هەرێمی کوردستان
سه‌رۆك نێچيرڤان بارزانى له‌گه‌ڵ وه‌زيرى ده‌ره‌وه‌ى توركيا كۆبووه‌وه
ئێواره‌ى ئه‌مڕۆ سێشه‌ممه 2024/7/30 له په‌راوێزی به‌شدارییاندا له ڕێوڕه‌سمى سوێندخواردنى به‌ڕێز سه‌رۆكى كۆمارى ئيسلاميى ئێراندا، به‌ڕێزان نێچيرڤان بارزانى، سه‌رۆكى هه‌رێمى كوردستان و هاكان فيدان وه‌زيرى ده‌ره‌وه‌ى توركيا كۆبوونه‌وه.
له كۆبوونه‌وه‌كه‌دا جه‌ختيان له خواستى دوولايه‌نه بۆ فراوانكردنى هاريكاريى هاوبه‌ش و بره‌ودان به په‌يوه‌ندييه‌كانى توركيا له‌گه‌ڵ عێراق و هه‌رێمى كوردستان له هه‌موو بواره‌کاندا كرده‌وه، هه‌روه‌ها تيشكيان خسته‌ر دوايين پێشهاته‌كانى ناوچه‌که و چه‌ند پرسێكى جێى بايه‌خى هاوبه‌ش.
https://presidency.gov.krd/president-nechirvan-barzani-meets-with-turkish-foreign-minister-3/
په‌يامى سه‌رۆك نێچيرڤان بارزانى بۆ يادى ئه‌نفالى بارزانييان
ئه‌مڕۆ له يادى (41) ساڵه‌ى ئه‌نفالكردنى بارزانيياندا، به شكۆدارييه‌وه يادى هه‌شت هه‌زار گه‌نج و پياو و پيرى بارزانى ده‌كه‌ينه‌وه كه 31ى ته‌ممووز تا ناوه‌ڕاستى ئابى 1983 له هه‌ڵمه‌تێكى دڕندانه‌ى ڕژێمى ئه‌وساى عێراقدا، له كۆمه‌ڵگه زۆره‌ملێكانى هه‌ولێر بێسه‌روشوێن و كۆمه‌ڵكوژ كران. دروود بۆ گيانى پاكيان، سه‌رى ڕێز و نه‌وازش له‌به‌رده‌مياندا داده‌نوێنين، سڵاو له خێزان و كه‌سوكاريان.
ئه‌نفالى بارزانييان وه‌ك هه‌موو تاوانكارييه‌كانى ديكه‌ى مێژوو، بۆ شكاندنى ئيراده‌ى گه‌لى ئازاديخوازى كوردستان بوو، به‌ڵام بووه په‌ڵه‌يه‌كى ڕه‌ش به نه‌وچه‌وانى ئه‌نجامده‌رانييه‌وه. هێز و وگوڕ و تينى زياترى به بزووتنه‌وه‌ى ڕزگاريخوازى كوردستان دا و دلێرانه‌تر ڕووبه‌ڕووى سته‌م و دكتاتۆرى بووه‌وه.
دايكانى ميهره‌بانى بارزانى و بارزانييه‌كان به‌گشتى له‌گه‌ڵ ئه‌نفالدا به‌رگه‌ى هه‌موو ئێش و ئازار و لێكه‌وته خراپه‌كانى ئه‌و مه‌رگه‌ساته‌يان گرت و له‌سه‌ر پێى خۆيان وه‌ستان. توانييان سه‌ربه‌رزانه منداڵه بێنازه‌كانيان به‌خێو و په‌روه‌رده بكه‌ن و نه‌وه‌يه‌كى دڵسۆز و لێهاتوو پێبگه‌يه‌نن. سڵاو له هه‌موو ئه‌و دايك و هاوسه‌ر و خوشكه شكۆمه‌ندانه‌ى له‌و هه‌موو ئازار و دۆخه سه‌خت و دژواره‌دا كۆڵيان نه‌دا، ده‌ستيان ماچ ده‌كه‌م.
