ڕۆژی چوارشەممە 6ـی 4ـی 2016 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە ئێنزۆ ئامێندۆلا جێگری وەزیری دەرەوەی ئیتالیا و شاندێكی یاوەری كرد كە پێكهاتبوو لە ماركۆ كارلینۆس باڵیۆزی ئیتالیا لە عێراق و خاتوو ئەلیساندرا دیپیبۆ كونسوڵی ئیتالیا لە هەولێر.
لە دیدارەكەدا جێگری وەزیری دەرەوەی ئیتالیا ستاییشی ڕۆڵی سەرۆك بارزانی و قارەمانێتی هێزی پێشمەرگەی كرد لە شكاندنی تیرۆریستان و ئەوەی خستەڕوو كە وڵاتەكەی خۆی بە دۆستی گەلی كوردستان دەزانێ و ڕێزی هەیە بۆ خەبات و قوربانیدانی گەلی كوردستان و هەروەها ویستی گەلی كوردستان بۆ دابینكردنی ئاییندەییەكی باشتر.
جێگری وەزیری دەرەوەی ئیتالیا ئەوەیشی بە سەرۆك بارزانی ڕاگەیاند كە هاتووە پابەندبوونی وڵاتەكەی دووپات بكاتەوە بۆ پشتیوانی لە هەرێمی كوردستان لە چوارچێوەی هاوپەیمانێتی نێودەوڵەتی لە شەڕی دژی تیرۆریستانی داعش.
لەبەرانبەردا سەرۆك بارزانی سوپاسی گەل و حكوومەتی ئیتالیای كرد و سەردانی سەرۆك وەزیران و بەرپرسە باڵاكانی ئیتالیای بۆ هەرێمی كوردستان لە سەرەتاكانی شەڕی داعش بە بەڵگەی دۆستایەتی گەلی كوردستان و گەلی ئیتالیا لە قەڵەم دا و پێشوازیشی لە پەرەپێدانی پەیوەندییەكانی هەردوولا كرد لە بوارە جیاجیاكاندا. لە بەشێكی دیكەی كۆبوونەوەكەدا سەرۆك بارزانی باسی لە شەڕی تیرۆر و سەركەوتنەكانی هێزی پێشمەرگە كرد و ئەوەی دووپاتكردەوە كە تیرۆر هەڕەشەیەكی جیهانییە بۆ سەر هەموو لایەك و ڕووبەڕووبوونەوەی هەوڵێكی نیازپاك و جددی هەموو وڵاتانی پێویستە و نابێ هەندێك لا تیرۆر وەك كارت بەكاری بهێنن چونكە لە ئەنجامدا هەر خۆیان لە ئاگری تیرۆردا دەسووتێن.
هەر لەم دیدارەدا باس لە پەیوەندییەكانی نێوان هەرێم و بەغدا كرا و شاندی میوان سەرۆك بارزانیی لە كار و چالاكیی تیمەكانی ئیتالیا لە كوردستان و سەدی موسڵ ئاگادار كردەوە.
ڕۆژی دووشەممە 4ـی 1ـی 2016 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە خاتوو ئەلێساندرا دی پیپۆ كونسوڵی نوێی ئیتالیا لە هەولێر كرد.
لە دیدارەكەدا كە كارمێلۆ فیكاڕا كۆنسوڵی پێشووی ئیتالیا لە هەولێر ئامادە بوو، كونسوڵی نوێی ئیتالیا كە بە مەبەستی خۆناساندن سەردانی سەرۆك بارزانی كردبوو خۆشحاڵیی خۆی بە دیداری لەگەڵ سەرۆك بارزانی و دەستپێكردنی ئەرك و كاری لە هەرێمی كوردستان نیشان دا. باسیشی لەوە كرد كە كوردستان بۆ گەل و حكوومەتی ئیتالیا بایەخێكی تایبەتی هەیە و هەموو هەوڵێك دەدا بۆ ئەوەی ئاستی پەیوەندییەكانی نێوان وڵاتەكەی و هەرێمی كوردستان باشتر بكات و بەرەو پێشەوەی ببات. هەر لەم دیدارەدا كونسوڵی پێشووی ئیتالیا لە هەولێر ڕایگەیاند كە گەل و حكوومەتی ئیتالیا بە تەواوی ئاگاداری هەوڵەكانی سەرۆك بارزانی و خەڵكی كوردستانن بۆ تێپەڕاندنی تەحەدیات و هەڕەشەكان و ستایشی كولتووری پێكەوەژیان و ژیانی دیموكراسی و پاراستنی پێكهاتەكان و یارمەتیدانی ئاوارە و لێقەوماوان دەكەن. هەروەها باسی لە ماوەی كاركردن و ئەزموونی خۆی كرد لە هەرێمی كوردستان و ناسینی سەرۆك بارزانی بە شەرەفێكی گەورە لە قەڵەم دا.
لەبەرانبەردا سەرۆك بارزانی هیوای سەركەوتنی بۆ كونسوڵی نوێ و پێشووی ئیتالیا خواست و سوپاسی گەل و حكوومەتی ئیتالیای كرد كە لە ڕۆژانی تەنگانەدا پاڵپشتی گەلی كوردستان بوون و سەردانی بەرپرسە باڵاكانی ئیتالیا هەر لە دەستپێكی شەڕی تیرۆریستان هەتا ئێستا ئاماژەیەكی ڕوونە بۆ دۆستایەتی نێوان هەر دوو گەلی كوردستان و ئیتالیا و گەلی كوردستان هەڵوێستی وڵاتی ئیتالیا لە پشتیوانیكردنی پێشمەرگە و كوردستان لەبیر ناكات. هەروەها هیوای خواست كە پەیوەندییەكانی نێوان هەرێمی كوردستان و ئیتالیا لە هەموو بوارەكاندا بەرەوپێشڤەچوونی زیاتر بەخۆیەوە ببینێت.
ڕۆژی چوارشەممە 15ـی 7ـی 2015 بەڕێز مەسعود بارزانی سەرۆكی هەرێمی كوردستان پێشوازی لە خاتوو ڕۆبێرتا پینۆتی وەزیری بەرگریی ئیتالیا و شاندێكی یاوەری كرد كە پێكهاتبوون لە باڵیۆزی ئیتالیا لە عێراق و كۆنسوڵی ئیتالیا لە هەولێر و ژمارەیەك ئەفسەر و ڕاوێژكاری وەزارەتی بەرگریی ئیتالیا.
لە دیدارەكەدا وەزیری بەرگریی ئیتالیا سوپاسی سەرۆك بارزانی كرد بۆ ڕەخساندنی دیدارەكە و لە دەستپێكی وتەكانیدا بە پێزانینێكی زۆرەوە باسی ڕۆڵی پێشمەرگەی كرد كە لە هێڵی یەكەمی شەڕكردنە لەدژی تیرۆریستانی داعش و ڕەزامەندیی خۆیشی نیشاندا لەو ئاستە بەرزەی كە هێزی پێشمەرگە لە شەڕكردن و مەشق و ڕاهێناندا هەیانە و، ئەوەی خستەڕوو كە بۆ ڕێگەگرتن لە داعش پێویست بوو وڵاتەكەی لە زووترین كاتدا یارمەتیی كوردستان بدات چونكە یارمەتیدانی كوردستان یارمەتیدانی ئیتالیایە و ئەو شەڕەیش شەڕێكە لەپێناو پاراستنی شارستانییەت و هەموو جیهان. وەزیری بەرگریی ئیتالیا جەختی لە دۆستایەتیی نێوان گەلی ئیتالیا و گەلی كوردستان كردەوە و ڕایگەیاند كە وڵاتەكەی بەردەوام دەبێت لە پێشكەشكردنی هاوكاریی سەربازی بۆ كوردستان.
