هەولێر - KDP.info- سەرۆکوەزیرانی کوردستان، پێشوازی لە نوێنەری حکوومەتی هەرێم لە تاران کرد و لەدیدارەکەدا دا جەخت لە بایەخ و په‌یوەندییەکانی هەولێر و تاران کرایەوە.
پێشنیوه‌ڕۆى ڕۆژی چوارشه‌ممه 2/3/2016، "نێچیرڤان بارزانى" سه‌رۆك وه‌زیرانى هه‌رێمى كوردستان؛ له دیدارێكدا له‌گه‌ڵ "نازم ده‌باغ" نوێنه‌رى حكوومه‌تى هه‌رێمى كوردستان له تاران، په‌یوه‌ندییه‌كانى حكوومه‌تى هه‌رێمى كوردستانى له‌گه‌ڵ كۆمارى ئیسلامیى ئێران تاوتوێ كرد و جه‌ختى له‌سه‌ر بایه‌خ و گرنگیى په‌یوه‌ندییه‌كانى هه‌ولێر و تاران بۆ هه‌رێمى كوردستان و كۆمارى ئیسلامى و خواستى حكوومه‌تى هه‌رێمى كوردستان بۆ بره‌ودان به په‌یوه‌ندییه‌كانى له‌گه‌ڵ كۆمارى ئیسلامى؛ كرده‌وه.
له دیداره‌كه‌دا كه "عه‌بدوڵڵا ئاكره‌یى" به‌ڕێوه‌به‌رى گشتیى په‌یوه‌ندییه‌كانى حكوومه‌تى هه‌رێم له‌گه‌ڵ ئێران ئاماده‌یى بوو، باس له كار و چالاكییه‌كانى نوێنه‌رایه‌تیى حكوومه‌تى هه‌رێمى كوردستان له تاران كرا و تیشك خرایه سه‌ر چۆنیه‌تیى كاراكردنى زیاترى كار و ئه‌ركه‌كانى نوێنه‌رایه‌تیى حكوومه‌ت و گرنگیى بره‌ودان و به‌ره‌وپێشبردنى په‌یوه‌ندییه‌كانى هه‌ردوولا، به‌تایبه‌تیش له‌و بوارانه‌دا كه بۆ هه‌رێمى كوردستان گرنگن و خزمه‌ت به به‌رژه‌وه‌ندییه‌كانى هه‌ردوولا ده‌كه‌ن.
به‌ڕێز نێچیرڤان بارزانى سه‌رۆك وه‌زیرانى هه‌رێمى كوردستان، له په‌یامیكدا به‌بۆنه‌ى هێرشه تیرۆرستییه‌كانى دوێنێ شه‌وى پاریسه‌وه، پشگیریی گه‌لی فه‌ره‌نسا ده‌كات و ده‌ڵێت شكست به تیرۆریزم دێت. ئه‌مه ده‌قى په‌یامه‌كه‌یه‌تى:
به دڵێكی پڕ په‌ژاره‌وه هه‌واڵى هێرشه ترسناكه‌كانى دژی خه‌ڵكی پاریسم بیست، له ناخی دڵه‌وه سه‌ره‌خۆشییان لێده‌كه‌م و ئه‌وپه‌ڕى پشتگیریی خۆم و گه‌لی كوردستانیان پێ ڕاده‌گه‌یه‌نم.
له شه‌ڕى دژى تیرۆریزمدا، فه‌ره‌نسا لێبڕاوانه له‌گه‌ڵ هه‌رێمی كوردستان وه‌ستاوه و له شه‌ڕی ئه‌واندا، ئێمه‌ش له‌گه‌ڵیانین. ته‌حه‌دای سه‌ركه‌وتن به‌سه‌ر ئه‌م هه‌ڕه‌شه‌یه‌دا زۆر گه‌ل و نه‌ته‌وه له سه‌رتاسه‌ری جیهاندا یه‌ك ده‌خات، ئه‌مه تێكۆشانى شارستانییه‌ت دژ به ده‌مارگیری و دڕنده‌ییه.
