پەیامی پیرۆزبایی سەرۆکی حکومەتی هەرێمی کوردستان بە بۆنەی هاتنی ساڵی نوێی زایینی 2024

ڕۆژی یەکشەممە 12/31، مەسرور بارزانی، سەرۆکی حکومەتی هەرێمی کوردستان، لە پەیامێکدا بە بۆنەی سەری ساڵی نوێی زایینی، سوپاسی خۆڕاگری هاونیشتمانییانی هەرێمی کوردستانی کرد کە بە هۆی نەناردنی شایستە داراییەکانیان لە لایەن حکومەتی فیدراڵەوە بارودۆخێکی سەختیان بەڕێ کرد.

سەرۆکی حکومەت داواشی لە لایەنە سیاسییەکانی هەرێمی کوردستان کرد کە بەرژەوەندییە باڵاکانی هەرێمی کوردستان بخەنە سەرووی بەرژەوەندییە حزبی و کەسییەکان و لەپێناو پاراستنی ئارامی و مافە ڕەواکانی خەڵکی هەرێمی کوردستان کار بکەن.

ئەمەش دەقی پەیامی سەرۆکی حکومەتی هەرێمی کوردستانە:

بە بۆنەی هاتنی ساڵی نوێی زایینی 2024، گەرمترین پیرۆزبایی لە سەرجەم کوردستانییان، بە تایبەتی پێشمەرگە قارەمانەکان و هێزەکانی ئاسایشی ناوخۆ و بنەماڵە و کەسوکاری سەربەرزی شەهیدان و هەروەها گەلانی عێراق و جیهان دەکەم. هیوادارم ساڵی نوێ، ساڵی خێر و خۆشی و خۆشگوزەرانی و پێشکەوتنی زیاتری کوردستان بێت.

سوپاسی خۆڕاگری هاونیشتمانییانی هەرێمی کوردستان دەکەم کە ساڵی ڕابردوو، بە هۆی نەناردنی مووچە و شایستە داراییەکانی هەرێم لە لایەن حکومەتی فیدراڵەوە، بارودۆخێکی سەختی داراییمان بەڕێ کرد. هیوادارین لە ساڵی نوێوە، کۆتایی بەو ستەم و نادادییە بێت کە بەرانبەر خەڵکی هەرێمی کوردستان و بە تایبەتی مووچەخۆرەکانی دەکرێت و کێشەی شایستە داراییەکانی هەرێم، بە شێوەیەکی دادپەروەرانە و لە چوارچێوەی ڕێککەوتنەکان و یاسای بودجە چارەسەر بکرێت و مووچەخۆرانی هەرێمیش، وەک مووچەخۆرانی ناوچەکانی دیکەی عێراق، مانگانە مووچەکانیان بەبێ تێکەڵکردنی لەگەڵ کێشە سیاسییەکان وەربگرن.

داوا لە هێز و لایەنە سیاسیەکانی هەرێمی کوردستان دەکەم کە بەرژەوەندییە باڵاکانی هەرێمی کوردستان بخەنە سەرووی بەرژەوەندییە حزبی و کەسییەکان و لەپێناو پاراستنی ئارامی و مافە ڕەواکانی خەڵکی هەرێمی کوردستان کار بکەن.

جێی خۆشحاڵییە کە ساڵی ڕابردوو، سەرەڕای بارودۆخی سەختی ئابووری، توانیمان بە هاوکاری کەرتی تایبەت، چەند پرۆژەیەکی خزمەتگوزاری لە شار و ناوچەکانی هەرێمی کوردستان لە بوارە جۆراوجۆرەکاندا ئەنجام بدەین. هەروەها لە بواری دیپلوماسیش، پەیوەندییەکانی هەرێمی کوردستان و وڵاتانی جیهان، لە ساڵی ڕابردوودا گەشەیەکی باشی كرد.

هیوادارم ساڵی نوێ، ساڵی کۆتاییهاتنی شەڕ و ئاڵۆزی و کاولکارییەکانی ڕۆژهەڵاتی ناوەڕاست و هەموو جیهان بێت بە گشتی، و ئاشتی و ئارامی جێگیر بێت و ساڵی دەستکەوت و گەشەپێدان و بووژانەوەی گشتگیریی کوردستان بێت.
ساڵی نوێ لە هەمووان پیرۆز بێت.

مەسرور بارزانی
سەرۆکی حکومەتی هەرێمی کوردستان
2023/12/31

 

https://gov.krd/government/the-prime-minister/activities/posts/2023/december/پەیامی-پیرۆزبایی-سەرۆکی-حکومەتی-هەرێمی-کوردستان-بە-بۆنەی-هاتنی-ساڵی-نوێی-زایینی-2024/

 

سەرۆکی حکومەت پێشوازی لە نوێنەری تایبەتی سکرتێری گشتیی نەتەوە یەکگرتووەکان دەکات

ڕۆژی پێنچشەممە 1/11 مەسرور بارزانى، سه‌رۆكى حکومەتی هه‌رێمى كوردستان، پێشوازى له‌ ڤیرجینیا گامبا، نوێنەری تایبەتی سکرتێری گشتیی نەتەوە یەکگرتوەکان بۆ کاروباری منداڵان و ململانێی چەکداری کرد.

له کۆبوونەوەکەدا نوێنەری تایبەتی سکرتێری گشتیی نەتەوە یەکگرتوەکان، کورتەیەکی له‌بارەی کار و چالاکییەکانیان و ئامانجی سەردانەکەیان بۆ عێراق و هەرێمی کوردستان خستە ڕوو.

ستایشی هەوڵ و ڕێکار و پلانەکانی حکومەتی هەرێمی کوردستانیشی کرد لە بواری پاراستنی مافەکانی منداڵان. خۆشحاڵیى خۆشی نیشان دا کە سەرۆکی حکومەت تێگەیشتنێکی باشی لەبارەی گرنگیی پاراستنی مافەکانی منداڵان و ئەرک و ئامانجەکانی نەتەوە یەکگرتووەکان تایبەت بەم بوارە هەیە.

سەرۆکی حکومەت ئامادەیی تەواوی حکومەتی هەرێمی کوردستانی بۆ هاریکاری و هەماهەنگیکردن و ئەنجامدانی پڕۆژەی هاوبەش لەگەڵ نەتەوە یەکگرتووەکان تایبەت بە پاراستنی مافەکانی منداڵان دەربڕی.