سوپاس و پێزانين بۆ هه‌موو ئه‌و جوامێرانه‌ى ئه‌و ڕۆژگاره سه‌خته، يارمه‌تيى لێقه‌وماوانى بارزانييان دا. خزمه‌ت و دڵسۆزيى ئه‌وان هه‌رگيز له‌بير ناكرێت. له‌م ياده‌دا دووپاتى ده‌كه‌ينه‌وه كه كار و هه‌وڵمان بۆ ناساندنى ئه‌نفالى بارزانييان و كاره‌ساته‌كانى ديكه‌ى گه‌لى كوردستان وه‌ك جينۆسايد له‌سه‌ر ئاستى نێوده‌وڵه‌تى به‌رده‌وام ده‌بێت. جه‌خت له يه‌كڕيزى و ته‌بايى و پێكه‌وه‌ييى لايه‌نه سياسييه‌كان و پێكهاته‌كانى كوردستان و قه‌رەبووكردنه‌ى كه‌سوكارى ئه‌نفالكراوان ده‌كه‌ينه‌وه.
سڵاو له يادى هه‌موو شه‌هيدانى كوردستان.
نێچيرڤان بارزانى
سه‌رۆكى هه‌رێمى كوردستان
2024/7/31
سه‌رۆک نێچیرڤان بارزانی له‌گه‌ڵ باڵیۆزی یه‌کێتیی ئه‌ورووپا کۆبووه‌وه
به‌یانیی ئه‌مڕۆ شه‌ممه ٢٠٢٤/٨/٣ به‌ڕێز نێچیرڤان بارزانی، سه‌رۆکی هه‌رێمی کوردستان، پێشوازی له به‌ڕێز تۆماس زایلەر، باڵیۆزی یەکێتیی ئەورووپا لە عێراق کرد.
له کۆبوونه‌وه‌یه‌کدا په‌یوه‌ندییه‌کانی هه‌ولێر – به‌غدایان تاوتوێ کرد و دوا هه‌نگاوه‌کان و به‌ره‌وپێشچوونی گفتوگۆی هه‌ردوولایان بۆ چاره‌سه‌رکردنی کێشه‌کان به ئه‌رێنی هه‌ڵسه‌نگاند، هه‌روه‌ها پشتگیرییان بۆ به‌رده‌وامیی گفتوگۆ و چاره‌سه‌ری کێشه‌کان به لێکگه‌یشتن دووپات کرده‌وه.
له‌مباره‌یه‌وه به‌ڕێز باڵیۆزی یه‌کێتیی ئه‌ورووپا گوتی: هەموو هەوڵێک دەدەن بۆ ئه‌وه‌ی یارمەتیی حکوومەتی هەرێمی کوردستان و حکوومه‌تی فیدراڵی بده‌ن بۆ کاراکردنی ئابووری و دەرفەته‌کانی کار.
له ته‌وه‌رێکی دیکه‌ی کۆبوونه‌وه‌که‌دا باسیان له یادی ده ساڵه‌ی جینۆساید و دۆخی ئێستا و داهاتووی ئێزدییان و پێکهاته‌کان له هه‌رێمی کوردستان و عێراق کرد، هه‌وره‌ها تیشکیان خسته سه‌ر ڕێککه‌وتنی حکوومه‌تی عێراقی فیدرال و حکوومه‌تی هه‌رێمی کوردستان بۆ ئاساییکردنه‌وی دۆخی شه‌نگال، پرسی کۆچ و دوا پێشهاته‌کانی ناوچه‌که به‌گشتی.
https://presidency.gov.krd/president-nechirvan-barzani-meets-with-european-union-ambassador-2/
سه‌رۆك نێچيرڤان بارزانى: هه‌ميشه پشتيوانى و به‌رگرى له مافه‌كانى ئێزدييان ده‌كه‌ين
به‌يانيى ئه‌مڕۆ شه‌ممه 2024/8/3 به‌ڕێز نێچيرڤان بارزانى، سه‌رۆكى هه‌رێمى كوردستان، به‌شدارى له ڕێوڕه‌سمى يادى ده ساڵه‌ى جينۆسايدى ئێزديدا كرد كه له له لايه‌ن زانكۆى كوردستان هه‌ولێر و نووسينگه‌ى ڕزگاركردنى ڕفێنراوانى ئێزدييه‌وه له هه‌ولێر ساز كرا.
