مەسعود بارزانی سەرۆكی هەرێمی كوردستان و لۆران فابیۆس وەزیری دەرەوەی فەرەنسا كۆنگرەیەكی  رۆژنامەوانییان سازكردو تێیدا باسیان لە بارودۆخی عێراق و هەرێمی كوردستان، هەروەها پەیوەندییە دووقۆڵییەكانی نێوان هەولێر و پاریس و هاوكارییە مرۆییەكانی فەرەنسا بۆ ئاوارەكانی شنگال كرد.

لە كۆنگرە رۆژنامەوانییەكەدا بارزانی سوپاسی هاتنی وەزیری دەرەوەی فەرەنسای بۆ هەرێمی كوردستان كرد و رایگەیاند، كە هاتنیان پاڵپشتییەكی گەورەیە بۆ گەلی كوردستان.

بارزانی سوپاسی حكومەتی فەرەنسای كرد بۆ ئەو هاوكارییە مرۆییانەی پێشكەشی ئاوارەكانی شنگالی كردووە. هەروەها جەختی لە پێكەوەژیانی ئایین و نەتەوە جیاوازەكانی كوردستان كردەوەو گوتی "ئێمەی گەلی كوردستان بە كورد ‌و مەسیحی و توركمان و ئێزدی پێكەوە دەژین و پێكەوە دەمرین". گوتیشی "رێگەنادەین كە تیرۆریستان پەیوەندی لە مێژینەی كورد و عەرەب تێكبدەن".

هەر لە كۆنگرە رۆژنامەوانییەكەدا بارزانی رایگەیاند "هەرێمی كوردستان كوردستان شەڕی دەوڵەتێكی تیرۆریستی دەكات نەك بەتەنیا رێكخراوێكی چەكدار". گوتیشی "چەكی دەستی چەكدارانی داعش بەهێزترە".

بارزانی دڵنیایی دایە گەلی كوردستان لە سەركەوتنیان بەسەر چەكدارانی داعش و گوتی "گەلی كوردستان دڵنیادەكەینەوە كە ئێمەی گەلی كورد پێشمەرگەی قارەمان و دۆستی دڵسۆزمان هەیە، بۆیە سەركەوتن هەر بۆ ئێمەیە".

وەزیری دەرەوەی فەرەنسا پشتگیریی وڵاتەكەی بۆ عێراق و هەرێمی كوردستان بەتایبەتی دووپاتكردەوەو رایگەیاند، كە هاوكارییەكانیان بۆ ئاوارەكان بەردەوام دەبێت. ئاماژەی بەوەشكرد، كە ئەو هاوكارییە مرۆییانەی فەرەنسا كە لە 24 كاژێری رابردوودا گەیشتووەتە عێراق و هەرێمی كوردستان بریتییە لە 18 تۆن كەلوپەل و دەرمان.

پێشنیازیشی كرد بۆ وڵاتانی ئەوروپا كە پردێكی ئاسمانی بۆ هاوكاریكردنی ئاوارەكانی عێراق و هەرێمی كوردستان دروستبكەن.

لۆران فابیۆس هەر لەمیانی كۆنگرە رۆژنامەوانییەكەدا باسی لە دۆخی سیاسیی عێراق كردو گوتی "فەرەنسا خوازیارە حكومەتێكی نیشتمانیی بەزوویی پێكبهێنرێت". گوتیشی "پشتگیریكردنی گەلی كورد دۆزێكی رەوایە".

بەمەبەستی ئاگاداركردنەوەی دیپلۆماتكاران و ‏نوێنەرانی ووڵاتانی بیانی و بەرپرسانی رێكخراوە نێودەوڵەتیەكان لە هەرێمی كوردستان، لە دواپەرەسەندنەكانی گۆڕەپانی سیاسی و ئەمنی كوردستان و عیراق و ناوچەكە، رۆژی چوارشەممە فەلاح مستەفا بەرپرسی پەیوەندیەكانی دەرەوەی حكومەت و فەریق جەبار یاوەر ووتەبێژی رەسمی و ئەمینداری گشتی وەزارەتی پێشمەرگە كۆبوونەوەیەكی فراوانیان لەگەڵ دیپلۆماتكاران و ‏نوێنەرانی ووڵاتانی بیانی و نەتەوە یەكگرتووەكان لە هەرێم ئەنجامدا.‏

لە سەرەتای كۆبونەوەكە، فەلاح مستەفا ئامانجی كۆبونەوەكەی بۆ ئامادەبووان ڕوونکردەوە کە ئەم كۆبوونەوەیە بەمەبەستی پتەوكردنی پەیوەندییەكان و خستنەڕووی هەڵوێستی سەركردایەتی سیاسی هەرێمی كوردستانە لە بەرامبەر پەرەسەندنە سیاسی و ئەمنیەكان و مەترسی تیرۆرستان لەسەر هەرێمی كوردستان و عیراق، كە بەم دواییە چەند ناوچەیەكی عیراقیان كۆنترۆل كردووە و كارەساتێكی مرۆیی گەورەی بەدوای خۆیدا هێناوە. وەهەروەها گووتی، ئەم گروپە تیرۆرستیانە ئەندامیان لەزۆر وڵاتی جیهانەوە هاتوون و مۆركێكی نێودەوڵەتی وەرگرتووەو تەنها پەیوەست نییە بە عیراق و ناوچەكە، بۆیە ئەركی كۆمەڵگای نێودەوڵەتییە كاراتر بن بۆ رێگەگرتن لە تەشەنەكردنی دیاردەی تیرۆر.

