به‌رپرسی په‌یوه‌ندیه‌کانی ده‌ره‌وه‌ی حکومه‌تی هه‌رێم له‌گه‌ڵ وه‌زیری ده‌وڵه‌تی به‌ریتانیا بۆ کاروباری گه‌شه‌پێدانی نێوده‌وڵه‌تی کۆبووه‌وه
فه‌لاح مسته‌فا به‌رپرسی په‌یوه‌ندیه‌کانی ده‌ره‌وه‌ی حکومه‌تی هه‌رێمی کوردستان له میانه‌ی سه‌ردانه فه‌رمیه‌که‌یدا بۆ به‌ریتانیا چاوی که‌وت به دێسمۆند سوه‌ین وه‌زیری ده‌وڵه‌ت بۆ کاروباری گه‌شه‌پێدانی نێوده‌وڵه‌تی و ژماره‌یه‌ك له کاربه‌ده‌ستانی وه‌زاره‌ته‌که.
له دیدارێکدا که خاتوو به‌یان سامی عبدالرحمان نوێنه‌ری حکومه‌تی هه‌رێمی کوردستان له به‌ریتانیا ئاماده‌بوو به‌رپرسی په‌یوه‌ندیه‌کانی ده‌ره‌وه سوپاسی هه‌ڵوێستی حکومه‌تی به‌ریتانیای کرد له هاریکاریکردنی گه‌لی کورد له بواره‌کانی مرۆیی و سه‌ربازی.
له لایه‌کی تره‌وه ئاماژه‌ی به بارودۆخی په‌نابه‌رانی کوردستان کرد به تایبه‌ت له‌م کات و ساته‌دا که ده‌چینه ناو وه‌رزی زستان و که‌ش و هه‌وا ڕوو له ساردی و به‌فر و بارانی زیاتر ده‌کات. هه‌روه‌ها ووتی حکومه‌تی هه‌رێمی کوردستان له بارودۆخێکی دارایی خهراپدایه ئه‌ویش به‌هۆی شه‌ڕی داعش و بڕینی بودجه‌ی هه‌رێمی کوردستان له لایه‌ن حکومه‌تی فیدڕاڵیه‌وه، ئه‌و دوو هۆکاره‌ش وایانکرددوه که حکومه‌تی هه‌رێم بارقورسیه‌کی یه‌کجار زۆری بکه‌وێته سه‌ر له بواری دابینکردنی کۆمه‌ك و شوێنی حه‌وانه‌وه بۆ ئه‌و په‌نابه‌رانه. له هه‌مانکاتیشدا له‌گه‌ڵ ستایشکردنی ڕۆڵی گه‌وره‌ی حکومه‌تی به‌ریتانیا، داواشی کرد که هاریکاریه‌کان زیاتر بکه‌ن و کار بکه‌ن له‌سه‌ر ئه‌وه‌ی ئه‌و هاریکاریه مرۆییانه‌ی که بۆ کوردستان ده‌نێردرێت به‌شێکی له ڕێگای ڕێکخراوه ناحکومیه‌کانیش به سه‌ر ئاواره‌کان دابه‌ش بکرێت. فه‌لاح مسته‌فا هه‌روه‌ها ووتی: " هه‌ر له سه‌ره‌تاوه ئێمه له کوردستان ده‌رگاکانمان واڵا کردووه بۆ لێقه‌وماوان و په‌نابه‌ران. ئیستاش که‌مه نه‌ته‌وه و ئایینه‌کانی ناوچه‌ی موسڵ به تایبه‌تی و عیراق به گشتی ڕوویان له کوردستان کردووه و ئێمه‌ش گیانیان ده‌پارێزین و به پێی تواناش هاریکاری مرۆییمان کردوون، به‌ڵام پێویستیمان به هاریکاری زیاتری کۆمه‌ڵگای نێوده‌وڵه‌تی هه‌یه له‌و بواره‌وه."
هه‌ر له درێژه‌ی دانیشتنه‌که‌دا به‌رپرسی فه‌رمانگه‌ی په‌یوه‌ندیه‌کانی ده‌ره‌وه داوای له به‌ریتانیا کرد له ڕێگای هاوپه‌یمانه‌کانیه‌وه کۆمه‌کی دارایی بۆ ئه‌و په‌نابه‌رانه په‌یدا بکات بۆ ئه‌وه‌ی یارمه‌تیده‌رێکی زیاتر بێت بۆ په‌یداکردنی بژێوی ڕۆژانه‌یان. له لایه‌کی تره‌وه ئاماژه‌ی به‌وه‌دا که حکومه‌تی فیدراڵ تا ئێستاش نه‌هاتۆته پێش و وه‌ك پێویست هاریکاری ئه‌و په‌نابه‌رانه ناکات. هه‌روه‌ها ووتی جگه له‌وه‌ی که حکومه‌تی فیدڕاڵ نزیه‌که‌ی 16 ملیار دۆلار قه‌رزداری حکومه‌تی هه‌رێمه و مووچه‌ی فه‌رمانبه‌ران و بودجه‌ی هه‌رێمی بڕیوه، ئاماده‌ش نه‌بووه یارمه‌تی ئه‌و په‌نابه‌رانه بدات که زۆربه‌ی هه‌ره زۆریان خه‌ڵکی به‌شه‌کانی تری عیراقن.
له‌لای خۆیه‌وه وه‌زیری ده‌وڵه‌تی به‌ریتانیا بۆ کاروباری گه‌شه‌پێدانی نێوده‌وڵه‌تی ئاماژه‌ی به‌وه‌دا که له دوو هه‌فته‌ی داهاتوودا حکومه‌تی وولاته‌که‌ی بڕی 16.5 ملیۆن پاوه‌ندی تر ته‌رخاند ده‌کات بۆ یارمه‌تیدانی په‌نابه‌رانی کوردستان و له ڕێگای ڕێکخراوه‌کانی سه‌ربه نه‌ته‌وه یه‌کگرتووه‌کان به‌سه‌ریاندا دابه‌ش ده‌کرێت.