هێرشی له‌مجۆره به مه‌به‌ستی بڵاوكردنه‌وه‌ی ترسه، به‌ڵام كۆمه‌ڵگه‌ی نێوده‌وڵه‌تی ده‌بێت به‌وپه‌ڕی بڕوابه‌خۆبوونه‌وه وه‌ڵام بداته‌وه. له ڕاستیدا، ئه‌م تراژیدیایه ڕۆژێك پاش شكستی گه‌وره‌ی داعش له شنگال هات، ئێمه ده‌توانین و ده‌بێت شكست به تیرۆریزم بهێنین.
نێچیرڤان بارزانى
سه‌رۆك وه‌زیرانى هه‌رێمى كوردستان
14/11/2015
بۆ ده‌ربڕینى هاوخه‌مى و هاوسۆزى له‌گه‌ڵ فه‌ره‌نسا، ئێواره‌ى ئه‌مڕۆ شه‌ممه 14/11/2015، به‌ڕێز نێچیرڤان بارزانى سه‌رۆك وه‌زیرانى هه‌رێمى كوردستان و شاندێكى یاوه‌رى، سه‌ردانى كونسلخانه‌ى گشتیى فه‌ره‌نسایان له هه‌ولێر كرد.
به‌رێز سه‌رۆك وه‌زیران وێڕاى به‌توندى ئیدانه‌كردنى هێرشه تیرۆرستییه‌كانى شه‌وى ڕابردووى پاریس، به ناوى خۆى و حكوومه‌ت و خه‌ڵكى هه‌رێمى كوردستانه‌وه، نیگه‌رانى و هاوسۆزى و هاوخه‌مى له‌گه‌ڵ خه‌ڵك و حكوومه‌ت و سه‌رۆكایه‌تیى فه‌ره‌نسا دووپات كرده‌وه و پرسه و سه‌ره‌خۆشى ئاراسته‌ى كه‌سوكارى قوربانیان كرد و هیواى زووچاكبوونه‌ى بۆ برینداران خواست.
هه‌روه‌ها هاوخه‌مى و هاوسۆزى و پرسه و سه‌رخۆشیى تایبه‌تى به‌ڕێز جه‌نابى سه‌رۆكى هه‌رێمى كوردستانى گه‌یانده جه‌نابى سه‌رۆك و گه‌ل و حكوومه‌تى فه‌ره‌نسا و دووپاتى كرده‌وه كه چۆن له ڕۆژگار و سه‌رده‌مه سه‌خته‌كاندا هه‌میشه فه‌ره‌نسا پشتیوان و هاوسۆزى گه‌لى كوردستان بووه و به‌رده‌وام هاوكارى و یارمه‌تى پێشكه‌ش كردووه، به هه‌مان شێوه ئه‌مڕۆ گه‌لى كوردستان هاوسۆز و هاوخه‌مى گه‌لى فه‌ره‌نسایه و به‌شدارى خه‌م و په‌ژاره‌یانه.
لاى خۆیه‌وه به‌ڕێز ئالان گێپغات كونسولى گشتیى فه‌ره‌نسا له هه‌رێمى كوردستان، سوپاس و پێزانینى خۆى بۆ سه‌ردانى به‌ڕێز نێچیرڤان بارزانى و شاندى یاوه‌رى ده‌ربڕى و دووپاتى كرده‌وه كه ئه‌م سه‌ردانه‌ى به‌ڕێزیان نیشانه‌ى په‌یوه‌ندیى پته‌و و دۆستایه‌تیى نزیكى هه‌ردوو گه‌ل و حكوومه‌تى فه‌ره‌نسا و گه‌ل و حكوومه‌تى هه‌رێمى كوردستانه و ئه‌م به‌سه‌ركردنه‌وه‌یه و هاوسۆزى و به‌شداریى به‌ڕێزیانى، به مایه‌ى ڕێز و پێزانینێكى زۆر له‌قه‌ڵه‌م دا. هه‌روه‌وها جه‌ختى له‌وه كرده‌وه كه فه‌ره‌نسا و هه‌رێمى كوردستان بۆ هه‌میشه به دۆست و پشتیوانى یه‌كتر ده‌مێننه‌وه.
بەبۆنەى رۆژى نیشتمانى وڵاتى هەنگاریا ئێوارەى دوێنێ بە ئامادەبوونى د. فوئاد حوسێن نوێنەرى بەرێز سەرۆک بارزانى و سەفین دزەیى نوێنەرى بەڕێز نێچیرڤان بارزانى سەرۆکى حکومەتى هەرێم و فەلاح مستەفا بەرپرسى پەیوەندیەکانى دەرەوەى حکومەت و پارێزگارى هەولێرو ژمارەیەک لە بەرپرسان و نوێنەرانى وڵاتانى بیانى لە هۆڵى هوتێل رۆتانا مەڕاسیمێک بەرێوەچوو.
