رووداو-هەولێر
 
نوێنەری حکومەتی هەرێمی کوردستان لە تاران رایگەیاند، ئێران لەگەڵ دوورخستنەوەی موقتەدا سەدر و رەوتی سەدرییەکان نییە لە پێکهاتەی حکومەتی داهاتوو و دەیەوێت حکومەتی سازان بێتە کایەوە. دەشڵێت، ئێرانییەکان نەیانویستووە کورد بەشێک بێت لە کێشەی نێو ماڵی شیعە.
 
رۆژی هەینی، 16ـی ئەیلوولی 2022، نازم دەباغ، نوێنەری حکومەتی هەرێمی کوردستان لە ئێران، لە هەڤپەیڤینێکدا لەگەڵ تۆڕی میدیایی رووداو باسی چەند پرسێکی نێوان ئێران و هەرێمی کوردستان و عێراقی کرد. نازم دەباغ رەتیدەکاتەوە ئیسماعیل قائانی، فەرماندەی فەیلەقی قودس لە هەوڵەکانی بۆ لێکنزیککردنەوەی عێراقییەکان شکستی هێنابێت.
 
"ئێران لەگەڵ حکومەتی سازانە."
 
لەبارەی بۆچوونی ئێران و شێوەی ئەو حکومەتەی دەیانەوێت لە عێراق لە دوای کشانەوەی سەدرییەکان دروستبکرێت، نوێنەرێ حکومەتی هەرێمی کوردستان گوتی: "بەبڕوای من ئەوەندەی شارەزاییم لە کۆماری ئیسلامیی ئێران هەیە، ئەوان لەگەڵ ئەوەن لایەنە عێراقییەکان بتوانن بە سازان حکومەتێک پێکبهێنن و هیچ لایەنێک وەلانەنرێت."
 
بە رواڵەت کورد بەسەر هەردوو بەرە شیعەکەی عێراقدا دابەشبوون، پارتی لە بەرەی سەدر و یەکێتیش لە بەرەی چوارچێوەدا دەردەکەوێت. نازم دەباغ دەڵێت: "ئێرانییەکان حەزیان نەکردووە کورد ببێتە لایەنێک لەگەڵ لایەنێکی دیکەی شیعە بۆ دەرپەڕاندنی لایەنەکانی دیکە، هەمیشە سووربوون لەسەر پێکهێنانی حکومەتێک هەموو لایەنەکانی تێدابێت."
 
سەبارەت بە دوورخستنەوەی موقتەدا سەدر لە گۆڕەپانی سیاسی یان پێکهێنانی حکومەتێک بەبێ سەدرییەکان، نازم دەباغ رەتیدەکاتەوە ئێرانییەکان لەگەڵ ئەو بژارەیە بن و دەڵێت: "بەدڵنیاییەوە ئێرانییەکان لەگەڵ هیچ کەسێک نین بەتایبەت کەسێک بیەوێت کێشە بۆ حکومەتی داهاتووی عێراق دروستبکات، موقتەدا سەدر بەندە بەبڕیاری خۆیەوە، ئەوەی ئێرانییەکان باسی دەکەن لەگەڵ رێککەوتن و سازانن بەبەشداریی هەموو ئەوانەی دەتوانن حکومەتی عێراق پێکبهێنن بە موقتەدا سەدریشەوە."
 
نوێنەری حکومەتی هەرێمی کوردستان لە تاران زیاتر روونیدەکاتەوە "ئێرانییەکان هەمیشە پێیانباشە موقتەدا سەدر و هەموو ئەوانی دیکەش لە حکومەتی داهاتووی عێراق هەبن، چونکە دەمێک بوو باسی حکومەتی زۆرینە دەکرا کە ئێمە باسمان لەوە دەکرد رەنگە ئەو حکومەتە بە زیانی کورد تەواوببێت، ئەو کات و ئێستاش کۆماری ئیسلامیی ئێران لەگەڵ حکومەت و پێکهاتەی سازانن لە عێراق، بەڵام ئەوەش پەیوەندیی بە بڕیاری موقتەدا سەدرەوە هەیە کە ئایا بڕیاری داوە بەشداریی حکومەتی داهاتوو بکات یان نا".
 
"هۆشداریی ئێرانییەکان بۆ لایەنە کوردییەکان دۆستایەتییە"
 
نازم دەباغ، نوێنەری حکومەتی هەرێمی کوردستان لە ئێران کە رۆژی هەینی و لەرێگەی تەلەفۆنەوە قسەی بۆ رووداو کرد، لەبارەی سەردانی شاندێکی باڵای ئێرانی بۆ هەرێمی کوردستان کە دەگوترێ لە رۆژانی رابردوودا هاتوونەتە هەولێر و سلێمانی، گوتی: "ئێمە ئاگادارین بەردەوام شاندەکان لە هاتن و چووندان و پێشتریش ئەو شاندانە سەردانیان کردووە." 
 