بەرپرسی پەیوەندیەكانی دەرەوەی حكومەت باسی لە  هەڵوێستی كۆمەڵگای نێودەوڵەتی کرد، کە ستایشی زۆری حكومەتی هەرێمی كوردستانیان كردووە بۆ گەشەسەندن و سەقامگیری هەرێمی كوردستان و بەرپەرچەردانەوەی تیرۆرستان و لەخۆگرتنی ژمارەیەكی زۆری ئاوارەی سوریاو ناوخۆی عیراق كە بەهۆی ناسەقامگیری و لە ترسی تیرۆرستان ناوچەكانی خۆیان جێهێشتووە. بەرێزیان گووتی،  كاتی ئەوە هاتووە ئەمڕۆ كۆمەلگای نێودەوڵەتی بە شێوەی پراكتیكی یارمەتی مرۆیی و سەربازی پێشكەش بە حكومەتی هەرێمی كوردستان بكەن.

فەلاح مستەفا ئەوەشی گووت کە ئەو كارەساتە مرۆییەی لە شنگال روودەدات نابێ‌ كۆمەڵگای نێودەوڵەتی لێی بێدەنگ بێت و دەبێ‌ یارمەتی ئەو خێزانانەی چیای شنگال بدرێت و كۆمەك و یارمەتیان پێشكەش بكرێت. دواتر باسی لە رەوشی ئەمڕۆی عیراق و پەیوەندی هەولێر و بەغدا و تەنگژەو ئاڵۆزیەكانی نێوان هەردوولا كرد بە تایبەت چەقبەستوویی پرۆسەی سیاسی پێكنەهێنانی حكومەت و راگرتنی بەشە بودجەی هەرێمی كوردستان.

لە کۆتاییدا، بەرپرسی پەیوەندییەكانی دەرەوە جەختی لەسەر سیاسەتی حكومەتی هەرێم كردەوە سەبارەت بە زیاتر بەهێزكردنی پەیوەندییەكان لەڕووی سیاسی و ئابووری و فەرهەنگی و پەرەپێدانی تواناكان لەگەڵ وڵاتانی جیهان بە گشتی و وڵاتانی ناوچەكە بەتایبەتی و گووتی: لە ماوەی رابڕدوو دا ئەم پەیوەندیانە پێشكەوتنێكی بەرچاویان بەخۆیەوە بینیوە.

شایانی باسە، هەریەک لە  كاروان جەمال جێگری بەرپرسی فەرمانگە و نوێنەرانی حكومەتی هەرێمی کوردستان لە نەمسا و ئیتاڵیا ئامادەی کۆبوونەوەکە بوون.

نێچیرڤان بارزانی ، سەرۆكی ئەنجوومەنی وەزیرانی هەرێمی كوردستان لە پەیامێكدا بۆ گەلی كوردستان رایدەگەیێنێ كە هێزی پێشمەرگە لەپێشڕەویدایە و ، بە تەواوی تیرۆریستان تێكدەشكێنن ، لەبەرئەوەش پێویست ناكات خەڵك تووشی دڵەڕاوكێ ببێت .

ئەمەش دەقی پەیامەكەی نێچیرڤان بارزانییە:

پەیامێك بۆ گەلی كوردستان

گەلی خۆشەویست و خۆڕاگری كوردستان دڵنیادەكەینەوە كە هێزی پێشمەرگەی كوردستان لەپێشڕەویدایە لە بەرەی شنگالدا، هەروەها لەبەرەی جەلەولا و مەخمووردا چەكدارە تیرۆریستییەكانی داعشی تێكشكاندوون .
حكومەتی هەرێمی كوردستان بە باوەڕبوون بە هێزی پێشمەرگەی كوردستان بەڵێندەداتە هەموو گەلی كوردستان كە ڕێگە نادات تیرۆریستان خاكی پیرۆزی كوردستان پیس بكەن و ، پێشكەوتنی ژیان لە كوردستان ڕابگرن .
داوا لە خەڵكی كوردستان دەكەین كە بەهیچ شێوەیەك دڵەڕاوكێ نەیانگرێت و ، بە ئارامی لە شوێنەكانی خۆیان بمێننەوە و درێژە بە كار و ژیانی ئاسایی خۆیان بدەن .
بەڵێندەدەینە گەلی كوردستان ، كە بە دەستێكی پۆڵاین لە تیرۆریستان دەدەین و ، ئەو مەترسییەی لەسەر گەلی كوردستان و ناوچەكەش هەیە لادەدەین . هەموومان دەبێ باوەڕمان بە پێشمەرگە هەبێت و پشتیوانی پێشمەرگە بكەین .
داوا لە هەموو خەڵكی كوردستان و گەنجانی كوردستان دەكەین كە هەمیشە ورەبەرزبن ، دەبێ هەموومان باوەڕمان بە دۆزی رەوای خۆمان هەبێت ، ئێمە ئێستا بەرگریی لە خاكی پیرۆزی كوردستان دەكەین لە بەرامبەر هێزێكی تیرۆریستی داگیركەردا ، ئەوەش ئەوپەڕی ورە بەرزی پێویستە ، بەتایبەتیش كە تیرۆریستان لەبەر زەبری پێشمەرگە كەوتوونەتە پەلەڤاژەی لەنێوچوونەوە.
بۆیەش داوا لە هەموو خەڵكی كوردستان دەكەین كە ورەبەرز و ئارام بن .

نێچیرڤان بارزانی
سەرۆكی ئەنجوومەنی وەزیرانی هەرێمی كوردستان
6/8/2014