هەرێمی کوردستان
سەرۆكی هەرێمی كوردستان و جێگری سەرۆكی ویلایەتە یەكگرتووەكانی ئەمەریكا لە پەیوەندییەكی تەلەفۆنیدا شەڕی داعش و بارودۆخی سیاسیی عێراقیان تاوتوێ كرد
ئێوارەی ڕۆژی دووشەممە 11ـی 4ـی 2016 بەڕێز جۆ بایدن جێگری سەرۆكی ویلایەتە یەكگرتووەكانی لەڕێی تەلەفۆنەوە پەیوەندی بە بەڕێز مەسعود بارزانی سەرۆكی هەرێمی كوردستان كرد.
لەم پەیوەندییە تەلەفۆنییەدا دوایین پێشهاتە سیاسییەكانی عێراق خرایە بەر باس و بیروڕا لەبارەی چارەسەركردنی بارودۆخی سیاسیی عێراق ئاڵوگۆڕ كرا و هەردوولا لەسەر پێویستیی چارەسەركردنی پڕۆسەی سیاسی هاوڕابوون و جەختیش لە هەماهەنگی و ڕاوێژی هەردوولا كرایەوە بۆ پشتگیریكردنی سەقامگیریی سیاسی و چارەكردنی پڕۆسەی سیاسی.
هەر لەم پەیوەندییە تەلەفۆنییەدا ڕۆشنایی خرایە سەر شەڕی داعش و ئامادەكارییەكانی ئۆپڕاسیۆنی ئازادكردنی موسڵ و تەئكید لەسەر كاری هاوبەش و هەماهەنگیی بەردەوامی نێوان هێزە هاوپەیمانەكان و هێزی پێشمەرگە و هێزەكانی عێراقی كرایەوە لە تێكشكاندنی تیرۆریستان و ئازادكردنی ناوچەكانی ژێر دەستی تیرۆریستانی داعش.
سەرۆكی هەرێمی كوردستان پێشوازی لە وەزیری بەرگریی فەڕەنسا دەكات
ڕۆژی سێشەممە 12ـی 4ـی 2016 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە ژان ئێڤ لۆدریان وەزیری بەرگریی فەڕەنسا و شاندێكی یاوەری كرد كە پێكهاتبوو لە مارك بارێتی باڵیۆزی فەڕەنسا لە عێراق و ئاڵێن گیبڕات كونسوڵی گشتیی فەڕەنسا لە هەولێر و ژمارەیەك ڕاوێژكار و بەرپرسی وەزارەتی بەرگریی فەڕەنسا.
لە دیدارەكەدا وەزیری بەرگریی فەڕەنسا خۆشحاڵیی خۆی بۆ هاتنی بۆ كوردستان و دیدار لەگەڵ سەرۆك بارزانی نیشاندا و ستاییشی ڕۆڵ و بوێریی هێزی پێشمەرگەی كوردستانی كرد لە شكاندنی داعش و ئازادكردنی ناوچەكان و بە تایبەتی ئازادكردنی شنگال لە لایەن پێشمەرگەی بە قارەمانانە وەسف كرد كە كاریگەریی زۆری لەسەر ڕای گشتیی جیهانی و فەڕەنسا جێهێشتووە. وەزیری بەرگریی فەڕەنسا ئەوەیشی ڕاگەیاند تیرۆر دوژمنێكی هاوبەشی هەموومانە و ئەوانیشی لە ئەوروپا ئازار داوە و وێڕای ئاماژەدان بەوەی كە فەڕەنسا لە تەحەدیات و گرفتەكانی هەرێمی كوردستان و قەیرانی ئابووری باش تێگەییشتووە جەختی لەوە كردەوە كە وڵاتەكەی بەردەوام دەبێت لە پشتیوانیكردنی هەرێمی كوردستان و هاوكاریكردنی پێشمەرگە و لە چوارچێوەی هاوپەیمانێتیی نێودەوڵەتیدا بەشدار دەبێ لە شەڕی ئازادكردنی موسڵ.