 

https://gov.krd/government/the-prime-minister/activities/posts/2024/january/سەرۆکی-حکومەت-پێشوازی-لە-نوێنەری-تایبەتی-سکرتێری-گشتیی-نەتەوە-یەکگرتووەکان-دەکات/

سەرۆکی حکومەت پێشوازی لە باڵیۆزی فینلەندا لە عێراق دەکات

ئەمڕۆ یەکشەممە 1/14، مەسرور بارزانی، سەرۆکی حکومەتی هەرێمی کوردستان، پێشوازی لە ئانو سارێلا، باڵیۆزی فینلەندا لە عێراق کرد.

لە دیدارەکەدا بیروڕا لەبارەی دوایین گۆڕانکاری و پەرەسەندنەکانی بارودۆخی گشتیی عێراق و ناوچەکە و برەودان بە پەیوەندیی دوولایەنە ئاڵوگۆڕ کرا.

تەوەريکی کۆبوونەوە، تایبەت بوو بە پەیوەندییەکانی هەرێمی کوردستان و حکومەتی فیدراڵ، لەمبارەیەوە جەخت لە گرنگیی دابينکردنی ماف و شایستە داراییەکانی هەرێم و دەستپێکردنەوەی هەناردەکردنی نەوتی هەرێمی کوردستان لە نزیکترین کاتدا کرایەوە.

پاراستنی ئاسایش و سەقامگیریی هەرێمی کوردستان و عێراق و پاراستنی سەلامەتیی هێزەکانی هاوپەیمانان و نێردە دیپلوماسییەکان لە عێراق و گرنگیی بەردەوامبوونیان لە ئەرکەکانیان، بەشێکی دیکەی گفتوگۆکان بوو.

 

https://gov.krd/government/the-prime-minister/activities/posts/2024/january/سەرۆکی-حکومەت-پێشوازی-لە-باڵیۆزی-فینلەندا-لە-عێراق-دەکات/

جارێکی دیکە هەولێری سەربەرز کرایەوە ئامانجی هێرشی موشەکیی سوپای پاسدارانی ئێران. بەداخەوە لە ئەنجامی ئەم هێرشە بێ پاساوە، شەهید و برینداری سڤیل هەیە.
داواکارم لە خوای گەورە، شەهیدەکان بە بەهەشت شاد بکات و بریندارەکان هەرچی زووتر چاک ببنەوە. بەتوندی ئەم تاوانە بەرانبەر بە خەڵکی کوردستان شەرمەزار دەکەم.
داواش لە حکومەتی فیدراڵی دەکەم هەڵوێستی توندیان هەبێت بەرانبەر بەم پێشێلکاریەی دەکرێتە سەر سەروەریی عێراق و بەتایبەتی هەرێمی کوردستان.
هەروەها داوا لە کۆمەڵگەی نێودەوڵەتی دەکەم لەسەر ئەو ستەمکاریەی بەرانبەر بە خەڵکی کوردستان دەکرێت، بێنە دەنگ. لە ڕۆژانی داهاتوودا، لەگەڵ کۆمەڵگەی نێودەوڵەتی لە پەیوەندیی بەردەوامدا دەبین لە پێناو کۆتایی هێنان بەم هێرشە دڕندانانەی دەکرێنە سەر خەڵکی بێتاوانی کوردستان.

مەسرور بارزانی
سەرۆکی حکومەتی هەرێمی کوردستان

16 کانوونی دووەم 2024

 

https://gov.krd/government/the-prime-minister/activities/posts/2024/january/پەیامێک-لە-سەرۆکی-حکومەتی-هەرێمی-کوردستان/

 

سه‌رۆك نێچيرڤان بارزانى له‌گه‌ڵ سه‌رۆكى ئيستۆنيا كۆبووه‌وه‌

ئێواره‌ى ڕۆژی چوارشه‌ممه‌ 2024/1/17 به‌ڕێز نێچيرڤان بارزانى، سه‌رۆكى هه‌رێمى كوردستان، له‌ ئۆفيسى خۆى له‌ هه‌ولێر پێشوازى له‌ به‌ڕێز ئالار كاريس سه‌رۆكى كۆمارى ئيستۆنيا و شاندێكى ياوه‌رى كرد.

له‌ كۆبوونه‌وه‌يه‌كدا كه‌ به‌ڕێزان جێگرانى سه‌رۆكى هه‌رێمى كوردستان و وه‌زيرى پێشمه‌رگه‌ ئاماده‌ى بوون، هه‌ردوولا خواستى بره‌ودان به‌ په‌يوه‌ندييه‌كانى ئيستۆنيا له‌گه‌ڵ عێراق و هه‌رێمى كوردستانيان دووپات كرده‌وه‌، به‌تايبه‌تى له‌ بوارى بازرگانى و كه‌رتى تايبه‌ت و له‌و بوارنه‌دا كه‌ هه‌رێمى كوردستان ده‌توانێت سوود له‌ ئه‌زموون و پسپۆڕيى ئيستۆنيا وه‌ربگرێت، وه‌ك بوارى ئايتى و حكوومه‌تى ئه‌له‌كترۆنى و بيناكردنى دامه‌زراوه‌كان.

سه‌رۆك نێچيرڤان بارزانى سوپاس و پێزانينى هه‌رێمى كوردستانى بۆ پشتگيرى و ڕۆڵى ئيستۆنيا له‌ هاوپه‌يمانيى نێوده‌وڵه‌تيى دژى داعش و ئه‌ركى تيمى ڕاوێژكاريى سه‌ربازييان و هاوكارييان له‌گه‌ڵ پێشمه‌رگه‌دا ده‌ربڕى و هيواى خواست له‌ بواره‌كانى ديكه‌ى سه‌ربازيدا هاوكاريى پێشمه‌رگه‌ بكه‌ن.

لاى خۆيه‌وه‌ سه‌رۆك كاريس خۆشحاڵيى خۆى به‌ يه‌كه‌م سه‌ردانى بۆ عێراق و هه‌رێمى كوردستان و به‌سه‌ركردنه‌وه‌ى تيمى سه‌ربازيى وڵاته‌كه‌ى له‌ هه‌رێمى كوردستان نيشان دا، هه‌روه‌ها دووپاتى كرده‌وه‌ كه‌ وڵاته‌كه‌ى ئاماده‌يه‌ له‌ هه‌موو بواره‌كاندا، زياتر بره‌و به‌ په‌يوه‌ندييه‌كان و هاريكاريى هاوبه‌ش له‌گه‌ڵ عێراق و هه‌رێمى كوردستاندا بدات.

له‌ ته‌وه‌رێكى ديكه‌ى كۆبوونه‌وه‌كه‌دا، دۆخى سياسى و ئه‌منيى عێراق و هه‌رێمى كوردستان، هێرشى سه‌ر هه‌ولێر، شه‌ڕ له‌ غه‌ززه‌ و دۆخى ئاڵۆزى ڕۆژهه‌ڵاتى ناوه‌ڕاست، شه‌ڕ له‌ ئۆكراينا و لێكه‌وته‌كانى، تاوتوێ كران.

