ئەمڕۆ دووشەممە 16ـی 2ـی 2015 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە ئادمیڕاڵ پیێڕ دی ڤیلیڕس سوپاسالاری فەڕەنسا و شاندێكی یاوەری كرد كە پێكهاتبوو لە جەنەڕاڵ دی سێت كوێنتین فەرماندەی ئۆپڕاسیۆنە تایبەتەكانی سوپای فەڕەنسا و ئاڵێن جوپڕێت كونسوڵی فەڕەنسا لە هەولێر و ژمارەیەك ئەفسەر و ڕاوێژكاری سوپای فەڕەنسا.

لە دیدارەكەدا سوپاسالاری فەڕەنسا ستاییشی ڕۆڵی پێشمەرگەی كرد لە ڕووبەڕووبوونەوەی تیرۆریستان و پەیوەندی و هەماهەنگیی نێوان هێزەكانی وڵاتەكەی و هێزی پێشمەرگەی بە باش وەسفكرد و ئەوەیشی دووپاتكردەوە كە شەڕی تیرۆریستان شەڕێكی هاوبەشی هەموومانە و سوپای فەڕەنساییش بەردەوام دەبێ لە یارمەتیدان و هاوكاری و مەشقپێكردنی پێشمەرگە و وڵاتەكەی هەتا لەناو بردنی داعش پابەندی ئەو هاوبەشی و یارمەتیدانە دەبێت. هەروەها جەختی لەوەیش كردەوە كە ئەو میتۆدەی تیرۆریستان بانگەشەی بۆ دەكەن بە هیچ شێوەیەك قابیلی قبوڵ نییە.

لەبەرانبەردا سەرۆك بارزانی سوپاسی گەل و سەرۆك و سوپای فەڕەنسای كرد و ئاماژەی بە هاتنی سەرۆك هۆڵاند بۆ كوردستان كرد و ئەو سەردانە كە لە كاتێكی زۆر هەستیاردا ئەنجامدرا بە دووپاتكردنەوەی دۆستایەتیی گەلی فەڕەنسا و هەرێمی كوردستانی لەقەڵەمدا ئەوەیشی خستەڕوو كە گەلی كوردستان بۆیان دەركەوت كە دۆستێكی مەزنی وەك فەڕەنسایان لە پشتە. سەرۆك بارزانی وێڕای ئاماژەدان بە ڕووداوە تیرۆریستییەكانی پاریس و كۆپێنهاگن و شوێنەكانی دی جەختی لەوە كردەوە كە تیرۆر هەڕەشەیەكی جیهانییە و تیرۆریستان لە هەر شوێنێك دەرفەتیان بۆ بڕەخسێت دەست لە وەحشیگەری ناپارێزن بۆیەشە ڕووبەڕووبوونەوەی ئەو دیاردەیە ئەركی هەموو لایەكە. لە درێژەی قسەكانیدا سەرۆك بارزانی باسی سەرەتاكانی سەرهەڵدانی داعش و چۆنییەتی گەشەكردن و پەلاماردانیان بۆ سەر كوردستان كرد و ئەوەی خستەڕوو كە لە سایەی قارەمانێتیی پێشمەرگە پەلاماری تیرۆریستان تێكشكا و پێشمەرگە ئوستوورەی داعشی شكاند و 15000 كیلۆمەتری چوارگۆشەی لەژێر دەستی تیرۆریستانی داعش ڕزگار كردووە. سەرۆك بارزانی هێمای بە كردەوە قێزەوەنەكانی تیرۆریستان دا و ئەوەی بۆ شاندی میوان باس كرد كە تیرۆریستانی داعش پشت بە هزری تەكفیری و جیهادی و هزری شۆڤینی دەبەستن و ئەم جۆرە بیركردنەوەیە نامرۆڤانەیە هیچ ئاییندەیەكی نییە.

هەر لەم كۆبوونەوەیەدا پێداویستییەكانی هێزی پێشمەرگە و چۆنییەتی پەرەپێدانی هەماهەنگی و هاوكاریی نێوان هێزی پێشمەرگە و سوپای فەڕەنسا بۆ شەڕی دژی تیرۆریستان تاوتوێ كرا.

