سەرۆكی هەرێمی كوردستان پێشوازی لە سەرۆکی کۆمیتەی نێودەوڵەتیی خاچی سوور دەكات
ئەمڕۆ پێنجشەممە 13ـی 3ـی 2014 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە پیتەر ماورێر سەرۆکی کۆمیتەی نێودەوڵەتیی خاچی سوور و شاندێکی یاوەری کرد.
لە سەرەتای دیدارەكەدا سەرۆکی کۆمیتەی نێودەوڵەتیی خاچی سوور خۆشحاڵیی خۆی بۆ ئەو دیدارە ڕاگەیاند و سوپاسی سەرۆک بارزانی کرد بۆ ڕەخساندنی ئەو دەرفەتە. هەروەها سوپاس و پێزانینی کۆمیتەی نێودەوڵەتیی خاچی سووری بۆ هەرێمی کوردستان ڕاگەیاند بۆ ئەو هاوکارییەی کە بۆ چالاکییەکانی کۆمیتەکەیان لە هەرێمی کوردستان دەکرێت و ڕایگەیاند کە ئەوان وەک کۆمیتەی نێودەوڵەتیی خاچی سوور ئەو ئاسانکاری و هاوکارییەی لەلایەن هەرێمی کوردستانەوە بۆ ئەنجامدانی چالاکییەکانیان بە تایبەتی بەسەرکردنەوەی بەندیخانەکان پێشکەشیان دەکرێت بە نموونەیەکی نایاب دەزانن و بۆ ئەوەش دەستخۆشی لە حکوومەتی هەرێمی کوردستان دەکەن. ڕاشیگەیاند کاتێک ئەوان ئەو پەرەسەندن و هاوکارییە لە هەرێمی کوردستان دەبینن هیوایان زیاتر دەبێت کە بتوانن ئەو پیشکەوتنە سەرانسەری عێراق بگرێتەوە.
لەبەشێکی دیکەی قسەکانیدا سەرۆکی کۆمیتەی نێودەوڵەتیی خاچی سوور سەرسامیی خۆی بەوە دەربڕی کە هەرێمی کوردستان لەو ناوچە نائارام و پڕ کێشەیەدا توانیویەتی ئارام و سەقامگیر بێت و لە پێشکەوتن بەردەوام بێت.
هەر لە دیدارەکەدا سەرۆکی کۆمیتەی نێودەوڵەتیی خاچی سوور ستایشی هەوڵەکانی هەرێمی کوردستانی کرد لە بەدەنگەوەهاتن و حەواندنەوەی پەنابەرانی سووریا و ئاوارەکانی ناوخۆی عێراق و ئامادەیی کۆمیتەی نێودەوڵەتیی خاچی سووری خستەڕوو بۆ ئەوەی هەوڵی هەردوولا تەواوکەری یەکتری بن، بەتایبەتیش لە بواری یەکخستنەوەی ئەو خێزانە پەنابەرانەی بەهۆی شەڕەوە پەرتەوازە بوونە و لەیەکتری دابڕاون.
لە بەرانبەردا سەرۆک بارزانی بەگەرمی بەخێرهاتنی سەرۆکی کۆمیتەی نێودەوڵەتیی خاچی سوور و شاندی یاوەری کرد و خۆشحاڵی خۆی لەوە دەربڕی کە کۆمیتەکەی نێودەوڵەتیی خاچی سوور ستایشی هاوکاریی دەزگەکانی حکوومەتی هەرێم دەکەن و ڕایگەیاند کە هەرێمی کوردستان بە خۆشحاڵییەوە پێشوازیی لە پێشنیار و ڕاسپارەکانی کۆمیتەی نێودەوڵەتیی خاچی سوور دەکات بۆئەوەی هەر کەمومورییەک هەبێت ڕاست بکرێتەوە. ڕاشیگەیاند کە گەلی کوردستان زۆریان ناخۆشی و نەهامەتی بینیوە بەڵام سەرباری ئەوەش لە لێبوردەییدا کەموێنەن.
سەبارەت بە ڕەوشی پەنابەر و ئاوارەکانیش سەرۆک بارزانی ڕایگەیاند کە ئێستا نزیکەی ٢٥٠ هەزار پەنابەر لە سووریاوە هاتوونەتە ناو هەرێمی کوردستان، هەروەها پێش ئەوانیش نزیکەی ٢٢٠ هەزار ئاوارە لە شارەکانی عێراقەوە ڕوویان لە هەرێم کردووە، ئەوە جگە لە زیاتر لە ٢٦ هەزار خانەوادەی مەسیحی کە بۆ پاراستنی گیانیان لە ناوچەکانی عێراقەوە هاتوونەتە هەرێمی کوردستان، ئەو ژمارە زۆرەیش قورساییەکی زۆری خستۆتە سەر هەرێمی کوردستان، بەڵام هاوکاریی کردنی ئەوانمان بە ئەرکی مرۆیی و نیشتیمانی زانیوە.
لە تەوەرێکی دیکەی دیدارەکدا پێشهاتەکانی عێراق و سووریا و ناوچەکە خرانە بەرباس و گفتوگۆیان لەبارەوە کرا.
هەینی, 14 ئازار 2014
سەرۆك بارزانی پێشوازی لە شاندێکی وەزارەتی دەرەوەی بریتانیا دەكات
پێشنیوەڕۆی ئەمڕۆ پێنجشەممە 13ـی 3ـی 2014 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە ئێدوارد ئۆکدێن بەڕێوەبەری بەشی ڕۆژهەڵاتی ناوەڕاست و باكووری ئەفریقیا لە وەزارەتی دەرەوەی بریتانیا و شاندێكی یاوەری كرد کە لە باڵیۆزی بریتانیا لە عێراق و کونسوڵی گشتیی بریتانیا لە هەولێر پێکهاتبوو.