پاشان هه‌ردوو سه‌رۆك له‌ لێدوانێكى ڕۆژنامه‌وانيى هاوبه‌شدا، باسيان له‌ ناوه‌ڕۆكى كۆبوونه‌وه و گفتوگۆكانيان كرد.

سه‌ره‌تا سه‌رۆك نێچيرڤان بارزانى گوتى:

به‌خێر بێن..

زۆر خۆشحاڵم كه‌ ئه‌مڕۆ له‌ هه‌ولێر پێشوازى له‌ جه‌نابى سه‌رۆك (كاريس) ده‌كه‌م. به‌ گه‌رمى به‌خێرهاتنى جه‌نابیان ده‌كه‌م بۆ هه‌رێمى كوردستان و عێراق، جێى خۆشحاڵى و پێزانينه‌ كه‌ له‌ يه‌كه‌م سه‌ردانيدا بۆ عێراق، سه‌ردانى هه‌رێمى كوردستانيش ده‌كات، دواى ئه‌وه‌ى هاوينى ڕابردوو به‌ڕێز وه‌زيرى به‌رگرييان هاته‌ هه‌ولێر.

كۆبوونه‌وه‌يه‌كى باشمان له‌گه‌ڵ جه‌نابى سه‌رۆك هه‌بوو ئه‌مڕۆ. باسمان له‌ بره‌ودان به‌ په‌يوه‌نديی ئيستۆنيا له‌گه‌ڵ عێراق و هه‌رێمى كوردستان، ده‌رفه‌ته‌كانى هاريكاريى هاوبه‌ش و گرنگيى پاراستنى ئارامى و سه‌قامگيرى له‌ ناوچه‌كه‌ كرد. هه‌روه‌ها ده‌ر‌باره‌ى هێرشه‌كانى سه‌ر هه‌ولێر، پێشهاته‌كانى ناوچه‌كه‌، دۆخى مرۆيى له‌ غه‌ززه‌ و شه‌ڕ له‌ ئۆكراينا، بيروڕامان ئاڵوگۆڕ كرد‌.

سوپاس و پێزانينمان بۆ گه‌ل و حكوومه‌تى ئيستۆنيا دووپات كرده‌وه‌ كه‌ له‌ چوارچێوه‌ى هاوپه‌يمانيى نێوده‌وڵه‌تيى دژى داعش، هاوكاريى عێراق و هه‌رێمى كوردستانيان كردووه‌. ئێستاش هێزێكى سه‌ربازييان له‌ هه‌رێمى كوردستان له‌ ئه‌ركدان و ڕاوێژ و يارمه‌تى پێشكه‌ش به‌ پێشمه‌رگه‌ ده‌كه‌ن، سوپاس و ده‌ستخۆشييان لێده‌كه‌ين.

جگه‌ له‌ هاوبه‌شيمان له‌ به‌ره‌نگاربوونه‌وه‌ى تيرۆر، ڕووبه‌ڕووبوونه‌وه‌ى ده‌مارگيرى وتوندڕه‌وى، ئێمه‌ له‌ هه‌رێمى كوردستان خوازيارين له‌ پسپۆڕى و ئه‌زموونى سه‌ركه‌وتووى ئيستۆنيا له‌ چه‌ند بوارێكدا سوود وه‌ربگرين. وه‌ك: بوارى ئاى تى و حكوومه‌تى ئه‌له‌كترۆنى كه‌ ئه‌وان له‌م بواره‌دا پێشه‌نگن.

بۆ ئه‌م مه‌به‌سته‌ كاتى خۆى چه‌ند جارێك شاندى حكوومه‌تى هه‌رێمى كوردستان سه‌ردانی ئيستۆنيای كردووه‌، هه‌روه‌ها له‌ بوارى شه‌فافيه‌ت و بيناكردنى دامه‌زراوه‌كان و له‌ هه‌ر بوارێكى ديكه‌دا‌ كه‌ ئێمه‌ بتوانين سوود له‌ ئه‌زموونى ئه‌وان وه‌ربگرين.

لێره‌دا دووباره‌ زۆر سوپاسی جه‌نابى سه‌رۆك ده‌كه‌ین بۆ ئه‌م هاتنه‌ی. هاتنیان نيشانه‌ى بايه‌خدان و پشتگيريیه‌ له‌ عێراق و له‌ هه‌رێمى كوردستان و بۆ ئێمه‌ گرنگه‌. هيوادارم بتوانين له‌ هه‌موو ئاست و بواره‌كاندا، بره‌و به‌ په‌يوه‌ندييه‌كان و هاريكاريى هاوبه‌شى داهاتوومان بده‌ين.

دیسانه‌وه‌ جه‌نابی سه‌رۆك به ‌خێر بێی.

زۆر سوپاس..

پاشان له‌ لێدوانه‌كه‌يدا سه‌رۆك ئالار كاريس گوتى:

جه‌نابى سه‌رۆك، سوپاس بۆ پێشوازیى گەرم و میوانداریتان، سوپاس بۆ گفتوگۆى ورد و ڕاشکاوانه‌مان. شانازییەکی گەورەیە کە یەکەم سەرۆکی ئیستۆنیا بم سەردانێکی فەرمی بۆ هەرێمی کوردستانی عێراق بکات.

خۆشحاڵم کە شانسێكی كه‌سيم هه‌بوو ئەو گۆڕانکارییە ئەرێنییە مه‌زنانه‌ى گەلی کوردستان ببينم ئه‌وانه‌ى لە بواری سیاسی، ئابووری و ئەمنیدا کردوویەتی. هەندێ له‌ دینامیکييه‌كان زۆر ئەرێنین، وەک پەرەپێدانی فرەیی لە ژیانی سیاسیدا.

لە په‌يوه‌نديى دوولايه‌نه‌شدا، بە خۆشحاڵییەوە ئاماژە بەوە دەکەم کە ئێمە لە بواری دیجیتاڵکردندا هاوکارییەکی باشمان هەیە. هیوادارم لە داهاتوودا بتوانین ئەم هاوكارييه‌ بۆ بوارەکانی ديكه‌ش فراوان بکەین.

هەروەها لە پرسە ئەمنییەکاندا هاوکارین. ئیستۆنیا بە درێژایيی ساڵان چالاکانە بەشداری لە ڕێكارى نێودەوڵەتيی جۆراوجۆردا کردووە بۆ ئەوەی بەشداری لە ئاسایش و سەقامگیريی عێراق و ڕۆژهەڵاتی ناوەڕاستدا بکات.

