بەناوی خودای مەزن و دلۆڤان

جەماوەری خۆشەویستی كوردستان

لەبەرانبەر هێرشی دڕندانەی تیرۆریستاندا كوردستان ئازایانە بەرگری لەخۆی دەكات و كۆمەڵگەی نێودەوڵەتی و وڵاتانی دۆستیش پشتگیریی خۆیان بۆ گەلی كوردستان ڕاگەیاندووە و پشت بەخوای مەزن و ئیرادەی ئێوە و هێزی پێشمەرگە تیرۆریستان تووشی شكست دەبن و تۆڵەی شەهیدان و ئاوارەكان و كارەساتی شنگالیان لێ دەكەینەوە. جێگەی خۆیەتی دەستخۆشی لە هێزەكانی پێشمەرگەی كوردستان بكەم كە ڕێگەیان بۆ ڕزگاركردنی خوشك و برا ئێزیدییەكان لە چیای شنگال كردووەتەوە و ژمارەیەكی زۆریان لەو ئازیزانە ڕزگار كردووە. هەروەها بەپێویستی دەزانم زۆر سپاسی ئەمەریكا و وڵاتانی دۆستی گەلەكەمان بكەم كە زۆر یارمەتیان دا بۆ ڕزگاركردنیان.

لە دوای ڕووداوەكانی شنگال و ئەو كارەساتەی بەسەر خوشك و برا ئێزیدییەكانماندا هات، ئەو بەرپرسە ئەمنی و سەربازی و حزبیانەی ئەركی پاراستنی دەڤەری شنگالیان لەئەستۆ بوو لەسەر كارەكانیان لادران و لیژنەیەكی لێكۆلینەوەیش بۆ دەرخستنی ڕاستییەكان پێك هاتووە و لیژنەكە بڕیار لەسەر سزادانی ئەو بەرپرسانە دەدات كە لە پاراستنی خەڵك و پێشمەرگە، كەمتەرخەم بوونە.

ئەوەی لە شنگال ڕوویدا تەنیا بەسەر خوشك و برا ئێزیدییەكاندا نەهاتووە بەڵكو زامێكە هەموومان ئازار دەدات. ئەو بەرپرسانە دەبوایە گیانی خۆیان فیدا كردبا و شنگال بەجێنەهێڵن، هەر وەك بەڵێنیان بە من دابوو، دەبوایە لەگەڵ ئەو پێشمەرگە قارەمانانە كە شێرانە مانەوە و بەرگرییان كرد، بمێننەوە. پشت بەخوای گەورە ناهێڵین دوژمنان بە مەرامەكانیان بگەن.

مسعود بارزانی
سەرۆكی هەرێمی كوردستان
14ـی 8ـی 2014

ئەمڕۆ پێنجشەممە 14ـی 8ـی 2014 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە خاتوو كلاودیا ڕۆس جێگری سەرۆكی پارلەمانی ئەڵمانیا و شاندێكی یاوەری كرد.

لەم دیدارەدا جێگری سەرۆكی پارلەمانی ئەڵمانیا سوپاسی سەرۆك بارزانی كرد بۆ ڕەخساندنی ئەم دیدارە و ڕایگەیاند كە هاتوومە كە گوێمان لە ئێوە بێت لەبارەی ڕووداوەكانی ئەم دوایە و بۆ ئەوەی بزانین كە چۆن دەكرێ یارمەتیی كوردستان بدەین لە ڕووبەڕووبوونەوەی ئەو تەحەدییە گەورەییە كە تووشی هەرێمی كوردستان بووە. جێگری سەرۆكی پارلەمانی ئەڵمانیا وێڕای ئاماژەدان بەو ژمارە زۆرەی ئاوارە كە ڕووی لە هەرێمی كوردستان كردووە ئاماژەی بەوەدا كە ئەوە قورساییەكی زۆر گەورە لەسەر كوردستان دروست دەكات چونكە پێویستیان بە خۆراك و دەرمان و شوێنی حەواندنەوە و هەروەها قوتابخانە و هاتوچۆ و نەخۆشخانە هەیە ئەوەیش لە حاڵێكدایە ماوەی هەشت مانگە بەغدا بودجەی كوردستانی نەناردووە. جێگری سەرۆكی پارلەمانی ئەڵمانیا سوپاسی ڕۆڵی پێشمەرگەیشی كرد لە شەڕی دژی تیرۆریستان سەرەخۆشیشی لە سەرۆك بارزانی و گەلی كوردستان و خانەوادەی ئەو پێشمەرگانە كرد كە لە بەرەكانی شەڕی دژی تیرۆریستاندا شەهید بوونە.

