سه‌رۆك نێچيرڤان بارزانى جه‌خت له سه‌ربه‌خۆييى ده‌سه‌ڵاتى دادوه‌رى ده‌كاته‌وه
نيوه‌ڕۆى ئه‌مڕۆ يه‌كشه‌ممه 2023/8/27 به‌ڕێز نێچيرڤان بارزانى، سه‌رۆكى هه‌رێمى كوردستان له ڕێوڕه‌سمێكدا پێشوازى له (60) ده‌رچووى په‌يمانگه‌ى دادوه‌رى كرد كه (45)يان وه‌ك دادوه‌ر و (15)يان وه‌ك جێگرى داواكارى گشتى سوێندى ياساييان خوادووه و ده‌ستبه‌كار ده‌بن. له‌و ژماره‌يه (24)يان ئافره‌تن و به‌سه‌ر ناوچه‌كانى هەولێر و سلێمانی و دهۆك و گەرمیاندا دابه‌ش ده‌بن.
له ڕێوڕه‌سمه‌كه‌دا كه به‌ڕێزان سه‌رۆك و ئه‌ندامانى ئه‌نجومه‌نى دادوه‌رى، ئه‌ندامانى داواكارى گشتى، وه‌زيرى داد و ژماره‌يه‌ك له به‌رپرسانى سه‌رۆكايه‌تيى هه‌رێمى كوردستان ئاماده‌ى بوون، سه‌رۆك نێچيرڤان بارزانى وته‌يه‌كى پێشكه‌ش كرد. ئه‌مه ده‌قه‌كه‌يه‌تى:
به‌ڕێزان سه‌رۆك و ئه‌ندامانى ئه‌نجومه‌نى دادوه‌رى،
دادوه‌ران،
ئه‌ندامانى داواكارى گشتى،
جەنابی وەزیر،
ئاماده‌بووانى به‌ڕێز،
ڕۆژتان باش..
هەموولایەكتان بە خێر بێن..
زۆر خۆشحاڵم كه ئه‌مڕۆ پێكه‌وه به‌شدارى له ڕێوڕه‌سمى ده‌ستبه‌كاربوونى (60) ده‌رچووى به‌ڕێزى خولى چواره‌مى په‌يمانگه‌ى دادوه‌ران ده‌كه‌ين كه (45) دادوه‌ر و (15) جێگرى داواكارى گشتين. جێى خۆشحاڵييه‌كى زۆره كه لەنا‌و ئەو ژماره‌يه، بيست و چوار خانمى به‌ڕێزن و به‌سه‌ر ناوچه‌كانى هه‌ولێر، سلێمانى، دهۆك و گه‌رمياندا دابه‌ش بوون. به گه‌رمى ده‌ستخۆشى و پيرۆزباييتان لێ ده‌كه‌م.
بوون به دادوه‌ر، ئه‌ركێكى سه‌خته و به‌رپرسياريه‌تييه‌كى گه‌وره‌يه به‌رامبه‌ر به خوا و بەرامبەر بە ويژدان و بەرامبەر بە كۆمه‌ڵگه و بەرامبەر بە مرۆڤايه‌تى. به ڕاستى ئێوه پيشه‌يه‌كى قورستان هه‌ڵبژاردووه، هيواى سه‌ركه‌وتنتان بۆ ده‌خوازم لەم ڕێگە سەختەی كە هەڵتانبژاردووە و خوای گەورە سه‌رفرازتان بكات و سەركەوتوو بن.
پاش ئه‌وه‌ى په‌يمانگاى دادوه‌ريتان سه‌ركه‌وتووانه ته‌واو كرد، ئێوه‌ى به‌ڕێز چ وه‌ك دادوه‌ر، چ وه‌ك جێگرانی داواكارى گشتى، كه سوێندى ياساييتان خوارد و ده‌ستبه‌كار ده‌بن، ئه‌مه بۆ هه‌رێمى كوردستان ڕووداوێكى گرنگ و جێى بايه‌خێكى به‌رچاوه. ئێوه ڕاسته‌وخۆ سه‌روكارتان له‌گه‌ڵ هاووڵاتييان و داوا و مافه‌كانيانه. ئێوه پارێزه‌رى مافه‌كانى هه‌موو چين و توێژه‌كانى كۆمه‌ڵگا و ماف و موڵك و به‌رژه‌وه‌نديى گشتين.
به‌ڕێزان..
دادوه‌رى، بنه‌ماى حوكمڕانييه لە هەر وڵاتێك. پارێزه‌رى كۆمه‌ڵگه و پارێزەری سيستمى سياسييه لە هەر وڵاتێك. بۆ كۆمه‌ڵگا پێشكه‌وتووه‌‌كانى دنيا، سه‌ربه‌خۆييى دادوه‌رى، سه‌روه‌ريى ياسا، هه‌بوونى متمانه به ده‌سه‌ڵاتى دادوه‌رى، پێويستييه‌كى له‌پێشينه و ژیرانەیە. بنه‌ماى پێشكه‌وتنى سياسى و ئابوورى و كۆمه‌ڵاتييه.
