وەزیری پێشمەرگەی حكومەتی هەرێمی كوردستان ستایشی رۆڵی فەرەنسای كرد بۆ پاڵپشتیكردنی هێزی پێشمەرگە وسەردانی ئەم دواییەی شاندی وەزارەتەكەی بۆ فەرەنسا ودیداریان لەگەڵ سەرۆكی ئەم وڵاتە وكاربەدەستانی بەسەركەوتوو وبەرهەمدار وەسفكرد.
مستەفا سەید قادر، وەزیری پێشمەرگە لە دیمانەیەكی تایبەت لەگەڵ ماڵپەڕی حكومەتی هەرێمی كوردستان، ئاماژەی بەوەدا كه پاڵپشتی ئەم وڵاتە بۆ هەرێمی كوردستان گرنگی خۆی هەیە له‌و كاته‌ی كە هێزی پێشمەرگە لەدژی هێزێكی تێرۆریستی نێودەوڵەتی دەجەنگێ كە هەڕەشە لەهەموو جیهان دەكات وبە ئه‌ركی هەموو وڵاتانی زانی پاڵپشتی پێشمەرگە بكەن.
فەرەنسا بەڵێنی پشتیوانی زیاتری پێداوین
وەزیری پێشمەرگە ئاماژەی بەوەدا كه شاندی وەزارەتەكەیان، كە لەسەر ئاستی وەزیر وبەرپرس وفەرماندە مەیدانیەكانی بەرەكانی شەڕ بوو، لەمیانەی دیدارەكانیدا توانی ڕونیەكی باش بە لایەنی فەرەنسی بدات لەبارەی هەلومەرجی شەڕ وبەرەكانی شەڕ وگوتی، فەرەنسا كە تا ئێستا بە چەك وتەقەمەنی وناردنی راوێژكاری سەربازی لەو شەڕەدا پشتیوانی پێشمەرگەی کردووە، بەڵێنی زیاتری پێداین وئێمەش داوای پاڵپشتی زیاترمان لێكردن، چونكە شەڕەكە قورسە وناهاوسەنگە وبەردەوامە.
هاوكات ئەوەشی خستەڕوو كە بێرنارد هێنری لێڤی كە فەیلەسوف ونووسەرێکی بەناوبانگی فەرەنسایە دوای سەردانی بۆ هەرێمی كوردستان لە مانگی شوباتی رابردوو، پوختەیەکی لەبارەی بارودۆخی كوردستانەوە وگرنگی یارمەتیدانی زیاتری هێزی پێشمەرگە پێشكەشکرد بە سەرۆکی فەرەنسی، فرانسوا هۆلاند. ئەم دەستپێشخەرییە بوو بە بناغەیەك بۆ ئەو دیدارەی لە فەرەنسا لەگەڵ سەرۆک وبەرپرسانی باڵای سیاسی وسەربازیدا كرا.
رۆڵی ئەڵمانیا ووڵاتانی تر
مستەفا سەید قادر تیشكی خستە سەر ئەم راستییەی کە ئەڵمانیاش رۆڵی هەبوور لەیارمەتیدان وپاڵپشتیكردنی پێشمەرگە، بەتایبەتی بەپێدانی چەكی میلان كە رۆڵێكی زۆر گەورەی لە لەناوبردنی تیرۆریستان هەبوو، وە هەروەها بە مەشقپێكردنی پێشمەرگە وسەردانی وەزیری بەرگری وچەندین شاندی ئەم وڵاتە بۆ هەرێم. ئەمەش جگە لەبەشداریكردنی هەرێمی كوردستان لەكۆنفڕانسی باڵای ئاسایشی نێودەوڵەتی بەسەرۆكایەتی بەڕێز مسعود بارزانی، سەرۆكی هەرێمی كوردستان، کە لە میونیخ سازکرا. لەم بارەیەوە گوتی، بێگومان ئەڵمانیاش لەو بارودۆخەدا گرنگی خۆی هەیە وئەوانیش چەندینجار وەڵامی ئەرێنی داواكاریەكانی ئێمەیان داوە وپێشبینیش دەكەین ئەلمانیا ووڵاتانی دیكەش شاندی وەزارەتی پێشمەرگە داوەت بكەن وئەوانیش شاندی خۆیان بنێرن بۆ زیاتر پشتیوانیكردنی پێشمەرگە.
نەوەد وپێنج لە سەدی خاكى ژێر دەستی داعش ئازادكراوە
وەزیری پێشمەرگە ئاماژەی بەوەدا کە ئێستا زیاتر لە 95 لەسەدی ئەو خاكەی کوردستان کە لەژێردەستی داعشدا بووە كەوتۆتەوە ژێر دەستی پێشمەرگە ومەترسی داعش دوور كەوتۆتەوە. بەڵام ئەمەش واتای ئەوە نیە كە مەترسی ئەو تیرۆریستانە بەسەر هەرێمی كوردستاندا نەماوە.
