نوێنەرایەتی
نازم دەباغ: ئێرانییەكان بەبینینی مام جەلال خۆشحاڵبوون
ژمارەیەك لەهاوڕێ و دۆستی دێرین لەئێران سەردانی سەرۆك مام جەلال دەكەن لەشوێنی حەوانەی خۆی لەتاران.
سەرۆك مام جەلال بەسەردانی هاوڕێ و دۆستەكانی خۆشحاڵ بوەو باشبوونی تەندروستی و سەردانەكەی ئەوانیشی خۆشحاڵكردوە، لەوبارەیەوە، نازم عومەر دەباغ نوێنەری حكومەتی هەرێم لەكۆماری ئیسلامی ئێران بە PUKmediaی راگەیاند: ئەمڕۆ لەشوێنی حەوانەوەی خۆی سەردانی سەرۆك مام جەلال-م كردو باری تەندروستی زۆر باشەو بەدیداری هاوڕێ و دۆستانیشی زۆر خۆشحاڵە.
لەبارەی سەردانیكردنی هاوڕێ و دۆستانیەوە، وتی: بەتەئكید ئەمڕۆ نەك لەچوارچێوەی دیداری رەسمی، بەڵكو بۆ سەردانیكردن و هەواڵپرسینی سەردانیانكردوەو مام جەلال-یش زۆر خۆشحاڵ بووە بەبینینیان.
رونیشیكردەوە كە تەنیا ستافی سكرتاریەتی مام جەلال یاوەری دەكەن و سەردانەكەش كە بۆ پشووە زیاتر لەهەفتەیەك دەخایەنێت، بەڵام بەوتەی نازم دەباغ كورتكردنەوە یان درێژكردنەوەی ماوەی گەشتەكە پەیوەستە بەویستی مام جەلال خۆیەوە.
نوێنه‌ری حكومه‌تی هه‌رێم له‌تاران:مام جه‌لال بۆ هه‌وا گۆڕین له‌تارانه
نوێنه‌ری حكومه‌تی هه‌رێمی كوردستان ره‌تیده‌كاته‌وه سه‌ردانه‌كه‌ی مام جه‌لال بۆ تاران سه‌ردانێكی سیاسی بێت و رایده‌گه‌یه‌نێت “مام جه‌لال بۆ هه‌وا گۆڕین له‌تارانه”.
ئاوێنه:نوێنه‌ری حكومه‌تی هه‌رێم له‌تاران، نازم ده‌باغ له‌گفتوگۆیه‌كی رۆژنامه‌ی ئاوێنه‌دا ده‌ڵێت “وه‌فدی یاوه‌ری مام جه‌لال بۆ تاران ته‌نها بریتین له‌براده‌رانی مه‌كته‌بی سكرتاریه‌ت”.
له‌باره‌ی سه‌ردانه‌كه‌ی مام جه‌لال بۆ تاران و له‌م كاته‌دا، نازم ده‌باغ وتی “له‌و ڕۆژه‌ی مام جه‌لال توشی نه‌خۆشیه‌كه‌ی بوه، ده‌یان جار بانگێشتی تاران كراوه به‌مه‌به‌ستی سه‌ردان كه نه‌كراوه یان نه‌گونجاوه مام جه‌لال سه‌ردانی تاران بكات”.
وتیشی “ئه‌م سه‌ردانه‌ی ئێستای بۆ تاران به‌مه‌ستی هه‌وا گۆڕین بوه، كه له‌شوێنی تایبه‌ت له‌تاران ده‌مێنێته‌وه”.
ده‌باغ جه‌غت له‌سه‌ر ئه‌وه ده‌كاته‌وه كه مام جه‌لال له‌تاران هیچ بۆنه‌‌و دیدارێكی سیاسی نابێت و ده‌ڵێت “ته‌نها ئه‌وانه‌ی دۆست‌و براده‌رو خۆشه‌ویستی مام جه‌لالن سه‌ردانی ده‌كه‌ن‌و حه‌زده‌كه‌ن بیبینن له‌شوێنی حه‌وانه‌وه‌ی خۆی له‌تاران چاویان به‌مام جه‌لال ده‌كه‌وێت”.