ئه‌ى ده‌بێ بۆ كۆمه‌ڵگه‌يه‌كى وه‌ك كوردستان چه‌نده له‌پێش و گرنگ و پێويست بێت كه له قۆناغى ڕاگوزه‌ردايه و كوردستان ده‌يه‌وێ ئه‌و سيستمه ديموكراسييه به‌هێزتر بكات كه دايمه‌زراندووه؟
دڵنيام هه‌مووتان وته و ڕوانينى وينستۆن چه‌رچل سه‌رۆك وه‌زيرانى به‌ريتانيا و شارل دوگۆل سه‌رۆكى فه‌رنسا له سه‌رده‌مى شه‌ڕى دووه‌مى جيهانيدا ده‌زانن. كاتێك له گه‌رمه‌ى شه‌ڕدا خه‌ريكبوو له‌نده‌ن له‌ژێر ئاگرى بۆمببارانى نازييه‌كاندا وێران ده‌بوو، چه‌رچل له وه‌زيرى داد ده‌پرسێت: دۆخى دادوه‌رى چۆنه؟ كه وه‌زير له وه‌ڵامدا ده‌ڵێ: باشه!
چه‌رچل وته ناوداره‌كه‌ى خۆی دەڵێت كە ئەویش: كه‌واته مه‌ترسن، به‌ريتانيا سه‌لامه‌ته.
هه‌روه‌ها دواى ڕزگاركردنى فه‌ره‌نسا له داگيركاريى نازييه‌كان، كه سه‌رۆك دوگۆل گه‌ڕايه‌وه پاريس، پرسيار له هاوڕێيه‌كى ده‌كات: دۆخى دادوه‌رى و داگاكان له وڵات چۆنه؟ وه‌ڵامى ده‌داته‌وه: هێشتا باشه.
ئينجا دوگول ده‌ڵێ: كه‌واته ده‌توانين سه‌رله‌نوێ فه‌ره‌نسا بنيات بنێينه‌وه!
له كۆمه‌ڵگا پێشكه‌وتووه‌كاندا، ئاوا له دادوه‌رى ده‌ڕوانن، بۆيه بێگومان بۆ ئێمه له هه‌رێمى كوردستان، سه‌ربه‌خۆييى ده‌سه‌ڵاتى دادوه‌رى و سه‌روه‌ريى ياسا، كۆڵه‌گه‌يه‌كى سه‌ره‌كيى حوكمڕانييه‌كى دروست و سه‌ركه‌وتووه لە وڵاتدا. بۆ ئه‌وه‌ى هاووڵاتى بڕوا و متمانه‌ى به ده‌سه‌ڵاتى دادوه‌رى، به ياسا و دادگا هه‌بێت، ده‌بێ دڵنيا بێت له‌وه‌ى مافه‌كانى ده‌پارێزرێن.
بۆ ئه‌وه‌ى ده‌سه‌ڵاتى دادوه‌رى، ياسا و دادپه‌روه‌رى جێبه‌جێ بكات، بۆ ئه‌وه‌ى به ڕاستى جێى متمانه و پارێزه‌رى مافى هه‌مووان بێت، ڕۆڵى دروستى خۆى له بنياتنانى كۆمه‌ڵگه‌يه‌كى ئاسووده‌ى مه‌ده‌نى و به‌دامه‌زراوه‌ييكردنى حوكمڕانيدا بگێڕێت، له كاتى لێكۆڵينه‌وه و بڕيارداندا، ده‌بێ به ته‌واوەتى بێلايه‌ن و دادپه‌روه‌رانه، ئازاد و سه‌ربه‌خۆ بن.
ئه‌وه ئه‌رك و به‌رپرسيارييه‌كى مه‌زنه، له ئه‌ستۆى دادوه‌ران، له ئه‌ستۆى ئێوەی بەڕێز و خۆشەویستدا. ئێوه له‌به‌رده‌م خودا و ويژدان و مرۆڤايه‌تيدا ئه‌و به‌رپرسياريه‌تييه هه‌ڵده‌گرن. ئێوه ده‌بێ له ئاستى ئه‌و ئه‌رك و په‌رپرسياريه‌تييه‌دا بن.
به‌ڕێزان..
ياسا ده‌سه‌ڵاتى به دادوه‌ر داوه كه ئازاد بێت. ئه‌وه ئه‌ركى ده‌سه‌ڵاتى دادوه‌رى و دادوه‌رانه سه‌ربه‌خۆييى خۆيان بپارێزن. ئه‌ركى دادوه‌ره ده‌بێ خۆى قبووڵى نه‌كات و ڕازى نه‌بێت هيچ كه‌س و لايه‌ن و ده‌سه‌ڵاتێك، هيچ شتێكى به‌سه‌ریاندا بسه‌پێنن.
هاووڵاتى كاتێك شه‌و به ئاسووده‌يى سه‌ر ده‌نێته‌وه، كاتێك متمانه‌ى به ياسا و وابه‌سته‌يى به وڵات و نيشتمانه‌وه هه‌يه كه دڵنيا بێت له‌وه‌ى دادوه‌رى، دادگا و دادوه‌ران سه‌ربه‌خۆن. دڵنيا بێت له‌وه‌ى ئه‌گه‌ر ڕۆژێك مافى پێشێل كرا، ياسايه‌كى سه‌روه‌رە له سه‌رووى هه‌مووانه‌وه‌يه، به‌رگرى و پارێزگارى لێ ده‌كات. ماف و شكۆى بۆ ده‌گه‌ڕێنێته‌وه. ئه‌گه‌ر هاووڵاتى ئه‌و بڕوا و متمانه‌يه‌ى نه‌بوو، دڵنيا بن، هيچ شتێكى ديكه ڕاسته‌ڕێ نابێت.
بۆيه به‌ڕێزان، هه‌موو پشتگيرييه‌كتان لە سه‌رۆكايه‌تيى هه‌رێمى كوردستان و دامه‌زراوه‌كانى وڵات و لايه‌نه په‌يوه‌نديداره‌كان هه‌يه.