لە سەرەتای دیدارەکدا بەڕێوەبەری بەشی ڕۆژهەڵاتی ناوەڕاست و باكووری ئەفریقیا لە وەزارەتی دەرەوەی بریتانیا سوپاسی سەرۆك بارزانی كرد بۆ پێشوازی و ڕەخساندنی ئەم دیدارە و لەسەرەتای قسەكانیدا سەرسامیی خۆی بە پێشکەوتن و گەشەسەندنی هەرێمی کوردستان دەربڕی. هەروەها ئاماژەی بە بارودۆخی نالەباری ئەمنی و سیاسیی عێراق كرد و ڕایگەیاند کە بریتانیا بە پێویستی دەزانێت سەرجەم لایەنە عێراقییەکان لە بەڕێوەبردنی وڵاتدا بەشداربن و نابێ هیچ لایەنێک پشتگوێ بخرێت، ئەوەیشی بە فاکتەری سەرەکیی سەقامگیریی عێراق لەقەڵەم دا. هەروەها نیگەرانیی خۆیشی لە زیادبوونی هەڕەشەی تیرۆریستان لە عێراق و ناوچەکە دەربڕی و ڕایگەیاند کە پێویستە هەموو لایەک هاوکار بن بۆ ڕووبەڕووبوونەوەی هەڕەشەی تیرۆر و ئەو تەحەدییانەی بەرەوڕووی ناوچەکە دێن.
بەڕێوەبەری بەشی ڕۆژهەڵاتی ناوەڕاست و باكووری ئەفریقیا لە وەزارەتی دەرەوەی بریتانیا لەبەشێکی دیکەی قسەکانیدا ئاماژەی بە ڕۆڵی بەرچاوی هەرێمی کوردستان کرد لە حەواندنەوەی پەنابەرانی سووریا و ئاوارەکانی ناوخۆی عێراق و ستایش و سوپاسگوزاریی وڵاتەکەی بۆ هەرێمی کوردستان دەربڕی.
لەبەرانبەردا سەرۆك بارزانی بە گەرمی بەخێرهاتنی شاندی میوانی كرد و لەبارەی بارودۆخی ئەمنی و قەیرانی سیاسیی عێراق و هەروەها كێشەكانی نێوان هەولێر و بەغدا سەرۆك بارزانی ئاماژەی بەوەدا كە پێشێلكردنی دەستوور سەرچاوەی سەرەکیی كێشەكانی عێراقە، ئەنجامەكەشی ئەوە بووە كە عێراق لە مانای دەوڵەتبوون دوور بكەوێتەوە و خزمەتگوزاری و ئاساییش و ژیانی دامەزراوەیی بۆ وڵات دابین نەكرێت. هەروەها سەرۆک بارزانی ڕایگەیاند عێراقی نوێ لەسەر بنەمای شەراکەت دامەزراوە کەچی بەغدا دەستوور پشتگوێ دەخات و وەک شەریک سەیری هەرێمی کوردستان ناکرێت، بەڵام گەلی کوردستان قوربانییەکی زۆری لەپێناو ئازادیدا بەخشیوە و ڕێگە نادات جارێکی تر وەک پاشکۆ مامەڵەی لەگەڵدا بکرێت.
بارودۆخی سیاسیی ناوچەكە و دوایین پێشهاتەكانی سووریا تەوەرێكی دیكەی ئەم دانیشتنە بوو.
هەینی, 14 ئازار 2014
سەرۆكی هەرێمی كوردستان لەگەڵ كوتلە كوردستانییەكانی نێو ئەنجوومەنی نوێنەرانی عێراق كۆبۆیەوە
ئەمڕۆ شەممە 15ـی 3ـی 2014 لە سەلاحەدین بەڕێز مەسعود بارزانی سەرۆكی هەرێمی كوردستان لەگەڵ كوتلە كوردستانییەكانی نێو ئەنجوومەنی نوێنەرانی عێراق كۆبۆیەوە.
لەم كۆبوونەوەیەدا دوایین پێشهاتە سیاسییەكانی عێراقی فیدڕاڵ خرایە بەر باس و گفتوگۆ و هەروەها قسەیش لەسەر سیاسەتی نەوتیی هەرێم و پەیوەندییەكانی نێوان هەرێم و بەغدا كرا و باسی ئەو خاڵە ناكۆكانەیش كرا كە بوونەتە هۆی دەركەوتنی قەیرانی سیاسیی نێوان هەرێم و بەغدا. نەناردنی بەشە بودجەی هەرێم و بڕینی مووچەی فەرمانبەرانی هەرێمی كوردستان بەشێكی دیكەی ئەم كۆبوونەوە بوو و بەشداربووانی كۆبوونەوەكە ئەم هەنگاوەی حكوومەتی عێراقییان فیدڕاڵ بە نایاسایی و تێكهەڵكردنی ژیانی خەڵك لەگەڵ كێشە سیاسییەكان وەسفكرد.
هەر لەم كۆبوونەوەیەدا پڕۆژە یاسای بودجەی عێراق بۆ ساڵی 2014 تاوتوێ كرا و سەرۆكی كوتلە كوردستانییەكانی ئەنجوومەنی نوێنەرانی عێراق و بەشداربووانی كۆبوونەوەكە تێبینی و پێشنیارەكانی خۆیان لەمبارەیەوە بە سەرۆك بارزانی ڕاگەیاند. پەیوەست بەم باسەوە كۆبوونەوەكە بەم ئەنجامە گەییشت كە پڕۆژە یاسای بودجەی ئەمساڵی عێراق بە بێی ڕەچاوگرتنی پڕەنسیپی تەوافوق لە ئەنجوومەنی وەزیرانی عێراقەوە نێردراوە بۆ ئەنجوومەنی نوێنەرانی عێراق. سەرباری ئەوەیش پڕۆژە یاساكە زێدڕۆیی بەسەر دەستووری تێدایە و پڕیەتی لە سزادان لەدژی هەرێمی كوردستان. بەشداربووانی كۆبوونەوەكە بە تێكڕای دەنگ داویان كرد كە پڕۆژەیاساكە نەخرێتە بەرنامەی كاری ئەنجوومەنی نوێنەران و خوێندنەوەی یەكەمی بۆ نەكرێت هەتا ئەو كاتەی ئەو بڕگانە لە پڕۆژەیاسای بودجە هەموار دەكرێت كە كوتلە كوردستانییەكانی نێو ئەنجوومەنی نوێنەران تێبینییان لەسەری هەیە. كۆبوونەوەكە جەختی لەوە كردەوە كە پێویستە مادەی 1ـی پڕۆژە یاسای بوودجەی ساڵی 2014 هەموار بكرێت و ئەو بڕگە و ماددانەی پەیوەندی بە سزادانی هەرێمی كوردستانەوە هەیە لا بدرێن و نەمێنن.
