د.یوسف محه‌مه‌د سادق، سه‌رۆكی په‌رله‌مانی كوردستان، داوا ده‌كات حكومه‌تی هۆڵه‌ندا هاوكاری هه‌رێمی كوردستان بكات له‌رووبه‌ڕووبوونه‌وه‌ی تیرۆرستانی داعش، چونكه ئه‌مڕۆ پێشمه‌رگه و هه‌رێمی كوردستان به نوێنه‌رایه‌تی دونیا شه‌ڕی دژه تیرۆر ده‌كات له‌پێناو پاراستنی به‌ها مرۆییه‌كان. ئه‌م وتانه‌ی سه‌رۆكی په‌رله‌مان له میانی سه‌ردانێكیدا هات بۆ وه‌زاره‌تی ده‌ره‌وه‌ی هۆڵه‌ندا كه ئه‌مرۆ ١٠ی ئه‌یلول به‌رێوه‌چوو تیایدا به‌یاوه‌ری شاندێك له‌په‌رله‌مانتارانی یه‌زیدی و مه‌سیحی و كه‌مه نه‌ته‌وه‌ییه‌كانی تری په‌رله‌مان سه‌ردانی وه‌زاره‌تی ده‌ره‌وه‌ی هۆڵه‌ندایان كرد و له‌لایه‌ن فرانس تیمه‌رمان وه‌زیری ده‌ره‌وه‌و چه‌ند گه‌وره به‌رپرسێكی وه‌زاره‌تی ده‌ره‌وه پێشوازییان لێكرا.
له‌میانی دانیشتنێكدا، سه‌رۆكی په‌رله‌مان تیشكی خسته سه‌ر بارودۆخی هه‌رێمی كوردستان و شه‌ڕی تیرۆرو ئاواره‌بوونی سه‌دان خێزانی كورد و یه‌زیدی و مه‌سیحی و عه‌ره‌ب، له ناوچه‌كانی تره‌وه بۆ هه‌رێمی كوردستان. سه‌رۆكی په‌رله‌مان ئاماژه‌ی به‌وه‌دا، له‌گه‌ڵ ئه‌وه‌ی حكومه‌تی عێراق ٨ مانگه موچه‌ی فه‌رمانبه‌رانی هه‌رێمی نه‌ناردووه وقه‌یرانێكی دارایی له هه‌رێمی كوردستاندا درووستبووه، به‌ڵام هه‌رێمی كوردستان بووه‌ته لانه‌ی ئارامی زیاتر له ملێونێك ئاواره، بۆیه پێویسته هۆڵه‌ندا و كۆمه‌ڵگه‌ی نێوده‌وڵه‌تی هاوكارمان بن له‌و بواره‌دا."
له‌به‌شیكی تری وته‌كانیدا سه‌رۆكی په‌رله‌مان داوای له وه‌زیری ده‌ره‌وه‌ی هۆڵه‌ندا كرد، پشتیوانی هه‌رێمی كوردستان بن بۆ هه‌نگاونان به‌ره‌و دیموكراسی و پاراستنی مافه‌كانی مرۆڤ."
وه‌زیری ده‌ره‌وه‌ی هۆڵه‌ندا: سورین له‌سه‌ر پاراستنی كوردستان سه‌قامگیریی كوردستان فاكته‌ری ئارامی ناوچه‌كه‌یه
له‌به‌رامبه‌ر وته‌كانی سه‌رۆكی په‌رله‌مانی كوردستان، دوای به‌خێرهێنان، فرانس تیمه‌رمان وه‌زیری ده‌وه‌ی هۆڵه‌ندا وتی " سورین له‌سه‌ر پاراستنی كوردستان، چونكه سه‌قامگیریی هه‌رێمی كوردستان، فاكته‌ری ئارامی ناوچه‌كه‌یه، ئاماژه‌ی به‌وه‌شدا هه‌رچی به‌وان بكرێت هاوكاری هه‌رێمی كوردستان ده‌كه‌ن و هه‌مو بژارده‌كان له به‌رده‌میاندا كراوه‌یه ته‌نانه‌ت بژارده‌ی سه‌ربازیش بۆ پارێزگاری له هه‌رێمی كوردستان.
پێویسته بوترێت ئه‌م سه‌ردانه‌ی سه‌رۆكی په‌رله‌مان و شاندی یاوه‌ری به‌مه‌به‌ستی گه‌یاندنی بارودۆخی شنگاله به دامه‌زراوه به‌رپرسه‌كانی ولاتی هۆله‌نداو رۆژی 7ی ئه‌یلول ده‌ستی پێكرد.
پێشنیوه‌ڕۆى ئه‌مڕۆ 4/8/2014 یوسف محه‌مه‌د سادق سه‌رۆكی په‌رله‌مانی كوردستان، له نوسینگه‌ى تایبه‌تیى خۆى له ته‌لارى په‌رله‌مان، پێشوازیى له وه‌فدێكى ئه‌نجومه‌نى پیران و په‌رله‌مانى ژاپۆن كرد.