بێگومان، نه‌مانگوتووه و ناڵێين له هه‌رێمى كوردستان هيچ كێشه‌يه‌ك له‌به‌رده‌م سه‌ربه‌خۆييى دادوه‌رى و سه‌روه‌ريى ياسادا نييه! ناڵێين هه‌موو شتێكى ده‌سه‌ڵاتى دادوه‌رى دروسته و له‌ژێر هيچ گوشارێكى سياسيدا نييه!
كێشه و ته‌حه‌ديى جددى له‌به‌رده‌م ده‌سه‌ڵاتى دادوه‌ری هه‌يه كه پێويستى به چاككردنەوە و چاكسازييه. به‌ڵام ئەوەی كە گرنگە، دڵنياتان ده‌كه‌مه‌وه، ئێمه ئيراده‌يه‌كى جدديمان هه‌يه، سوورين و به‌رده‌وام له كار و هه‌وڵداين بۆ چاككردنى. ئێوه‌ش لاى خۆتانه‌وه هه‌نگاو به هه‌نگاو، ده‌توانن گرفته‌كان نه‌هێڵن.
ده‌توانن ياسا سه‌روه‌ر بكه‌ن و ڕێگه نه‌ده‌ن ده‌ستێوه‌ردان له ئه‌رك و بڕياره‌كانتاندا بكرێت كە بە دڵنیاییەوە دەیڵێم دەسەڵاتی دادوەری ئەو ڕێكچكەیەی گرتووە و لەسەر ئەوە دەڕوات و بەردەوام دەبێت. لەگەڵ ئەوەی كە دەزانین كێشەكان زۆرن، لەگەڵ ئەوەی كە دەزانین كێشەكان ئاسان نین، بەڵام ئەوە وەك ئامانجێك دەستنیشان كراوە و دادوەرەكان لەسەری دەڕۆن.
به‌ڕێزان..
گرنگه به‌رده‌وام تواناكانتان پێشبخه‌ن. له دادوه‌ريدا ڕه‌چاوى مافه‌كانى مرۆڤ و پێوه‌ره نێوده‌وڵه‌تييه‌كان بكه‌ن، خولى شياندن و به‌هێزكردن له هه‌موو بواره‌كاندا ببينن، ئه‌وپه‌ڕى سوود له ته‌كنه‌لۆژيا وه‌ربگرن، په‌يوه‌ندى و هاوكاريى به‌رده‌وامتان له‌گه‌ڵ ده‌سه‌ڵاته‌كانى ديكه‌ى هه‌رێمى كوردستان و دامه‌زراوه‌كانى دادوه‌ريدا له عێراق و لە جيهاندا هه‌بێت.
کاتی خۆی كه یاسای پەیمانگای دادوەران ئامادە کرا، کۆمەڵێک ئامانجمان هەبوو، لەوانە: پێگەیاندنی دادوەر و ئەندامانی داواکاری گشتی و پەرەپێدانی ئاستی زانستی و مەعریفییان، تا دەسەڵاتی دادوەری هەم لەڕووی دامەزراوەیی، هەم لەڕووی توانای مرۆیی بە شێوەکی پێشکەوتوو، ببێته هۆى بەهێزکردنی پێگەی دەسەڵاتی دادوەرى، هه‌روه‌ها حوکم و سەروەريی یاسا تۆکمەتر و کاراتر بن.
ئێستا ئێمە ئەمڕۆ بەرهەمی پەیمانگای دادوەری دەبینین کە زادەی ئەو یاسايه‌يه لە هەرێمی كوردستان. ئه‌مه مایەی خۆشحاڵی و پێزانینی ئێمه‌يه.
هه‌ر له‌م ده‌رفه‌ته‌دا ده‌مه‌وێ داكۆكى له‌وه بكه‌مه‌وه كه پێويسته پڕۆژەیاسایەکی تایبەت بە داواکاری گشتی ئاماده بكرێت تا ڕێكخستنێكى ياسايييانه بۆ كاره‌كانى و په‌يكه‌رێكى تۆكمه‌ى دامه‌زراوه‌يى بۆ ئامادە بکرێت، بۆ ئه‌وه‌ى بخرێتە بەردەم پەرلەمانی داهاتووى کوردستان بۆ گفتوگۆ و پەسەندکردن.
دووباره پيرۆزبايى له هه‌موو ده‌رچووان، به‌ڕێزان دادوه‌ران و جێگرانى داواكارى گشتى ده‌كه‌م، به‌تايبه‌تيش پیرۆزباییەكی گەرمی خانمانى به‌ڕێز دەكەم. هيوادارم ده‌ستبه‌كاربوونتان به‌شێك له كه‌موكوڕييه‌كانى ئه‌و بواره پڕ بكاته‌وه. ببنه‌نه نموونه‌ى نه‌وه‌يه‌كى تازه‌ى ده‌سه‌ڵاتى دادوه‌رى، به گيانێكى تازه‌وه، سه‌ربه‌خۆ و ئازادانه ئه‌ركه‌كه‌تان ڕاپه‌ڕێنن و متمانه و دڵنيايى له‌ناو هاووڵاتيياندا به‌هێز و بەهێزتر بكه‌ن.
سوپاس و ده‌ستخۆشى و پێزانين بۆ په‌يمانگاى دادوه‌رى. ئێوه ئه‌ركێكى پيرۆز به‌جێ ده‌گه‌يه‌نن. هه‌ر سه‌ركه‌وتوو بن و خوا پشتیوانتان بێت.