لەبەرانبەردا سەرۆك بارزانی بە گەرمی بەخێرهاتنی شاندی میوانی كرد و بەناوی خۆی و گەلی كوردستان سوپاسی گەل و حكوومەتی ئیتالیای كرد كە یارمەتیی كوردستانیان داوە لە شەڕی تیرۆریستان و هاتنی سەرۆك وەزیران و كارەبەدەستە باڵاكانی ئیتالیای بۆ كوردستان بە ئاماژەیەكی ڕوون بۆ پەیوەندیی مێژوویی و دۆستانەی نێوان هەرێمی كوردستان و ئیتالیا لە قەڵەم دا. سەرۆكی هەرێمی كوردستان لە درێژەی قسەكانیدا ڕۆشنایی خستەسەر مەترسییەكانی تیرۆر بۆ سەر ئاساییشی جیهان و جەختی لەوە كردەوە كە ڕووبەڕووبوونەوەی تیرۆر تەنیا شەڕی سەربازی و شەڕی لایەنێك نییە، شەڕی هەموو جیهانی ئازاد و دیموكراتخوازە لەدژی تاریكی و شەڕانگێزی. ئەم شەڕە پێویستی بە هەوڵی هەموو لایەك هەیە و هاوكات لەگەڵ شەڕی سەربازی پێویستە لەڕووی فكری و ئابووری و سیاسیشەوە شەڕی تیرۆریستان بكرێت و جوهدی وڵاتانی عەرەبی و ئیسلامیی بۆ ئەو مەبەستە بە پێویست زانی. هەروەها ئاماژەیشی بەوەدا كە هەندێ وڵات تووشی هەڵە بوون كە بیریان لەوە كردەوە تیرۆر وەك كارت بۆ ململانێكان بەكار بهێنن چونكە تیرۆر هەڕەشەیەكی گەورەیە و دواجار زیانی بۆ خۆیان و بۆ هەموو لایەك دەبێت. سەرۆك بارزانی باسی دەركەوتنی تیرۆریستانی لە عێراق و پەلاماردانیان بۆ سەر كوردستان كرد و هێمای بەوەدا كە پێشمەرگە توانی تیرۆریستانی داعش لە سنوورەكانی كوردستان تێكبشكێنێت، ئێستا ورەی پێشمەرگە زۆر بەرزە و گەلی كوردستانیش بە هیچ شێوەیەك تەحەمولی هزری داعش و خەڵكی وەك داعش ناكات و لە كوردستاندا جێگەیان نییە.
تاوتوێكردنی هەڕەشەكانی داعش لە ناوچەكە و سووریا و لیبیا و چۆنییەتی ڕووبەڕووبوونەوەیان و هەروەها ڕێككەوتنی ئەتۆمی ئێران و وڵاتانی پێنج كۆ یەك تەوەرێكی دیكەی ئەو دانیشتنە بوو و، سەبارەت بە بوونی تیرۆریستان لە سووریا سەرۆك بارزانی ئەوەی ڕاگەیاند كە پێویستە داعش لە سووریایش تێكبشكێندرێت و شەڕی تیرۆر لە سووریا و عێراق بابەتێكە بە یەكەوە بەستراوەتەوە. پەیوەست بە ڕێككەوتنی ئەتۆمیی ئێران و وڵاتانی پێنج كۆ یەك سەرۆك بارزانی هیوای ئەوەی خواست كە ئەم ڕێككەوتنە ببێتە مایەی پتەوتركردنی سەقامگیری و ئاشتی لە ناوچەكە و ڕێگەیش بۆ لەناوبردنی تیرۆر خۆش بكات.
ڕۆژی دووشەممە 6ـی 7ـی 2015 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە ماركۆ كارنێلۆس باڵیۆزی ئیتالیا لە عێراقی فیدڕاڵ كرد.
لە دیدارەكەدا باڵیۆزی ئیتالیا لە عێراقی فیدڕاڵ پێزانینی هەبوو بۆ ئەو پێشكەوتن و بووژانەوەیەی كە لە هەرێمی كوردستاندا هەیە و سوپاسی گەلی كوردستانیشی كرد كە ژمارەیەكی یەكجار زۆری پەنابەری لە خۆ گرتووە. هەروەها جەختیشی لە پەرەپێدانی پەیوەندییەكانی نێوان ئیتالیا و هەرێمی كوردستان لە بواری سیاسی و ئابووری و شوێنەوار كردەوە. باڵیۆزی ئیتالیا لە عێراقی فیدڕاڵ سەرۆك بارزانیشی لە بڕیاری وڵاتەكەی ئاگادار كردەوە كە لە ماوەیەكی نزیكدا ئاستی نوێنەرایەتیی ئیتالیا بۆ كونسوڵخانەی گشتی بەرز دەكاتەوە. هەروەها پابەندبوونی وڵاتەكەیشی دووپاتكردەوە لە بەردەوامبوونی هاریكارییە سەربازییەكان و ڕاهێنانی هێزی پێشمەرگەی كوردستان و هاوكارییە مرۆییەكان بۆ هەرێمی كوردستان.
لەبەرانبەردا سەرۆك بارزانی هیوای سەركەوتنی بۆ باڵیۆزی ئیتالیا خواست لە ئەنجامدانی ئەرك و كارەكانی و هەروەها سوپاسی حكوومەت و گەلی ئیتالیای كرد كە هاوكارییان پێشكەشی هێزی پێشمەرگە كردووە و ئامادەیی تەواوی هەرێمی كوردستانیشی ڕاگەیاند بۆ فراوانتركردنی پەیوەندییەكان و كاری هاوبەشی هەردوولا لە بواری ئابووری و سیاسی و ئاسەواردا. هەروەها سەرۆك بارزانی دەستخۆشی لە حكوومەتی ئیتالیا كرد بۆ بڕیاری كردنەوەی كونسوڵخانەی گشتی لە شاری هەولێر.
باسكردنی بارودۆخی سیاسی و ئەمنیی عێراق و چۆنییەتی ڕووبەڕووبوونەوەی تیرۆریستان و ژیان و گوزەرانی ئاوارەكان تەوەرێكی دیكەی ئەم كۆبوونەوەیە بوو.
له دووه‌مین ڕۆژی سه‌ردانه فه‌رمییه‌كه‌یدا بۆ ئیتالیا، نیوه‌ڕۆی ئه‌مڕۆ سێشه‌ممه ٣-٣-٢٠١٥، به‌ڕێز نێچیرڤان بارزانی سه‌رۆك وه‌زیرانی هه‌رێمی كوردستان و شاندی یاوه‌ری له ڕۆما له لایه‌ن به‌ڕێز ’’پاوڵۆ جێنتیلۆنی’’ی وه‌زیری ده‌ره‌وه‌ی ئیتالیاوه پێشوازییان لێكرا.
