سەرۆكی هەرێمی كوردستان پێشوازی لە سەرۆكی كۆمیتەی نێونەتەوەیی خاچی سوور دەكات
ئەمڕۆ یەكشەممە 11ـی 1ـی 2015 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە پیتێر ماورێر سەرۆكی كۆمیتەی نێونەتەوەیی خاچی سوور و شاندێكی یاوەری كرد.
لە دیدارەكەدا سەرۆكی كۆمیتەی نێونەتەوەیی خاچی سوور سوپاسی سەرۆك بارزانی كرد بۆ ڕەخساندنی ئەو دیدارە و وێڕای ئاماژەدان بە ڕووداوە خێراكانی ناوچەكە و هەڕەشەی تیرۆر ئەوەی بە سەرۆك بارزانی ڕاگەیاند كە ڕێكخراوی خاچی سوور بەنیازە چالاكییەكانی خۆی لە ناوچە پڕكێشەكانی جیهان فراوانتر بكات بە جۆرێك كە لەگەڵ گۆڕانكارییە تازەكان بگونجێت. سەرۆكی كۆمیتەی نێونەتەوەیی خاچی سوور سوپاسی گەل و حكوومەتی هەرێمی كوردستانیشی كرد كە میوانداریی سەدانهەزار ئاوارەیان كردووە و پێكهاتە نەتەوەیی و ئایینییەكانیان لە هەڕەشەی تیرۆریستان پاراستووە. هەروەها لە بەشێكی دیكەی قسەكانیدا باسی فراوانبوونی چالاكییەكانی ڕێكخراوی خاچی سووری كرد لە گەیاندنی هاوكاریی مرۆڤی بۆ ئاوارەكان لە هەرێمی كوردستان كرد و ئەوەیشی بە سەرۆك بارزانی ڕاگەیاند كە ڕێكخراوی خاچی سووری نێودەوڵەتی ئامادەیە لە گەڕاندنەوەی ئاوارەكان بۆ ناوچە ئازادكراوەكان یارمەتیی هەرێمی كوردستان بدات. لە بەشێكی دیكەی قسەكانیدا سەرۆكی كۆمیتەی نێونەتەوەیی خاچی سوور سوپاسی دامودەزگەی فەرمیی هەرێمی كوردستانی كرد كە لە جێبەجێكردنی ئەرك و كارەكانی ڕێكخراوەكەیان هاوكاری و ئاسانكارییان پێشكەش دەكەن و هەروەها ئاسانكاری و هاوكاریی گرتووخانەكانی هەرێمی كوردستانیشی بەرز نرخاند لە كاتی سەردانی نوێنەر و چاودێرەكانی ڕێكخراوەكەیان بۆ گرتووخانەكانی هەرێم.
لەبەرانبەردا سەرۆك بارزانی بەخێرهاتنی شاندی میوانی كرد و دەستخۆشی لە ئەرك و كارەكانی ڕێكخراوی خاچی سووری نێودەوڵەتی كرد و پێشوازی لە هەوڵ و چالاكییەكانی ئەم ڕێكخراوەی لە یارمەتیدانی ئاوارەكان كرد كە لە كوردستاندا نیشتەجێن. سەرۆك بارزانی ئەوەیشی ڕاگەیاند كە بۆ كوردستان جێگەی شانازییە بووەتە پەناگەی ئاوارە و نەتەوە و ئایینە جیاوازەكان و حكوومەتی هەرێم بەهەموو توانایەك یارمەتیی ئاوارەكان دەدات بەڵام بەهۆی ئەو ژمارە زۆرەی ئاوارەكان و قەبارەی كارەساتەكە ئەركی یارمەتیدان لە ئاستی تواناكانی هەرێم چووەتەدەر و كوردستان پێشوازی لە هەر لایەنێك دەكات كە یارمەتیی پێشكەشی ئاوارەكان بكات .
هەر لەم دیدارەدا سەرۆك بارزانی وێڕای ئاماژەدان بە هۆكار و سەرەتاكانی دەركەوتنی تیرۆریستانی داعش و كەوتنی موسڵ و بەهێزبوونیان ئەوەی خستەڕوو كە كوردستان ئاستەنگێكی گەورە بوو لەبەرانبەر فراوانبوونی تیرۆر و بۆ ئەوەی ڕێگە لە گەشە و پێشكەوتنی كوردستان بگرن و بەهۆی هێزەوە خاكی كوردستانیش داگیر بكەن، پەلاماری كوردستانیاندا بەڵام تیرۆریستان هەرگیز پێشبینیی ئەوەیان نەدەكرد گەلی كوردستان و پێشمەرگە بەمشێوەیە ڕووبەڕوویان ببنەوە و دۆستانی گەلی كوردستانیش یارمەتیی پێشمەرگە بدەن. سەرۆك بارزانی لە درێژەی قسەكانیدا هێمای بەوەدا كە تیرۆریستان چەك و ئیمكانیاتی دوو دەوڵەتیان لەبەردەستە و لە ڕەگەز و نەتەوەی جۆراوجۆرن و دژی هەموو بەهاكانن و هەڕەشەن بۆ سەر هەموو جیهان بۆیە ڕووبەڕووبوونەوە و لەناوبردنیان ئەركی هەموو لایەكە و تەنیا بە لایەنێك ناكرێت. سەرۆك بارزانی ئەوەیشی باسكرد كە كوردستان بە شێوەیەكی فیعلی لە كۆبانێ هەتا خانەقین لەگەڵ تیرۆردا لەشەڕێكی قورسدایە و خۆڕاگریی و ڕۆڵی قارەمانانەی پێشمەرگە و خەڵكی كوردستانی لەم شەڕەدا بەرز نرخاند.