سەبارەت بە داواکاریی ئێرانییەکان لە کورد، دەباغ دەڵێت: "ئێرانییەکان نایانەوێت و نەشیانویستووە کورد بەشێک بێت لە کێشەکانی نێو ماڵی شیعە، بەڵام کە بەشێک لەلایەنە کوردییەکان خۆی تاکلایەنە ئەو بڕیارەی داوە، ئەوە بابەتێکی دیکەیە."
 
بەپێی زانیارییەکان، شاندەکەی ئێران هۆشدارییان داوەتە بەرپرسان لە مەترسییەکانی سەر هەرێمی کوردستان، نازم دەباغ دەڵێت: "پێموایە ئەم پرسی هۆشداریدانە لەچوارچێوەی دۆستایەتییە، هەروەها چۆن باڵیۆزی ئەمریکا و جێگری وەزیری دەرەوەی ئەمریکا و وڵاتانی دیکەش ئەوانەی خۆیان بە دۆستی کورد و عێراق دەزانن ئەو هۆشداراییانەی داوە کە لایەنە کوردییەکان دەبێت یەکڕیز بن و تەبابن و رێکبکەون و نەوەک هەر یەکەیان لە ئاهەنگ و لە سازێک بژەنن."
 
"هەموو سیاسییەکانی عێراق بە قسەی ئێران ناکەن"
 
قاسم سولەیمانی، فەرماندەی پێشووی فەیلەقی قودسی سەر بە سوپای پاسدارانی ئێران، پەیوەندی بەهێزی لەگەڵ سەرکردەکانی عێراق و هەرێمی کوردستان هەبوو، بەڵام دەگوترێت ئیسماعیل قائانی هاوشێوەی قاسم سلێمانی ئەو پەیوەندییەی نییە و کەمتر کاریگەری هەیە.
 
نازم دەباغ لەو بارەیەوە دەڵێت: "من پێموانییە وابێت، بەڵکو هۆکارەکە دەگەڕێتەوە بۆ ئەوەی رەنگە شێوازی کارکردنی بەرپرسێک لەگەڵ بەرپرسێکی دیکە بگۆڕێت، بەڵام بە گشتی ئەو کەسانەی بە نوێنەرانەیەتیی کۆماری ئیسلامیی ئێران و لە ژێر رابەرایەتیی ئاغای ئیسماعیل قائانی هەموو سەرکردەکانیان بینیوە و دەشیانبینن، بەڵام جاری واش هەیە ئێرانییەکان خۆیان نەیانویستووە پێشوازی لە موقتەدا سەدر یان هەر سەرکردەیەکی دیکەی عێراقیش بکەن."
 
نازم دەباغ دەشڵێت: "ئەوانەی دەچنە عێراق کەسانی خاوەن بڕیار و باوەڕپێکراویشن و بە نوێنەرانەتیی کۆماری ئیسلامی و ئیسماعیل قائانی دەچنە عێراق، بۆیە کاتێک پێویست بکات بۆی هەیە بچنە عێراق و گوشاری خۆشیان بکەن، بەڵام تاوەکو ئێستا ئاستی پەیوەندییەکان لەو چوارچێوەیەدایە، چونکە سیاسەتێکی وا لە لایەن سەرکردەکانی عێراقی نەهاتووەتە کایەوە کە بەبێ گوشار یان بە خواست و ئارەزووی خۆیان بیر لەوە بکەنەوە کێشەکانی عێراق بە هەرێمی کوردستانەوە چارەسەر ببێت، خۆشتان دەزانن هەمیشە سەرکردەیەک دێتە مەیدانەوە لەکاتێکدا کە دڵنیایی وەردەگرێت کە رێککەوتن لەئارادایە."
 
نازم دەباغ نایشارێتەوە هەڵسوکەوت و تێڕوانینی جیاوازی سەرکردەکانی عێراق لەسەر پرسەکان نیشانەی ئەوەیە کە مەرج نییە هەموویان بەقسەی کۆماری ئیسلامیی ئێران بکەن، بەڵام ئەو وڵاتە لەپێناو پاراستنی ئاسایش و سەقامگیریی خۆی و لەپێناو دروستکردنی حکومەتێک کە لەداهاتوودا کێشەی بۆ دروست نەبێت و لە ئاییندەدا نەبێتە هۆی کێشە بۆ ئێران، راوێژ دەدات و هاتووچۆ دەکات و گوتوێژ لەگەڵ سەرکردەکان دەکات.
 
