سه‌رۆك بارزانی پێشوازی له وه‌زیری ده‌ره‌وه‌ی سوید دەكات
ئه‌مڕۆ سێشەممە 19ـی8ـی له سه‌لاحه‌ددین به‌ڕێز مسعود بارزانی سه‌رۆكی هه‌رێمی كوردستان پێشوازیی له وه‌زیری ده‌ره‌وه‌ی سوید به‌ڕێز(كارل بیڵت) و شاندێكی یاوه‌ری كرد كه له ژمارەیەك په‌رله‌مانتارانی یه‌كێتی ئه‌ورووپا پێكهاتبوون.
له‌سه‌ره‌تای دیداره‌كه‌دا وه‌زیری ده‌ره‌وه‌ی سوید ئاماژه‌ی به‌وه كرد له‌گه‌ڵ شاندێكی كۆمیسیۆنی هاوكاری مرۆیی یه‌كێتی ئه‌ورووپا بۆ پشتیوانیكردنی كوردستان هاتوون و جەختی لە پاڵپشتیی سیاسی و مرۆیی وڵاته‌كه‌ی و یه‌كێتی ئه‌ورووپا بۆ كوردستان له ڕووبه‌ربوونه‌وه دژ به تیرۆریستان كردەوە.
وه‌زیری ده‌ره‌وه‌ی سوید سوپاس و دەستخۆشی لە حكومه‌تی هه‌رێمی كوردستان و گه‌لی كوردستان كرد بۆ هاوكاری و په‌نادانی سه‌دان هه‌زار ئاواره و پاراستنی ژیانیان له هەڕەشەی تیرۆریستان. لەم دیدارەدا شاندی میوان جەختیان لەوە كردەوە كە یەكێتیی ئەورووپا ئامادەیە بە بەردەوامی هەتا كۆتاییهاتنی قەیرانی پەنابەران و هەڕەشەی تیرۆریستان هاوكار و پشتیوانی حكوومەتی هەرێم بێت و ئەوەیشیان بە سەرۆك بارزانی ڕاگەیاند كە گرنگترین خاڵ بە لای ئەوانەوە پاراستنی ژیانی ئاواره‌كان و دابینكردنی پێداویستیه‌كانی ژیانیانه.
لە بەرانبەردا سه‌رۆك بارزانی بەخێرهاتنی وه‌زیری ده‌ره‌وه‌ی سوێد و شاندی یاوه‌ری كرد و سەردانەكەیانی بۆ كوردستان به ئومێد به‌خش وه‌سف كرد و ئاماژه‌ی به‌وه كرد كوردستان لە دۆخی ئێستای دا پێویستیی بە هاوكاری و یارمەتیدانی دۆستانی هەیە و ئەوەیشی بۆ شاندی میوان خستەڕوو كە گەلی كوردستان ڕووبەڕووی دەوڵەتێكی تیرۆریستیی پڕچەك بووەتەوە كە پابەندی هیچ جۆرە بەها و پڕەنسیپێك نییە.
لە درێژەی قسەكانیدا سه‌رۆك بارزانی له‌باره‌ی حه‌وانه‌وه و یارمه‌تیدانی ئاواره‌كان گوتی: " ئێمە یارمەتیدانی ئاوارەكان به ئەركێكی نیشتمانی و مرۆیی خۆمان ده‌زانین و جێگەی شانازییه توانیومانه ئه‌و ژماره زۆره بپارێزین و په‌یوه‌ست به‌م پرسه‌شه‌وه، سه‌رۆك بارزانی داوای له شاندی میوان كرد هانی كۆمه‌ڵگه‌ی نێوده‌وڵه‌تی بده‌ن كۆمه‌ك و هاوكارییه‌كانیان بۆ ئاواره‌كان زیاتر بكەن چونكه ئه‌م ژماره زۆرەی ئاوارە و پەنابەر له ده‌ره‌وه‌ی توانای حكومه‌تی هه‌رێمی كوردستانه و جه‌ختشی له‌وە كرده‌وه، پێویسته كۆمەڵگەی نێودەوڵەتی و گشت لایەك هه‌ست به‌رپرسیاریه‌تی بكه‌ین به‌رامبه‌ر به‌و ئاوارانه و یارمه‌تیان بده‌ین بۆ گه‌ڕانه‌وه‌یان بۆ شوێنی خۆیان.
هه‌ر له كۆبوونه‌وه‌كه‌دا به‌وردی باس له مه‌ترسی و هه‌ڕه‌شه‌كانی تیرۆریستان و تاوان و ده‌ڕنده‌ییه‌كانیان دژ به ئێزیدی و مه‌سیحیه‌كان و خەڵكی كوردستان كرا و هه‌ردوولا هاوڕابوون كه تیرۆر دیاریده‌یه‌كی نێوده‌وڵه‌تیه و مه‌ترسی له‌سه‌ر ناوچه‌كه و هه‌موو جیهانه و ده‌بێ بە جدی بیر لەوە بكرێتەوە رێگرییان لێبكرێ.
ته‌وه‌رێكی دیكه‌ی كۆبوونه‌وه‌كه په‌یوه‌ست بوو به باسكردنی پرۆسه‌ی سیاسی عێراق و وه‌زیری ده‌ره‌وه‌ی سوێد ئاماژه‌ی به‌وه كرد، وڵاته‌كه‌ی و یه‌كێتی ئه‌ورووپا هانی لایه‌نه سیاسیه‌كانی عێراق ده‌دات كە حكومه‌تێكی گشتگیر به به‌شداریی هه‌موو لایه‌نه‌كان پێكبهێنرێ بۆ ئەوەی بتوانن رووبه‌ڕووی قه‌یرانه‌كان و هەڕەشەی تیرۆر ببنه‌وه.