بە مەبەستى پیرۆزبایی کردن و گەیاندنى پەیامى حکومەتى هەرێمى کوردستان بۆ رۆژى نیشتمانى ووڵاتى هەنگاریا، فەلاح مستەفا بەرپرسى فەرمانگەى پەیوەندیەکانى دەرەوەى حکومەتى هەرێمى کوردستان ووتەیەکە پێشکەش کردو پیرۆزبایى لە گەل و حکومەتى هەنگاریا کرد بە بۆنەى (٥٩) مین ساڵیادى رۆژى سەربەخۆیی ووڵاتەکەیان و رزگار بوون لە ژێر دەستى و حکومى دیکتاتۆرى و هەنگاونان بەرەو سەربەخۆیی و دیموکراسى لە ووڵاتەکەیاندا.
بەڕێزیان ئاماژەى بە هەوڵەکانى حکومەتى هەنگاریا دا لە پێشخستنى پەیوەندی دوو قۆڵی ووڵاتەکەى لەگەڵ هەرێمى کوردستان و بەردەوام بوون لە هەماهەنگى کردن و هاوکارى کردنى حکومەتى هەرێمى کوردستان لە شەڕى دژى بە داعش و هاوکاریکردنى هێزى پێشمەرگەى کوردستان و یارمەتیدانى ئەو ئاوارە و پەناهەندانەى کە روویان لە هەرێمى کوردستان کردووە.
هاوکات، بەرێز کابا ڤێزیکێنیا کونسوڵى گشتى هەنگاریا لە هەرێمى کوردستان کە بەشێک لە ووتارەکەى بە زمانى کوردى پێشکەشکرد سوپاس و پێزانى خۆى ئاراستەى ئامادەبووان کرد بە بۆنەى (٥٩) مین ساڵیادى رۆژى سەربەخۆیی هەنگاریا. پاشان بەرێزیان ئاماژەى بە هەنگاوەکانى حکومەتى هەنگاریا بۆ یارمەتى دانى حکومەتى هەرێمى کوردستان کرد بۆ رووبەروو بوونەوەى شەڕى دژ بە تیرۆر لە هەرێمەکەدا ئەویش بە پێشکەشکردنى یارمەتى و هاوکارى سەبازى بۆ هێزى پێشمەرگە کرد.
لە کۆتاییدا، بەڕێزیان ئاماژەى بە کردنەوەى نووسینگەى کونسوڵگەرى ووڵاتەکەى لە هەرێمى کوردستان لە ساڵى ڕابردوو کرد بە مەبەستى پتەوکردنى پەیوەندیە دوولایەنەکانى نێوان هەردوولا لە رووى دابینکردنى کورسى خوێندن و پەرەپێدانى پەیوەندیە کەلتورى و زانستى و بارزگانیەکان لەماوەى دەست بەکاربوونیان لە هەرێمى کوردستاندا.
له لێدوانێكى تایبه‌تدا بۆ ماڵپه‌ڕى فه‌رمیى حكوومه‌تى هه‌رێمى كوردستان، به‌ڕێز سامى ئه‌رگۆشى سكرتێرى ڕۆژنامه‌وانیى به‌ڕێز نێچیرڤان بارزانى سه‌رۆك وه‌زیرانى هه‌رێمى كوردستان، ڕایگه‌یاند: بۆ به‌شداریكردن له كۆنفرانسى ئاسایشیى میوونیخ كه له تارانى پایته‌خت ده‌به‌سترێت، به‌ڕێز نێچیرڤان بارزانى سه‌رۆك وه‌زیرانى هه‌رێمى كورستان ڕۆژى 17ى ئه‌م مانگه به داوه‌تێكى فه‌رمى سه‌ردانى ئێران ده‌كات.
