نوێنەری حکومەتی هەرێمی کورستان لە ئێران رایگەیاند: بڕیارە «مەسعود پزیشکیان» سەرۆک کۆماری ئێران سەردانی بەغدا بکات، بەڵام تاوەکو ئێستا کاتەکەی نەزانراوە.
نازم دەباغ، بە کەناڵ 8ی راگەیاند: بڕیارە لە داهاتوودا سەرۆک کۆماری ئێران لەسەر بانگێشتی «محەمەد شیاع سودانی» سەرۆکوەزیرانی عێراق، سەردانی بەغداد بکات، بەڵام تا وەکوو ئێستا کاتی سەردانەکەی دیاری نەکراوە.
دەباغ سەبارەت بە ئەگەرى سەردانی پزیشکیان بۆ هەولێر رایگەیاند: لە کاتى هاتنەکەى بۆ بەغداد، بڕیار دەدات سەردانی هەولێر بکات یا خود نا.
23ـى ئابی 2024، لە پەیوەندییەکی تەلەفۆنیدا «فوئاد حسێن» وەزیری دەرەوەی عێراق، لەگەڵ «عەباس عێراقچی» هاوتا ئێرانییەکەى، لەسەر داوای «محەمەد شیاع سودانی» بانگێشتنامەیەکى ئاراستەى «مەسعود پزیشکیان» کرد بۆ ئەوەى سەردانى عێراق بکات.
هاوکات لە رێوڕەسمی سوێندخواردنەکەیدا «نێچیرڤان بارزانی» سەرۆکی هەرێمی کوردستان، بانگهێشتنامەى ئاڕاستەى «مەسعود پزیشکیان» کرد بۆ ئەوەى لە دواى بەغداد سەردانى هەولێر بکات.
سامیا حەسەن