لەبەرانبەردا سەرۆك بارزانی بە گەرمی بەخێرهاتنی وەزیری بەرگریی فەڕەنسا و شاندی یاوەری كرد و سوپاسی گەل و سەرۆك و حكوومەتی فەڕەنسای كرد كە هاوسۆز و پشتیوانی گەلی كوردستان و پێشمەرگەن، هەروەها سوپاسی تیمە سەربازییەكانی فەڕەنسای كرد كە لە مەشق و ڕاهێنان و ڕاوێژدا یارمەتیی پێشمەرگەیان داوە. سەرۆك بارزانی لە گوتەیەكدا باسی لە بارودۆخی مەیدانیی بەرەكانی شەڕ و ئۆپڕاسیۆنی ئازادكردنی شنگال كرد و پەیوەست بە هەڕەشەی تیرۆر هێمای بەوەدا كە ڕووداوە تیرۆریستییەكانی پاریس و بروكسێل و پەلاماری تیرۆریستان بۆ سەر كوردستان بەڵگەی ڕوونن كە تیرۆر هەڕەشەیەكه بۆ هەموو وڵاتان و ڕووبەڕووبوونەوەیشی هەوڵێكی هەمە لایەنەی كۆمەڵگەی نێودەوڵەتی پێویستە و ئەوەیشی خستەڕوو كە جێگەی شانازییە لەسەر دەستی پێشمەرگە ئەفسانەی داعش تێكشكێندرا. لەبارەی ئامادەكارییەكان بۆ ئۆپڕاسیۆنی ئازادكردنی موسڵیش سەرۆك بارزانی باسی ئەو تەحەدیات و مەترسیانەی كرد كە لە ئەنجامی پەلاماری تیرۆریستان بۆ سەر خەڵك هاتووەتە ئاراوە و تەئكیدی لەوە كردەوە كە لەپێناو ڕێگەگرتن لە دووبارەبوونەوەی كارەساتەكان و دڵنیایی پێكهاتە نەتەوەیی و ئایینی و مەزهەبیی پارێزگای نەینەوا پێویستە ڕێككەوتن و پلانێكی سیاسیی ورد لەنێوان لایەن و پێكهاتەكاندا هەبێت.
لە بەشێكی دیكەی كۆبوونەوەكەدا وەزیری بەرگریی فەڕەنسا باسی لەو هاوكارییانە كرد كە وڵاتەكەی بەنیازە لە داهاتوودا پێشكەشی پێشمەرگەی بكات و ئەوەیشی خستەڕوو كە سەرۆكی فەڕەنسا لە بارودۆخی مەیدانی شەڕ و تەحەدیاتی هەرێمی كوردستان و بیروبۆچوونی سەرۆك بارزانی لەبارەی كۆی كێشەكان ئاگادار دەكاتەوە.
سەرۆكی هەرێمی كوردستان پێشوازی لە ڕابەری بزووتنەوەی ئیسلامی لە كوردستان دەكات
ڕۆژی چوارشەممە 13ـی 4ـی 2016 لە سەلاحەددین بەڕێز مەسعود بارزانی سەرۆكی هەرێمی كوردستان پێشوازی لە مامۆستا عیرفان عەبدولعەزیز ڕابەری بزووتنەوەی ئیسلامی لە كوردستان و شاندی یاوەری كرد.
لە دیدارەكەدا باس لە بارودۆخی سیاسیی ناوچەكە و دوا پێشهات و گۆڕانكارییە سیاسییەكانی عێراق و پەیوەندییەكانی نێوان هەولێر و بەغدا كرا و هەروەها ئاییندەی پەیوەندییەكان و ڕیفراندۆمی خەڵكی كوردستان و تەحەدیات و دەرفەتەكانی بەردەم هەرێمی كوردستان تاوتوێ كرا.
هەر لەم كۆبوونەوەیەدا باس لە بارودۆخی سیاسی ناوخۆی هەرێم كرا و ڕۆشنایی خرایە سەر سەقامگیریی سیاسی و قەیرانی دارایی و هەروەها پڕۆسەی چاكسازی و بەرژەوەندییە باڵاكانی گەلی كوردستان.