لەبەرانبەردا سەرۆك بارزانی بەگەرمی بەخێرهاتنی جێگری سەرۆكی پارلەمانی ئەڵمانیا و شاندی میوانی كرد و ڕێز و پێزانینی خۆیشی بۆ پاڵپشتیی وڵاتانی دۆستی گەلی كوردستان ڕاگەیاند و ئاماژەی بەوەدا كە سیاسەتی ئێمە ئەوە بووە كە پێكهاتە نەتەوەیی و ئایینییەكان بپارێزین و بەرگری لە خۆمان بكەین. بەداخەوە لە چەند ساڵی ڕابردوو حكوومەتی عێراقی و هەندێ وڵات ڕێگر بوون لەوەی گەلی كوردستان چەكی پێ بگات بۆ ئەوەی لە كاتی هەڕەشەكاندا بەرگری لەخۆی بكات.

سەرۆك بارزانی لەدرێژەی قسەكانیدا ئاماژەی بەوەدا كە پێویستیمان بە یارمەتیی جیهانی ئازاد هەیە بۆ ئەوەی ئاوارەكان بە باشی بپارێزین و شەڕی تیرۆریستان بكەین. سەرۆك بارزانی جەختیشی لەسەر ئەوە كردەوە كە گەلی كوردستان ئازا و خۆڕاگرە هەر بۆیە لە سەركەوتنی خۆمان لەدژی دوژمن دڵنیاین.

بە مەبەستی بەسەركردنەوەی بەرەكانی جەنگ و هەڵسەنگاندنی مەیدانیی دۆخ و گوزەرانی پێشمەرگە و لەنزیكەوە ئاگاداربوون لە ئامادەكاری و ئەو ڕێوشوێنە سەربازییانەی كە لە لایەن هێزەكانی پێشمەرگە بۆ بەرگریكردن و هێرشبردن لەدژی تیرۆریستان گیراونەتەبەر ئەمڕۆ چوارشەممە 13ـی 8ـی 2014 بەڕێز مەسعود بارزانی سەردانی هێڵەكانی پێشەوەی بەرەكانی ڕووبەڕووبوونەوەی هێزەكانی پێشمەرگە لەدژی تیرۆریستان لە میحوەری مەخموور و گوێڕ و خازر كرد.

لەم سەردانەدا سەرۆك بارزانی لە هەر سێ میحوەری مەخموور و گوێر و خازر لەنزیكەوە سەنگەرەكانی پێشمەرگەی بەسەر كردەوە و لەگەڵ پێشمەرگەكاندا دوا و لە چۆنییەتیی ئامادەكارییەكانی پێشمەرگە بۆ ڕووبەڕووبوونەوە و هێرشكردن بۆ سەر تیرۆریستان ئاگادار كرایەوە و لەلایەن فەرمانە و بەرپرسە سەربازییەكانی ئەم میحوەرانە وردەكاریی پلانەكان و ئامادەیی پێشمەرگە لەڕووی ورە و چەك و ڕێوشوێنەكانی خۆپاراستن و تێشكاندنی دوژمن خرایە ڕوو و، سەرۆك بارزانییش فەرماندەكانی هێزی پێشمەرگەی لە ڕێنوێنی و پلانە گشتییە سەربازییەكان و دۆخی سیاسی و سەربازیی و پشتگیریی وڵاتان و دۆستان ئاگادار كردەوە.

