له میانه‌ی سه‌ردانه‌که‌یدا بۆ ووڵاتی به‌ریتانیا فه‌لاح مسته‌فا به‌رپرسی په‌یوه‌ندیه‌کانی ده‌ره‌وه چاوی که‌وت به تۆبایه‌س ئێڵوود وه‌زیری کاروباری ڕۆژهه‌ڵاتی ناوه‌راست له حکومه‌تی ئه‌و ووڵاته. له‌دانیشتنەکە‌دا باس له ڕه‌وشی ئێستای کوردستان و عیراق و هه‌ڕه‌شه‌کانی تیرۆریستانی داعش کرا.
به‌رپرسی په‌یوه‌ندیه‌کانی ده‌ره‌وه ئاماژه‌ی به سه‌رکه‌وتنه‌کانی هێزه‌کانی پێشمه‌رگه‌دا و ووتی له‌گه‌ڵ ئه‌وه‌شدا هه‌ڕه‌شه‌ی ئه‌و گرووپه تیرۆریستیه به‌رده‌وام کاریگه‌ری له‌سه‌ر بارودۆخه‌که هه‌یه و پێویسته تواناکانمان به یه‌که‌وه بخه‌ینه گه‌ڕ بۆ ئه‌وه‌ی ئه‌و گرووپه له‌ناو ببه‌ین. ووتیشی: " ده‌بێت ئامانجی ئه‌و شه‌ڕه له‌ناوبردنی داعش بێت، نه‌وه‌ك له خۆگرتن و لاوازکردنی، چونکه ئه‌و گرووپه تیرۆریسیه هه‌ڕه‌شه‌یه بۆ سه‌ر هه‌موو جیهان. ئه‌گه‌ر له‌ناو نه‌بردرێت ئه‌وا ڕۆژ له دوای ڕۆژ ته‌شه‌نه‌ی زیاتر ده‌کات و هه‌ڕه‌شه‌که‌شی له‌سه‌ر ناوچه‌که و جیهاندا زیاتر ده‌بێت."
وتیشی: "بۆ ئه‌وه‌ی ئه‌و ئامانجه بپێکین، پێویسته چه‌کی قورسی زیاتر بدرێته هێزی پێشمه‌رگه و ڕاهێنانی زیاتری بۆ بکرێت بۆ ئه‌وه‌ی بتوانێت زه‌بری کوشنده‌تر له‌و تیرۆریستانه بدات." ده‌رباره‌ی ئازادکردنی موسڵیش، به‌رپرسی په‌یوه‌ندیه‌کانی ده‌ره‌وه ئاماژه‌ی به‌وه‌دا که پێشمه‌رگه ده‌توانێت ڕۆڵی به‌رچاو ببینێت له‌و پڕۆسه‌یه، به‌ڵام ده‌بێت لایه‌نی عیراقی و بە تایبەتیش پێکهاتەی سوننە ڕۆڵی سه‌ره‌کی هه‌بێت و ئاماده‌باشی زیاتریشی بۆ بکرێت.
فه‌لاح مسته‌فا هه‌روه‌ها ووتی که داعش ته‌نها به شه‌ڕ له‌ناو نابردرێت، به‌ڵکو ده‌بێت سه‌رچاوه دارایی و ئابووری و ئایدیۆلۆژیاکه‌شی ڕابگیردرێت. هه‌روه‌ها ووتی ده‌بێت حکومه‌تی عیراقی کار له‌سه‌ر ئه‌وه بکات که پێکهاتەی سووننه پشتگوێ نه‌خرێن و ڕۆڵی خۆیان له پڕۆسه‌ی سیاسی عیراقدا هه‌بێت. له لایه‌کی تره‌وه به‌رپرسی په‌یوه‌ندیه‌کانی ده‌ره‌وه جارێکی تر نیگەرانی حکومه‌ت و گه‌لی کوردستانی له‌سه‌ر بەشدارینەکردنی کورد لە کۆنفڕانسه‌که‌ی هاوپه‌یمانان له‌سه‌ر داعش که له له‌نده‌ن له‌م دواییانه‌دا به‌سترا دووپات کرده‌وه. ووتیشی که پێویسته ڕۆڵی سه‌رکردایه‌تی کورد و پێشمه‌رگه‌ی کوردستان له شه‌ڕ له دژی داعش و گۆڕینی هاوکێشه‌کان له‌به‌رچاو بگیردرێت، چونکه له سه‌ر ئه‌رزی واقیعدا پێشمه‌رگه‌ی کوردستانه توانیویه‌تی شکست به‌و تیرۆریستانه بێنێت و هێزه‌کانیان لاواز بکات.