جێگەی ئاماژەپێكردنە لەم دانیشتنەدا مەسرور بارزانی ڕاوێژكاری ئەنجوومەنی ئاساییشی هەرێم و مستەفا سەید قادر وەزیری پێشمەرگە و فواد حوسێن سەرۆكی دیوانی سەرۆكایەتیی هەرێم و فەلاح مستەفا بەرپرسی فەرمانگەی پەیوەندییەكانی حكوومەت و ئەنوەر حاجی عوسمان بریكاری وەزارەتی پێشمەرگە و جەعفەر شێخ مستەفا و فەریق شێروان عەبدوڵڕەحمان و فەریق جەبار یاوەر ئەندامانی فەرماندەیی گشتیی هێزەكانی پاراستنی هەرێم ئامادە بوون.

پێشنیوەڕۆی ئەمرۆ 17ـی 2ـی 2015 لە سەڵاحەددین، سەرۆكی هەرێمی كوردستان لەگەڵ شاندی دانووساندنكاری حكوومەتی هەرێمی كوردستان لەگەڵ بەغدا كۆبووەوە كە پێكهاتبوو لە نێچیرڤان بارزانی سەرۆكی حكوومەتی هەرێمی كوردستان، قوباد تاڵەبانی جێگری سەرۆكی حكوومەت، فوئاد حوسێن سەرۆكی دیوانی سەرۆكایەتی هەرێمی كوردستان، ئاشتی هەورامی وەزیری سامانە سروشتییەكان، عەلی سندی وەزیری پلاندانان و رێباز محەمەد حەملان وەزیری دارایی.

لەو كۆبوونەیەدا، شاندەكە راپۆرتی خۆی دەربارەی سەردانیان بۆ بەغدا و كۆبوونەوەیان لەگەڵ حەیدەر عەبادی سەرۆك وەزیرانی عێراق و مەسەلەی بودجە و كێشە داراییەكان و هەروەها هەڵوێستی حكوومەتی هەرێمی كوردستان لەوبارەیەوە بۆ سەرۆك بارزانی خستەڕوو.

دوای ڕاگۆڕینەوە و تاوتوێكردنی ئەو راپۆرتە، سەرۆك بارزانی تێبینی و رێنوێنی پێویستی لەمبارەیەوە دا و جەختی لەوەش كردەوە كە پێویستە خاڵەكان و دۆخەكە زۆر بە باشی دیراسە بكرێن و ئەگەر عێراق بە شێوەیەكی گشتی كێشەی جددی هەبێت لە بواری دارایی، پێویستە حكوومەتی هەرێم و بەغدا پێكەوە دابنیشن بۆ چارەسەری كێشەكان.

لە تەوەرێكی تری كۆبوونەوەكە، قەیرانی دارایی هەرێمی كوردستان خرایە بەرباس و ئەو بۆچوونانەی بۆ مامەڵەكردن لەگەڵ دۆخەكە و گرتنەبەری ئیجرائاتی پێویست پێشكەش كراوە، قسەی لەبارەیەوە كرا.

لە بەشێكی دیكەی كۆبوونەوەكەدا، باس لەوە كرا كە شاندەكە لەگەڵ هێزە سیاسییەكانی هەرێمی كوردستان كۆببێتەوە بۆ گەیاندنی ئەنجامی دانووستاندنەكان و چۆنێتی مامەڵەكردن لەگەڵ بارودۆخەكە.

هەڕەشەی تیرۆریستانی داعش و بارودۆخی مەیدانی بەرەكانی رووبەڕووبوونەوە بەشێكی دیكەی ئەو كۆبوونەوە بوو.

لە چوارچێوەی سەردانەكەی رۆژی سێشەممە 17ـی 2ـی 2015 بۆ كەركووك، بەڕێز مسعود بارزانی سەرۆكی هەرێمی كوردستان، بە ئامادەبوونی بەڕێز كۆسرەت رەسوڵ عەلی جێگری سەرۆكی هەرێمی كوردستان و فواد حوسێن سەرۆكی دیوانی سەرۆكایەتیی هەرێم لەگەڵ پارێزگار و ئەندامانی ئەنجوومەنی پارێزگای كەركووك كۆبووەوە.