شەممە, 15 ئازار 2014
فەرمانگەی باربوكردنی هەناردەی بەریتانیا ئامادەیی خۆی بۆ هاوكاریكردنی هەرێمی كوردستان نیشاندا
ئەمڕۆ فەلاح مستەفا بەرپرسی پەیوەندیەكانی دەرەوە پێشوازی لە شاندێكی گروپی كاری باربوی دارایی بەریتانیا كرد بە سەرۆكایەتی ستیڤ دۆكسن سەرۆكی گروپ كە بەیاوەری هیو ئیڤانز كونسوڵی گشتی بەریتانیا سەردانی فەرمانگەیان كردبوو.
لە دیدارێكدا كە خاتوو سوهام جەبەلی یاریدەدەری بەرپرسی فەرمانگە ئامادەی بوو ، سەرۆكی شاندەكە مەبەستی سەردانەكەی بۆ هەرێمی كوردستان رونكردەوە و باسی لە كار و چالاكیەكانی فەرمانگەكەیانی كرد و گوتی : مەبەست لەو سەردانەمان ئاشنابوونە بە بارودۆخی كوردستان بۆ ئەوەی بزانین چۆن دەتوانین پشتگیری پلان و بەرنامە و ستراتیژی حكومەت بكەین بۆ بونیادنانەوە و پێشڤەچوونی هەرێم لە هەموو بوارەكاندا و ببینە هاوبەشی حكومەتی هەرێم لە پرۆسەی بونیادنانەوەدا .
ئاماژەی بەوەشدا بینینی راستی بارودۆخ بە شێوەیەكی راستەوخۆ كاریگەری خۆی دەبێت و دووپاتیكردەوە ئەوەی لە هەرێمی كوردستاندا لە یەكەمین سەردانیاندا و لەو ماوە كورتەیاندا بینیان ، بونیادنانەوە لە هەموو كەرتەكان بەردەوامە و ئەوەش دەرفەتێكی زۆر بۆ كۆمپانیا بەریتانیەكان دەرەخسێنێت بۆ ئەوەی لەو پرۆسەیە هاوكاری حكومەتی هەرێم بن .
هاوكات ئاماژەی بەوەشدا كە ئەوان مەبەستیانە گوێ لە بەرپرسانی حكومەت بگرن بۆ ئەوەی بیر و بۆچوونەكان بخەنە چوارچێوەیەكی هاوبەش و لە بەرژەوەندی هەردوولا جێبەجێبكرێت و پاڵپشتی مادی و مەعنەوی بۆ كۆمپانیا بەریتانیەكان نیشاندا بۆ ئەوەی لە هەرێمی كوردستاندا كار بكەن .
دواتر فەلاح مستەفا وێڕای بەخێرهێنانی شاندی میوان دووپاتیكردەوە حكومەت پێشوازی لەو سەردانەیان دەكات و هاوڕایی خۆی لەگەڵ بۆچوونەكانیان نیشاندا بەوەی كە باشترە بارودۆخی هەرێم بە شێوەیەكی راستەوخۆ ببینن و دووپاتیكردەوە بەریتانیا هاوبەشێكی گرنگە بۆ هەرێمی كوردستان و حكومەتی هەرێم بە بایەخەوە سەیری ئەم هاوبەشیە لەگەڵ حكومەتی بەریتانیا دەكات و نیشانیدا ئەو سەردانەیان بۆ هەرێم لە كاتێكی گونجاودایە .
هەروەها باسی ئەولەویاتی حكومەتی هەرێم كرد بۆ گرنگیپێدان لە بوارەكانی وەبەرهێنان كە جگە لە وزە و ژێرخان خۆیان لە كەرتەكانی كشتوكاڵ و پیشەسازی و گەشتیاریدا دەبینێتەوە .
پاشان بەرپرسی پەیوەندیەكانی دەرەوە تیشكی خستە سەر رەوشی سەقامگیری و ئاسایشی هەرێم و نیشانیدا حكومەتی هەرێم دەخوازێ سیاسەتێكی سەربەخۆی ئابوری هەبێت و پشت بە خۆی ببەستێت لە رێگەی دابینكردنی سەرچاوەی هەمەجۆری ئابوریەوە .
لە بەرامبەردا سەرۆكی شاند گوتی : ئێمە دەمانەوێ هاوكارتان بین بۆ ئەوەی بتوانن لە رێگەی پاڵپشتیكردنی بازرگانی و وەبەرهێنان لە هەرێم لەسەر پێی خۆتان بوەستن .
دواتر هەردوولا بیروڕایان لە بارەی داڕشتنی پرۆژەی هاوبەش ئاڵوگۆڕ كرد بۆ جێبەجێكردنیان لە هەرێم لە نزیكترین دەرفەتدا.
شیاوی باسە ئەم گروپە كە سەر بە حكومەتی بەریتانیایە لە چەندین وڵاتی جیهاندا پرۆژەی گەورە و گرنگ لە رێگەی پشتیوانیكردن لە چالاكی كۆمپانیا بەریتانیەكان جێبەجێ دەكەن .