له كۆبوونه‌وه‌یه‌كدا به‌ڕێز وه‌زیری ده‌ره‌وه‌ی ئیتالیا خۆشحاڵیی خۆی بۆ سه‌ردانی به‌ڕێز سه‌رۆك وه‌زیرانی هه‌رێمی كوردستان و شاندی یاوه‌ری بۆ ئیتالیا ده‌ربڕی و دووپاتی كرده‌وه كه ئه‌وان به‌رده‌وام ئاگایان له بارودۆخی ناوچه‌كه و هه‌رێمی كوردستان و عیراقه، به‌ڵام ئه‌م سه‌ردانه ده‌رفه‌تێكه بۆ ئه‌وه‌ی له شاندی هه‌رێمی كوردستان خۆیه‌وه، دوایین هه‌ڵسه‌نگاندنی بارودۆخه‌كه بزانن.
بره‌ودان به په‌یوه‌ندییه‌كانی هه‌رێمی كوردستان و ئیتالیا، پێشهاته‌كانی شه‌ڕی دژی تیرۆر و سه‌ركه‌وتن و پێشڕه‌وییه به‌رده‌وامه‌كانی پێشمه‌رگه، دۆخی مووسڵ و هه‌وڵ و پلانه‌كان بۆ ڕزگاركردنی ئه‌و شاره و گرنگیی به‌شداریی هه‌مه‌لایه‌نه و هه‌ماهه‌نگی له‌گه‌ڵ هاوپه‌یمانان بۆ ڕزگاركردنی، ڕه‌وشی ئاواره و په‌نابه‌ران له هه‌رێمی كوردستان، په‌یوه‌ندییه‌كانی هه‌ولێر و به‌غدا و دوایین ڕێككه‌وتنی نێوان هه‌ردوولا، گرنگیی به‌شداری و هاوبه‌شیی هه‌موو پێكهاته‌كان له پرۆسه‌ی سیاسیی عیراقدا و بارودۆخی سووریا و كاریگه‌ریی پێشهاته‌كانی ئه‌و وڵاته له ناوچه‌كه به‌گشتی، له كۆبوونه‌وه‌كه‌دا تاوتوێ كران.
به‌ڕێز وه‌زیری ده‌ره‌وه‌ی ئیتالیا پابه‌ندیی وڵاته‌كه‌ی به هاوكاری و پشتگیریی سه‌ربازی و مرۆیی و به‌ره‌وپێشبردنی په‌یوه‌ندییه‌كانی له‌گه‌ڵ هه‌رێمی كوردستان دووپات كرده‌وه و له‌مباره‌یه‌وه بڕیاری به‌رزكردنه‌وه‌ی نوێنه‌رایه‌تیی ئیتالیای له هه‌رێمی كوردستان بۆ كونسلخانه‌ی گشتی به نیشانه‌ی بایه‌خدانی ڕۆما به په‌یوه‌ندییه‌كانی له‌گه‌ڵ هه‌ولێر له قه‌ڵه‌م دا و جه‌ختی له‌وه كرده‌وه كه ئیتالیا به بایه‌خه‌وه ده‌ڕوانێته په‌یوه‌ندییه‌كانی له‌گه‌ڵ هه‌رێمی كوردستان و به هه‌موو به‌ڵێنه‌كانییه‌وه بۆ هاوكاری و پشتگیریی هه‌رێمی كوردستان، پابه‌نده.
ده‌رباره‌ی هاوكارییه مرۆیی و سه‌ربازییه‌كانیش، ڕایگه‌یاند: ئیتالیا له پشتگیریی سه‌ربازی به ناردنی چه‌ك و قه‌قه‌مه‌نی و ڕاهێنه‌رانی سه‌ربازی بۆ هه‌رێمی كوردستان به‌رده‌وام ده‌بێت و ئه‌وه‌ی تا ئێستا له ڕووی مرۆیی و سه‌ربازییه‌وه پێشكه‌ش به هه‌رێمی كوردستان كراوه، دوایین ئاستی هاوكارییه‌كان نه‌بووه. هه‌روه‌ها خۆشحاڵیی خۆی به ڕێككه‌وتنی نێوان هه‌ولێر و به‌غدا ده‌ربڕی و پشتگیریی وڵاته‌كه‌ی بۆ باشبوونی په‌یوه‌ندییه‌كانی هه‌ردوو حكوومه‌تی هه‌رێمی كوردستان و حكوومه‌تی فیدرالی عیراق دووپات كرده‌وه.
لای خۆیه‌وه به‌ڕێز نێچیرڤان بارزانی سه‌رۆك وه‌زیرانی هه‌رێمی كوردستان سوپاسی هه‌ڵوێست و پشتگیرییه‌كانی ئیتالیای كرد و ده‌ستخۆشی له بڕیاری به‌رزكردنه‌وه‌ی ئاستی نوێنه‌رایه‌تیی ئیتالیا له هه‌رێمی كوردستان بۆ كونسلخانه‌ی گشتی كرد و هه‌موو پشتگیری و هاوكارییه‌كی حكوومه‌تی هه‌رێمی بۆ سه‌ركه‌وتنی كاری كونسلخانه‌كه‌یان، نیشان دا. ده‌رباره‌ی په‌یوه‌نیش له‌گه‌ڵ به‌غدا، ته‌واوی پابه‌ندیی حكوومه‌تی هه‌رێمی كوردستانی به دوایین ڕێككه‌وتنی له‌گه‌ڵ حكوومه‌تی فیدرال و یاسای بودجه‌ی ساڵی ٢٠١٥-ه‌وه ده‌ربڕی و ئاماده‌ییی حكوومه‌تی هه‌رێمی كوردستانی بۆ چاره‌سه‌ركردنی هه‌موو كێشه‌كان له ڕێگه‌ی دیالۆگ و لێكگه‌یشتنه‌وه، دووپات كرده‌وه.
به‌ڕێز سه‌رۆك وه‌زیران هه‌روه‌ها تیشكی خسته سه‌ر ئه‌وه‌ی كه هه‌رێمی كوردستان به پێكه‌وه‌ژیان و ته‌بایی و كولتووری فره‌نه‌ته‌وه‌یی و فره‌ئایینی و ئه‌و پره‌نسیپانه‌وه پابه‌نده، كه به درێژاییی مێژوو له‌ناو پێكهاته جیاكانی كوردستاندا هه‌بوون و بێ جیاوازی به‌رگری له هه‌موو پێكهاته نه‌ته‌وه‌یی و ئایینییه‌كان ده‌كات، باسی له ڕۆڵی پێشمه‌رگه‌ش له پاراستن و به‌رگریكردن له هه‌موو ناوچه و پێكهاته‌كانی هه‌رێمی كوردستان كرد.