ده‌رباره‌ى كۆنفرانسه‌كه‌ش گوتى: ئه‌م كۆنفرانسه كه به هه‌ماهه‌نگى له‌گه‌ڵ ئه‌نتیستۆى نێوده‌وڵه‌تیى لێكۆڵینه‌وه‌ى سیاسى له پایته‌ختى ئێران ساز ده‌كرێت، هه‌ر یه‌كه له به‌ڕێزان وه‌زیرانى ده‌ره‌وه‌ى ئه‌ڵمانیا و ئێران و ژماره‌یه‌ك له په‌رله‌مانته‌ران و به‌رپرسانى حكوومى و ئه‌كادیمسیه‌ن و لێكۆڵه‌ره‌وه‌ى نێوده‌وڵه‌تى و ئێرانى به‌شدارى تیادا ده‌كه‌ن و زیاتر په‌یوه‌سته به دوایین ڕێككه‌وتنى نێوان كۆمارى ئیسلامى و وڵاتانى ڕۆژاوا و چه‌ندین بابه‌ت و باس و ته‌وه‌رى په‌یوه‌ست به‌م پرسه‌ى تیایدا تاوتوێ ده‌كرێت.
به‌ڕێز ئه‌رگۆشى هه‌روه‌ها ئاماژه‌ى به‌وه دا كه چاوه‌ڕوان ده‌كرێت له‌م سه‌ردانه‌ى بۆ تاران، به‌ڕێز نێچیرڤان بارزانى چاوى به ژماره‌یه‌ك له به‌رپرسانى كۆمارى ئیسلامیى ئێرانیش بكه‌وێت.
سه‌رله‌به‌یانیى ئه‌مڕۆ یه‌كشه‌ممه 27\9\2015 به‌ڕێز نێچیرڤان بارزانى سه‌رۆك وه‌زیرانى هه‌رێمى كوردستان به‌شدارى له ڕێوڕه‌سمى ده‌ستبه‌ركاربوونى قه‌داسه‌تى گورگیسی سێیەم سڵێوه، پاتریارکی كه‌نیسه‌ى ڕۆژهه‌ڵاتى ئاشوورییەکانی جیهان كرد كه له كه‌نسیه‌ى مار یۆحه‌نناى مه‌عمه‌دان له شارۆچه‌ى عه‌ینكاوه‌ى سه‌ر به پارێزگاى هه‌ولێر به‌ڕێوه چوو.
له ڕێوڕه‌سمه‌كه‌دا كه هه‌ر یه‌كه له به‌ڕێزان نوێنه‌رى قه‌داسه‌تى پاپاى ڤاتیكان، نوێنه‌رانى كه‌نیسه جیاوازه‌كان، نوێنه‌رانى سه‌رۆك كۆمار و سه‌رۆك وه‌زیران و په‌ر‌له‌مانى عیراق، جێگرى سه‌رۆك وه‌زیرانى هه‌رێمى كوردستان، ژماره‌یه‌ك له وه‌زیران و په‌رله‌مانته‌ران و به‌رپرسانى هه‌رێمى كوردستان، كونسول و نوێنه‌رانى وڵاتانى بیانى له هه‌رێمى كوردستان و ژماره‌یه‌كى به‌رچاوى پیاوانیى ئایینى مه‌سیحى و خه‌ڵكى ناوچه‌كه ئاماده‌یى بوون، به‌بۆنه‌ى ده‌ستبه‌كاربوونیه‌وه، قه‌داسه‌تى پاتریارک له وته‌یه‌كدا گه‌ڕانه‌وه‌ى كورسیى پارتریاركیى كه‌نیسه‌ى ڕۆژهه‌ڵاتى ئاشوورى بۆ ڕۆژهه‌ڵات و به‌تایبه‌تى بۆ شارى هه‌ولێر، به ڕووداوێكى گرنگ و بۆنه‌یه‌كى پیرۆز له قه‌ڵه‌م دا.
هه‌روه‌ها تیشى خسته سه‌ر ڕۆڵى هه‌رێمى كوردستان له پرسى پێكه‌وه‌ژیانى ئایین و نه‌ته‌وه جیاكان و له‌مباره‌یه‌وه به‌تایبه‌تى سوپاسى به‌ڕێزان جه‌نابى سه‌رۆك مه‌سعوود بارزانى، سه‌رۆكى هه‌رێمى كوردستان و نێچیرڤان بارزانى سه‌رۆك وه‌زیرانى هه‌رێمى كوردستان كرد، كه ڕۆڵێكى گه‌وره‌یان له به‌رگریكردن و پاراستنى مافى پێكهاته نه‌ته‌وه‌یى و ئایینییه‌كانى هه‌رێمى كوردستان ده‌بینن. هه‌روه‌ها ڕۆڵى خه‌ڵك و حكوومه‌تى هه‌رێمى كوردستانى له به‌هاناوه‌چوون و داڵده‌دانى نزیكه‌ى ملیۆنێك و حه‌وت سه‌د هه‌زار په‌نابه‌ر و ئاواره‌ى له هه‌موو پێكهاته ئایینى و نه‌ته‌وه‌ییه‌كان به‌رز نرخاند، كه له ئه‌نجامى هێرشه تیرۆرستییه‌كانى داعش ڕوویان له ناوچه ئارامه‌كانى هه‌رێمى كوردستان كردووه.
