نێچیرڤان بارزانى له‌گه‌ڵ ئه‌ردۆغان كۆ بووه‌وه
پێشنيوه‌ڕۆى ئه‌مڕۆ يه‌كشه‌ممه 28ى ئه‌يلوولى 2014، به‌ڕێز نێچيرڤان بارزانى سه‌رۆك وه‌زيرانى هه‌رێمى كوردستان كه به داوه‌تێكى فه‌رميى به‌ڕێزان سه‌رۆك وه‌زيرانى توركيا و سه‌رۆكى كۆڕبه‌ندى ئابووريى جيهان بۆ به‌شداريكردن له كار و چالاكييه‌كانى كۆڕبه‌نده‌كه، به ياوه‌ريى شاندێكى حكوومى، سه‌ردانى توركياى كرد، دواى به‌شداريكردنى له ڕێوڕه‌سمى كرده‌نه‌وه‌ى كۆڕبه‌نده‌كه‌دا، له ئيستانبول له‌گه‌ڵ به‌ڕێز ڕه‌جه‌ب ته‌ييب ئه‌ردۆغان سه‌ركۆمارى توركيا كۆ بووه‌وه.
له كۆبوونه‌وه‌كه‌دا به تيروته‌سه‌لى باس له ڕووداوه‌كان و دوا پێشهاته‌كانى عيراق و هه‌رێمى كوردستان و ناوچه‌كه كرا و، به تايبه‌تى تيشك خرايه سه‌ر ڕووداوه‌كانى دواى هێرشى تيرۆرستانى داعش بۆ سه‌ر پارێزگاكانى مووسڵ و تكريت و دواتر هه‌رێمى كوردستان. هه‌روه‌ها شه‌ڕ و ڕووبه‌ڕوونه‌وه‌ى پێشمه‌رگه له‌گه‌ڵ تيرۆرستان و كۆنترۆڵكردنه‌وه‌ى زۆرێك له‌و شوێنانه‌ى پێشتر كه‌وتبوونه ده‌ستى تيرۆرستان و، پرۆسه‌ى سياسى له عيراق و پێكهێنانى كابينه‌ى به‌ڕێز د. عه‌بادى و پێشبينيى ڕووداو و پێشهاته‌كانى ناوچه‌كه و ڕۆژهه‌ڵاتى ناوه‌ڕاست به گشتى، تاوتوێ كران.
سه‌رۆك ئه‌ردۆغان جه‌ختى له‌سه‌ر به‌ره‌وپێشبردن و پته‌وكردنى زياترى په‌يوه‌ندييه‌كانى توركيا له‌گه‌ڵ هه‌رێمى كوردستان كرده‌وه و ڕايگه‌ياند توركيا به‌و په‌يوه‌ندى و ڕێككه‌وتنانه‌وه پابه‌نده كه له هه‌موو بواره‌كاندا له‌گه‌ڵ هه‌رێمى كوردستان هه‌يه‌تى، له هه‌مان كاتدا هه‌وڵى جددى ده‌دات هاوكار و پشتگيرى هه‌رێمى كوردستان بێت له‌و نه‌هامه‌تيانه‌ى ئه‌م دواييه ڕووبه‌ڕووى بوونه‌ته‌وه، به تايبه‌تى له ڕووى مرۆييه‌وه كه تا ئێستا هاوكارييه‌كى باشيان پێشكه‌ش كردووه و له‌و هاوكاريانه به‌رده‌وام ده‌بن. ده‌رباره‌ى تيرۆريش، سه‌رۆك ئه‌ردۆغان ڕوونى كرده‌وه كه بۆ ڕووبه‌ڕووبوونه‌وه‌ى تيرۆر هه‌ماهه‌نگيى ته‌واويان له‌گه‌ڵ هێزه هاوپه‌يمانه‌كان هه‌يه و ئه‌م هه‌ماهه‌نگييه له‌گه‌ڵ هه‌رێمى كوردستانيش ده‌بێت، له‌پێناو نه‌هێشتنى هه‌ر مه‌ترسييه‌ك له‌سه‌ر ناوچه‌كه.
لاى خۆيه‌وه به‌ڕێز نێچيرڤان بارزانى سوپاسى ئه‌م هه‌ڵوێسته‌ى به‌ڕێز سه‌ركۆمار و هاوكارييه‌كانى توركياى كرد و ڕوونى كرده‌وه كه هه‌رێمى كوردستان چاوه‌ڕوانى پشتگيرى و هاوكاريى زياترى توركيا ده‌كات. هه‌روه‌ها خواستى هه‌رێمى كوردستانى بۆ به‌ره‌وپێشبردنى په‌يوه‌ندييه ئابوورى و سياسييه‌كانى هه‌ردوولا نيشان دا، هه‌ڵوێستى هه‌رێمى كوردستانيشى ده‌رباره‌ى به‌شداريكردن له حكوومه‌تى نوێى عيراقدا ڕوون كرده‌وه، كه به‌شدارى ده‌كات و ده‌يه‌وێ شانسێك بداته حكوومه‌تى تازه‌ى عيراق بۆ چاره‌سه‌ركردنى كێشه‌كانى هه‌ولێر و به‌غدا، هيوايشى خواست په‌يوه‌ندييه‌كانى توركيا له‌گه‌ڵ عيراق و هه‌رێمى كوردستان باشتر ببن.
ئێواره‌ى ئه‌مڕۆش دواى ته‌واوبوونى كار و چالاكييه‌كانى ڕۆژى يه‌كه‌مى كۆڕبه‌ندى ئابووريى جيهان، به‌ڕێز نێچيرڤان بارزانى له‌گه‌ڵ سه‌رۆك و سه‌رۆك وه‌زيران و سه‌ركرده‌ى وڵاتانى جيهان كه به‌شدارييان له كۆڕبه‌نده‌كه‌دا كردووه، له‌سه‌ر بانگهێشتى به‌ڕێز سه‌ركۆمارى توركيا، به‌شدارى له ئێواره‌خوانێكى تايبه‌تدا كرد.