له كۆبوونه‌وه‌كه‌دا هه‌ر یه‌كه له به‌ڕێزان جێگری سه‌رۆك وه‌زیران، وه‌زیری ئه‌وقاف و كاروباری ئایینی، باڵیۆزی عیراق له ئیتالیا، به‌رپرسی فه‌رمانگه‌ی په‌یوه‌ندییه‌كانی ده‌ره‌وه، وته‌بێژی فه‌رمیی حكوومه‌ت و نوێنه‌ری حكوومه‌تی هه‌رێمی كوردستان له ئیتالیا، ئاماده بوون. دوای ئه‌وه‌ش به‌ڕێزان سه‌رۆك وه‌زیرانی هه‌رێمی كوردستان و وه‌زیری ده‌ره‌وه‌ی ئیتالیا له كۆنگره‌یه‌كی ڕۆژنامه‌وانیدا، وه‌ڵامی پرسیاری ڕۆژنامه‌نووسانیان دایه‌وه.
لە كۆنگرە رۆژنامەوانییەكەدا سەرەتا بەڕێز وەزیری دەرەوەی ئیتالیا بەخێرهاتنی بەڕێز نێچیرڤان بارزانی و شاندی یاوەری كرد و سەرۆك وەزیرانی هەرێمیش سوپاسی وەزیری دەرەوەی ئیتالیای كرد بۆ ئەو پێشوازییەی كە لێیان كراوە و گوتی: " من دەمەوێ لەو ده‌رفه‌ته‌دا سوپاسی گەلی كوردستان بە گەل و حكوومەتی ئیتالیا بگەیەنم. سەرۆك وەزیرانی ئیتالیا، یەكەم سەرۆك وەزیر بوو دوای هێرشی تیرۆریستانی داعش بۆ سەر هەرێم، سەردانی هەرێمی كوردستانی كرد و دوای ئەویش جەنابی وەزیری دەرەوە سەردانی كردین.
ئێمە سوپاسی پشتگیریی سەربازی و مرۆییی ئیتالیا دەكەین بۆ هەرێمی كوردستان و خۆشحاڵین بە پەرەپێدانی زیاتری پەیوەندییەكان لەگەڵ ڕۆما. لە ئەنجامی ئەو پشتگیرییە سەربازییەی كە لە لایەن ئەمەریكا و وڵاتانی ڕۆژئاواوە لێمان كرا، سەركەوتنی باشمان بەرامبەر داعش بەدەست هێناوە. ئەو شەڕەی ئەمڕۆ لەگەڵ داعش دەیكەین، تەنیا شەڕی كورد نییە؛ بەڵكو شەڕی هەموو مرۆڤایەتییە لە دژی ئەو تیرۆریستانە. پێشمەرگەكانی ئێمە لە شەڕی دژی داعشدا جددین و ئێمە وەك گەلی كورد هیوادارین وڵاتانی ڕۆژئاوا لەو ئەركەی كە ئەمڕۆ كورد لە دژی ئەو تیرۆریستانە بەڕێوەی دەبات، تێبگەن.”
لەبارەی هاوكارییە مرۆییەكانی ئیتالیا بۆ هەرێمی كوردستان، بەڕێز نێچیرڤان بارزانی گوتی: "لەگەڵ جەنابی وەزیری دەرەوە باسی ڕەوشی مرۆییی ئەو پەنابەرانەمان كرد كە بەهۆی هێرش و مەترسییەكانی تیرۆریستانی داعشه‌وه ئێستا زیاتر لە ملیۆنێك و پێنجسەد هەزار كەس ئاوارەی هەرێمی كوردستان بوونە و بەمەش لە ماوەیەكی نزیكدا ڕێژەی دانیشتوان لە هەرێمی كوردستان سەدا بیست و هەشت زیادی كردووە. ئەوەی لە توانای ئێمەدا هەبێت بۆ ئەو خەڵكە ئاوارەیە كە لە كورد و مەسیحی و شەبەك و عەرەب پێكهاتوون، بۆیان دەكەین. جارێكی دیكه سوپاسی حكوومەت و گەلی ئیتالیا دەكەین بۆ هاوكارییە مرۆییەكانیان و هیوادارین بە هاوكاریی هەموولایەك كۆتایی بەو تیرۆریستانە لە هەموو شوێنێك بهێنین."
لەبارەی هاوكارییە سەربازی و مرۆییەكانی ئیتالیا بۆ هەرێمی كوردستان و ئەو كێشە داراییەكانی نێوان هەولێر و بەغدا، هەریەك له بەڕێزان وەزیری دەرەوەی ئیتالیا و بەڕێز سەرۆك وەزیرانی هەرێمی كوردستان ئاماژه‌یان به‌وه دا كە لە كۆبوونەوەكەیاندا باسیان لەوە كردووە هاوكارییەكانی ئیتالیا بۆ هەرێمی كوردستان لە هەموو بوارەكاندا بەردەوام دەبێت، بە تایبەت هاوكارییە مرۆییەكان، چونكە خەڵكێكی زۆری ئاوارە لە هەرێم هەن و پێویستیی زۆریان بە هاوكاری هەیە. لە بارەی قەیرانی دارایی عێراق و هەرێمی كوردستانیشه‌وه، بەڕێز سەرۆك وەزیران گوتی: "قەیرانێكی جددی دارایی بەرۆكی ئێمەی گرتووە و لەگەڵ جەنابی وه‌زیری دەرەوەی ئیتالیاش ئەو بابەتەمان باس كرد. هەڵوێستی ئیتالیا لەم بارەوە ئەوەیە كە هەردوولامان، واتە هەرێمی كوردستان و بەغدا كێشەكانمان لە ناوخۆی وڵاتدا چارەسەر بكەین و جەنابی وەزیر ئێمەی هان دا كە كێشەكان لەگەڵ بەغدا لە ڕێگەی دایالۆگه‌وه، چارەسەر بكەین."
لە وەڵامی پرسیارێكدا لەبارەی قوناغی دوای چارەسەریی كێشەكانی نێوان هەرێمی كوردستان و بەغدا، بەڕێز نێچیرڤان بارزانی گوتی: " ئێمە لە عیراق پابەندی دەستووری هەمیشەیین كە سەدا هەشتای خەڵكی عیراق دەنگی بۆ داوە. ئەوەی كە گرینگە پێویستە بەغدا واقعبینانە سەیری كێشەكان بكات و ئێمە ئامادەین ئەو كێشانەمان لەسەر دەستوور و ئەوانی دیكەش، لە چوارچێوەی عیراقدا چارەسەر بكەین. ئەولەویەتی ئێستای ئێمە شەڕی دژی تیرۆریستانی داعشە و وەك كورد ئێمە لەبەرەی پێشەوەین و پێشمەرگە و گەلی ئێمە لە بەرەكانی پێشەوەی ئەو شەڕی دژی تیرۆریستاندان و بە یارمەتیی وڵاتانی هاوپەیمان، توانیومانە هەڕەشە و هێرشەكانی ئەو تیرۆریستانە لە شوێنی خۆیان ڕابگرین."
ئێواره‌ی ئه‌مڕۆ دووشه‌ممه 2015/3/2، به‌ڕێز نێچیرڤان بارزانی سه‌رۆك وه‌زیرانی هه‌رێمی كوردستان و شاندی یاوه‌ری، له ڕۆما له لایه‌ن به‌ڕێز ’’مه‌تێیۆ ڕێنزی’’ سه‌رۆك وه‌زیرانی ئیتالیاوه پێشوازییان لێ كرا.