سەبارەت بە ئەمریکا و ئێران کە کامیان هەژموونیان لە عێراق زیاترە، نازم دەباغ پێیوایە هەردووکیان هاوتای یەکدی قسەیان دەڕوات و دەڵێت: "هەموو وڵاتانی دراوسێ و بە ئەمریکاشەوە دەسەڵاتی خۆیان لە عێراق هەیە، بەداخەوە سیاسەتمەدارانی عێراق دەمدەمی بیردەکەنەوە نەوەک ستراتیژی، دەکرێت وەکو پێش راپەڕینی 1991 یەکبگرن و بەیەکەوە بە سازان کاربکەن، وەکو چۆن ئەو کات تەنیا شتێک بیریان لێدەکردەوە رووخانی سەدام حوسێن بوو، ئێستاش دەکرێت یەکبگرنەوە بۆ دروستکردنەوەی عێراقێکی ئارام."
 
"تێكچوونی ئاسایشی هەرێمی کوردستان کاریگەریی لەسەر وڵاتانی دراوسێ دەبێت"
 
لە وەڵامی ئەو پرسیارەی بۆ هەرێمی کوردستان باشە دۆستی ئێران یان ئەمریکا بێت و کامیان بۆ ئاییندەی هەرێمی کوردستان لەبارترن و لە بەرژەوەندیی زیاتری هەولێرە؟ نازم دەباغ، نوێنەری حکومەتی هەرێمی کوردستان لە تاران دەڵێت: "لە هەموو شتێک گرنگتر یەکڕیزی و تەبایی نێو ماڵی خۆمانە، ئیدی ئێران یان ئەمریکا لەبەر چاوی رەش و کاڵی کورد و عێراق نەهاتووە هاوکاریی کورد و عێراق بکات، بەڵام ئێمە بۆ خۆمان هاوکاریی خۆمان ناکەین."
 
سەبارەت بە ناتەبایی لایەنە سیاسیەکانی هەرێمی کوردستان و کاریگەرییان بەتایبەت لە پرسە نێوخۆی و عێراقییەکانیشەوە بۆچوونی وایە: "هەتا کورد ناتەبابن، دڵنیایی دەداتە وڵاتانی دراوسێ کە ناتوانن هاوکاربن بۆ پاراستنی ئاسایش و بەرژەوەندییەکان، چونکە تێكچوونی ئاسایشی هەرێمی کوردستان کاریگەری دەبێت لەسەر تێكچوونی ئاسایشی وڵاتانی دراوسێ، چی ئێران بێت یان تورکیا یان سووریا بێت."
 
https://www.rudaw.net/sorani/interview/16092022

سه‌رۆكى هه‌رێمى كوردستان و باڵيۆزى قه‌ته‌ر كۆبوونه‌وه‌‏

نيوه‌ڕۆى ئه‌مڕۆ سێشه‌ممه 2022/9/13 به‌ڕێز نێچيرڤان بارزانى، سه‌رۆكى هه‌رێمى ‏كوردستان پێشوازى له‌ به‌ڕێز خالد بن حه‌مه‌د ئه‌لسلێتى، باڵيۆزى قه‌ته‌ر له‌ عێراق ‏كرد.‏

له‌ كۆبوونه‌وه‌يه‌كدا ‌په‌يوندييه‌كانى عێراق و هه‌رێمى كوردستان له‌گه‌ڵ قه‌ته‌ر، دۆخى ‏سياسيى عێراق و دوايين پێشهاته‌كانى، هه‌وڵه‌كانى كردنه‌وه‌ى كونسولخانه‌ى گشتيى ‏قه‌ته‌ر له‌ هه‌ولێر له‌ داهاتوودا، ده‌رفه‌ته‌كانى وه‌به‌رهێنانى قه‌ته‌رى له‌ هه‌رێمى ‏كوردستان و ئاماده‌كارييه‌كانى قه‌ته‌ر بۆ مۆنديالى جيهانى 2022 تاوتوێ كران.‏

هه‌ردوولا جه‌ختيان له‌ خواستى قه‌ته‌ر و هه‌رێمى كوردستان بۆ بره‌ودانى زياتر به‌ ‏په‌يوه‌ندييه‌كان و هاريكاریی هاوبه‌شى نێوانيان و ڕه‌خساندنى زه‌مينه‌ى له‌بار بۆ ‏وه‌به‌رهێنانى قه‌ته‌رى له‌ كه‌رت و بواره‌ جياكاندا له‌ هه‌رێمى كوردستان و عێراق ‏كرده‌وه‌، هه‌روه‌ها باسيان لە گرنگيى گه‌شته‌كانى ڕاسته‌وخۆى هێڵى ئاسمانيى قه‌ته‌رى‌ ‏بۆ عێراق و هه‌رێمى كوردستان كرد.‏