دەربارەی ئەرك وكاری وزارەت، بەتایبەتی لەو بارودۆخەی ئێستا كە هەرێمی كوردستان لەشەڕدایە بەرامبەر تیرۆریستانی داعش، وەزیری پێشمەرگە گوتی: هێزەكانی پێشمەرگە وئاسایشی ناوخۆ بەپۆلیس وئاسایشەوە وخەڵكی خۆبەخش وپێشمەرگەی خانەنشین وهەردوو یەكەی 70 و 80 هەموویان لەژێر یەك چەتر ویەك فەرماندەییدان كە فەرماندەی گشتی هێزە چەكدارەكان سەرپەرشتی دەكات كە ئەویش جەنابی سەرۆكی هەرێمە. بۆیە هەر هێزێك لەدەرەوەی ئەم چوارچێوەیەدا بێت، بەپێی سیاسەتی حكومەتی هەرێم وسیاسەتی گشتی هەرێمی كوردستان رێگەی پێنادرێت، جا لەهەر چ هێز ولایەنێك بێت.
لەماوەی رابردوودا پلانێكمان هەبوو برایانی ئێزدی ومەسیحی وكاكەیی وتوركمان وشەبەكیش كە ویستیوویانە وەكو پێشمەرگە یان لەپاراستنی ناوچەكانیان بەشداری بكەن هەر لەچوارچێوەی ئێمەدا بووە ویەكەی تایبەتمان بۆ كردوون ولەلایەن ئێمەشەوە مەشقیان پێكراوە وپێداویستیشیان بۆ دابینكراوە ونێردراونەتە بەرەكانی شەڕ.دووپاتیشیكردەوە هەرێمی كوردستان پێویستی بەهیچ هێزێكی دیكە نیە.
رێكخستنەوەی هێزەكانی پێشمەرگە
رێكخستنەوەی هێزی پێشمەرگە كە خاڵێكی گرنگی نێو كارنامەی كابینەی هەشتەمی حكومەتی هەرێم بوو هەروەها یەكخستنی هەموو ئەو یەكە وهێزانەی ناوی پێشمەرگەیان هەڵگرتووە، وەك وەزیر ئاماژەی پێدا، كار وئەركێكی دیكەی گرنگی سەرشانی وەزارەتە بەوەی كە هێزی چەكداری كوردستان لەچوارچێوەی حزبی وسیاسی بێتە دەرەوە وببێتە هێزێكی حكومی ونیشتیمانی وهەر تاكێكی سەر بەو هێزە لەهەر چ حزب ولایەن ونەتەوە وئایینێك بێت بۆی هەبێت بگاتە بەرزترین ئاستی پلەبەندی سەربازی وهەر كار وئەركێك وەربگرێت بەپێی توانا ولێ وەشاوەیی لەسەر بنەمای هاوڵاتیبوون.
بەپێی وتەی وەزیری پێشمەرگە، شەڕی داعش رێگر بوو لەوەی پرسی یەكخستنەوەی پێشمەرگە دوا بكەوێت، بەڵام هەنگاوی بچووكیش نراون وبەپێویستیشی زانی بەزووترین كات ئەم كارە بكرێت ولەو بارودۆخەدا یەكبوونی هێزێکی نیشتیمانی بەپێویستیەكی گرنگ زانی، بەتایبەتی بۆ بەرەنگاربوونەوەی مەترسیەكان وقۆستنەوەی دەرفەتی پاڵپشتی نێودەوڵەتی بەهەبوونی یەك گوتاری سیاسی نیشتیمانی بەوەلانانی هەموو جیاوازیە حزبی وئایینی ونەتەوەییەکان.
مستەفا سەید قادر رەتیكردەوە "هیچ لایەنێكی سیاسی لەبەردەم یەكگرتنەوەی پێشمەرگە ورێكخستنی هێزەكانی راستەوخۆ رێگری نیشاندابێت یان تەگەرەی دروست کردبێت." هەبوونی لێدوانی جیاجیای بە هەڵوێستی تاكە كەسی لەقەڵەمدا.
دڵنیاکردنەوەی هاوڵاتیان
لەبارەی بارودۆخی بەرەكانی شەڕیش وەزیری پێشمەرگە ئاماژەی بەوەدا كە رۆژانە داعش پەلاماری پێگە وسەنگەرەكانی پێشمەرگە دەدات وهێزەكانی پێشمەرگەش بەرپەرچیان دەدەنەوە ورێگریش لەپێشڕەوییەكانیان دەكەن. ئێستا پێشمەرگە باش شارەزای تاكتیکەكانی داعش بووە وهاوڵاتیانی هەرێمی كوردستانی لەوە دڵنیا كردەوە كە پێشمەرگە دەتوانێ پارێزگاری لەهەرێمی كوردستان بكات ونیشانیشیدا هەرجارە وگرفتێك لەشوێنێكدا رووی دابێت بەشێوەیەكی خێرا چارەسەر كراوە.