له سه‌ره‌تای دیداره‌كه‌دا به‌ڕێز نێچیرڤان بارزانی سوپاس و پێزانینی خه‌ڵك و حكوومه‌تی هه‌رێمی كوردستانی بۆ پشتگیری و پشتیوانیی مرۆیی و سه‌ربازیی ئیتالیا بۆ هه‌رێمی كوردستان و سه‌ردانی هاوینی ڕابردووی به‌ڕێز سه‌رۆك وه‌زیرانی ئیتالیا بۆ هه‌ولێر دووپات كرده‌وه و كات و مانای سه‌ردانه‌كه‌ی به گرنگ و پشتیوانییه‌كی گه‌وره بۆ هه‌رێمی كوردستان له قه‌ڵه‌م دا. پاشان پوخته‌یه‌كی ده‌رباره‌ی ڕه‌وشی هه‌رێمی كوردستان و پێشڕه‌وی و سه‌ركه‌وتنه‌كانی به‌رده‌وامی پێشمه‌رگه و ڕه‌وشی ئاواره و په‌نابه‌رانی له هه‌رێمی كوردستان خسته ڕوو كه بارێكی قورسیان خستووه‌ته سه‌ر شانی حكوومه‌تی هه‌رێم و پێویستی به یارمه‌تی و هاوكاریی زیاتر هه‌یه.
لای خۆیه‌وه به‌ڕێز سه‌رۆك وه‌زیرانی ئیتالیا خۆشحاڵیی خۆی به سه‌ردانی به‌ڕێز سه‌رۆك وه‌زیرانی هه‌رێمی كوردستان و شاندی یاوه‌ری بۆ ڕۆما نیشان دا و گوتی: دڵنیاتان ده‌كه‌ینه‌وه كه پشتگیری و هاوكاریی مرۆیی و سه‌ربازیمان بۆ هه‌رێمی كوردستان به‌رده‌وام ده‌بێت و بۆ له‌ناوبردنی تیرۆر هه‌موو پشتگیرییه‌ك له هه‌رێمی كوردستان ده‌كه‌ین، ڕێز و پێزانینی وڵاته‌كه‌یشی بۆ ئازایه‌تیی پێشمه‌رگه له به‌ره‌نگاربوونه‌وه‌ی تیرۆرستاندا دووپات كرده‌وه كه وه‌ك گوتی: په‌یامی خۆڕاگری و ئازاییان دایه هه‌موو جیهان.
هه‌روه‌ها تیشكی خسته سه‌ر ته‌شه‌نه‌كردنی ڕێكخراوه تیرۆرستییه‌كان له شوێنه‌كانی دیكه‌ی جیهان و جه‌ختی له‌وه كرده‌وه كه ده‌بێ هه‌مووان پێكه‌وه به‌ره‌نگاری تیرۆر بیبنه‌وه و گوتی: ئیتالیا له هه‌موو ڕوویه‌كه‌وه و زیاتر له جاران هاوكاریی هه‌رێمی كوردستان ده‌كات، چونكه هه‌رێمی كوردستان به شوێنێكی ستراتیژی ده‌بینین و خۆمان به دۆستی گه‌لی كوردستان ده‌زانین، بۆیه‌شه ئیتالیا بڕیاری داوه ئاستی نوێنه‌رایه‌تیی خۆی له هه‌رێمی كوردستان بۆ كونسلخانه‌ی گشتی به‌رز بكاته‌وه و به‌مه‌ش ده‌مانه‌وێ په‌یامێك بده‌ینه هه‌مووان كه ئێستا ڕه‌وشی هه‌رێمی كوردستان له جاران باشتره و ڕایگه‌یاند: بۆ ئێمه گرنگه ئه‌و سه‌قامگیرییه‌ی له كوردستان هه‌یه، به‌رده‌وام بێت.
له به‌شێكی دیكه‌ی دیداره‌كه‌دا په‌یوه‌ندییه‌كانی نێوان هه‌ولێر و به‌غدا، بارودۆخی مووسڵ و ناوچه‌كه به‌گشتی و چۆنیه‌تیی به‌ره‌نگاربوونه‌وه‌ی تیرۆر و ئۆپه‌راسیۆنه سه‌ربازییه‌كان و په‌ره‌پێدانی پرۆسه‌ی سیاسی له عیراق و گرنگیی به‌شداری و هاوبه‌شیی هه‌موو پێكهاته‌كان له پرۆسه‌ی سیاسیی وڵاتدا تاوتوێ كرا، هه‌روه‌ها تیشك خرایه سه‌ر بارودۆخی سووریا و كاریگه‌ریی پێشهاته‌كانی ئه‌وێ له‌سه‌ر ڕه‌وشی عیراق و ناوچه‌كه به‌گشتی و جه‌خت له‌سه‌ر پێویستیی چاره‌سه‌رێكی سیاسیانه بۆ كێشه‌ی سووریا كرایه‌وه.
شاندی یاوه‌ری به‌ڕێز سه‌رۆك وه‌زیران، له هه‌ر یه‌كه له به‌ڕێزان جێگری سه‌رۆك وه‌زیران، وه‌زیری ئه‌وقاف و كاروباری ئایینی، به‌رپرسی فه‌رمانگه‌ی په‌یوه‌ندییه‌كانی ده‌ره‌وه، وته‌بێژی فه‌رمیی حكوومه‌ت و نوێنه‌ری حكوومه‌تی هه‌رێمی كوردستان له ئیتالیا، پێكهاتبوون.
ئێوارەی ئەمڕۆ سێشەممە 23ی دیسەمبەری 2014 بەڕێز نێچیرڤان بارزانی سەرۆك وەزیرانی هەرێمی كوردستان پێشوزای لە بەڕێز "پاولۆ جێنتیلۆنی" وەزیری دەرەوەی ئیتالیا و شاندێكی یاوەری كرد.
لە كۆبوونەوەیەكدا بەڕێز نێچیرڤان بارزانی وێڕای بەخێرهێنان؛ تیشكی خستە سەر دوایین پێشهاتەكانی شەڕی دژی تیرۆرستانی داعش و سەركەوتنەكانی پێشمەرگە لە ناوچەی شنگال و سوپاس و پێزانینی خەڵك و حكوومەتی هەرێمی كوردستانی بۆ ئەمەریكا و وڵاتانی ئەورووپا و هاوپەیمانیی نێودەوڵەتی دووپات كردەوە كە هاوكاریی پێشمەرگەیان كردووە، بە تایبەت تیشكى خسته سه‌ر كاریگەریی هێرشە ئاسمانییەكان له گۆڕێنی باڵانسی شەڕ و ئاماژەی بە قوربانییەكانی پێشمەرگە و بەرگریی قارەمانانەیان له بەرنگاربوونەوەی تیرۆردا، كرد.