وتیشی “خۆتان ده‌زانن مام جه‌لال توانای دانیشتن‌و قسه‌كردن‌و گفتوگۆی سیاسی نه‌ماوه‌‌و ئه‌وه‌ی كه بۆ سه‌ردانی مام جه‌لال دێت ته‌نها چاوی پێیده‌كه‌وێت‌و ده ده‌قه پێنج ده‌قه چاوی به‌مام جه‌لال ده‌كه‌ویت‌و وێنه‌ی له‌گه‌ڵ ده‌گرێت‌و ده‌ڕوات”.
نازم ده‌باغ له‌گه‌ڵ "پییر لیننەر" سکرتێری یەکەمی باڵیۆزخانەی سوید له تاران کۆبۆوه
"نازم ده‌باغ" نوێنه‌رى حکوومه‌تى هه‌رێمى کوردستان له شاری تاران، له‌گه‌ڵ "پییر لیننەر" سکرتێری یەکەمی باڵیۆزخانەی سوید لە وڵاتی ئێران دیداریی کرد.
"پییر لیننەر" سکرتێری یەکەمی باڵیۆزخانەی سوید لە تاران دوێنێ یەکشەممە ٢/٧/٢٠١٧ سەردانی نووسینگەی نوێنەرایەتی حکوومەتی هەرێمی کوردستان لە وڵاتی ئێرانی کرد و لە لایەن "نازم عومەر ده‌باغ" نوێنەری حکوومه‌تى هه‌رێمى کوردستان له تاران پێشوازی لێکرا.
لیننەر بەهۆی تەواوبوونی کارەکەی لە تاران و گەڕانەوەی پێیخۆش بوو بۆ دواجار سەردانی نوێنەرایەتی حکوومەتی هەرێمی کوردستان لە تاران بکات و داواکار بوو کە پەیوەندییەکانی نوێنەرایەتی حکوومەتی هەرێمی کوردستان و باڵیۆزخانەی سوید لە وڵاتی ئێران دوای خۆی بەردەوام بێت و سەبارەت بە پێشهاتەکانی ئەم دواییەی ناوچەکە و ئەنجامدانی ریفراندۆم له هەرێمی کوردستان و کاردانەوەی وڵاتان لەسەر ئەو پرۆسەیە گفتوگۆ بکات.
لە لای خۆیەوە نوێنەری حکوومه‌تى هه‌رێمى کوردستان له تاران ڕاوبۆچوونی حکوومه‌تى هه‌رێمى کوردستان لەسەر رووداوەکان بۆ سکرتێری یەکەمی باڵیۆزخانەی سوید لە تاران ڕوونکردەوە، کە ئەوە بریارێکی سەرۆکایەتی هەرێمی کوردستان و سەرکردایەتی سیاسی کوردە بۆ جێبەجێ کردن و بریاردان لە مافی چارەی خۆنووسین.
"نازم ده‌باغ" له به‌شێکی قسه‌کانیدا ئاماژه‌ی به‌وه‌دا کە کورد لە مێژە لە خەباتدایە بۆ ئەو مەبەستە و ئێستاش کاتێکی لەبارە بۆ ئەنجامدانی ریفراندۆم له هەرێمی کوردستان و ئەگەر سەرکردایەتی کورد ئێستا ئەنجامی نەدات ئەوا نەوەکانمان ئەنجامی دەدەن.
نوێنەری حکوومه‌تى هه‌رێمى کوردستان له تاران وتیشی: هەروەها ئەو عێراقەی کە بەژداربووین لە بنیادنانی لە ئاستی چاوەڕوانی گەلی کورددا نەبوو و چەندین کێشەیان بۆ دروست کردین .
"نازم ده‌باغ" سەبارەت بە پرسیاری "پییر لیننەر" کە وڵاتانی دراوسێ لەوە نیگەرانن کە پارچەکانی کەی کوردستان داوای سەربەخۆیی بکەن، ووتی: کە بێ گومان وڵاتانی دراوسێ نیگەرانن بەڵام دەبێت ڕازییان بکەین و بۆیان ڕوونبکەینەوە کە نابینە هۆی دروستبوونی کێشە بۆ وڵاتانی دراوسێ.