وه‌زیری ده‌ره‌وه‌ی سوێد ته‌ئكیدی له‌وه كرده‌وه كورد له پرۆسه‌ی سیاسی عێراق ده‌نگێكی به‌رز و به‌هاداری هه‌بووه و داوای كرد لە قۆناغی ئێستایشدا بەشداریی چالاكی هەبێت.
سه‌رۆك بارزانی له‌باره‌ی پرۆسه‌ی سیاسیی عێراق و دامه‌زراندنی حكومه‌تی نوێی به فرسه‌تێكی باش و دوا فرسه‌ت زانی بۆ ئه‌وه‌ی كێشه قووڵه‌كانی عێراق چاره‌سه‌ر ببێ، و ئەوەیش دووپات كردەوە كە نابێ ئامانج ته‌نیا دروستكردنی حكوومه‌ت بێ، به‌ڵكو پێویستە نه‌هجێكی نوێی هه‌بێ و هه‌ڵه‌كانی ڕابردوو دووباره نه‌كه‌نه‌وه، ئه‌گه‌ر هه‌مان ره‌فتار و هه‌ڵه‌كانی پێشوو دووباره بكرێنه‌وه و قەیران و گرفتەكان قووڵتر و فراوانتر دەبن.
په‌یوه‌ندی نێوان هه‌رێمی كوردستان و وڵاتی سوێد به‌شێكی دیكه‌ی دیداره‌كه بوو و وه‌زیری ده‌ره‌وه‌ی سوێد ئاماژه‌ی به رۆڵی چالاكی جالیه‌ی كوردی له وڵاته‌كه‌یدا له ژیانی كۆمه‌ڵایه‌تی و سیاسی و به پردی نێوان هه‌رێمی كوردستان و سوید وەسفی كرد. سه‌رۆك بارزانی پێشوازی له پته‌وكردنی په‌یوه‌ندییه‌كانیهەرێمی كوردستان و سویدی كرد و سوپاسی دەوڵەت و گەلی سویدیشی كرد كه له كاتی تەنگانەدا خه‌ڵكی ئێمه‌ی له خۆ گرت.
نێچیرڤان بارزانى داوا ده‌كات كۆنفرانسێكى نێوده‌وڵه‌تى بۆ وڵاته كۆمه‌كبه‌خشه‌كان ساز بكرێت
دواى نیوه‌ڕۆى ئه‌مڕۆ دووشه‌ممه 18ى ئابى 2014، به‌ڕێز نێچیرڤان بارزانى سه‌رۆك وه‌زیرانى هه‌رێمى كوردستان پێشوازى له به‌ڕێز "دۆنی گۆیێر" باڵیۆزى فه‌ره‌نسا له عیراق كرد كه به‌بۆنه‌ى كۆتاییهاتنى ئه‌ركه‌كه‌ى و بۆ ماڵئاواییكردن سه‌ردانى به‌ڕێزیانى كرد. به‌ڕێز سه‌رۆك وه‌زیران سوپاس و پێزانینى خۆى پێشكه‌ش به باڵیۆزى فه‌ره‌نسا كرد كه له ماوه‌ى كاركردنیدا ڕۆڵێكى دیارى له بره‌ودان به په‌یوه‌ندییه‌كانى كوردستان و فه‌ره‌نسادا گێڕاوه و هیواى خواست له كار و ئه‌ركى داهاتوویدا سه‌ركه‌وتوو بێت.
لاى خۆیه‌وه باڵیۆزى فه‌ره‌نسا خۆشحاڵیى خۆى به پێشكه‌وتنه‌كانى هه‌رێمى كوردستان له هه‌موو ڕووه‌كانى ئاسایش و ئارامى و ئابوورى و كۆمه‌ڵاتییه‌وه ده‌ربڕى و هاوسۆزیى خۆى و وڵاته‌كه‌ى له‌گه‌ڵ ڕه‌وشى ئێستاى هه‌رێمى كوردستان نیشان دا و دووپاتى كرده‌وه كه فه‌ره‌نسا بۆ ڕووبه‌ڕووبوونه‌وه‌ى تیرۆر پشتگیرى له هه‌رێمى كوردستان ده‌كات.
هه‌روه‌ها ئاماژه‌ى به په‌یوه‌ندییه ته‌له‌فۆنییه‌كانى نێوان هه‌ردوو به‌ڕێزان سه‌رۆك هۆلاند و سه‌رۆك بارزانى دا و خۆشحاڵیى خۆى به سه‌ردانى وه‌زیرى ده‌ره‌وه‌ى فه‌ره‌نسا بۆ هه‌ولێر ده‌ربڕى و ڕایگه‌یاند فه‌ره‌نسا به ته‌واوى پشتگیریى ئه‌و هه‌ڵمه‌ته نێوده‌وڵه‌تییه ده‌كات كه له لایه‌ن كۆمه‌ڵگه‌ى نێوده‌وڵه‌تیه‌وه بۆ هاوكارى و پشتگیریى هه‌رێمى كوردستان له دژى تیرۆرستانى داعش هاتۆته كایه‌وه و تیشكى خسته سه‌ر ڕۆڵى فه‌ره‌نسا له هاندانى كۆمه‌ڵگه‌ى نێوده‌وڵه‌تى به تایبه‌تى ئه‌ورووپا بۆ پشتگیریى هه‌رێمى كوردستان و به‌هاناوه‌چوونى ئه‌و په‌نابه‌ر و ئاوارانه‌ى ڕوویان له ناوچه ئارامه‌كانى كوردستان كردووه.
