هەواڵی رۆژ

په‌رله‌مانى كوردستان، پشتگیرى له‌ حكوومه‌تى هه‌رێمى كوردستان ده‌كات

ئەمڕۆ پێنجشەممە، 14ی ئایاری 2015، به‌ڕێزان نێچیرڤان بارزانی سەرۆکی حکوومەتی هەرێمی کوردستان و قوباد تاڵه‌بانى جێگری سەرۆک وەزیران و وەزیرانی په‌یوه‌ندار، سەردانی پەرلەمانی کوردستانیان کرد و لە لایەن به‌ڕێزان د. یووسف محەمەد سادق سەرۆکی پەرلەمان و د. جەعفەر ئیمینکی و فەخرەدین قادر سکرتێری پەرلەمان و پێشوازییان لێ كرا و له‌گه‌ڵ سەرۆکی فراکسیۆنەکانی پەرلەمان و لیژنە تایبەتمەندەکانی پەرلەمان کۆبوونەوەیەک ساز کرا.

لە سەرەتای کۆبوونەوەکەدا، بەڕێز د. یووسف محەمەد سادق سەرۆکی پەرلەمان، هیوای خواست کۆبونەوەکە هەنگاوێک بێت بەرەو کۆدەنگیی نیشتمانی لەسەر پرسە تایبەتمەندەکانی پەیوەست بە ژیانی هاووڵاتیانی  کوردستان، داوای لە شاندی حکوومەتی هەرێمى كوردستان کرد، دواهەمین هەنگاو پێشهاتەکانی نێوان هەرێم و بەغدا بۆ شاندی پەرلەمان بخەنە ڕوو.

بەڕێز نێچیرڤان بارزانی ، ئاماژەی بە گرفتەکانی نێوان هەرێم و بەغدا کرد و وتی "بەداخەوە بەغدا هەرجارەی بە بیانوویەک کێشەمان  بۆ درووست دەکات، ئێمە پانەندی ڕێکەوتنەکە بووین و نەوتی پێویستمان ناردووە، بەڵام بەغدا بودجەى هەرێمی كوردستانى وەک خۆی نەناردووە."

لەبارەی پلانی داهاتووی حکومەتی هەرێمى كوردستانه‌وه‌، بۆ ئەم پێشهاتە نوێیە، به‌ڕێز سەرۆک وەزیران گوتی:"هەرێمی کوردستان کارتی بەدەستەوەیە بەکاری بێنێت، بەڵام دەمانەوێت دەرفەتێک بدەینەوە بە بەغدا و لە ڕێگەی دانیشتنەوە گرفتەکان چارەسەربکەین." دواتر وەزیرانی تایبەتمەند و سەرۆکی فراکسیۆنەکان و ئەندامانی لیژنە تایبەتمەندەکانی پەرلەمان پرسیاریان ئاڕاستەی شاندی حکومەتی هەرێم کرد."

له‌ كۆبوونه‌وه‌كه‌دا فراكسیۆنه‌كانى په‌رله‌مانى كوردستان و لیژنه‌ په‌یوه‌نداره‌كان، پشتگیرییان بۆ حكوومه‌تى هه‌رێمى كوردستان دووپات كرده‌وه‌ بۆ ئه‌وه‌ى له‌ ئه‌گه‌رى پابه‌ندنه‌بوونى حكوومه‌تى فیدرال به‌ یاساى بودجه‌ى عیراقه‌وه‌ و نه‌ناردنى بڕه‌ پاره‌ى شایسته‌ى هه‌رێمى كوردستان، حكوومه‌تى هه‌رێمى كوردستان بریارى خۆى بدات و به‌پێى یاساى په‌رله‌مانى كوردستان ڕێكارى دیكه‌ بۆ دابینكردنى بودحه‌ى پێویست بۆ هه‌رێمى كوردستان بگرێته‌ به‌ر.

لە کۆتایی کۆبوونەوەکەدا، سەرۆکی پەرلەمانی کوردستان وتی: بەداخەوە حکوومەتی بەغدا پابەندی یاسای بودجە نەبووە، ناکرێت پێشمەرگە لە بەرەکانی پێشەوەی شەڕی تیرۆرستاندا خوێنی بڕژێت و بەغداش بە بیانووی جیاواز بودجەکەی ببڕێت.