نوێنەری حکوومه‌تى هه‌رێمى کوردستان له تاران له کۆتایی ئه‌م دیداره‌دا وتیشی: وڵاتی سوید هەمیشە دۆستی کورد بووە و هیوادارین له‌م پرۆسەیەشدا پشتیوانمان بن.
"پییر لیننەر" سکرتێری یەکەمی باڵیۆزخانەی سوید لە تاران لە پرسیاری نوێنەری حکوومه‌تى هه‌رێمى کوردستان له تاران سەبارەت بە هەڵوێستی حکوومەتی سوید لەسەر پرۆسەی ریفراندۆم وتی: ئێمە پێمان باشە لە چوارچێوەی عێراقدا بە ئامانجەکانی خۆتان بگەن.
نازم ده‌باغ له ئێواره‌خوانی خوێندکاره عێراقییه‌کانی زانکۆکانی ئێران به‌شداریی کرد
"نازم ده‌باغ" نوێنەری حکوومه‌تى هه‌رێمى کوردستان له تاران له ئێواره‌خوانی خوێندکاره عێراقییه‌کانی زانکۆکانی ئێران له باڵیۆزخانه‌ی عێراق له تاران به‌شداریی کرد.
باڵیۆزخانه‌ی عێراق له تاران رۆژی شه‌ممه ١٧/٦/٢٠١٧ ئێواره‌خوانێکی بۆ خوێندکاره عێراقییه‌کان سازکرد که له زانکۆکانی ئێران ده‌خوێنن و هه‌ر به‌م بۆنه‌یه‌وه "راجح سابیر عەبوود ئەالمووسەوی" باڵیۆزی عێراق لە تاران، بانگهێشتی "نازم ده‌باغ" نوێنەری حکوومه‌تى هه‌رێمى کوردستان له تارانی کرد و هه‌روه‌ها "سۆران عه‌لی ئه‌مین" بەرێوبەریی پەیوەندییەکان و ڕاگەیاندنی نوێنەرایەتی حکوومەتی ھەرێمی کوردستان لە ئێران و "سه‌لام عارف روشدی" ئه‌ندامی نوێنەرایه‌تی حکوومه‌تى هه‌رێمى کوردستان له تاران له‌م بۆنه‌یه‌دا به‌شدارییان کرد.
باڵیۆزی عێراق لە تاران خۆشحاڵیی خۆی له ئاماده‌بوونی "نازم ده‌باغ" نوێنەری حکوومه‌تى هه‌رێمى کوردستان له تاران له‌م بۆنه‌یه‌دا ده‌ربڕیی و جه‌ختی له به‌رده‌وامبوونی په‌یوه‌ندییه‌کانی نێوان نوێنەرایه‌تی حکوومه‌تى هه‌رێمى کوردستان له تاران و باڵیۆزخانه‌ی عێراق له ئێران کرده‌وه.
رۆژنامەی ئێل تیمپۆی کۆلۆمبیا لەگەڵ نازم ده‌باغ وتوووێژی کرد
خاتوو "کاتالینا گۆمیز ئانجێل" پەیامنێری رۆژنامەی "ئێل تیمپۆ"ی کۆلۆمبیا لەگەڵ "نازم ده‌باغ" نوێنەری حکوومه‌تى هه‌رێمى کوردستان له تاران وتوووێژی کرد.
خاتوو "کاتالینا گۆمیز ئانجێل" Catalina Gómez Angel رۆژنامەنووسی کۆلۆمبی و پەیامنێری رۆژنامەی "ئێل تیمپۆ"ی El Tiempo Newspaper کۆلۆمبیا ئەمرۆ یەکشەممە ١٨/٦/٢٠١٧ سەردانی نووسینگەی نوێنەرایەتی حکوومه‌تى هه‌رێمى کوردستان له تارانی کرد و لەگەڵ "نازم عومه‌ر ده‌باغ" نوێنەری حکوومه‌تى هه‌رێمى کوردستان له وڵاتی ئێران سەبارەت بە ئەنجامدانی ریفراندۆم لەهه‌رێمى کوردستان و کاردانەوەی وڵاتان لەسەر ئەو پرۆسەیە چاوپێکەوتنی ئەنجامدا.