دوو شەممە, 17 ئازار 2014
نێچیرڤان بارزانى و ئه‌ردۆغان په‌یوه‌ندییه‌كانى هه‌ولێر و ئه‌نقه‌ره تاوتوێ ده‌كه‌ن
له به‌رده‌وامیى سه‌ردانه‌كه‌یدا بۆ توركیا و دواى كۆبوونه‌وه و ڕێككه‌وتنى وان بۆ كردنه‌وه‌ى چوار ده‌روازه دیكه‌ى سنوورى له نێوان هه‌رێمى كوردستان و توركیادا، دوێنێ ئێواره شه‌ممه 15ى ئازارى 2014 نێچیرڤان بارزانى سه‌رۆك وه‌زیرانى هه‌رێمى كوردستان و شاندى یاوه‌رى له ئه‌نقه‌ره له‌گه‌ڵ ڕه‌جه‌ب ته‌ییب ئه‌ردۆغان سه‌رۆك وه‌زیرانى توركیا كۆ بوونه‌وه.
له كۆبوونه‌وه‌كه‌دا كه هه‌ر یه‌كه له ئاشتى هه‌ورامى وه‌زیرى سامانه سروشتییه‌كان، كامه‌ران ئه‌حمه‌د وه‌زیرى ئاوه‌دانكردنه‌وه و سه‌رۆكى ده‌سته‌ى وه‌به‌رهێنان به‌وه‌كاله‌ت، سه‌فین دزه‌یى گوته‌بێژى فه‌رمیى حكوومه‌ت و هه‌ردوو پارێزگارى هه‌ولێر و سلێمانى له شاندى هه‌رێم و تانه‌ر یلدز وه‌زیرى وزه و فه‌ریدوون سینیرلى ئۆغلو جێگرى وزیرى ده‌ره‌وه‌ى توركیا و ژماره‌یه‌ك له ڕاوێژكاران ئاماده‌ى بوون، په‌یوه‌ندیى دووقۆڵیى هه‌رێمى كوردستان و توركیا له بواره‌كاى بازرگانى و ئابوورى و هاریكاریى وزه و بره‌ودانى زیاتر به‌م په‌یوه‌ندیانه خرانه به‌ر باس.
ئه‌ردۆغان خۆشحاڵیى خۆى به سه‌ردانه‌كه‌ى شاندى هه‌رێم و ڕێككه‌وتنه‌كه‌ى نێوان هه‌رێمى كوردستان و توركیا بۆ فراونكردنى ده‌روازه‌ى سنووریى ئیبراهیم خه‌لیل و كردنه‌وه‌ى چوار ده‌روازه‌ى نوێى سنوورى له نێوان هه‌ردوولادا ده‌ربڕى و دووپاتى كرده‌وه كه كردنه‌وه‌ى ئه‌م ده‌روازه سنووریانه ده‌بێته هۆى زیادبوونى چالاكیى بازرگانى و ئابوورى و بره‌ودان به په‌یوه‌ندییه كۆمه‌ڵاتییه‌كان به تایبه‌تیش له‌و ناوچانه‌ى سنوور كه تێكه‌ڵاوى و خزمایه‌تى له نێوان دانیشتوانى هه‌ردوولاى سنووردا هه‌یه.
له كۆبوونه‌وه‌كه‌دا ڕه‌وشى ئه‌منى و سیاسیى عیراق و ئاینده‌ى پرۆسه‌ى سیاسى و هه‌ڵبژاردنه‌كانى داهاتووى عیراق و هه‌رێمى كوردستان و توركیا، بارودۆخ و پێشهاته‌كانى سووریا و گۆڕاكارییه‌كانى ناوچه‌كه به‌گشتى تاوتوێ كران. هه‌ر دوێنێ شه‌و دواى كۆتاییهاتنى به‌رنامه‌ى سه‌ردانه‌كه، نێچیرڤان بارزانى و شاندى یاوه‌رى گه‌ڕانه‌وه هه‌ولێر.
- دوو شەممە, 17 ئازار 2014
بەیاننامەی ئەنجومەنی وەزیران لە یادی كیمیابارانكردنی هەڵەبجەی شەهید
بیست و شه‌ش ساڵ به‌ر له ئێستا یه‌كێك له سامناكترین تاوانه‌كانى مێژوو دژ به گه‌لى كورد و ته‌واوى مرۆڤایه‌تى ئه‌نجام درا كاتێك فڕۆكه مه‌رگهێنه‌كنى به‌عس به چه‌كى كیمیایى شارى ئارامى هه‌ڵه‌بجه‌یان بۆمباران كرد و له چه‌ند خوله‌كێكى كه‌مدا زیاتر له پێنج هه‌زار مرۆڤى شه‌هید و به هه‌زارانى دیكه‌شى بریندار و ته‌واوى ژینگه‌ى هه‌ڵه‌بجه‌ى ژاراوى كرد.
له‌و یاده تاڵه‌دا سەری ڕێز و نەوازش بۆ شەهیدان دادەنوێنین و هاوخەمیی خۆمان بۆ برینداران و كەسوكاری قوربانییانی ئەو مه‌رگه‌ساته دووپات دەكەینەوە. ئەو تاوانە گەورەیە، ڕاسته به یه‌كێك لە گەورەترین تاوان لە مێژووی مرۆڤایەتیی دوای جەنگی جیهانیی دووەمدا دەژمێردرێت، به‌ڵام له هه‌مان كاتدا بووه كلیلى كردنه‌وه‌ى گرێكوێره‌ى به‌ختى كورد.