سەربازەکانمان لێره لە هەولێرن، ستایشی میوانداری و میهرەبانيی خەڵکی ناوچەکە دەکەن. سوپاس جەنابی سەرۆک بۆ میوانداریکردنیان. ئێمە لێرەین بۆ پشتگیری و یارمەتیدانتان، بۆ ئەوەی هەرێمی کوردستان لەوەى هه‌يه‌ زیاتر ئاوەدان و ئارامتر بێت و گەشە بکات.

هۆکاری ديكه‌ى گرنگ بۆ هاتنمان‌ ئەوەیە کە ئێمە خوازیارين له‌ جیهاندا ئاشتى هه‌بێت، هه‌روه‌ها بۆ ئێمە دیموکراسی و ئازادی زۆر بايه‌خدارن، ئه‌وانه‌ ئه‌و به‌هايانه‌ن کە هەوڵ ده‌ده‌ين به‌ديبێن و بپارێزرێن.

ئیستۆنیا بە توندی هەموو جۆرە ئەگەرێكى تیرۆر سه‌ركۆنه‌ دەکات، چونکە مەترسییەکی گه‌وره‌يه‌ بۆ سەر ئاسایش و ئاشتيی نێودەوڵەتی. ئێمە لەگەڵ هەموو هاوپەیمانەکانمان لە شەڕی دژی تیرۆردا پێکەوە وەستاوین، هەروەها بە توندی سه‌ركۆنه‌ى هێرشە بەردەوامەکانی سەر هێزەکانی هاوپەیمانان لە عێراق دەکەم و سەرەخۆشيی قووڵم بۆ خەڵکی ناوچەکە کە لە هێرشی دوێنێدا لێرە لە هەولێر خۆشه‌ويستانيان لەدەستداوە.

ئەمڕۆ ئاڵنگارييه‌كانى چۆنيه‌تيى مامەڵەکردنمان لەگەڵ بارودۆخى ئەمنیی ئاڵۆزدا تاوتوێ كرد كه‌ چ لە ئەوروپا و چ لە ڕۆژهەڵاتی ناوەڕاست، له‌ ئارادان‌. بارودۆخی غەززە بۆ ئێمە مايه‌ى نیگەرانییەکی گەورەیە، پشتیوانی له‌ هەموو هەوڵێك دەکەین بۆ چارەسەركردنی ئاشتیانەی ئەم ململانێیە.

هەروەها باسمان لە دەستدرێژيی ڕووسیا بۆ سەر ئۆکرانیا کرد. ئیستۆنیا دڵنیایە ئەگەر ڕێگە بدەین دەستدرێژکار ئامانجه‌كانى بپێكێت، ئه‌وه‌ ده‌بێته‌ هانده‌ر بۆ هەموو دەوڵەتە شەڕانگێزەکانی دیکە بۆ ئه‌وه‌ى كار بۆ به‌ديهێنانى ئامانجە ئیمپریالیستەکانیان بكه‌ن.

ناتوانین ڕێگە بدەین ئەمە ڕووبدات، ناتوانین ڕێگە بە هیچ دەوڵەتێک بدەین بنەماکانی سستمى نێودەوڵەتی تێکبدات. بۆیە ده‌بێ هەموو وڵاتانی دیموکراسی و ئازادیخواز، پێکەوە کار بکەن بۆ پاراستنی جیهانێک كه‌ هەمووان تيايدا بتوانن سەرفراز بن و بە ئارامی بژین.

جەنابی سەرۆک، دووباره‌ زۆر سوپاس بۆ گفتوگۆى ڕاشکاوانە و بۆ ئەو میواندارییە گەرمەی له‌ خۆم و شاندەکەم کرا. هیوای ئارامی و سەرفرازیتان بۆ دەخوازم!

 

https://presidency.gov.krd/president-nechirvan-barzani-meets-with-president-of-estonia/

 

سه‌رۆك نێچيرڤان بارزانى پێشوازى له‌ باڵيۆزى به‌ريتانيا كرد

ئێواره‌ى ڕۆژی چوارشه‌ممه‌ 2024/1/17 به‌ڕێز نێچيرڤان بارزانى له‌ ديدارێكدا له‌گه‌ڵ به‌ڕێز ستيڤن هيچن باڵيۆزى به‌ريتانيا له‌ عێراق، ده‌رباره‌ى په‌يوه‌ندييه‌كانى به‌ريتانيا له‌گه‌ڵ عێراق و هه‌رێمى كوردستان، گفتوگۆى هه‌ولێر ـ به‌غدا بۆ چاره‌سه‌ركردنى كێشه‌كانيان و هێر‌شه‌كانى سه‌ر هه‌ولێر، بيروڕايان گۆڕييه‌وه‌.

هه‌ردوولا به‌ ئه‌رێنى پێشكه‌وتنه‌كانى گفتوگۆى حكوومه‌تى هه‌رێمى كوردستان و حكوومه‌تى فيدراڵيى عێراقيان هه‌ڵسه‌نگاند و هيوايان خواست بۆ چاره‌سه‌ركردنى كێشه‌كانيان بگه‌نه‌ لێكگه‌يشتنى هاوبه‌ش، هه‌روه‌ها جه‌ختيان له‌ گرنگيى پاراستنى ئارامى و سه‌قامگيريى عێراق و ناوچه‌كه‌ كرده‌وه‌.

دۆخى ناوچه‌كه‌ به‌گشتى، ئاڵۆزييه‌كانى ڕۆژهه‌ڵاتى ناوه‌ڕاست و ئه‌گه‌ر و لێكه‌وته‌كانى، ته‌وه‌رێكى ديكه‌ى ديداره‌كه‌ بوو.

 

https://presidency.gov.krd/president-nechirvan-barzani-receives-british-ambassador-to-iraq/

 

سه‌رۆك نێچيرڤان بارزانى له‌گه‌ڵ باڵيۆزى ئه‌مه‌ريكا كۆبووه‌وه‌

ئێواره‌ى ڕۆژی چوارشه‌ممه‌ 2024/1/17 به‌ڕێز نێچيرڤان بارزانى، سه‌رۆكى هه‌رێمى كوردستان، پێشوازى له‌ خاتوو ئالينا ڕۆمانۆوسكى، باڵيۆزى ئه‌مه‌ريكا له‌ عێراق كرد.

له‌ كۆبوونه‌وه‌يه‌كدا دۆخى سياسيى عێراق و هه‌رێمى كوردستان، دوايين پێشهاته‌ ئه‌منييه‌كان و به‌ئامانجگرتنى هه‌ولێر، په‌يوه‌ندييه‌كانى هه‌ولێر ـ به‌غدا و په‌يوه‌ندييه‌كانى ئه‌مه‌ريكا له‌گه‌ڵ عێراق و هه‌رێمى كوردستان، تاوتوێ كران.