له ڕێوڕه‌سمه‌كه‌دا كه به‌ڕێزان نوێنه‌رى سه‌ركۆمارى عێراق، نوێنه‌رى سه‌رۆك وه‌زيرانى هه‌رێمى كوردستان و قوباد تاڵه‌بانى جێگرى سه‌رۆك وه‌زيرانى هه‌رێمى كوردستان، ميرى ئێزدييان و بابه‌شێخ و سه‌رۆكى ئه‌نجومه‌نى دادوه‌ريى هه‌رێمى كوردستان و ژماره‌يه‌ك له به‌رپرسانى حكوومى و حزبيى عێراق و هه‌رێمى كوردستان و ديپلۆماتكاران و چه‌ندين چين و توێژى ئێزدى و ميوانان ئاماده‌ى بوون، سه‌رۆك نێچيرڤان بارزانى، وتارێكى پێشكه‌ش كر، ئه‌مه ده‌قه‌كه‌يه‌تى:
جه‌نابى ميرى ئێزدييان، مير حازم ته‌حسين به‌گ،
جه‌نابى بابه‌شێخ،
خوشك و برایێن خۆشەویست یێن ئێزدی،
ئاماده‌بووانى به‌ڕێز..
به‌يانيتان باش..
هه‌موو لايه‌كتان به خێر بێن بۆ ڕێوڕه‌سمى يادى به‌ئازارى ده ساڵه‌ى جينۆسايدى ئێزدييان. يادى يه‌كێك له تاوانه هه‌ره دڕنده‌كانى مێژوو، كه ئه‌مڕۆ دواى ده ساڵ، هێشتا برينێكى كراوه‌يه و تا ئێستا هاووڵاتييانى ئێزديمان به ده‌ست لێكه‌وته‌كانييه‌وه ده‌ناڵێنن. يادى تاوانكارييه‌كى ديكه‌ى ترسناك كه چووه ڕيزى كيمياباران و ئه‌نفال و ڕاگواستن و زينده‌به‌چاڵكردن، وێرانكردن و هه‌موو ئه‌و تاوانانه‌ى به‌رامبه‌ر به گه‌ل و خاكى كوردستان كروان.
شه‌هيدبوونى زياتر له (5,000) كه‌س كه سه‌تانيان پێكه‌وه گولله‌باران كران و له نزيكه‌ى (100) گۆڕى به‌كۆمه‌ڵدا خرانه ژێر خاك، ڕفاندنى زياتر له (6,417) كچ و ژن و منداڵى ئێزدى، به‌سه‌بيكردن و كڕين و فرۆشتنيان له بازاڕه‌كاندا كه به‌داخه‌وه هێشتا چاره‌نووسى (2,596)يان نادياره، وێرانبوونى شه‌نگال و ده‌وروبه‌رى، ده‌ربه‌‌ده‌ربوونى سه‌تان هه‌زار خه‌ڵكى شه‌نگال و ناوچه‌كه، ئازار و حه‌سره‌تى هه‌موو ئه‌مانه، نه له (10) ساڵدا، هه‌تاهەتايه له‌بير ناكرێن!
جينۆسايدى ئێزدييان له سه‌رده‌مى جيهانى مۆدێرن و پشكه‌وتندا، شۆكێكى گه‌وره‌ى باوه‌ڕنه‌كراو بوو كه ته‌واوى مرۆڤايه‌تى لە جیهاندا هه‌ژاند. بوو به خاڵێكى وه‌رچه‌رخان له مێژووى كوردستان و عێراق كه ده‌بووايه زۆر جدديتر هه‌ڵوه‌سته‌ى له‌سه‌ر بكرێت و هه‌موو كۆمه‌ڵگه‌ى نێوده‌وڵه‌تى پێكه‌وه كار بكات بۆ ئه‌وه‌ى هه‌رگيز و هەرگیز له شوێنێكى ديكه ئەم تاوانە دووباره نه‌كرێتەوە. هه‌موو هه‌وڵێك بخرێته گه‌ڕ بۆ ئه‌وه‌ى تاوانكاران به سزاى خۆيان بگه‌ن، دادپه‌روه‌ر‌ى بۆ قوربانييان جێبه‌جێ ببێت و به هه‌موو شێوه‌يه‌ك قوربانییان قه‌ره‌بوو بكرێنه‌وه! له‌م ياده‌دا به‌وپه‌ڕى شكۆدارييه‌وه يادى قوربانييان ده‌كه‌ينه‌وه. له‌به‌رده‌م گيانى پاكياندا سه‌ر داده‌نوێنين. ئه‌وان بۆ هه‌ميشه له يادى هه‌موو كوردستانييه‌ك و هه‌ر مرۆڤێكى به‌ويژداندا ده‌مێننه‌وه.
سڵاو و ڕێز بۆ ماڵبات و كه‌سوكارى دڵبرينى قوربانييان. له نزيكه‌وه هه‌ست به ژان و ئازاريان ده‌كه‌ين. ئاگادارين و ده‌زانين به‌رده‌وام له چ حه‌سره‌ت و ئاهـ و خه‌مگينييه‌كدا ڕۆژ و شه‌وانيان به‌سه‌ر ده‌به‌ن. هاوسۆز و هاوخه‌م و هه‌ميشه پشتيوانيانين.