به‌ڕێز سه‌رۆك وه‌زیرانیش پوخته‌یه‌كى ده‌رباره‌ى پێشڕه‌ویكردنى پێشمه‌رگه له هه‌موو به‌ره‌كاندا له دژى داعش خسته ڕوو، هه‌روه‌ها سوپاس و پێزانینى حكوومه‌ت و خه‌ڵكى كوردستانى پێشكه‌ش به فه‌ره‌نسا كرد بۆ ئه‌و ڕۆڵه گه‌وره‌یه‌ى له دابینكردنى پشگیریى نێوده‌وڵه‌تیدا بۆ كوردستان بینیویه‌تى. دووپاتیشى كرده‌وه كه هه‌رێمى كوردستان پێویستى به هاوكاریى زۆر زیاترى نێوده‌وڵه‌تى هه‌یه بۆ ئه‌وه‌ى وه‌ك پێویست به هاناى ئه‌و سه‌دان هه‌زار ئاوارانه‌وه بچێت كه له ترسى داعش ماڵ و حاڵى خۆیان جێ هێشتووه، چونكه باره‌كه زۆر له‌وه قورستره كه به ته‌نیا له تواناى حكوومه‌تى هه‌رێمى كوردستاندا بێت.
به‌ڕێز نێچیرڤان بارزانى هه‌روه‌ها داواى كرد كۆنفرانسێكى نێوده‌وڵه‌تى بۆ ئه‌و وڵات و لایه‌ن و ڕێكخراو و داموده‌زگا نێوده‌وڵه‌تییه كۆمه‌كبه‌خشانه ساز بكرێت كه كۆمه‌ك و هاوكاریى مرۆیى پێشكه‌ش به هه‌رێمى كوردستان ده‌كه‌ن بۆ ئه‌وه‌ى بتوانێت وه‌ك پێویست به هاناى ئه‌و ژماره زۆرى په‌نابه‌ران و ئاواره‌كانه‌وه بچێت كه ئێستا له زۆربه‌ى شاره گه‌وره‌كانى هه‌رێمى كوردستاندا گیرساونه‌ته‌وه و پێویستییان به‌وپه‌ڕى كۆمه‌ك و هاوكاریى مرۆیى هه‌یه و ئه‌گه‌ر هه‌ڵمه‌تێكى نێوده‌وڵه‌تى بۆ به‌هانه‌وه‌چوونیان نه‌كرێت، ڕووبه‌ڕووى كاره‌ساتێكى مرۆیى ده‌بنه‌وه.
نێچیرڤان بارزانى پێشوازى له شاندێكى به‌ریتانى كرد
دواى نیوه‌ڕۆى ئه‌مڕۆ دووشه‌ممه 18ى ئابى 2014، به‌ڕێز نێچیرڤان بارزانى سه‌رۆك وه‌زیرانى هه‌رێمى كوردستان پێشوازى له به‌ڕێز "ڕۆڕی ستیوارت" سەرۆكی لێژنەی بەرگری لە پەرلەمانی بەریتانیا و شاندێكی یاوەری كرد كه له‌سه‌ر داواى به‌ڕێز سه‌رۆك وه‌زیرانى به‌ریتانیا سه‌ردانى هه‌رێمى كوردستانیان كردووه.
له دیدارێكدا دوایین پێشهاته‌كانى شه‌ڕگه و به‌ره‌كانى ڕووبه‌ڕووبوونه‌وه له‌گه‌ڵ چه‌كدارانى تیرۆرستى داعش و پێشڕه‌وییه‌كانى ئه‌م چه‌ند ڕۆژانه‌ى پێشمه‌رگه له هه‌موو به‌ره‌كاندا خرانه به‌ر باس، هه‌روه‌ها تیشك خرایه سه‌ر ڕه‌وش و بارودۆخى ئه‌و سه‌دان هه‌زار ئاوارانه‌ى كوردى ئێزدیى شه‌نگال و مه‌سیحییه‌كانى مووسڵ و پێكهاته‌كانى دیكه‌ى ده‌وروبه‌رى كه له ئه‌نجامى هێرشه تیرۆرستییه‌كانى داعشدا ڕوویان له ناوچه ئارامه‌كانى هه‌رێمى كوردستان كردووه.
به‌ڕێز سه‌رۆك وه‌زیران دووپاتى كرده‌وه به‌هاناوه‌چوونى په‌نابه‌ران ته‌نیا به حكوومه‌تى هه‌رێمى كوردستان ناكرێت كه ماوه‌یه‌ى حه‌وت مانگه بودجه‌كه‌ى له لایه‌ن حكوومه‌تى عیراقه‌وه بڕاوه و حكوومه‌تى به‌غداش هاوكارییه‌كى واى پێشكه‌ش نه‌كردووه، بۆیه ده‌بێ كۆمه‌ڵگه‌ى نێوده‌وڵه‌تى به هانایانه‌وه بێت و له‌مڕووه‌وه هاوكاریى حكوومه‌تى هه‌رێمى كوردستان بكات.
له به‌شێكى دیكه‌ى دیداره‌كه‌دا هه‌ردوولا باسیان له گرنگیى به‌ده‌نگه‌وه‌هاتنى نێوده‌وڵه‌تى بۆ هه‌رێمى كوردستان و به‌رده‌وامیى ئه‌و پشتگیرییه كرد تا بتوانێت ڕووبه‌ڕووى تیرۆرستانى داعش ببێته‌وه و مه‌ترسیى تیرۆر له هه‌رێمى كوردستان و پێكهاته نه‌ته‌وه‌یى و ئایینییه‌كانى دوور بخاته‌وه. بۆ ئه‌م مه‌به‌سته‌ش هه‌ردوولا كۆك بوون له‌سه‌ر گرنگیى دابینكردنى پاراستنێكى ئاسمانیى نێوده‌وڵه‌تى بۆ ئه‌و شوێنانه‌ى كوردانى ئێزدى و مه‌سیحییه‌كانى ده‌شتى نه‌ینه‌وا و شه‌به‌ك و توركمانى ناوچه‌كه كه بوونه‌ته ئامانجى هێرشه تیرۆرستییه‌كانى داعش.