ئازادكردنی شنگال
وەزیری پێشمەرگە ئاشكرایكرد پلانی ئازادكردنەوەی شنگاڵ لەئارادا هەیە، بەڵام پلانەكە دواخراوە بۆ ئەو كاتەی كە بتواندرێ بەرگریی تەواو لەو خاكە ئازادكراوە بكرێت وخەڵكی ئەو ناوچانەش بگەڕێنەوە شوێنی خۆیان، دووپاتیشیكردەوە پرسی رزگاركردنی مووسڵیش كاریگەری بەسەرەوە هەیە كە گرنگی بۆ خودی هەرێمی كوردستانیش هەیە چونكە دەركردنی داعش لەمووسڵ دەبێتە مایەی سەقامگیری هەرێمی كوردستانیش وئەوەشی خستەڕوو كە گرتنەوەی مووسڵ بەتەنها بەپێشمەرگە ناكرێت.
لە دیدارەکەدا جێگری سەرۆك كۆماری عێراق خۆشحاڵیی خۆی بەو دیدارە نیشان دا و دەستخۆشی و پیرۆزبایی سەركەوتنەكانی پێشمەرگەی بەسەر تیرۆریستان لە سەرۆك بارزانی كرد و هیواشی خواست تیرۆریستان لە عێراق بەتەواوی تێكبشكێندرێن و ئارامی و ئاسایش بۆ وڵات بگەڕێتەوە.
لە بەرانبەردا سەرۆك بارزانی بەخێرهاتنی جێگری سەرۆک کۆماری عێراقی فیدراڵی کرد و لە وتەیەکدا جەختی کردەوە کە پێشمەرگە زۆر قارەمانانە بەرگری لە خاك و وڵات دەكات و توانی ئەفسانەی داعش تێكبشێنێت و ئێستا تیرۆریستان لە شکستی بەردەوامدان و هبچ داهاتوویەكیان لەم وڵاتەدا نییە.
لە بەشێکی دیکەی دیدارەکەدا باس لە ڕەوشی ئاوارە و لێقەوماوانی شەڕی داعش کرا و جێگری سەرۆک کۆماری عێراق ستایشی هەرێمی کوردستانی کرد کە باوەشی بۆ ئەو ژمارە زۆرەی پەنابەران کردۆتەوە و وێڕای باری قورسی دارایی و شەڕی داسەپاوی تیرۆریستان بەڵام کوردستان نوایەکی ئارامی لێقەوماوان بووە.
پەیوەندییەكانی نێوان هەولێر و بەغدا و رەوشی ئەمنیی و سیاسیی عێراق و ناوچەكە تەوەرێكی دیكەی دیدارەكە بوو و تەئکید لەوە کرایەوە کە بۆ تێپەڕبوون لەم دۆخەی ئێستا پێویستە هەماهەنگی و هاوکاریی لەنێوان هەردوولا و هاوپەیمانێی نێودەوڵەتیی دژی داعش بەردەوام بێت.
ئەمڕۆ شەممە 2015/4/4 بەڕێز نێچیرڤان بارزانی سەرۆك وەزیرانی هەرێمی كوردستان پێشوازی لە بەڕێز كاردینال (فێرناندۆ فیلۆنی) نوێنەری پاپای ڤاتیكان كرد كە ماوەی چەند ڕۆژێكە بە سەردان لە هەرێمی كوردستانە.
لە دیدارێكدا نوێنەری پاپای ڤاتیكان سوپاس و پێزانینی خۆی بۆ حكوومەتی هەرێمی كوردستان دەربڕی بۆ ئەو هەموو هاوكارییەی پێشكەشی ئەو ئاوارانەی كردووە كە لە ترسی تیرۆریستانی داعش ڕوویان لە هەرێمی كوردستان كردووە و ئاماژەی بەوە كرد كە ڕەوشی ئاوارەكان بە بەراورد لەگەڵ سەرەتای هاتنیان بۆ هەرێمی كورستان، زۆر باشتر بووە و هیوای خواست ڕەوشەكە بەرەو ئاساییبوونەوە بچێت و ئاوارەكان بگەڕێنەوە سەر جێگە و ڕێگەی خۆیان و بە تەبایی و برایەتی لەگەڵ هەموو پێكهاتەكان بەیەكەوە بژین. هەروەها سوپاسی خۆی و پاپای ڤاتیكانی پێشكەش بە سەرۆك وەزیرانی هەرێمی كوردستان كرد بۆ ئەو هەموو قوربانیدانەی كە پێشمەرگە لە شەڕی دژی تیرۆر داویانە و ئەو نەبەردیەی لەو شەڕە سەپاوەدا پیشانی دەدەن و بەبێ جیاوازی بەرگری لە هەموو پێكهاتەكان دەكەن.