گرنگيى ئارامى و سه‌قامگيريى سياسيى عێراق بۆ ته‌واوى ناوچه‌كه‌، په‌يوه‌ندييه‌كانى ‏عێراق و هه‌رێمى كوردستان له‌گه‌ڵ وڵاتانى دراوسێ و ناوچه‌كه و چه‌ند پرسێكى ‏ديكه‌ى جێى بايه‌خى هاوبه‌ش، ته‌وه‌رێكى ديكه‌ى كۆبوونه‌وه‌كه‌ بوو‌.‏

 

https://presidency.gov.krd/the-president-of-the-kurdistan-region-and-the-qatari-ambassador-meet/

سه‌رۆك نێچيرڤان بارزانى سه‌ره‌خۆشى له‌شانشینی یەكگرتوو ده‌كات

به‌يانيى ئه‌مڕۆ يه‌كشه‌ممه‌ 2022/9/11 به‌ڕێز نێچيرڤان بارزانى، سه‌رۆكى هه‌رێمى ‏كوردستان، يه‌كه‌مين پرسه‌نامه‌ى بۆ كۆچى دواييى شاژن ئێلێزابێسى دووه‌م، شاژنى ‏كۆچكردووى شانشینی یەکگرتوو له‌ تۆمارى پرسه‌دا نووسى كه‌ له‌ هه‌ولێر له‌لايه‌ن ‏كونسولخانه‌ى گشتيى به‌ريتانياوه‌ كراوه‌ته‌وه‌.‏

له‌ پرسه‌نامه‌كه‌دا سه‌رۆك نێچيرڤان بارزانى، سه‌ره‌خۆشيى خۆى و گه‌لى كوردستانى ‏به‌ شا چارلزى سێيه‌م و خانه‌واده‌ى شاهانه‌ و گه‌لى شانشینی یەکگرتوو و وڵاتانى ‏كۆمۆنوێلس گه‌ياند و هاوخه‌مى و هاوسۆزى له‌گه‌ڵياندا ده‌ربڕى.‏

سه‌رۆك نێچيرڤان بارزانى هه‌روه‌ها ئاماژه‌ى به‌ پێگه‌ و خۆشه‌ويستيى شاژن ‏ئێلێزابێسى دووه‌م له‌سه‌ر ئاستى جيهان كرد و دووپاتى كرده‌وه‌ كه‌ له‌م كاته‌ ‏سه‌خته‌دا بيرى خۆى و هاووڵاتيانى هه‌رێمى كوردستان لاى خاوه‌نشكۆ شا و ‏خانه‌واده‌ى شاهانه‌ى شانشینی یەکگرتووه‌.‏

 

https://presidency.gov.krd/president-nechirvan-barzani-offers-condolences-to-the-united-kingdom/

یەک شەممە, 04 ئەیلول 2022 09:19

«نازم ده‌باغ» و «سەلام عارف روشدی» له‌گه‌ڵ «سایمۆن شێرکلیف» باڵیۆزی به‌ریتانیا دیداریان کرد

"نازم ده‌باغ" نوێنه‌رى حکومه‌تى هه‌رێمى کوردستان له ئێران و "سەلام عارف روشدی" جێگری نوێنەری حکومه‌تى هه‌رێمى کوردستان لە تاران، له‌گه‌ڵ "سایمۆن شێرکلیف" باڵیۆزی به‌ریتانیا کۆبۆونه‌وه.

 

"نازم عومه‌رده‌باغ" نوێنه‌رى حکومه‌تى هه‌رێمى کوردستان له وڵاتی ئێران و "سەلام عارف روشدی" جێگری نوێنەری حکومه‌تى هه‌رێمى کوردستان لە تاران، ڕۆژی دووشەمە ڕێکەوتی 29/08/2022 لەسەر داوای باڵیۆزخانەی به‌ریتانیا، بانگهێشتی نیوەڕۆخوانی باڵیۆزخانە کران و لە لایەن "سایمۆن شێرکلیف" Simon Shercliff باڵیۆزی به‌ریتانیا و خاتوو کالیپسۆن بەرپرسی بەشی سیاسی باڵیۆزخانه‌ی ئه‌م وڵاته له تاران پێشوازیان لێکرا. 