هه‌ر له وته‌كه‌یدا قه‌داسه‌تى پاتریارك داواى كارى پێكه‌وه‌یى له‌گه‌ڵ كه‌نیسه‌كانى دیكه كرد و جه‌ختى له‌وه كرده‌وه كه كه‌نیسه جیاوازه‌كانى مه‌سیحى، ئه‌مڕۆ له هه‌موو كاتێك زیاتر پێویستییان به كارى پێكه‌وه‌یى و هه‌ماهه‌نگى و هاوكاریى نێوانیان هه‌یه. هه‌روه‌ها هیواى خواست كه ئارامى و ئاوه‌دانى بگه‌ڕێته‌وه عیراق و داواى كرد فره‌ڕه‌نگى و فره‌ئاینى و فره‌نه‌ته‌وه‌یى له عیراق بپارێزرێت، سوپاسى به‌شداریى هه‌موو ئه‌و لایه‌ن و میوانانه‌یشى كرد له ڕێوڕه‌سمه‌كه‌دا به‌شدار بوون.
دواتر له هۆڵى شه‌هید سه‌عد عه‌بدوڵڵا نیوەڕۆخوانێك ڕێكخرا و دوای ته‌واوبوونى، قەداسەتی پارتریارك گۆرگیسی سێیەم سڵێوە پاتریاركی كەنیسەی ڕۆژهەڵاتی ئاشووری وتارێكی پێشكەش كرد و تیایدا باسی لە گرنگیی ڕێوڕەسمەكه كرد و خۆشحاڵیی خۆیشی بە ئامادەبوونی بەڕێز نێچیرڤان بارزانی سەرۆك وەزیرانی هەرێمی كوردستان لە ڕێوڕەسمەكەدا و ئەو ئامادەكارییانەی بۆ ڕێوڕەسمه‌كە ئەنجامی داون، دەربڕی و سوپاسی بەشداریی نوێنەری بەرێز حەیدەر عەبادی سەرۆك وەزیرانی عێراقی فیدراڵ و كونسڵ و نوێنەرانی وڵاتانی بیانی و هەموو ئامادەبووان لە ڕێوڕەسمەكەدا كرد و هیوای خواست ئاشتی و ئارامی بۆ هەموو عێراق بگەڕێتەوە.
هه‌روه‌ها هیوای خواست هەموو خەڵكی عێراق و بە تایبەتی قوتابیان ئەوانەی لەبەر ئەو بارودۆخەی ڕووبەڕووی عێراق بووەتەوە لە خوێندن دابڕاون، لە ئارامیدا بژین و لەمبارەیەشەوە سوپاسی حكوومەتی هەرێمی كوردستانی كرد كە توانیویەتی بواری خوێندن بۆ ئەو قوتابیانە، بە تایبەت قوتابیانی زانكۆ بگەڕێنێتەوە و لە زانكۆكانی هەرێمی كوردستان هەلی تەواوكردنی خوێندنیان بۆ بڕەخسێنێت.
دواتر نوێنەری پاپای ڤاتیكان وتەیەكی پێشكەش كرد و تیایدا جگە لە دەربڕینی خۆشحاڵیی خۆی بۆ بەشداریكردن لە ڕێوڕەسمی دەستبەکاربوونی پاتریارکی كەنیسەی ڕۆژهەڵاتی ئاشووری، بەناوی قەداسەتی پاپاوه، هیوای سەركەوتنی بۆ کڵێسای ڕۆژهەڵاتی ئاشووری خواست و ئاماژەی بە بارودۆخی سەختی ناوچەكە كرد و هیوای خواست پارتریاركی كەنیسەی ڕۆژهەڵاتی ئاشووری ڕۆڵی خۆی لە هەموو بوارەكاندا و بە تایبەت لە ئارامكردنەوەی ناوچەكەدا ببینێت و لەمبارەیەشەوە هاوكاری و پشتیوانیی خۆی بۆ قەداسەتی پارتریارك دەربڕی. هەروەك برایەتی و پێكەوەژیانی هەموو نەتەوە و تایفە ئاینییەكانی بۆ بەردەوامیی ئاشتی لە ناوچەكە، دووپات كردەوە.