لە تەوەرێكی دیكەی دیدارەكەدا باسى دوا پێشهاتەكان بە تایبەتی قوناغی ئاساییبوونەوەی ڕەوشەكە و گەڕانەوەی ئاوارەكان بۆ سەر ماڵ و حاڵی خۆیان كرا و لەم میانەشدا داكۆكى لەسەر هاوكاریكردن و پاراستنیان كرایەوە بۆ ئەوەی بتوانن ژیانی ئاساییی خۆیان دەست پێبكەنەوە.
لای خۆیەوە بەڕێز سەرۆك وەزیرانی هەرێمی كوردستان سوپاسی سەردانی نوێنەری پاپای ڤاتیكانی بۆ هەرێمی كوردستان كرد و تیشكى خسته سه‌ر دوا سەردانی خۆی بۆ ڤاتیكان و پێشوازى و دیدارى له‌گه‌ڵ قەداسەتی پاپا. ئاماژەی بەوەش كرد كە حكوومەت و خەڵكی هەرێمی كوردستان باوەڕیان بە برایەتی و پێكەوەژیان و یەكڕیزیی هەموو پێكهاتەكان هەیە و بەردەوام دەبن لە هاوكاریكردنی ئاوارەكان و هیوای خواست لە كاتێكی نزیكدا بارودۆخەكە ئاسایی ببێتەوە تا ئاوارەكان بگەڕێنەوە شوێنی خۆیان و ئامادەییی حكوومەتی هەرێمی دەربڕی كە لە شوێنەكانیان هاوكاری و پاراستن بۆ ئاوارە گەڕاوەكان دابین بكات.
لەم پەیوەندییە تەلەفۆنییەدا سكرتێری گشتیی ڕێكخراوی نەتەوە یەكگرتووەكان دڵگرانیی خۆی نیشاندا كە سەرباری ئەوەی زۆری پێخۆش بووە بەڵام بەهۆی كەمیی كات نەیتوانیوە سەردانی هەرێمی كوردستان بكات. هەروەها پیرۆزبایی لە سەرۆك بارزانی كرد بە بۆنەی سەركەوتنەكانی هێزی پێشمەرگەی كوردستان لەبەرانبەر تیرۆرریستانی داعش و سەرەخۆشی لە خانەوادەی شەهیدانی پێشمەرگە كرد و ستاییشی ڕۆڵی هێزی پێشمەرگەی كرد لە شكستدانی تیرۆریستانی داعش.
هەر لەم پەیوەندییە تەلەفۆنییەدا سكرتێری گشتیی ڕێكخراوی نەتەوە یەكگرتووەكان دەستخۆشی لە خەڵك و حكوومەتی هەرێمی كوردستان كرد كە یارمەتیی ئاوارە و پەنابەرانیان داوە و ڕایگەیاند كە ڕێكخراوی نەتەوە یەكگرتووەكان هەوڵ دەدات بەردەوام بێت لە هاوكاریكردنی هەرێمی كوردستان بۆ حەواندنەوەی ئاوارەكان و ئاستی هاوكارییەكانیش زیاتر بكات. لە بەشێكی دیكەی ئەم پەیوەندییە تەلەفۆنییەدا سكرتێری گشتیی ڕێكخراوی نەتەوە یەكگرتووەكان خۆشحاڵیی خۆی نیشاندا كە پەیوەندییەكانی نێوان هەرێم و بەغدا لە قۆناغێكی باشتر دان و هەوڵەكان بۆ چارەسەربوونی گرفتەكان بەردەوامن.
پێشنیوه‌ڕۆی ئه‌مڕۆ یه‌كشه‌مه 15/3/2015 به‌ڕێز مسعود بارزانى، سه‌رۆكى هه‌رێمى كوردستان له میحوەری ڕۆژئاوای دیجلە له‌گه‌ڵ كه‌سایه‌تی و سه‌رۆك هۆزه‌‌كانى ڕۆژئاواى دیجله(ره‌بیعه و زوممار و شنگال) كۆبۆوه.
له كۆبوونه‌وه‌كه‌دا سه‌رۆك بارزانی له وته‌یه‌كدا تیشكی خسته سه‌ر ڕەوشی دەڤەرەکە لە قۆناخەکانی کاتی پەلاماری داعش و دوای ئازادکردنەوەی ناوچەکە لەلایەن پێشمەرگە و باسی ره‌فتاره چه‌په‌ڵه‌كانی رێكخراوی تیرۆریستی داعشی به‌رامبه‌ر خه‌ڵكی ئه‌و ده‌ڤه‌ره‌کرد و داوای له ئاماده‌بووان كرد كه هه‌ماهه‌نگی هه‌بێت بۆ برایه‌تى و پێكه‌وەژیان و جه‌ختی له پێوه‌ندیی مێژوویی نێوان كورد و عه‌ره‌ب كرده‌وه و ڕایگه‌یاند: ڕه‌وا نییه ڕێ به سته‌مكاران و ناحه‌زان بدرێت شه‌ڕ و ناكۆكی داعش بكه‌نه ناكۆكی نێوان ئه‌و دوو گه‌له‌ی كه ده‌مێكه پێكه‌وه ده‌ژین.