نێچیرڤان بارزانی هێرشه تیرۆرستییه‌كه‌ی پاریس ئیدانه ده‌كات
هێرشه‌كه‌ی ئه‌مڕۆی سه‌ر گۆڤاری ’’شارلی ئه‌بدۆ’’ له پاریسی پایته‌ختی فه‌ڕه‌نسا، كارێكی تیرۆستییه، كه هیچ پاساوێكی نییه و به توندی ئیدانه‌ی ده‌كه‌ین. به ناوی حكوومه‌تی هه‌رێمی كوردستانه‌وه سه‌ره‌خۆشی له خانه‌واده و كه‌سوكاری قوربانیان ده‌كه‌ین. له دژی تیرۆر به هه‌موو جۆره‌كانییه‌وه، به هه‌موو شێوه‌یه‌ك پشتگیری له گه‌لی فه‌ڕه‌نسا ده‌كه‌ین، وه‌ك چۆن فه‌ڕه‌نسا له شه‌ڕی دژی تیرۆردا له وڵاته‌كه‌مان، پشتگیری له گه‌لی هه‌رێمی كوردستان ده‌كات.
نێچیرڤان بارزانی
سه‌رۆك وه‌زیرانی هه‌رێمی كوردستان
7ی یه‌نایه‌ری 2015
لێدوانى فەرمانگەى پەیوەندیەکانى دەرەوە سەبارەت بە هێرشە تیرۆرستیەکەى پاریس
فەرمانگەى پەيوەنديەکانى دەرەوەى حکومەتى هەرێمى کوردستان بە توندى سەرکۆنەى رووداوى تەقەکردنە مەترسيدارەکەى سەر نووسينگەى گۆڤارى چارلى هێبدۆ لە پاريس دەکات، کە بووە هۆى گيان لەدەستدانى 12 کەس. هەست و پاڕانەوەکانى ئێمە لەگەڵ قوربانيەکانى ئەو کردەوە تيرۆرستيەيە. ئێمە لەم کارەساتەدا لەگەڵ خەڵکى فەڕەنسادا دەوەستين و لەم بارودۆخە سەختەدا هاوخەمى خەڵکى کوردستان دەدەبڕين.
ئەم جۆرە هێرشانە تەنها هاندەرمان دەبێت بۆ پابەندبوونمان بە يەکگرتوويي و پاراستنى بەهاکانى ئازادى دەربڕين و هەروەها بۆ بەردەوامبوونمان لە شەڕ دژى تيرۆر. ئەم جۆرە هێرشانە ئەوەمان پيشان دەدات کە پێويستە ئەندامانى کۆمەڵگەى نێودەوڵەتى پێکەوە شانبەشانى يەکتر شەڕ دژى تيرۆرستان بکەن، کە هەڕەشەن بۆسەر بەهاکانى ديموکراسى و لێبوردەيي و پێکەوە ژيانى ئاشتيانە. ئەمڕۆ هێزەکانى پێشمەرگەى کوردستان لە پێشەوەى بەرەکانى شەڕدان دژى تيرۆر. هاوکات پێويستە شەڕ دژى توندڕەوەکان بەبێ راوەستان بەردەوام بێت.
جارێکى ديکە پرسەو سەرەخۆشى خۆمان ئاڕاستەى خانەوادەى قوربانيەکانى رووداوەکەى پاريس دەکەين.
لە ئەمەریکا، فەلاح مستەفا سەردانی وەزارەتی دەرەوە و كۆنگرێس و سیناتی كرد
بە مەبەستی ناساندنی نوێنەری تازەی حكومەتی هەرێم بەرپرسی پەیوەندیەكانی دەرەوە بە یاوەری نوێنەری حكومەتی هەرێم لە ئەمریكا سەردانی وەزارەتی دەرەوە و كۆنگرێس و سیناتی وویلایەتە یەكگرتووەكانی ئەمریكایان كرد.
فەلاح مستەفا بەرپرسی پەیوەندیەكانی دەرەوە بە یاوەری خاتوو بەیان سامی نوێنەری حكومەتی هەرێم لە ئەمریكا لە سەردانی وەزارەتی دەرەوەی ئەمریكا چاویان كەوت بە بەڕێز برێت مەكگێرك جێگری یاریدەدەری وەزیری دەرەوەی ئەمریكا بۆ كاروباری ڕۆژهەڵاتی نزیك. لە سەرەتایی دیدارەكەدا سوپاسی بەڕێز برێت مەكگێرك یان كرد لە پشتگیریەكانی بۆ هەرێمی كوردستان و عێراق و ئەو پێشوازیە گەرمەی كە لە شاندەكەی كرد.
بەرپرسی پەیوەندیەكانی دەرەوە گوتی " ئێمە سوپاسی وویلایەتە یەكگرتووەكانی ئەمریكا دەكەین بۆ هاوكاری كردنی خەڵكی هەرێمی كوردستان لە ساڵی 1991 و ئازادكردنی عێراق لە ساڵی 2003 و دواتریش دووبارە بەجێهێنانی ئەركی دۆستایەتیان لەگەڵ هەرێمی كوردستان لە ساڵی 2014 ئەویش لە ڕێگای وەشاندنی گورزی ئاسمانی بۆ سەر ڕێكخراوی تیرۆریستی داعش كە بووە هۆی زیاتر پشتگیری و بەرزكردنەوەی مۆراڵی خەڵكی هەرێمی كوردستان و هێزەكانی پێشمەرگە".