دواتر بەڕێز نەوزاد هادی پارێزگاری هەولێر لە وتەیەكدا جیا لە بەخێرهێنانی میوانان، جەختی لەوە كردەوە كە گەڕانەوەی كورسیی پارتریاركی كەنیسەی ڕۆژهەڵاتی ئاشووری بۆ شاری هەولێر گرنگییەكی تایبەتی خۆی هەیە و بە كارێكی مێژوویی وەسف كرد و هەموو پشتگیری و هاوكارییەكی پارێزگای هەولێریشی بۆ سەرخستنی كارەكانی كەنیسەی ڕۆژهەڵاتی ئاشووری دووپات كردەوە.
ئێوارەی ئەمڕۆ یەكشەممە 27/9/2015 و دوای بەشداریكردنی لە ڕێوڕەسمی دەستبەکاربوونی پاتریارک گورگیسی سێیەم سڵێوە پاتریاركی كەنیسەی ڕۆژهەڵاتی ئاشووری و گواستنەوەی كەنیسەی ڕۆژهەڵات لە ئەمەریكاوە بۆ هه‌ولێر، بەڕێز نێچیرڤان بارزانی سەرۆك وەزیرانی هەرێمی كوردستان وه‌ڵامى چه‌ند پرسیارێكى ڕۆژنامه‌نووسانى دایه‌وه.
لە وه‌ڵامى پرسیارێكدا گواستنەوە و گەڕانەوەی كەنیسەی ڕۆژهەڵاتی ئاشووری لە ئەمەریكاوە بۆ هەرێمی كوردستان دوای هەشتا ساڵ، بە ڕۆژێكی مێژوویی بۆ هەرێمی كوردستان و كەنیسەی ڕۆژهەڵاتی ئاشووری و پەیڕەوانی ئەو كەنیسەیە لە قەڵەم دا و ئەمەشی بۆ ئارامی و پێكەوەژیانی برایانە و ئاشتیی نێوان هەموو پێكهاتە نەتەوەیی و ئایینییەكانی هەرێمی كوردستان گەڕاندەوە و بە سەرەتایەكی گرنگ و جێی شانازی بۆ هەرێمی كوردستان ناو‌زه‌د كرد.
سەبارەت بەو ئاوارە و پەنابەرانەی لە ترسی تیرۆر ڕوویان لە هەرێمی كوردستان كردووە، بەرێزیان ئاماژەی بەوە كرد كە نزیكەی ملیۆنێك و حەوتسەد هەزار ئاوارە و پەنابەر ڕوویان لە هەرێمی كوردستان كردووە و ئەوەی لە تواناى حكوومەتی هەرێمی كوردستاندا بووبێت بۆ ئەو ئاوارە و پەنابەرانە كردوویەتی و بەردەوامیش دەبێت لە هاوكاریكردنیان سەرەڕای ئەو بارودۆخە خراپە داراییه‌ی كە ڕووبەڕووی هەرێمی كوردستان بووەتەوە.
ده‌رباره‌ى ناردنی نەوتی هەرێمی كوردستان و ئەو كێشانەی لەبەردەم ناردنی نەوت دروست دەكرێن، ڕوونی كردەوە كە تاكە ڕێگە بۆ هەناردەكردنی نەوتی هەرێمی كوردستان بۆڕیی نەوتی توركیایە و كاتێك ئەو بۆڕیەش دەتەقێنرێتەوە یان هەوڵ دەدرێت لەناو توركیا نەوتی لێ دەربهێندرێت، زیانێكی گەورە بەر هەرێمی كوردستان دەكەوێت. هیوای خواست ئەو لایەنانەی ئەم كارانە ئەنجام دەدەن لەوە تێبگەن كە ئەم بۆڕییە نەوتە شادەماری بژێوی خەڵكی كوردستانە و واز لەو كارە ناشرینانە بهێنن و هاوكاربن بۆ ئەوەی جارێكی دیكە ئەو كارە دووبارە نەبێتەوە و هەوڵەكانیشیان لەگەڵ حكوومەتی توركیا بەردەوامە و لە دیدار و كۆبوونەوەكان لەگەڵ بەرپرساتی توركیا جەختیان لەوە كردووەتەوە زیاتر گرنگیی بەوە بدرێت ئەو بۆڕییە نەوتە بپارێزرێت.