هه‌ر له‌و كۆبوونه‌وه‌یه‌دا، سه‌رۆكی هه‌رێمی كوردستان ئەوەی وەبیر سه‌رۆك هۆز و كه‌سایه‌تییە عه‌ره‌بەکانی ناوچه‌كانی شنگال، ڕه‌بیعه، به‌نداوی مووسڵ و زومماری هێنایەوە کە لەکاتی ڕاپه‌ڕینه مه‌زنه‌كه‌ی ساڵی 1991 ترسی ئەوەمان هەبوو كه دوای ئه‌وه‌ی كورد به‌ره‌و ڕووی كیمیاباران و ئه‌نفال بووه‌وه، دوای ئازادی، په‌نا بۆ تۆڵه ببات، به‌ڵام گه‌لی كورد سه‌ربڵندانه بنه‌مای تۆڵه‌سه‌ندنه‌وه‌ی وه‌لا نا و بنه‌ماكانی پێكه‌وه‌یی له‌به‌رچاو گرت.
سه‌رۆك بارزانی باسی کردەوە چەپەڵەکانی داعشی کرد و ئاماژەی بەوە کرد کە ئەو ناوچانەی لەلایەن تیرۆریستانەوە داگیر کران كاولیان کرد و خەڵکی ناوچەکە بینییان کە ئەو تیرۆریستانە چەند دژە مرۆڤ و دواكه‌وتوون، هەروەها دەرکەوت کە داعش جگە له كاولكاریی هیچی پێشکەشی ناوچە سوننە نشینەکان نەکرد.
سه‌رۆك بارزانی ڕایگه‌یاند، سوپاس بۆ خوا ئێستا زۆربه‌ی ناوچه‌كان له چنگی داعش ڕزگار كراون، ئێستایش پێویستمان به هه‌مووان هه‌یه بۆ دروستكردنی پێوه‌ندییه‌كی نوێ و ڕێگە نادەین كه‌س ده‌ستدرێژەیی بکاتە سەر خەڵکی ناوچەکە و هه‌موو لایه‌كیش مافی خۆیانه به ئازادی بژین و كه‌رامه‌تیان پارێزراو بێ، بەڵام پێویستە هه‌ریه‌ك لای خۆیه‌وه ڕۆڵ ببینی بۆ پاراستنی سه‌قامگیری و ئاساییشی ناوچه‌كە و هه‌ر خزمه‌تگوزارییه‌ك لە ناوجەکە پێویست بێت پێشـكه‌ش ده‌كرێت و داوا له حكوومه‌تی هه‌رێم ده‌كه‌م ده‌ستبه‌جێ خزمه‌تگوزاری دابین بكات و داوایش له حكوومه‌تی فیدراڵ ده‌كه‌م هاوكار بێ.
سه‌رۆك بارزانی بە سه‌رۆك هۆز و پیاوماقوڵانی ناوچەکەی راگه‌یاند کە ئه‌وه‌ی كه فه‌رمانڕانیی داعشی پێ دروسته، ئه‌وا ڕێگه‌ی ده‌ده‌ین بچێته نێو داعشه‌وه، به‌ڵام ئه‌وه‌ی كه ڕۆڵی خراپ ببینێ و سیخوڕی بكات، لێره جێگایان نابێته‌وه، هەروەها جەختیشی کردەوە هه‌ر كه‌سێك هاوكاریی ئه‌و تیرۆریستانه‌ی كردووه، به‌و شێوه‌یه مامه‌ڵه‌ی له‌گه‌ڵدا ده‌كه‌ین كه له‌گه‌ڵ داعشدا ده‌كرێ.
سەرۆک بارزانی تەئکیدیشی کردەوە کە هه‌ر كه‌سێك له هه‌رێمی كوردستاندا بژی، ئازاده له پێڕۆكردنی ئایین و تایبه‌تمه‌ندییه‌كانی، جه‌ختیشی كرده‌وه، ئه‌و ناوچانه‌ی كه ئازادمان كردوون به‌شێكن له هه‌رێمی كوردستان و بۆ ناوچه‌كانی دیكه‌یش ئاماده‌ی هاوكارین.
هه‌ر له میانى ئه‌و كۆبوونه‌وه‌یه‌یدا له‌گه‌ڵ سه‌رۆك هۆز و كه‌سایه‌تیەکانی عه‌ره‌بى ده‌ڤه‌رى رۆژئاواى دیجله، سه‌رۆكى هه‌رێمى كوردستان جه‌ختى له‌سه‌ر برایه‌تى كورد و عه‌ره‌ب كرده‌وه و رایگه‌یاند كه داعش ناتوانێت برایه‌تى كورد و عه‌ره‌وب تێكبدات و داعش هیچ پاشه‌رۆژێكى لێره نییه .