سوپاس بۆ ئاماده‌بوونتان و هيواى ڕۆژێكى خۆشتان بۆ ده‌خوازم و دیسانەوە پیرۆزباییەكی گەرم لە هەرهەمووتان دەكەم و زۆر بە خێر بێن.
https://presidency.gov.krd/president-nechirvan-barzani-stresses-the-independence-of-the-judiciary/
سەرۆکی حکومەتی هەرێمی کوردستان پێشوازی لە کونسوڵی گشتیی نوێی ئەمەریکا دەکات
ڕۆژی پێنجشەممە 8/24 مەسرور بارزانی سەرۆکی حکومەتی هەرێمی کوردستان، پێشوازی لە مارک سترۆ کونسوڵی گشتیی نوێی ئەمەریکا لە هەرێمی کوردستان کرد.
سەرۆکی حکومەت پیرۆزبایی دەستبەکاربوونی لێکرد و خواستی حکومەتی هەرێمی کوردستانیشی بۆ پەرەپێدانی زیاتری پەیوەندییەکانی لەگەڵ ئەمەریکا دەربڕی.
سەرۆکی حکومەت هەروەها ئاماژەی بە پەیوەندیی مێژوویی و دۆستانەی هەرێم لەگەڵ ئەمەریکا کرد و سوپاس و پێزانینی هەرێمی کوردستانی بۆ هاوکاری و پشتیوانی بەردەوامیی ئەمەریکا دووپات کردەوە.
کونسوڵی گشتیی نوێی ئەمەریکا ، ئامادەیی وڵاتەکەی بۆ برەودان بە پەیوەندیی و هەماهەنگیی دوولایەنە نیشاندا .
گرنگیی پاراستنی مافە دەستوورییەکانی هەرێمی کوردستان و چارەسەرکردنی کێشەکان لەگەڵ حکومەتی فیدرال لەسەر بنەمای دەستوور و ڕێککەوتنەکان، تەوەرێکی سەرەکی دیدارەکە بوو.
https://gov.krd/government/the-prime-minister/activities/posts/2023/august/سەرۆکی-حکومەتی-هەرێمی-کوردستان-پێشوازی-لە-کونسوڵی-گشتیی-نوێی-ئەمەریکا-دەکات/
پەیامی سەرۆکی حکومەتی هەرێمی کوردستان لە ساڵیادی ئەنفالی بادینان
ئەمڕۆ هەینی ، مەسرور بارزانی سەرۆکی حکومەتی هەرێمی کوردستان ، پەیامێکی لە ساڵیادی شاڵاوەکانی ئەنفالی بادینان بڵاوکردەوە کە ئەمە دەقەکەیەتی ؛
لە ( 35 )مین ساڵڤەگەڕی شاڵاوە بەدناوەکانی ئەنفال لە دەڤەری بادینان، بەڕێز و شکۆوە یادی قوربانیيانی ئەو تاوانە گەورە و هۆڤانەیەی ڕژێمی پێشووی عێراق دەکەینەوە کە ئامانجی قڕکردن و جێنۆسایدکردنی گەلی کوردستان بوو بە گشت پێکهاتەکانییەوە.
لەم هێرش و پەلامارانەدا ، کە دوا قۆناخی شاڵاوەکانی ئەنفال بوو، هەزاران خەڵکی بێتاوانی بادینان ئەنفالکران و بە دەیان هەزاریش ئاوارە و دەربەدەر بوون و سەدان گوندیش تێکدران و لە ئەنجامی بەکارهێنانی چەکی قەدەخەکراودا، زیانێکی زۆر گەورە بە ناوچەکە گەیشت.
جێگەی داخ و نیگەرانییە، تا ئێستا ماددەی 132ی دەستوور جێبەجێ نەکراوە کە تایبەتە بە قەرەبووکردنەوەی زیانلێکەوتووان و کەسوکاری قوربانییانی شاڵاوەکانی ئەنفال و تاوانەکانی ڕژێمی بەعسی عێراق.
لەم یادەدا، دووپاتی دەکەینەوە، کە مافی ڕەوای خەڵکی کوردستان و بەتایبەتی کەسوکار و زیانلێکەوتووانی سەرەکی دەستی ڕژێمی پێشووی عێراقە، کە بە شێوەیەکی شایستە قەرەبوو بکرێنەوە و دڵنیا بکرێنەوە کە جارێکی دیکە ڕووبەڕووی جێنۆسایدکردن نابنەوە.
لە ساڵیادی ئەنفالی بادیناندا، سەری ڕێز بۆ گیانی پاکی ئەنفالکراوانی بادینان و گشت شەهیدان و ئەنفالکراوانی کوردستان دادەنوێنین.
مەسرور بارزانی
سەرۆکی حکومەتی هەرێمی کوردستان
2023/8/25
https://gov.krd/government/the-prime-minister/activities/posts/2023/august/پەیامی-سەرۆکی-حکومەتی-هەرێمی-کوردستان-لە-ساڵیادی-ئەنفالی-بادینان/
سەرۆکی حکومەتی هەرێمی کوردستان پێشوازی لە شاندێکی ئەڵمانی دەکات
ئەمڕۆ پێنجشەممە 8/24 مەسرور بارزانی سەرۆکی حکومەتی هەرێمی کوردستان، پێشوازی لە شاندێکی ئەڵمانی کرد بە سەرۆکایەتی لەمیا قەدوور ئەندامی پەرلەمانی ئەڵمانیا.