دوابەدوای کۆبوونەوەکەش لە کۆنگرەیەکی ڕۆژنامەنووسیدا، سەرۆکی پەرلەمان و سەرۆکی ئەنجومەنی وەزیران ناوەڕۆکی کۆبوونەوەکەیان بۆ ڕۆژنامەنووسان خستە ڕوو.

سەرۆکی پەرلەمانی کوردستان: پەرلەمانی کوردستان بە گیانی یەک تیمییەوە کار دەکات

د.یوسف محەمەد سادق، سەرۆکی پەرلەمانی کوردستان، دەڵیت: "ئەم قەیرانە ئابوورییەی ڕووی کردووەتە هەرێمی کوردستان ئەرکی حکومەت و هەمو لایەنە جیاوازەکانە بەدوای چارەسەرێکی گونجاودا بگەڕێن بۆ دەربازبوون لەم قەیارانە و باشترکردنی ژیانی هاوڵاتیان.

ئەم وتانەی سەرۆکی پەرلەمانی کوردستان، لە میانی پێشوازیکردن بوو لە مامۆستا عەلی باپیر، ئەمیری کۆمەڵی ئیسلامی و شاندێکی یاوەریی. کە ئێوارەی ئەمرۆ ٢ی ئەیلول سەردانی پەرلەمانی کوردستانیان کرد.
لە دانیشتنێکدا هەریەک لە فەخرەدین قادر، سکرتێری پەرلەمان و مەروان گەڵاڵی سەرۆکی فراکسێۆنی کۆمەڵی ئیسلامی لە پەرلەمان ئامادەیبوون، کارو چالاکییەکانی پەرلەمانی کوردستان و هەماهەنگی نێوان حیزبە سیاسییەکان و پەرلەمان گفتوگۆیان لەبارەوە کرا.
لەسەرەتای دانیشتنەکەدا، سەرۆکی پەرلەمانی کوردستان، تیشکێکی خێرای خستە سەر کارو چالاکییەکانی پەرلەمان و وتی "هەمو فراکسیۆنەکانی پەرلەمانی کوردستان، پەرلەمانتاران لە لیژنە جیاوازەکاندا بە گیانی یەک تیمییەوە کار دەکەن، راستە جیاوازی لە تێڕوانین و بۆچوونەکاندا هەیە، بەڵام ئەمەش سرووشتی کاری پەرلەمانییە لە هەمو دونیادا، خۆشبەختانە  جیاوازی و ململانێ سیاسی و کۆمەڵایەتییەکانی شەقام ئێستا لە پەرلەماندا ڕەنگیداوەتەوە، ئەمەش نیشانەی زیندوویەتی پەرلەمانە.
 دواتر عەلی باپیر، بەناوی خۆی و شاندی میوانەوە، سوپاس و دەستخۆشی لە دەستەی سەرۆکایەتی و هەمو فراکسیۆنەکانی پەرلەمانی کوردستان کرد، کە بە شیوەیەکی مەدەنیانەو شارستانییانە شەڕ لەسەر مافی هاوڵاتیانی هەرێمی کوردستان دەکەن. لەبەشیکی تری وتەکانیدا، ئەمیری کۆمەڵی ئیسلامی دەستخۆشی لە ڕٶڵی چالاکی پەرلەمان کرد، لە چاودێرییکردنی کار و هەنگاوەکانی حکومەتی هەرێمی کوردستان، لەو بارەیەوە وتی "ڕاستە ئەم کابینەیەی حکومەتی هەرێم هەمو لایەکمان تێیدا بەشدارین، بەڵام دەبێت پەرلەمان چاودێریی بکات، بۆ ئەوەی زۆرترین خزمەت بە هاوڵاتیان بکات.

 

 

 

 

شاندێكی پەرلەمانی عێراق سەردانی پەرلەمانی کوردستان دەکات

پێشنیوەڕۆی ئەمڕۆ ١٢ی ئاب، د.یوسف محەمەد سادق سەرۆکی پەرلەمانی کوردستان و فەخرەدین قادر سکرتێری پەرلەمان، پێشوازییان کرد لە ئارام شێخ محەمەد جێگیری  سەرۆکی ئەنجومەنی نوێنەرانی عێراق و شاندی فراکسیۆنە کوردییەکانی ئەنجومەنی نوێنەرانی عێراق، کە بە مەبەستی هەماهەنگی و کاری هاوبەشی نێوان هەردوولا سەردانی پەرلەمانی کوردستانییان کردبوو.