 

له‌م دیداره‌دا، باسی باروودۆخی عێراق بە گشتی و هەرێمی کوردستان و ناوچەکە بە تایبەتی کرا و پێیان وابوو عێراق تووشی هەلوومەرجێکی سەخت و دشوار دەبێت، بەڵام بە شێوەیەکی حەکیمانە دەبێت بارودۆخەکە هێور بکرێتەوە.

یەک شەممە, 04 ئەیلول 2022 13:47

«نازم ده‌باغ» له‌گه‌ڵ شاندی زانکۆی پەیام نووری ئێران کۆبۆوه

"نازم ده‌باغ" نوێنه‌رى حکوومه‌تى هه‌رێمى کوردستان له‌ شاری تاران، له‌گه‌ڵ دکتۆر "ئیبڕاهیم ته‌قی زادە" سەرۆکی زانکۆی پەیام نووری ئێران و شاندی هاوڕێی دیداری کرد.

 

شاندی زانکۆی پەیام نووری ئێران بە سەرۆکایەتی دکتۆر "ئیبڕاهیم ته‌قی زادە" و بە یاوەری دکتۆر "موجته‌با سوڵتان ئه‌حمه‌دی" سەرۆکی کاروباری نێودەوڵەتی زانکۆ و دکتۆر "وه‌حید ئه‌فشین مێهر" سەرۆکی زانکۆی پەیام نووری پارێزگای تاران، ڕۆژی شەممە ڕێکەوتی 03/09/2022 سەردانی نوێنەرایەتی حکومەتی هەرێمی کوردستانیان کرد و له لایه‌ن "نازم عومه‌رده‌باغ" نوێنه‌رى حکومه‌تى هه‌رێمى کوردستان له تاران، بە گەرمی بەخێرهاتن و پێشوازییان لێکرا.

 

دکتۆر ته‌قی زادە له سه‌ره‌تای ئه‌م کۆبوونه‌وه‌یه‌دا خۆشحاڵی خۆی دەربڕی بۆ ئەم دیدار و چاوپێکەوتنە و هیوای بەردەوامی خواست بۆ سەردان و دیداری نێوان هەر دوولا و له درێژه‌ی قسه‌کانیدا سه‌باره‌ت به زانکۆی پەیام نوور، ئه‌رک و کارەکانیان، خوێندکارانی بیانی و ناوخۆیی و هه‌روه‌ها باروودۆخی خوێندنی باڵا له وڵاتی ئێران هاته ئاخاوتن. 

 

له به‌شێکی دیکه‌ی ئه‌م کۆبوونه‌وه‌یه‌دا، سەرۆکی زانکۆی پەیام نووری ئێران، هەروەها باسی وەرگرتنی خوێندکارانی هەرێمی کوردستان و هاوکاری زانستی و توێژینەوەی زانستی کرد لەگەڵ وەزارەتی خوێندنی باڵا و زانکۆکانی هەرێمی کوردستان.  

 

له‌ درێژه‌ی ئه‌م دیداره‌دا، دکتۆر ته‌قی زادە داوای هاوکاری و یارمەتی لە نوێنه‌رى حکومه‌تى هه‌رێمى کوردستان له تاران کرد بۆ ئەوه‌ی که له‌م پێناوه‌دا پاڵپشتی و یارمه‌تیان بدات.

شەممە, 03 ئەیلول 2022 22:31

«نازم ده‌باغ» له تاران له‌گه‌ڵ مامۆستا «عه‌لی باپیر» دیداریی کرد

"نازم ده‌باغ" نوێنه‌رى حکوومه‌تى هه‌رێمى کوردستان له‌ شاری تاران، له‌گه‌ڵ مامۆستا "عه‌لی باپیر" سکرتیری حیزبی کۆمەڵی دادگەری کوردستان کۆبۆوه.

 

مامۆستا "عەلی باپیر" ئەمیری کۆمەڵی دادگەریی کوردستان، ئەمڕۆ یەکشەمە ڕێکەوتی 04/09/2022 

سەردانی نووسینگەی نوێنەرایه‌تی حکومه‌تى هه‌رێمى کوردستان له‌ شاری تارانی کرد و له لایه‌ن "نازم عومه‌رده‌باغ" نوێنه‌رى حکومه‌تى هه‌رێمى کوردستان له وڵاتی ئێران، "سەلام عارف روشدی" جێگری نوێنەری حکومه‌تى هه‌رێمى کوردستان لە تاران، "فه‌خرالدین عه‌زیز"، "لوقمان لەتیف" و "هیوا ره‌شید" ئەندامانی نوێنەرایەتی حکومەتی هەرێمی کوردستان بە گەرمی بەخێرهاتن و پێشوازی لێکرا.