پرسی هه‌ڕه‌شه‌کانی داعشیش به‌شێکی تری دیداره‌که بوو. وه‌زیره‌که‌ی به‌ریتانیا ووتی که کوردستان و هێزی پێشمه‌رگه ڕۆڵی سه‌ره‌کی له شه‌ڕکردن له گه‌ڵ داعش له ناوچه‌که ده‌بینێت و ووتیشی حکومه‌تی ووڵاته‌که‌ی ئه‌وه‌ی له ده‌ستی دابێت بۆ کوردستان ده‌یکات. هه‌روه‌ها ووتی ووڵاته‌که‌ی له بواری هاریکاریکردنی په‌نابه‌رانی کوردستانیش به‌رده‌وام ده‌بێت و کاریش ده‌کات بۆ ئه‌وه‌ی کۆمه‌ڵگای نێوده‌وڵه‌تی زیاتر به هانای ئه‌و په‌نابه‌رانه‌وه بێت. هاوکات سوپاسی حکومه‌تی کوردستانیشی کرد که له‌گه‌ڵ بوونی چه‌ندین ته‌نگژه‌و قه‌یران، توانی به باشترین شێوه پێشوازی له‌و په‌نابه‌رانه بکات و شوێنی حه‌وانه‌وه‌یان بۆ دابین بکات.
شوان عەتووف خەڵاتی تایبەتی فیستیڤاڵی فیلمی "ئۆ کورت" لە ئیتاڵیای بەدەستهێنا
مەنسوور جیهانی ـ کورتە فیلمی "ماڵ و کلیل" لە دەرهێنانی "شوان عەتووف" خەڵاتی تایبەتی لێژنەی دادوەرانی بەشی پێشبڕکێی سەرەکیی 14مین خولی فیستیڤاڵی نێودەوڵەتیی کورتە فیلمی "ئۆ کورت" لە وڵاتی ئیتاڵیای بەدەستهێنا.
کورتە فیلمی چیرۆکی "ماڵ و کلیل" لە نووسین و دەرهێنانی سینەماکاری کورد "شوان عەتووف" و بەرهەمی بەڕێوەبەرایەتی هونەری سینەمای سلێمانی لە نوێترین بەشداری نێونەتەوەیی خۆیدا کاتژمێر 30/7ی ئێوارێی ڕۆژی 21 تەشرینی دووەم / نۆڤەمبەری 2014 لە بەشی پێشبڕکێی سەرەکیی نێونەتەوەیی چواردەیەمین خولی فیستیڤاڵی نێودەوڵەتیی کورتە فیلمی "ئۆ کورت" O Curt لە شاری ناپۆلی لە وڵاتی ئیتاڵیا نمایشکرا و لە لایەن ئەندامانی لێژنەی دادوەرانی ئەم فیستیڤاڵەوە خەڵاتی تایبەتی پێبەخشرا.
ئەم کورتە فیلمە 15 خولەکییە کە لە لایەن کۆمپانیای "ئای لۆف فیلم" لە باشووری کوردستان و وڵاتی بەریتانیا لە سەرتاسەری جیهاندا بڵاودەکرێتەوە لە فیستیڤاڵی کورتە فیلمی "ئۆ کورت" لەگەڵ 17 کورتە فیلم لە وڵاتانی فەڕەنسا، ئەڵمانیا، ئیسپانیا، ئێران، تورکیا، ئیتاڵیا، ڕووسیا، سووریا، ئەمەریکا و هۆنگ کۆنگ ڕکابەری کرد و شەشەمین خەڵاتی خۆی بەدەستهێنا و لە 30 فیستیڤاڵی دیکەی جیهانیشدا بۆ وەرگرتنی خەڵات لە پێشبڕکێی سەرەکییەکاندایە.
ئەندامانی لێژنەی دادوەرانی بەشی پێشبڕکێی سەرەکیی نێونەتەوەیی چواردەیەمین خولی فیستیڤاڵی نێودەوڵەتیی کورتە فیلمی "ئۆ کورت" بریتی بوون سینەماکارە ناودار و بەئەزموونی وڵاتی ئیتاڵیا، لەوانە: "دانییەل جیپری" ـ بەڕێوەبەرەی وێنەگرتن و سەرۆکی لێژنەی دادوەران، "جۆزێپێ بۆرۆنێ" ـ ڕەخنەگری فیلم و مێژوونووسی سینەما، "مۆرۆزیۆ برۆچی" ـ سیناریۆنووس و "کلۆدیۆ دی بیاجیۆ" ـ ئەکتەر، دەرهێنەر و بەرهەمهێنەر.
فیستیڤاڵی نێودەوڵەتیی کورتە فیلمی "ئۆ کورت" بە نمایشی بەرهەمی وڵاتانی جۆراوجۆری جیهان لە چەندین بەشی پێشبڕکێی و دەرەوەی پێشبڕکێی، لەوانە: بەشی "پێشبڕکێی نێودەوڵەتی"، بەشی "پێشبڕکێی ناپۆلی"، بەشی "پێشبڕکێی ئەنیمەیشن"، بەشی "پێشبڕکێی لێجێرۆ" و بەشی "پێشبڕکێی خوێندکاری" و هەروەها بەشی "دەرەوەی پێشبڕکێی" لە ڕۆژانی 19 تا 22ی تەشرینی دووەم / نۆڤەمبەری 2014 لە شاری ناپۆلی لە وڵاتی ئیتاڵیا بەڕێوەچوو.
کورتە فیلمی "ماڵ و کلیل" لە دوایین بەشداری نێونەتەوەیی خۆیدا بە ئامادەبوونی "شوان عەتووف" لە بەشی پێشبڕکێی فیستیڤاڵی نێودەوڵەتیی فیلمی "فایتی کۆرتی" Fiati Corti لە شاری ڤینیس لە وڵاتی ئیتاڵیا نمایشکرا و لە لایەن ئەندامانی لێژنەی دادوەرانی ئەم فیستیڤاڵەوە خەڵاتی تایبەتی پێبەخشرا.
نوێنەری حکومەت لەویلایەتە یەکگرتووەکانی ئەمەریکا دەستنیشانکرا
ئەنجومەنی وەزیران بڕیاریدا بەگواستنەوەی راژەی خاتوو بەیان سامی عەبدولرەحمان نوێنەری حکومەتی هەرێمی کوردستان لە بەریتانیا بۆ نوێنەرایەتی حکومەت لە ئەمەریکا.