هه‌رچه‌نده ئه‌وكات كۆمەڵگای نێودەوڵەتی وەك پێویست بە هانای گەلەكەمانه‌وه نەهات و بێده‌نگییان لێ كرد، به‌ڵام دوای چەندین ساڵ لە هەوڵ و تێكۆشانی بەردەوام، كۆمەڵگای نێودەوڵەتی و ناوەندەكانی بڕیار، دانیان بە گه‌وره‌یى كاره‌ساته‌كه‌دا نا و له‌م ساڵانه‌ى دواییدا هه‌ڵمه‌تى ناساندنى كاره‌ساتى هه‌ڵه‌بجه به جینۆساید له چه‌ندین وڵاتى جیهان ده‌ستى پێكرد و به هه‌وڵ و كۆششى حكوومه‌تى هه‌رێمى كوردستان و دۆستان و دڵسۆزان به‌رده‌وامه.
ئه‌مساڵ یادى ئه‌و كاره‌ساته هاوكاته له‌گه‌ڵ بڕیارى به‌پارێزگاكردنى هه‌ڵه‌بجه، بۆیه له‌گه‌ڵ هاوخه‌مى و هاوده‌ردى و ماته‌مین بۆ یادى قوربانیان، پیرۆزباییش له خه‌ڵكى خۆڕاگرى هه‌ڵه‌بجه ده‌كه‌ین و دووپاتى ده‌كه‌ینه‌وه كه حكوومه‌تى هه‌رێمى كوردستان به ئه‌ركى خۆى ده‌زانێت هه‌مو خزمه‌تێك پێشكه‌ش به هه‌ڵه‌بجه و كه‌سوكارى قوربانیان بكات و ئه‌وه‌ى له توانایدا بێت درێغى ناكات.
نه‌مرى بۆ شه‌هیدان و هیواى چاكبوونه‌وه بۆ برینداران و دڵنه‌وایى بۆ كه‌سوكارى قوربانیان ده‌خوازین. پیرۆزبایى به‌پارێزگابوونى هه‌ڵه‌بجه له هه‌ڵه‌بجه‌ییان و ته‌واوى كوردستانیان ده‌كه‌ین.
ئه‌نجومه‌نى وه‌زیرانى هه‌رێمى كوردستان.
2014/3/16
سەرۆکی هەرێمی کوردستان بڕیاری بە پارێزگاکردنی هەڵەبجەی واژۆکرد
د.ئومێد سەباح، گوتەبێژی سەرۆكایەتی هەرێمی كوردستان رایگەیاند ئەمڕۆ سەرۆكی هەرێمی كوردستان بڕیاری بەپارێزگاكردنی هەڵەبجەی واژۆ كردووە.
د.ئومێد سەباح بە تۆڕی میدیایی رووداوی گوت "كاژێر 10ی سەرلەبەیانی هاوكات لەگەڵ ساڵیادی كارەساتی كیمیابارانكردنی هەڵەبجەی شەهید بەڕێز مەسعود بارزانی مەرسوومی فەرمانی هەرێمی بۆ بە پارێزگابوونی هەڵەبجەی شەهیدی واژۆكرد".
پێشتر بارزانی لە نووسراوێكی فەرمیدا داوای لە حكومەتی هەرێمی كوردستان كرد چاوەڕێی بەغدا نەكات و رێكارە كارگێڕییەكانی بەپارێزگابوونی هەڵەبجە دەستپێبكات.
لە نووسراوەكەی سەرۆكی هەرێمی كوردستاندا هاتبوو، "لەبەر ئەوەی بە رای كۆمەڵێك یاساناس، بابەتی بەپارێزگابوونی هەڵەبجەی شەهید دەكەوێتە بازنەی سەڵاحیاتی ئیداریی هەرێمی كوردستان و هەروەها نەبوونی ئیستیجابەی پێویست لە لایەن بەغدا بۆ بەپارێزگاكردنی هەڵەبجە، بڕیارمان دا حكوومەتی هەرێمی كوردستان بە زووترین كات دەست بە رێوشوێنە ئیدارییەكانی بەپارێزگاكردنی هەڵەبجەی شەهید بكات بۆ ئەوەی داواكاریی خەڵكی قارەمانی ئەم دەڤەرە جێبەجێ بكرێت".
رۆژی 13ی ئەم مانگەش نێچیرڤان بارزانی، سەرۆكی حكومەتی هەرێمی كوردستان، لە میانی كۆنگرەیەكی رۆژنامەنووسیدا، بڕیاری بە پارێزگاكردنی هەڵەبجەی واژۆكرد‌و رەوانەی سەرۆكایەتی هەرێمی كوردستانی كردەوە.
یەک شەممە, 16 ئازار 2014
چوار ده‌روازه‌ى دیكه‌ى سنوورى له نێوان هه‌رێمى كوردستان و توركیادا ده‌كرێنه‌وه
سەرلەبەیانیی ئەمڕۆ شەممە 15ی ئازاری 2014 نێچیرڤان بارزانی سەرۆك وەزیرانی هەرێمی كوردستان و شاندێكی یاوەری كە لە وەزیری ئاوەدانكردنەوە و سەرۆكی دەستەی وەبەرهێنان بە وەكالەت و هەردوو پارێزگاری هەولێر و سلێمانی و گوتەبێژی فەرمیی حكوومەت پێكهاتبوون گه‌یشته توركیا و لە فڕۆكەخانەی وان لە لایەن ئەحمەد داوود ئۆغڵو وەزیری دەرەوەی توركیا و پارێزگاری وانەوە پێشوازی لێ كرا.
پاشان لە خوانێكی بەیانیدا كە لە لایەن وەزیری دەرەوەی توركیاوە بۆ سەرۆك وەزیرانی هەرێمی كوردستان و شاندی یاوەری ڕێكخرا بوو، نێچیرڤان بارزانی تیشكی خستە سەر پێگەی دیار و به‌رچاوى وان لە مێژووی كورد دا و ڕایگەیاند هەمیشە حەزی كردووە سەردانی وان بكات.