 له‌م دیداره‌دا، به گرینگییه‌وه باسی پێگەی نوێنەرایەتی و بەشداربوونی ئەندامانی هەموو پارتە سیاسییەکان لە نوێنەرایەتی حکومەتی هەرێمی کوردستان لە ئێران کرا و به وردیی ئاماژه به ئەرک و کاروباری نوێنەرایەتییەکان کرا. 

له درێژه‌ی ئه‌م کۆبوونه‌وه‌یه‌دا، هەروەها باسی بارودۆخی عێراق بە گشتی و هەرێمی کوردستان و ناوچەکە بە تایبەتی کرا.

له‌ نزيكه‌وه‌ و به‌ نيگه‌رانييه‌كى قووڵه‌وه‌ له‌ پێشهاته‌ سياسى و ئه‌منييه‌كانى ئه‌مڕۆى به‌غدا و چه‌ند شوێنێکی دیکه‌ی وڵات ده‌ڕوانين. داوا له‌ هه‌موو لايه‌ك ده‌كه‌ين ئه‌وپه‌ڕى دان به خۆياندا بگرن و ڕێگه‌ نه‌ده‌ن دۆخه‌كه‌ له‌وه‌ زياتر له‌ كۆنترۆڵ ده‌ربچێت.

خۆپيشاندانى ئاشتيانه‌ مافێكى ده‌ستووريى پارێزراوه‌، به‌ڵام ئاڵۆزى و ڕاگرتنى دامه‌زراوه‌كانى ده‌وڵه‌ت هيچ كێشه‌يه‌ك چاره‌سه‌ر ناكات و دۆخه‌كه‌ ئاڵۆزتر ده‌كات، بۆيه‌ ده‌بێ شكۆى دامه‌زراوه‌كانى ده‌وڵه‌ت پارێزراو بێت و ڕێگرى له‌ ئه‌رك و كاره‌كانيان نه‌كرێت.

هه‌روه‌ها له‌سه‌ر هێزه‌ ئه‌منييه‌كان پێويسته‌ به‌وپه‌ڕى ئاگايى و وشيارييه‌وه‌ مامه‌ڵه‌ له‌گه‌ڵ دۆخه‌كه‌دا بكه‌ن و ڕێگه‌ نه‌درێت خۆپيشاندان و ڕووداوه‌كان ببنه‌ هۆى تێكچوونى زياترى دۆخى ئه‌منى و كه‌وتنه‌وه‌ى قوربانى له‌نێوان عێراقييه‌كاندا.

دۆخى وڵات ئه‌وپه‌ڕى دانايى و گه‌ڕانه‌وه‌ بۆ لۆژێك و ده‌سپێكردنى گفتوگۆيه‌كى نيشتمانى و به‌رپرسانه‌ و هاريكاريى هه‌مووانى ده‌وێت بۆ ئه‌وه‌ى عێراق له‌و دۆخه‌ سه‌خته‌ ڕزگارى ببێت و كار له‌ كار نه‌ترازێت.

دووپاتى ده‌كه‌ينه‌وه‌ كه‌ هه‌رێمى كوردستان وه‌ك هه‌ميشه‌ هاريكار ده‌بێت بۆ چاره‌سه‌رى و لێكگه‌يشتنى لايه‌نه‌ عێراقييه‌كان، بۆيه‌ دووباره‌ هه‌موو هێز و لايه‌نه‌ په‌يوه‌نداره‌ عێراقييه‌كان بانگهێشت ده‌كه‌ين بۆ ئه‌وه‌ى بێن له‌ هه‌ولێر كۆببنه‌وه‌ و ده‌ست به‌ گفتوگۆيه‌كى جددى بۆ تێپه‌ڕاندنى ئه‌م دۆخه‌ ئاڵۆزه‌ى وڵات بكه‌ن.

نێچيرڤان بارزانى

سه‌رۆكى هه‌رێمى كوردستان

2022/8/29

 

https://presidency.gov.krd/statement-issued-by-the-president-of-the-kurdistan-region-7/

سه‌رۆكى هه‌رێمى كوردستان پێشوازى له‌ باڵيۆزى چين كرد

پاشنيوه‌ڕۆى ئه‌مڕۆ يه‌كشه‌ممه‌ 2022/8/28 به‌ڕێز نێچيرڤان بارزانى، سه‌رۆكى هه‌رێمى كوردستان، پێشوازى له‌ به‌ڕێز سوى وى، باڵيۆزى نوێى كۆمارى چينى مللى و شاندێكى ياوه‌رى كرد.