فەلاح مستەفا بەرپرسی فەرمانگەی پەیوەندیەکانی دەرەوەی حکومەت رایگەیاند: لەچوارچێوەی هەوڵەکانی حکومەتی هەرێم لەژێر رێنماییەکانی بەڕێز مسعود بارزانی سەرۆکی هەرێمی کوردستان بۆ پەرەپێدان و پتەوکردنی پەیوەندیەکان لەگەڵ وڵاتانی جیهان، و لەبەر گرینگی نووسینگەی حکومەتی هەرێمی کوردستان لە ئەمەریکاو بەتاڵی ئەم پۆستە بۆ ماوەیەک، حکومەتی هەرێمی کوردستان خاتوو بەیانى به نوێنەرى تازەی حكومەت دەستنیشان کرد.
شیاوى باسە ئێستا حکومەتی هەرێمی کوردستان 14 نوێنەرایەتی لە دەرەوەی وڵات هەیە.
هیندیستان كونسوڵگەری گشتی خۆی لە هەرێمی كوردستان دەكاتەوە
ئەمڕۆ بەڕێز كاروان جمال جێگري بەرپرسي پەيوەنديەكاني دەرەوەي حكومەت پێشوازي لە باڵيۆز (سەنجاي ڕەنا) نێردەي تايبەتي وەزارەتي دەرەوەي هينديستان بۆ كاروباري هاوڵاتياني هيند لە عێراق و هەرێمي كوردستان كرد كە بە مەبەستي پتەوكردني پەيوەنديە دوولايەنەكاني نێوان هەرێم و ووڵاتي هينديستان سەرداني هەرێمي كردبوو.
لەسەرەتاي كۆبوونەوەكەدا بەڕێزيان خۆشحاڵي خۆي بە سەردانەكەي بۆ هەرێمي كوردستان دەربڕي و ستايشي لايەنە پەيوەنديدارەكاني حكومەتي هەرێمي كوردستاني كرد بۆ پێشكەشكردني ئەو هاوكاري و كارئاسانيانە بۆ كردنەوەي كونسوڵي گشتي هينديستان لە هەرێمي كوردستان كرد.
پاشان، باڵيۆزي ناوبراو ئاماژەي بە مەبەستي سەردانەكەي بۆ هەرێم كرد كە ئەويش گرتنەبەري ئەو ڕێكارە ياسايانەيە بۆ كردنەوەي كونسوڵي گشتي ووڵاتەكەي لە پايتەختي هەرێم و برەودان بە پەيوەنديە ديبلۆماسي و بازرگانيەكان لەگەڵ هەرێمي كوردستان كرد. بۆ ئەم مەبەستە، بەڕێزيان هەرێمي كوردستان بە ناوچەيەكي لەبار ناوبرد بۆ بانگهێشتكردني كۆمپانيا هينديەكان و ئەنجامداني كاري وەبەرهێنان تيايدا.
لەلايەن خۆيەوە بەڕێز كاروان جمال خۆشحاڵي خۆي بۆ ئەم هەنگاوەي حكومەتي هينديستان لە هەرێم دەربڕي و بە هەنگاوێكي گرنگي زاني بۆ دروستكردني پردي پەيوەندي ديبلۆماسي و ئاڵوگۆركردني پەيوەنديە بازرگاني و ئابوري و كەلتوري نێوان هەردوولا. پاشان، ستايشي ئەزمووني ديموكراسي حكومڕاني ووڵاتي هينديستان كرد كە توانيويەتي هەموو پێكهاتە نەتەوەيي و ئايينەيە جياجياكان لەژێر يەك چەتري بەرێوبردن كۆبكاتەوە.پاشان، لەتەوەرەيەكي تري كۆبوونەوەكەدا، باڵيۆزي ناوبراو ئاماژەي بە هێرشەكاني ئەم دواييەي ڕێكخراوي داعش بۆ سەر عێراق و ناوچەكرد كە تيايدا ژمارەيەك هاوڵاتي هيندي لەلايەن ڕێكخراوي ناوبراو دەستگيركران. هاوكات، بەڕێزيان ستايشي هەوڵەكاني حكومەتي هەرێم و دەزگا ئاسايشەكاني هەرێي كرد كە بە هەماهەنگي سوپاي عێراق توانيان ژمارەيەك پەرستياري هيندي لە ناوەڕاستي عێراق ڕزگار بكەن و پاشان گواستنەوەيان بۆ هەرێمي كوردستان.
لە دوايدا هەريەك لە پرسەكاني كرێكاراني هيندي و كۆمپانيا هينديەكان لە هەرێمي كوردستان و پەيوەنديە بازرگاني و ئابوريەكان و دابينكردني كورسي خوێندن بۆ قوتابياني كورد لە زانكۆكاني هينديستان تەوەرەيەكي تري كۆبوونەوەكە بوو.
له له‌نده‌ن فه‌لاح مسته‌فا له‌گه‌ڵ وه‌زیری ده‌ره‌وه‌ی به‌ریتانیا بۆ کاروباری ڕۆژهه‌ڵاتی ناوه‌ڕاست کۆبووه‌وه
هه‌ر له میانه‌ی سه‌ردانه فه‌رمیه‌که‌یدا بۆ به‌ریتانیاک فه‌لاح مسته‌فا به‌رپرسی په‌یوه‌ندیه‌کانی ده‌ره‌وه‌ی حکومه‌تی هه‌رێمی کوردستان چاوی که‌وت به تۆبایه‌س ئێڵوود وه‌زیری ده‌ره‌وه‌ی به‌ریتانیا بۆ کاروباری ڕۆژهه‌ڵاتی ناوه‌ڕاست.
له سه‌ره‌تای دیداره‌که‌دا تۆبایه‌س ئێڵوود وه‌زیری ده‌ره‌وه بۆ کاروباری ڕۆژهه‌ڵاتی ناوه‌ڕاست خۆشحاڵی حکومه‌تی ووڵاته‌که‌ی ده‌ربڕی به ڕێککه‌وتنه‌که‌ی نێوان به‌غدا و هه‌وڵێر و هیوای خواست که له ده‌رئه‌نجامدا ڕێککه‌وتنێکی دوورخایه‌نی کۆنکریتی لێ بێته ئاراوه.