خاتوو ڕۆمانۆوسكى به‌رده‌واميى پشتگيريى ئه‌مه‌ريكاى بۆ عێراق و هه‌رێمى كوردستان دووپات كرده‌وه‌ و ئاماده‌ييى وڵاته‌كه‌ى بۆ بره‌ودان به‌ په‌يوه‌ندييه‌كان و فراوانكردنى هاريكاريى هاوبه‌شى نێوانيان ده‌ربڕى.

دۆخى ناوچه‌كه‌ و ئاڵۆزييه‌كانى ڕۆژهه‌ڵاتى ناوه‌ڕاست و چه‌ند پرسێكى ديكه‌ى جێى بايه‌خى هاوبه‌ش، ته‌وه‌رێكى ديكه‌ى كۆبوونه‌وه‌كه‌ بوون.

 

https://presidency.gov.krd/president-nechirvan-barzani-meets-with-us-ambassador-to-iraq-4/

 

سه‌رۆكى هه‌رێمى كوردستان پێشوازى له‌ سه‌رۆكى ئيستۆنيا ده‌كات

پێشنيوه‌ڕۆى ئه‌مڕۆ چوارشه‌ممه‌ 2024/1/17 به‌ڕێز نێچيرڤان بارزانى، سه‌رۆكى هه‌رێمى كوردستان له‌ فڕۆكه‌خانه‌ى نێوده‌وڵه‌تيى هه‌ولێر، پێشوازى له‌ به‌ڕێز ئالار كاريس سه‌رۆكى كۆمارى ئيستۆنيا كرد كه‌ جارى يه‌كه‌مه‌ سه‌ردانى عێراق و هه‌رێمى كوردستان ده‌كات.

بڕيار وايه‌ ئێواره‌ى ئه‌مڕۆ هه‌ردوو سه‌رۆك كۆبوونه‌وه‌يه‌ك ئه‌نجام بده‌ن و ده‌رباره‌ى په‌يوه‌ندييه‌كانى ئيستۆنيا له‌گه‌ڵ عێراق و هه‌رێمى كوردستان و بره‌ودان به‌ بواره‌كانى هاريكاريى هاوبه‌ش و چه‌ند پرسێكى جێى بايه‌خى هاوبه‌ش، گفتوگۆ بكه‌ن و بيروڕا بگۆڕنه‌وه‌.

 

https://presidency.gov.krd/kurdistan-regional-government-president-receives-estonian-president/

 

زۆر به‌ توندى سه‌ركۆنه‌ى‌ ئه‌و هێرشه‌ دوژمنكارييه‌ ده‌كه‌ين كه‌ سوپاى پاسدارانى ئێران شه‌وى ڕابردوو به‌ مووشه‌كى دوورهاوێژ كرديه‌ سه‌ر هه‌ولێر و له‌ ئه‌نجامدا ژماره‌يه‌ك هاووڵاتى شه‌هيد و بريندار بوون. سه‌ره‌خۆشى له‌ خانه‌واده‌ و كه‌سوكارى شه‌هيدان ده‌كه‌ين، هاوسۆز و هاوخه‌ميانين و هيواى زووچاكبوونه‌وه‌ بۆ برينداران ده‌خوازين.

به‌رده‌واميى به‌ئامانجگرتنى هه‌رێمى كوردستان و شه‌هيدكردنى هاووڵاتييان، تاوانكارييه‌كى بێ پاساو و دژ به‌ ياسا نێوده‌وڵه‌تييه‌كان و دراوسێيه‌تى و به‌ها مرۆيييه‌كانه‌‌، هه‌روه‌ها پێشێلكردنێكى زه‌قى سه‌روه‌رى و ئارامى و سه‌قامگيريى عێراقه. هه‌رێمى كوردستان هه‌رگيز بۆ هيچ لايه‌نێك سه‌رچاوه‌ى هه‌ڕه‌شه‌ نه‌بووه‌ و نابێت.

به‌هانه‌ى سوپاى پاسدارانى ئێران بۆ هێرشه‌كه‌ به‌ ته‌واوى بێ بنه‌ما و دووره‌ له‌ ڕاستييه‌وه‌، بۆيه‌ داوا له‌ حكوومه‌تى فيدراڵيى عێراق ده‌كه‌ين به‌په‌له‌ ده‌ست به‌ لێكۆڵينه‌وه‌ بكات بۆ ده‌رخستنى ڕاستييه‌كان، هه‌روه‌ها ئه‌ركى خۆى له‌ پاراستنى هه‌رێمى كوردستان به‌جێ بگه‌يه‌نێت و ڕێ له‌و هێرشانه‌ بگيرێت.

سه‌رۆكايه‌تيى هه‌رێمى كوردستان

2024/1/16

 

https://presidency.gov.krd/kurdistan-regional-government-condemns-the-attack-on-erbil/

 

 

ئێواره‌ى ئه‌مڕۆ يه‌كشه‌ممه‌ 14/1/2024 به‌ڕێز نێچيرڤان بارزانى، سه‌رۆكى هه‌رێمى كوردستان، له‌ كۆنگره‌يه‌كى ڕۆژنامه‌وانييدا له‌ به‌غدا، ده‌رباره‌ى سه‌ردانى دوو ڕۆژه‌ و ديدار و كۆبوونه‌وه‌كانى له‌گه‌ڵ سه‌ركرده‌ و به‌رپرسانى عێراق، قسه‌ى بۆ ڕۆژنامه‌نووسان كرد و وه‌ڵامى پرسياره‌كانيانى دايه‌وه‌.

به‌ڕێزيان سه‌ره‌تا گوتى:

“هاتنی ئێمه‌ بۆ به‌غدا به‌ پله‌ی یه‌ك به‌شداری بوو له‌ ڕۆژی شه‌هیدی عێراقيدا، له‌و ڕێوڕه‌سمه‌دا‌ به‌شدار بووین و دواتر له‌ دوێنێوه‌ تا ئه‌مڕۆ كۆمه‌ڵێك دیدار و گفتوگۆمان له‌گه‌ڵ هه‌موو هێزه‌ سیاسییه‌كانی عێراق، له‌گه‌ڵ سه‌رۆك وه‌زیران، له‌گه‌ڵ لایه‌نه‌ سیاسییه‌كانی عێراق ئه‌نجامداوه‌. بێگومان ئه‌م دیدارانه‌ ده‌بێت به‌ شێوه‌یه‌كی ئاسایی وه‌ربگیرێن، چونكه‌ ماده‌م ئێمه‌ له‌م جوگرافیایه‌ ده‌ژین و له‌م وڵاته‌ ده‌ژین، زۆر ئاساییيه‌ سه‌ردانی به‌غدا بكه‌ين و هه‌وڵ بديه‌ن ئه‌و كێشانه‌ی هه‌یه‌ له‌گه‌ڵ به‌غدا گفتوگۆیان له‌باریه‌وه‌ بكه‌ین و هه‌وڵ بده‌ين چاره‌سه‌ريان بۆ بدۆزينه‌وه‌.