"نازم ده‌باغ" لە لایەن خۆیەوە راوبۆچوونی حکوومه‌تى هه‌رێمى کوردستانی لەسەر رووداوەکان بۆ پەیامنێری رۆژنامەنووسی کۆلۆمبی روونکردەوە، کە ئەوە بڕیارێکی سەرۆکایەتی هه‌رێمى کوردستان و هه‌روه‌ها سەرکردایەتی سیاسی کوردە بۆ جێبەجێ کردن و بڕیاردان لە مافی چارەی خۆنووسین.
نوێنەری حکوومه‌تى هه‌رێمى کوردستان له تاران هەروەها ئاماژه‌ی به‌وه‌کرد که بڕوامان وایە کە راگەیاندنەکان دەتوانن لەوبوارەدا پشتیوان بن بۆ ناساندنی مافی رەوای کورد لە ریفراندۆم و سەربەخۆیی بە رای گشتی جیهانی.
"نازم دەباغ" له‌گه‌ڵ "سه‌لاح عه‌بدوالخالق ئه‌لبه‌نای" راوێژکاری باڵیۆزخانەی کویت لە ئێران دیداریی کرد
"نازم دەباغ" نوێنەری حکوومەتی ھەرێمی کوردستان لە تاران له‌گه‌ڵ "سه‌لاح عه‌بدوالخالق ئه‌لبه‌نای" راوێژکاری باڵیۆزخانەی میرنشینی کویت لە ئێران کۆبۆوە.
"سه‌لاح عه‌بدوالخالق ئه‌لبه‌نای" راوێژکاری باڵیۆزخانەی میرنشینی کویت لە تاران کاتژمێر ١٢ی نیوەرۆ رۆژی سێشەممە ١٣/٦/٢٠١٧ سەردانی نوێنەرایەتی حکوومەتی هەرێمی کوردستان لە تارانی کرد و لە لایەن "نازم دەباغ" نوێنەری حکوومەتی ھەرێمی کوردستان لە تاران و "سۆران عه‌لی ئه‌مین" بەرێوبەریی پەیوەندییەکان و ڕاگەیاندنی نوێنەرایەتی حکوومەتی ھەرێمی کوردستان لە ئێران پێشوازییان لێکرا.
البه‌نای لەسەر پرسی ریفراندۆم کە لە هەرێمی کوردستان ئەنجام دەدرێت پرسیاری هەبوو و هەروەها لەسەر ڕاوبۆچوونی وڵاتانی دراوسێ لەسەر ئەم بابەتە لە نوێنەری حکوومەتی ھەرێمی کوردستان لە تاران پرسیاری کرد.
له به‌شێکی ئه‌م دیداره‌دا "نازم دەباغ" راوبۆچوونی فەرمی حکوومەتی ھەرێمی کوردستانی خستە ڕوو و ئاماژەی بەوە کرد کە هەرێمی کوردستان چاوەڕوانی لە وڵاتان بە تایبەت دۆستەکانمان ئەوەیە کە پشتیوانی بکەن لەو راپرسییە و رێز لە راوبۆچوونی میللەتی کورد بگیرێن.
لە درێژەی دانیشتنەکەدا نوێنەری حکومەت پرسیاری لە راوبۆچوونی وڵاتی کویت و وڵاتانی کەنداو سەبارەت بە ریفراندۆم کرد، که "سه‌لاح عه‌بدوالخالق ئه‌لبه‌نای" راوێژکاری باڵیۆزخانەی میرنشینی کویت لە تاران لە وڵامدا گوتی پێم وایە زۆرینەی وڵاتانی کەنداو و عەرەب لەگەڵ مافەکانی گەلی کوردبن بەڕەچاوکردنی رەزامەندی حکوومەتی ناوەند.