ناوبراو ئاماژه‌ی به په‌یوه‌ندیه پێشکه‌وتووه‌کانی نێوان به‌ریتانیا و هه‌رێمی کوردستاندا و ووتیشی که ئه‌و په‌یوه‌ندیانه به‌رده‌وام ده‌بن و به‌ریتانیا له ڕووه‌کانی سه‌ربازی و مرۆیی به‌رده‌وام ده‌بێت له هاریکاریکردنی کوردستان. هه‌روه‌ها خۆشحاڵی خۆی بۆ چالاکی کۆمپانیا به‌ریتانیاکان له کوردستان نیشاندا و جه‌ختیشی له‌سه‌ر ئه‌وه کرده‌وه که ئه‌وان کار له‌سه‌ر ئه‌وه ده‌که‌ن که کۆمپانیاکانی به‌ریتانیا زیاتر و چالاکانه تر کاره‌کانیان له کوردستان ئه‌نجام بده‌ن.
هه‌ر له دیداره‌که‌دا که خاتوو به‌یان سامی عبدالرحمان نوێنه‌ری حکومه‌تی هه‌رێمی کوردستان له به‌ریتانیا ئاماده بوو، به‌رپرسی په‌یوه‌ندیه‌کانی ده‌ره‌وه‌ی حکومه‌تی هه‌رێم ئاماژه‌ی به‌وه‌دا که کوردستان به چاوێکی گرنگه‌وه سه‌یری په‌یوه‌ندیه دوو قۆڵیه‌کانی نێوان هه‌ردوولا ده‌کات و سوپاسی حکومه‌تی به‌ریتانیای کرد بۆ ئه‌و هه‌موو هاریکاریه سه‌ربازی و مرۆییه‌ی که پێشکه‌شی کوردستان ده‌کات. هه‌روه‌ها سوپاسی باڵیۆزی به‌ریتانیای کرد له به‌غدا که ڕۆڵێکی گه‌وره و ئه‌رێنی بینی له نزیککردنه‌وه‌ی بۆچونه‌کانی نێوان به‌غدا و هه‌رێم که له ده‌رئه‌نجامدا بووه هۆکاری ئه‌و ڕێککه‌وتنه‌ی نێوان هه‌ردوولا.
فه‌لاح مسته‌فا ووتی:" ئێمه له کوردستان هه‌موو کاتێك ده‌رگای ووتووێژمان کردۆته‌وه له‌گه‌ڵ به‌غدا بۆ گه‌یشتن به چاره‌سه‌ری یه‌کجاره‌کی بۆ هه‌موو کێشه و پرسه‌کان. ئه‌گه‌ر به‌غداش ئه‌و ڕێککه‌وتنه‌ی ئێستا وه‌ك خۆی به بێ گرفت جێبه‌جێ بکات، ئه‌وا ده‌توانین به یه‌که‌وه کاری زۆر باش بکه‌ین به تایبه‌ت له‌و بارودۆخه‌ی ئێستادا." ووتیشی پێویسته کات ببه‌خشینه حکومه‌ته‌که‌ی به‌ڕێز عه‌بادی، به‌ڵام له هه‌مانکاتدا پێویسته حکومه‌تی نوێی عیراق ئه‌و هه‌ڵانه‌ی حکومه‌ته‌کی پێشوو دووباره نه‌کاته‌وه که بووه هۆکاری ئه‌و ته‌نگژه‌یه‌ی که ووڵات پێیدا تێده‌په‌ڕێت.
وه‌زیری کاروباری ڕۆژهه‌ڵاتی ناوه‌ڕاستی حکومه‌تی به‌ریتانیا هیوای خواست ئه‌و ڕێککه‌وتنه بکه‌وێته بواری جێبه‌جێکردن و ڕێککه‌وتنێکی یه‌کجاره‌کی لێ بێته ئاراوه چونکه له ده‌رئه‌نجامدا ڕێگه خۆشکه‌رێکی باش ده‌بێت بۆ ئه‌وه‌ی کۆمپانیا جیهانیه‌کان زیاتر ڕوو له کوردستان بکه‌ن. له لایه‌کی تریشه‌وه تۆبایه‌س ئێلوود ستایشی ڕۆڵی قاره‌مانانه‌ی پێشمه‌رگه‌ی کوردستانی کرد له ڕووبه‌ڕووبوونه‌وه‌ی تیرۆریستان و ئه‌وه‌ی دووپات کرده‌وه که به‌ریتانیا به‌رده‌وام ده‌بێت له به‌خشینی چه‌ك و ته‌قه‌مه‌نی و راهێنان بۆ پێشمه‌رگه‌ی کوردستان.
سه‌باره‌ت به پرسی داعشیش به‌رپرسی په‌یوه‌ندیه‌کانی ده‌ره‌وه‌ی حکومه‌تی هه‌رێم ووتی که کوردستان ڕوو به‌ڕووی گرووپێکی تیرۆریستی دڕنده بۆته‌وه و له جیاتی جیهانی مۆدێرن ئه‌و شه‌ڕه ده‌کات. هه‌روه‌ها ووتی ڕۆژانه له چه‌ندین به‌ره‌ی جه‌نگدا شه‌ڕ و پێکدادان به‌رده‌وامه و زۆربه‌ی هه‌ره زۆری ئه‌و ناوچانه‌ی که داعش گرتبووی له چنگیان ڕزگار کراونه‌ته‌وه و پلانیش هه‌یه له داهاتوویه‌کی نزیکدا ته‌واوی ناوچه‌کانی تر ڕزگار بکرێنه‌وه.
هه‌ر له درێژه‌ی دیداره‌که‌دا وه‌زیری کاروباری ڕۆژهه‌ڵاتی ناوه‌ڕاست له حکومه‌تی به‌ریتانیا باسی پرسی یه‌کگرتنه‌وه‌ی هێزه‌کانی پێشمه‌رگه‌ی کرد له ژێر چه‌تری وه‌زاره‌تی پێشمه‌رگه‌ی کوردستان و سوپایه‌کی نیشتیمانی و ئاماژه‌ی به‌وه‌دا ئه‌گه‌ر هاتوو حکومه‌تی هه‌رێم ئه‌و کاره ئه‌نجام بدات ئه‌وا پێگه‌ی هه‌رێم له ده‌ره‌وه به‌هێزتر و گه‌وره‌تر ده‌بێت. ووتیشی ئێمه لێبورده‌یی و به‌رپرسیارییه‌تی پێشمه‌رگه ده‌زانین، بۆیه‌ش ئه‌گه‌ر ئه‌و هێزانه بخرێنه ناو سوپایه‌کی نیزامی و نیشتیمانی و به باشترین شێوه ڕاهێنانی بۆ بکرێت، ئه‌وا له داهاتوودا ئه‌و سوپایه له جیهاندا سوودی لێوه‌رده‌گیردرێت بۆ ئه‌وه‌ی وه‌ك هێزی ئاشتی پارێز له دونیادا به‌کاربهێندرێت. بۆ ئه‌م مه‌به‌سته‌ش به‌رپرسی په‌یوه‌ندیه‌کانی ده‌ره‌وه داوای هاوکاری له حکومه‌تی به‌ریتانیا کرد بۆ رێکخسته‌وه‌ی هێزاه‌کانی پێشمه‌رگه. له‌م روه‌شه‌وه وه‌زیری کاروباری ڕۆژهه‌ڵاتی ناوه‌ڕاستی حکومه‌تی به‌ریتانیا ئاماده‌یی ووڵاته‌که‌ی نیشاندا له پێشکه‌شکردنی ڕاوێژ له‌مه‌ڕ چۆنیه‌تی دروستکردنی سوپایه‌کی نیشتیمانی بۆ کوردستان.