له‌م دیدارانه‌ی كه‌ ئه‌مڕۆ و دوێنێ كراوه،‌ زیاتر دوو بابه‌تی سه‌ره‌كیمان گفتوگۆ كردووه،‌ یه‌كه‌میان پرسی قووتی خه‌ڵكی كوردستان كه‌ به‌ بۆچوونی ئێمه‌ حكوومه‌تی هه‌رێمی كوردستان هه‌موو پابه‌ندييه‌كانى خۆی به‌رامبه‌ر به‌ به‌غدا جێبه‌جێ كردووه‌ و ئێستا پێویسته‌ ده‌رباره‌ى بابه‌تی مووچه‌ چۆن هه‌ڵسوكه‌وت له‌گه‌ڵ هه‌موو پارێزگاكانی عێراق ده‌كرێت، ده‌بێت له‌گه‌ڵ هه‌رێمی كوردستانيش به‌و شێوه‌یه‌ بێت. ناكرێت مووچه‌ بكرێته‌ بابه‌تێكی سیاسی، یان كارتێكى فشار له‌سه‌ر هه‌رێمی كوردستان. بێگومان جه‌نابی سه‌رۆك وه‌زیران تێگه‌یشتنێكی یه‌كجار باشی هه‌بووه‌ بۆ ئه‌م پرسه‌ و دڵنیام له‌وه‌ی هه‌موو هه‌وڵێكی خۆی ده‌دات بۆ ئه‌وه‌ی ئه‌م كێشه‌یه‌ چاره‌سه‌ر بكرێت. هه‌روه‌ك ده‌زانن هه‌ر ئه‌مڕۆش بڕیارێكى له‌ ئه‌نجومه‌نی وه‌زیران داوه‌، به‌ سوپاسه‌وه‌ بۆ جه‌نابی سه‌رۆك وه‌زیران كه‌ ئه‌مه‌ هه‌ر له‌ ئه‌جێندای كۆبوونه‌وه‌شدا نه‌بووه‌، به‌ڵام زۆر به‌ په‌رۆشه‌وه‌ جه‌ختى له‌سه‌ر ئه‌وه‌ كردۆته‌وه‌ كه‌ ده‌بێت ئه‌مه‌ بخرێته‌ ناو ئه‌جێندای كۆبوونه‌وه‌ی ئه‌نجومه‌نی وه‌زیرانه‌وه‌. به‌ دیدی ئێمه‌ ئه‌و بڕیاره‌ی ئه‌مڕۆ سه‌ره‌تایه‌كی باشه‌ بۆ چاره‌سه‌ركردنی كێشه‌كان.

بابه‌تی دیكه‌ پرسی ئه‌منییه‌ كه‌ ئێمه‌ پێمانوایه‌ ناردنی ئه‌م درۆنانه‌ بۆ هه‌رێمی كوردستان، ئاسایشی هه‌رێمی كوردستان و ئاسایشی عێراقیش تێكده‌ده‌ن، چونكه‌ هه‌موو پێكه‌وه‌ به‌ستراوه‌ و ناكرێت له‌ یه‌كتری جیا بكرێنه‌وه‌. ئه‌مه‌ بابه‌تێكی سه‌ره‌كی بوو كه‌ له‌گه‌ڵ هه‌موو لایه‌نه‌كانیش ئه‌م باسه‌مان كرد. بێگومان ئه‌مه‌ گفتوگۆی زیاتری ده‌وێت، به‌ڵام ئێمه‌ هیوادارین ئه‌م بابه‌ته‌ش چاره‌سه‌ر بكرێت.

لێره‌دا جێی خۆیه‌تی جارێكی دیكه‌ سوپاسی خۆڕاگريی خه‌ڵكی هه‌رێم و مووچه‌خۆرانی هه‌رێمی كوردستان بكه‌ین. سوپاسیان بكه‌ین كه‌ به ‌ڕاستی له‌ هه‌موو كوردستانه‌وه‌ زۆر خۆڕاگر بوون و زۆر به‌رگه‌يان گرتووه‌. هیوادارین ئه‌مساڵ بابه‌تى مووچه‌ جارێكی دیكه‌ نه‌بێته‌ بابه‌تی میدیایی و له‌ ڕاگه‌یاندن باس بكرێت. بابه‌تێك بێت كه‌ به‌ شێوه‌یه‌كی ئاسایی و نۆرمال وه‌ك هه‌موو مووچه‌خۆرانی دیكه‌ له‌ عێراق، مووچه‌ی مووچه‌خۆرانی هه‌رێمی كوردستانیش دابین بكرێت.”

دواتر له‌ وه‌ڵامی پرسیارێكدا سه‌باره‌ت به‌ واده‌ی چاره‌سه‌ركردنی كێشه‌ی مووچه‌ی مووچه‌خۆرانی هه‌رێمی كوردستان و گفتوگۆكانى حكوومه‌تى هه‌رێمى كوردستان و حكوومه‌تى فيدرالى له‌مباره‌يه‌وه‌، سه‌رۆك نێچیرڤان بارزانی گوتی:

“به‌ سوپاسه‌وه‌ شاندی هه‌رێمی كوردستان، شاندی حكوومه‌تی هه‌رێمی كوردستان زۆر به‌ جددی كاریان له‌سه‌ر ئه‌م بابه‌ته‌ كردووه‌، پرسه‌كه‌ ئه‌وه‌ نییه‌ كه‌ ته‌نیا به‌نده‌، حكوومه‌تی هه‌رێمی كوردستان و ئه‌و شاندانه‌ی كه‌ له‌ هه‌ولێره‌وه‌ هاتوون بۆ به‌غدا به‌ شێوه‌یه‌كی زۆر ڕێكوپێك كاریان له‌سه‌ر ئه‌م دۆسیایه‌ كردووه‌ و به‌ ته‌واوه‌تی هه‌موو هه‌وڵی ئێمه‌ ئه‌وه‌یه‌ ئه‌م پرسه‌ له‌ ڕێشه‌وه‌ چاره‌سه‌ر بكرێت و نه‌بێته‌ بابه‌تێكی میدیایی، مووچه‌ هات، مووچه‌ گه‌یشت، مووچه‌ وایلێهات. ئێستا به‌ هیوای ئه‌وه‌ین ئه‌مساڵ بتوانین ئه‌م بابه‌ته‌ به ‌شێوه‌یه‌ك چاره‌سه‌ر بكه‌ین كه‌ په‌نا به‌خوا نه‌بێته‌ بابه‌تی میدیایی”.