هەروەها ڕوونی كردەوە له‌به‌ر ناوچه‌ى موكسێ، شوێنى شاعیرى مه‌زنى كورد فه‌قیێ ته‌یران، شارى وان له بوارى ئه‌دبیات و كولتورى كوردیدا گرنگى و بایەخی تایبەتی خۆی هەیه. خۆشحاڵیی خۆیشی بەو گۆڕانكاریانە نیشان دا كە له توركیا هاتوونه‌ته ئاراوه و هیوای خواست پرۆسەی ئاشتی لە توركیا بەردەوام بێت تا ئاشتیی بەردەوام بۆ ناوچەكە لەگەڵ خۆیدا بهێنێت. ئاماژەی بە دوایین سەردانی وەزیری دەرەوەی توركیا بۆ هەرێمی كوردستانیش كرد كە لە كۆڕبەندی سلێمانیدا بە كوردی قسەی كرد و بووە مایەی خۆشحاڵیی هەمووان.
نێچیرڤان بارزانى هەروەها ڕایگەیاند لەم سه‌ردانه‌دا هەردوو پارێزگاری هەولێر و سلێمانیش یاوه‌رى ده‌كه‌ن و ئاماژه‌ى به‌وه دا كه بڕیار بوو پارێزگاری دهۆكیش لەگەڵیان بێت، بەڵام بەهۆی نەخۆشكەوتنی، نەیتوانیوه.
لە كۆبوونەوەكەدا گفتوگۆیەكی تێروتەسەل لەسەر فراوانكردنی دەروازەی سنووریی ئیبراهیم خەلیل و زیادكردنى هێڵى سێیه‌م له‌و ده‌روازه‌یه و كردنەوەی چوار دەروازەی دیكەی سنووری لە نێوان هەرێمی كوردستان و توركیا كرا و بڕیاری لەسەر درا، بۆ ئەم مەبەستەش هەردوو پارێزگاری دهۆك و هەولێر لەگەڵ پارێزگارەكانی شرناخ و هەكاری كه پێكه‌وه سنوورى هاوبه‌شیان هه‌یه، له‌گه‌ڵ لایەنە پەیوەندارەكانی هەردوولا لەم مانگەدا كۆ دەبنەوە بۆ ئەوەی پڕۆژەكە بخەنە ڕێ.
دواتر لە كۆنگرەیەكی ڕۆژنامەوانیدا سەرۆك وەزیرانى هه‌رێمى كوردستان و داوود ئۆغڵو ناوەڕۆكی كۆبوونەوەكەیان بۆ ڕۆژنامەنووسان ڕوون كردەوە. نێچیرڤان بارزانی دووپاتی كردەوە كه په‌یوه‌ندییه‌كانى توركیا و هه‌رێمى كوردستان پێشكه‌وتنێكى زۆریان به خۆیانه‌وه بینیوه و ڕوونى كرده‌وه ئەو گۆڕانكاڕیانەی لەم ساڵانەی دواییدا لە توركیا ڕوویان داوە گۆڕانكاریی گرنگن و ده‌بێ كه‌م نه‌بینرێن، هیوایشی خواست كێشەكان بە شێوەیەكی ئاشتیانە چارەسەر بكرێن و پرۆسەی ئاشتی بگاتە ئەنجام تا ئاشتی هه‌میشه‌یى لەگەڵ خۆیدا بهێنێت.
داوود ئۆغڵو ئاماژه‌ى به‌و گۆڕانكاریانه كرد كه له كاتى سه‌ردانى شێخ ئه‌حمه‌دى بارزانییه‌وه له ساڵى 1932 بۆ وان و تا سه‌ردانى ئه‌م دواییه‌ى مه‌سعوود بارزانى سه‌رۆكى هه‌رێمى كوردستان بۆ دیاربه‌كر و ئه‌م سه‌ردانه‌ى ئه‌مڕۆى نێچیرڤان بارزانى بۆ وان له توركیا ڕوویان داوه و جەختی لەسەر گرنگیی پەیوەندیی ئابووری و بازرگانیی نێوان توركیا و هەرێمی كوردستان كردەوە و گوتی: كردنەوەی دەروازە سنوورییه‌كان لە نێوان هەردوولادا هه‌م له ڕووى بازرگانى و ئابوورى و هه‌م له ڕووى كۆمه‌ڵایه‌تیشه‌وه بە سوودی هەردوو لایەنی توركیا و هەرێمی كوردستان و عیراق دەشكێتەوە.
دواتر لە بەرنامەیەكی ڕاستەوخۆی كەناڵەكانی TRTدا نێچیرڤان بارزانی و داوود ئۆغڵو تیشكیان خستە سەر ناوەڕۆكی دیدار و كۆبوونەوەكانی ئەمڕۆیان. نێچیرڤان بارزانی لەبارەی كێشەكانی نێوان هەولێر و بەغدا و پرسی نەوت و غاز دووپاتی كردەوە: سیاسەتی نەوتیی هەرێمی كوردستان لە سەر بنەمای دەستووری عیراق بونیاد نراوە و هەرێمی كوردستان مافی دەستووریی خۆی پەیڕەو دەكات. هەروەها جەختی لەسەر ئەوەش كردەوە كە ئەوەی بەغدا دەیەوێت، كۆنتڕۆڵكردنی پرسی نەوتە كە لە لایەن هەرێمی كوردستانەوە قابیلی قبووڵ نیە و هەرێمی كوردستان بۆ دواوە ناگەڕێتەوە. هەروەها گوتی: دوایین بڕیاری سەرۆك وەزیرانی عیراقی نووری مالیكی كە مافی بە خۆی داوە مووچەی كارمەندانی هەرێمی كوردستان ببڕێت، ڕاستیی مەترسییه‌كانی هەرێمی كوردستانی دەرخست، بۆیه هه‌رێمى كوردستان قبووڵى ناكات دۆسیاى نەوتی هەرێمی كوردستان لە دەرەوەی كۆنترۆڵی خۆی بێت.