له كۆتاییى دیداره‌كه‌دا پرۆسه‌ى سیاسى و پێكهێنانى كابینه‌ى تازه‌ى حكوومه‌تى عیراق تاوتوێ كرا و له‌مباره‌یه‌وه به‌ڕێز نێچیرڤان بارزانى دووپاتى كرده‌وه كێشه‌كانى عیراق به‌ر له ڕێكاره ئه‌منى و سه‌ربازییه‌كان، به پله‌ى یه‌كه‌م پێویستى به چاره‌سه‌رى سیاسى هه‌یه و ده‌بێ هه‌مووان له‌وه تێبگه‌ن كه عیراقى به‌ر له كه‌وتنى مووسڵ به هیچ شێوه‌یه‌ك عیراقى دواى ئه‌وه نیه و له‌سه‌ر ئه‌م بنه‌مایه مامه‌ڵه بكه‌ن. هه‌روه‌ها هیواى خواست حكوومه‌تێكى عیراقیى وا پێك بێت كه بتوانێت كۆكه‌ره‌وه و ده‌ربڕى خواست و ما‌فه‌كانى هه‌موو پێكهاته نه‌ته‌وه‌یى و ئایینى و مه‌زهه‌بییه‌كانى عیراق بێت و سوود له هه‌ڵه‌كانى حكوومه‌تى پێش خۆى وه‌ربگرێت.
سوێد و ده‌زگاكانى یه‌كێتیى ئه‌ورووپا سوپاسى هه‌رێمى كوردستان ده‌كه‌ن
دواى ئه‌وه‌ى كه به سه‌ردانێك گه‌یشته هه‌ولێر، ئێواریه‌ى ئه‌مڕۆ دووشه‌ممه 18ى ئابى 2014 به‌ڕێز نێچیرڤان بارزانى سه‌رۆك وه‌زیرانى هه‌رێمى كوردستان پێشوازى له وه‌زیرى ده‌ره‌وه‌ى سوێد "كارل بیلد" و شاندێكى باڵاى یاوه‌رى كرد كه له كۆمه‌ڵێك به‌رپرسانى ده‌زگاكانى یه‌كێتیى ئه‌ورووپا و هه‌ردوو باڵیۆزى یه‌كێتیى ئه‌ورووپا و سوێد له عیراق و ژماره‌یه‌ك له ڕاوێژكاران پێكهاتبوو.
له سه‌ره‌تاى دیداره‌كه‌دا وه‌زیرى ده‌ره‌وه‌ى سوێد خۆشحاڵیى به سه‌ردانى هه‌ولێر ده‌ربڕى و باسى له هه‌ڵوێستى وڵاته‌كه‌ى و یه‌كێتیى ئه‌ورووپا كرد بۆ پشتگیرى و هاوكاریكردنى هه‌رێمى كوردستان له ڕووبه‌ڕووبوونه‌وه له‌گه‌ڵ تیرۆرستانى داعشدا. هه‌روه‌ها دووپاتى كرده‌وه به‌م سه‌ردانه‌یان ویستوویانه هه‌م بارودۆخه‌كه له نزیكه‌وه ببینن، هه‌م ئه‌وه نیشان بده‌ن و ئه‌و په‌یامه به هه‌موو لایه‌ك بگه‌یه‌نن كه له‌م بارودۆخه‌دا پشتیوانى هه‌رێمى كوردستانن.
به‌ڕیز سه‌رۆك وه‌زیرانیش وێڕاى به‌خێرهێنان و خۆشحاڵى به‌م سه‌ردانه‌یان، ڕوونى كرده‌وه هاتنیان بۆ هه‌رێمى كوردستان په‌یامێكى دروست بۆ گه‌لى كوردستان ده‌نێرێت به‌وه‌ى كه له ڕۆژگارێكى ئاوادا ته‌نیا نیه. ئینجا پوخته‌یه‌كى له پێشڕه‌وییه‌كانى پێشمه‌رگه پێشكه‌ش كرد و دووپاتى كرده‌وه هه‌رێمى كوردستان سووره له‌سه‌ر به‌رپه‌چدانه‌وه‌ى تیرۆرستان و شكستپێهێنانیان. ئاماژه‌ى به‌وه‌ش دا كه هه‌رێمى كوردستان پێویستى به چه‌ك و تفاقى پێشكه‌وتووى سه‌ربازى هه‌یه بۆ ئه‌وه‌ى بتوانێت باشتر ڕووبه‌ڕووى تیرۆر ببێته‌وه.
سه‌رۆك وه‌زیران هه‌روه‌ها جه‌ختى له‌وه كرده‌وه كه ڕه‌وشى مرۆییى په‌نابه‌ران و ئاواره‌كان زۆر قورسه و ئه‌وه‌ى ده‌گوره‌زێ كاره‌ساتێكى مرۆییى یه، بۆیه هه‌رێمى كوردستان چاوى له كۆمه‌ك و هاوكاریى نێوده‌وڵه‌تییه بۆ ئه‌وه‌ى بتوانێت وه‌ك پێویست به‌هاناى په‌نابه‌ران و ئاواراه‌كانه‌وه بچێت. پابه‌ندیى حكوومه‌تیشى بۆ پاراستن و هاوكاریكردنى هه‌موو پێكهاته نه‌ته‌وه‌یى و ئایینییه‌كانى ناوچه‌كه دووپات كرده‌وه.