له‌ ديدارێكدا سه‌رۆك نێچيرڤان بارزانى وێڕاى پيرۆزبايى بۆ ده‌ستبه‌كاربوونى، هيواى سه‌ركه‌وتنى بۆ خواست و هه‌موو پشتگيرييه‌كى هه‌رێمى كوردستانى بۆ سه‌ركه‌وتنى ئه‌ركه‌كه‌ى و خواستى بره‌ودانی‌ په‌يوه‌ندييه‌كان له‌ هه‌موو بواره‌كاندا له‌گه‌ڵ چين دووپات كرده‌وه‌. به‌ڕێزيان هه‌روه‌ها سوپاسى هه‌رێمى كوردستانى بۆ چين ده‌ربڕى كه‌ له‌ كاتى په‌تاى كۆڤيد_19دا پێداويستيى پزيشكى پێشكه‌ش به‌ دامه‌زراوه‌ پزيشكييه‌كانى هه‌رێمى كوردستان كرد.

لاى خۆيه‌وه‌ به‌ڕێز باڵيۆزى نوێى چين له‌ عێراق وێڕاى ده‌ربڕينى سه‌رسامى به‌ ئاوه‌دانى و پێشكه‌وتنى هه‌رێمى كوردستان و پێزانينى بۆ ڕۆڵى پێشمه‌رگه‌ له‌ شه‌ڕى دژى داعشدا، جه‌ختى له‌ خواستى وڵاته‌كه‌ى بۆ به‌ره‌وپێشبردنى په‌يوه‌ندييه‌كانى له‌گه‌ڵ عێراق و هه‌رێمى كوردستان كرده‌وه‌ و ئاماژه‌ى به‌وه‌ دا كه‌ عێراق هاوبه‌شێكى گرنگی بازرگانييه‌ له‌گه‌ڵ چين، هه‌روه‌ها هيواى خواست په‌يوه‌ندييه‌كان و ئاستى هه‌نارده‌كردن و هاورده‌كردنى وڵاته‌كه‌ى له‌گه‌ڵ عێراق و هه‌رێمى كوردستاندا، به‌رز ببێته‌وه‌.

چالاكييه‌كانى باڵيۆزخانه‌ى چين له‌ به‌غدا و كونسولخانه‌يان له‌ هه‌رێمى كوردستان، دۆخى سياسيى عێراق و هه‌رێمى كوردستان و ناوچه‌كه‌ به‌گشتى و چه‌ند پرسێكى جێى بايه‌خى هاوبه‌ش، ته‌وه‌رێكى ديكه‌ى ديداره‌كه‌ بوو كه‌ به‌ڕێز كونسولى گشتيى چين ئاماده‌ى بوو.

 

https://presidency.gov.krd/the-president-of-kurdistan-region-receives-the-chinese-ambassador/

سه‌رۆكى هه‌رێمى كوردستان پێشوازى له‌ كونسولى نوێى ئه‌مه‌ريكا ده‌كات ‏

ئه‌مڕۆ چوارشه‌ممه‌ 2022/8/24 به‌ڕێز نێچيرڤان بارزانى، سه‌رۆكى هه‌رێمى ‏كوردستان، پێشوازى له‌ به‌ڕێز ئيرڤن هيكس جوونيه‌ر كونسولى گشتيى نوێى ‏ئه‌مه‌ريكا له‌ هه‌رێمى كوردستان كرد.‏

له‌ كۆبوونه‌وه‌يه‌كدا سه‌رۆك نێچيرڤان بارزانى وێڕاى به‌خێرهێنان، پيرۆزبايى لێكرد بۆ ‏ده‌ستبه‌كاربوونى و هيواى سه‌ركه‌وتنى بۆ خواست، هه‌روه‌ها هه‌موو پشتگيرييه‌كى ‏هه‌رێمى كوردستانى بۆ سه‌رخستنى ئه‌ركه‌ى نيشان دا.‏

لاى خۆيه‌وه‌ به‌ڕێز كونسولى نوێى ئه‌مه‌ريكا خۆشحاڵيى خۆى به‌ ده‌ستبه‌كاربوونى ‏له‌ هه‌رێمى كوردستان ده‌ربڕى و جه‌ختى له‌ خواستى وڵاته‌كه‌ى بۆ بره‌ودانى ‏په‌يوه‌ندييه‌كانى له‌گه‌ڵ هه‌رێمى كوردستان دووپات كرده‌وه‌.‏