سه‌رله‌به‌يانيى ئه‌مڕۆش به‌ڕێز سه‌رۆك وه‌زيرانى هه‌رێمى كوردستان و شاندى ياوه‌رى له‌گه‌ڵ دامه‌زرێنه‌ر و سه‌رۆكى كۆڕبه‌ندى ئابووريى جيهان به‌ڕێز پرۆفيسۆر "كلاوس شواب" كۆ بووه‌وه و له ديدارێكدا ڕه‌وشى عيراق و هه‌رێمى كوردستان و ناوچه‌كه، خرانه به‌ر باس. به‌ڕێز "شواب" پێشكه‌وتنه‌كانى كوردستان و داڵده‌دانى زياتر له يه‌ك مليۆن په‌نابه‌ر و ئاواره‌ى به‌رز نرخاند، كه جێگه‌ى سوپاس و پێزانينى كۆمه‌ڵگه‌ى نێوده‌وڵه‌تييه.
هه‌روه‌ها ڕايگه‌ياند جيهان به گشتى و وڵاتانى كۆمه‌كبه‌خش به تايبه‌تى ده‌بێ ئاوڕى زياتر له هه‌رێمى كوردستان بده‌نه‌وه، هيوايشى خواست له ئاينده‌‌دا بتوانن سه‌ردانى كوردستان بكه‌ن. به‌ڕێز سه‌رۆك وه‌زيرانيش بانگهێشتى كردن بۆ ئه‌وه‌ى سه‌ردانى كوردستان و هيواى خواست ده‌رفه‌ت بێته ئاراوه كه هاوشێوه‌ى كۆڕبه‌ندى ئابوورى جيهان له كوردستانيش ساز بكه‌ن.
شاندى ياوه‌رى به‌ڕێز سه‌رۆك وه‌زيرانى هه‌رێمى كوردستان كه له به‌ڕێزان قوباد تاڵه‌بانى جێگرى سه‌رۆك وه‌زيران، ئاشتى هه‌ورامى وه‌زيرى سه‌رچاوه سروشتييه‌كان، ڕێباز حه‌ملان وه‌زيرى دارايى و ئابوورى، عه‌لى سندى وه‌زيرى پلاندانان، فه‌لاح مسته‌فا به‌رپرسى فه‌رمانگه‌ى په‌يوه‌ندييه‌كانى ده‌ره‌وه و سه‌فين دزه‌يى وته‌بێژى فه‌رميى حكوومه‌تى هه‌رێمى كوردستان پێكهاتبوون، له چه‌ندين پانێلى جياجياى كۆڕبه‌نده‌كه و ده‌رباره‌ى چه‌ندين بابه‌تى جۆراوجۆر، به‌شدارييه‌كى كارايان كرد و سبه‌ى له ڕۆژى دووه‌مى كۆڕبه‌نده‌كه‌شدا به هه‌مان شێوه به‌شدارى له پانێله‌كاندا ده‌كه‌ن.
نێچیرڤان بارزانى پێشوازى له دوو كۆنگرێسمانى ئه‌مه‌ریكى ده‌كات
سه‌رله‌به‌یانیى ئه‌مڕۆ 27ى ئه‌یلوولى 2014، به‌ڕێز نێچیرڤان بارزانى سه‌رۆك وه‌زیرانى هه‌رێمى كوردستان پێشوازى له هه‌ردوو كۆنگرێسمانى ئه‌مه‌ریكى به‌ڕێزان "ئاده‌م كینزنگه‌ر" و جۆرج هۆڵدینگ" كرد.
له دیدارێكدا كۆنگرێسمانان خۆشحاڵیى خۆیان به پێشكه‌وتنه‌كانى هه‌رێمى كوردستان نیشان دا و، دووپاتیان كرده‌وه هه‌رێمى كوردستان سوودێكى زۆر باشى له‌و ده‌رفه‌ته وه‌رگرتووه كه دواى ڕووخاندنى ڕژێمى دكتاتۆریى به‌عس هاتۆته ئاراوه و، ئه‌زموون و پێشكه‌وتنه‌كانى هه‌رێمى كوردستان بۆ حكوومه‌ت و گه‌لى ئه‌مه‌ریكا نموونه‌ى سه‌ركه‌وتنن، بۆیه ئه‌مه‌ریكا هه‌رگیز پشت له هه‌رێمى كوردستان ناكات و هه‌میشه هاوكارى ده‌كات، به تایبه‌تیش كه ئێستا له جیاتى هه‌موو جیهانى ئازاد، له جه‌نگێكدا كه ئه‌مه‌ریكا سه‌رپه‌ر‌شتى ده‌كات، زۆر ئازایانه ڕووبه‌ڕووى تیرۆر بووه‌ته‌وه.
كۆنگرێسمانان هه‌روه‌ها باسیان له ڕه‌وش و بارودۆخى مرۆییى ئاواره‌كان له هه‌رێمى كوردستان كرد و سوپاسى حكوومه‌ت و خه‌ڵكى هه‌رێمى كوردستانیان كرد بۆ به‌هاناوه‌چوون و حه‌واندنه‌وه‌ى ئاواره و په‌نابه‌ران، كه له هه‌موو پێكهاته نه‌ته‌وه‌یى و ئایینییه‌كانى عیراق و سووریاش، ڕوویان له هه‌رێمى كوردستان كردووه و له‌مباره‌یه‌وه هیچ كه‌مته‌رخه‌مییه‌كى نه‌كردووه. جه‌ختیشیان له‌وه كرده‌وه كاتێك گه‌ڕانه‌وه ئه‌مه‌ریكا داوا ده‌كه‌ن پشتگیریى باشتر له هه‌رێمى كوردستان و هاوكاریى زیاترى حكوومه‌تى هه‌رێمى كوردستان بكرێت، بۆ ئه‌وه‌ى بتوانێت به شێوه‌یه‌كى باشتر هاوكاریى ئاواره و په‌نابه‌ران بكات.