هەر لەم بەسەر كردنەوانەدا سەرۆك بارزانی لە هەر سێ میحوەری مەخموور و گوێڕ و خازر وتەی پێشكەشی هێزەكانی پێشمەرگە كرد و تێیدا دەستخۆشی و سوپاسی خۆڕاگریی هێزەكانی پێشمەرگەی كرد و داوایشی لێ كردن كە ڕێگە بە هیچ جۆرە كەموكوڕییەك نەدەن و بە وریایی و چاوكراوەیی سەنگەرەكانیان و خاكی كوردستان بپارێزن بە جۆرێك كە دوژمن بیر لەوە نەكاتەوە كە بتوانێ خاكی كوردستان داگیر بكات. سەرۆك بارزانی ئاماژەی بە مێژووییبوونی ئەم قۆناغە و هەستیاریی ئەركی هێزەكانی پێشمەرگە كرد بە تایبەت كە هەموو دونیا ئێستا بە ڕێز و پێزانینەوە چاوی لە هێز و هیمەتی پێشمەرگەیە و پێشمەرگە بووەتە جێگەی ئومێدی هەموو جیهان چونكە شەڕی تیرۆر دەكات ئەو تیرۆرەی كە هەڕەشەیە لەسەر هەموو مرۆڤایەتیی و جیهان.

سەرۆك بارزانی وێڕای ئاماژەدان بەوەی كە ئەو شەڕی ئێستا پێشمەرگە دەیكات شەڕێكی تازە و شێوازەكانی جیاوازن لە شەڕەكانی دیكە، ئاماژەی بەوەدا ئەو دوژمنەی پێشمەرگە شەڕی لەگەڵ دەكات دوژمنێكە كە هیچ ئاییندەی نییە و لە جیهاندا مەقبووڵ نییە و ئەگەر ئەو دوژمنە لەسەر دەستی گەلی كوردستان تێكبشكێندرێت ئەوە دەبێتە سەروەرییەكی مەزن بۆ كوردستان. سەرۆك بارزانی ئەوەیشی بۆ هێزەكانی پێشمەرگە لە هەر سێ میحوەری مەخموور و گوێڕ و خازر خستەڕوو كە لەوە دڵنیایین كە ئەم بارودۆخە لە بەرژەوەندیی گەلی كوردستان كۆتایی دێت و كوردستان سەردەكەوێت و دەبێ هەموومان بیر لە سەركەوتنی گەلی كوردستان بكەینەوە و كار بۆ ئەم سەركەوتنە بكەین.

ئێوارەی ئەمڕۆ چوارشەممە 13ـی 8ـی 2014 دێڤید كامێرون سەرۆك وەزیرانی بریتانیا لەڕێی تەلەفۆنەوە پەیوەندی بە بەڕێز مەسعود بارزانی سەرۆكی هەرێمی كوردستان كرد.

لەم پەیوەندییەدا سەرۆك وەزیرانی بریتانیا پشتیوانیی تەواوی خۆی بۆ سەرۆك بارزانی و گەلی كوردستان لە شەڕی دژی تیرۆریستان ڕاگەیاند و هیوای سەركەوتنی بۆ خواستن و جەختی لەوە كردەوە كە بریتانیا پشتیوانی گەلی كوردستان دەبێت.