به‌ڕێزان،
هه‌ستانه‌وه له جينۆسايد، ده‌ستكردنه‌وه به ژيان، دروستكردنه‌وه‌ى ئومێد و هيوا به داهاتوو بۆ ئێزدييان له دۆخ و سه‌رده‌م و جوگرافياى ئاوادا، كارێكى ئاسان نییە و بەڵكو زۆریش سه‌خته، به‌ڵام خۆڕاگرى و ئيراده‌يان بۆ ژيان و مانه‌وه و به‌رده‌وامى، وا ده‌كات ئێزدى چۆن له ڕابردوودا به ده‌يان فه‌رمانى نه‌هێشتن و قڕكردن له‌ناو نه‌چوون، ئاوها ئه‌مجاره‌ش له‌سه‌ر سووتماك و نه‌هامه‌تييه‌كانى ئه‌و جينۆسايده، هه‌ستنه‌وه سه‌رپێ و ده‌ست پێبكه‌نه‌وه.
ئه‌وه‌ى له‌سه‌ر ئاستى نێوده‌وڵه‌تى كراوه بۆ داننان به جينۆسايدى ئێزدييان، هاوكاريى نێوده‌وڵه‌تى، ئه‌وه‌ى له هه‌رێمى كوردستان و لە عێراق بۆ خزمه‌تى ئێزدييان كراوه له دانانى ياساى (ڕزگاربووانى ئێزدى و پێكهاته‌كانى دیكە له مه‌سيحى و توركمان و شه‌به‌ك)، بڕينه‌وه‌ى يارمه‌تيى مانگانه له حكوومه‌تى فيدراڵى عێراق و هەروەها پشتیوانی لەلایەن حكوومه‌تى هه‌رێمى كوردستانەوە كە بۆ يارمه‌تيدانى ئاواره ئێزدييه‌كان بۆ گه‌ڕانه‌وه بۆ شه‌نگال و چه‌ندين هه‌نگاوى ديكه‌ش، جێى ڕێز و پێزانين و ده‌ستخۆشين، به‌ڵام به دڵنيايييه‌وه هيچێك له‌وانه به‌س نين و هێشتا زۆر ماوه كه ده‌بێ بۆ گەلی خۆرشەویستی ئێزدیپیان بكرێت. كه‌مكردنه‌وه‌ى لێكه‌وته‌كانى جينۆسايد، ئه‌رك و به‌ر‌پرسياريه‌تيى هاوبه‌شى هه‌مووانه له عێراق و هه‌رێمى كوردستان و ته‌نانه‌ت كۆمەڵگەی نێودەوڵەتیش. چاره‌سه‌ركردنى لێكه‌وته‌ى ده‌روونى، كۆمه‌ڵايه‌تى، مرۆيى، ئابوورى و ژينگه‌ييى جينۆسايد، ئه‌ركێكى قورس و درێژخايه‌نه كه توانا و پسپۆڕى و پێويستيى زۆرى ده‌وێت. ئێمه هه‌موومان جگه له به‌رده‌وامى و سه‌رخستنى ئه‌و ئه‌ركه، هيچ ڕێگه‌يه‌كى ديكه‌مان له‌پێش نييه و ده‌بێ بيكه‌ين. ده‌بێ چاره‌نووسى ونبووان ئاشكرا بكرێت و كه‌سوكاريان له ئازارى به‌رده‌وامى چاوه‌ڕوانى ڕزگار بكه‌ين.
بۆ ئه‌م مه‌به‌سته هه‌موو خوشك و برايانى ئێزدى دڵنيا ده‌كه‌ینەوە هه‌تا تاقه ڕفێندراوێك مابێت، كارى تيمه‌كانى نووسينگه بۆ ڕزگاركردنى ڕفێندراوانى ئێزدى به‌رده‌وام ده‌بێت. به هه‌زاران قوربانى بۆ ماوه‌يه‌كى درێژخايه‌ن پێويستييان به چاره‌سه‌رى ده‌روونى و چاودێريى تايبه‌تی هه‌يه، ده‌بێ بۆيان مسۆگه‌ر بكرێت و يارمه‌تییان بدرێت بۆ گێڕانه‌وه‌يان بۆ ژيانى ئاسايى. شه‌نگال و ده‌وروبه‌رى، پێويستی به ئاوه‌دانكردنه‌وه و خزمه‌تگوزارى و مسۆگه‌ركردنى ئارامى و سه‌قامگيرى هه‌يه. بۆيه پێويسته حكوومه‌تى عێراقى فيدراڵ له‌گه‌ڵ حكوومه‌تى هه‌رێمى كوردستان هاوكارى بكات بۆ جێبه‌جێكردنى ڕێككه‌وتنامەی شەنگال و ئاساييكردنه‌وه‌ى دۆخەكەی.