سه‌باره‌ت به‌ پرسی هه‌مواری یاسای بودجه‌ و چاره‌سه‌ركردنی شایسته‌كانی هه‌رێمی كوردستان تیایدا، به‌ڕێزیان ڕایگه‌یاند:

“بێگومان ته‌نیا بۆ دابینكردنی مووچه‌ له‌ هه‌رێمی كوردستان زیاتر له‌ ده‌ورى هه‌شتسه‌د و حه‌فتا و پێنج ملیار دینار پێویسته‌، ئه‌مه‌ ته‌نیا بۆ مووچه، ئه‌مه‌ بابه‌تێكه‌ حكوومه‌تی هه‌رێمی كوردستان زۆر به‌ شێوه‌یه‌كی شه‌فافانه‌ هه‌ڵسوكه‌وتی له‌سه‌ر ئه‌م بابه‌ته‌ كردووه‌ و هه‌موو داتاكانی داوه‌ته‌ به‌غدا. ئێستا نۆره‌ی ئه‌وه‌یه‌ كه‌ پابه‌ندى له‌ به‌غداوه‌ بكرێت و مووچه‌ی مووچه‌خۆرانی هه‌رێمی كوردستان دابین بكرێت”.

له‌ وه‌ڵامی پرسیارێكی دیكه‌دا ده‌رباره‌ى په‌يوه‌نديى بڕیاره‌كه‌ى ئه‌نجومه‌نی وه‌زیرانی عێراق به‌ ناردنی شه‌شسه‌د و پازده‌ ملیار دینار بۆ هه‌رێمی كوردستان له‌گه‌ڵ سه‌ردانى جه‌نابيان بۆ به‌غدا، سه‌رۆك نێچیرڤان بارزانی ئاشكرای كرد:

“به‌ سوپاسه‌وه‌، دوێنی جه‌نابی سه‌رۆك وه‌زیران باسی ئه‌وه‌ی كرد كه‌ ئه‌م بابه‌ته‌ ده‌خرێته‌ كۆبوونه‌وه‌ی ئه‌نجومه‌نی وه‌زیرانه‌وه‌، به‌ڵام ئه‌وه‌ ته‌نیا ئه‌وه‌ نییه‌ كه‌ هه‌وڵی من بێت، پێش منیش حكوومه‌تی هه‌رێم شاندی ناردووه‌ته‌ به‌غدا، به‌ به‌رده‌وامی له‌سه‌ر هێڵ بوون له‌گه‌ڵ به‌غدا و هه‌وڵێكی زۆریان داوه‌‌، هه‌موو لایه‌كمان هه‌وڵمان داوه‌ بۆ ئه‌وه‌ی ئه‌م كێشه‌یه‌ په‌نا به‌خوا له‌گه‌ڵ به‌غدا چاره‌سه‌ر بكرێت”.

سه‌باره‌ت به‌وه‌ی تا چه‌ند له‌ كۆبوونه‌وه‌كانیدا له‌ به‌غدا باس له‌ چۆنیه‌تيی ڕێگریكردن له‌ هێرشى درۆنى بۆ سه‌ر هه‌رێمی كوردستان و گارانتيی ئه‌و بابه‌ته‌ كراوه‌، به‌ڕێزیان ڕایگه‌یاند:

“ئه‌و درۆنانه‌ی كه‌ بۆ هه‌رێمی كوردستان ده‌نێردرێن، ئه‌وه‌ پێشێلكردنی سه‌روه‌ریی عێراقه‌، كه‌مكردنه‌وه‌ی ده‌سه‌ڵات و بۆچوونی سه‌رۆك وه‌زیرانی عێراقیشه‌ وه‌ك فه‌رمانده‌ی گشتیی هێزه‌ چه‌كداره‌كان. هه‌ڵوێستی ئێمه‌ ئاشكرایه‌، ئێمه‌ له‌گه‌ڵ ئه‌وه‌داین ئه‌م كێشانه‌ چاره‌سه‌ر بكرێن و دووباره‌ نه‌بنه‌وه‌، وه‌ك گارانتیش، من هیچ گارانتییه‌كم وه‌رنه‌گرتووه‌، به‌ڵام هه‌ڵوێستی خۆمان وه‌ك هه‌رێمی كوردستان زۆر به‌ ڕوونی له‌ قسه‌كانم، له‌و ڕێوڕه‌سمه‌دا هه‌ڵوێستی هه‌رێمی كوردستانم باس كردووه‌. جارێكی دیكه‌ ئه‌و هه‌ڵوێسته‌مان دووپات ده‌كه‌ینه‌وه‌ و ئه‌وانه‌ی كه‌ له‌ ده‌ره‌وه‌ی یاسا ئه‌م كارانه‌ ده‌كه‌ن، یه‌كه‌م شت سه‌روه‌ریی عێراق پێشێل ده‌كرێت، چونكه‌ چ جیاوازییه‌ك هه‌یه؟!‌ بۆ نموونه‌ جیاوازيی نێوان هه‌ولێر و به‌غدا چییه‌؟ هه‌ولێریش شارێكی عێراقییه‌ و سه‌روه‌ریی به‌غدا و سه‌روه‌ریی هه‌ولێر یه‌ك سه‌روه‌رین كه‌ سه‌روه‌ریی عێراقه‌. پێشێلكردنی سه‌روه‌ریی عێراق له‌لایه‌ن هه‌ندێك گرووپی چه‌كداره‌وه‌، پێشێلكردنی سه‌روه‌ریی هه‌موو عێراقه‌ نه‌ك ته‌نیا هه‌رێمی كوردستان. ده‌بێت ئه‌مه‌ بوه‌ستێت و ناكرێت ئه‌مه‌ به‌رده‌وام بێت. تێگه‌یشتنێكی باش هه‌یه‌ بۆ ئه‌م پرسه‌. ده‌توانم بڵێم تێگه‌یشتنی باش هه‌یه‌ و به ‌هیواین په‌نا به‌خوا ئه‌مه‌ چاره‌سه‌ر بكرێت”.