هەروەها خاتوو بەیان سامی نوێنەری تازەی حكومەتی هەرێم لە ئەمریكا گووتی كە بە پەرۆشەوە دەڕوانێتە هەماهەنگی كردن لەگەڵ بەڕێز برێت مەكگێرك لە ئەركی نوێی وەك نوێنەری حكومەتی هەرێم لە ئەمریكا بە تایبەتی لەو كاتەی ئێستادا كە هەرێمی كوردستان و وویلایەتە یەكگرتووەكانی ئەمریكا بەیەكەوە شەڕ دەكەن دژی ڕێكخراوی تیرۆریستی داعش.
بەڕێز برێت مەكگێرك ئەوەی دووپات كردەوە كە هاوبەشیەكی ستراتیژی لە نێوان وویلایەتە یەكگرتووەكانی ئەمریكا و هەرێمی كوردستاندایە هەیە كە لە پێناوی بەرژەوەندی هەردوولادایە.
هەروەها لە كۆبوونەوەكەدا گفتوگۆكرا دەربارەی پێداویستیەكانی هێزی پێشمەرگە كە ئێستا لە شەڕدان دژی ڕێكخراوی تیرۆریستی داعش و ئەو قەیرانەی مرۆییەی ڕووبەڕووی هەرێمی كوردستان و عێراق بۆتەوە لە ئەنجامی ئاوارەبوونی ژمارەیەكی زۆر لە خەڵك. هەردوولا پێشوازیان لە بەرەوپێشچوونی كەشی هاوكاری و هەماهەنگی نێوان هەولێر و بەغدا كرد.
هەروەها ڕۆژی سێ شەممە ڕێكەوتی 7/1/2015 بەرپرسی پەیوەندیەكانی دەرەوە و نوێنەری حكومەتی هەرێم لە ئەمریكا چاویان كەوت بە ژمارەیەك لە ئەندامانی كۆنگرێس و سینات.
لە دیدارێكدا لەگەڵ سیناتۆر بۆب كۆركەر سەرۆكی كۆمیتەی كاروباری دەرەوەی سینات و نوێنەری وویلایەتی تێنیسی كە زۆرترین ژمارەی ڕەوەندی كوردستانی لێیە، گفتوگۆ و بیروڕا ئاڵوگۆڕكرا دەربارەی بارودۆخی هەرێمی كوردستان و عێراق و سوریا و پێویستی زیاتری هاوكاری وویلایەتە یەكگرتووەكانی ئەمریكا كە دەتوانێت پێشكەش بە هێزەكانی پێشمەرگەی كوردستانی بكات. هەروەها ئاماژەكرا بە ڕۆڵی هەرێمی كوردستان لە دابین كردنی پەناگەیەكی ئارام بۆ ئەو پێكهاتە نەتەوەییانەی ڕوویان لە هەرێمی كوردستان كردووە.
هەروەها ژمارەیەك دیدار و كۆبوونەوە لەگەڵ ئەندامانی كۆنگرێس و سینات ئەنجامدرا لەوانە بەڕێزان كۆنگرێسمان دێڤین نیونس سەرۆكی كۆمیتەی هەواڵگری، سیناتۆر تیم كاینی، كۆنگرێسمان رۆدنی فێرلینگهیوسن سەرۆكی كۆمیتەی لاوەكی بەرگری لە كۆمیتەی دابین كردن، كۆنگرێسمان جێری كۆنۆڵی، كۆنگرێسمان دەینا رۆراباكەر، كە لە تەواوی ئەو دیدار و كۆبوونەوانەدا باس لە بارودۆخی ئەمڕۆی هەرێمی كوردستان و عێراق و بەرەنگاربوونەوەی ڕێكخراوی تیرۆریستی داعش لەلایەن هێزی پێشمەرگەی كوردستان و پێداویستی هەرێمی كوردستان لە ڕووی هاوكاری سەربازی و مرۆیی كرا.
سەرۆك بارزانی پێشوازی لە پێشمەرگەی قارەمانی شنگال قاسم دەربۆ دەكات
ئەمڕۆ چوارشەممە 7ـی 1ـی 2014 بەڕێز مەسعود بارزانی سەرۆكی هەرێمی كوردستان پێشوازی لە پێشمەرگەی قارەمانی دەڤەری شنگال قاسم دەربۆ كرد.
لە دیدارێكدا سەرۆك بارزانی سوپاسی خۆڕاگری و قارەمانێتیی قاسم دەربۆ و هەڤاڵانی و هەروەها ئەم پێشمەرگە دڵێرانە كرد كە قارەمانانە بەرگرییان لە چیای شنگال كرد و ڕێگەیان نەدا دەستی گڵاوی تیرۆریستان بگاتە چیای شنگال. سەرۆك بارزانی لەبارەی ئەو كارەساتەی بەسەر خوشك و برا ئێزیدییەكان هاتووە، ئاماژەی بەوەدا كە زوڵم و دەستدرێژیی دوژمنان و تیرۆریستان دژی خوشك و برا ئێزیدییەكان درێژەپێدەری ئەو زوڵمەیە كە دوژمنانی كوردستان لەدژی گەلەكەمان و بێسەروشوێنكردنی 12000 فەیلی و 8000 بارزانی و سەدوهەشتاودوو هەزار كوردی گەرمیان و ناوچەكانی دیكەی كوردستان و هەروەها كیمیابارانكردنی هەڵەبجە ئەنجامیان داوە. دوژمنان ئێزیدییەكانیان بەهۆی كوردبوون و ئێزیدیبوونیان كردە ئامانج و بەلای تیرۆریست و دوژمنانەوە ئێزیدیەكان دووجار تاوانبارن ئەویش چونكە لە نەتەوەی كوردن و ئایینیشیان ئێزیدییە. بۆیە ئێمەیش هەرچی لە تواناماندا بیت دەیكەین بۆ ئەوەی ئێزیدییەكان سەرفیراز و ئازاد بن و وەك هەموو خەڵكی كوردستان بە ئازادیی بژیین.