لەبەرانبەردا سەرۆك بارزانی سوپاسی سەرۆك وەزیرانی بریتانیای كرد و ڕایگەیاند كە شانازی بەوە دەكەین كە لە جیاتی جیهانی ئازاد و دیموكرات شەڕی نەك ڕێكخراوێكی تیرۆریستی بەڵكو شەڕی دەوڵەتێكی تیرۆریستی دەكەین و ئەوەیشی خستەڕوو كە هەتا دوایین دڵۆپەی خوێن سوورین لە شەڕی تیرۆریستان و بە هێز و ئیرادەی پۆڵایینی پێشمەرگە ئەو شەڕە دەكەین. سەرۆك بارزانی ئەوەی بە سەرۆك وەزیرانی بریتانیا ڕاگەیاند كە ئێستا گەلی كوردستان پاش ئەوەی وڵاتانی جیهانی ئازاد پاڵپشتیی خۆیان بۆ كوردستان نیشاندا ئومێدێكی زیاتری هەیە و لە هەڵوێستی بەرگری دەرچووە و كەوتووەتە هەڵوێستی هێرشبردن. سەرۆك بارزانی ئاماژەیشی بەوەدا كە گەلی كورد داوای هاتنی سەربازی هیچ وڵاتێك ناكات چونكە توانای مرۆڤی و هێزی پێشمەرگەی هەیە و ئەوەی كوردستان داوای دەكات ئەوەیە كە لەڕووی چەكەوە توانای پێشمەرگە بگاتە ئاستێك كە ڕووبەڕووی تیرۆریستان ببێتەوە تێكیانبشكێنێت. لە بەشێكی دیكەی قسەكانیدا سەرۆك بارزانی پاراستنی هەموو پێكهاتە نەتەوەیی و ئایینییەكانی كوردستانی بە ئەركێكی پیرۆز زانی.
هەر لەم پەیوەندییەدا سەرۆك وەزیرانی بریتانیا سەرسامیی خۆی بە ئازایەتیی پێشمەرگە و ئیرادەی بەهێزی سەرۆك بارزانی نیشاندا لە دژایەتیكردنی تیرۆر و ڕاشیگەیاند كە وڵاتەكەی ئەوەی لەدەستی بێت بۆ یارمەتیدان و پشتگیریی سەربازیی و مرۆیی گەلی كوردستان و بە هەماهەنگی زیاتری مەیدانی لەگەڵ هەرێمی كوردستان دەیكات.

لەدرێژەی پەیوەندییە تەلەفۆنییەكەدا سەرۆك بارزانی وێڕای ئاماژەدان بە هەڵوێستی بریتانیا لە پشتگیریكردنی كوردستان لە ساڵی 1991 سوپاسی هەڵوێستی جوامێرانەی ئێستای بریتانیای كرد و ڕایگەیاند شەڕی تیرۆر پێویستی بە پاڵپشتییەكی دەولی هەیە و چونكە هەڕەشەیە لەسەر هەموو جیهان و بۆ كوردستانیش جێگەی شانازییە كە سەرقافڵەی ئەم جەنگەیە.

پڕۆسەی سیاسیی عێراق و هەنگاوەكانی پێكهێنانی حكوومەتی تازەی عێراق تەوەرێكی دیكەی گفتوگۆی تەلەفۆنیی نێوان سەرۆك بارزانی سەرۆك وەزیرانی بریتانیا بوو. 

ئێوارەی ئەمڕۆ دووشەممە11ـی 8ـی 2014 لەڕێی تەلەفۆنەوە فرانك واڵتێر شتانمایێر وەزیری دەرەوەی ئەڵمانیا پەیوەندی بە بەڕێز مەسعود بارزانی سەرۆكی هەرێمی كوردستان كرد.

لەم پەیوەندییە تەلەفۆنییەدا وەزیری دەرەوەی ئەڵمانیا سوپاسی سەرۆك بارزانیی و هێزی پێشمەرگە و سەركردایەتیی سیاسیی كوردستانی كرد بۆ ڕووبەڕووبوونەوەیان لەدژی تیرۆریستان و یارمەتیدانی ئاوارەكان و پاراستنی خەڵكی سڤیل و پێكهاتە ئایینی و نەتەوەییەكانی عێراق و كوردستان.
هەر لەم پەیوەندییە تەلەفۆنییەدا وەزیری دەرەوەی ئەڵمانیا پاڵپشتیی وڵاتەكەی بۆ گەلی كوردستان دووپات كردەوە و ڕایگەیاند كە وڵاتەكەی ئامادەیە لە شەڕی دژی تیرۆردا لەتەك گەلی كوردستان بوەستێت و ئەوەیشی بە سەرۆك بارزانی ڕاگەیاند كە حكوومەتی ئەڵمانیا دیراسەی چۆنییەتی هاوكاریكردنی حكوومەت و خەڵكی كوردستان دەكات.