لە بەرانبەریشدا سه‌رۆك هۆز و كه‌سایه‌تییە عه‌ره‌بیەکانى ناوچه‌كه ستایشى پێشمه‌رگه و گه‌لى كوردستان و حكوومه‌ت و له سه‌رووشیانه‌وه ستایشى سه‌رۆك بارزانییان بۆ پاراستنى گیان و ماڵیان و راشیانگه‌یاند كه پێشمه‌رگه زامنى پاراستنى سه‌روماڵییانه.
بۆ بینین و بیستنی دەقی وتەکانی سەرۆک بارزانی لەسەر ئەم لینکە كلیك بکە.
ئەمڕۆ چوارشەممە 18ـی 3ـی 2015 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە شاندی هۆزی حەدیدی بە سەرۆكایەتیی ئەحمەد مەحمود ئەلوەشانی كرد.
لە دیدارەكەدا شاندی میوان سوپاسی سەرۆك بارزانی و هێزی پێشمەرگەی كوردستانیان كرد كە ناوچەكانیان لەژێر دەستی داعش ڕزگار كردووە و پێزانینیان بۆ قارەمانێتی و قوربانیدانی هێزی پێشمەرگەی كوردستان هەبوو و زۆر بە توندی ئیدانەی ئەو تاوانە قێزەوەنانەیان كرد كە تیرۆریستانی داعش درهەق پێكهاتە ئایینی و نەتەوەییەكانی پارێزگای نەینەوا و خوشك و برا ئیزیدی و مەسیحییەكان ئەنجام داوە.
شاندی هۆزی حەدیدیی نیشتەجێی پارێزگای نەینەوا و دەورووبەری ناحیەی وانكێ و سەدی موسڵ ئەوەیان بە سەرۆك بارزانی ڕاگەیاند كە ئامادەیی تەواویان هەیە كە شانبەشانی هێزی پێشمەرگەی كوردستان ناوچەكانیان بپارێزن و شەڕی تیرۆریستانی داعش بكەن و چارەنووسی خۆیان بە هەرێمی كوردستان ببەستنەوە و داوایان كرد ناوچەكانیان بخرێتە سەر هەرێمی كوردستان. هەروەها وێڕای ئاماژەدان بەوەی تیرۆریستانی داعش دەستیان لە تێكدان و شێواندنی باری كۆمەڵایەتی و كوشتن و بڕینی خەڵكی بێتاوان هەبووە ستاییشی مامەڵەی ڕەوشتبەرزانەی هێزی پێشمەرگەی كوردستانیان كرد لەگەڵ دانیشتوانی ناوچەكە و خەڵكی عەرەبی دەڤەرە ئازادكراوەكان.
لەبەرانبەردا سەرۆك بارزانی بەخێرهاتنی شاندی میوانی كرد و سوپاسی هەڵوێستیانی كرد و هێمای بەوەدا كە ئەو تاوانانەی تیرۆریستانی داعش ئەنجامیان داوە لە هیچ شوێن و مێژوویەكدا ڕووی نەداوە. ئەوەیشی خستەڕوو كە گەلی كوردستان خاوەنی كولتووری پێكەوەژیان و ڕەوشتی بەرزە و هیچ جیاوازییەك لەنێوان موسڵمان و مەسیحی و ئێزیدی و عەرەب و كورد و پێكهاتەكانی دی نییە. سەرۆك بارزانی جەختی لەوەیش كردەوە كە ئەوەی دەستی لەگەڵ داعش هەبووبێت و هاوكاریی داعشی كردبێت و هزری داعشی لا پەسەند بێت بە هیچ شێوەیەك نابێ بگەڕێتەوە ناوچە ئازاد كراوەكان.
تیرۆریستانی داعشیش هیچ ئاییندەیەكیان لە ناوچەكە نییە و لەناوچوونیان تەنیا بە كاتەوە بەندە. سەرۆك بارزانی ئەوەیشی دووپات كردەوە كە پێویستە خەڵكی ناوچەكە لە ژیانێكی ئاسوودەدا بژیین و ڕێز لە ئیرادەی دانیشتوانی ناوچەكە بگیرێت و ئەوان بڕیار لە چارەنووسی خۆیان بدەن.
ئەمڕۆ پێنجشەممە 19ـی 3ـی 2015 لە سەلاحەدین بەڕێز مەسعود بارزانی پێشوازی لە شاندێكی یەكێتیی ئەوروپا كرد كە پێكهاتبوو لە ژمارەیەك لە ئەندامانی كۆمیتەی بەرگری و كۆمیتەی كاروباری دەرەوەی پارلەمانی ئەورووپا و جانا هیباسكۆڤا باڵیۆزی یەكێتیی ئەوروپا لە عێراق.