لەبەرانبەردا فەرماندە و پێشمەرگەی قارەمانی دەڤەری شنگال سوپاسی سەرۆك بارزانی كرد و ئامادەبوونی سەرۆك بارزانیی لە بەرەكانی شەڕ بە هۆكارێكی گەورە زانی لە سەركەوتنی هێزی پێشمەرگە و هەروەها هاتنی سەرۆك بارزانیشی بۆ سەر چیای شنگال بە وەرچەرخانێك لە مێژووی دەڤەری شنگال لە قەلەمدا. قاسم دەربۆ بەڵێنی بە سەرۆك بارزانیدا كە تاهەتایە بەرگریكاری كەرامەت و خاكی كوردستان و شنگال دەبێت و جەختی لەوەیش كردەوە كە ئێزیدییەكان و خەڵكی دەڤەری شنگال، شنگال بە بەشێكی ڕەسەنی كوردستان دەزانن.
پەیامی هاوخەمیی سەرۆك بارزانی بۆ سەرۆكی فەڕەنسا
بە بیستنی هەواڵی پەلاماری تیرۆریستان بۆ سەر گۆڤاری شارلی ئێبدۆ لەناو شاری پاریس و گیانلەدەستدانی ژمارەیەك ڕۆژنامەنووس و هاووڵاتیی بێتاوان زۆر خەمبار بووم. بە ناوی خۆم و گەلی كوردستان سەرەخۆشی لە بەڕێزتان و گەلی فەڕەنسا و كەسوكاری قوربانیانی ئەم ڕووداوە دەكەین و زۆر بە توندی ئیدانەی ئەو كردەوە نامرۆڤانە و قێزەوەنە دەكەین.
لەو ڕۆژە ناخۆشەدا گەلی كوردستان لە كاتێكدا كە بە شێوەیەكی ڕاستەوخۆ لەگەڵ دڕندەترین جۆری تیرۆر لەشەڕدایە، پشتیوان و هاوخەمی گەلی فەڕەنسایە.
جارێكی دی سەرەخۆشی لە كەسوكاری قوربانیانی ئەم ڕووداوە دڵتەزێنە دەكەم و هیوای چاكبوونەوەیش بۆ برینداران دەخوازم. لەوەیش دڵنیام كە لە ئەنجامدا تیرۆریستان تێكدەشكێن و مرۆڤایەتی سەردەكەوێت.
مسعود بارزانی
سەرۆكی هەرێمی كوردستان
7ـی 1ـی 2015
ئه‌نجومه‌نى وه‌زیران جەژنى لەدایکبوونى پێغەمبەر (د.خ) لە موسڵمانان پیرۆز ده‌کات
یادی ڕۆژی لەدایكبوونی حه‌زره‌تی موحه‌ممه‌د پێغه‌مبه‌ری ئیسلام (دروودی خوای لێ بێت)، بە گەرمی لە سەرجەم موسڵمانانی كوردستان و عیراق و سەرانسەری جیهان پیرۆز دەكەین، له خوای مه‌زن و پەروەردگار داواكارین ئەم بۆنە پیرۆزە بكاتە سه‌ره‌تای قۆناغێكی دیكە بۆ چەسپاندنی ئاشتی و سەقامگیری و بەردەوامبوونی پێكەوەژیانی ئاشتیانە لەنێو پێكهاتەكانی گەلەكەمان و ته‌واوی مرۆڤایه‌تیدا.
گەلى کوردستان شانازى دەکات کە هەر لە دێرزەمانەوە خۆى لە توندوتیژى و تایەفەگەرى و ڕەگەزپەرستى بەدوور گرتووە و هەمیشە هەوڵى چه‌سپاندنی بنه‌ماكانی ئاشتى و پێکەوەژیان و لێبوردەیى له‌نێو پێكهاته ئایینی و نه‌ته‌وه‌ییه‌كانی كوردستاندا داوه. هیوادارین ئه‌م یاده، له‌گه‌ڵ خۆیدا ئاشتی و ته‌بایی و پته‌وكردنی بنه‌ماكانی پێكه‌وه‌ژیان بۆ كوردستان و ناوچه‌كه و جیهان بێهنێت و دووبارە جەژنی لەدایكبوونی پێغەمبەر (دروودی خوای لێ بێت) لە هەموو موسڵمانان پیرۆز بێت.
ئه‌نجومه‌نى وه‌زیرانى هه‌رێمى كوردستان
2015/1/2
پارێزگاری نوێی سلێمانی دەست بەكار بوو
بە چاودێری وئامادەبوونی قوباد تاڵەبانی جێگری سەرۆكی حكومەتی هەرێمی كوردستان ئەمرۆ لە تەلاری پارێزگای سلێمانی مەراسیمی دەستبەكاربوونی پارێزگاری نوێ بەڕێوەچوو.
