ئەمڕۆ چوارشەممە 23ـی 7ـی 2014 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە پاتریاك لویس ڕۆفاییلی یەكەم ساكۆ پاتریاكی كلدانی لە عێراق و جیهان و شاندێكی یاوەری كرد كە لە ژمارەیەك مەتران و پیاوی ئایینی مەسیحیی كوردستان و عێراق پێكهاتبوو.

لە كۆبوونەیەكدا پاتریاك لویس ڕۆفاییلی یەكەم ساكۆ پاتریاكی كلدانی لە عێراق و جیهان سوپاسی سەرۆك بارزانیی كرد بۆ ڕەخساندنی ئەم دیدارە و سوپاسی سەرۆك بارزانی و حكوومەتی هەرێمی كوردستانی كرد بۆ پێشوازی و حەواندنەوەی مەسیحییەكانی نەینەوا و عێراق و هەروەها هاوكاریكردن و پاراستنیان لە هەڕەشەی تیرۆریستان. پاتریاكی كلدانی لە عێراق و جیهان نیگەرانیی خۆیشی نیشان دا بەرانبەر ڕووداوەكانی موسڵ و هەروەها ئەو هەڕەشە و جیاكارییەی لەسەر بنەمای ئایین و بەناوی ئیسلام لەدژی مەسیحییەكان دەكرێ و ئاماژەی بەوەدا كە ئەوەی ئێستا لە ئارادایە پەرەسەندنی كولتووری ئینكاری بەرانبەر و شێواندنی سیمای ئیسلامە و ڕایشیگەیاند كە دەركردن و تێكدانی كەنیسەكان و توراسی مێژوویی و ئایینیی مەسیحییەكان لە نەینەوا بوونی مەسیحییەكانی لەم ناوچەیە كردۆتە ئامانج. لە درێژەی قسەكانیدا پاتریاكی كلدانی لە عێراق و جیهان جەختی لەوە كردەوە كە پێویستە توراسی مێژوویی مەسیحییەكان و مانەوەی مەسیحییەكان بپارێزرێت و شێوەیەكی سەردەمیانە بۆ یەكلاییكردنەوەی گرفتەكانی عێراق بدۆزرێتەوە و داوایشی كرد كە لەگەڵ حكوومەتی هەرێمی كوردستان هەماهەنگی و بەدواداچوونی هاوبەش هەبێت بۆ چارەكردنی گرفتی ئاوارە و پەنابەرانی مەسیحی.

لەبەرانبەردا سەرۆك بارزانی بەخێرهاتنی شاندی میوانی كرد و سەبارەت بە دەركردنی خوشك و براكانی مەسیحی لە دەشتی نەینەوا بە توندی ئەو هەوڵانەی ئیدانە كرد كە لەدژی مەسیحییەكان لە لایەن تیرۆریستانەوە ئەنجام دەدرێت و ڕایگەیاند كە ئەم تەوژمە تەنیا هەڕەشە نییە بۆ سەر مەسیحییەكان بەڵكو هەڕەشەیە بۆ سەر هەموو پێكهاتەكانی عێراق و ناوچەكە و جیهان و دژی هەموو پڕەنسیپە ئایینی و مرۆڤییەكان و دژی ژیانە و لەو ماوەیەدا نەك تەنیا كەنیسەكان بەڵكو مەزارگە و شوێنە پیرۆزەكانی موسلمانانیش كەوتوونەتە بەر پەلاماری تیرۆریستانەوە. سەرۆك بارزانی لە درێژەی قسەكانیدا شاندی میوانی دڵنیا كردەوە كە هەرێمی كوردستان هەموو هەوڵێكی دەخاتەگەڕ بۆ یارمەتیدانی پەنابەران و ئاوارەكان و كوردستانیش وڵاتی هەمووانە و دەرگەی بۆ لێقەوماوان كرایەوە و ڕایگەیاند كە زۆر باش لە كێشە و گرفتەكانی خوشك و برا مەسیحییەكان دەگات و پێویستە هەموومان وڵاتی خۆمان بپارێزێن و گوتی: " یان هەموومان پێكەوە دەمرین یان پێكەوە بە ئازادی و سەربەرزی دەژیین". سەرۆك بارزانی داوایشی لە خوشك و برا مەسیحییەكان كرد كە خۆڕاگر بن و بیر لە كۆچكردن بۆ دەرەوەی وڵات نەكەنەوە و ئەوەی خستەڕوو كە دژایەتیكردنی تیرۆر و نەهێشتنی توندڕۆیی هەوڵێكی هەمەلایەنە و دەولیی پێویستە و هەرێمی كوردستانیش بەهەموو توانایەكیەوە ڕووبەڕووی تیرۆریستان دەبێتەوە و بەرگری لە خاك و ژیانی هاووڵاتیان دەكات.