لاى خۆیه‌وه به‌ڕێز سه‌رۆك وه‌زیران، خۆشحاڵیى خۆى به سه‌ردانیان بۆ هه‌رێمى كوردستان ده‌ربڕى و سوپاسى ئه‌مه‌ریكا و كۆنگرێس و خه‌ڵكى ئه‌مه‌ریكى كرد كه هه‌ر له سه‌ره‌تاى ڕاپه‌ڕینه‌وه پشتگیرییان له هه‌رێمى كوردستان كردووه. ده‌رباره‌ى جه‌نگى دژى تیرۆریش، دووپاتى كرده‌وه ئه‌مڕۆ هه‌رێمى كوردستان له‌پێناو پاراستنى ئاشتى و دیموكراسى و پێكه‌وه‌ژیان، ڕووبه‌ڕووى هێزێكى دڕنده‌ى تاریك بووه‌ته‌وه. هه‌روه‌ها سوپاسى ئه‌مه‌ریكاى كرد كه هاوكاریى سه‌ربازیى پێشمه‌رگه ده‌كات و جه‌ختیشى له‌وه كرده‌وه كه پێشمه‌رگه پێویستى به هاوكارى و پشتگیریى زیاتره. ئاماژه‌ى به ڕه‌وشى ئاواره‌كانیش دا و داواى كرد ئه‌مه‌ریكا و كۆمه‌ڵگه‌ى نێوده‌وڵه‌تى ئاوڕى جددیتر و زیاتریان لێ بده‌نه‌وه و هاوكارییان بكه‌ن.
ده‌رباره‌ى به‌شداریى هه‌رێمى كوردستان له حكوومه‌تى نوێى عیراقدا، به‌ڕێز سه‌رۆك وه‌زیران دووپاتى كرده‌وه هه‌رێمى كوردستان خوازیارى ئه‌وه‌یه هه‌موو كێشه‌كانى له‌گه‌ڵ حكوومه‌تى عیراق چاره‌سه‌ر بكات و به بڕیارى به‌شداریكردنیشى له حكوومه‌تدا، ده‌رفه‌تێكى به سه‌رۆك وه‌زیران به‌ڕێز عه‌ببادى داوه بۆ چاره‌سه‌ركردنى كێشه‌كان. له كۆتاییى دیداره‌كه‌دا په‌یوه‌ندییه‌كانى هه‌رێمى كوردستان و ئه‌مه‌ریكا تاوتوێ كران و، هه‌ردوولا داكۆكییان له‌سه‌ر په‌ره‌پێدان و به‌رزكردنه‌وه‌ى زیاترى ئاستى په‌یوه‌ندییه‌كان كرده‌وه.
نوێنەرایەتیی هەرێمى کوردستان لە تاران بەشداریی لە ڕێوڕەسمی رۆژى جیهانى ئاشتیدا کرد کە لە لایەن مۆزەخانەى ئاشتى تاران بەرێوەچوو.
لەدواى بانگهێشتێکى فەرمى لە لایەن مۆزەخانەى ئاشتى تاران بەبۆنەى رۆژى جیهانى ئاشتى هەر یەک لە "سۆران عەلی ئەمین" بەرێوەبەریی پەیوەندییەکان و ڕاگەیاندنیی نوێنەرایەتیی هەرێمى کوردستان و "سەلام عارف روشدى" ئەندامی نوێنەرایەتیی هەرێمى کوردستان بەشداریان لە ڕێوڕەسمی رۆژى جیهانى ئاشتیدا کرد کە لە لایەن مۆزەخانەى ئاشتى تاران و بە ئامادەبوونی چەندین کەسایەتیی پایەبەرزیی ئێرانی لە هۆڵی مۆزەخانەى ئاشتى لە شاری تاران بەرێوەچوو.
لەم بەرنامەیەدا ژمارەیەک لە دیپلۆماتە بیانییەکان بەشداربوون لەگەڵ هەندێک بەرپرسی کۆمارى ئیسلامى ئێران لەوانە: دکتۆر "سەید محەمەد خاتەمى" سەرۆک کۆمارى پێشووى ئێران، "گری لۆییس" نوێنەریی نیشتەجێی و باڵیۆزی ڕێکخراوەی نەتەوە یەکگرتووەکان لە تاران، "ئەحمەد موحیت تەباتەبایی" جێگری سەرۆکی کۆمیتەی نەتەوەیی مۆزەخانەکانی ئێران، "محەمەد بەهەشتی" سەرۆکی کۆمیتەی نەتەوەیی مۆزەخانەکانی ئێران و چەندین کەسایەتیی دیکەی بیانی و ئێرانی.
لە سەرەتای ڕێوڕەسمی رۆژى جیهانى ئاشتیدا پەیامی بریندارانی کیمیایی و هەروەها "ئێستێر کیش لارووش" بەرپرسی نووسینگەی ناوچەیی یۆنسکۆ لە تاران خوێندرایەوە، پاشان "محەمەد ڕەجایی موقەدەم" بریکاریی ناوەندیی زانیارییەکانی ڕێکخراوەی نەتەوە یەکگرتووەکان لە تاران، پەیامى "بانکى مۆن" سکرتێرى گشتیی ڕێکخراوەی نەتەوە یەکگرتووەکان خوێندەوە.
لە درێژەی ئەم ڕێوڕەسمەدا دکتۆر "سەید محەمەد خاتەمى" سەرۆک کۆمارى پێشووى ئێران وتارێکی پێشکەش کرد و لە کۆتاییدا "گری لۆییس" نوێنەریی نیشتەجێی ڕێکخراوەی نەتەوە یەکگرتووەکان لە تاران چەند وتەیەکی پێشکەش کرد.
نێچیرڤان بارزانى پێشوازى له باڵیۆزى كۆریاى باشوور ده‌كات
دواى نیوه‌ڕۆى ئه‌مڕۆ 25ى ئه‌یلوولى 2014، به‌ڕێز نێچیرڤان بارزانى سه‌رۆك وه‌زیرانى هه‌رێمى كوردستان پێشوازى له باڵیۆزى كۆریاى باشوور له عیراق به‌ڕێز "چۆ جوونگ وۆن" كرد، كه یه‌كه‌م جاره دواى ده‌ستبه‌كاربوونى وه‌ك باڵیۆزى وڵاته‌كه‌ى له عیراق، سه‌ردانى هه‌رێمى كوردستان ده‌كات.