لە دیدارەکەدا کە کلاوس شترایشەر کونسوڵی گشتیی ئەڵمانیا لە هەرێمی کوردستان ئامادەی بوو، ستایشی دۆخی بەیەکەوەژیانی ئاشتییانەی نێوان پێکهاتە جیاوازەکان و ئازادی ئایینی لەهەرێمی کوردستان کرا و جەخت لە گرنگیی پەرەپێدانی کولتووری میانڕەوی و بەرەنگاربوونەوەی هزری توندڕەوی کرا.
لە بەشێکی دیکەی دیدارەکەدا ، بیروڕا لەبارەی بارودۆخی ئاوارە و پەنابەران لە هەرێمی کوردستان و ڕووبەڕووبوونەوەی مەترسیی هەڕەشەکانی تیرۆریستانی داعش ئاڵوگۆڕ کرا.
https://gov.krd/government/the-prime-minister/activities/posts/2023/august/سەرۆکی-حکومەتی-هەرێمی-کوردستان-پێشوازی-لە-شاندێکی-ئەڵمانی-دەکات/
سەرۆکی حکومەتی هەرێمی کوردستان پێشوازی لە وەزیرانی دەرەوە و وزەو سەرچاوە سرووشتییەکانی تورکیا كرد
ڕۆژی پێنجشەممە 8/24 مەسرور بارزانی سەرۆکی حکومەتی هەرێمی کوردستان، پێشوازی لە هاکان فیدان وەزیری دەرەوەی تورکیا کرد.
لە دیدارەکەدا کە ئەلپئەرسلان بەیرەکتار وەزیری وزە و سەرچاوە سرووشتییەکانی تورکیا ئامادەی بوو، دوا پەرەسەندنەکانی عێراق و ناوچەکە و پەرەپێدانی پەیوەندیی دوولایەنە تاوتوێ کرا.
سەرۆکی حکومەت جەختی لە گرنگیی بەهێزکردنی پەیوەندییەکان لە گەڵ تورکیا لە بواری ئاڵوگۆڕی بازرگانی و ئاسانکاریکردن بۆ هاتووچۆ و گەشتیارانی هەردوولا کردەوە.
تەوەرێکی دیکەی کۆبوونەوەکە تایبەت بوو بە پێویستی و گرنگیی دەستپێکردنەوەی هەناردەکردنی نەوتی هەرێمی کوردستان لە ڕێگەی بەندەری جەیهانی تورکیا و نەهێشتنی هەموو ئاستەنگ و کێشەیەکی تایبەت بەم بابەتە ، چونکە وەستانی هەناردەکردنی نەوت ، زیانی بە هەموو لایەک گەیاندووە.
هەروەها لە بەشێکی دیکەی گفتوگۆکاندا، باس لە پڕۆژەی ناسراو بە ( ڕێگەی پەرەپێدان) و بەستنەوەی وڵاتانی کەنداو و عێراق بە تورکیا و جیهان لە ڕێگەی هێڵی ئاسنینەوە کرا . لەمبارەیەوە سەرۆکی حکومەت، دووپاتی کردەوە کە پێویستە ئەنجامدانی پڕۆژەکە بە ڕەزامەندی و هەماهەنگیکردن بێت لەگەڵ هەرێمی کوردستان و بە شێوەیەک بێت کە لە بەرژەوەندی گشت هاووڵاتی و پێکهاتە جیاوازەکانی عێراقدا بێت .
وەزیری دەرەوەی تورکیا خۆشحاڵی خۆی بە سەردانکردنی هەرێمی کوردستان نیشاندا و ئامادەیی وڵاتەکەشی بۆ پتەوکردنی پەیوەندییەکان لەگەڵ هەرێمی کوردستان لە هەموو بوارەکاندا دەربڕی .
پاشان سەرۆکی حکومەت و وەزیری دەرەوەی تورکیا لە لێدوانێکدا بۆ دەزگاکانی ڕاگەیاندن، جەختیان لە برەوان بە پەیوەندیی دوولایەنە لە بوارەکانی ئابووری و بازرگانی و هەماهەنگیی لە پێناو ئاسایش و سەقامگیری عێراق و هەرێمی کوردستان و ناوچەکە کردەوە.
https://gov.krd/government/the-prime-minister/activities/posts/2023/august/سەرۆکی-حکومەتی-هەرێمی-کوردستان-پێشوازی-لە-وەزیرانی-دەرەوە-و-وزەو-سەرچاوە-سرووشتییەکانی-تورکیا-كرد/
په‌يامى سه‌رۆك نێچيرڤان بارزانى له يادى ئه‌نفالى باديناندا
له يادى (35) ساڵه‌ى ئه‌نفالى باديناندا، به ڕێز و شكۆدارييه‌وه يادی شه‌هيدانى خه‌ڵكى سڤيلى بادينان و ته‌واوى قوربانييانى شاڵاوه‌كانى ئه‌نفال ده‌كه‌ينه‌وه. ساڵى 1988 له گه‌رميانه‌وه تا بادينان (182) هه‌زار هاووڵاتيى بێتاوانى كوردستان به منداڵ و ئافره‌ت و پير و گه‌نجه‌وه، بوونه قوربانيى ئه‌و تاوانه. سڵاو و دروود بۆ گيانى پاكيان ده‌نێرين.
