئه‌ڤرۆ یێت كوردستانێ، ب خوینا گه‌شا ب ده‌هان شه‌هیدێت كوردستانێ ل وان دەڤەران ژی دەڤەرا زاخۆ هاتینە بدەستڤە ئینان.

ژبه‌ر هندێ زاخۆكا ده‌لال، باژێڕێ ژیانێ، هێژایی گه‌له‌ك و گه‌له‌ك خزمەتێن زێدەترە ل تشتێن كو ئەڤرۆ ئەم دبینین. هه‌ر خزمه‌ته‌كا بێتە كرن، هەر پڕۆژەیەكا بێتە بجهئینان بەرسڤەكە ژبۆ ماندیبوونا پێشمەرگە یێت مە یێت قەهرەمان یێت ڤێ دەڤەرێ، بەرسڤەكە بۆ خوینا شەهیدا، بەرسڤەكە بۆ ماندیبوونا دەڤەرا زاخۆ كو هەمیشە پێشەنگ بوونە ل پاراستنێ و بەرخوەدانێ و خەباتێ خوە ماندیكرنێ بۆ وان دەستكەفتێت كو مللەتێ مە خەبات بۆ كری و شەهد بۆ دای و خوین بۆ ڕێشتی. 

ئه‌ڤرۆ ژی كو ئه‌م هه‌می پێكڤه‌ ڤێ یاریگه‌هێ ڤه‌دكه‌ین، ئه‌م ب ڕێز و پێزانینه‌كا مه‌زن، گیانێ پیرۆزێ وان هه‌می شه‌هیدا، شه‌هیدێت شۆڕەشا ئه‌یلوولێ، شه‌هیدێت گولانێ، شه‌هیدێت ئه‌نفالا، گرتی و بێسه‌روشوینا، شه‌هیدێت ئه‌ڤرۆ یێت شه‌ڕێ دژه‌تیرۆرێ دئینینه‌ڤ بیرا خۆ، سه‌رێ خۆ ل به‌ر مه‌زناهیا گیانێ وان دچه‌مینین، سلاڤا بۆ گۆڕا وان ئازیزا دهنێرین و سۆزێ نەڤەدكەین كو لسەر ڕێكا وان دێ بەردەوام بین بۆ ئازادیا كوردستانێ.

هه‌ر د ڤێ هه‌لكه‌فتنێدا، تڤیا جامێریا خه‌لكێ زاخۆ و دهۆكێ و به‌هدینا ب گشتی ژبیر نه‌كه‌ین، كو گه‌له‌ك مه‌ردانه‌ ده‌رگه‌هێ دل و مال و گوند و باژێڕ و ده‌ڤه‌را خۆ، بێ جوداهی بۆ خوشك و برایێت خۆ یێت ئاواره‌ و په‌نابه‌رێت ژ هه‌می پێكهاتێت دینی و نه‌ته‌وه‌یی ڤه‌كرن و ب دلگه‌رمی پێشوازی ل وان كر، ب هه‌می ڕه‌نگا هاریكاریا وان كر، د جهێ خۆ دایە ب ناڤێ حكوومەتا هەرێما كوردستانێ سوپاسییەكا گەرم یا خەلكێ دەڤەرا زاخۆ و دهۆك و بادینا ب گشتی بكەین بۆ وێ جامێریا وان كری و دەرگەهێ خۆ ڤەكری ب وان عەزیزێت لێقەومایی ئەوێت كو بەرێ خۆ دایە دەڤەرا وان، سوپاس بۆ وە هەمیان، سوپاس بۆ زاخۆ، سوپاس بۆ دهۆك، سوپاس بۆ هەموو باژێڕێن دەڤەرا بادینا، ئاكرێ بەردەڕەش و ئامێدیێ و هەمی دەڤەران.

ب تایبه‌تی گه‌له‌ك و گه‌له‌ك سپاسیا هه‌می خه‌لكێ ده‌ڤه‌رێ دكه‌ین كو ده‌ستپێكا سالا خاندنێ، گه‌له‌ك ته‌حه‌مول كر و زارۆكێت وان بۆ ده‌مه‌كێ درێژ، ژ خوندنێ پاشكه‌ڤتن، چونكی هه‌می قوتابخانه‌ ببوونه‌ په‌ناگه‌ها خوشك و برایێت ئاواره‌ و په‌نابه‌ر، ئەڤ خۆڕاگریا وە جهێ سوپاس و پێزانینێ یە.