سه‌باره‌ت به کێشه‌کانی نێوان به‌غدا و هه‌ولێر، فه‌لاح مسته‌فا ئه‌وه‌ی دووپات کرده‌وه که حکومه‌تی هه‌رێمی کوردستان به‌رده‌وام ده‌بێت له پابه‌ندبوون به‌و ڕێککه‌وتننه‌ی که له‌گه‌ڵ به‌غدا به‌م دواییانه واژووی کردووه، به‌ڵام له هه‌مانکاتدا پێویسته به‌غدا پابه‌ند بێت به ڕێککەتن و به‌ڵێنه‌کان به تایبه‌تیش له ڕووی دابینکردنی بودجەی هەرێم و مووچه‌ی هاووڵاتیان و بودجه‌ی پێشمه‌رگه. هه‌روه‌ها ووتی: " به‌غدا وەکو پێویست هاریکاریمان ناکات له شه‌ڕ له دژی داعش. پێویسته بەغدا مافی خۆمان له بودجه ڕه‌وانه بکات و له ڕووی سه‌ربازیشدا هاریکاری زیاترمان بکات."
هه‌ر له کۆبوونه‌وه‌که‌دا فه‌لاح مسته‌فا ئاماژه‌ی به‌وه‌دا که پێویستە بەریتانیا سیاسەتێکی واقیحبینانە پەیڕەو بکات بۆ مامەڵەکردن لەگەڵ بارودۆخی ئێستای عیراق. داوای هاریکاری زیاتری سه‌ربازی و مرۆییشی له حکومه‌تی به‌ریتانیا کرد و ووتی که له کوردستان 2 ملیۆن ئاوارەی ناوخۆ و پەنابەر هەیە. ووتیشی ئه‌و ژماره گه‌وره‌یه پاڵه‌په‌ستۆیه‌کی یه‌کجار زۆری خستۆته سه‌ر حکومه‌تی هه‌رێمی کوردستان. ووتیشی له‌گه‌ڵ سوپاسمان بۆ ئه‌و هاوکاریانه‌ی که حکومه‌تی به‌ریتانیا و کۆمەڵگای نێودەوڵەتی تا ئێستا پێشکه‌شی کردوون، داوای یارمه‌تی زیاتر ده‌که‌ین بۆ ئه‌وه‌ی بتوانین به‌رده‌وام بین له دابینکردنی پێداویستیه‌کانی ڕۆژانه‌ی ئه‌و په‌نابه‌رانه.
له لای خۆیه‌وه‌ش تۆبایه‌س ئێڵوود وه‌زیری کاروباری ڕۆژهه‌ڵاتی ناوه‌ڕاست له حکومه‌تی به‌ریتانیا ستایشی قاره‌مانییه‌تی و ڕۆڵی گه‌وره‌ی پێشمه‌رگه‌ی کوردستانی کرد له ڕووبه‌ڕووبوونه‌وه‌ی داعش و شکستهێنان به‌و گرووپه تیرۆریستیه. ووتیشی که هه‌موو جیهان شانازی به‌و ڕۆڵه‌ی پێشمه‌رگه ده‌کات، بۆیه‌ش له هه‌موو لایه‌که‌وه هاریکاری پێشکه‌ش ده‌کرێت. له هه‌مان کاتیشدا ئه‌وه‌ی دووپات کرده‌وه که ووڵاته‌که‌ی به‌رده‌وام ده‌بێت له پێشکه‌شکردنی هاریکاری و یارمه‌تی سه‌ربازی بۆ له‌ناوبردنی داعش. له لایه‌کی تریشه‌وه جه‌ختی له‌سه‌ر ئه‌وه کرده‌وه که ووڵاته‌که‌ی له ڕێگای باڵیۆزخانه‌که‌یان له به‌غداوه به‌رده‌وام ده‌بێت له پێشکەشکردنی هاریکاری بۆ یەکلاییکردنەوەی کێشەکان بە تایبەتیش لە بواری پێشکەشکردنی هاریکاری زیاتر و یەکلاییکردنەوەی پرسی بودجەی هەرێم.