ئه‌نجومه‌نى وه‌زیران سه‌رى ساڵى ئاشووریى بابلى و جهژنهكانى ئه‌كیتۆ پیرۆز ده‌كات
سه‌رى ساڵى ئاشووریى بابلى و جهژنهكانى ئه‌كیتۆ، به گه‌رمى له ته‌واوى خوشك و برایانى ئاشوورى، كلدانى و سریانى له كوردستان، عیراق و ته‌واوى جیهان پیرۆز ده‌كه‌ین. هیواى ساڵێكى خۆش، ئارام و پڕ له كامه‌رانییان بۆ ده‌خوازین.
هیوادارین جه‌ژنى كۆتاییهاتنى هه‌موو ناخۆشییه‌كان و شكاندن و له‌ناوبردنى تیرۆرستان بێت، بۆ ئه‌وه‌ى هه‌موو خوشك و برایانى ئاواره‌ى مه‌سیحى و ته‌واوى ئه‌و ئاوارانه‌ى له هه‌موو پێكهاته نه‌ته‌وه‌یى و ئایینه‌كان، ناچار بوون ماڵ و حاڵى خۆیان جێبهێڵن، به سه‌ركه‌وتوویى و سه‌ربه‌رزانه بگه‌ڕێنه‌وه سه‌ر ماڵ و حاڵى خۆیان.
تیرۆرستان به تاوانكارییه‌كانیان گورزێكى گه‌وره‌یان كه‌لتوورى پێكهوهژیانى پێكهاته نه‌ته‌وه‌یى و ئایینییه‌كان له ناوچه‌كه داوه، به‌ڵام هه‌رێمى كوردستان وه‌ك هه‌میشه به لانكه‌ى ئارامى لێبورده‌یى و پێكهوهژیانى ئایینى و نه‌ته‌وه‌یى ده‌مێنێته‌وه و ڕۆڵه‌كانى كورستانییان به هه‌موو پێكهاته‌كانیانه‌وه، تیرۆرستان له‌ناو ده‌به‌ن و سه‌رده‌كه‌ون.
دووباره سه‌رى ساڵى ئاشووریى بابلى و جهژنهكانى ئه‌كیتۆ له هه‌موو لایه‌ك پیرۆز ده‌كه‌ین، هیوادارین جهژنهكانى داهاتوومان له سایه‌ى سه‌ركه‌وتن و ئاشتى و ئارامى و سه‌قامگیرییه‌كى یه‌كجاریدا بكه‌ینه‌وه.
ئه‌نجومه‌نى وه‌زیرانى هه‌رێمى كوردستان
31.3.2016
سەرۆكی هەرێمی كوردستان پێشوازی لە سەرۆكی ئیئتیلافی نیشتیمانیی عێراقی دەكات
ڕۆژی شەممە 9ـی 4ـی 2016 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە د. ئەیاد عەلاوی سەرۆكی ئیئتیلافی نیشتیمانیی عێراقی و شاندێكی یاوەری كرد.
لە دیدارەكەدا سەرۆكی ئیئتیلافی نیشتیمانیی عێراقی و شاندی یاوەری، سەرۆك بارزانیان لە بیروڕای خۆیان سەبارەت بە بارودۆخی عێراق و قەیرانی سیاسی و چۆنییەتی چارەسەركردنی قەیرانەكە ئاگادار كردەوە و هەروەها سەرۆك بارزانیش سیاسەتی هەرێمی كوردستانی لەمبارەیەوە بۆ شاندی میوان خستەڕوو.
هەر لەم كۆبوونەوەیەدا هەردوولا لەسەر ئەوە هاوڕا بوون كە پڕۆسەی سیاسی بە بێ پابەندبوونی لایەنەكان بە پڕەنسیپی شەراكەت ناچێتە پێش و قەیرانەكانیش چارەسەر ناكرێن.
كۆماری چیك چەند پرۆژەیەك لە هەرێمی كوردستان جێبەجێ دەكات
پاشنیوەڕۆی ئەمڕۆ دووشەممە 4 - 4 - 2016 بەڕێز نێچیرڤان بارزانی سەرۆك وەزیرانی هەرێمی كوردستان، پێشوزای لە خاتوو ئێڤا درداكۆڤا كونسوڵی گشتیی نوێی كۆماری چیك لە هەرێمی كوردستان و شاندێكی یاوەری كرد.