بەر لە ڕێكەوتنیشی بۆ ئەنقەرە، نێچیرڤان بارزانی بە یاوەریی وەزیری دەرەوەی توركیا گەشتێكی بە نێو ناوەندی شاری واندا كرد و لە یەكێك لە كافێیەكانی شارەكەدا قاوەیەكیان خواردەوە، دواتر بەرەو ئەنقەرە بەڕێ كەوت.
یەک شەممە, 16 ئازار 2014
فەلاح مستەفا: پێشوازی لە كردنەوەی نووسینگەی مرۆیی كۆمسیاری یەكێتی ئەوروپا لە هەرێم دەكەین
بەمەبەستی لە نزیكەوە ئاگاداربوون لە رەوشی سیاسی هەرێم و بارودۆخی ئاوارەكانی سوریاو خۆئامادەكردن بۆ كردنەوەی نووسینگەی كۆمسیاری یەكێتی ئەوروپا لە هەرێمی كوردستان، ئەمڕۆ شەممە خاتوو یانا هایبۆسكۆڤا باڵیۆزی یەكێتی ئەوروپا لە عیراق، سەردانی فەرمانگەی پەیوەندیەكانی دەرەوەی حكومەتی كردو لەلایەن فەلاح مستەفا بەرپرسی پەیوەندیەكانی دەرەوەی حكومەت پێشوازی لێكرا.
سەرەتا خاتوو یانا هایبۆسكۆڤا خۆشحاڵی خۆی بۆ ئەم دیدارە نیشانداو تیشكی خستە سەر سەردانی ئەم دواییەی خاتوو كریستالینا جۆرجیێڤا كۆمیساری باڵای یەكێتی ئەورووپا بۆ هاریكاریی نێودەوڵەتی و هاوكاریی مرۆیی و بەدەنگەوەچوونی قەیرانەكان بۆ هەرێمی كوردستان و بەسەردانێكی سەركەوتووی وەسف كرد.
بەڕێزیان باسی لە بڕیاری یەكێتی ئەوروپا كرد بۆ كردنەوەی نووسینگەی مرۆیی كۆمسیاری یەكێتی ئەوروپا لە هەرێمی كوردستان ( ECHO) كە بڕیارە لە داهاتوویەكی نزیك دەستبەكاربن بەمەبەستی یارمەتیدانی ئاوارەكانی سوریا لە هەرێم و ئاوارەكانی ناوخۆ.
لەلایەن خۆیەوە، بەرپرسی پەیوەندیەكانی دەرەوەی حكومەت پوختەیەكی سەبارەت بە رەوشی ئەمڕۆی هەرێمی كوردستان و عیراق و دوایین پێشهاتەكان پێشكەش كرد. هەروا گووتی وەك حكومەتی هەرێم بە گەرمی پێشوازی لەم هەنگاوەی یەكێتی ئەوروپا دەكەین بۆ كردنەوەی نووسینگەی مرۆیی كۆمسیاری یەكێتی ئەوروپا لە هەرێمی كوردستان و وەك فەرمانگەی پەیوەندیەكانی دەرەوەی حكومەت ئامادەی هەر هاوكاری و هەماهەنگیەكین بۆ سەرخستنی كارە مرۆییەكانتان لە هەرێمی كوردستان.
قەیرانی سوریا و كێشەی پەنابەران و پەیوەندیەكانی هەولێرو بەغداو هەڵبژاردنەكانی عیراق تەوەرەیەكی تری كۆبوونەكە بوو. لەم بارەیەوە، فەلاح مستەفا بەرپرسی پەیوەندیەكانی دەرەوەی حكومەت هەڵوێستی سەركردایەتی سیاسی كوردستانی لەمەڕ چارەسەركردنی پرسەكان دووپاتكردەوە، هاوكات پێشنیاری سەردان و كۆبوونەوەی فراوانی كرد لە نێوان باڵیۆزی وڵاتانی یەكێتی ئەوروپا لەگەڵ سەركردایەتی هەرێمی كوردستان بۆ ئاڵوگۆڕی بیروڕا سەبارەت بە دوایین گۆڕانكاری و پێشهاتە سیاسیەكان و یەكخستنی هەوڵەكان بۆ یارمەتیدانی ئاوارەكان.
هەروا هیوای خواست نووسینگەی یەكێتی ئەوروپا یارمەتی كۆمسیۆنی باڵای سەربەخۆی هەڵبژاردنەكان لە عیراق بدات بۆ سەرخستنی پرۆسەی هەڵبژاردنی عیراق كە بڕیار وایە لە مانگی نیسانی ئەمساڵ بەڕێوە بچێت.
جێگەی باسە هەفتەی رابردوو خاتوو كریستالینا جۆرجیێڤا كۆمیساری باڵای یەكێتی ئەورووپا بۆ هاریكاریی نێودەوڵەتی و هاوكاریی مرۆیی و بەدەنگەوەچوونی قەیرانەكان سەردانی هەرێمی كوردستانی كرد و لەگەڵ بەڕێز نێچیرڤان بارزانی سەرۆك وەزیرانی هەرێمی كوردستان و لایەنە پەیوەنددارەكان كۆبووەوەو سەردانی چەند كەمپێكی پەنابەرانی سوریای لە شارەكانی هەولێرو دهۆك كرد.
نێچیرڤان بارزانى هه‌ماهه‌نگى له‌گه‌ڵ كۆمیته‌ى خاچى سوورى نێوده‌وڵه‌تى تاوتوێ ده‌كات
دواى نیوه‌ڕۆى ئه‌مڕۆ پێنجشه‌ممه 13ى ئازارى 2014، نێچیرڤان بارزانى سه‌رۆك وه‌زیرانى هه‌رێمى كوردستان پیشوازى له پیته‌ر ماوره‌ر سه‌رۆكى كۆمیته‌ى خاچى سوورى نێوده‌وڵه‌تى ICRC كرد.