پێويسته خزمه‌تكردنى خه‌ڵكى شه‌نگال و پێكهاته‌ى ئێزدى، كارى له‌پێشينه‌ى هه‌موومان بێت. هه‌موو پێكه‌وه كار بكه‌ين بۆ ئه‌وه‌ى چيتر شه‌نگال و ئێزدى نه‌بنه گيرۆده‌ى ئه‌جێنداى حزبى و سياسى و بارمته‌ى ده‌ستى هاوكێشه و هێزه ناوچه‌يييه‌كان. شه‌نگالييه‌كان ده‌بێ خۆيان كارو‌بارى خۆيان به‌ڕێوه ببه‌ن و چيتر ديلى ده‌ستى هێزه‌كانى ده‌ره‌وه‌ى سنوور نه‌بن. بۆيه PKK و هه‌ر هێزێكى ناياسايى، ده‌بێ شه‌نگال بەجێبهێڵن تاكو هه‌مووان پێكه‌وه بتوانن ئاسايش، ژيان، ئاوه‌دانى، ئومێد و هيوا بگێڕينه‌وه بۆ شه‌نگال. له عێراقى فره‌ئايين و نه‌ته‌وه‌دا، بوونى كاراى دامه‌زراوه‌كان و جێبه‌جێكردنى ده‌ستوور، گه‌ره‌نتيى پاراستنى هه‌موو پێكهاته‌كان و ماف و ئێستا و داهاتوويانه. كليلى ئارامى و سه‌قامگيرى و پێشكه‌وتنى وڵاته، بۆيه ده‌بێ هه‌موومان كار بكه‌ين بۆ جێبه‌جێكردنى ده‌ستووری هەمیشەیيی عێراق.
ئاماده‌بووانى به‌ڕێز..
ئێزدياتى، ئايينى ژياندۆستى، مرۆڤدۆستى و يه‌كترقبووڵكردنه، كێشه‌ى له‌گه‌ڵ هيچ ئايين و باوه‌ڕێكى ديكه‌دا نييه. ئێزدى به سروشتى خۆيان خه‌ڵكێكن زۆر حه‌ز ده‌كه‌ن به خۆشى و ئاشتييانه له‌گه‌ڵ ده‌وروبه‌ردا بژين، بۆيه كۆمه‌ڵگه‌يه‌كى تا بڵێى حه‌ز به ئاشتى و ئارامى و سه‌قامگيرين. له‌گه‌ڵ وڵات و گه‌ل و ده‌ر و دراوسێدا زۆر دڵسۆز و مرۆڤپه‌روه‌رن، بۆيه ئێزدى بنه‌مايه‌كى گرنگى كولتوورى ده‌وڵه‌مه‌ندى فره‌يى و پێكه‌وه‌ژيان و لێبورده‌يين له كۆمه‌ڵگه‌ى كوردستانى و عێراق.