لاى خۆیه‌وه كۆمیسارى مرۆییى یه‌كێتیى ئه‌ورووپا تیشكى خسته ڕه‌وشى په‌نابه‌ران و ئاواره‌كان و سوپاس و پێزانینى كۆمسیۆنه‌كه‌یانى پێشكه‌ش به حكوومه‌تى هه‌رێمى كوردستان كرد كه وێڕاى بارقورسى و بڕینى بودجه‌ى كوردستان له لایه‌ن به‌غداوه، كۆمه‌ك و هاوكارى پێشكه‌ش به هه‌مووان كردووه، به‌مه‌ش هه‌رێمى كوردستان سه‌لماندوویه‌تى كه شایانى پشتیوانیى نێوده‌وڵه‌تییه.
له كۆتاییدا هه‌ردوولا هیوایان خواست كه پرۆسه‌ى سیاسى له عێراق بكه‌وێته سه‌ر ڕاسته‌ڕێى خۆى و پێكهێنانى كابینه‌ى نوێ ببێته ده‌سپێكى قۆناغێكى تازه‌ى سیاسى له عێراق كه گشتگیر و به به‌شداریى هه‌موو پێكهاته‌كانى عیراق بێت و ببێته مایه‌ى گۆڕانكاریى ڕاسته‌قینه له شێواز و سیسته‌مى ده‌سه‌ڵاتداریى عیراقدا.
وەزیری دەرەوەی وڵاتی سوید گەیشتە هەرێمی كوردستان
لەچوارچێوەی بایەخدانی كۆمەڵگای نێودەوڵەتی بە بارودۆخی هەرێمی كوردستان و دەربڕینی پشتیوانی بۆ سەقامگیری و پێشكەوتنەكانی هەرێمی كوردستان لە بەرامبەر هەر هێرش و پەلامارێكی تیرۆرستان، ئێوارەی ئەمڕۆ بەڕێز كارل بیلت وەزیری دەرەوەی وڵاتی سوید بە یاوەری شاندێك لە رێگەی فڕۆكەخانەی نێودەوڵەتی هەولێر گەیشتە هەرێمی كوردستان و لەلایەن بەڕێزان كەریم سنجاری وەزیری ناوخۆ و فەلاح مستەفا بەرپرسی پەیوەندیەكای دەرەوەی حكومەت پێشوازی لێكرا.
ئەمەو بڕیار وایە بەڕێزیان دیدارو كۆبوونەوە لەگەڵ گەورە بەرپرسانی هەرێمی كوردستان ئەنجام بدات.
سەرۆكی هەرێمی كوردستان پێشوازی لە سەرۆكی لێژنەی بەرگریی لە پەرلەمانی بەریتانیا كرد
ئەمڕۆ یەك شەممە 17 ـی 8 ـی 2014 لە سەلاحەددین، بەڕێز مەسعود بارزانی سەرۆكی هەرێمی كوردستان پێشوازیی لە ڕۆڕی ستیوارت سەرۆكی لێژنەی بەرگری لە پەرلەمانی بەریتانیا و شاندی یاوەری كرد.
لە دیدارێكدا دواین پێشهاتە سیاسی و ئەمنیەكانی كوردستان و عێراق و بارودۆخی مەیدانی بەرەكانی ڕووبەڕووبوونەوەی هێزەكانی پێشمەرگەی كوردستان و تیرۆریستان تاوتوێكرا و هەروەها قسە لەبارەی رەوشی ئاوارەكان و چۆنییەتی گەیاندنی هاریكاریی مرۆیی بریتانیا كرا.
لەو دیدارەدا سەرۆكی لێژنەی بەرگریی لە پەرلەمانی بەریتانیا سڵاوی سەرۆك وەزیرانی بەریتانیای بەسەرۆك بارزانی گەیاند و دووپاتی ئەوەی كردەوە وڵاتەكەی پاڵپشتی لە گەلی كوردستان دەكات و هەرێمی كوردستان و سەقامگیری و پێشكەوتنەكەی بۆ بەریتانیا بابەتێكی پڕ بەهایە.
پرۆسەی سیاسی عێراق و دوا هەنگاوەكانی پێكهێنانی حكوومەتی نوێی عێراق و پەیوەندییەكانی نێوان هەرێمی كوردستان و بەغدا تەوەرێكی دیكەی دیدارەكە بوو.
سەرۆكی هەرێمی كوردستان پێشوازی لە وەزیری دەرەوەی لوبنان دەكات
ئەمڕۆ دووشەممە 18ـی 8ـی 2014 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە جوبران باسیل وەزیری دەرەوەی لوبنان و شاندێكی یاوەری كرد.
لە دیدارێكدا وەزیری دەرەوەی لوبنان سوپاسی سەرۆك بارزانی كرد بۆ ڕەخساندنی ئەم دیدارە و سڵاوی گەلی لوبنان و سەرۆك وەزیرانی وڵاتەكەی بە سەرۆك بارزانی گەیاند و جەختی لە پەرەپێدانی پەیوەندییەكانی هەردوو وڵات لە بوارە جیاجیاكان كردەوە و سوپاسی سەرۆك بارزانی و گەلی كوردستانیشی كرد بۆ حەواندنەوە و پاراستنی ئەو هاووڵاتییە مەسیحییانەی كە لە ئەنجامی پەلاماری تیرۆریستان پەنایان بۆ كوردستان هێناوە.
لە بەرانبەردا سەرۆك بارزانی بەخێرهاتنی شاندی میوانی كرد و وێڕای ئاماژەدان بە پەیوەندییە مێژووییەكانی گەلی كوردستان و لوبنان پێشوازی لە فراوانبوونی پەیوەندییەكانی نێوان كوردستان و لوبنان كرد.