له دیدارێكدا باس له په‌یوه‌ندییه‌كانى هه‌رێمى كوردستان و كۆریاى باشوور كرا كه ده‌گه‌ڕێنه‌وه بۆ سه‌ره‌تاى هاتنى تیمى زه‌یتوونى سه‌ربازیى كۆرى بۆ هه‌ولێر، كاتێك ساڵى 2003 دواى ڕووخانى ڕژێمى به‌عس باره‌گایه‌كیان له هه‌ولێر كرده‌وه و له چه‌ندین بوارى جیاى ئاوه‌دانكردنه‌وه و خزمه‌تگوزاریدا، هاوكاریى هه‌رێمى كوردستانیان كرد و په‌یوه‌ندییه‌كى باشیان له‌گه‌ڵ حكوومه‌ت و خه‌ڵكى هه‌رێمى كوردستان دروست كرد، تاكوو بوونه پردێكى كاریگه‌رى نێوان هه‌ولێر و سیئۆل. هه‌روه‌ها هه‌ردوولا خواستى خۆیان بۆ پته‌وكردنى په‌یوه‌ندییه‌كان له هه‌موو بواره‌كاندا دووپات كرده‌وه.
له به‌شێكى دیكه‌ى دیداره‌كه‌دا باس له بارودۆخى ئێستاى سیاسى و سه‌ربازى و ئه‌منیى عیراق كرا و، تیشك خرایه سه‌ر شه‌ڕى دژى تیرۆرستانى داعش، هه‌روه‌ها ڕۆڵى پێشمه‌رگه له ڕووبه‌ڕووبوونه‌وه و شكاندنى تیرۆرستان تاوتوێ كرا و داكۆكى له پێویستیى هاو‌كاریكردنى پێشمه‌رگه و پڕچه‌ككردنى بۆ پاراستنى هه‌رێمى كوردستان كرایه‌وه.
بارودۆخى ئاوه‌ره‌كان له كوردستان به گشتى و به تایبه‌تى له سنوورى پارێزگاى دهۆك به‌شێكى دیكه‌ى دیداره‌كه بوو، كه تیایدا به‌ڕێز سه‌رۆك وه‌زیران دووپاتى كرده‌وه ڕه‌وشه‌كه كاره‌ساتاوییه و له تواناى حكوومه‌تى هه‌رێمى كوردستان به‌ده‌ره، بۆیه پێویستى به هاوكاریى عیراق و كۆمه‌ڵكه‌ى نێوده‌وڵه‌تى هه‌یه.
به‌ڕێز باڵیۆزى كۆریاش وێڕاى ده‌ستخۆشى له حكوومه‌تى هه‌رێمى كوردستان بۆ به‌هاناوه‌چوونى ئاواره‌كان، ڕایگه‌یاند كه له به‌غداش له‌گه‌ڵ به‌رپرسانى حكوومه‌تى عیراقى ئه‌م بابه‌ته باس ده‌كات و داوا ده‌كات هاوكاریى هه‌رێمى كوردستان بكرێت.
نێچیرڤان بارزانى پێشوازى له جێگرى سه‌رۆك وه‌زیرانى عیراق ده‌كات
ئێواره‌ى نیوه‌ڕۆى ئه‌مڕۆ 25ى ئه‌یلوولى 2014، به‌ڕێز نێچیرڤان بارزانى سه‌رۆك وه‌زیرانى هه‌رێمى كوردستان پێشوازى له به‌ڕێز ساڵح موتڵه‌گ جێگرى سه‌رۆك وه‌زیرانى عیراق و شاندێكى یاوه‌رى كرد.
له دیدارێكدا به‌ڕێز سه‌رۆك وه‌زیران خۆشحاڵیى خۆى به سه‌ردانیان بۆ هه‌رێمى كوردستان و هاتنى پێشتریان بۆ پارێزگاى دهۆك ده‌ربڕى و، دووپاتى كرده‌وه كه هاتنیان به تایبه‌تى بۆ ئه‌وه‌ى له نزیكه‌وه ڕه‌وشى ئاواره‌كان ببینن و به‌دواداچوون بۆ كێشه‌كانیان بكه‌ن، هه‌نگاوێكى گرنگ و مایه‌ى پێزانینه. جه‌ختیشى له‌وه كرده‌وه كه هه‌رێمى كوردستان ئه‌وه‌ى له توانایدا بووبێت، هاوكاریى ئاواره‌كانى كردووه و ده‌كات، به‌ڵام مه‌سه‌له‌كه پێویستیى به هاوكاریى حكوومه‌تى عیراق و كۆمه‌ڵگه‌ى نێوده‌وڵه‌تى هه‌یه و ده‌بێ عیراق زۆر به جددى ئه‌رك و به‌رپرسیاریه‌تیى خۆى له‌مباره‌یه‌وه جێبه‌جێ بكات.
لاى خۆیه‌وه به‌ڕێز ساڵح موتڵه‌گ جێگرى سه‌رۆك وه‌زیرانى عیراق، سوپاس و پێزانینى بۆ حكوومه‌ت و خه‌ڵكى هه‌رێمى كوردستان ده‌ربڕى كه باوه‌شیان بۆ ئاواره‌كان كردووه‌ته‌وه و هاوكارییان كردوون، جه‌ختیشى له‌وه كرده‌وه كه له نزیكه‌وه به‌دواداچوون بۆ ڕه‌وشى ئاواره‌كان ده‌كه‌ن و كارى به‌رده‌وام ده‌كه‌ن و هه‌وڵ ده‌ده‌ن به هه‌موو شێوه‌یه‌ك هاوكارییان بكه‌ن. له‌مباره‌یه‌شه‌وه ئاماژه‌ى به هه‌وڵه‌كانى داموده‌زگا په‌یوه‌نداره عیراقییه‌كان و هاوكارى و هه‌ماهه‌نگییان له‌گه‌ڵ ده‌زگا په‌یوه‌نداره‌كانى هه‌رێمى كوردستان كرد.