به جينۆسايدكردنى ئێزدييان، داعش ويستى دوژمندارى و لێكترازان و ناكۆكى بخاته نێوان پێكهاته‌كانى كۆمه‌ڵگه و كولتوورى پێكه‌وه‌ژيانمان تێك بدات. به داخه‌وه له شه‌نگال و لە هه‌ندێ ناوچه‌ى ديكه، ئێزدى له خه‌و هه‌ستان و بينييان كه درواسێ و كريڤى چه‌ندين ساڵه، به‌رگ و بيرى ڕه‌شى داعشيان پۆشيوه و ده‌ست له هيچييان ناپارێزن. ئه‌وه به ڕاستى جێى ئازارێكى قووڵ و ژانێكى گه‌وره‌يه. بۆيه خه‌ڵكى ئێزديمان ئێستا دواى (10) ساڵ له جينۆسايد و مه‌ينه‌تييه‌كانى، له هه‌موو شتێك زياتر پێويستييان به دروستكردنه‌وه و بنياتنانه‌وه‌ى متمانه‌يه. ئه‌ركى هه‌موومانه، له هه‌موو ڕوويه‌كه‌وه هه‌رچى پێويسته بيكه‌ين بۆ ئه‌وه‌ى دڵنيايى، متمانه، هيوا و ئومێد به داهاتوويه‌كى گه‌ش و پارێزراو، به ئێزدييان ببه‌خشين. ڕێگه‌يه‌ك بدۆزينه‌وه كه ئه‌وه‌ى به سه‌ر ئه‌واندا هاتووه، ئيتر بۆ هه‌ميشه ببێته هۆكارى پاراستن و هه‌رگيز ڕۆژى ڕه‌شى وا نه‌بيننه‌وه. جگه له‌و هه‌موو ئه‌ركانه‌ى ده‌كه‌وێتە سه‌ر شانى حكوومه‌ت و لايه‌نه سياسى و په‌يوه‌نديداره‌كان بۆ خزمه‌تكردنى ئێزدييان، دەمەوێت ئاماژە بەو ڕۆڵە گرنگەش بکەم کە زانکۆکان دەتوانن بیگێڕن. زۆر گرنگە دامەزراوە ئەکادیمییەکانمان توێژینەوەی زانستی و تێزى ئەکادیمی بە زمانى جیاواز تەرخان بکەن بۆ لێکۆڵینەوە لە ئێزدییەکان كە چۆن ئایین و کولتوور و نەریت و زمانی خۆیان پاراستووە؟
بۆيه داوا لە زانکۆکانمان دەکەم بەشێک لە تێزی ماستەرنامە و دکتۆراکانیان بۆ پرسی ئێزدیيان تەرخان بکەن كه هەموو کایەکانی ژیانيان لەخۆ بگرێت. بەم کارە سەکۆیەک بۆ ئێزدیيان دەڕەخسێنین بۆ دەربڕین و بەرگریکردن لە کەیسەکەیان، هه‌روه‌ها بۆ پاراستنی ڕەسەنایەتی و میراتيان، تا ببێتە سەرچاوەیەکی بەڵگەنامە و دیکۆمێنت و له سه‌رچاوه جیهانییەکاندا.
له كۆتاييدا به‌وپه‌ڕى ڕێز و پێزانينه‌وه يادى ئه‌و پێشمه‌رگه قاره‌مانانه ده‌كه‌ينه‌وه كه به سه‌ركردايه‌تيى جه‌نابى سه‌رۆك مه‌سعوود بارزانى له ئۆپه‌راسيۆنى ڕزگاركردنى شه‌نگال گيانيان به‌خشى. دروود بۆ گيانى پاكيان، ياديان هه‌ميشه به خێر بێت. سڵاو بۆ خێزان و كه‌سوكارى سه‌ربه‌رزيان ده‌نێرين. سوپاس بۆ هاوپه‌يمانيى نێوده‌وڵه‌تى كه بۆ تێكشكاندنى داعش يارمه‌تيى عێراق و هه‌رێمى كوردستانيان دا. چۆن پێكه‌وه داعشمان تێكشاند، ئاواش پێكه‌وه به هاريكاريى هاوبه‌ش له هه‌موو بواره‌كاندا، بيرى تاريكى تيرۆر و توندڕه‌وى و توندوتيژى له‌ناو ده‌به‌ين. بۆ ئه‌م مه‌به‌سته ده‌بێ به‌رده‌وام له كار و هه‌وڵ و كۆششدا بين، چونكه داعش بە بۆچوونی ئێمە هێشتا مه‌ترسييه‌كى ڕاسته‌قينه‌يه كه هه‌ڕه‌شه له ئارامى و سه‌قامگيريى عێراق و ناوچه‌كه ده‌كات. ده‌ستخۆشى له زانكۆى كوردستان هه‌ولێر و نووسينگه‌ى ڕزگاركردنى ڕفێندراوانى ئێزدى ده‌كه‌م بۆ ڕێكخستنى ئه‌م ياده.