لەبەرانبەردا سەرۆك بارزانی سوپاسی وەزیری دەرەوەی ئەڵمانیا كرد و ڕایگەیاند كە خۆشحاڵین بەوەی لە كاتی تەنگانەدا دۆستەكانمان پشتیوانی و هاوكاریی خۆیان بۆ گەلی كوردستان دووپات دەكەنەوە. هەروەها سەرۆك بارزانی سوپاسی هەموو ئەو لایەن و وڵاتانەی كرد كە بۆ ڕووبەڕووبوونەوەی تیرۆر یارمەتیی كوردستان دەدەن. سەرۆك بارزانی ئەوەیشی خستەڕوو كە كوردستان تەنیا شەڕی ڕێكخراوێكی تیرۆریستی ناكات بەڵكو شەڕی دەوڵەتێكی تیرۆریستی دەكات. سەرۆك بارزانی ئەوەیشی بە وەزیری دەرەوەی ئەڵمانیا گوت كە گەلی كوردستان سەربەرزانە بەرگری لەخۆی و ئاییندەی خۆی دەكات و لە سەركەوتنی خۆمان دڵنیاین و لەشەڕی تیرۆر و بەرگریكردن لە خۆی بەردەوام دەبێت. هەر لەم پەیوەندییە تەلەفۆنییەدا وەزیری دەرەوەی ئەڵمانیا ڕایگەیاند كە بۆ یارمەتیدانی هەرێمی كوردستان لەگەڵ وڵاتانی ئەوڕووپایی و هەرێمی كوردستان لە پەیوەندیی بەردەوامدا دەبن.

لە هەولێری پایتەخت بەڕێز مسعود بارزانی سەرۆكی هەرێمی كوردستان پێشوازی لە لۆران فابیۆس وەزیری دەرەوەی فەڕەنسا و شاندێكی یاوەری كرد.

لە كۆبوونەوەیەكدا كە نێچیرڤان بارزانی سەرۆكی حكوومەتی هەرێمی كوردستان و قوباد تاڵەبانی جێگری سەرۆكی حكوومەت و مەسروور بارزانی ڕاوێژكاری ئەنجوومەنی ئاساییشی هەرێمی كوردستان و مستەفا سەید قادر وەزیری پێشمەرگە و فەلاح مستەفا بەرپرسی فەرمانگەی پەیوەندییەكانی حكوومەتی هەرێم و فواد حوسێن سەرۆكی دیوانی سەرۆكایەتی هەرێمی كوردستان ئامادەی بوون سوپاسی پاڵپشتیی فەڕەنسای كرد بۆ گەلی كوردستان بەتایبەتی خودی وەزیر كە هەڵگری پەیامی پشتیوانی سەرۆك و گەلی فەڕەنسا بوو بۆ هەرێمی كوردستان و ڕایگەیاند كە بە پشتبەستن بە خۆمان و هاوكاریی دۆستانمان لەوە دڵنیاین كە تیرۆریستان تێكدەشكێنین. سەرۆك بارزانی ئەوەیشی خستەڕوو كە گەلی كوردستان لەپێناو چەسپاندنی پێكەوەژیان و لێبووردەیی و ئازادییدا ئامادەیە قوربانی بدات.

سەبارەت بە كاریگەریی ڕووداوەكانی ئەم دواییە لەسەر پەیوەندی نێوان كورد و عەرەب سەرۆك بارزانی جەختی لەوە كردەوە كە ڕێگە نادەین تیرۆر پەیوەندیی نێوان كورد و عەرەب تێك بدات. لەبارەی شەڕی تیرۆریشدا سەرۆك بارزانی ئەوەی ڕوونكردەوە كە كوردستان لەشەڕدایە لەگەڵ دەوڵەتێكی تیرۆریستیی پڕچەك و داوای لە وڵاتانی ئازاد كرد كە بۆ تێكشكاندنی تیرۆریستان پشتیوانی كوردستان بن. سەرۆك بارزانی سوپاسی سەرۆكی فەڕەنسا و ئەمەریكا و هەموو ئەو وڵاتانەی كرد كە یارمەتیی كوردستان دەدەن و هێمای بەوەدا كە كوردستان سەركەوتوو دەبێت چونكە پێشمەرگەی قارەمانی هەیە و دۆستی بە وەفا و مەزنیشی هەیە.