به‌ڕێز سه‌رۆك وه‌زیران دووپاتى كرده‌وه ده‌بێ كارێكى جددى بكرێت بۆ ئه‌وه‌ى ئاواره‌كان له سه‌رما و سۆڵه‌ى زستان بپارێزرێن و له‌و وه‌رزه‌دا تووشى نه‌خۆشى و په‌تا و كاره‌ساتى گه‌وره‌تر نه‌بنه‌وه، بۆیه داواى كرد هه‌م حكوومه‌تى عیراق خۆى كارێكى جددى بۆ هاوكارییان بكات، هه‌م داموده‌زگاكانى نه‌ته‌وه یه‌كگرتووه‌كان و كۆمه‌ڵگه‌ى نێوده‌وڵه‌تیش هان بدات كه زیاتر هاوكاریى ئاواره‌كان بكه‌ن، به تایبه‌تیش له پارێزگاى دهۆك كه زیاتر له 50%ى ڕێژه‌ى هه‌موو ئاواره‌كانى عیراق له وێیه.
له به‌شێكى دیكه‌ى دیداره‌كه‌دا، تیشك خرایه سه‌ر پێكهێنانى كابینه‌ى نوێى حكوومه‌تى عیراق و به‌شداریى كورد له حكوومه‌تى به‌ڕێز عیبادیدا و، به‌ڕێز نێچیرڤان بارزانى دووپاتى كرده‌وه كه هه‌رێمى كوردستان ده‌یه‌وێت هه‌موو لایه‌نه به‌شداره‌كانى حكوومه‌تى هه‌رێمى كوردستان، به‌شدارى له حكوومه‌تى عیراقدا بكه‌ن. له دیداره‌كه‌دا هه‌روه‌ها ڕه‌وشى سه‌ربازى و ئه‌منى و ڕووبه‌ڕووبوونه‌وه‌ى تیرۆستانى داعش، تاوتوێ كرا.
شاندی هەرێمی کوردستان لە چوارچێوەی شاندی عێراق بەشداری لە کۆبوونەوەی ساڵانەی نەتەوە یەکگرتووەکان و لوتکەی ژینگە لە نیویۆرک کرد
رۆژي چوار شەممە 24/9/2014 شاندي هەرێمي کوردستان کە پێهاتووە لە دکتۆر فوئاد حسێن سەرۆکي ديواني سەرۆکايەتي هەرێمي کوردستان و فەلاح مستەفا بەرپرسي پەيوەنديەکاني دەرەوەي حکومەتي هەرێم لە چوارچێوەي شاندي عێراق بەشداريان کرد لە 69يەمين کۆبوونەوەي ساڵانەي کۆمەڵەي گشتي نەتەوە يەکگرتووەکان لە نيويۆرک.
لە کۆبوونەوەکەدا کە ووڵاتاني ئەندام لە نەتەوە يەکگرتووەکان تيايدا بەشدارن، سکرتێري گشتي نەتەوە يەکگرتووەکان و سەرۆکي ووڵاتاني بەشدار ووتاري خۆيان پێشکەش دەکەن و تيايدا باس لە بارودۆخ و پرسە گرينگەکاني جيهان دەکرێت. هاوکات لە پەراوێزي ئەم کۆبوونەوەيەدا چەندين کۆبوونەوەي لاوەکي لەنێوان سەرۆک و بەرپرساني باڵاي ووڵاتاني جيهان ئەنجام دەدرێت.
ئەوەي گرينگە ئەوەيە کە کۆبوونەوەکەي ئەمساڵي کۆمەڵەي گشتي نەتەوە يەکگرتووەکان لە کاتێکدايە کە هاوپەيمانيەکي نێودەوڵەتي بۆ رووبەڕووبوونەوەي مەترسيەکاني گرووپي تيرۆرستي داعش لە ناوچەکە پێکهاتووە کە گرينگي تايبەتي بۆ هەرێمي کوردستان و عێراق و ناوچەکە هەيە. ئەمەش وێڕاي قەيراني سوريا و ئۆکرانياو نەخۆشي ئيبۆلا.
هەروەها بەشداري شاندي هەرێم لەو کۆبوونەوەيەدا لەچوارچێوەي شاندي عێراق گرنگي خۆي هەيە بۆ ئەنجامداني ديدار لەگەڵ بەرپرساني باڵاي ووڵاتاني جيهان بۆ پەرەپێداني پەيوەنديەکان و گەياندني پەيامي هەرێم و بۆ بەدەستهێناني پشتيواني و هاوکاري. ئەمەش وێڕاي ديدارو کۆبوونەوە لەگەڵ بەرپرساني باڵاي نەتەوە يەکگرتووەکان و ئاژانسەکاني سەر بەو رێکخراوە.
لە لايەکي ديکەوەو رۆژي سێ شەممە 23/9/2014 شاندي هەرێمي کوردستان بەشداريان کرد لە کۆبوونەوەي لوتکەي ژينگە لە نيويۆرک، کە تيايدا ژمارەيەکي بەرچاو وەزيراني دەرەوەي ووڵاتان و بەرپرساني ئاژانسەکاني نەتەوە يەکگرتووەکان ئامادەي بوون.
لە کۆبوونەوەکەدا گفتوگۆ کرا دەربارەي ئەو هەڕەشەو مەترسيانەي کە کەوتووەتە سەر ژينگە، کەمکردنەوەي ئەو هەڕەشەو مەترسيانەش وەک ئەرکێکي گرينگي کۆمەڵگەي نێودەوڵەتي باسي لێوەکرا. بۆ ئەم مەبەستەش سوود وەرگرتن لە تەکنەلۆژياي پێشکەوتوو وەک يەکێک لە چارەسەرەکان گفتوگۆي لەبارەوە کرا. هاوکات هەماهەنگي بەردەوامي نێوان ووڵاتاني جيهان بۆ رووبەڕووبوونەوەي مەترسيەکان وەک ئەرکێکي نێودەوڵەتي باسي لێوە کرا.