لە دیدارێكدا بەڕێز سەرۆك وەزیرانی هەرێمی كوردستان وێڕای بەخێرهێنان، پیرۆزبایی دەستبەكاربوونی لە خاتوو درداكۆڤا كرد كە وەك كونسوڵی گشتیی نوێی كۆماری چیك لە هەرێمی كوردستان دەستبەكار بووە و هیوای سەركەوتنی بۆ خواست و هەموو هاوكاری و پشتگیرییەكی حكوومەتی هەرێمی كوردستان و لایەنە پەیوەندارەكانی بۆ كار و چالاكییەكانی كونسوڵخانەی گشتیی چیك لە هەرێمی كوردستان دووپات كردەوە.
لە كۆبوونەوەكەدا هەردوولا جەختیان لە پەرەپێدانی پەیوەندیی نێوان هەرێمی كوردستان و كۆماری چیك كردەوە و ئامادەییان بۆ پێشكەشكردنی هەموو ئاسانكارییەك لەپێناو بەرەوپێشەوەبردنی پەیوەندییەكان لە هەموو بوارەكاندا بە تایبەتی لەو بوارانەدا كە بۆ هەردوولا گرنگن، دەربڕی.
لە بەشێكی دیكەی دیدارەكەدا خاتوو درداكۆڤا جەختی لەوە كردەوە كە وڵاتەكەی لە پشتگیری و هاوكاریكردنی هێزی پێشمەرگە لە شەڕی دژی داعش بەردەوام دەبێت و ئاماژەی بەوەش دا كە چەند پرۆژەیەك لە هەرێمی كوردستان جێبەجێی دەكەن لەوانە سپۆنسەركردنی كەمپی ئاشتی بۆ ئاوارە و پەنابەران لە پارێزگای سلێمانی، دروستكردنی باڵەخانەی كەنیسەیەك لە ئەلقۆش، ڕاهێنانی پزیشكانی هەرێمی كوردستان لە پراگی پایتەختی چیك، چارەسەركردنی پێشمەرگە بریندارەكان لە نەخۆشخانە سەربازییەكانی چیك بە تایبەتی ئەوانەی كە چارەسەرییان لە هەرێمی كوردستان نییە و لە داهاتووشدا بەشداریكردن لە ئاوەدانكردنەوەی ئەو دەڤەرانەی لەژێر دەستی داعش ڕزگار كراون.
تاوتوێكردنی ڕەوشی ناوچەكە بە گشتی و عێراق و هەرێمی كوردستان بە تایبەتی و چەند بابەتێكی دیكەی پەیوەندیدار، لایەنێكی دیكەی دیدارەكە بوو.
دوایین هەواڵەکان
- «سەلام رشدی» لهگهڵ «سەفین دزەیى» بەرپرسى پەیوەندییەکانى دەرەوە کۆبووه
- پهيامى سهرۆك نێچيرڤان بارزانى بۆ ساڵى نوێ
- پەیامی سەرۆکی حکومەتی هەرێمی کوردستان بە بۆنەی سەری ساڵی نوێی زایینی2025
- سهرۆكى هه‌رێمى كوردستان، پێشوازيى له كونسوڵی گشتيى نوێى ئێران كرد
- عەباس غەزالی: کۆچی مامۆستا مهنسوور یاقووتی وهک لهدهست چونی یاقووتێکی گرانبههایه
- سهرۆک نێچیرڤان بارزانی لهگهڵ وهزیری بهرگریی هۆڵهندا کۆبووهوه
- سهرۆك نێچيرڤان بارزانى پێشوازيى له ئيسماعيل بهشيكچى كرد
- سهرۆك نێچيرڤان بارزانى و وهزيرى بهرگريى ئيتاڵيا كۆبوونهوه
- سهرۆك نێچيرڤان بارزانى لهگهڵ فەرماندەی هێزەکانی هاوپەیمانيی نێودەوڵەتی كۆبووهوه
- سهرۆك نێچيرڤان بارزانى پێشوازیی له باڵيۆزى نوێى چيك كرد