سەرۆكی هەرێمی كوردستان پێشوازی لە نوێنەران و سەرۆكی فڕاكسیۆنەكانی توركمان و كلدان و ئاشوور و سریان و ئەرمەن لە پارلەمانی كوردستان دەكات
ئەمڕۆ پێنجشەممە 11ـی 12ـی 2014 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە نوێنەران و سەرۆكی فڕاكسیۆنەكانی توركمان و كلدان و ئاشوور و سریان و ئەرمەن لە پارلەمانی كوردستان كرد و لەگەڵیاندا كۆبۆیەوە.
لەم كۆبوونەوەیەدا قسە لەبارەی چۆنییەتی دیاریكردنی ئەندامانی كۆمیسیۆنی باڵای هەڵبژاردنی كوردستان لە پارلەمانی كوردستان كرا و، نوێنەران و سەرۆكی فڕاكسیۆنەكانی توركمان و كلدان و ئاشوور و سریان و ئەرمەن لە پارلەمانی كوردستان نیگەرانیی خۆیان لەبارەی شێوازی دیاریكردنی ئەندامانی كۆمیسیۆن و پشتگوێخستنی بەش و داواكارییەكانیان لە كۆمیسیۆنی هەڵبژاردن بە سەرۆك بارزانی ڕاگەیاند. هەروەها ئەوەیان خستەڕوو كە هەماهەنگینەكردنی لایەنە سیاسییەكانی كوردستان لەگەڵ پێكهاتە نەتەوەیی و ئایینییەكان لە مەسەلەی دیاریكردنی ئەندامانی كۆمیسیۆنی هەڵبژاردن سابیقەیەكی خراپ دروست دەكات و ترسی ئەوەیان هەیە بابەتی لەمشێوەیە لە داهاتوویشدا دووبارە ببێتەوە.
نوێنەران و سەرۆكی فڕاكسیۆنەكانی توركمان و كلدان و ئاشوور و سریان و ئەرمەن لە پارلەمانی كوردستان داوایان لە سەرۆك بارزانی وەك پارێزەری ماف و داواكاریی پێكهاتە نەتەوەیی و ئایینییەكانی كوردستان و عێراق كرد كە، ڕێگە لەوە بگیرێت مافەكانیان لە كۆمیسیۆن پشتگوێ بخرێت و پێكهاتەكان نوێنەرایەتیی ڕاستەقینەیان لە كۆمیسیۆندا هەبێت. هەروەها سوپاسی سەرۆك بارزانیشیان كرد كە هەردەم بەدەنگ داواكاری و مافی پێكهاتە ئایینی و نەتەوەییەكان هاتووە و بایەخیان پێ دەدات.
لەبەرانبەردا سەرۆك بارزانی پاڵپشتیی تەواوی خۆی بۆ داواكاریی شاندی میوان ڕاگەیاند و جەختی لەوە كردەوە كە شێوازی دیاریكردنی ئەندامانی كۆمیسیۆن نادروست بووە و ئەوەی خستەڕوو كە ئەم بابەتە زیان بە پێگە و ناوبانگی هەرێمی كوردستان دەگەیێنێت. كۆمیسیۆنی هەڵبژاردن دامەزراوەیەكی نیشتیمانییە و ناكرێ بە بیرێكی تەسكی حزبی مامەڵەی لەگەڵدا بكرێت و پێویستە هەموو لایەك بەشداریی ڕاستەقینەیان هەبێت و هیچ لایەنێكیش بۆی نییە لەجیاتی پێكهاتەكان نوێنەر دیاری بكات. سەرۆك بارزانی نوێنەران و سەرۆكی فڕاكسیۆنەكانی توركمان و كلدان و ئاشوور و سریان و ئەرمەن لە پارلەمانی كوردستانی لەوە دڵنیا كردەوە كە هەروەكچۆن لە پڕۆسەی نووسینەوەی دەستووری عێراقیدا پێداگیری لەسەر چەسپاندنی مافی پێكهاتە نەتەوەیی و ئایینییەكانی عێراق كردووە ئەوهایش بەردەوام دەبێت لە پاڵپشتیكردن و پاراستنی مافەكانیان. سەرۆك بارزانی ئەوەیشی دووپات كردەوە كە هەموو تواناكانیشی دەخاتە گەڕ بۆ گەییشتن بە چارەسەرێكی گونجاو.
كۆسره‌ت ره‌سول عه‌لی: ئاسۆی به‌رده‌م كورد رووناكه و جیهان چاوی له‌سه‌ریه‌تی
كۆسره‌ت ره‌سول عه‌لی جێگری سه‌رۆكی هه‌رێمی كوردستان رایده‌گه‌یه‌نێ كه ئاسۆی به‌رده‌م گه‌لی كورد رووناكه‌و هه‌موو جیهان چاوی له‌سه‌ریه‌تی و گه‌لی كوردیش هه‌میشه ویستوویه‌تی به ئاشتی و ئارامی و ئازادی بژی.
ئه‌م وتانه‌ی جێگری سه‌رۆكی هه‌رێمی كوردستان ئه‌مڕۆ چوارشه‌ممه 10/12/2014 له شاری هه‌ولێر له‌میانی پێشوازی كردنی له (فرانك بالێس) باڵیۆزی به‌ریتانیا له عێراق و ئه‌نكس مه‌كی كونسوڵی گشتی به‌ریتانیا له هه‌رێمی كوردستان هات.