لە دیدارەكەدا شاندی میوان پیرۆزبایی سەركەوتنەكانی پێشمەرگەیان لەشەڕی دژی تیرۆریستانی داعش لە سەرۆك بارزانی كرد و ڕۆڵ و قوربانیدانی پێشمەرگەیان لە ڕووبەڕووبوونەوەی تیرۆریستان بەرز نرخاند و ئاماژەیان بەوەدا كە شێوازی مامەڵەكردن لەگەڵ مەترسییەكان و بەرخودانی پێشمەرگە وایكردووە هێزی پێشمەرگەی كوردستان و بەشداریی ئافرەتان لەم بەرخودانەدا ڕێز و پێگەیەكی بەرزی بۆ پێشمەرگە لە ئاستی جیهانیدا مسۆگەر كردووە. هەروەها ستاییشی سەقامگیری و پێشكەوتنی كوردستانیان كرد و ڕایانگەیاند كە دەیانەوێ كار بكەن بۆ بەردەوامیی و فراوانتركردنی پشتیوانی بۆ هەرێمی كوردستان و پێویستیشە وڵاتانی ئەوروپایی بەردەوام بن لە گەیاندنی هاوكاریی سەربازی و مرۆیی بۆ هەرێمی كوردستان.
لەبەرانبەردا سەرۆك بارزانی بەخێرهاتنی شاندی میوانی كرد و سوپاسی هەڵسەنگاندن و هەڵوێستی ئەوانی كرد لەمەڕ هێزی پێشمەرگە و هەرێمی كوردستان و وێڕای ئاماژەدان بە چۆنییەتی دەركەوتنی داعش و پەلاماردانیان بۆ كوردستان و تاوانەكانیان ئەوەی خستەڕوو كە بە یارمەتیی هێزی هاوپەیمانان پێشمەرگە ئوستوورەی داعشی شكاند و لە زۆربەی ناوچەكانی دەركردن بەڵام لەگەڵ ئەوەیشدا داعش هێشتا هەڕەشەیە و پێویستە لەڕووی فكرییشەوە لەدژی تیرۆریستان بوەستین و داوایشی كرد كە كۆمەڵگەی نێودەوڵەتی بە شێوەیەكی جدیتر بیر لە ڕووبەڕووبوونەوەی دیاردەی تیرۆر بكات و كار لەسەر نەهێشتنی هۆكارەكانی دیاردەی توندڕۆیی و تیرۆر بكرێت. سەرۆك بارزانی جەختیشی لەوە كردەوە كە پێویستە موسڵ و هەموو ئەو ناوچانەی لەژێر دەستی داعشدا ماون ئازاد بكرێن. هەر لە درێژەی قسەكانیدا سەرۆك بارزانی هێمای بەوەدا كە یەكێتیی ئەوروپا دەتوانێ ڕۆڵێكی كاریگەرتری لە چارەسەركردنی قەیرانەكانی ناوچەكەدا هەبێت و پێشوازیشی لەوە فراوانتركردنی پەیوەندییەكانی نێوان هەرێمی كوردستان و یەكێتیی ئەورووپا كرد.
لەبەشێكی دیكەی ئەم دیدارە باس لە گرفتی ئاوارەكان كرا و شاندی میوان پێزانینی بۆ هەرێمی كوردستان هەبوو كە سەرباری شەڕ و قەیرانی ئابووری یارمەتیی پتر لە ملیونێك و پێنجسەد هەزار ئاوارەی داواە كە خۆی لە خۆیدا بارێكی قورسە لەسەر شانی هەرێمی كوردستان. هەروەها ستاییشی هێزی پێشمەرگەیان كرد كە مامەڵەیەكی زۆر شیاویان لەگەڵ عەرەبی ئەو ناوچانە كردووە كە لەژێر دەستەڵاتی تیرۆریستان ئازاد كراون.
نیوەڕۆی ئەمڕۆ یه‌كشه‌ممه 2015/3/15 بەڕێز نێچیرڤان بارزانی سەرۆك وەزیرانی هەرێمی كوردستان پێشوازی لە بەڕێز كێنتارۆ سۆنۆرا جێگری وەزیری دەرەوەی ژاپۆن كرد.
لە دیدارێكدا سەرەتا بەڕێز جێگری وەزیری دەرەوەی ژاپۆن سوپاسی حكوومەتی هەرێمی كوردستانی كرد بۆ ئیدانەكردنی كوشتنی بارمتە ژاپۆنییەكە لە لایەن ڕێكخراوی تیرۆریستی داعشەوە و سوپاس و پێزانینی سەرۆك وەزیران و حكوومەت و خەڵكی ژاپۆنی بۆ ئەم هەڵوێستەی هەرێمی كوردستان و حكوومەتی هەرێم دووپات كردەوە و پشتگیریی ژاپۆنی بۆ هەرێمی كوردستان دەربڕی.