هه‌ر به‌م بۆنه‌يه‌وه به ناوى خۆم و ئێوه‌شه‌وه، به گه‌رمى ده‌ستخۆشى له به‌رپرسان و تيمه‌كانى نووسينگه ده‌كه‌م بۆ ڕزگاركردنى ڕفێندراوان. ڕزگاركردن و گه‌ڕانه‌وه‌ى (3,579) ڕفێندراو كارێكى مه‌زن و مايه‌ى سوپاس و پێزانينێكى زۆره، هيواى سه‌ركه‌وتنيان بۆ ده‌خوام. خوشك و برايانى ئێزدى دڵنيا ده‌كه‌مه‌وه كه بۆ هه‌ميشه پشتيوانيان ده‌بين و به‌رگرى له مافه‌كانيان ده‌كه‌ين. له هه‌وڵه‌كانمان بۆ به‌پارێزگاكردنى شه‌نگال و ئاوه‌دانكردنه‌وه‌ى به‌رده‌وام ده‌بين. كار ده‌كه‌ين بۆ ئه‌وه‌ى به‌شدارى و نوێنه‌رايه‌تيكردنى سياسى و كارگێڕيى ئێزدييان و هه‌موو پێكهاته‌كان له داموده‌زگا و دامه‌زراوه‌كانى عێراق و هه‌رێمى كوردستان وه‌ك پێويست و پارێزراو بێت. به‌رده‌وام ده‌بين تا به شێوه‌يه‌كى فراونتر جينۆسايدى ئێزدييان له جيهان بناسرێت و قه‌ره‌بوو بكرێنه‌وه.
ده‌ستخۆشى له هه‌موو ئه‌وانه‌ش ده‌كه‌م كه ئه‌مڕۆ له هه‌ر شوێنيك ئه‌م ياده خه‌مگينه ده‌كه‌نه‌وه. سوپاس و ڕێز و پێزانين بۆ هه‌موو ئه‌وانه‌ى له ساتى يه‌كه‌مى جينۆسايده‌كه‌وه له‌گه‌ڵ خوشك و برايانى ئێزدى و خه‌ڵكى شه‌نگالدا وه‌ستان، به‌تايبه‌تى خه‌ڵكى دڵسۆز و ميوانپه‌روه‌رى دهۆك و بادينان به‌گشتى كه به هه‌موو شێوه‌يه‌ك باوه‌شيان بۆ لێقه‌وماوانى شه‌نگال كرده‌وه. مرۆڤپه‌روه‌ر‌ى و جوامێريى ئه‌وان هه‌رگيز له‌بير ناچێته‌وه.
لە كۆتاییدا سڵاو له ياد و گيانى پاكى جه‌نه‌رالى فڕۆكه‌وانى عێراقى (ماجد عبدالسلام التميمي) كه له كاتى يارمه‌تيدانى لێقه‌وماوانى شه‌نگالدا گيانى له‌ده‌ستدا و شه‌هيد بوو. سڵاو بۆ گیانی پاكی ئەو دەنێرین و هەر لێرەوە سڵاو و ڕێز و خۆشەویستیمان بۆ بنەماڵەكەی دووپات دەكەینەوە.
دیسانەوە هه‌موو لايه‌كتان به خێر بێن.
زۆر سوپاس..
https://presidency.gov.krd/president-nechirvan-barzani-we-will-always-support-the-yazidis-and-defend-their-rights/
سه‌رۆك نێچيرڤان بارزانى له‌گه‌ڵ باڵيۆزى نه‌مسا كۆبووه‌وه
پێشنوه‌ڕۆى ئه‌مڕۆ شه‌ممه 2024/8/3 به‌ڕێز نێچيرڤان بارزانى، سه‌رۆكى هه‌رێمى كوردستان پێشوازى له به‌ڕێز ئه‌ندريا ناسى، باڵيۆزى نه‌مسا له عێراق كرد.
له كۆبوونه‌وه‌يه‌كدا هه‌ردوولا جه‌ختيان له بره‌ودان به په‌يوه‌ندييه‌كانى نه‌مسا له‌گه‌ڵ عێراق و هه‌رێمى كوردستان و ده‌رفه‌ته‌كانى فراوانكردنى هاريكاريى هاوبه‌شيان له هه‌موو بواره‌كاندا كرده‌وه. له‌مباره‌يه‌وه باس له دوايين سه‌ردانى سه‌رۆك نێچيرڤان بارزانى بۆ ڤيه‌ننا و ديدار و كۆبوونه‌وه‌كانى له‌گه‌ڵ به‌ڕێزان سه‌ركۆمار و وه‌زيرى ده‌ره‌وه‌ى نه‌مسا كرا.