سەبارەت بە كۆبوونەوە پێنج قۆڵییەكان بۆ چارەسەركردنی پرسی سەرۆكایەتیی هەرێمی كوردستان، بەڕێزیان دووپاتی كردەوە كە دوا پەیامی بەڕێز مەسعوود بارزانی سەرۆكی هەرێمی كوردستان لەبارەی ئەو پرسەوە ئاشكرایە و هەموو لایەنەكان هەوڵی ئەوە دەدەن بگەن بە ڕێككەوتن و هیوای خواست لە كۆبوونەوەی شەشی مانگی داهاتوودا هەموو لایەنەكان بگەنە ڕێككەوتنێك كە لە بەرژوەندیی هەرێمی كوردستاندا بێت.
سەبارەت بە هاتنی بەرێز حسێن شەهرستانی نوێنەری بەرێز حەیدەر عەبادی سەرۆك وەزیرانی عێراقی فیدراڵ بۆ هەرێمی كوردستان، بەڕێز سەرۆك وەزیرانی هەرێمی كوردستان ئاشكرای كرد كە بەڕێز شەهرستانی بە سەردانێكی ئاسایی بە مەبەستی بەشداریكردن لە ڕێوڕەسمی گواستنەوەی كەنیسەی ڕۆژهەڵاتی ئاشووری بۆ هەرێمی كوردستان هاتۆتە هەرێم و كۆبوونەوەشیان لەگەڵی هەبووە.
لەبارەی چاكسازییەكانیشەوە دووپاتی كردەوە كە هەر لە سەرەتای دورتسبوونی كابینەی هەشتەمی حكوومەتی هەرێمی كوردستانەوە ئەوان هەوڵیان داوە بەپێی چەند پرۆگرامێك دەست بە چاكسازی بكەن و وەزارەتەكانیش یەك بە یەك خەرێكی چاكسازین و ئەمەشی بە كارێكی پێویست زانی. جەختی لەوەش كردەوە كە دەبێت پرۆسەی چاكسازی بەردەوام بێت.
لەبارەی لێپرسینەوە و چوونی وەزیرەكانی حكوومەتیشه‌وه بۆ پەرلەمانی كوردستان، دووپاتی كردەوە كە بەپێی عورف و یاساكان دەبێت ڕەزامەندیی سەرۆكایەتیی ئەنجومەنی وەزیران لەوبارەیەوە وەربگیرێت دواتر وەزیرەكان بچنە پەرلەمان.
دەربارەی ئازادكردنی شاری مووسڵ لە دەستی تیرۆرستانی داعش و بەشداریكردنی هێزی پێشمەرگە لە ئازادكردنەوەی ئەو شارەدا، بەڕێز نێچیرڤان بارزانی ئاماژەی بەوە كرد كە ئازادكردنی شاری مووسڵ بۆ هەرێمی كوردستان كارێكی گرنگە، چونكە پەیوەندی بە ئاسایشی هەرێمی كوردستانەوە هەیە، بەڵام تا ئێستا پلانێكی جددی بۆ ئازادكردنەوەی شاری مووسڵ دانەنراوە و ئێستا بیر لە دانانی ئەو پلانە دەكرێتەوە و هەر كاتێك پلانەكە ئامادە كرا و ئەوان پلانەكەیان بینی، ئەو كات وەك هەرێمی كوردستان بڕیاری بەشداریكردن، یان بەشدارینەكردنی پێشمەرگە لە شەڕی ئازادكردنەوەی مووسڵدا دەدەن.