بەڕێز جێگری وەزیری دەرەوەی ژاپۆن هەروەها دووپاتی كردەوە كە حكوومەتی وڵاتەكەی پشتگیریی مرۆیی و كۆمەك پێشكەش بەو ئاوارە و پەنابەرانە دەكات كە بەهۆی ترسی تیرۆره‌وه هاتوونەتە هەرێمی كوردستان، بەتایبەتیش لە بوارەكانی تەندروستی و پەروەردە و خزمەتگوزارییە گشتییەكاندا، ئەوەشی ئاشكرا كرد كە وڵاتەكەی كۆمەڵێك پرۆژەی خزمەتگوزاری لە بوارە جیاجیاكاندا لە ناوچە جیاوازەكانی هەرێمی كوردستان ئەنجام دەدات. هه‌روه‌ها باسی لە سەردانی شاندێكی پەرلەمانی عیراق بۆ وڵاتەكەی كرد كە لە هەموو لایەنەكانی كورد و سوننە و شیعە پێكهاتبوو و لە وێش ژاپۆن ئامادەییی خۆی بۆ ئەنجامدانی كۆمەڵێك پرۆژەی خزمەتگوزاری لە عیراق و هەرێمی كوردستان نیشان داوە و ژمارەیەك لەو پرۆژانە لە پارێزگاكانی هەرێمی كوردستان ئەنجام دەدرێن.
لای خۆیەوە بەڕێز سەرۆك وەزیرانی هەرێمی كوردستان سوپاسی ئەم سەردانەی جێگری وەزیری دەرەوەی ژاپۆنی كرد بۆ هەرێمی كوردستان و سەردانەكەی لەم كاتەدا وەك پشتگیرییەك بۆ هەرێمی كوردستان لە قەڵه‌م دا. جەختی لەوەش كردەوە كە كوشتنی بارمتە ژاپۆنییەكە بەو شێوە وەحشیگەرییە، تراژیدیایەك بوو هەمووانی شۆك كرد و دووبارە سەرخۆشیی خۆی و حكوومەت و خەڵكی هەرێمی كوردستانی بە حكوومەت و گەلی ژاپۆن راگەیاند. پوختەیەكیشی دەربارەی بارودۆخی هەرێمی كوردستان و شەڕی دژی تیرۆر خستە ڕوو و تیایدا ئاماژەی بەوە دا كە پێشمەرگە لە پێشڕەوی و سەركەوتن و تیرۆریستانیش لە شكست و پاشەكشێی بەردەوامدان و پێشمەرگە كۆمەڵێك شوێن و پێگەی زۆر ستراتیژی لە دەستی تیرۆریستان دەرهێناوە.
هەروەها باسی لەوە كرد كە هەرێمی كوردستان پێشوازی لە زیاتر لە ملیۆنێك و پێنج سەد هەزار پەنابەر و ئاوارە كردووە و ئەمەش پاڵەپەستۆیەكی زۆری بۆ سەر حكوومەتی هەرێمی كوردستان دروست كردووە، بەتایبەتى كە حكوومەتی عیراق وەك پێویست هاوكاریی ئاوارە و پەنابەرانی نەكردووە و داوای كرد حكوومەتی ژاپۆن لە هاوكاری و كۆمەكە مرۆییەكانی بەردەوام بێت. جەختی لەوەش كردەوە كە هەرێمی كوردستان چاوی لەوەیە ژاپۆن لە بواری هەڵگرتنەوەی میندا بە دابینكردنی ئامێر و پێداویستیی و تەكنەلۆژیای نوێی بواری هەڵگرتنەوەی مین، هاوكاریی هەرێمی كوردستان بكات كە كاریگەرییەكی زۆری لەسەر بارودۆخی شەڕ و ڕووبەڕووبوونەوەی تیرۆر دەبێت، هه‌روه‌ها سوپاسی ژاپۆنی كرد بۆ ئەو پرۆژانەی كە لە هەرێمی كوردستان ئەنجامیان دەدات و ئەم هاوكاریانەی ژاپۆنی بەرز نرخاند.
دوایین هەواڵەکان
- سهركۆمارى توركيا بهردهواميى پشتگيريى وڵاتهكهى بۆ عێراق و هه‌رێمى كوردستان دووپات كرده‌وه
- پەیامی سەرۆک نێچیرڤان بارزانی لە ساڵیادی ڕۆژنامەگەریی کوردیدا
- نێچيرڤان بارزانى: دهبێ نيشتمان كۆكهرهوهى ههموومان بێت
- سه‌رۆك نێچيرڤان بارزانى له‌گه‌ڵ باڵيۆزى يهكێتيى ئهورووپا كۆبووهوه
- سه‌رۆكى هه‌رێمى كوردستان پێشوازى له باڵيۆزى فهرهنسا كرد
- سه‌رۆك نێچيرڤان بارزانى پێشوازى له باڵيۆزى بهريتانيا كرد
- سەرۆکی حکومەتی هەرێمی کوردستان پێشوازی لە باڵیۆزی بەریتانیا لە عێراق دەکات
- عەباس غەزالی: نووسین و چاپکردنی "فەرھەنگیی زارەکیی موکریان" شانازییەکی بێ پایانە
- پەیامی پیرۆزبایی سەرۆکی حکومەتی هەرێمی کوردستان بەبۆنەی جەژنی نەورۆز
- سه‌رۆكى هه‌رێمى كوردستان نامهيهكى پيرۆزبايى له وهزيرى دهرهوەى توركياوه پێدهگات