هەر لەم دیدارەدا هەڕەشەكانی تیرۆر بۆ هەرێمی كوردستان و عێراق و ناوچەكە و ڕێگەكانی ڕووبەڕووبوونەوەی ئەم هەڕەشەیە تاوتوێ كرا. لەم كۆبوونەوەیەدا بارودۆخی ئاوارە و پەنابەران خرایە بەر باس و بە لەبەرچاوگرتنی ئەوەی ئەو ژمارە زۆرەی كە ڕوویان لە هەرێمی كوردستان كردووە هەردوولا جەختیان لەوە كردەوە كە پێویستە كۆمەڵگەی نێودەوڵەتی پاڵپشتییەكی زیاتری هەرێمی كوردستان بكات و حكوومەتی عێراقیش بە بەرپرسیارێتیی خۆی بەرانبەر هاووڵاتیان و پەنابەران پابەند بێت و ئاسانكاری بۆ یارمەتیدان و بەهاناچوونی پەنابەران بخاتەڕوو.
پەیوەست بە پاراستن و یارمەتیدانی خوشك و برا مەسیحییەكان سەرۆك بارزانی ڕایگەیاند كە هەرێمی كوردستان بە هەموو توانایەوە هەوڵی داوە یارمەتییان بدات و بیانپارێزێت و داوایشی كرد كە بیر لە جێهێشتنی خاك و وڵاتیان نەكەنەوە چونكە هەڕەشەی تیرۆر كاتییە و تیرۆریستان تێكدەشكێن و ئەوەیشی خستەڕوو كە گەلی كوردستان بەهەموو پێكهاتەكانییەوە یان هەموومان پێكەوە دەمرن یان پێكەوە بە ئازادی لەسەر خاكی خۆمان دەژیین. سەرۆك بارزانی ئامادەیی حكوومەتی هەرێمیشی ڕاگەیاند كە دەرگەی خۆبەخشین بۆ خوشك و برا مەسیحییەكان بكاتەوە بۆ ئەوەی شانبەشانی پێشمەرگە پارێزگاری لە وڵات بكەن.
سه‌رۆكی هه‌رێمی كوردستان په‌یوه‌ندییه‌كی ته‌له‌فۆنی له وه‌زیری ده‌ره‌وه‌ی نه‌رویج پێده‌گات
ئه‌مڕۆ دووشه‌مه 18/8/2014 به‌ڕێز مسعود بارزانی سه‌رۆكی هه‌رێمی كوردستان په‌یوه‌ندیه‌كی ته‌له‌فۆنی له بۆرج برێندا وه‌زیری ده‌ره‌وه‌ی نه‌رویجه‌وه پێگه‌یشت.
له په‌یوه‌ندییه‌كه‌دا وه‌زیری ده‌ره‌وه‌ی نه‌رویج پاڵپشتی حكوومه‌ت و گه‌لی نه‌رویجی بۆ گه‌لی كوردستان له شه‌ڕی تیرۆریستاندا راگه‌یاند و پیرۆزبایی سه‌ركه‌وتنه‌كانی هێزی پێشمه‌رگه‌ی كوردستانی به‌سه‌ر تیرۆریستان له سه‌رۆك بارزانی كرد، به‌وه‌ی كە هێزەكانی پێشمەرگە رێگه‌یان نه‌دا تیرۆریستان پێشڕه‌وی بكه‌ن و توانیان تێكیان بشكێنن.
هه‌روه‌ها رایگه‌یاند، هیوادارین ئه‌وه‌ی به‌ڕێزتان و هه‌رێمی كوردستان لە بەرەنگاربوونەوەی داعشدا كردوویه‌تی ببێته سه‌ره‌تای كۆتایهاتن و تێكشكاندنی تیرۆریستان له ناوچه‌كه و جیهاندا. له‌درێژه‌ی په‌یوه‌ندییه ته‌له‌فۆنیه‌كه‌دا وه‌زیری ده‌ره‌وه‌ی نه‌رویج هاوسۆزی خۆی به‌رامبه‌ر مه‌ینه‌تی ئه‌و هه‌موو هاووڵاتیانه نیشاندا كه له ترسی هه‌ڕه‌شه‌كانی تیرۆریستاندا ئاوارە بوونە و ماڵ و حاڵی خۆیان جێهێشتووه و روویان له هه‌رێمی كوردستان كردووه.
له‌به‌رامبه‌ردا سه‌رۆك بارزانی سوپاسی هه‌ڵویسستی حكوومه‌تی نه‌رویجی كرد و رایگه‌یاند، گه‌لی كوردستان به‌سه‌ربه‌رزییه‌وه له جیاتی جیهانی ئازاد شه‌ڕی دەوڵەتێكی تیرۆریستی ده‌كات، كه چه‌كی هه‌ردوو سوپای عێراق و سوریای كه‌وتۆته ده‌ست و گوتی: سه‌ربه‌رزین به‌وه‌ی هه‌رێمی كوردستان و پێشمه‌رگه توانیویه‌تی گیانی زیاتر له یه‌ك ملیۆن و نیو ئاواره بپارێزێ.
له به‌شێكی دیكه‌ی په‌یوه‌ندییه ته‌له‌فۆنییه‌كه‌دا سه‌رۆكی هه‌رێمی كوردستان رایگه‌یاند، ئێمه له‌سه‌ر پاراستنی به‌ها و پره‌نسیپه‌كانی دیموكراسی و لێبورده‌یی و پێكه‌وه‌ژیان سوورین.
له كۆتایی په‌یوه‌ندییه ته‌له‌فۆنیه‌كه‌دا وه‌زیری ده‌ره‌وه‌ی نه‌رویج ڕایگەیاند وه‌ك هه‌نگاوێكی پراكتیكی هه‌فته‌ی داهاتوو سه‌ردانی هه‌رێمی كوردستان ده‌كات و دووپاتی ئەوەی كردەوە كە نەرویج بەردەوام دەبێت لە هاریكاریی مرۆیی و حكوومه‌ته‌كه‌ی دیراسه‌ی ئه‌وه ده‌كات، كه چۆن ئه‌م هاوكاری و پشتیوانیانه فراوانتر بكرێن.