جێگەي باسە شاندي هەرێمي کوردستان کە نزيکەي دوو هەفتەيە گەيشتووەتە ئەمريکا بۆ ئەنجامداني ديدارو کۆبوونەوە لەگەڵ بەرپرساني ئيدارەو کۆنگريسمان و سيناتۆرەکاني ئەو ووڵاتە بە مەبەستي بە دەستهێناني پشتيواني و هاوکاري مرۆيي و سەربازي زياتر بۆ هەرێمي کوردستان، لە ئێستاشدا شاندي هەرێم لە چوارچێوەي شاندي عێراقي بۆ ئامادەبوون بەشداري کردن لە 69يەمين کۆبوونەوەي ساڵانەي کۆمەڵەي گشتي نەتەوە يەکگرتووەکان لە ويلايەتي نيويۆرک لە ئەمريکان و بڕياريش وايە لە پەراوێزي ئەم بەشداري کردنەدا چەندين کۆبوونەوەي ديکە لەگەڵ بەرپرساني باڵاي ووڵاتان و ئاژانسەکاني نەتەوە يەکگرتووەکان بۆ هەمان مەبەست ئەنجام بدەن.
سەرۆكی هەرێمی كوردستان پێشوازی لە پێشمەرگە و فەرماندەی قارەمان قاسم سمێر دەكات
ئەمڕۆ هەینی 26ـی ئەیلوولی 2014 بەڕێز مەسعود بارزانی پێشوازی لە پێشمەرگە و فەرماندەی قارەمانی شنگال قاسم سمێر كرد.
لە دیدارێكدا سەرۆك بارزانی ستاییشی ڕۆڵ و قارەمانێتیی قاسم سمێر و ئەو پێشمەرگانە كرد كە لە چیای شنگال قارەمانانە بەرگرییان لە خەڵكی شنگال كرد و ڕێگەیان نەدا دەستی گڵاوی تیرۆریستان بگاتە چیای شنگال. سەرۆك بارزانی دەستخۆشی لە قاسم سمێر كرد كە لەدوای داگیربوونی شنگال لە لایەن تیرۆریستانی داعشەوە توانیویانە گورزی كوشندە لە دەڤەری شنگال و دەورووبەری چیای شنگال لە تیرۆریستانی داعش بوەشێنن. سەرۆك بارزانی قاسم سمێر و هەڤالانی وەك پێشمەرگەی قارەمان وەسف كرد كە مایەی ئومێدی گەلی كوردستانن و دووپاتیشی كردەوە كە پشت بە خوای گەورە و خوڕاگری و دلێریی پێشمەرگە قارەمانەكان تیرۆریستانی داعش لە هەموو بستێكی خاكی كوردستان دەردەكرێن و لەناودەبردرێن.
هەر لەم دیدارە پێشمەرگە و فەرماندەی دلێری شنگال قاسم سمێر ورەی پێشمەرگەی لە چیای شنگال و دەرووبەری بە بەرز وەسف كرد و دۆخی مەیدانیی بەرەكانی لە دەڤەری شنگال خستەڕوو و ڕایگەیاند كە چاوەڕوانی فەرمانی سەرۆك بارزانین بۆ تێكشكاندن و وەدەرنانی تیرۆریستان لە شنگال.
سەرۆكی هەرێمی كوردستان پێشوازی لە جێگری سەرۆك وەزیرانی عێراق دەكات
ئەمڕۆ هەینی 26ـی ئەیلوولی 2014 بەڕێز مەسعود بارزانی سەرۆكی هەرێمی كوردستان پێشوازی لە ساڵح موتلەك جێگری سەرۆك وەزیرانی عێراق كرد.
لە دیدارێكدا دوایین پێشهاتە سیاسی و ئەمنییەكانی عێراق و هەروەها چۆنییەتی سەرخستنی پڕۆسەی سیاسی و پێكهێنانی حكوومەتی تازەی عێراقی تاوتوێ كرا. لەم كۆبوونەوەیە هەردوولا جەختیان لە پێویستیی بوونی هەماهەنگیی نێوان لایەنە سیاسییە عێراقییەكان كردەوە بۆ ئەوەی حكوومەتی تازە بتوانێت قەیرانەكان چارەسەر بكات و ڕووبەڕووی هەڕەشەی تیرۆریستانیش ببێتەوە.
هەر لەم كۆبوونەوەیەدا بارودۆخی ئاوارەكان خرایە بەر باس و جێگری سەرۆك وەزیرانی عێراق هەنگاوەكانی حكوومەتی عێراقی بۆ یارمەتیدانی ئاوارەكان بۆ سەرۆك بارزانی خستەڕوو و ئەوەیش دووپات كرایەوە كە چارەسەری سەرەكیی كێشەی ئاوارەكان گەڕانەوەیانە بۆ سەر ماڵ و حاڵی خۆیان و هەروەها پاراستنیان لە هەڕەشەی تیرۆریستان و پێویستیشە كە پلانی پێویست بۆ ئاوەدانكردنەوەی ئەو ناوچانە هەبێت كە بەهۆی پەلاماری تیرۆریستانی داعش تێكدراون.
سه‌رۆكی هه‌رێمی كوردستان پێشوازی له وه‌زیری به‌رگری ئه‌ڵمانیا و شاندی یاوه‌ری ده‌كات
ئه‌مڕۆ پێنج شه‌ممه 25/9/2014 له شاری هه‌ولێر به‌ڕێز مسعود بارزانی سه‌رۆكی هه‌رێمی كوردستان پێشوازی له ئورسولا فۆن دێر لایێن وه‌زیری به‌رگری ئه‌ڵمانیا و شاندێكی یاوه‌ری كرد كە پێكهاتبوون لە باڵیۆزی ئەڵمانیا لە عێراق و ژمارەیەك ڕاوێژكاری سەربازیی وەزارەتی بەرگریی ئەڵمانیا.