لەوتەیەكدا قوباد تاڵەبانی، دەستخۆشی خۆی و حكومەتی هەرێمی كوردستانی لە بەهرۆز حەمە ساڵح كرد كە لە ماوەی پێنج ساڵی كاركردنی وەك پارێزگاری سلێمانی جێدەستی لە خزمەت كردنی پارێزگای سلێمانی دیار بووە و وەك پارێزگارێكی سەركەوتووی وەسف كرد.
جێگری سەرۆكی حكومەت پیرۆزبایی خۆی و حكومەتی هەرێمی كوردستانی لە پارێزگاری نوێی سلێمانی كردوو رایگەیاند: ئێمە متمانەی تەواومان بە پارێزگاری نوێی سلێمانی د.ئاسۆ فەرەیدون هەیە و دڵنیاین لە كارەكانی سەركەوتوو دەبێت و هیوادارین هەمیشە بە بێ جیاوازی خزمەت بەخەڵكی پارێزگاكە بكات و لەئاست متمانەی هەموواندا بێت.
پاشان قوباد تاڵەبانی سوپاسی خەڵكی پارێزگای سلێمانی كرد كە ماوەیەك لە چاوەروانی دەست بەكاربوونی پارێزگاری نوێدا بوون.
نێچیرڤان بارزانی چیای شه‌نگال به‌سه‌ر ده‌كاته‌وه
پێشنیوه‌ڕی ئه‌مڕۆ دووشه‌ممه 2015/1/5 به‌ڕێز نێچیرڤان بارزانی سه‌رۆك وه‌زیرانی هه‌رێمی كوردستان، سه‌ردانی ناحیه‌ی سنوونێ و مه‌زارگه‌ی شێخ شه‌رفه‌دینی له چیای شه‌نگال كرد.
سه‌ره‌تا له كۆبوونه‌وه‌یه‌كدا له‌گه‌ڵ به‌ڕێوه‌به‌رایه‌تیی ناوچه‌كه و نوێنه‌رانی خه‌ڵكی ئێزدی له‌و سنووره، دوایین ڕه‌وش و بارودۆخی ناوچه ئازادكراوه‌كان و پرۆسه‌ی گه‌ڕانه‌وه‌ی دانیشتوان و پێداویستی و خزمهتگوزارییهكان و ڕێكخستنه‌وه و كاراكردنه‌وه‌ی داموده‌زگا حكوومییه‌كانی تاوتوێ كرد و دووپاتی كرده‌وه كه حكوومه‌تی هه‌رێمی هه‌موو هه‌وڵه‌كانی ده‌خاته گه‌ڕ بۆ ئه‌وه‌ی داموده‌زگا كارگێڕییه‌كان و هه‌موو خزمهتگوزارییهكان بگه‌ڕێنه‌وه ناوچه‌كه و ڕێگه بۆ گه‌ڕانه‌وه‌ی هاووڵاتیان خۆش بكرێت، بۆ ئه‌م مه‌به‌سته‌ش تیمی تایبه‌تی حكوومی، سه‌ردانی ناوچه‌كه ده‌كه‌ن تا ڕاپۆرتێك له‌سه‌ر پێویستییه‌كان و پێشكه‌شكردنی خزمه‌تگوزارییه گشتییهكان ئاماده بكات.
به‌رێز سه‌رۆك وه‌زیران هه‌روه‌ها ستایشی ڕۆڵی ئه‌و فه‌رمانده و پێشمه‌رگه ئێزدییانه‌ی كرد، كه هه‌ر له سه‌ره‌تای هێرشه‌كانی داعشه‌وه، له ناوچه‌كه و چیای شه‌نگال مانه‌وه و به‌رگرییان كرد و گوتی: سه‌ری ڕێز و نه‌وازش به‌رامبه‌ر شه‌هیدان داده‌نوێنینن، هه‌ره‌وه‌ها ئه‌وپه‌ڕی ڕێز و پێزانیمان بۆ ئه‌و قاره‌مانانه دووپات ده‌كه‌ینه‌وه كه مانه‌وه و مه‌ردانه به‌رگرییان له ناوچه‌كه و له چیای شه‌نگال و مه‌زاری شێخ شه‌رفه‌دین كرد و به‌تایبه‌تی باسی له ڕۆڵی دیاری فه‌رمانده ئێزدییه‌كانی پێشمه‌رگه به‌ڕێزان قاسم شه‌شۆ، قاسم سمێر، قاسم دربۆ، خه‌له‌ف مراد عتۆ هه‌بابی و فه‌قیر به‌ده‌ل ئلیاس، كرد.