لە دانیشتنێکدا کە سەرۆکی فراکسیۆنەکانی پەرلەمانی کوردستان  ئامادەبوون، جێگیری سەرۆکی ئەنجومەنی نوێنەرانی عێراق و شاندی پەرلەمانتارانی کوردی ئەنجومەنی نوێنەرانی عێراق، تیشکێکی هەمەلایەنەیان خستە سەر شێوازی کاری ئەنجومەنی نوێنەرانی عێراق و هەماهەنگی نێوان فراکسیۆنە کوردییەکان کە لە نێو ئەنجومەنی نوێنەران وەک یەک تیم کار دەکەن.
 لەدانیشتنەکەدا هەردوولا پشتگیریی  هەوڵەکانی بەڕیز سەرۆک کۆماری عێراقیان کرد بۆ دیاریکردنی کاندیدێک بۆ سەرۆک وەزیرانی نوێ، ئەم هانگاوەش بە گرنگ وەسفکرا بە ئاڕاستەی دەربازبوونی وڵات لەم تەنگەژە سیاسییەی کە تێیکەوتووە. لەو پێناوەشدا هەردولا هەماهەنگی و هاوکاری نێوان پەرلەمانی کوردستان و ئەنجومەنی نوێنەرانییان بە گرنگ زانی.
 
 
دواتر سەرۆکی پەرلەمانی کوردستان، ئاماژەی بەوەدا پێویستە لەسەر ئاستی کاری پەرلەمانی هەردولا بەتایبەتیش ئەو لیژنانەی کە پسپۆڕییەتییان لەیەکەوە نزیکە هەماهەنگی لەنێوانیاندا هەبێت.
لەبەشێکی تری وتەکانیدا  سەرۆکی پەرلەمانی کوردستان، داوای لەشاندەکە کرد  هەوڵ بدەن بۆ کۆتایی هێنان بەو بڕیارەی سەرۆک وەزیرانی کاربەڕێکەری عێراق کە ماوەی چەند مانگێکە موچەی فەرمانبەرانی هەرێمی کوردستانی بڕیووە.
لەبەشێکی تری کۆبوونەوەکەدا هەماهەنگی نێوان ئەنجومەنی نوێنەرانی عێراق و پەرلەمانی کوردستان دوپاتکرایەوە بۆ هاوکاری ئاوارەکانی عێراق کە ڕوویان لەهەرێمی کوردستان کردووە.
لەکۆتایی دانیشتنەکەدا، هەردولا بڕیاریاندا لیژنەیەکی هەشت کەسی هاوبەش لەنێوان فراکسیۆنەکانی پەرلەمانی کوردستان و فراکسیۆنە کوردستانییەکان لەئەنجومەنی نوێنەراینی عێراق درووست بکرێت، بۆ ئامادەکردنی پڕۆتۆکۆل و هەماهەنگی و کاری هاوبەش و پەیوەندی دامەزراوەیی لە نێوان هەردولادا.

 

 

 

 

سەرۆکی پەرلەمان لەکۆبوونەوەی لەگەڵ کونسوڵ و نوێنەری وڵاتان لەهەرێمی کوردستان وڵاتانی جیهان هاوکاری هەرێمی کوردستان دەکەن لە بەگژاچوونەوەی تیرۆرستاندا

پێشنیوەڕۆی ئەمڕۆ شەممە ٩ی ئاب، د.یوسف محەمەد سادق سەرۆکی پەرلەمانی کوردستان، بە ئامادەبوونی فەخرەدین قادر، سکرتێری پەرلەمان، پێشوازیی کرد لەکونسوڵ و نوێنەری زیاتر لە بیست وڵات لەهەرێمی کوردستان. لە کۆبوونەوەیەکدا دوای بەخێرهاتن، سەرۆکی پەرلەمانی کوردستان تیشکێکی خێرای خستە سەر بارودۆخی ئێستای هەرێمی کوردستان و گۆڕانکارییەکان و شەڕی دژە تیرۆرو ڕەوشی ئاوارەکان و پەیوەندییەکانی نێوان هەرێمی کوردستان و حکومەتی عێراق.