لەبەرامبەردا وەزیری دەرەوەی فەڕەنسا سوپاسی سەرۆك بارزانیی كرد بۆ ئەو پێشوازییە گەرمەی لێی كراوە و ڕایگەیاند كە هەڵگری پەیامی پشتیوانیی حكوومەت و گەلی فەڕەنسایە بۆ هەرێمی كوردستان. وەزیری دەرەوەی فەڕەنسا ئاماژەی بەوەدا كە شەڕی كوردستان لەگەڵ تیرۆریستاندا شەڕی فەڕەنسایشە چونكە فەڕەنسا وڵاتی ئازادییەكانە و شەڕی دژی تیرۆر شەڕی پاراستنی ئازادییە. وەزیری دەرەوەی فەرەنسا دووپاتی كردەوە كە فەڕەنسا لەتەك هەرێمی كوردستان دەوەستێت و هاوكارییەكانی بەردەوام دەبێت و ئەوەیشی خستەڕوو كە هانی وڵاتانی ئەوڕووپایی دەدات بۆ ئەوەی پردێكی ئاسمانی لەنێوان ئەوڕووپا و كوردستان دروست بكرێت بە مەبەستی گەیاندنی هاوكاری بۆ ئاوارەكان و حكوومەتی هەرێمی كوردستان.
قسەكردن لەسەر دوا پێشهاتە سیاسی و ئەمنییەكانی هەرێم و پەلاماری تیرۆریستان بۆ كوردستان و بارودۆخی ئاوارەكانی پارێزگای موسڵ و دەڤەری زوممار و شەنگال و چۆنییەتی یارمەتیدانیان تەوەرێكی دیكەی ئەم كۆبوونەوەیە بوو. پاش تەواوبوونی كۆبوونەوەكە سەرۆك بارزانی و وەزیری دەرەوەی فەڕەنسا ناوەڕۆكی كۆبوونەوەكەیان لە پڕێسكۆنفڕانسێكدا بۆ دەزگاكانی ڕاگەیاندن شی كردەوە.
لەکۆنگرە رۆژنامەوانیەکەدا هەردوولا پەیمانی دۆستایەتی نێوانیان دووپاتکردەوە بەوەی کە وەزیری دەرەوەی فەڕەنسا دووپاتیکردەوە ئەو شەڕەی هەرێمی کوردستان لەدژی تیرۆر دەیکات شەڕی فەڕەنساشە وئەم وڵاتەش لەپاڵپشتی خۆی بۆ هەرێمی کوردستان بەردەوام دەبێت وبەشێوەیەکی فەرمیش پەیامی سەرۆکی فەڕەنسای بە هەرێمی کوردستان گەیاند، هاوکات وەزیری دەرەوەی فەڕەنساش رایگەیاند کە 118 تۆن یارمەتی مرۆیی بۆ ئاوارە مەسیحی وئێزدیەکان هێناوە کە لەترسی تیرۆر پەنایان بۆ هەرێمی کوردستان بردووە.
نیشانیشیدا هاتنی ئەو پەیامێکی بەهێزە بەوەی کە فەڕەنسا وەکو دەوڵەتێکی گەورە وگرنگ پشتیوانی گەلی کوردستانە وپشتیوانی هەموو گەلی عیراقە. ئێمە بەپشت بەستن بەخۆمان وبەهاوکاری وپشتیوانی دۆستانمان دڵنیاین کە هەموو تیرۆریست ودوژمنان تێکدەشکێن وسەرکەوتن هەر بۆ ئێمە دەبێت. ئێمە لەسەر رێبازی خۆمان بەردەوام دەبین کە ڕێبازی لێبوردەیی وپێکەوەژیان وئازادی ئایینی ومەزهەبیە وهەرچی قوربانیەک پێویست بێت بۆ زیاتر چەسپاندنی ئەو سەوابینە ئێمە ئامادەین بیبەخشین.
لەلای خۆشیەوە لۆران فابیۆس وەزیری دەرەوەی فەڕەنسا لەوتەیەکدا وێڕای سوپاسگوزاری بۆ سەرۆک بارزانی، دووپاتیکردەوە ئەو پەیامی دۆستایەتی بۆ گەلی کوردستان بەناوی سەرۆک وگەل وحکومەتی فەڕەنسا هێناوە ونیشانیشیدا لەکاتی گەڕانەوەی هانی ئەوروپاییەکانیش دەدا لەسەر هەمان ڕێچکە بڕۆن.