دوای ئه‌وه به‌ڕێز نێچیرڤان بارزانی مه‌زاری شێخ شه‌رفه‌دینی به‌سه‌ر كرده‌وه و له وه‌ڵامی پرسیاری ڕۆژنامه‌نووساندا گوتی: ’’هاتنی ئێمە بۆ مەزارگەی شەرفەدین و دیتنی ئەو قارەمانانەی کە چەندین مانگە بەرگرییان کردووە و ماندوو بوونە لە چیای شه‌نگال، یەکەم شت بۆ ئەوە بووە کە بە ناوی حکوومەتی هەرێمی کوردستانه‌وه دەستخۆشییان لێ بکەین و پێیان بڵێین ڕێزگرتنی ئێمە بۆ خەبات و ماندووبوونی چەند مانگەی ئەوان و ئەو بەرگرییەی ئەوان کردوویانە لە چیای شه‌نگال یەکجار زۆرە. دووەمیش سەردانمان بۆ مەزارگەی شەرفەدین پەیامی ئێمەیە بۆ خوشک و برا ئێزدیەکانمان و پێیان دەڵێین کە حکوومەتی هەرێمی کوردستان ڕێزی بۆ ئەوان هەیە و پێیان دەڵێین ئێمە لە برینی قووڵی ئێوە تێدەگەین، بەڵام سوپاس بۆ خودا کە لە ئەنجامی خەبات و ماندووبوونی ئەو قارەمانانە، ئێستا ئەو ناوچەیە بە تەواوی ئازاد کراوە و سوپاسی ئەو قارەمانانە دەکەم کە نەیانهێشت ئەم شوێنە پیرۆزەی ئێزدییەکان بکەوێتە دەستی چەکدارانی داعشه‌وه.
هه‌روه‌ها گوتی: له‌گه‌ڵ ئیداره‌ی ناوچه‌كه به تێروته‌سه‌لی باسی هەنگاوەکانی دواترمان کرد لە ڕووی ئاوەدانکردنەوە و گەیاندنی خزمەتگوزاری، کە چۆن خزمەتگوزاریی كارگێڕی بۆ خەڵکی ناوچەکە دەستەبەر بکەین و هیوادارین لە هەنگاوەکانی دواتردا و دوای ئازادکردنی تەواوی شه‌نگال، خزمەتگوزاریی تەواویان بۆ دەستەبەر بکرێت و ژیان بۆ ناوچەکە بگەڕێتەوە و خەڵکەکەشی بگەڕێننەوە سەر ماڵ و حاڵی خۆیان.
سەبارەت بە قەرەبووکردنەوەی ناوچەکە و خەڵکەکەی به‌ڕێز سەرۆک وەزیران گوتی: “بە دڵنیاییەوە هەر من نیم، دوای منیش دیسان لیژنەکانی حکوومەتی هەرێمی کوردستان سەردانی ناوچەکە دەکەنەوە و مەبەستی ئێمە ئەوەیە کە هەر شتێک لە توانادا بێت بۆ قەرەبووکردنەوەی خەڵکی ناوچەکە و گەڕانەوەیان، هەر شتێک پێویست بێت و ئەرکی ئێمە بێت، بە دڵنیاییەوە ئێمە وەک حکوومەت ئەرکی خۆمان جێبه‌جێ ده‌كه‌ین”.
ده‌رباره‌ی پرسی بەجینۆسایدناساندنی ئەوەی لە شه‌نگال ڕووی داوە، به‌ڕێز نێچیرڤان بارزانی گوتی: ”ئێمە بۆ ئەو مەبەستە ئێمە لیژنەمان پێکهێناوە و دوو وەزیری حکوومەتی هەرێمی کوردستان لە لیژنەکەدا بەشدارن، لەگەڵ هەندێ شایەتحاڵی ڕووداوەکان. هەوڵەکانی ئێمە وەک حکوومەت لەوبارەیەوە بەردەوامن، چونکە بە ڕاستی بڕوای ئێمە وایە ئەو ڕووداوەی بەسەر ئێزدییەکاندا هات، بە هەموو پێوەرەکان جینۆسایدە و هەر هەوڵێک پێویست بکات بۆ بەنێونەتەوەییی ناساندنی ئەو ڕووداوە بە جینۆساید، ئەوا بێ دوودڵی حکوومەت ئەنجامی دەدات”.
لەبارەی وەستانی پێشرەوییەکانی پێشمەرگەشه‌وه بۆ ناو شه‌نگال، به‌ڕێز سەرۆک وەزیران گوتی:”لە ڕاستیدا ئەو بەرنامەیەی کە یەکەمجار دانرا، سەنتەری شه‌نگال لە پلانی ئۆپەراسیۆنەکەی پێشمەرگەدا نەبوو، بڕیار نەبوو جارێ پێشمەرگە بچێتە ناو شه‌نگاله‌وه، ئۆپەراسیۆنە سەربازییەکە تەنها بۆ ڕزگارکردنی چیای شه‌نگال و سنوون و دەورووبەری بوو، ئێستا بە دڵنیایەوه پێشمەرگە لە ڕوانگەی سەربازییەوە سەیری شه‌نگال دەکات و هەر کاتێ شه‌نگال ببێتە ئامانجی ڕزگارکردنی لە لایەن پێشمەرگەوە، ئەوا دەکەوێتە ناو بەرنامەی ئۆپەراسیۆنەکانەوە”.
لەبارەی کاتی ڕزگارکردنی ئه‌و ئافره‌ته ئێزدییانه‌شه‌وه كه له لایه‌ن تیرۆرستانی داعشه‌وه ڕفێنراون، به‌رێز سەرۆک وەزیران گوتی: "هەموو بابەتێک لە ڕاگەیاندنەکانەوە باس ناکرێن، بەڵام دەمەوێ هەموو خەڵک و ئێزدییەکان دڵنیا بکەمەوە کە هەوڵەکانمان بەردەوامن.