دادگاى باڵاى تاوانه‌كانى عێراق، شاڵاوه‌كانى ئه‌نفالى به جينۆسايد و تاوانى جه‌نگ و تاوانى دژى مرۆڤايه‌تى له قه‌ڵه‌م داوه، بۆيه له كاتێكدا گيانى پاكى شه‌هيدانى ئه‌نفال به بير ده‌هێنينه‌وه، دووپاتى ده‌كه‌ينه‌وه كه حكوومه‌تى عێراقى فيدراڵى، ده‌بێ ئه‌ركى خۆى بۆ قه‌ره‌بووكردنه‌وه‌ى خێزان و كه‌سوكارى قوربانييان جێبه‌جێ بكات و له ئێش و ئازاريان كه‌م بكاته‌وه.
له‌م ياده‌دا سوپاس و پێزانينمان بۆ خه‌ڵكى جوامێر و دڵسۆزى هه‌ولێر و به‌حركه و ده‌وروبه‌ريان دووپات ده‌كه‌ينه‌وه. ئه‌وان ئه‌و ڕۆژه سه‌ختانه له كه‌مپه‌كانى جێژنيكان به هاناى ڕاگوێزراوان و لێقه‌وماوانی ئه‌نفالى بادينانه‌وه چوون و ده‌ستى يارمه‌تى و هاوكارييان بۆ درێژ كردن.
خزمه‌تكردنى باشترى كه‌سوكارى ئه‌نفالكراوان، ته‌بايى و يه‌كڕيزيى ناوخۆييمان، كارى جددى و هه‌وڵدان بۆ دووباره‌نه‌بوونه‌وه‌ى تاوانه‌كانى وه‌ك ئه‌نفال و ناساندنى به جينۆسايد له‌سه‌ر ئاستى جيهان، باشترين يادكردنه‌وه و وه‌فادارييه بۆ گيانى پاكى قوربانييانى ئه‌نفال و ته‌واوى شه‌هيدانى كوردستان.
ده‌بێ مێژوو و ڕابردووى تاڵى گه‌لانى عێراق، وانه و په‌ند و هانده‌ر بن بۆ كارى پێكه‌وه‌يى و يه‌كترقبووڵكردن و مسۆگه‌ركردنى مافى ته‌واوى پێكهاته‌كان له عێراقى نوێدا، بۆ ئه‌وه‌ى كاره‌ساته‌كانى ڕابردوو دووباره نه‌بنه‌وه و ئازادى و مافه ده‌ستوورييه‌كانى هه‌مووان پارێزراو بن.
نێچيرڤان بارزانى
سه‌رۆكى هه‌رێمى كوردستان
2023/8/25
سه‌رۆكى هه‌رێمى كوردستان پێشوازى له كونسولى نوێى ئه‌مه‌ريكا كرد
پێشنوه‌ڕۆى ڕۆژی چوارشه‌ممه 23/8/2023 به‌ڕێز نێچيرڤان بارزانى، سه‌رۆكى هه‌رێمى كوردستان، له ديدارێكدا له‌گه‌ڵ به‌ڕێز مارك سترۆ كونسولى گشتيى نوێى ئه‌مه‌ريكا له هه‌رێمى كوردستان، وێڕاى به‌خێرهێنان، هيواى سه‌ركه‌وتنى بۆ خواست و هه‌موو پشتگيرييه‌كى بۆ سه‌رخستنى ئه‌ركه‌كه‌ى و خواستى هه‌رێمى كوردستانى بۆ بره‌ودانى په‌يوه‌ندييه‌كانى له‌گه‌ڵ ئه‌مه‌ريكا، دووپات كرده‌وه.
لاى خۆيه‌وه به‌ڕێز كونسولى گشتيى نوێى ئه‌مه‌ريكا وێڕاى ده‌ربڕينى خۆشحاڵى به ده‌ستبه‌كاربوونى له ئه‌ركه‌كه‌يدا، داكۆكى له پابه‌نديى وڵاته‌كه‌ى به بره‌ودان به په‌يوه‌ندييه‌كانى له‌گه‌ڵ هه‌رێمى كوردستان و پته‌وكردنى هاريكاريى هاوبه‌شى نيوانيان كرده‌وه.
دۆخى ناوچه‌كه به‌گشتى و چه‌ند بابه‌تێكى جێى بايه‌خى هاوبه‌ش، ته‌وه‌رێكى ديكه‌ى كۆبوونه‌كه بوو.
سه‌رۆكى هه‌رێمى كوردستان له‌گه‌ڵ وه‌زيرى ده‌وڵه‌تى به‌ريتانيا بۆ كاروبارى ئاسايش كۆبووه‌وه
به‌يانيى ڕۆژی چوارشه‌ممه 23/8/2023 به‌ڕێز نێچيرڤان بارزانى، سه‌رۆكى هه‌رێمى كوردستان، پێشوازى له به‌ڕێز تۆم توگێندهات وه‌زيرى ده‌وڵه‌تى به‌ريتانيا بۆ كاروبارى ئاسايش و شاندێكى ياوه‌رى كرد.
له كۆبوونه‌وه‌يه‌كدا كه به‌ڕێزان باڵيۆزى به‌ريتانيا له عێراق و كونسولى گشتييان له هه‌رێمى كوردستان ئاماده‌ى بوون، دوايين پێشهاته‌كانى شه‌ڕى دژى تيرۆر و به‌ره‌نگاربوونه‌وه‌ى و مه‌ترسييه‌كانى داعش، هه‌ڵبژاردنه‌كان و دۆخى ناوخۆى هه‌رێمى كوردستان، په‌يوه‌ندييه‌كانى هه‌ولێر ـ به‌غدا، كۆچى ناياسايى بۆ به‌ريتانيا و ڕووبه‌ڕووبوونه‌وه‌ى مادده هۆشبه‌ره‌كان، تاوتوێ كران.