هەروەها باسی لە ڕەوش و پێویستییه‌كانی ئاوارە و پەنابەران كرد و جەختی لەسەر پێویستیی گەیشتنی هاوكاریی بەپەلە لە لایەن كۆمەڵگەی نێودەوڵەتی و نەتەوە یەكگرتووەكانه‌وه كردەوە، بە تایبەت كە وەرزی سەرما و سۆڵە و زستان گەیشت و ئاواره‌كان لە بارودۆخ و ڕەوشێكی نالەباردان و ئەوپەڕی پێویستییان بە هاوكاریی بەپەلە هەیە. سوپاسی سەرۆك وەزیران و سەرۆك ئەركانی سوپای ئیتالیایشی كرد كە لە ڕیزی پێشەوەی ئەوانه بوون دوای هێرشەكانی داعش بۆ سەر هەرێمى كوردستان؛ سەردانی هه‌ولێریان كرد، هه‌روه‌ها سڵاو و ڕێزی خۆی بۆ بەڕێز سەرۆك وەزیرانی ئیتالیا نارد.
به‌ڕێز نێچیرڤان بارزانى ئەوەشی دووپات كردەوە كە پێویستییان بە هاوكاریی ئیتالیا هه‌یه بۆ ئەوەی كۆمەڵگەی نێودەوڵەتی و ئەورووپا هان بدەن تا لە پرسی ناساندنی كارەساتی ئێزدییەكان بە جینۆساید لە ئاستی جیهاندا؛ هاوكاریی هەرێمی كوردستان بكەن. دەربارەی ڕەوشی ئێستای عێراقیش باسی لە دوایین ڕێككەوتنی نێوان هەولێر و بەغدا كرد و هیوای خواست ڕێككەوتنه‌كە ببێتە هۆكارێك بۆ چارەسەركردنی تەواوی كێشەكان لەسەر بنەمایەكی واقعبینانە و پشتگیریی هەرێمی كوردستانی بۆ به‌ڕێز سەرۆك وەزیران و حكوومەتی نوێی عێراق دووپات كرده‌وه.
لای خۆیەوە بەڕێز پاولۆ جێنتیلۆنی وەزیری دەرەوی ئیتالیا وێڕای پێشكەشكردنی پیرۆزبایی بۆ سەركەوتنەكانی پێشمەرگە لە ناوچەی شنگال و دەوروبەری؛ باسی لە ڕۆڵی دیاری كورد له هاوپەیمانیی نێودەوڵەتیدا كرد و بە ڕۆڵێكی زۆر گرنگی لە قەڵەم دا، هه‌روه‌ها دەستخۆشی و ڕێز و پێزانینى بۆ ڕۆڵی پێشەرگە و خەڵكی كوردستان دووپات كردەوە و تیشكی خستە سەر ئەوەی كە وڵاتەكەی بە هەموو شێوەیەك ئامادەی هاوكاریكردنی هەرێمی كوردستانە و پێشتریش هاوكاریی سەربازی و مرۆییان پێشكەش كردووە و چەند تیمێكیان مەشق و ڕاهێنانی سەربازی بە پێشمەرگە ده‌كه‌ن و ئەو تیمانە لە ڕۆژانی داهاتوودا فراوانتر دەكرێن. دووپاتیشی كردەوە كە ئیتالیا هەم لە چوارچێوەی نێودەوڵەتی و هەم بە شێوەیەكى ڕاستەوخۆش، هاوكاریی هەرێم دەكات.
به‌ڕێز وەزیری دەرەوەی ئیتالیا باسی لەوەش كرد كە دوای ڕزگاركردنی شوێنەكان، ئیتالیا دەتوانێت لە بواری ئاوەدانكردنەوەی ئەو شوێنانەدا هاوكاری هەرێمی كوردستان بكات و لەم بوارەشدا خاوەنی ئەزمونێكی دەوڵەمەندن. هه‌روه‌ها خۆشحاڵیی خۆی به پەیوەندییەكانی هەرێمی كوردستان و ئیتالیا دەربڕی و هیوای خواست ئەو نووسینگە دیپلۆماسیەی له هه‌ولێر هه‌یانه، لە ماوەیەكی نزیكی داهاتوودا ببێتە كونسوڵخانە و بۆ ئەم مەبەستەش پەرلەمانی ئیتالیا بڕیاری له‌سه‌ر داوە. سەرسامی و خۆشحاڵیی خۆیشی بۆ ئارامی و پێشكەوتوویی شاری هەولێر نیشان دا و بە شارێكی مۆدێرن و ئارام و سەقامگیری لەقەڵەم دا.
دوای كۆبوونەوەكەش كۆنگرەیەكی ڕۆژنامەوانی بۆ هەردوو بەڕێزان نێچیرڤان بارزانی و وەزیری دەرەوەی ئیتالیا ڕێكخرا و سه‌ره‌تا به‌ڕێز سه‌رۆك وه‌زیران گوتى:
ئێوارەتان باش، بەخێر بێن..
خۆشحاڵین پێشوازی لە وەزیری دەرەوەی ئیتالیا دەكەین كە ئەمڕۆ سه‌ردانى كردووین، هەروەك دەزانن به‌ڕێز سەرۆك وەزیرانی ئیتالیا خۆی لە كەسانی یەكەم بووە كە دوای ئەوەی گرووپی تیرۆریستی داعش بەرەو كوردستان هاتن، هات سەردانی هەولێری كرد و دواتر سوپاسالاری ئیتالیاش سەردانی ئێمەی كرد و ئیتالیا وەك بەشێك لەو هاوپەیمانییە نێودەوڵەتیەی دژی تیرۆریستان دروست بوو، لە ڕووی تەقەمه‌نی و چەك و یارمەتیی مرۆیی و هاوكاریی سەربازییه‌وه، یارمەتیی هەرێمی كوردستانی داوە. ئێمە لەو كۆبوونەوەیەدا بە وردی باسی ئەو تەوەرانە و پەیوەندیی هەرێمی كوردستان و ئیتالیامان كرد، هەروەها باسی ئەو هاوكاریانەمان كرد كە ئیتالیا بۆ هەرێمی كوردستانی ناردووه و دەینێرێت. هەرێمی كوردستان سوپاسگوزاری ئەو یارمەتییەیە و هیوادارین ئەو پەیوەندیانەی نێوان هەرێمی كوردستان و عیراق بەگشتی لەگەڵ ئیتالیا لە ئایندەدا زیاتریش ببێت.
دواتر وەزیری دەرەوەی ئیتالیا لە وتەیەكدا، پیرۆزباییی سەركەوتنی پێشمەرگەی لە سەرۆك وه‌زیرانى هەرێمی كوردستان كرد و دووپاتى كرده‌وه كه سه‌ركه‌وتنه‌كانى شه‌نگال لە ڕووی مۆراڵه‌وه كاریگەریی زۆری لەسەر ڕای گشتی دروست كرد و گرنگیی خۆی هەبوو و گوتی:
زۆر سوپاس، كۆبوونەوەیەكی زۆر گرنگ و بەسوودمان لەگەڵ سەرۆك وەزیرانی نێچیرڤان بارزانی هەبوو، من حەز دەكەم لە سەرەتادا پیرۆزبایی لە بەڕێز نێچیرڤان بارزانی بكەم بۆ ئەو دەستكەوتە سەربازیانەی لە شه‌نگال بە دەست هاتن و ئەمەش زۆر گرنگ بوو لە ڕووی مۆراڵه‌وه، چونكە نیگەرانییەكی زۆر لاى ڕای گشتی لەوبارەوە هەبوو و جەخت لەسەر ئەم بارودۆخە دەكرایه‌وە، بۆیە توانای پێشمەرگە بۆ ڕزگاركردنی شه‌نگال لە ڕووی سیمبۆلى و مۆڕاڵه‌وه، زۆر گرنگ بوو.