سەرۆكی هەرێمی كوردستان پێشوازی لە باڵیۆزی فەڕەنسا لە عێراق دەكات
ئێوارەی ئەمڕۆ یەكشەممە 17ـی 8ـی 2014 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە دۆنی گۆیێر باڵیۆزی فەڕەنسا لە عێراق و شاندێكی یاوەری كرد.
لە دیدارێكدا باڵیۆزی فەڕەنسا لە عێراق سوپاسی سەرۆك بارزانیی كرد بۆ ڕەخساندنی ئەم دیدارە و نیگەرانیی و هاوسۆزیی خۆیشی بۆ گەلی كوردستان نیشاندا بۆ ئەو تەحەدیات و گرفتانەی لە ئەنجامی پەلاماری تیرۆریستان بۆ سەر كوردستان هاتووەنەتە ئارا. باڵیۆزی فەڕەنسا لە عێراق ئەوەیشی خستەڕوو كە لەوە دڵنیایە كوردستان لەسەر ڕێگەی ڕاست دەڕوات و دەتوانێ لە كاروانی پێشكەوتنی خۆی بەردەوام بێت و هەروەها وێڕای ئاماژەدان بە دۆستایەتیی دێرینی گەلی كوردستان و گەلی فەڕەنسا ڕایگەیاند كە فەڕەنسا ئامادەیە لە هەر كاتێكدا هەڕەشە لەسەر گەلی كوردستان بێت یارمەتیی بدات. باڵیۆزی فەڕەنسا لە عێراق هێمایشی بەوەدا كە وڵاتەكەی بەردەوام دەبێت لە یارمەتیدانی مرۆیی و سەربازی بۆ هەرێمی كوردستان و هانی وڵاتانی دیكەی ئەورووپایش دەدات كە یارمەتیدانەكانیان چالاكتر بكەن. سەبارەت بە هەڵوێستی بەغدا لەمەڕ یارمەتیدانی هەرێمی كوردستان باڵیۆزی فەڕەنسا لە عێراق ئاماژەی بەوەدا كە حكوومەتی عێراقی لەبەرانبەر ئەو دۆخە مرۆیی و ئەمنییەی لە كوردستان هاتووتە ئاراوە دەبێ بە هەست بەرپرسیارێتییەكی زیاتر مامەڵە بكات.
لەبەرانبەردا سەرۆك بارزانی بەخێرهاتنی باڵیۆزی فەڕەنسای كرد و هیوای سەركەوتنی بۆ خواست و بەناوی خەڵكی كوردستان سوپاسی سەرۆك و حكوومەت و گەلی فەڕەنسای كرد كە لەكاتی تەنگانەدا بە كردەوە لەتەك گەلی كوردستان وەستان و ڕۆڵی پێشڕەوانەی فەڕەنسایشی بۆ هاندانی وڵاتانی ئەورووپا بۆ یارمەتیانی كوردستان بەرز نرخاند.
سەبارەت بە دۆخی بەرەكانی جەنگ سەرۆك بارزانی ئاماژەی بەوەدا كە ئێمە ڕووبەڕووی دەوڵەتێكی تیرۆریستیی پڕچەك بووینەوە كە چەكی دوو وڵاتی سووریا و عێراقی كەوتۆتە دەست و پێشمەرگەیش كە ماوەی 10 ساڵە لە لایەن حكوومەتی عێراق ئابلوقەی لەسەرە پێویستی بە چەكێكە كە بتوانێ ئەو تیرۆریستانە بشكێنێت كە چەكی نوێ و زۆریان لەبەردەستە.
لەم دیدارەدا سەرۆك بارزانی بە وردی لەبارەی جینۆسایدی كوردانی ئێزیدی و ئاوارەبوونیان و هەروەها ئاوارەبوونی مەسیحییەكان دوا و ئەوەی خستەڕوو كە ژمارەی ئاوارەكان لە توانای هەرێم چووەتە دەر بە تایبەتیش كە ماوەی 8 مانگە بەغدا بودجەی هەرێمی بڕیوە و ئێستایش لە شەڕێكی بەردەوام داین لەگەڵ تیرۆریستان. لە درێژەی قسەكانیدا سەرۆك بارزانی ئاماژەی بە بوونی ژمارەیەكی زۆری بیانی كرد لەنێو ڕیزەكانی داعش و بەرەنگاربوونەوەی تیرۆری بە ئەركێكی نێودەوڵەتی لەقەڵەم دا.
سەبارەت بە سیاسەتی بەغدایش سەرۆك بارزانی ڕایگەیاند كە بەرپرسیارێتیی دروستبوونی ئەم دۆخە نالەبارە دەكەوێتە سەر شانی حكوومەتی عێراقی كەچی لە مەسەلەی ئاوارەكان و شەڕی دژی داعش بەرپرسیارێتیی خۆی بەجێنەگەیاندووە.
پۆڵۆنیا هاوكاریى هه‌رێمى كوردستان دەکات
سه‌ر‌له‌به‌یانیى ئه‌مڕۆ یه‌كشه‌ممه 17ى ئابى 2014، به‌ڕێز نێچیرڤان بارزانى سه‌رۆك وه‌زیرانى هه‌رێمى كوردستان پێشوازى له به‌ڕێز باڵیۆز "ستانیسلاو سمۆلن" نێرده‌ى تایبه‌تى وه‌زاره‌تى ده‌ره‌وه‌ى پۆلۆنیا كرد كه ئه‌مڕۆ له‌گه‌ڵ فڕۆكه‌یه‌كى بارهه‌ڵگرى وڵاته‌كه‌ى كۆمه‌ك و یارمه‌تیى مرۆیى بۆ ئاواره‌كان گه‌یانده فڕۆكه‌خانه‌ى هه‌ولێر.