بەبۆنەی دەست بەكاربوونی وەك باڵیۆزی نوێ‌ ی كۆماری ئەڵمانیای فیدڕاڵ لە بەغداد ، ئەمرۆ بەڕێز ئیكهارد بروی سەردانی فەرمانگەی پەیوەندیەكانی دەرەوەی كردو لە لایەن فەلاح مستەفا بەرپرسی پەیوەندیەكانی دەرەوە پێشوازی لێكرا.

لە دیدارێكدا كە كاروان جەمال جێگری بەرپرسی فەرمانگە و ئالفرێد پرۆتز كونسوڵی گشتی ئەڵمانیا ئامادەبوون ، بەرپرسی پەیوەندیەكانی دەرەوە بەخێرهاتن و پیرۆزبایی دەست بەكاربوونی لە باڵیۆز بروس كردو دڵنیای كردەوە كە فەرمانگەی پەیوەندیەكان بەردەوام دەبێت لە هەماهەنگی و پێشكەش كردنی ئاسانكاری پێویست بۆ سەرخستنی ئەرك و كارەكانیان لە هەرێمی كوردستان.

هەر لەو دیدارەدا بەرپرسی فەرمانگە كورتەیەكی دەربارەی پرۆسەی سیاسی لە عێراق و قەیرانەكانی روبەڕوی عێراق بۆتەوە بەگشتی پێشكەش بە باڵیۆز كرد ، هاوكات باسی دوایین گۆرانكاری و بارودۆخی سیاسی و ئەمنی هەرێمی كوردستان و دەستدرێژیەكانی ئەم دواییەی گروپی تیرۆرستی داعش بۆ سەر ناوچە سنوریەكانی هەرێمی كوردستان كرا ، بەرپرسی فەرمانگەی پەیوەندیەكان تیشكی خستە سەر هۆكاری هێرشەكانی گروپی تیرۆرستی داعش بۆ سەر هەرێمی كوردستان ، لە بەرامبەردا پابەندبوونی حكومەتی هەرێم بۆ پاراستنی تێكڕای ناوچەكانی هەرێمی كوردستان و دلێری و بەرپرسیاریەتی هێزی پێشمەرگەی بۆ شاندی مێوان باس كرد كە توانیویانە تاكو ئێستا بەرگری لە هەرێم و ڕێگری لە تیرۆرستان بكەن.

هەر لەم دیدارەدا فەلاح مستەفا ئاماژەی بە مەترسی گەورەی گروپی تیرۆرستی داعش دا نەك تەنها بۆ عێراق و هەرێمی كوردستان بەڵكو مەترسیەكی نێودەوڵەتی گەورەن بۆ جیهان ، بۆیە پێویستە كۆمەڵگای نێودەوڵەتی هاوكاری هەرێمی كوردستان بكات لە ڕوبەڕوبونەوەی تیرۆر و بنبڕكردنیان.
لە تەوەرێكی تری دیدارەكەدا باس لە پێداویستی خێرای مرۆیی كرا بۆ ئاوارەكان كە لە دەرەنجامی ڕوداوەكان ئاوارەبوونو لە توانای حكومەتی هەرێم چۆتە دەرەوە ، بۆیە بەرپرسی فەرمانگە جەختی لەوە كردەوە "كە ئەمرۆ هاوكاری پێویستە نەك بەیانی"

بەشێكی تری دیدارەكە باس لە پەیوەندی دوولایەنەی هەردوولا كراو پێشخستنی پەیوەندیەكان خواستی هەردوولا بوون.

