پێشنیوەڕۆی ئەمڕۆ ١٢ی ئاب، د.یوسف محەمەد سادق سەرۆکی پەرلەمانی کوردستان و فەخرەدین قادر سکرتێری پەرلەمان، پێشوازییان کرد لە ئارام شێخ محەمەد جێگیری سەرۆکی ئەنجومەنی نوێنەرانی عێراق و شاندی فراکسیۆنە کوردییەکانی ئەنجومەنی نوێنەرانی عێراق، کە بە مەبەستی هەماهەنگی و کاری هاوبەشی نێوان هەردوولا سەردانی پەرلەمانی کوردستانییان کردبوو.
لە دانیشتنێکدا کە سەرۆکی فراکسیۆنەکانی پەرلەمانی کوردستان ئامادەبوون، جێگیری سەرۆکی ئەنجومەنی نوێنەرانی عێراق و شاندی پەرلەمانتارانی کوردی ئەنجومەنی نوێنەرانی عێراق، تیشکێکی هەمەلایەنەیان خستە سەر شێوازی کاری ئەنجومەنی نوێنەرانی عێراق و هەماهەنگی نێوان فراکسیۆنە کوردییەکان کە لە نێو ئەنجومەنی نوێنەران وەک یەک تیم کار دەکەن.
لەدانیشتنەکەدا هەردوولا پشتگیریی هەوڵەکانی بەڕیز سەرۆک کۆماری عێراقیان کرد بۆ دیاریکردنی کاندیدێک بۆ سەرۆک وەزیرانی نوێ، ئەم هانگاوەش بە گرنگ وەسفکرا بە ئاڕاستەی دەربازبوونی وڵات لەم تەنگەژە سیاسییەی کە تێیکەوتووە. لەو پێناوەشدا هەردولا هەماهەنگی و هاوکاری نێوان پەرلەمانی کوردستان و ئەنجومەنی نوێنەرانییان بە گرنگ زانی.
دواتر سەرۆکی پەرلەمانی کوردستان، ئاماژەی بەوەدا پێویستە لەسەر ئاستی کاری پەرلەمانی هەردولا بەتایبەتیش ئەو لیژنانەی کە پسپۆڕییەتییان لەیەکەوە نزیکە هەماهەنگی لەنێوانیاندا هەبێت.
لەبەشێکی تری وتەکانیدا سەرۆکی پەرلەمانی کوردستان، داوای لەشاندەکە کرد هەوڵ بدەن بۆ کۆتایی هێنان بەو بڕیارەی سەرۆک وەزیرانی کاربەڕێکەری عێراق کە ماوەی چەند مانگێکە موچەی فەرمانبەرانی هەرێمی کوردستانی بڕیووە.
لەبەشێکی تری کۆبوونەوەکەدا هەماهەنگی نێوان ئەنجومەنی نوێنەرانی عێراق و پەرلەمانی کوردستان دوپاتکرایەوە بۆ هاوکاری ئاوارەکانی عێراق کە ڕوویان لەهەرێمی کوردستان کردووە.
لەکۆتایی دانیشتنەکەدا، هەردولا بڕیاریاندا لیژنەیەکی هەشت کەسی هاوبەش لەنێوان فراکسیۆنەکانی پەرلەمانی کوردستان و فراکسیۆنە کوردستانییەکان لەئەنجومەنی نوێنەراینی عێراق درووست بکرێت، بۆ ئامادەکردنی پڕۆتۆکۆل و هەماهەنگی و کاری هاوبەش و پەیوەندی دامەزراوەیی لە نێوان هەردولادا.