له ته‌وه‌رێكى ديكه‌ى كۆبوونه‌وه‌كه‌دا ده‌رباره‌ى دۆخى گشتيى عێراق و هه‌رێمى كوردستان، په‌يوه‌ندييه‌كانى هه‌ولێر ـ به‌غدا، دوايين پێشهاته‌كانى ناوچه‌كه و چه‌ند پرسێكى ديكه‌ى جێى بايه‌خى هاوبه‌ش، بيروڕايان گۆڕييه‌وه.
https://presidency.gov.krd/president-nechirvan-barzani-meets-with-austrian-ambassador/
سه‌رۆك نێچيرڤان بارزانى سوپاسى جهنهرال ڤاول ده‌كات
نيوه‌ڕۆى ئه‌مڕۆ شه‌ممه 2024/8/3 به‌ڕێز نێچيرڤان بارزانى، سه‌رۆكى هه‌رێمى كوردستان، بۆ ماڵئاوايى و كۆتاهاتنى ئه‌ركى، پێشوازى له جهنهرال جۆول ڤاول فه‌رمانده‌ى گشتيى هێزه‌كانى هاوپه‌يمانان له عێراق و سووريا كرد.
له ديدارێكدا سه‌رۆك نێچيرڤان بارزانى سوپاس و پێزانينى بۆ خزمه‌تى جهنهرال ڤاول له ميانى ئه‌ركه‌كه‌يدا ده‌ربڕى و هيواى سه‌ركه‌وتنى له ئه‌ركى نوێدا بۆ خواست، هه‌روه‌ها ستايشى هه‌رێمى كوردستانى بۆ هاوكارى و پشتگيريى هاوپه‌يمانيى نێوده‌وڵه‌تى له عێراق و هه‌رێمى كوردستان بۆ تێكشكاندنى داعش دووپات كرده‌وه.
لاى خۆيه‌وه جهنهرال ڤاول وێڕاى نيشاندانى خۆشحاڵى به كاركردنى له عێراق و سووريا، سوپاس و پێزانينى بۆ هاوكارى و پشتگيريى هه‌رێمى كوردستان له ماوه‌ى ئه‌ركيدا ده‌ربڕى، هه‌روه‌ها جه‌ختى له گرنگيى به‌رده‌واميى پشتگيريى هاوپه‌يمانيى نێوده‌وڵه‌تى بۆ عێراق و هه‌رێمى كوردستان كرده‌وه.
له ديداره‌كه‌دا كه به‌ڕێز سوپاسالارى پێشمه‌رگه‌ى كوردستان و ژماره‌يه‌ك له به‌رپرسان له هه‌ردوولا ئاماده بوون، هاوڕا بوون له‌سه‌ر ئه‌وه‌ى هێشتا داعش مه‌ترسييه‌كى ڕاسته‌قينه‌يه و هه‌ڕه‌شه له ئارامى و سه‌قامگيريى ناوچه‌كه ده‌كات.
جموجووڵه‌كانى داعش و دۆخى عێراق و سووريا و دوايين پێشهاته‌كانى ناوچه‌كه، لايه‌نێكى ديكه‌ى ديداره‌كه بوو.
https://presidency.gov.krd/president-nechirvan-barzani-thanks-general-al-vaul/
دوایین هەواڵەکان
- نوێنەری حکومەتی هەرێم لە ئێران: سەردانەکەی پزیشکیان ئاماژەیە بۆ گرنگیدانی ئێران بە هەرێمی کوردستان
- هه‌رێمى كوردستان و ئێران جه‌خت له بره‌ودان به پهيوهندييهكانيان ده‌كه‌نه‌وه
- سه‌رۆک نێچیرڤان بارزانی: سەردانی سەرۆک کۆماری ئێران مێژوویی بوو
- نازم دەباغ له وتووێژ له‌گه‌ڵ ئاژانسی ئیرنا: مەسعوود پزشکیان سەردانی هەولێر دەکات
- نازم دەباغ: کاتی سەردانی پزیشکیان بۆ عێراق دیار نییە
- «سەلام رشدی» له‌گه‌ڵ شاندی یهکێتی هاورده و ناردنکارانی لقی هه‌ولێر کۆبۆوه
- سه‌رۆك نێچيرڤان بارزانى: هه‌ميشه پشتيوانى و به‌رگرى له مافه‌كانى ئێزدييان ده‌كه‌ين
- سه‌رۆک نێچیرڤان بارزانی له‌گه‌ڵ باڵیۆزی یه‌کێتیی ئه‌ورووپا کۆبووه‌وه
- سه‌رۆك نێچيرڤان بارزانى له‌گه‌ڵ باڵيۆزى نه‌مسا كۆبووه‌وه
- سه‌رۆك نێچيرڤان بارزانى سوپاسى جهنهرال ڤاول ده‌كات