لە سەرەتای كۆبوونەوەكەدا، نەجمەدین كەریم پارێزگاری كەركووك، وێڕای بەخێرهێنانی سەرۆك بارزانی سوپاسی هێزی پێشمەرگەشی كرد كە لە سایەی قوربانیدانی ئەوان خەڵكی كەركووك لە ئاسایش و ئارامیدا دەژین و جەختی لەوە كردەوە كە بڕیاردان لە چارەنووسی كەركووك لە لایەن خەڵكی شارەكە خۆیەوە دەبێت.

دواتر سەرۆك بارزانی لە وتەیەكیدا بۆ ئامادەبووانی كۆبوونەوەكە خۆشحاڵی خۆی نیشاندا بە سەردانی شاری كەركووك و كۆبوونەوە ی لەگەڵ پارێزگار و ئەندامانی ئەنجوومەنی پارێزگا و ئەوەی خستەڕوو كە پێویستە شاری كەركووك نموونەی پێكەوەژیانی و تەبایی و برایەتی پێكهاتە ئایینی و نەتەوەییەكان بێت، هەروەها داواشی كرد كە كەشوهەوای برایەتی و پێكەوەژیان لە كەركووك بپارێزرێت و لەو پێناوەشدا سەرۆك بارزانی پاڵپشتی تەواوی خۆی بۆ پارێزگاری كەركووك و ئەنجوومەنی پارێزگا راگەیاند.

سەبارەت بە هەڕەشەی تیرۆریستانی داعش، ئەوەی بۆ ئامادەبووان روونكردەوە كە هێشتا تیرۆریستان هەڕەشەن بۆ سەر عێراق و ناوچەكە، بەڵام خەڵكی شاری كەركووكیشی دڵنیاكردەوە كە بەهیچ شێوەیەك رێگا نادرێت تیرۆریستانی داعش بگەن بە شاری كەركووك و بە هێزی پێشمەرگە بە هەموو هێز و توانایەكییەوە بەرگری لە كەركووك و پێكهاتەكانی دەكات و رایشیگەیاند پێویستە ئیرادەی پێكەوەژیانی پێكهاتەكان لە كەركووك بەهێز بكرێت و كەركووك لە بەرامبەر هەڕەشە و قەیرانەكان خۆڕاگر بێت.

سەرۆك بارزانی هێمایشی بەوەدا كە هەموومان بەیەكەوە پارێزگاری لە كەركووك دەكەین و داواشی لە خوشك و برایانی مەسیحی دانیشتووی كەركووك كرد كە بیر لە كۆچكردن و بەجێهێشتنی كەركووك نەكەنەوە و ئیرادەی مانەوەیان بەهێز بیت و ئاماژەی بەوەدا كە تیرۆریستانی داعش هیچ ئاییندەیەكیان لە ناوچەكە نییە و بارودۆخ و گوزەرانی خەڵك بۆ دۆخی ئاسایی خۆی دەگەڕێتەوە.

لە بەرامبەردا، ئەندامانی ئەنجوومەنی پارێزگای كەركووك سوپاسی سەرۆك بارزانییان كرد و خۆشحاڵی خۆیان بۆ ئەو سەردانە دەربڕی و سوپاسی پەرۆشی سەرۆك بارزانییان كرد بۆ بارودۆخی كەركووك. هەروەها پێزانینیشیان بۆ قوربانیدانی هێزی پێشمەرگە هەبوو و جەختیشیان لە برایەتی و پێكەوەژیانی پێكهاتەكانی كەركووك كردەوە.

لە بەشێكی دیكەی ئەم كۆبوونەوەدا، بارودۆخی ناو شاری كەركووك و ناوچەكانی دەوروبەر و هەروەها ئەو ناوچانەی كە لەژێر داگیركاری تیرۆریستانی داعشدان تاوتوێكرا.