بەمەبەستی ئاگاداركردنەوەی دیپلۆماتكاران و ‏نوێنەرانی ووڵاتانی بیانی و بەرپرسانی رێكخراوە نێودەوڵەتیەكان لە هەرێمی كوردستان، لە دواپەرەسەندنەكانی گۆڕەپانی سیاسی و ئەمنی كوردستان و عیراق و ناوچەكە، رۆژی چوارشەممە فەلاح مستەفا بەرپرسی پەیوەندیەكانی دەرەوەی حكومەت و فەریق جەبار یاوەر ووتەبێژی رەسمی و ئەمینداری گشتی وەزارەتی پێشمەرگە كۆبوونەوەیەكی فراوانیان لەگەڵ دیپلۆماتكاران و ‏نوێنەرانی ووڵاتانی بیانی و نەتەوە یەكگرتووەكان لە هەرێم ئەنجامدا.‏

لە سەرەتای كۆبونەوەكە، فەلاح مستەفا ئامانجی كۆبونەوەكەی بۆ ئامادەبووان ڕوونکردەوە کە ئەم كۆبوونەوەیە بەمەبەستی پتەوكردنی پەیوەندییەكان و خستنەڕووی هەڵوێستی سەركردایەتی سیاسی هەرێمی كوردستانە لە بەرامبەر پەرەسەندنە سیاسی و ئەمنیەكان و مەترسی تیرۆرستان لەسەر هەرێمی كوردستان و عیراق، كە بەم دواییە چەند ناوچەیەكی عیراقیان كۆنترۆل كردووە و كارەساتێكی مرۆیی گەورەی بەدوای خۆیدا هێناوە. وەهەروەها گووتی، ئەم گروپە تیرۆرستیانە ئەندامیان لەزۆر وڵاتی جیهانەوە هاتوون و مۆركێكی نێودەوڵەتی وەرگرتووەو تەنها پەیوەست نییە بە عیراق و ناوچەكە، بۆیە ئەركی كۆمەڵگای نێودەوڵەتییە كاراتر بن بۆ رێگەگرتن لە تەشەنەكردنی دیاردەی تیرۆر.

بەرپرسی پەیوەندیەكانی دەرەوەی حكومەت باسی لە  هەڵوێستی كۆمەڵگای نێودەوڵەتی کرد، کە ستایشی زۆری حكومەتی هەرێمی كوردستانیان كردووە بۆ گەشەسەندن و سەقامگیری هەرێمی كوردستان و بەرپەرچەردانەوەی تیرۆرستان و لەخۆگرتنی ژمارەیەكی زۆری ئاوارەی سوریاو ناوخۆی عیراق كە بەهۆی ناسەقامگیری و لە ترسی تیرۆرستان ناوچەكانی خۆیان جێهێشتووە. بەرێزیان گووتی،  كاتی ئەوە هاتووە ئەمڕۆ كۆمەلگای نێودەوڵەتی بە شێوەی پراكتیكی یارمەتی مرۆیی و سەربازی پێشكەش بە حكومەتی هەرێمی كوردستان بكەن.

فەلاح مستەفا ئەوەشی گووت کە ئەو كارەساتە مرۆییەی لە شنگال روودەدات نابێ‌ كۆمەڵگای نێودەوڵەتی لێی بێدەنگ بێت و دەبێ‌ یارمەتی ئەو خێزانانەی چیای شنگال بدرێت و كۆمەك و یارمەتیان پێشكەش بكرێت. دواتر باسی لە رەوشی ئەمڕۆی عیراق و پەیوەندی هەولێر و بەغدا و تەنگژەو ئاڵۆزیەكانی نێوان هەردوولا كرد بە تایبەت چەقبەستوویی پرۆسەی سیاسی پێكنەهێنانی حكومەت و راگرتنی بەشە بودجەی هەرێمی كوردستان.

لە کۆتاییدا، بەرپرسی پەیوەندییەكانی دەرەوە جەختی لەسەر سیاسەتی حكومەتی هەرێم كردەوە سەبارەت بە زیاتر بەهێزكردنی پەیوەندییەكان لەڕووی سیاسی و ئابووری و فەرهەنگی و پەرەپێدانی تواناكان لەگەڵ وڵاتانی جیهان بە گشتی و وڵاتانی ناوچەكە بەتایبەتی و گووتی: لە ماوەی رابڕدوو دا ئەم پەیوەندیانە پێشكەوتنێكی بەرچاویان بەخۆیەوە بینیوە.

شایانی باسە، هەریەک لە  كاروان جەمال جێگری بەرپرسی فەرمانگە و نوێنەرانی حكومەتی هەرێمی کوردستان لە نەمسا و ئیتاڵیا ئامادەی کۆبوونەوەکە بوون.