له دیدارێكدا سه‌رۆكى كۆمیته‌ى خاچى سوورى نێوده‌وڵه‌تى خۆشحاڵیى خۆى به سه‌ردانى هه‌رێمى كوردستان و ئه‌و په‌یوه‌ندییه ده‌ربڕى كه له سه‌ره‌تاى نه‌وه‌ده‌كانى سه‌ده‌ى ڕابردووه‌وه له‌گه‌ڵ هه‌رێمى كوردستان هه‌یانه و خواستى ڕێكخراوه‌كه‌یانى بۆ پته‌وكردنى په‌یوه‌ندییه‌كانى له‌گه‌ڵ هه‌رێمى كوردستان دووپات كرده‌وه. هه‌روه‌ها ستایشى هه‌رێمى كوردستانى كرد كه هه‌میشه حكوومه‌ت و به‌رپرسان و لایه‌نه په‌یوه‌نداره‌كان به جددى پێشوازییان له پێشنیاره‌كانى ئه‌م ڕێكخراوه نێوده‌وڵه‌تییه كردووه بۆ پێداچوونه‌وه و چاره‌سه‌ركردنى كێشه و كه‌موكورتییه‌كان.
سه‌رۆكى كۆمیته‌ى خاچى سوورى نێوده‌وڵه‌تى ئاماده‌ییى ڕێكخراوه‌كه‌یانى بۆ هاوكاریكردنى حكوومه‌تى هه‌رێمى كوردستان بۆ دابینكردنى خزمه‌تگوزارییه ته‌ندروستییه‌كان له گرتووخانه‌كانى هه‌رێم و زیادكرنى مه‌شق و ڕاهێنان ده‌ربڕى، هیوایشى خواست كه ئه‌و شێوه هه‌ماهه‌نگى و هاریكارییه‌ى له‌گه‌ڵ هه‌رێمى كوردستان هه‌یانه، ببێته نموونه‌یه‌كى باش له‌گه‌ڵ به‌شه‌كانى دیكه‌ى عیراقیش. هه‌روه‌ها خۆشحاڵیى خۆى به پێشكه‌وتنه جیاكانى هه‌رێمى كوردستان له ڕووى كارگێڕى و پێشوازیكردن له بیروبۆچوون و ڕه‌خنه و گله‌ییه‌كان و ئاماده‌باشیى حكوومه‌ت بۆ گوێگرتن له ڕا و پێشنیاره‌كانى كۆمیته‌ى خاچى سوور و چاككردنه‌وه‌ى هه‌ڵه و كه‌موكورتییه‌كان، نیشان دا.
لاى خۆیه‌وه نێچیرڤان بارزانى سوپاسى كردن بۆ پێشكه‌شكردنى ئه‌و تێبینى و پێشنیارانه‌ى كه بووه‌ته مایه‌ى پێداچوونه‌وه به كاره‌كاندا و خۆشحاڵیى حكوومه‌تى هه‌رێمى كوردستانى به پته‌وبوونى په‌یوه‌ندییه‌كانى له‌گه‌ڵ كۆمیته‌ى خاچى سوورى نێوده‌وڵه‌تى نیشان دا و ڕوونى كرده‌وه حكوومه‌تى هه‌رێم هه‌نگاوى ناوه بۆ باشتركردنى بارودۆخ له هه‌موو بواره‌كاندا. هه‌روه‌ها جه‌ختى له‌سه‌ر ئه‌وه كرده‌وه كه لایه‌نه په‌یوه‌نداره‌كانى حكوومه‌تى هه‌رێمى كوردستان پێویستیان به ڕاوێژى به‌رده‌وام له‌گه‌ڵ ئه‌م ڕێكخراوه نێوده‌وڵه‌تییه هه‌یه بۆ باشتركردنى هه‌موو بواره‌كان و له‌پێناو زیاتر چه‌سپاندنى بنه‌ماكانى دیموكراسى و مافه‌كانى مرۆڤ له هه‌رێمى كوردسان.
پێنج شەممە, 13 ئازار 2014
More...
نێچیرڤان بارزانی هه‌ڵه‌بجه‌ی وه‌ك چواره‌مین پارێزگای هه‌رێم ڕاگه‌یاند
نێچیرڤان بارزانى داواى هاوكاریى ئه‌ورووپا بۆ په‌نابه‌ران ده‌كات
بەرپرسی پەیوەندیەكانی دەرەوە پێشوازی لە كونسوڵی پۆڵۆنیا لە هەرێمی كوردستان كرد
هەولێر.. هەشتەمین فیستیڤاڵی ئازادی و نەورۆز دەستیپێكرد
دوایین هەواڵەکان
- نوێنەری حکومەتی هەرێم لە ئێران: سەردانەکەی پزیشکیان ئاماژەیە بۆ گرنگیدانی ئێران بە هەرێمی کوردستان
- هه‌رێمى كوردستان و ئێران جهخت له بره‌ودان به پهيوهندييهكانيان دهكهنهوه
- سهرۆک نێچیرڤان بارزانی: سەردانی سەرۆک کۆماری ئێران مێژوویی بوو
- نازم دەباغ له وتووێژ له‌گه‌ڵ ئاژانسی ئیرنا: مەسعوود پزشکیان سەردانی هەولێر دەکات
- نازم دەباغ: کاتی سەردانی پزیشکیان بۆ عێراق دیار نییە
- «سەلام رشدی» له‌گه‌ڵ شاندی یهکێتی هاورده و ناردنکارانی لقی هه‌ولێر کۆبۆوه
- سه‌رۆك نێچيرڤان بارزانى: ههميشه پشتيوانى و بهرگرى له مافه‌كانى ئێزدييان دهكهين
- سهرۆک نێچیرڤان بارزانی له‌گه‌ڵ باڵیۆزی یهکێتیی ئه‌ورووپا کۆبووهوه
- سه‌رۆك نێچيرڤان بارزانى له‌گه‌ڵ باڵيۆزى نهمسا كۆبووهوه
- سه‌رۆك نێچيرڤان بارزانى سوپاسى جهنهرال ڤاول ده‌كات