لای خۆیه‌وه به‌ڕێز شێخ ئیسماعیل، پیاوی ئایینیی ئێزدی و مجێوری مه‌زارگه‌ی شێخ شه‌رفه‌دین، ده‌رباره‌ی سەردانی به‌ڕێزان سەرۆک بارزانی سه‌رۆكی هەرێمی کوردستان و سەرۆکی حکوومەتی هەرێمی کوردستان بۆ چیای شه‌نگال گوتی "ئێمە زۆر خۆشحاڵ بووین بە هاتنی به‌ڕێزان سەرۆکی هەرێم و سەرۆکی حکوومەت بۆ چیای شه‌نگال و مەزارگەی شەرفەددین’’.
هەروەها گوتی: ’’سەردانی به‌ڕێز سەرۆکی حکوومەت بۆ مەزارگەی شەرفەددین بە واتای سەردانی بەڕێزیانە بۆ ماڵی تەواوی ئێزدییەکان و ئەمرۆ بۆ ئێمە بووە جەژن. هیوادارین هاتنەکەی ببێتە خێر بۆ چیای شه‌نگال و هیوای خواست بە پشتیوانی خودا و سەرۆک بارزانی و جەنگاوەرە ئیزدییەکان و قاسم شەشۆ و هەموو ئێزدییەکان، شه‌نگالیش بە تەواوی ئازاد بکرێت’’.
هەروەها گوتی: ’’دوای کردنەوەی ڕێگەی چیای شه‌نگال، هاوکارییەکان بە بەردەوامی گەیشتوونەتە خەڵکەکە و هیوادارین ئەو هاوکاریانە بەردەوام بن و گوتی: دواکاریی هەرە گرنگمان ئەوەیە هەوڵ بدرێت ئەو کچ و ژنە ئێزدییانەی کە تا ئێستا لە دەستی چەکدارانی داعشدان، ڕزگار بکرێن و داوکارایی دووەممان ئەوەیە کە شه‌نگال ببێتە هەرێمیکی ئێزدی کە سەر بە هەرێمی کوردستان بێت و تەزووی کارەباشمان کە بە هێڵەکانی مووسڵەوە بەسترا بوون، لەمەودوا بە هێڵەکانی هەرێمی کوردستانه‌وه ببەسترێتەوە”.
لە لایەکی دیکەوە به‌ڕێز قاسم شەشۆ یەکێک لە فەرماندە سەربازییەکانی کوردانی ئێزدی كه هه‌ر له سه‌ره‌تاوه له چیای شه‌نگال مایه‌وه و به‌رگری كرد، گوتی:”هاتنی به‌ڕێز سەرۆک بارزانی و ڕێزدار نێچیرڤان بارزانی بۆ ئەو ناوچەیە مێژوویەکە، کە هیچ کاتیک لەبیر ناکرێت و جێگەی دڵخۆشی و سەربڵندیی ئێمەیە. دەمانەوێت لە ڕاگەیاندنەکانەوە بەو خەڵکە بڵیین کە پێشتر دەیانگوت پێشمەرگە لە شنگال ڕایکرد، با ئێستا بزانن کە پێشمەرگە بە خوێن و شەهیدبوون، برینداربوون، هاتن و ڕێگەی چیای شه‌نگالیان کردەوە و سەرۆک بارزانی هاتە چیای شه‌نگال و مەزارگەی شەرفەدین، وەک چۆن ئێستا دەیبینن کە سەرۆکی حکوومەتیش لەبەردەم دەرگای مەزارگەی شەرفەدینە و بەو خەڵکە دەڵێین؛ ئەوان ناتوانن فێڵمان لێبکەن و گاڵتە بە عەقلی خەڵکی ئێمە بکەن.
هەروەها لەبارەی چەند لێدوانێکەوە کە گوایە دەگوترێ شه‌نگال بکرێتە هەرێمی سەربەخۆ کە سەر بە هەرێمی کوردستان نەبێت، به‌ڕێز قاسم شەشۆ گوتی: "ئێمە لە ڕاگەیاندنەکانەوە هەستمان کردووە کە هەندێ کەس دەڵێن با شه‌نگال هەرێمێکی سەربەخۆ بێت و سەر بە هه‌رێمی کوردستان نەبێت، ئەو کەسانە ناحەزی ئێمەن و ئەوان بەرپرسیار نین لە شه‌نگال و بڕیار لە دەستی ئەواندا نییە، ئێمە بەشیکین لە کوردستان و هەرگیز جیا نابینەوە، بەڵام لە سەرۆکی حکوومەت داواکارین کە شه‌نگال بکرێتە پارێزگا و بە قەزا نەمێنێتەوە’’.
پاشنیوه‌ڕۆش به‌رێز نێچیرڤان بارزانی له‌سه‌ر چیای شه‌نگال، له‌گه‌ڵ فه‌رمانده سه‌ربازییه‌كانی سنووره‌كه و فه‌رمانده ئێزدییه‌كانی پێشمه‌رگه كه هه‌ر له سه‌ره‌تاوه له چیای شه‌نگال مانه‌وه و فه‌رمانده‌ییی پێشمه‌رگه ئێزدییه‌كانیان كرد و به‌رگرییان له چیای شه‌نگال و ئاواره ئێزدییه‌كان و مه‌زاری شێخ شه‌رفه‌دین كرد، دوایین پێشهاته سه‌ربازییه‌كان و چۆنیه‌تیی به‌ڕێوه‌چوونی ئۆپه‌راسیۆنه سه‌ربازییه‌كانی پێشمه‌رگه‌ی تاوتوێ كرد.