له دیدارێكدا هه‌ردوولا گفتوگۆیان له‌باره‌ی دوایین گۆڕانكاری و رووداوه‌كانی عێَراق و ناوچه‌كه كردو به پێویستیانزانی كه چاره‌سه‌ری كێشه‌و گرفته‌كان به هه‌ماهه‌نگی نێوان سه‌رجه‌م لایه‌نه‌كان ئه‌نجام بدرێ.
ته‌وه‌رێكی تری گفتوگۆكان تایبه‌ت بوو به په‌یوه‌ندییه‌كانی نێوان هه‌رێم و به‌غدا، بۆ ئه‌م مه‌به‌سته كۆسره‌ت ره‌سول عه‌لی گوتی"دوای ده‌ستبه‌كاربوونی كابینه‌ی تازه‌ی حكومه‌تی ناوه‌ند هه‌ستمان كردووه كه كه‌شێكی جیاواز له جاران هه‌یه‌و به خۆشحاڵیشه‌وه توانیومانه بگه‌ینه رێكه‌وتن له‌سه‌ر زۆرێك له بابه‌ته‌كان".
لای خۆیه‌وه فرانك بالێس گوتی"له سه‌ره‌تاوه ئێمه گوتوومانه ده‌بێ حكومه‌تی ناوه‌ند و هه‌رێمی كوردستان له‌سه‌ر مێزی گفتوگۆ دانیشن و بگه‌نه رێكه‌وتن.
به‌شێكی تری گفتوگۆكان تایبه‌ت بوو به ره‌وشی كوردستان و جه‌نگی رووبه‌ڕووبوونه‌وه‌ی تیرۆر، له‌مباره‌یه‌وه جێگری سه‌رۆكی هه‌رێمی كوردستان گوتی"له سه‌ره‌تای دروستبوونی ئه‌م شه‌ڕه‌وه به هه‌موو هێز و توانایه‌كمانه‌وه رووبه‌ڕووی تیرۆر بووینه‌ته‌وه‌و به‌رده‌وامیش ده‌بین له‌سه‌ری، به‌ڵام پێویسته كۆمه‌ڵگای نێوده‌وڵه‌تی هاوكاری زیاترمان بكات".
له كۆتایی كۆبوونه‌وه‌كه‌دا هه‌ردوولا به پێویستیانزانی كۆمه‌ڵگای نێوده‌وڵه‌تی زیاتر هاوكار بێ و تواناكانی بخاته گه‌ڕ بۆ زوو به‌زوو كۆتایی هێنان به جه‌نگی تیرۆر و له‌ناوبردنی تیرۆرستان.
سەرۆكی هەرێمی كوردستان پێشوازی لەو پێشمەرگانە كرد كە لە كۆبانێ بۆ هەرێمی كوردستان گەڕاونەتەوە
ئەمڕۆ سێشەممە 9ـی 12ـی 2014 لە سەلاحەدین بەڕێز مەسعود بارزانی سەرۆكی هەرێمی كوردستان لە مەراسیمێكی تایبەت و بە ئامادەبوونی مستەفا سەید قادر وەزیری پێشمەرگە و ئەنوەر حاجی عوسمان بریكاری وەزیری پێشمەرگە و ژمارەیەك لە بەرپرسانی وەزارەتی پێشمەرگە، بە مەبەستی بەخێرهێنانەوەیان پێشوازی لەو پێشمەرگانە كرد كە پاش بەجێگەیاندنی ئەركەكانیان لە كۆبانێ گەڕاونەتەوە هەرێمی كوردستان.
لە دیدارەكەدا سەرۆك بارزانی گوتەیەكی پێشكەش كرد و تێیدا بە گەرمی بەخێرهاتنی ئەو پێشمەرگە قارەمانانەی كرد كە دوای بەجێگەیاندنی ئەرك و ڕاسپاردە سەربازییەكان بە سەركەوتوویی بۆ هەرێمی كوردستان گەڕاونەتەوە. سەرۆك بارزانی ئەركی پێشمەرگەی لە كۆبانێ بە پیرۆز و بەرز وەسف كرد و گوتی: " ئێوە سەروەرییەكی گەورەتان بۆ خۆتان و خانەوادە و وڵاتەكەتان تۆمار كردووە، شەرەفی یارمەتیدانی خوشك و براكانمان لە پارچەیەكی دیكەی كوردستان بەر ئێوە كەوتووە و ئەوە سەروەرییەكی زۆر مەزنە". سەرۆك بارزانی ئەوەیشی بە پێشمەرگەكان گوت كە جێگەتان لە دڵی میللەتی كوردە و سەری ئێمەتان بەرز كرد و دەستتان خۆش بێت. سەرۆك بارزانی ئەوەیشی دووپات كردەوە كە ئەو پێشمەرگانەی دەچنە كۆبانێ و بەرگری لە خوشك و براكانیان دەكەن نوێنەری هەموو پێشمەرگە و هەموو كوردستانییەكی دڵسۆزن و ڕایشیگەیاند كە چوونی پێشمەرگە بۆ كۆبانێ دوژمنی تووشی نائومێدی كرد و دەستكەوت و سەركەوتنی مەزن لە كۆبانێ بەدیهات.
سەرۆك بارزانی لە درێژەی قسەكانیدا ڕۆڵی پێشمەرگەی لە ڕووبەڕووبوونەوەی تیرۆریستان بەرز نرخاند و ئاماژەی بەوەدا كە تەنیا پێشمەرگەیە توانیویەتی هێرشی تیرۆریستان ڕابگرێت و تێكیانبشكێنێت و ئەوەیش شەرەفێكی گەورەیە كە بە دەست و بازووی پێشمەرگە ئەو سەركەوتنانە تۆمار كراون. سەرۆك بارزانی لە قسەكانیدا جەختیشی لەوە كردەوە كە لە هەموو حاڵەتێكدا نابێ ئێرادەی گەلەكەمان بشكێت و ئیرادەی گەلی كوردستانیش خۆی لە ئیرادەی پێشمەرگە دەبینێتەوە و سەركەوتنی پێشمەرگە بە مانای سەركەوتنی ئێرادەی گەلی كوردستانە.