هه‌ر سه‌باره‌ت به‌ بودجه‌ و دیاریكردنی واده‌یه‌ك و چۆنیه‌تیی هه‌مواركردنه‌وه‌ی یاساكه‌ و كۆبوونه‌وه‌ی چاوه‌ڕوانكراوی كۆمسیۆنی سه‌ربه‌خۆی هه‌ڵبژاردنه‌كانی عێراق له‌گه‌ڵ سه‌رۆكایه‌تیی هه‌رێمی كوردستان له‌مباره‌يه‌وه‌ سه‌رۆك نێچیرڤان بارزانی گوتی:

“هه‌موو هه‌وڵێكی حكوومه‌تی هه‌رێمی كوردستان ئه‌وه‌یه‌ یاسای بودجه‌ به‌ شێوه‌یه‌ك دابڕێژرێ كه‌ ده‌سته‌به‌ری مافی مووچه‌خۆرانی هه‌رێمی كوردستان بكات. له‌سه‌ر پرسی هه‌ڵبژاردن، زۆر به‌داخه‌وه‌ هه‌ڵبژاردنه‌كان زۆر دواكه‌وتن و زیاتر دواكه‌وتنی هه‌ڵبژاردن بابه‌تی شه‌رعییه‌تی داموده‌زگاكانی هه‌رێمی كوردستان ده‌خاته‌ ژێر پرسیاره‌وه‌. داوامان كردووه‌ شاندی كۆمسیۆنی باڵا سه‌ردانی هه‌ولێر بكات و سبه‌ی و دووسبه‌ی له‌گه‌ڵ هاوكارانم كۆده‌بنه‌وه‌ له‌ سه‌رۆكایه‌تیی هه‌رێم و قسه‌ له‌سه‌ر واده‌یه‌ك ده‌كه‌ین كه‌ دڵنیا بین له‌و واده‌یه‌دا هه‌ڵبژاردن ده‌كرێت. زۆر به‌داخه‌وه‌ كه‌ له‌‌ سه‌رۆكایه‌تیی هه‌رێم ڕۆژی هه‌ڵبژاردن دیاری ده‌كه‌م و له‌به‌ر زۆر هۆكار ناكرێت. هیوادارم ئه‌مه‌ كۆتا جار بێت”.

ده‌رباره‌ی ئه‌وه‌ی كه‌ ته‌مه‌نی كۆمسیۆن كێشه‌ بۆ پرۆسه‌ی هه‌ڵبژاردن دروست ناكات، به‌رێزیان ڕایگه‌یاند “ده‌بێت هه‌وڵ بده‌ین پێش ئه‌وه‌ هه‌ڵبژاردن بكرێت”.

هه‌ر سه‌باره‌ت به‌ چاره‌سه‌رنه‌كردنی كێشه‌ی مووچه‌ و شایسته‌ داراییه‌كانی هه‌رێمی كوردستان له‌گه‌ڵ به‌غدا، له‌ وه‌ڵامى پرسيارێكى ديكه‌دا ئاشكرای كرد:

“هیوادارین و ئه‌وه‌ی بینیم له‌ جه‌نابی سه‌رۆك وه‌زیران له‌ به‌غدا، هه‌موو لایه‌نێك ده‌یه‌وێ ئه‌م كێشه‌یه‌ چاره‌سه‌ر ببێت و هه‌موو هه‌وڵێكی ئێمه‌ش ئه‌وه‌یه‌ كه‌ ئه‌م كێشه‌یه‌ به‌پێی یاسا چاره‌سه‌ری بۆ بدۆزرێته‌وه‌”.

هه‌ر سه‌باره‌ت به بڕياره‌كه‌ى حكوومه‌تی عێراق به‌ ناردنى پاره‌ بۆ هه‌رێمی كوردستان بنێرێت، هه‌روه‌ها ده‌رباره‌ى پێشبینيی هه‌نارده‌كردنه‌وه‌ی نه‌وتی هه‌رێمی كوردستان، سه‌رۆك نێچیرڤان بارزانی گوتی:

“پرسی هه‌نارده‌كردنه‌وه‌ی نه‌وتی هه‌رێمی كوردستانیش یه‌كێك له‌ بابه‌ته‌كان بوو كه‌ ئێمه‌ له‌گه‌ڵ سه‌رۆك وه‌زیران و وه‌زیری نه‌وت گفتوگۆمان كرد و به‌هیوای ئه‌وه‌ین ئه‌م پرسه‌ش له‌ ماوه‌یه‌كی كورتدا چاره‌سه‌ر بكرێت، ناتوانم بڵێم كه‌ی، به‌ڵام پێموایه‌ له‌سه‌ر ڕێگه‌یه‌كی دروستین بۆ ئه‌وه‌ی ئه‌م كێشه‌یه‌ش په‌نا به‌خوا چاره‌سه‌ر بكرێت. هه‌روه‌ك باسم كرد مووچه‌خۆرانی هه‌رێمی كوردستان مافی خۆیانه‌ كه‌ ده‌بێت مووچه‌ وه‌رگرن و هیوادارین ئه‌م بڕیاره‌ی ئه‌مڕۆی ئه‌نجومه‌نی وه‌زیران سه‌ره‌تایه‌ك بێت بۆ كۆتاییهێنان به‌و كێشه‌یه‌”.

دواتر له‌ وه‌ڵامى پرسیارێكدا ده‌ر‌باره‌ی هه‌نگاوه‌كانی دياريكردنى پۆستی پارێزگاری كه‌ركووك، به‌ڕێزیان ئاشكرای كرد:

“دوای ئه‌وه‌ی ئه‌نجامه‌كان ڕاده‌گه‌یه‌نرێت و دوای ئه‌وه‌ی تانه‌لێدان ته‌واو ده‌بێت، بێگومان ده‌كه‌وینه‌ گفتوگۆكردن. له‌لایه‌ن خۆمانه‌وه‌ با وا قسه‌ بكه‌م وه‌ك پارتی، ئێمه‌ له‌گه‌ڵ یه‌كێتیی نیشتمانیی كوردستان ئه‌م باسه‌ گفتوگۆ ده‌كه‌ین. په‌نا به‌خوا هه‌وڵ ده‌ده‌ین چ له‌ مووسڵ و چ له‌ كه‌ركووك، بگه‌ینه‌ لێكگه‌یشتنێك كه‌ له‌ به‌رژه‌وه‌ندیی خه‌ڵكی كوردستاندا بێت. زۆر سوپاس”.

 

https://presidency.gov.krd/president-nechirvan-barzani-we-discussed-the-issue-of-the-kurdish-peoples-livelihood-with-baghdad/

 

پەڕەى 2 لەکۆى 204 پەڕەدا

هەواڵی زیاتر لە تویتەر

راپۆرتە پڕ بینەرەکان

حالت های رنگی