 لەسەرەتای وتەکانیدا سەرۆکی پەرلەمان، باسی لە هەوڵەکانی سەرۆکایەتی پەرلەمانی کوردستانی کرد لەگەڵ ڕێکخراوی نەتەوە یەکگرتووەکان و ڕێکخراوە مرۆییەکانی تر بۆ بە هاناوەچوونی  ئاوارە یەزیدییەکانی شنگار و موسڵ، چونکە ژیانیان لە مەترسیدایە.
لەباسکردنی شەڕی نێوان هێزی پێشمەرگەی کوردستان و تیرۆرستانیشدا، سەرۆکی پەرلەمانی کوردستان وتی "ئەم شەڕە تەنها مەترسی نییە بۆ سەر هەرێمی کوردستان و عێراق، بەڵکو ئاسایشی وڵاتانی ناوچەکەو جیانیش دەخاتە مەترسییەوە، چونکە داعش شێوازێکی نوێی توندوتیژییە و تیرۆریش هیچ سنووریکی نییە، بۆیە پێویستە وڵاتانی دونیا هاوکارمان بن لەم شەڕەدا و سوپاسی وڵاتە یەکگرتووەکانی ئەمەریکا و بەریتانیا و وڵاتانی تر کرد کە پشتیوانیان بۆ هەرێمی کوردستان و هێزی پێشمەرگەی کوردستان دەربڕیووە.
لەبارەی پەیوەندییەکانی نێوان هەرێمی کوردستان و عێراقیش سەرۆکی پەرلەمان بۆ کونسوڵی وڵاتان وتی "لە ئێستادا پەیوەندییەکانمان بەرەو پێشچوونی بەخۆیەوە بینیوەو لەچەند ئاستێکدا هاوکاری و هەماهەنگی هەیە، بەڵام بەداخەوە هەندێ لە دەسەڵاتدارانی عێراق تا ئێستاش ناتوانن لەم واقیعە نوێیە بگەن، هەر بۆیە دەیانەوێت بە عەقڵییەتی کۆن و مەرکزی جارانەوە حکومرانی عێراق بکەن، بۆیە ئەمەش هۆکاری سەرەکی بەشێک لە کێشەکانە.!
لەوبارەشەوە ئاماژەی بەوەدا سەرۆک وەزیرانی عێراق ماوەی ٧ مانگە موچەی فەرمانبەرانی هەرێمی کوردستانی بڕیووە، ئەمەش بووەتە بارگرانییەکی زۆر بەسەر حکومەتی هەرێمی کوردستانەوە بۆ ئەوەی موچەی فەرمانبەران دابین بکات.
لەبارەی پرسی دەستووریی هەرێمی کوردستانیشەوە، سەرۆکی پەرلەمان وتی "هەمو فراکسیۆنەکانی پەرلەمان کۆکن لەسەر پێداچوونەوەو هەموارکردنی دەستوور، لە داهاتوودا دەستور یەکێک دەبێت لە کارە سەرەکییەکانمان، چونکە دەمانەوێت مافی کەمە نەتەوەکانی تورکمان و عەرەب و یەزیدی مەسیحی، دوای گەڕانەوەی ناوچە دابراوەکان لەو دەستوورە نوێیەدا بچەسپینین.
دواتریش کونسوڵ و نوێنەری وڵاتان لە هەرێمی کوردستان، کۆمەڵێک پێشنیارو سەرنج و تێبینییان لەسەر بارودۆخی ئێستای هەرێمی کورستان بۆ سەرۆکی پەرلەمان خستە ڕوو، ئاماژەیان بەوەدا هەرێمی کوردستان لە کەشیکی ئارامدایەو ڕۆژانە کاروباری ئاسایی خۆیان بەڕێدەکەن، لە نزیکیشەوە جاودێریی بارودۆخەکە دەکەن و هاوکاری هەرێمی کوردستان دەکەن لەڕووبەڕوو بوونەوەی تیرۆرستاندا،
دوای کۆبوونەکەش سەرۆکی پەرلەمانی کوردستان لە کۆنگرەیەکی ڕۆژنامەنووسیدا تەوەرە سەرەکییەکانی کۆبوونەوەکەی لەگەڵ کونسوڵی وڵاتان بۆ ڕۆژنامەنووسان و میدیاکاران خستە ڕوو.

 

 

 

 

هەواڵی زیاتر لە تویتەر

  • krg_irant

راپۆرتە پڕ بینەرەکان

حالت های رنگی

بازگردانی