هه‌ردوولا جه‌ختيان له گرنگيى هاريكاريى هاوبه‌شى به‌ريتانيا له‌گه‌ڵ عێراق و هه‌رێمى كوردستان بۆ كه‌مكردنه‌وه‌ى كۆچى ناياسايى و تاوانى ڕێكخراو كرده‌وه و هاوڕا بوون كه بۆ ڕێگريكردن له بڵاوبوونه‌وه‌ى مادده هۆشبه‌ره‌كان له ناوچه‌كه، هاريكاريى هاوبه‌شى ناوچه‌يى پێويسته و بۆ ئه‌م مه‌به‌سته ده‌بێ هه‌نگاوى پێويست بگيرێنه به‌ر. هه‌رله‌مباره‌يه‌وه باس له ياداشتێكى لێكگه‌يشتن كرا كه له‌نێوان حكوومه‌تى هه‌رێمى كوردستان و حكوومه‌تى به‌ريتانيادا واژۆ ده‌كرێت.
له‌باره‌ى دۆخى ناوخۆى هه‌رێمى كوردستانيشه‌وه، هه‌ردوولا هاوڕا بوون له‌سه‌ر گرنگى و پێويستيى پته‌وكردنى هاوهه‌ڵوێستى و يه‌كڕيزيى ناوخۆیى و ئه‌نجامدانى هه‌ڵبژاردن. هه‌ر له‌باره‌ى هه‌ڵبژاردنه‌وه به‌ڕێز سه‌رۆكى هه‌رێمى كوردستان دووپاتى كرده‌وه كه هه‌رێمى كوردستان پابه‌ندى ئه‌نجامدانى هه‌ڵبژاردنه و شه‌رعيه‌تى هه‌رێمى كوردستان له هه‌ڵبژاردنه‌وه دێت.
له ته‌وه‌رێكى ديكه‌ى كۆبوونه‌وه‌كه‌دا، دوايين پێشهاته‌كانى دۆخى ناوچه‌كه به‌گشتى، خرانه به‌ر باس.
https://presidency.gov.krd/the-kurdistan-regional-government-president-barzani-met-with-the-british-secretary-of-state-for-security-affairs/
سه‌رۆك نێچيرڤان بارزانى له‌گه‌ڵ وه‌زيرى ده‌ره‌وه‌ى توركيا كۆبووه‌وه
به‌يانيى ڕۆژی پێنجشه‌ممه 2023/8/24 به‌ڕێز نێچيرڤان بارزانى، سه‌رۆكى هه‌رێمى كوردستان پێشوازى له به‌ڕێز هاكان فيدان، وه‌زيرى ده‌ره‌وه‌ى توركيا كرد.
له كۆبوونه‌وه‌يه‌كدا که به‌ڕێزان جێگرانی سه‌رۆکی هه‌رێمی کوردستان ئاماده‌ی بوون، په‌يوه‌ندييه‌كانى توركيا له‌گه‌ڵ عێراق و هه‌رێمى كوردستان و بواره‌كانى هاريكاريى هاوبه‌شى نێوانيان، په‌يوه‌ندى و كێشه‌كانى هه‌ولێر ـ به‌غدا و گفتوگۆى چاره‌سه‌ركردنيان، دۆخى عێراق و هه‌رێمى كوردستان به‌گشتى تاوتوێ كران.
سه‌رۆك نێچيرڤان بارزانى وێڕاى ده‌ربڕينى خۆشحاڵى به سه‌ردانه‌كه، دووپاتى كرده‌وه هه‌رێمى كوردستان به گرنگى و بايه‌خه‌وه له په‌يوه‌ندييه‌كانى له‌گه‌ڵ توركيا ده‌ڕوانێت كه به‌رژه‌وه‌نديى هاوبه‌شى ئابوورى، بازرگانى و ئه‌منى پێكه‌وه ده‌يانبه‌ستێته‌وه و ئاماده‌يه له هه‌موو بواره‌كاندا بره‌و به په‌يوه‌ندييه‌كانى هه‌ولێر ـ ئه‌نقه‌ره بدات، هه‌روه‌ها سوپاسى توركياى كرد بۆ پشتگيرى له هه‌رێمى كوردستان له هه‌موو بواره‌كان و به‌تايبه‌تى له كاته سه‌خته‌كاندا و ئاماژه‌ى به‌وه كرد كه هه‌رێمی كوردستان هه‌رگيز پشتگيرى و هاوكارييه‌كانى توركيا له‌بير ناكات.
لاى خۆيه‌وه به‌ڕێز وه‌زيرى ده‌ره‌وه‌ى توركيا جه‌ختى له‌وه كرده‌وه كه توركيا گرنگييه‌كى تايبه‌ت به په‌يوه‌ندييه‌كانى له‌گه‌ڵ عێراق و هه‌رێمى كوردستان ده‌دات و به‌غدا و هه‌ولێر گرنگييه‌كى تايبه‌تيان بۆ توركيا هه‌يه. به‌ڕێزيان ستايشى ئارامى و سه‌قامگيريى هه‌ولێر و هه‌رێمى كوردستانى كرد و ئاماده‌ييى وڵاته‌كه‌ى بۆ فراوانكردنى په‌يوه‌ندييه‌كان و هاريكاريى هاوبه‌شى نێوان هه‌ردوولا له هه‌موو بواره‌كاندا ده‌ربڕى. هه‌روه‌ها سوپاسى ڕۆڵى سه‌رۆك نێچيرڤان بارزانى كرد له بره‌ودان به په‌يوه‌ندييه‌كانى عێراق و هه‌رێمى كوردستان له‌گه‌ڵ توركيا.