نێچیرڤان بارزانی سه‌ردانی میحوه‌ری ڕۆژائاوای دیجله و ناوچه‌ی زوممار ده‌كات
پێشنیوه‌ڕۆی ئه‌مڕۆ یه‌كشه‌ممه 2015/1/4، به‌ڕێز نێچیرڤان بارزانی سه‌رۆك وه‌زیرانی هه‌رێمی كوردستان، میحوه‌ری ڕۆژئاوای دیجله‌ی له ناوچه‌ی سحێلا و سنووری زوممار به‌سه‌ر كرده‌وه و له دیدارێكدا له‌گه‌ڵ فه‌رمانده و به‌رپرسه سه‌ربازییه‌كانی میحوه‌ره‌كه، بارودۆخی ناوچه‌كه و دوایین پێشهاته سه‌ربازییه‌كان و پێشڕه‌وییه به‌رده‌وامه‌كانی پێشمه‌رگه‌ی له به‌ره‌كانی جه‌نگی دژی تیرۆرستانی داعشدا تاوتوێ كرد و له پێویستییه‌كانی پێشمه‌رگه و به‌ره‌كانی جه‌نگی كۆڵییه‌وه.
پاشان به‌ڕێز سه‌رۆك وه‌زیران ناوه‌ندی شارۆچكه‌ی زومماری به‌سه‌ر كرده‌وه و سه‌ردانی هه‌ردوو باره‌گای لیژنه‌ی ناوچه‌ی زومماری پارتی دیموكراتی كوردستان و كۆمیته‌ی زومماری یه‌كێتیی نیشتمانیی كوردستانی كرد، كه ته‌نیا دوو باره‌گای حیزبه كوردستانییه‌كانن دوای ڕزگاركردن و ده‌رهێنانه‌وه‌ی زوممار له ده‌ست تیرۆرستانی داعش، گه‌ڕاونه‌ته‌وه شارۆچكه‌كه. له دوو دیداری جیا له‌گه‌ڵ به‌رپرسانی هه‌ردوولادا، باس له ڕه‌وشی شارۆچكه‌كه و گه‌ڕانه‌وه‌ی دانیشتوانی و پێداویستی و خزمهتگوزارییهكان كرا و به‌تایبه‌تیش جه‌خت له كێشه‌ی نه‌بوونی كاره‌با و په‌له‌كردن له گه‌ڕاندنه‌وه‌ی هێڵی كاره‌بای نیشتمانی كرا. به‌ڕێز سه‌رۆك وه‌زیرانیش ڕایگه‌یاند كه لایه‌نه په‌یوه‌نداره‌كان ڕاده‌سپێرێت تا به زووترین كات كار له‌سه‌ر ئه‌م كێشه‌یه بكرێت و هه‌وڵی ده‌ستپێكردنه‌وه‌ی پێشكه‌شكردنی خزمه‌تگوزارییه گشتییهكان بدرێت.
دوای نیوه‌ڕۆش له دوایین وێستگه‌ی سه‌ردانه‌كه‌یدا بۆ ئه‌و سنووره، به‌ڕێز نێچیرڤان بارزانی، باره‌گای ده‌سته‌ی نه‌وتی نه‌ینه‌وا و كۆمپانیای نه‌وتی باكووری له عه‌ینزاله به‌سه‌ر كرده‌وه. له دیدارێكدا له‌گه‌ڵ به‌رپرسان و سه‌رپه‌رشتیارانی ده‌سته و كۆمپانیاكه، بارودۆخی ناوچه‌كه و سروشتی كار و گرنگیی پاراستنی ئه‌و دامه‌زراوانه، دوای پاككردنه‌وه‌یان له تیرۆرستانی داعش، خسته به‌ر باس و تاوتوێ كرد.
More...
نێچیرڤان بارزانی میحوەری گوێڕ ـ مەخمووری بەسەر كردەوە
نێچیرڤان بارزانى به‌شدارى له یادى شۆڕشى فه‌له‌ستینیدا ده‌كات
نێچیرڤان بارزانى به‌شداریى ڕێوڕه‌سمى "مه‌ولوودى پێغه‌مبه‌ر " ده‌كات
نوێنەری حکومەتی هەرێمی کوردستان لە ئەمریکا دەستبەکاربوو
دوایین هەواڵەکان
- پهيامى سه‌رۆك نێچيرڤان بارزانى بۆ ساڵى نوێ
- پەیامی سەرۆکی حکومەتی هەرێمی کوردستان بە بۆنەی سەری ساڵی نوێی زایینی2025
- سهرۆكى هه‌رێمى كوردستان، پێشوازيى له كونسوڵی گشتيى نوێى ئێران كرد
- عەباس غەزالی: کۆچی مامۆستا مهنسوور یاقووتی وهک لهدهست چونی یاقووتێکی گرانبههایه
- سهرۆک نێچیرڤان بارزانی له‌گه‌ڵ وهزیری بهرگریی هۆڵهندا کۆبووهوه
- سه‌رۆك نێچيرڤان بارزانى پێشوازيى له ئيسماعيل بهشيكچى كرد
- سه‌رۆك نێچيرڤان بارزانى و وهزيرى بهرگريى ئيتاڵيا كۆبوونهوه
- سه‌رۆك نێچيرڤان بارزانى له‌گه‌ڵ فەرماندەی هێزەکانی هاوپەیمانيی نێودەوڵەتی كۆبووهوه
- سه‌رۆك نێچيرڤان بارزانى پێشوازیی له باڵيۆزى نوێى چيك كرد
- سەرۆک نێچیرڤان بارزانی پێشوازیی لە سوپاسالاری بەریتانیا کرد