سەرۆك بارزانی لە قسەكانیدا باسی لە هەڕەشەكان و سەرەتای دروستبوونی داعش كرد و ئەوەی خستەڕوو كە دوژمن تەوەقوعی ئەوەی نەدەكرد پێشمەرگە و گەلی كوردستان خۆیان بگرن و هەروەها جیهانیش یارمەتیی گەلی كوردستان بدات بۆیە پەلاماری كوردستانیدا. سەرۆك بارزانی جەختیشی لەوە كردەوە كە خۆڕاگریی پێشمەرگە پێگە و ناوبانگێكی بەرزی بۆ گەلی كوردستان بەدیهێناوە و ئەو پێگەیە بە هیچ سامانێك دروست نابێ تەنیا بە خۆڕاگری و قوربانیدان نەبێ.
سەرۆك بارزانی لەدرێژەی قسەكانیدا باسی ئەوەیشی كرد كە لە یارمەتیدانی خوشك و براكانمان لە كۆبانێ بەردەوام دەبین و گوتی: " ئەركێكی نەتەوەیی و نیشتیمانییە ئەگەر ڕێگە هەبێت ، خوشك و برایانمان لە كۆبانێ پێویستیان بە یارمەتی هەبێت ئێمە یارمەتیان دەدەین.
لە كۆتایی قسەكانیدا سەرۆك بارزانی سڵاوی بۆ گیانی پاكی ئەو شەهیدە قارەمانانە نارد كە لە شەڕی دژی تیرۆریستاندا گیانی خۆیان بەخت كردووە و هیوای خواست خودای مەزن بە بەهەشتی خۆی شادیان بكات.
كۆبوونەوەی دەوری نێوان فەرمانگەی پەیوەندیەكانی دەرەوەی حكومەت و نوێنەرایەتی ووڵاتانی بیانی لە هەرێم بەڕێوەچوو
ئەمڕۆ يەكشەممە ڕێكەوتي 7/12/2014 كۆبوونەوەي دەوري نێوان فەرمانگەي پەيوەنديەكاني دەرەوەي حكومەت و نوێنەرايەتي ووڵاتاني بياني لە هەرێمي كوردستان بە ئامادەبووني بەڕێزان د. فواد حسين سەرۆكي ديواني سەرۆكايەتي هەرێم و فەلاح مستەفا بەرپرسي پەيوەنديەكاني دەرەوە و سەفين دزەيي ووتەبێژي حكومەتي هەرێم ئەنجامدرا.
لە سەرەتاي كۆبوونەوەكەدا بەرپرسي پەيوەنديەكاني دەرەوە بە ناوي حكومەتي هەرێمي كوردستان سوپاسي تەواوي نوێنەرايەتيەكاني ووڵاتاني بياني لە هەرێمي كوردستان كرد بۆ بەردەوامي كارەكانيان لە هەرێمي كوردستان و هاوكاري و پشتگيريان لە خەڵكي هەرێمي كوردستان و پەرەپێداني پەيوەنديەكان لە بواري سياسي و ئابوري و كەلتوري و بازرگاني و وەبەرهێنان. هەروەها پيرۆزبايي دەست بەكاربووني لە ژمارەيەك لە كونسوڵي گشتي و نێردەي ووڵاتـاني بياني كرد كە لە ماوەي ڕابردوودا لە هەرێمي كوردستان دەست بەكاربوونە.
دواتر باسي لە دووايين ڕێكەوتنامەي نێوان هەرێمي كوردستان و بەغدا كرد كە دەستپێكي قۆناغێكي تازە بۆ چارەسەركردني كێشە هەلپسێرداوەكاني نێوان بەغدا و هەولێر و دەرەنجامي ڕێكەوتنامەكەش لە بەرژوەندي خەڵكي هەرێمي كوردستان و عێراقە بۆ زياتر ئارامي و ئاوەدانكردنەوە و بينات نانەوەي ووڵات.
هەڕەشە و هێرشەكاني داعش و هاتني ئاوارە و پەنابەران بۆ هەرێمي كوردستان تەوەرێكي تري كۆبوونەوەكە بوو كە تيايدا جەخت كرايەوە لەسەر مەترسي هەڕەشەكاني داعش و بەرەنگاربوونەوە هێزەكاني پێشمەرگە كە توانيوويانە شەپۆڵي مەترسيەكاني داعش بوەستێنن و ناوچەيەكي بەرفراوان ئازادبكەن، بۆيە سوپاسي ئەو ووڵاتانە كرا كە لە ڕووي دابين كردني چەك و مەشق هاوكاري هێزەكاني پێشمەرگەيان كردووە هاوكات داواي بەردەوامي ئەو هاوكاري سەربازي كرا بەتايبەتي بەهۆي بەردەوامي شەڕو هەڕەشەكاني داعش.
سەبارەت بە بارودۆخي مرۆيي ئێستا هەرێمي كوردستان ميوانداري نزيكەي يەك مليۆن و شەش سەد هەزار ئاوارەي ناوخۆي و پەنابەري سوري دەكات و حكومەتي هەرێم ئەو پەڕي تواناي خۆي خستۆتە گەڕ بۆ دابين كردني پێداويستيەكانيان بەتايبەتي كە ئێستا بەرەو وەرزي زستان نزيك دەبينەوە، ووڵاتە كۆمەك بەخشەكان هاوكاري مرۆييان پێشكەش كردووە بەڵام زۆري ئەو ژمارەيە پێويستي بە هەوڵي زياتر هەيە بۆيە داواكرا كە نوێنەرايەتي ووڵاتاني بياني هەوڵ بدەن سەرەڕاي هاوكاري حكومەتەكانيان، ڕێكخراوە نێودەوڵەتيە ناحكوميەكان هان بدەن بە هاناي ئەو ئاوارە و پەنابەرانەوە بێن و حكومەتي هەرێم ئامادەيە تەواوي كار ئاساني و هاوكاري پێشكەش بكات بۆ جێبەجێ كردني چالاكيەكانيان لە كوردستان.
بەڕێز د. فواد حسين سەرۆكي ديواني سەرۆكايەتي هەرێم باسي لە بارودۆخي هەرێمي كوردستان و ناوچەكە كرد بە تايبەتي ڕۆڵي هێزەكاني پێشمەرگە لە ئازادكردني ناوچەكان و دابين كردني ئارامي و سەقامگيري و ئاسايش و شەڕكردن دژي ڕێكخراوي تيرۆريستي داعش بە نوێنەرايەتي هەموو جيهاني ئازاد.