له ته‌وه‌رێكى ديكه‌ى كۆبوونه‌وه‌كه‌دا به بايه‌خه‌وه باس له پرسى هه‌نارده‌كردنه‌وه‌ى نه‌وتى هه‌رێمى كوردستان له ڕێگه‌ى به‌نده‌رى جه‌يهانى توركييه‌وه كرا و له‌مباره‌يه‌وه بيروڕايان گۆڕييه‌وه، هه‌روه‌ها دۆخى ناوچه‌كه به‌گشتى و چه‌ند پرسێكى جێى بايه‌خى هه‌ردوولا، خرانه به‌ر باس.
https://presidency.gov.krd/president-nechirvan-barzani-meets-with-turkish-foreign-minister-2/
سه‌رۆكى هه‌رێمى كوردستان پێشوازى له كونسولى نوێى هيندستان كرد
پاشنيوه‌ڕۆى ڕۆژی سێشه‌ممه 22/8/2023 به‌ڕێز نێچيرڤان بارزانى، سه‌رۆكى هه‌رێمى كوردستان، له ديدارێكدا له‌گه‌ڵ به‌ڕێز مادان گۆپال كونسولى گشتيى نوێى هيندستان له هه‌رێمى كوردستان و شاندێكى ياوه‌رى، وێڕاى به‌خێرهێنان، پشتگيريى خۆيان و لايه‌نه په‌يوه‌نديداره‌كانى هه‌رێمى كوردستانى بۆ سه‌رخستنى ئه‌ركه‌كه‌ى و بره‌ودان به په‌يوه‌ندييه‌كانى هيندستان له‌گه‌ڵ هه‌رێمى كوردستان، ده‌ربڕى.
سه‌رۆك نێچيرڤان بارزانى دووپاتى كرده‌وه كه هيندستان وڵاتێكه، عێراق و هه‌رێمى كوردستان به شێوه‌يه‌كى گشتى ده‌توانن له زۆر بواردا سوود له شاره‌زايى و پسپۆڕى و ئه‌زموونه‌كانى وه‌ربگرن، بۆيه گرنگه هه‌رێمى كوردستان بايه‌خ و گرنگى به په‌يوه‌ندييه‌كانى له‌گه‌ڵ هيندستان بدات. له‌مباره‌يه‌وه به‌تايبه‌تى ئاماژه‌ى به گرنگيى كردنه‌وه‌ى گه‌شتى ڕاسته‌وخۆى ئاسمانيى نێوان هه‌رێمى كوردستان و هيندستان كرد.
لاى خۆيه‌وه به‌ڕێز كونسولى گشتيى نوێى هيندستان، خۆشحاڵيى خۆى به ده‌ستبه‌ركاربوونى له هه‌رێمى كوردستان نيشان دا و جه‌ختى له كار و هه‌وڵه‌كانى بۆ بره‌ودان به په‌يوه‌ندييه‌كانى وڵاته‌كه‌ى له‌گه‌ڵ هه‌رێمى كوردستان كرده‌وه.
https://presidency.gov.krd/kurdistan-regional-government-president-barzani-receives-the-new-indian-consul-general/
More...
سه‌رۆك نێچيرڤان بارزانى پێشوازى له شاندێكى باڵاى سه‌ربازيى هاوپه‌يمانان كرد
سەرۆکی حکومەت لەگەڵ سەرۆکی ئیمارات کۆدەبێتەوە
سه‌رۆك نێچيرڤان بارزانى ماڵئاوايى له كونسولى ئه‌مه‌ريكا ده‌كات
سه‌رۆك نێچيرڤان بارزانى: پێكه‌وه‌ژيانى ئاشتيانه، بووه‌ته هێزێكى گه‌وره بۆ كوردستان
دوایین هەواڵەکان
- سه‌رۆكى هه‌رێمى كوردستان له‌گه‌ڵ باڵيۆزى فه‌ره‌نسا كۆبووه‌وه
- سەرۆکی حکومەت لەگەڵ سەرۆک کۆماری فیدراڵ کۆبووەوە
- سەرۆکی حکومەتی هەرێمی کوردستان و سەرۆک وەزیرانی فیدراڵ کۆبوونەوە
- «سەلام رشدی» بەشداری له دووەمین ئاهەنگى پێشوازی ساڵانەی پەیوەندییەکانى دەرەوە بۆ دیپلۆماتکاران کرد
- سەرۆکی حکومەت پێشوازی لە وەزیری دەرەوەی نەمسا دەکات
- سه‌رۆك نێچيرڤان بارزانى له‌گه‌ڵ وه‌زيرى ده‌ره‌وه‌ى نهمسا كۆبووه‌وه
- سه‌رۆك نێچيرڤان بارزانى: ده‌بێ كێشهكان به لێكگه‌يشتن چارهسهر بكرێن
- سەرۆکی حکومەتی هەرێمی کوردستان پێشوازی لە باڵیۆزی کۆماری ئیسلامی ئێران لە عێراق دەکات
- سه‌رۆكى هه‌رێمى كوردستان و باڵيۆزى ئه‌مه‌ريكا كۆبوونهوه
- سەرۆکی حکومەتی هەرێمی کوردستان لەگەڵ باڵیۆزی ئەمەریکا لە عێراق کۆبووەوە