له دیدارێكدا كە مەسرور بارزانی ڕاوێژكاری ئەنجوومەنی ئاساییشی هەرێمی كوردستان و مستەفا سەید قادر وەزیری پێشمەرگە و شێخ جەعفەر شێخ مستەفا و فەریق شێروان عەبدولرەحمان و جەبار یاوەر ئەندامانی فەرماندەیی گشتیی هێزەكانی پاراستنی هەرێمی كوردستان و دڵشاد بارزانی نوێنەری حكوومەتی هەرێم لە ئەڵمانیا و سەفین دزەیی گوتەبێژی جكوومەتی هەرێمی كوردستان ئامادەی بوون، سه‌رۆك بارزانی به گه‌رمی به‌خێرهاتنی وه‌زیری به‌رگریی ئه‌ڵمانیا و شاندی یاوه‌ری كرد و سوپاسی حكوومه‌ت و گه‌لی ئه‌ڵمانیای كرد، كه له كاتی ته‌نگانه‌دا پشتگیرییان له گه‌لی كوردستان كرد و ئاماژه‌ی به بڕیاره‌كه‌ی حكوومه‌تی ئه‌ڵمانیا دا بۆ پشتگیری كردن له گه‌لی كوردستان، كه هه‌رچه‌نده بڕیارێكی ئاسان نه‌بوو، به‌ڵام جێگه‌ی پێزانینه و وایكرد كوردستان پشتئه‌ستوور بێت به‌وه‌ی دۆستێكی مەزنی وه‌كو ئه‌ڵمانیای هه‌یه.
هه‌ر له دیداره‌كه‌دا سه‌رۆك بارزانی باسی له‌وه كرد، كه جێگه‌ی شانازییه ئه‌مڕۆ گه‌لی كوردستان و هێزه‌كانی پێشمه‌رگه له جیاتی جیهان شه‌ڕی ده‌وڵه‌تێكی تیرۆریستیی پڕچه‌ك ده‌كات كە چەكی دوو دەوڵەتی كەوتووەتە دەست و ئاماژه‌ی به‌وەیشدا، كه تیرۆریستان به ته‌نها هه‌ڕه‌شه نین بۆ سه‌ر كوردستان، به‌ڵكو هه‌ڕه‌شه‌ن بۆ سه‌ر هه‌موو جیهان بۆیە له‌ناوبردنی تیرۆریستانی داعش و ڕیشەكێشكردنیان پێویستی به هه‌وڵێكی هاوبه‌شی نێوده‌وڵه‌تی هه‌یه.
له درێژه‌ی قسه‌كه‌یدا سه‌رۆك بارزانی باسی له خۆراگری و سه‌ركه‌وتنه‌كانی پێشمه‌رگه كرد و ئه‌وه‌ی خسته‌ڕوو، كه پێشمه‌رگه توانی كوردستان بپارێزێ و پارێزگاریشی له ژیانی زیاتر له یه‌ك ملیۆن ئاواره له پێكهاته ئاینی و نه‌ته‌وەیی و ئیتنیه جیاجیاكان بكات، كه له ترسی هه‌ڕه‌شه‌كان په‌نایان بۆ كوردستان هێناوه.
سەرۆك بارزانی لە درێژەی قسەكانیدا باسی له دۆخی مه‌یدانیی بەرەكانی جەنگی دژی تیرۆریستان كرد و ئاماژه‌ی به‌وه‌دا، ئێستا ده‌ستپێشخه‌ری له‌ده‌ستی پێشمه‌رگه‌یه و هێزەكانی پێشمه‌رگه بۆ تێكشكاندنی تیرۆریستان كەوتوونەتە قۆناغی هێرشبردن. هه‌ر له‌و دیداره‌دا سه‌رۆك بارزانی بە وردی شاندی میوانی له بارودۆخی ناله‌باری ئاواره‌كان و پێداویستییه سه‌ره‌تاییه‌كانی كرد و جەختی له‌وه كرده‌وه، كه چاره‌سه‌ری بنه‌ڕه‌تیی كێشەی ئاوارەكان ئه‌وه‌یه كە بگه‌ڕێنه‌وه شوێنەكانی خۆیان و بشپارێزرێن. سەرۆك بارزانی هێمایشی بەوەدا كە حكوومەتی هەرێمی كوردستان بە هەموو توانایەكیەوە یارمەتیی ئاوارەكانی داوە بەڵام ژمارەی ئاوارەكان و ئاستی كارەساتەكە لە تواناكانی هەرێم تێپەڕیوە.
له‌به‌رامبه‌ردا ئورسولا فۆن دێرلایێن وه‌زیری به‌رگری ئه‌ڵمانیا سوپاسی سه‌رۆكی هه‌رێمی كوردستانی كرد بۆ ئه‌و پێشوازییه گه‌رمه‌ی لێیان كرا و ئاماژه‌ی به‌وه‌دا ئه‌ڵمانیا به بایه‌خه‌وه سه‌یری خۆڕاگری پێشمه‌رگه و پاراستنی ئه‌و ژماره زۆره‌ی ئاواره‌كان ده‌كات و جه‌ختی له‌وه كرده‌وه ئه‌ڵمانیا به‌رده‌وام ده‌بێت له یارمه‌تییه مرۆییه‌كان و پڕچه‌ككردن و راهێنانی هێزه‌كانی پێشمه‌رگه. له به‌شێكی دیكه‌ی قسه‌كانیدا وه‌زیری به‌رگری ئه‌ڵمانیا باسی له‌وه كرد، كه ئه‌وان باش ده‌زانن كوردستان له‌جیاتی جیهان شه‌ڕی تیرۆریستان ده‌كات، بۆیه ئەڵمانیا بڕیاری هاوكاری و پاڵپشتیكردنی كوردستانی داوە.
هه‌روه‌ها وه‌زیری به‌رگری ئه‌ڵمانیا له درێژه‌ی قسه‌كه‌یدا باسی له مرۆڤدۆستی گه‌لی كورد كرد و گوتی: گەلی كوردستان له‌ناوچه‌كه‌دا پێشەنگی پێكه‌وه‌ژیان و لێبورده‌ییه و ئه‌مه‌ش جێگه‌ی ڕێز و پێزانینی كۆمه‌ڵگه‌ی نێوده‌وڵه‌تییه.