بەڕێز سفين دزەيي پوختەيەكي دەربارەي گفتوگۆكاني نێوان هەرێمي كوردستان و حكومەتي فيدراڵ لە بەغدا خستەڕوو كە هەرێمي كوردستان بەشێوەيەكي بەردەوام هەوڵي داوە كە تەواوي پرسە هەڵپسێردراوەكان لە ڕێگاي گفتوگۆ چارەسەربكرێت و گووتي تێگەيشتني تەواومان هەيە كە هەموو پرسەكان لە يەك ڕۆژدا چارەسەر ناكرێت بەڵام بووني گفتوگۆي بەردەوام و كاركردن بەيەكەوە تاكە ڕێگايە كە لە بەرژوەندي هەرێمي كوردستان و عێراقدايە.
بەڕێز فايز ئەلخوري كونسوڵي گشتي شانشيني ئوردني و عەميدي سيلكي ديبلۆماسي بە ناوي ديپلۆماتكاران سوپاسي فەرمانگەي پەيوەنديەكاني دەرەوەي كرد بۆ ڕێكخستني ئەو كۆوونەوە و ئاماژەيكرد كە تەواوي نوێنەرايەتي ووڵاتاني بياني لە هەرێمي كوردستان كاردەكەن بۆ پەرەپێداني پەيوەنديەكانيان لەگەڵ هەرێمي كوردستان لە چوارچێوەي عێراقدا و بەيەكەوە كاركردن بۆ بەرەنگاربوونەوەي ئەو ڕووبەربوونەوانە.
لە كۆتايي كۆبوونەوەكەدا ژمارەيەك پرسيار لەلايەن ئامادەبووانەوە ئاراستەكران و لەلايەن نوێنەراني هەرێمي كوردستان بەشێوەيەكي وورد وەڵامدرانەوە.
نوێنەراني ووڵاتاني شانيشني ئوردن، فەڵەستين، كۆماري ئيسلامي ئيران، ئيماراتي عەرەبي يەكگرتوو، وويلايەتە يەكگرتووەكاني ئەمريكا، كۆماري توركيا، پۆلەندا، بەريتانيا، كۆماري چيني ميللي، كۆماري ئەلمانياي فيدراڵ، كۆماري ڕووسياي فيدراڵ، كۆماري هەنگاريا، كۆماري ميسري عەرەبي، كۆماري ئيتاليا، كۆماري ڕۆمانيا، هۆڵەندا، كۆماري چيك، كۆماري فەڕەنسا، كۆماري بولگاريا، ژاپۆن، نێردەيي نەتەوەيەكگرتووەكان لە هەرێمي كوردستان ئامادەي كۆبوونەوەكە بوون.
سەرۆكی هەرێمی كوردستان پێشوازی لە كونسوڵی نوێی میسر لە هەولێر دەكات
ئەمڕۆ دووشەممە 8ـی 12ـی 2014 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە عومەر فەهمی كونسوڵی نوێی وڵاتی میسر لە شاری هەولێر كرد.
لە دیدارەكەدا كونسوڵی نوێی میسر كە بە مەبەستی خۆناساندن سەردانی سەرۆك بارزانی كردبوو خۆشحاڵیی خۆی نیشاندا كە وەك كونسوڵی تازەی وڵاتەكەی لە هەرێمی كوردستان دەستبەكار بووە. هەروەها سوپاس و پێزانینی گەل و حكوومەتی میسری بە سەرۆك بارزانی ڕاگەیاند بۆ هەوڵ و قوربانیدانی پێشمەرگە و خەڵكی كوردستان لەبەرانبەر تیرۆریستانی داعش و ئاماژەی بەوەدا كە جیهان بە ڕێزەوە سەیری خەبات و خۆڕاگریی خەڵكی كوردستان لەبەرانبەر تیرۆریستان دەكات.
لەبەرانبەردا سەرۆك بارزانی بەخێرهاتنی كونسوڵی تازەی میسری كرد و هیوای سەركەوتنی لە ئەرك و كارەكانی بۆ خواست.
هەر لەم دیدارەدا بارودۆخی سیاسی و ئەمنیی ناوچەكە و هەڕەشەی تیرۆریستان و پەیوەندییەكانی هەرێم و بەغدا قسەی لەسەر كرا و جەختیش لە پەرەپێدانی پەیوەندییەكانی نێو هەرێمی كوردستان و میسر كرایەوە.
More...
سەرۆكی هەرێمی كوردستان لەگەڵ فەرماندەی فەرماندەیی ناوەندیی هێزەكانی ئەمەریكا كۆبۆیەوە
ئه‌نجومه‌نی وه‌زیران ته‌قینه‌وه‌كانی كه‌ركووك ئیدانه ده‌كات
فەلاح مستەفا لەگەڵ شاندێكی پەیمانگای ئاشتی ئەمەریكی كۆبووەوە
دارا جەلیل خەیات: سەرەڕای گرفتەکان، هەرێمی کوردستان پێگەی ئابووری وبازرگانی خۆی پاراستووە
دوایین هەواڵەکان
- سهركۆمارى توركيا بهردهواميى پشتگيريى وڵاتهكهى بۆ عێراق و ههرێمى كوردستان دووپات كردهوه
- پەیامی سەرۆک نێچیرڤان بارزانی لە ساڵیادی ڕۆژنامەگەریی کوردیدا
- نێچيرڤان بارزانى: ده‌بێ نيشتمان كۆكهرهوهى ههموومان بێت
- سهرۆك نێچيرڤان بارزانى له‌گه‌ڵ باڵيۆزى يهكێتيى ئهورووپا كۆبووهوه
- سهرۆكى ههرێمى كوردستان پێشوازى له باڵيۆزى فهرهنسا كرد
- سهرۆك نێچيرڤان بارزانى پێشوازى له باڵيۆزى بهريتانيا كرد
- سەرۆکی حکومەتی هەرێمی کوردستان پێشوازی لە باڵیۆزی بەریتانیا لە عێراق دەکات
- عەباس غەزالی: نووسین و چاپکردنی "فەرھەنگیی زارەکیی موکریان" شانازییەکی بێ پایانە
- پەیامی پیرۆزبایی سەرۆکی حکومەتی هەرێمی کوردستان بەبۆنەی جەژنی نەورۆز
- سهرۆكى ههرێمى كوردستان نامهيهكى پيرۆزبايى له وهزيرى دهرهوەى توركياوه پێدهگات