هەروەها وەك سەرۆك وەزیران گوتی، ئێمە باسی هاوكاریی هاوبەشی نێوانمان كرد لە چوارچێوەی ئەو هاوپەیمانییەی لە دژی داعش پێكهاتووە، بە تایبەتی هاوكاریی سەربازی و خۆشحاڵم كە لە ڕۆژی یەكەمەوە یەكەم تیمی ئێمە لە مامۆستا و ڕاهێنەر و مەشقكارانی سەربازیی ئیتاڵی، گەیشتۆوونەتە هەرێمی كوردستان و لە ئایندەدا ژمارەیان دەگاتە 280 كەس، بەڵام ئێستا 35یان گەیشتوونەتە هەولێر بۆ مەشق و ڕاهێنانی پێشمەرگە لەسەر ئەو سیستەمەی چەكی ئیتاڵی كە بۆ ئه‌وانمان دابین كردووە.
ئێمە هەر لەو كۆبوونەوەیەدا باسی هاوكاریی مرۆییمان كرد كە ئەمەش ئەركێكی قورس و سه‌خته لەسەر هەرێمی كوردستان و لە ڕووی هەبوونی په‌نابه‌ر و ئاوارەى ناوخۆوه، حكوومەتی هەرێمی كوردستانی خستۆتە ژێر بارێكی قورسه‌وه.
هه‌روه‌ها گوتى: ئیتالیا لەمبارەیەوە بەرنامەی خۆی هەیە و دەستپێشخەریی ئەوەی هەبوو كە 12 ملیۆن دۆلار بۆ هاوكاریی مرۆیی دابین بكات، بەڵام ئێمە بیرمان لە دەستپێشخەریی دیكە كردۆتەوە بۆ هاوكاریی مرۆیی، بە تایبەتی كە ئێستا لە وەرزی زستانداین، بۆیە دەمانەوێ لەم ڕووەوە هاوكار بین. ئێمە هەروەها جەخت لەسەر باشتركردنی پەیوەندیی نێوان هەردوولامان دەكەینەوە، جگە لە خەبات لە دژی تیرۆریستانی داعش، دەمانەوێ پەیوەندییەكانمان لە زۆر بواردا بچێتە پێشه‌وه، بە تایبەتی لە بواری ئابووری و كولتووریەوە، چونكە دەكرێ كاری زۆر لەسەر هەردوو بوار بكرێت، كە بەرژەوەندیی هاوبەشی هەردوولای تیادایە، ڕاستە ئێستا ئەو هاوكارییە هەیە و لە زۆر بواریشدا بەدی دەكرێت، هەروەها تیمی تایبەتمان لە بواری شوێنەواردا هەیە و بە ڕەچاوكردنی سەقامگیریی هەرێمی كوردستان و ئەو سەركەوتنەی لە ڕووی سەربازییەوە بە دەست هاتوون، ئەگەری هاوكاری لە زۆر بواردا زیاتر دەكات.
وەزیری دەرەوەی ئیتالیا ئاشكرای كرد، هه‌موو ئه‌و فڕۆكە ئیتالیانه‌ى یارمه‌تى و هاوكارى بۆ هه‌رێمى كوردستان ده‌هێنن، پێشتر له به‌غدا ده‌نیشنه‌وه ئینجا دێنه هه‌ولێر، ئه‌مه‌ش له‌سه‌ر داواى حكوومه‌تى عیراقه و گوتى: ئێمه له‌م داوایه تێده‌گه‌ین. ڕوونیشى كرده‌وه لە دوایین سەردانیدا بۆ بەغدا، تێبینیی ئەوەی كرد ئەوان بەرنامەی خۆیان هەیە و بە بەیاخەوە دەڕواننە ئەو ڕێككەوتنەی لەگەڵ هەولێر ئیمزایان كردووە و هیوای خواست جێبەجێی بكەن.
لای خۆیەوە به‌ڕێز نێچیرڤان بارزانی لە وەڵامی پرسیارێكدا لەبارەی بارودۆخی دەشتی نەینەوا و ڕزگاركردنییه‌وه، ئاماژەی بەوە دا ئەگەر ئۆپه‌راسیۆنى سەربازیش بكرێت بۆ گەڕاندنەوەی مه‌سیحییه‌كان بۆ شوێنەكانی خۆیان، ڕاگرتن و پاراستنی ناوچەكە كارێكی گرنگترە و گوتی: بەبێ ئەنجامدانی ئۆپەراسیۆنی سەربازی لە مووسڵ، ئەم كارە زەحمەت دەبێت، نیگەرانیی ئێمە لە بارەی پاراستنیانە دوای گەڕانەوەیان. ئەنجامدانی ئۆپەراسیۆنی سەربازی بۆ مووسڵ كارێكی سەختە، بەڵام هاوكاریكردن بۆ گەڕانەوەی ئەم خەڵكە بۆ زێدی خۆیان لە پێشینەی كارەكانی ئێمەیە و ناشتوانین كاتەكەی دیاری بكەین.
به‌ڕێز وەزیری دەرەوەی ئیتالیا ئەوەی خستە ڕوو كه وڵاتەكەی چەكی بە هەرێمی كوردستان داوە و پێكهاتبوو لەمووشەكی RBG و دژه‌تانك، ئەمە جگە لە هەبوونی مەشقكار بۆ ڕاهێنان و مەشقپێكردنی پێشمەرگە لەسەر بەكارهێنانی و ئاماژەی بەوەش دا فڕۆكەكانی ئیتالیا لە بنكەی سەرەكیی خۆیانەوە لە كوێت كاری خۆیان ئەنجام دەده‌ن و جۆری فڕۆكەكانیش TORNADO و فڕۆكەی بێ فڕۆكەوانن كه ڕەزامەندیی پەرلەمانی ئیتالیاى له‌سه‌ره.
بەڕێز نێچیرڤان بارزانی تیشكى خسته سه‌ر بارودۆخی هەرێمی كوردستان لە سەردەمی حكوومەتی پێشوو و ڕوونى كرده‌وه كوردستان بە كاتێكی سەختدا تێپەڕی، لە هەمان كاتیشدا گەشبینیی خۆی بە حكوومەتی تازەی به‌ڕێز عه‌بادی نیشان دا و دووپاتی كردەوە ئێستا قۆناغێكی دیكەی پەیوەندییەكان دەست پێدەكات، هه‌روه‌ها ڕایگه‌یاند كه عه‌بادی سەردانی كوردستان دەكات، بەڵام تا ئێستا كاتی سەردانەكە دیار نیە و گوتی : لە حكوومەتی هەرێمی كوردستان سیاسەتی كاركردنمان لەگەڵ حكوومەتی تازەی عیراقدا هەیه بۆ چارەسەركردنی كێشەكان.