لە وەڵامی پرسیارێكدا سەبارەت بەو بژاردانەی لەبارەی هەڵبژاردنی سەرۆكی هەرێمی كوردستانه‌وه لەلایەن خەڵك یان پەرلەمانی كوردستانەوە لەلایەن چوار لایەنەكه‌وە خراونەتە ڕوو، بەرێز نێچیرڤان بارزانی ڕایگەیاند بژاردەكان سەیرن، چونكە باس لەوە دەكەن گەر سەرۆك لەلایەن خەڵكەوە هەڵبژێردرێت دەبێت دەسەڵاتێكی كەمی بێت و گەر لەلایەن پەرلەمانیشەوە هەڵبژێردرێت دەستەڵاتێكی زۆری دەبێت، كە پێویستە پێچەوانە بكرێتەوە، چونكە ئەو سەرۆكەی ڕاستەوخۆ لەناو خەڵكەوە هەڵدەبژێردرێت پێویستە دەستەڵاتی زیاتر بێت لەوەی كە لەلایەن پەرلەمانەوە هەڵدەبژێردرێت، لەبەرئەوەی ڕاستەوخۆ شەرعیەت لە گەلەكەیەوە وەردەگرێت.
ئەوەشی ئاشكرا كرد كە مەسەلەكە هیچ پەیوەندیی بە بەرێز مەسعوود بارزانییەوە نییە هەروەك لە دوا پەیامیدا باسی كردووە و هیوای خواست بە شێوەیەكی واقعبینانە بیر لە چارەسەری ئەو پرسە بكرێتەوە بەوەی كە بەرژه‌وەندیی ئێستای هەرێمی كوردستان لەچیدایە، ئەوە ئەنجام بدرێت. ئەوەشی خستەڕوو كە ئەوان پێیان وانییە ئەو پێشبینیانەی تا ئێستا خراونەتە ڕوو بە شێوەیەك بن بۆ گەیشتن بە چارەسەر دانرابن و هیوای بەردەوامیی گفتوگۆ و دیالۆگی خواست بۆ دۆزینەوەی چارەسەر بۆ ئەو كێشەیە.
پێشنیوه‌ڕۆى ئه‌مڕۆ یه‌كشه‌ممه 27\9\2015، به‌ڕێز نێچیرڤان بارزانى سه‌رۆك وه‌زیرانى هه‌رێمى كوردستان له هه‌ولێر، پێشوازى له به‌ڕێز حسێن شه‌هرستانى وه‌زیرى خوێندنى باڵا و توێژینه‌وه‌ى زانستیى حكوومه‌تى فیدرالى عیراق كرد.
له دیدارێكدا دۆخى سیاسیى عیراق و پێشهاته سیاسى، سه‌ربازى و ئه‌منییه‌كانى وڵات تاوتوێ كرا و به وردى تیشك خرایه سه‌ر دۆخى ئابوورى و داراییى عیراق. هه‌روه‌ها په‌یوه‌ندییه‌كانى نێوان هه‌ولێر و به‌غدا و چۆنیه‌تیى هه‌نگاونان بۆ چاره‌سه‌ركردنى كێشه‌كان خرانه به‌‌ر باس.
له دیداره‌كه‌دا كه به‌ڕێز فوئاد حسێن سه‌رۆكى دیوانى سه‌رۆكایه‌تیى هه‌رێمى كوردستانیش ئاماده‌ى بوو، به‌ڕێز سه‌رۆك وه‌زیران به وردى باسێكى ده‌رباره‌ى شه‌ڕى دژى تیرۆرستانى داعش له كوردستان و شكستى به‌رده‌وامى داعش به‌رانبه‌ر به سه‌ركه‌وتنه‌كانى پێشمه‌رگه خسته ڕوو. هه‌روه‌ها به تێروته‌سه‌لى باسى له دۆخى ئابووریى هه‌رێمى كوردستان و قه‌یرانى دارایى و ده‌ره‌نجام و لێكه‌وته‌كانى كرد.
به‌ڕێز شه‌هرستانى وه‌ك نوێنه‌رى به‌ڕێز سه‌رۆك وه‌زیرانى عیراقى فیدرال بۆ به‌شدارى له ڕێوڕه‌سمى ده‌ستبه‌كاربوونى قه‌داسه‌تى پارتریاكى تازه‌ى كه‌نیسه‌ى ڕۆژهه‌ڵاتى ئاشووریى جیهان و گواستنه‌وه‌ى كورسیى كه‌نیسه‌كه بۆ هه‌ولێر، سه‌ردانى هه‌رێمى كوردستانى كردبوو.