هه‌ر له‌و كۆبوونه‌وه‌یه‌دا مسته‌فا سه‌ید قادر وه‌زیری پێشمه‌رگه‌ی حكوومه‌تی هه‌رێمی كوردستان لە گوتەیەكیدا تیشكی خستە سەر ئەو هاوكارییانەی دەوڵەتانی دۆست پێشكەشی هێزی پێشمەرگەیان كردووە و پێداویستیه‌كانی هێزی پێشمه‌رگه و وردەكاریی تەكنیكی و بارودۆخی مه‌یدانیی به‌ره‌كانی شه‌ڕی بۆ ئاماده‌بووانی كۆبوونه‌وه‌كه شیكرده‌وه.
پڕۆسه‌ی سیاسی عێراق و پێكهێنانی حكوومەتی تازە ته‌وه‌رێكی دیكه‌ی ئەم كۆبوونەوەیە بوو.
شایانی باسە دوای تەواوبوونی كۆبوونه‌وه‌كه سه‌رۆكی هه‌رێمی كوردستان و وه‌زیری به‌رگری ئه‌ڵمانیا له كۆنگره‌یه‌كی رۆژنامه‌نووسیی هاوبه‌شدا ناوه‌ڕۆكی كۆبوونه‌وه‌كه‌یان بۆ رۆژنامه‌نووسان خسته‌ڕوو.
سەرۆكی هەرێمی كوردستان پێشوازی لە باڵیۆزی بریتانیا لە عێراق دەكات
ئەمڕۆ سێشەممە 23ـی ئەیلوولی 2014 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە فرانك بێكەر باڵیۆزی بریتانیا لە عێراق و شاندێكی یاوەری كرد.
لە دیدارێكدا سەركەوتنەكانی پێشمەرگە بەسەر تیرۆریستان و هەنگاوەكانی هێزە هاوپەیمانەكان و وەشاندنی گورزە ئاسمانییەكان لە دژی تیرۆریستانی داعش لە ناو خاكی سووریا خرایە بەر باس و جەخت لەوە كرایەوە كە پێویستە هیچ پەناگەیەكی ئارام لە سووریا و عێراق بۆ تیرۆریستانی داعش نەمێنێت.
پەیوەست بە دژایەتیكردنی تیرۆریستان هەردوولا لەسەر ئەوە هاوڕابوون كە هاوكات لەگەڵ سەركەوتنی سەربازی بەسەر تیرۆریستان پێویستە لەڕووی سیاسیشەوە لەناوخۆی عێراق و هەروەها لەگەڵ وڵاتانی ناوچەكە كاری جدی بكرێت بۆ نەهێشتن و لەناوبردنی تیرۆریستانی داعش.
بارودۆخی هێزەكانی پێشمەرگە لە بەرەكانی ڕووبەڕووبوونەوەی تیرۆر تەوەرێكی دیكەی ئەم دانیشتنە بوو و تێیدا سەرۆك بارزانی ئاماژەی بەوەدا كە دەستپێشخەری لەدەستی هێزی پێشمەرگە دایە و تیرۆریستان لە دۆخی بەرگری و پاشەكشە دان. سەرۆك بارزانی ئەوەیشی دووپات كردەوە كە ئەو خەڵكانەی هاوكاریی داعشیان كردووە و بەشداربوونە لە كوشتن و بڕین و تاڵان و دەستدرێژی بۆ سەر خەڵك دەبێ بە توندی سزا بدرێن و تاوانباران لەو كەسانە جیا بكرێنەوە كە لەگەڵ تیرۆریستاندا هاودەست نەبوونە. لەبارەی دۆخی ئاوارەكانیش سەرۆك بارزانی جەختی لەوە كردەوە كە پێویستە خەڵكی ئاوارە بگەڕێندرێنەوە شوێنەكانی خۆیان و لە هەڕەشەی تیرۆریستانیش بپارێزرێن.
More...
سەرۆكی هەرێمی كوردستان پێشوازی لە جێگری سەرۆك كۆماری عێراق دەكات
سەرۆكی هەرێمی كوردستان پێشوازی لە باڵیۆزی كۆریای باشوور لە عێراق دەكات
سەرۆكی هەرێمی كوردستان پێشوازی لە سەرۆكی ئەنجوومەنی باڵای ئیسلامیی عێراق دەكات
نێچیرڤان بارزانی:باشترین شێوه، پێكه‌وه‌ژیانی ئاره‌زوومه‌ندانه‌یه
دوایین هەواڵەکان
- پهيامى سه‌رۆك نێچيرڤان بارزانى بۆ ساڵى نوێ
- پەیامی سەرۆکی حکومەتی هەرێمی کوردستان بە بۆنەی سەری ساڵی نوێی زایینی2025
- سه‌رۆكى هه‌رێمى كوردستان، پێشوازيى له كونسوڵی گشتيى نوێى ئێران كرد
- عەباس غەزالی: کۆچی مامۆستا مهنسوور یاقووتی وهک لهدهست چونی یاقووتێکی گرانبههایه
- سهرۆک نێچیرڤان بارزانی له‌گه‌ڵ وه‌زیری به‌رگریی هۆڵهندا کۆبووهوه
- سه‌رۆك نێچيرڤان بارزانى پێشوازيى له ئيسماعيل بهشيكچى كرد
- سه‌رۆك نێچيرڤان بارزانى و وه‌زيرى بهرگريى ئيتاڵيا كۆبوونهوه
- سه‌رۆك نێچيرڤان بارزانى له‌گه‌ڵ فەرماندەی هێزەکانی هاوپەیمانيی نێودەوڵەتی كۆبووهوه
- سه‌رۆك نێچيرڤان بارزانى پێشوازیی له باڵيۆزى نوێى چيك كرد
- سەرۆک نێچیرڤان بارزانی پێشوازیی لە سوپاسالاری بەریتانیا کرد