هه‌روه‌ها گوتى ئێمە مانگی ڕابردوو سەردانی بەغدامان كرد و گەیشتینە ڕێككەوتنێكی سەرەتایی لەبارەی پرسی نەوت و داهاته‌وه بۆ هەناردەكردنی بڕی 250 هەزار بەرمیلی نەوتى ڕۆژانه لە لایەن حكوومەتی هەرێمی كوردستانەوە، لەگەڵ هاوكاریكردنی بەغدا بۆ هەناردەكردنی 300 هەزار بەرمیل نه‌وتى ڕۆژانه لە نەوتی كەركووك. هیوادارین بگەینە جێبەجێكردنی ئه‌م ڕێككەوتنە لە سەرەتای مانگی یەكی ساڵی تازە، بە هەبوونی كەشوهەوایەكی تازە و هیوادارین سوودی لێ وەربگرین بۆ چارەسەركردنی كێشەكانی هەولێر و بەغدا، هەروەها پێویستە بەغداش 17%ی بەشی هەرێمی كوردستان لە بودجەی گشتیی عیراق بنێرێت كە تا ئێستا ئێمە 11%مان وەرگرتووە، ئەم ڕێككەوتنەش بۆ ماوەی یەك ساڵە و هیوادارم لەم كاتەدا بگەینە ڕێككەوتنی تەواو و ئێمە ئامادەین بۆ هەموو هاوكاریەك.
دوایین شت له وه‌ڵامى پرسیارێكدا به‌ڕێز وه‌زیرى ده‌ره‌وه‌ى ئیتالیا گوتى: پێزانینمان بۆ ڕۆڵى پێشمه‌رگه هه‌یه كه له جیاتى هه‌موو جیهان له‌سه‌ر زه‌وى به هاوكاریى هێزى ئاسمانیى هاوپه‌یمانان شه‌ڕى داعش ده‌كات، ئه‌مه ته‌نیا هه‌ستى من نییه، هه‌ستى ڕاى گشتیى ئیتالیاش هه‌ر ئه‌مه‌یه. به‌شداریى پێشمه‌رگه له شه‌ڕه‌كانى كۆبانێشدا به‌رز ده‌نرخێنین و هاوكارییه‌كى باشه بۆ ئه‌و شه‌رڤانانه‌ى له وێ ده‌جه‌نگن.
ئەمڕۆ چوارشەممە 29ـی 10ـی 2014 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە كونسوڵ و نوێنەری وڵاتانی هاوپەیمان لەشەڕی دژی داعش كرد.
لە كۆبوونەوەیەكدا كە كونسوڵ و نوێنەری وڵاتانی ئەمەریكا و فەڕەنسا و بریتانیا و ئەڵمانیا و ئیتالیا و هۆڵەندا و كەنەدا و ئۆستڕالیا لە هەرێمی كوردستان ئامادەی بوون سەرۆك بارزانی وێڕای بەخێرهێنانی شاندی میوان سوپاسی گەل و حكوومەتەكانی هێزی هاوپەیمانان لە شەڕی دژی داعش كرد بۆ ئەو پاڵپشتی و هاوكارییەی كە لەشەڕی دژی داعش پێشكەشی هەرێمی كوردستانیان كردووە و ئەو هەماهەنگییەی كە لەنێوان هێزەكانی پێشمەرگە و هێزی هاوپەیماندا هەیە بە بەرز نرخاند بە تایبەت كە هەماهەنگییەكە وای كردووە كە لەشەڕی دژی داعشدا هیچ زیانێك بەر خەڵكی سڤیل نەكەوێت.
سەرۆك بارزانی ئەوەیشی باس كرد كە تیرۆریستانی داعش لەم شەڕەدا پابەندی هیچ یاسا و ئەخلاق و بەهایەكی مرۆڤی نین بەڵام لەبەرانبەر ئەوەدا هێزی پێشمەرگە سەرباری دڕندەیی داعش بە تەواوەتی ڕەچاوی یاساكانی جەنگ و بنەماكانی مافی مرۆڤ و پاراستنی خەڵكی مەدەنی دەكات و ئەو پابەندبوونەی هێزەكانی پێشمەرگەیش ڕیشەی لە بەهاكان و مێژووی خەباتی گەلی كوردستاندایە كە بە هیچ شێوەیەك پێشمەرگە دەستی بۆ كردەی نامرۆڤانە و تۆقاندنی خەڵكی سڤیل نەبردووە.
سەرۆك بارزانی لە درێژەی قسەكانیدا ڕایگەیاند كە بە پشتیوانیی هێزی هاوپەیمان و ئازایەتیی پێشمەرگە سەركەوتنی بەرچاو لە بەرەكانی شەڕ بەدی هاتووە و ئەو سەركەوتنانە بووە هۆی ئەوەی تیرۆریستانی داعش لە پلانەكانیان بۆ پێكەوەگرێدانی دەشتی نەینەوا و ناوچەكانی ژێر دەستەڵاتیان لە سووریا شكست بهێنن.
هەر لەم كۆبوونەوەیەدا سەرۆك بارزانی بە وردی شاندی میوانی لە بارودۆخی مەیدانیی بەرەكانی شەڕ و پێداویستییەكانی هێزی پێشمەرگە و پلانی داهاتووی بەرەكانی شەڕ ئاگادار كردەوە. سەرۆك بارزانی ئەوەیشی خستەڕوو كە دوژمن توانای ڕووبەڕووبوونەوەی ڕاستەوخۆی پێشمەرگەی نەماوە و پشتی بە خۆكوژ و دانانی تەقەمەنی و ماین و بۆمبی چێندراوەوە بەستووە. لە بەشێكی دیكەی قسەكانیدا سەرۆك بارزانی بە پێویستی زانی كە حكوومەتی عێراقی لە شەڕی دژی داعش كار بە بەرپرسیارێتی و پابەندبوونەكانی بكات و ڕایگەیاند كە هەرێمی كوردستان سەرباری ئەوەی تێبینیی زۆری لەسەر حكوومەتی تازە هەبوو بەڵام بڕیاری بەشداریكردنی دا بۆ ئەوەی باشتر بتوانرێ شەڕی تیرۆریستان بكرێ. سەرۆك بارزانی لەمبارەیەوە بە پێویستی زانی كە حكوومەتی عێراقی ئەرك و پابەندبوونەكانی لە هاوكاریكردنی پێشمەرگە لەم شەڕەدا جێبەجێ بكات.
هەر لەم كۆبوونەوەیەدا سەرۆك بارزانی تیشكی خستە سەر بارودۆخی ئەو هاووڵاتی و پێشمەرگانەی لەسەر چیای شنگالدا قارەمانانە بەرگری لە چیا دەكەن و ڕۆڵی ئەوانی لە پاراستنی چیای شنگال بەرز نرخاند.
لە بەشێكی دیكەی ئەم كۆبوونەوەدا ئامادەبووان تێبینی و پرسیارەكانیان لەبارەی چۆنییەتی هاوكاریكردنی پێشمەرگە و پێداویستییەكانی هێزی پێشمەرگە ئاراستەی سەرۆك بارزانی كرد و سەرۆك بارزانیش وەڵامی تێبینی و پرسیارەكانیانی دایەوە.
شایانی باسە لەم كۆبوونەوەیەدا فواد حوسێن سەرۆكی دیوانی سەرۆكایەتی و مستەفا سەید قادر وەزیری پێشمەرگە و سەفین دزەیی گوتەبێژی حكوومەتی هەرێمی كوردستان ئامادە بوون.