هه‌روه‌سا من دڤێت ب ڤێ هەلكەتنێ سوپاسیا پارێزگەهێ دهۆكێ و دامودەزگەهێت وێ و بڕێڤەبەرێت گشتی ل دهۆكێ بكەین بۆ ئەو كارێ وان كری، بۆ ئەو خزمەتا وان كری د ڤێ هەیامێ دا، دەستخۆشیێ ل وان دكەم.

ئاماده‌بوویێت هێژا،

ژ لایه‌كێ دیڤه‌، ئه‌ڤرۆ كو ئەم ڤێ یاریگه‌هێ ڤه‌دكه‌ین، ئه‌م جاره‌كا دی بۆ هه‌می دۆستا و بۆ نه‌یارا ژی دسه‌لمینین، كو خه‌لكێ كوردستانێ به‌رامبه‌ر چ زه‌خت و زۆری و، به‌رامبه‌ر چ تیرۆر و شه‌ڕ و پیلانا ژی، ئیراده‌ و خواستا خۆ یا بۆ ژیانێ و پێشكه‌ڤتنێ ژده‌ست ناده‌ت!، چ ئاسته‌نگ و دۆرپێچ و، چ بڕینا بودجه‌ و مووچا، ئیسرارا مه‌ یا بۆ به‌ره‌ڤ پێشڤه‌چوونێ و ئاڤاكرنێ و سه‌ركه‌فتنێ، لاواز ناكه‌ت، بەلكی ئیسرارا مە مكومتر دكەت بۆ سەركەفتن و گەهشتن ب وان ئارمانجا یێت كو شەهیدێت مە خوینا خۆ دای و پێشمەرگێ مە بۆ ماندی بووی و مللەتێ مە خەبات بۆ كری.

ئه‌ڤرۆ خۆراگری یا پێشمه‌رگێت مە، كارەكێ وەسا كریە كو ناڤێ پیرۆزێ پێشمەرگەی ل جیهانێ دەنگ ڤەدایە، لێرە ب ناڤێ وە سڵاڤ و ڕێزێت خۆ بۆ هەر پێشمەرگەیەكی ل خانەقیت تا دگەهیتە بەرۆكێت شەڕی ل شنگالێ دهنێرین و ب ناڤێ وە سڵاڤان بۆ وان دنێرین و دەستخۆشی و پیرۆزباهیێ ل وان دكەین بۆ وێ بەرگری و بەرخوادانا ئەڤرۆ ئەو دكەن بۆ پاراستنا دەستكەفتێت مللەتێ مە، بۆ پاراستنا خوینا شەهیدێت مە، بۆ پاراستنا ماندیبوونا مە، سڵاڤێت مە لێرە بۆ هەر پێشمەرگەیەكی ل شنگال تا خانەقین و كەركووك و هەمی دەڤەرێت كوردستانێ.

ئەڤرۆ ئەز گەلەك كەیفخۆش بووم یا كو من لڤیرە دیتی، كۆمەڵەكا گەنجێت رێكوپێك یێت ئافرەت من دیتن كو ل ئەكادەمیا زاخۆ یا لەشكەری هاتینە پەروەردەكرن، ئەڤە نیشانەیەكێ زۆر جوان و گرنگە كو دڤێت ئەم كارێ خۆ بەردەوام بكەین، بێگومان پشتەڤانیا ئافرەتان بۆ بەردەوامیا خەباتا مە تشتەكێ پێدڤی یە و ئەز پیرۆزباهیێ ل وە دكەم و هیڤیدارم نمونەیا وە زێدەتر ببیت.

جارەكا دی ئەز ڤەكرنا ڤێ یاریگەهێ ل خەڵكێ زاخۆ و كوردستان و هەمی عێراقێ پیرۆز دكەم.

ئێڤاریا وە باش و هون هەمی بخێر بێن و زۆر سوپاس....