له دیدارێكدا سه‌ره‌تا به‌ڕێز سه‌رۆك وه‌زیران سوپاس و پێزانینى حكوومه‌تى هه‌رێمى كوردستانى پێشكه‌ش به پۆلۆنیا كرد بۆ گه‌یاندنى ئه‌م كۆمه‌ك و هاوكارییانه، ئینجا باس له دوا پێشهاته ئه‌منى و سه‌ربازییه‌كانى ناوچه‌كه و به‌ره‌كانى جه‌نگ و ڕووبه‌ڕووبوونه‌وه‌ى پێشمه‌رگه له‌گه‌ڵ چه‌كدارانى تیرۆرستیى داعش كرا و هه‌ردوولا جه‌ختیان له‌سه‌ر پێویستیى پشتگیریى نێوده‌وڵه‌تى بۆ هه‌رێمى كوردستان له‌م شه‌ڕه‌یدا له‌دژى تیرۆرستانى داعش كرده‌وه.
له‌مباره‌یه‌وه به‌ڕێز سه‌رۆك وه‌زیران دووپاتى كرده‌وه كه هه‌رێمى كوردستان چاوى له هاوكارى و یارمه‌تیى نێوده‌وڵه‌تى به‌گشتى و ئه‌ورووپا به‌تایبه‌تى هه‌یه بۆ ئه‌وه‌ى بتوانێت به‌ره‌نگارى تیرۆرستان ببێته‌وه و پێداویستیى سه‌دان هه‌زار له‌و په‌نابه‌ر و ئاوارانه‌ش دابین بكات كه ڕوویان له هه‌رێمى كوردستان كردووه.
به‌ڕیز نێرده‌ى وه‌زاره‌تى ده‌ره‌وه‌ى پۆلۆنیاش وێڕاى دووپاتكردنه‌وه‌ى پشتگیریى وڵاته‌كه‌ى بۆ هه‌رێمى كوردستان و خۆشحاڵییان به سه‌ركه‌وتنه‌كانى پێشمه‌رگه، تیشكى خسته سه‌ر دوایین كۆبونه‌وه‌ى وه‌زیرانى ده‌ره‌وه‌ى یه‌كێتیى ئه‌ورووپا كه تیایدا پشتگیریى سه‌ربازى و مرۆییان بۆ هه‌رێمى كوردستان دووپات كرده‌وه و ڕایگه‌یاند كه له كۆبوونه‌وه‌كه‌دا پۆلۆنیا ڕۆڵێكى دیارى بۆ پشتگیریى هه‌رێمى كوردستان گێڕاوه.
به‌ڕێز سه‌رۆك وه‌زیرانیش سوپاسى ئه‌م هه‌ڵوێسته‌ى پۆڵۆنیاى كرد و داواى كرد كه هه‌مووان پشتگیریى سه‌ربازى و مرۆیى له هه‌رێمى كوردستان بكه‌ن، بۆ ئه‌وه‌ى بتوانێت له‌و شه‌ڕه‌دا سه‌ركه‌وتوو بێت كه ئێستا له جیاتى هه‌موو جیهان، له‌دژى تیرۆرستانى داعش ده‌یكات.
له كۆتاییى دیداره‌كه‌دا به‌ڕێز نێرده‌ى وه‌زاره‌تى ده‌ره‌وه‌ى پۆلۆنیا دووپاتى كرده‌وه كه وڵاته‌كه‌ى خوازیارى ئه‌وه‌یه كۆمپانیا و كارساز و خاوه‌نكارانى خۆى بنێرێته هه‌رێمى كوردستان و ئه‌و په‌یامه بگه‌یه‌نێت كه هه‌رێمى كوردستان بۆ كار و ئه‌نجامدانى پرۆژه، شوێنێكى ئارامه و ده‌توانن كار و چالاكیى بازرگانى و ئابوورى تیادا ئه‌نجام بده‌ن.
More...
حكوومه‌ت چه‌ند بریارێك له‌سه‌ر ڕه‌وشى هه‌نووكه‌ییى كوردستان ده‌دات
پەرلەمانی بەریتانیا پشتگیری خۆی بۆ هەرێمی كوردستان دووپاتكردەوە
فڕانك ڤاڵتەر شتاینمایر وەزیری دەرەوەی ئەڵمانیا گەیشتە هەرێمی كوردستان
سەرۆكایەتی ھەرێمی كوردستان نامه‌یه‌كی ئاراستەی یه‌كێتی ئه‌وروپا كرد
دوایین هەواڵەکان
- پهيامى سه‌رۆك نێچيرڤان بارزانى بۆ ساڵى نوێ
- پەیامی سەرۆکی حکومەتی هەرێمی کوردستان بە بۆنەی سەری ساڵی نوێی زایینی2025
- سهرۆكى هه‌رێمى كوردستان، پێشوازيى له كونسوڵی گشتيى نوێى ئێران كرد
- عەباس غەزالی: کۆچی مامۆستا مهنسوور یاقووتی وهک لهدهست چونی یاقووتێکی گرانبههایه
- سهرۆک نێچیرڤان بارزانی له‌گه‌ڵ وه‌زیری بهرگریی هۆڵهندا کۆبووهوه
- سه‌رۆك نێچيرڤان بارزانى پێشوازيى له ئيسماعيل بهشيكچى كرد
- سه‌رۆك نێچيرڤان بارزانى و وهزيرى بهرگريى ئيتاڵيا كۆبوونهوه
- سه‌رۆك نێچيرڤان بارزانى له‌گه‌ڵ فەرماندەی هێزەکانی هاوپەیمانيی نێودەوڵەتی كۆبووهوه
- سه‌رۆك نێچيرڤان بارزانى پێشوازیی له باڵيۆزى نوێى چيك كرد
- سەرۆک نێچیرڤان بارزانی پێشوازیی لە سوپاسالاری بەریتانیا کرد