هه‌ردوولا دوا پێشهاته‌كانى عێراق و كێشه‌كانى به‌رده‌م پرۆسه‌ى سياسييان تاوتوێ ‏كرد و له‌مباره‌يه‌وه‌ ‌سه‌رۆك نێچيرڤان بارزانى دووپاتى كرده‌وه‌ كه‌ چاره‌سه‌رى دۆخى ‏عێراق ته‌نيا به‌ گفتوگۆ و لێكگه‌يشتن له‌سه‌ر بنه‌ماى ده‌ستوور ده‌كرێت، هه‌روه‌ها ‏باسى له‌ دۆخى ناوخۆى هه‌رێمى كوردستان و گرنگيى يه‌كڕيزيى نێوان لايه‌نه‌ ‏سياسييه‌كانى هه‌رێمى كوردستان كرد.‏

ده‌رباره‌ى په‌يوەندييه‌كانيش، سه‌رۆك نێچيرڤان بارزانى دووپاتى كرده‌وه‌‌ كه‌ ده‌رفه‌تى ‏هاريكاريى ئه‌مه‌ريكا له‌گه‌ڵ عێراق و هه‌رێمى كوردستان هه‌يه‌ به‌تايبه‌تى له‌ بوارى ‏وه‌به‌رهێنان و كه‌رتى تايبه‌تدا. ‏

شه‌ڕى دژى تيرۆر و مه‌ترسييه‌كانى داعش، گرنگيى بره‌ودان به‌ ديموكراسى و ‏پاراستنى مافه‌كانى مرۆڤ و ئازادييه‌كان و ئازاديى ڕاده‌ربڕين له‌ هه‌رێمى كوردستان، ‏دۆخى ناوچه‌كه‌ به‌گشتى و چه‌ند پرسێكى ديكه‌ى جێى بايه‌خى هاوبه‌ش، ته‌وه‌رێكى ‏ديكه‌ى كۆبوونه‌وه‌كه‌ بوون.‏

سەرۆکی حکومەت پێشوازی لە کونسولی گشتیی نوێی ئەمەریکا دەکات

هەولێر، هەرێمی کوردستان (GOV.KRD)- ئەمڕۆ چوارشەممە 24ی ئاب ، مەسرور بارزانی سەرۆکی حکومەتی هەرێمی کوردستان ، پێشوازی لە ئيرڤین هيكس جوونيه‌ر کونسولی گشتیی نوێی ئەمەریکا لە هەرێمی کوردستان کرد.
سەرۆکی حکومەت، پیرۆزبایی دەستبەکاربوونی لێکرد و هیوای سەرکەوتنی بۆ خواست لە ئەرکەکەیدا. سەرۆکی حکومەت ، سوپاسی پشتگیریی و پشتیوانی بەردەوامی ئەمەریکای کرد و خواستی هەرێمی کوردستانی بۆ پەرەپێدانی زیاتری پەیوەندی دوولایەنە دووپات کردەوە.
کونسولی گشتیی نوێی ئەمەریکا، وێڕای دەربڕینی خۆشحاڵی بۆ دەستبەکاربوونی لە هەرێمی کوردستان. ئامادەیی وڵاتەکەشی بۆ برەودان و بەهێزترکردنی پەیوەندییەکان لە گەڵ هەرێم لە هەموو بوارەکاندا نیشاندا.
چاکسازییەکانی کابینەی نۆیەمی حکومەتی هەرێمی کوردستان و هەمەجۆرکردنی ئابووری و گرنگیدان بە وەبەرهێنان و پشتگیریکردنی کەرتی تایبەت، تەوەرێکی دیکەی گفتوگۆکانی کۆبوونەوەکە بوو.

 
 
 
 
 
 
 
 
https://gov.krd/government/the-prime-minister/activities/posts/2022/august/%D8%B3%DB%95%D8%B1%DB%86%DA%A9%DB%8C-%D8%AD%DA%A9%D9%88%D9%85%DB%95%D8%AA-%D9%BE%DB%8E%D8%B4%D9%88%D8%A7%D8%B2%DB%8C-%D9%84%DB%95-%DA%A9%D9%88%D9%86%D8%B3%D9%88%D9%84%DB%8C-%DA%AF%D8%B4%D8%AA%DB%8C%DB%8C-%D9%86%D9%88%DB%8E%DB%8C-%D8%A6%DB%95%D9%85%DB%95%D8%B1%DB%8C%DA%A9%D8%A7-%D8%AF%DB%95%DA%A9%D8%A7%D8%AA/
پەڕەى 4 لەکۆى 178 پەڕەدا

هەواڵی زیاتر لە تویتەر

راپۆرتە پڕ بینەرەکان

حالت های رنگی